It Ends With Us : Chapter - 4

[Tlantlani Fanai]

Ka car atanga apartment thleng tur in darkar chanve vel lai hun ka hmang a nih chu. Min pui theih takin tiin vawihnih lai Lucy ka call a, mahse min chhang thei bawk silo. Apartment chhung ka luha thutthlenga a beng bula phone dah paha a lo mu ar ar ka hmuh chuan ka thin a rim ngei mai.

Ring deuha kawngka ka khar pawp chuan a rawn hawichhuak a. "I chungah enge thleng a?"

Bang chu rinchhanin room lam pan chuan ka bai phei auh auh a. "Ka ke ka ulh."

Ka bedroom kawngkhar bul ka thlen chuan a rawn au vak a,"I call ka chhanloh vang khan tihpalh lutuk! Alex nen kan inbia a! Lo call let leh che ka tum a!"

"A pawilo!" tih pahin ka room kawngka chu ka khar hmak a. Bathroom ah lutin nachhawkna ka neih ho chu ka la chhuak a. Pahnih eiin ka khumah ka mu thla a, inchung chu ka en reng a.

Karkhat chhung he hmunah hian ka awm reng a ngai dawn tih hi ka awi theilo. Ka phone la chhuakin ka nu ka text a.

*Ka ke ka ulh a. That chu ka tha a mahse dawra ka mamawh leitur ho ka lo thawn dawn che ania*

Khumah phone chu ka dah thla a, a vawikhat nan ka hnaiha ka nu lo cheng ve chu ka lawm hle mai. Chuti em em chuan a hrehawm lo bawk. Ka pa thih hnu hian ka ngaina sawtin ka hria. A inthenpui loh vang khan ka rilruah nheina kha a awm miau sia. Ka nu ka ngeina te chu reh teuh tawh mah se ka pa ka ngaihtuah chhuah erawh chuan engmah a la reh velo thung.

Ka pa chunga rilru tha engmah ka pu lo hi a thalo tih chu ka hria, mahse a sual em a tin ni. Ka nu leh Atlas chungah nen.

Ka nu insawnpui leh ka hnathawh inkara building thar zawnga ka buai em avangin a hmaa ka chhiar tawh ka journal ho pawh ka chhiar chhunzawm leh hman tawhlo.

Ka closet bulah chuan kalin vawikhat ka in pai khut a. Vanneihthlak takin ka in man hman hlauh thung. Journal ka lak hnu chuan khumah keng pheiin ka awmna chu ka siam rem a.

Hna ka thawh theih taklohah chuan karkhat chhung chu tihtur engmah ka nei dawnlo a, chuvang chuan ka hun hman dan tur ngaihtuah aiin ka hun kal tawhte thlir let nan hmang ila a tha zawk ang.




.
.
.
.
.
.
.


Ellen Duhtak,

Nikuma Oscar a I host kha TV ka en tawha hmuhnawm ber a la ni ang. Ka la hrilhlo tlat chein ka hria. Vaccuming skit khan zun min chehtir tep leh nghal.

E, chuan vawiinah Ellen zuitu thar ni turin Atlas a rawn awm belh a. Inchhunga ka luh tir vanga min judge hmain thil thlen dan kan sawi phawt ange.

Nimina ka inbual tir hnu khan zanah chuan ka hmuh chhunzawm tawhlo a. Mahse tukin zing khan bus ah ka bulah a rawn thu ve a. Ka bula a rawn thut thlak pahin min rawn nuih a, nimin ai kha chuan a hlim hmel tawh deuh.

Ka pa kawr a ha lai hmuh chu a mak duh lutuk. Mahse ka rin aiin kekawr ho pawh a lo ha tawk a.

"Han ring chhin teh?" a tia. A bang chu a hawng bawk a.

"Enge?"

Bag pakhat hi a la chhuak a min pe a. "Garage a ka chhar ania. A bal lutuk a tihfai sak che ka tum a mahse tui tel lo chuan a fai tha theilo a."

Ngaihthatloh hmel deuha en pahin bag chu ka la a. Ka hriat chinah chuan a la tawng hnem ber tum a ni ang. Bag chu enin ka hawng a. Huan siamna hmanraw thenkhat a ang.

"Suahdur a lei I laih lai kha ka lo hmu che a. A dang i neih leh neihloh chu ka hrelo a mahse heihi tuman an hmang chuangloa chuvang chuan...."

"Ka lawm e,"ka lo ti vat a. Mak ka ti deuh bawk. Lei laihna tur a te chi chu ka nei ve thin a mahse a vawnna a chhiat deuh vangin ka kut a ti pilh thin a. Nikuma ka birthday khan anu hnenah huan siamna tur hmanrua ka dil a mahse suahdur lian deuh leh bawngtuthlawh lian deuh hi min pe ringawt a, ka mamawh loh zawk an nih thu ka hrilh ngam bawk silo.

Atlas chuan a aw thian kharhin zawite hian a rawn tawng leh a, "Gift ang tak tak a nilo tih chu ka hria, lei pawh ka leilo. Mahse thil pek ve che ka duh a. I hriat...kha..."

A thusawi chu a sawi zawh hmain lo bu nghat nghatin bag chu ka suih tha leh a. "School ban thleng ilo la kawl thei angem? Ah na tur ka nei tawh lo a."

Ka kut atang ka bang suih that chu la in a mal chunga a school bag a dah chhungah chuan a khung lut leh a, a bag chu a kuah a. "Kum engzat nge I nih?" a rawn ti a.

"Sawmpanga."

Ka kum ka sawi chuan tlemin a lungnih loh hmel deuh ka ti, mahse a chhan chu ka hrelo.

"Tenth grade ah ami I awm?"

Chhan dan tur dang ka hriat mai loh vangin ka lo bu ringawt a. Mipa hi ka be vak ngailo a, senior phei chu, chuvang chuan tlemin ka nervous ve deuh.

"Khami hmunah khan engtia rei nge kan awm dawn ka hrelo a," zawite hian a rawn ti chhuak leh a. "Mahse school banah huan lamah emaw engpawh tihpui I ngaih chuan ka hman ania, tihtur vak ka nei chuanglo, current a awmlo bawk a."

Ka nui a, mahse a thusawi chu nuihzat chi a ni em tih ka ngaihtuah tha leh a.

Bus kan chuan chhung chuan I chungchang hlir kan sawi a, Ellen. Thil a nin thu a sawiin I show a en ve tawh em tih ka zawt a, I nuihzatthlak atia mahse TV chuan current a mamawh sia a ti leh a. Nuih chi a ni em tih pawh ka chiang chiahlo.

School banah ka rualin a en ve thei ang tih ka hrilh a, DVR ah ka record a hmun ka tihfai laiin ka en thin a. Kawngka ka kalh anga ka nu leh pate an lo haw pawn kawngka hnunglam atanga Atlas chu ka tlanchhuah tir mai anga.

Kan haw hma chu ka hmu leh tawh lo,haw lamah chuan ka bula Katie alo thut hman vangin Atlas chu ka bulah pawh a thu lo a, Katie hnena thu sawn tura ka tih chuan Atlas hi ka duh emaw a tih ka hlau bawk si. A tawngthei sia a thutnaah chuan ka thuttir tawp a.

Bus hmalama a thut vangin Atlas chu a chhuk hmasa a, ka chhuk ve hma chu awkward deuh hian minlo nghak reng a. Ka chhuk hnu chuan a thil dahna bag kha min pe a, zinga TV enpuia ka sawm kha engmah a sawi leh tawh lo a, en pui turah ka inngai tawp.

"Lo kal rawh," ka ti a. Inchhunga min zui luh hnu chuan kawngka chu ka kalh daih a. " Anu te an lo haw chuan inhmuhtir loin kawngka hnung lamah sawn I tlanchhuak mai dawn nia."

"Tehreng mai, lungngai suh," nui deuh chung hian a ti a.

Intur a duh leh duhloh ka zawh chuan a duh thu a sawi a. Eitur ka siam zawh hunah kan in tur nen living room lamah ka chawi phei a. Thutnaah ka thu thla a, ka pa chair ah a thu ve thung a, I show ka play hnu chuan kan tawng vak tawhlo. Fakna ho ka forward a. Fiamthu hun hriat hi mi mize pawimawhna lai tak a niin ka hria. I fiamthu thawha a nuih apiangin ina ka hruai lut chu nuam ka tih phah deuh, a chhan pawh ka hrelo, ka thian a nih chuan tlemin nuamlo ka tihna a bo phah ka rin vang pawh a ni maithei.

I show a zawh veleh chuan a haw nghal a, inbual a duh leh duhloh ka zawt tep a mahse anu te an lo haw a hun tep tawh sia. Bathroom atanga tlanchhuaka engmah ha loa kawngka hnunga a tlanchhuah a ngaih ka hlau ber.

Mahse a nuihzatthlak in a hmuhnawm viau maithei bawk a ni.

-Lily



.
.
.
.
.
.


Ellen Duhtak,

Titehh, Reruns maw? Kar khat chhunga rerun maw? Hun I mamawh ve tho tih chu ka hria a mahse chu aia tha tur chu nikhatah vawikhat aiin vawihnih I show record la. A chanve chhunga tihtur kha a awm belh teuh thei dawn a, rerun kan en a ngaih loh phah dawn a.

Kan ka tih chhan chu Atlas leh Keimah ka tihna a nia. Ellen Show en lama ka partner ber a ni tawh. Keimah ang hian a duh ve che ka ring a mahse nitina ziak ve tur chuan ka ti ngailo ang. A fan-girl tih chi zawk em mai.

Khami hmunah khan karhnih lai a awm tawh a. Kan inah a rawn inbual zeuh zeuh a, alo kal apiangin eitur ka pe bawk a. School bana alo kalin a kawr te pawh ka lo suk sak thin. Buainaah inngaiin ngaihdam min dil ziah a, mahse dawtsawiloh chuan a nuam ka ti. Ka inngaihtuah vak vakna tur atang ka rilru min lakpen sak a, chuanin tlai tin hun hman dun ka chak bawk.

Zanin chu apa alo haw tlai a hna thawh zawhah bar-ah a kal tihna. Anu nen an inhau leh dawn tihna ania, thil thalo a ti leh dawn tihna a ni bawk.

A then mailoh avangin a chang chuan anu chungah hian ka thin a rim nasa thei lutuk. Kum sawmpanga chauh ka la ni a, chenpui reng a la thlan zawk chhan hi ka la hrethiamlo ang tih pawh ka hria, mahse a chhuanlam atana min hman ka duhlo. In atanga chhuahsana rethei tawk leh apartment chhe deuha ka graduate hmaa ramen noodles vel ei mai mai a ngaih pawn pawi ka tilo. Tun ai hian a nuam zawk daih ang.

A au ri ka hre leh tawh. A chang chuan hetianga a awm hian bengdaih tumin ka va chhuak thin a. Ka hmuh laiin anu kut thlak a duhlo a chuvang chuan va chhuah leh a ngaiin ka hria.

-Lily



.
.
.
.
.
.


Ellen Duhtak,

Silai emaw chem chu nei ila ka that chiang ngawt ang.

Living room-a ka luh rual rualin a nam thlu lai ka hmu a. Chokaah an ding dun a bengdaih tumin anu in a banah alo vuan a, mahse a nam thlu chawrh a. A pet tepin ka hria, mahse min hmuh chuan a tawp hmak a. Phun bul bul chungin an bedroom lamah a phei a kawngkhar chu na deuhin a khar sawk bawk a.

Puih tumin anu lamah chuan ka tlan a mahse hetianga a awm lai hi ka hmuh a duhlo thin a. "Ka tha, Lily. Ka tha, kan inhau mai mai alawm," a lo ti nghal vat a.

A tap a, ka pa in a benna vanga a biang sen vek pawh chu ka hmu thei. A that leh thatloh hriat tuma kal hnaih ka tum chuan counter chu vuanin lehlam a hawi daih a. "Ka tha ka tih kha Lily. I room ah va lut leh tawh rawh."

Kal chu ka kal sawn ngei a, mahse ka room ah ka let lo. Kan huan hnung lampang kawngkaah chuan ka tlan chhuak a. Ka lak atanga a inla hrang tlat hi ka thin a rim. An pahnih awmna inah hian awm ve pawh ka duh hrihlo, khua thim vek tawh mah se Atlas awmna inah chuan ka tlan phei a kawngka chu ka kik a.


Inchhunga a che ri hrut ri leh thil a ti tla ri chu ka hria a. "Keimah Lily," zawite hian ka ti a. Chumi hnu lawkah chuan kawngkhar hnung lampang chu a rawn hawng a ka ding lampang leh vei lampang chu a en kual hmasa te te a, min rawn en chuan ka tap tih a hre chauh.

"I tha em?" tih pahin pawnah chuan a rawn chhuak nghal a, ka kawra ka mittui ka hruk lai chuan inchhunga lut tura min sawm loin pawnah a rawn chhuak tih ka hre chiah. Step a ka thut chuan a rawn thu thla ve nghal a.

"Ka tha. Ka thin a rim deuh hlek a. A chang chuan ka thin a rim hian ka tap thin a."

Ka sam chu ka bengah min rawn zeh sak a, hetianga a tih hian nuam ka ti,tlemin ka thinrimna a reh phah deuh bawk. Chumi hnu chuan min rawn kuah a, a dar chu min nghen tir a. Engtinnge tawng miahloa min bengdaih dan pawh chu ka hrelo, mahse a thleng miau sia. Mi thenkhat hi chu an awm ve vang ringawt a boruak ti dai thei an awm a, Atlas pawh hi a ni chiah. Ka pa anglo takin.

Rei ve deuh kan thut hnu chuan ka room light in on chu kan hmu a.

"Kal tawh rawh," a rawn ti sep a. Ka bedroom a anu in min zawng mek lai chu kan hmu thei ve ve a. A awmna atanga ka bedroom a lan chian zia ka hre ve chiah.

In lam pana ka kal chhung zawng chuan kha ina Atlas awm thin lai zawng ka ngaihtuah a, zan thimah ka light on laiin ka kal kual thin em tih te ka ngaihtuah a, room a zana ka hak thin chu T-shirt chauh a ni thin bawk sia.

Chuan hei hi thil atthlak tak a ni bawk, Ellen: tiang ka awm lai chu hmu se tihna rilru ka nei a.

-Lily





.
.
.
.
.
.



Nachhawkna in hna a rawn thawh tan avang chuan ka journal chu ka khup a. Naktukah ka chhiar belh mai ang. Maithei. Ka pa in ka nu chunga a thil tih thin chhiar let hian ka mood a ti off vek thei.

Atlas chunchang chhiar nawn leh hian min ti lungngai deuh bawk a.

Ryle chungchang ngaihtuaha mutthilh ka tum a, mahse kan inkara thil thleng khan min tih thinrim bakah ka hlimloh phah tel bawk si.

Allysa chungchang ka ngaihtuah mai ang, vawiina alo kal vanga ka hlim zia te pawh. Heng thla reilote chhung chu a puihna mai bakah ka thian a nihna hian min pui thei ang. Ka rin ai daihin a hahthlak dawn tlat.