Tiam tlat eS2

[Cck Lalchhuanawmi]

Tiam tlat e
Chapter-7
Ziaktu: Cck Lalchhuanawmi

Ka hnung lam hawiin, u Roa chuan zaizirin ei turin min lo ti a. Ka mittui a tla ringawt.

Ka ei zawh ve leh room-ah ka chho nghal a, u Roa pawh ka hmu tawh lo. Bathroom-ah lutin ka rawmawl ka su a, thisen a lo chhuah ngawt dan hi ka hrethiam lo.

"Zaii", bathroom aṭang ka chhuak a, "I lo bo daih a",

"Ka hmu tawh si lo che a, ka chho daih a nih hi", ka ti a. Thisen chungchang erawh ka theih chhung zêp ka duh.

A hnaa kir leh turin ka lo ti a, mu hahdam tura min hrilhin a chhuak ta a. Ṭhutthlengah ṭhuin thâwk ka la vang vang.

Eng natna nge ka vei le? Vawt leh hnung na leh taksa sâin min tibuai tawh a. Tunah, thisen a ni leh tawh.

Ka kawchhungah thisente hi a pût mawni! Ka hmulthi an ding suau suau, ka hlauin min râp lutuk.

"A ni lo ang", ka ti sap a. Mahse, ka rinhlelhna erawh lian tak a ni.

Zana u Roa lo haw pawh, engmah thleng lo angin ka lo hmuak a. Hotel-a awm kan nih tawh avangin nuam ka ti chiah lo.

In tê taktêa kan awm lai kha ka ngai, khatah kha chuan ei rawngbawlin a hnathawk lo haw kha ka hmuak a, mahni ei rawngbawl ngei kan ei dun bawk.

Hotel-ah erawh, ei rawngbawlsa kan ei a, in pawh ni loin room a nia, tifai tur an lo kal ziah. Kan mutna pindan hi chu keima'n tifaiin, kan thawmhnaw pawh keima'n ka su.

Ka muhil thei lo chu ka inlet ka inlet, khum aṭang thoin pindan kawngkhar hawn ka tum lai chuan ka hrawk zain ka khuh leh bawrh bawrh.

U Roan a hriat ka hlauh em avangin kan puan sin chu chhah thei ang bera thlepin, ka kâ hupin ka khuh a.

Thisen a chhuah leh ka hlau lutuk ringawt, tlema ka zia deuh hnu chuan puan ka la sawn a, ka thaw huai. Thisen a chhuak tawh em lo.

Mahse, puan hi suk a ngai dawn, ka chil rial tlem a kai. Ka hrufai leh thuak thuak.

Pindan aṭang ka chhuak a, dawhkan bawha lo ṭhu ka hmuh chuan ka en ringawt. A hnuah va panin, "U Ro", ka sâwi harh a.

Phelh phangin min en, "Aw, aa, ka lo muthlu a ni maw?",

"Lo mu tawh mai rawh, naktukah i chhunzawm tawh mai dawn nia",

"Lawk aw, a rei tawh lo ang", a ti chu, "Naktukah i chhunzawm dawn nia, zan a rei tawh", ka ti a.

A ṭhutna aṭang ka kaitho lui, pindan lamah ka kai a, thuawih takin min zui ve mai bawk.

"Zanah rei tak tak mengin, zing aṭang hna i thawk leh a, i chau chhe mai ang, tikhan, muhil hmak ang che", ka ti a.

Ka muhil leh thei lawk lo, u Roa muhil chu ka thlir vawng vawng. Ka thih hnaih inrinna chuan min tuam hlup hlup a, min fan chhuak vek tawh.

Damdawi ṭha takin ka ei a, ka hnung na te pawh dam tawh tluk a ni, vawt tiin, ka tlun ngai tawh lo bawk a, mahse, la fam fel chu ka ni chuang lo.

Khuhin min man leh chawt, u Roa hriat lohin ka khuh ṭhin a. Ka khuh apiang hian thisen a chhuak chuang lo, a khat tawk hian ka khuh chhuak ta ṭhin a.

Ka khuhna lamah ka âwm te hi a na vek thei, tumah ka hrilh ngam lo a, ka ṭawngṭai tawp zel.

"Ngati nge i cher tial tial mai le, Doctor hnenah thau theihna damdawi inchawh tir ila a ṭha ang", ka hmaah ṭhuin ka kut pahnih a vuan khawm a.

Ka inthlahrung zawk, "Damdawi ka ei vang ti dawn ila, chaw ka ei ṭha tho bawk sia", tiin chhuanlam ka siam a.

Damdawi ka puh ta daih, ei loh tawp chu ka ngaingam chuang lo. Chhuanlam siamna tur damdawi hi ka hriat chhun a ni rih tlat.

Damdawi ka ei vang a ni lo tih chu ka hre reng mai, ka kawchhungah thisen a pût hi ka ring hmiah tawh.

"Ngati nge i ṭah a, na i nei em ni, i neih chuan sawi rawh aw, min hrilh zel rawh ka tih kha", ka mittui hruin, ka biang a tuai heuh heuh.

Ka hrilh tawp mai dawn nge mawni, ka hrilh chuan engtin nge kan awm zel dawn ka hre si lo.

"Engtikah nge Mall i neih let leh ang le?",

"Han nghak phawt ila, Mall lam kha chu lo ngaihtuah hah miah suh, chuan, 'kan' ti rawh, nangpawh a neitu i ni ve tho alawm", a ti a.

Ka insut faih faih, "I tlai ang, kal tawh rawh",

"Lo mu mai mai rawh aw, hahdam deuhin lo awm rawh", tiin, min chhuahsan a.

Bathroom-ah lutin ka khuh leh vak vak, ka thâwk lam a tibuai dawnin ka hria. Bathroom aṭang chhuakin tui ka in nghek ringawt.

Ka uin min lo phone a, ka pa nen kan inbia, "I damṭha tawh em?",

"Aw, Pathian zarah ka damṭha tawh lutuk, nangni zawk in damṭha em?", ka ti let a. Ka awmdan te hi hrilh leh vek ka chak lutuk.

Mahse, u Roa a hrilh ka hlau nen, ka ngawi ta reng ringawt, "Keini pawh kan ṭha e, hei kum a tawp hnai tawh si a, in lo haw chho dawn nge, engtia awm nge in tum tih hriat ka duh a, ka lo zawt che",

"Ka hre lo le, u Roa ka lo sawipui ang aw",

"Lo haw chhoh loh in duh a nih pawhin a pawi chuang lo a, mahse, Mazai, nau te hi i lo pai ang tih ka hlau em mai, nupa tak tak in ni bawk si lo", ka pa chuan a ti a.

Ka ngaihtuahna a kaiharh zawk ti ila ka sawi uar lo mai thei, kan la innei lo a, nupa tak tak kan ni lo tihna. Mahse, nupa ang deuh thuak chuan kan awm chu a ni si.

Ka pu bulah chuan, "Nau te ka pai miah lo ang, engtin mah kan awm ngai hleinem, u Roa pawhin nupa kan nih tak tak hun a nghak alawm", ka ti a.

Chutia nupa chungchang kan sawi ta mai chu, ka zak ru tlat. Chhungte bula sawi chu a lo nuam miah lo, a bikin nu leh pa bulah ngat phei chuan.

"A ṭha e, nupui pasal ṭhen ve ve tawh ni mah ula, nupa nih tak tak hun hi nghah a ṭha ngai e", a lo ti a.

Ka pawm zawng tak a ni, u Roa pawh insum thei tak a ni bawk. Hmeichhia leh mipa taksa innawk innawk kan ni a, amah zawkin nghah a ṭhat zawk thu a sawi a, kei lah, ka zak zawk.

Ka inbual a, u Roa sawi ang tak takin ka cher riak mai, ka dul râng hi chu Bawihtei vang a ni tih ka hria. A mak ngawt mai, dul râng hma chi ka nih dawn hi.

Kawr bantluan hain ka sam ka thlah a, mawza ka bun bawk, Hotel chhung hi chu a vawt ve ruih a, ka inthuam dan pawh hi a awm ve tho.

Room aṭang ka chhuak a, u Roan ka ei tur cial deuha a siam tir thu a sawi a, ka ei chak tawh lutuk ringawt.

Lift aṭanga ka chhuak chu tu emaw hian min su thlu let tawp, ka tho thuai a, a rui tih a hriat mai, a men dan leh a din dan aṭang tein a hriat, a rim a nam em em bawk.

Chutah, min lo panin min ânkhum ta bawrh bawrh. Bang ka ngheng tawp, Vai ṭawngin a ni a, eng nge a sawi ka hre ve lo.

Min ben tuma a kut lekin min tin uaih uaih a, min kawk sawk sawk mai bawk. Hmâna ka nunhluiah min thlawhpui leh vang vang.

Ka ding mawl tawp, ka mit ka khap fak fak a. Ka khûr dar dar, ka thinphu a rang em em a, ka chawmawlh zo vek tawhin ka hria.

"Zaii, Zaii", tih thawm ka hriat chuan ka meng a. Khumah ka lo mu reng. U Roan min en chhuk run bawk. Ka hmai a chul kual riak riak a.

Min lainat a ni tih a hriat ngawih ngawih, "Eng nge i an?",

"Ka ṭha tawh e", ka ti a. A zawi lutuk a, kei ngei pawh hian ka hre pha chang chang.

Thawh tuma ka inbengkang chu min lo pui vat, "I ṭha tawh tak tak maw?",

"Umm, ka ṭha tawh lutuk, eng nge thleng?",

"Ka lo hmuh che kha chuan chhuatah i lo let reng a, eng nge thleng zawk?",

"Lift aṭanga ka lo chhuak kha zu ruipa pakhatin min ânkhum bawrh bawrh a, ka hriat ngai pawh a ni lo. Hun kal tawha mi ka hre chhuak a, ka hlau lutuk, chumi chu ka lo tlu a niang, ka hre thei tawh lo reng reng", ka ti a.

Ka ngaihtuah zawng ringawt pawh hian min la tihlau, "Cctv aṭang kan en dawn nia, hlau duh tawh miah suh, ka awm tawh hi", a ti a. Bu nghatin ka nuih sak.

Min hruai chhuak a, "Hotel pawn lamah kan ei chhuak dawn nia, Pangpar te kan lei pah ang a, kan lêng kual hrep bawk dawn nia",

"Hotel lam a buai phah zawk ang e",

"Buai lo e, Manager dang an awm alawm, a rukin", tiin, ka beng bulah a lo phun sup.

Ka kut nghet taka a chelh angin nghet tak bawkin ka chelh let ve. Min kalbosan hlau takin ka chelh hi a ni zawk mah.

Restaurant pakhatah kan chawl a, ei ṭeuh ka tum tehreng nen, plate chanve pawh ka ei zo thei lo.

U Roa chu ka nuih tlawn ringawt, ka ei zawh loh chu a ei a, ei lo turin ka ti ve nasa lutuk, "Ka inei thau ang a, ka thau chanve ka pe dawn che nia", thutak fe hian a ti a.

A nui duh ṭhak lo lehnghal. Kan ei man pea a kalsawn laiin ka khuh leh a, thisen ka khuh chhuah lohna a rei ve tawh deuh nen, ka khuh chhuak leh tlat!

Ka thukru leh vat vat a, tui ka in khawlh khawlh. Engmah thleng lo angin ka lo awm.

Muangchangin kawng sirah kan kal a, motor ri chuah chuah leh motor khu lêng tam lutuk chuan namen loin ka hrawk a tiza.

Dawrah lutin scarf a lei a, ka hnar hnuai chin zawng khuhin ka nghawngah a vet kual, "Ti kha chuan, a zia tawh ang", nui sângin a ti a.

A nui hmel te hian min tina, a bula awm reng a, a nui hmel hmuh reng te hi ka duh!

Dawr aṭang chhuak lehin muangchangin kan kal leh a, a kut chu ka hmer vawng vawng.

Pangpar a hmuh chuan bawr nalh deuh hi a lei a, a pawmin ka pawm. A rimtui chem chem bawk.

A hnuah, u Roan min ken sak a, lo kun hniamin, "Pangpar pawh i dawng thei ta", a ti a. Ka en chho a, a nui suk.

Hotel-ah kan let leh a, "I chau awm si a, room lamah chho tlang mai ang aw", a ti a. Ka lo hnial lo nasa lutuk.

Lift nghakin kan ding a, a lo inhawn a lift chhung aṭanga nui ver ver chunga lo chhuak ka hmuh chuan, u Roa kut ka chelh nghet sauh sauh.

Ani pawh a ṭang ru lutuk ringawt, "Heta ka hmu hlawl che chu a va'n mak em em", Awmawmi chuan a ti a.

U Roa ai pawhin ka lo ṭang tawh zawk, "A nih hi mawle, eng nge i lo tih a?", u Roa chuan a ti a. Ka kut a hmer ngawt ngawt.

Pangpar pawm lo ila chuan ka kut pahniha vawn hi nia ka nâp.

"Ka lo zin lawk, nang zawk, hetah eng nge i tih?", Awmawmi chuan a ti leh. Ka mihring mihrinna a chhuak a, ka haw(hua) ngawih ngawih.

Bên chawrh ka chak lutuk, ka awm ve lo ang maiin u Roa chauh a biain a en a, pawisawilo ang maiin a la nui ver ver zui.

"Keini pawh kan zin lawk, kan kal tawh mai ang", u Roa chuan min lo en a, "Lift dang nghak mai ang", a ti a. Ka lo bu nghat.

Ṭhutthlengah ṭhuin a indawm kun a, a bulah ngawi renga ṭhuin a hnungah ka bawk.

Hnem dan tur pawh ka hre lo, a nat dan tur ka hriatthiampui loa, engtiang chiahin nge a tawrh dawn tih lah ka hre lo.

Thinlung kehsawm ang mai a ni, ang mai pawh a ni lo, a thinlung hi a kehsawm!

A phone a lo ri a, speaker-ah dahin, "Lalchhuanawmi", tih leh, "Manager", tih thumal ka hriat chuan Awmawmin Manager hmuh a duh thu a hrilhnaah ka ngai hmiah.

U Roa chu ding chhuakin, "Ka zu kal ang e", a ti zawi sup a. A hreh ngawih ngawih hi a ni ber.

"Lo kun teh", ti sapin, a lo kun chu ka fawp zeuh, "Zela pa hi ka ring tawk, a chak a, a huaisen a, a chakin a huaisen em em a ni", ka ti a. A nui hak hak.

Min kuah a, "Zela pa bulah Zela nu a awm chhung chu, a chakin a huaisen reng ang", a ti a.

Room pawn thleng ka thlah, Pangpar bawr nalh deuh chu pawmin ka mittui a luang ngiai ngiai.

Hotel neitu mah nise, amah tichhe tu hmaah tlawm deuhin a zu awm dawn a, ka ngaihtuah ngam lo zawk.

A sumdawnna an tihchhiatsak hian an tan eng nge ṭangkaina a neih?