ZUAPA

[Duati Hnialum]

"I lo haw tawh a ni maw Mambawih" lo titu ka nu chu enin khawngaihnain ka khat, a hmai ka pa kutthlakna avanga duk deuh te chuan ka tah an tichhuakin ka thinlung hi ka pa huatnain a rum vawng vawng.

Chutia ka nu zawhna chang loa amah ka en reng takah chuan lo kal hnaiin "i dam lo mi? ngah nge i hmel te chu i va nawm loh hmel ve? " tia a mitmeng atang pawha min ngaihtuah zia ka hmuh chuan nui lui sakin "ka tha lawm nu, ka lo ngai hman lutuk tawh che a" tih leh kuah ka ruala, a ni pawn min lo kuah let vatin ka sam chu dim takin a chula.

Chutia kan nufaa kan lo inkuah lai chuan kawngka lam atang chuan thawm rawn awm thutin ka pa ni e he khawvela ka mi huat ber leh min tah tir ngun tu ber chu kawngka atang chuan lo pei lutin "ka ril atam Mawite chaw ei min va siam nghal rawh" tih leh kan thut phah nei ve chhunah chuan thut a ruala. Ka nu chuan hmanhmawh takin ka pa chaw eitur chu siam sak nghalin a thutna bul chiahah dawkan te hungin a chawp sak ta nghala.
Hei hi ka nu nena kan hringnun chu a ni, rethei tawh nak alaiin chhungkaw pa ber chuan ruihhlo tlanin a nupui leh fate riltam taka kan awm thin tihpawh ngaihtuah lo lekin a hrawka lut tur a awm chhung chuan a lawm tawk em em a ni.

Kei hi Hmangaihzuali niin Aizawla veng tla berh ve takah chungkuaa khawsain ka nu hian chawhmeh zuar kual thinin kei erawh school harsa takin min kal tir ve tang tang . Ka pa hi chiah leh tha ka hriat tirh atang ruih loh lai nei ngai lo leh a duatna awka vawikhat mah la dawng ngai loin ka seiliana,a ruih sual changa a kutthak hnawihna kan nufa hian kan ni. A hmingin hna chhe te neiin ruihhlo zunah tang lo chu nise ti em ema harsa tur pawh hi kan ni lo, a hlawh inchhungkhur atana ka hman chu sawi loh ka nu chawhmeh zawrhna atanga a hlep ve thlengin a hmanga, khawsak hrasat loh ngaihna reng a awm lo.

Thenrual te pawh kawm ngam loa min siamtu ka Pa a nun sima a that ve theihnan hian vawi engzat nge Pathian hnenah ka tawngtai pawh ka hre zo ta lo! mahse hei tun thlengin chhan tik ni reng a la nei lo a nih hi!
Kum 17 mi niin pawl sawmpahnih ka ni ve tawha Pathian zarah lehkha ka thiam theiin zirtirtute duhsakna pawh ka dawng nasain ka fee te phei chu kan school in min free a chuti nilo se chu school ka chawlhna hi a rei tawh ang.

Chaw te kan ei kham hnu chuan tifel sawk sawkin mombatti nen chuan lehkha ka zir tana, lehkha ka chhiar mawlh mawlh lai chuan ka pa chu rawn tho phutin ka lehkhabu chu min rawn khup sakin "I bengchheng lutuk, mu tawh rawh" tih leh ka mombatti chhit chu chem hlum a ruala .


Ka nu'n " U Lian, I timak e, fate lehkha chhiar tha hle hle lai khatia I tih" a rawn tih chuan ka pa chuan thinrim takin ka nu panin "Lo inrawlh ve chhen suh, Pa berin 'mu rawh se' ka tih chuan a zawm mai tur a ni " tih leh ka nu chu ben a ruala ,ka pa va man ka tum chuan "E he heeee, mahni pate pawh sual ngam" tih leh ka sama keh chu a ruala chutah ka thinrim chuan "Pa I nihna chu I hre hlea mah se Pa I nihna anga I tih tur pakhat tal I ti em?nang ang pa ka nei che hi ka zakin Pa nei loh pawh ka thlang zawk"ka tih chuan "naupang nghal lutuk"tih leh ka hmaia min ben a ruala, ka nu chuan lo dang mah se ka pa tha ngah zawk nanana chu hneh hek lo min sawisa ta hrep a.


Ni e tu pa in nge mahni fate lehkha zir hmumawh ngai! Mite chuan an fate lehkha an zir theihnan tuition te laksakin ei tur tui tui te hluiin an enkawl thin a. Kei ka pa ve erawh chuan bengcheng min tia a nih chu!
Ka mittui chu ka biangah a rawn luang ta zung zunga. Ka nu chuan "Mambawih, tho rawh le" tih leh min kaitho a ruala khumah chuan muin ka nu chuan "I pa chu a chhuak thawh, nang pawh I pa I chhangleta ,a ruih lai chuan chhang let tawh miah suh sual vaiu mah se I pa nihna a la bo loa khatin mahni pa te an tingai lo a nia " a tih chuan "Nu, ka pa hian Vawikhat tal tawngkam tha leh duat takin min ko ngai lo ,a hnen atanga ka dawn awm chhun chu sawisak chiah a ni" ka tih chuan ka nu chuan min kuah vatin min hnem mawlh mawlha.


Ka pa chu ka tan chuan thi tawh ang maiah ka ngai. Kawnga kan inhmuh pawn ka be ngai loa inchhungah pawh ka be ngai lo chu chuan tithinrim zualin min sawisa nek zel.


Pathian zarah Pawl sawmpahnih pawh tha takin ka zir zoa, zirzawm ka tum tawh lo thu ka nu hrilhin Phaiah chhuka Beautician zir ka duh thu ka hrilh chuan rem a ti vak loa mahse ka tihdeuh tlat avangin rem a tive ta hlauh.
Ka pa pawh zu in nasa ta ngang chu a taksain chhiat pahin a hrisello hlea mahse han ngaihsak vak ka tum lem lo.


Ka duh ang ngeiin Phaiah chuan chhukin Beautician chu ka zira, ka nu'n ka zirna senso min tum sak theih dawn loh avangin catering ah te inhlawhin a rem remah ka inhlawh ve mai zela.


Ni leh thla te pawh ral ve zelin ka zirlai pawh ka zir chhuak ve ta. Kan zirna nu Miss Sharma chuan a hnuaia thawk chhunzawm tura min sawm avangin keipawh ka thawk vea. Hlawh ka neih ve takah chuan ka nu chu thawn ve thinin ka hlim ve hle.


Ka hnathawk zo inah ka haw chuan ka phone chu phawrhin chutah ka nu missed call lo awm tuarin call back nghal vatin chutah ka nu thu rawn sawi chuan min thawng tak zet.
Ka pa he khawvela ka mi hnuat ber tia ka sawi thin thih thu ka nu'n a rawn sawi chuan ka ding khurh hlawk hlawk.


Inchhirna, hamhawihna leh mahni inzahpuina te chuan min rawn tuamin awm ngaihna reng ka hre lo.


Mizo welfare lam leh Miss Sharma ten ka hawna tur min buaipui vel vek avang chuan flight hamsa berah Aizawl lam chu ka pan taa.


Kan in ka luh rual chuan ka nu chuan tap chungin kawngka atang chuan min lo hmuaka.


Ka pa ruang ka han hmu chiah chu ka thinlung hi a kehsawm vekin ka hria, mi nung a ni tawh lo tih hriat zetin a taksa te chu a vawtin a lo khawng luaha. A hmel ka en chuan hmana ka Pa hmel reng hmuh tur a awm ta lo!


Ka pa ruang bulah chuan thuin ka pa ngawt chu ka melha ka tap thei miahh lo chu hreawm ka ti mah se ka mittui reng a thla thei lo.

Ka pa kuang lei hnuaia an dah thlak meuh chuan khur zawih zawihin ka pa chu ka aua ka hnung atang ka tet lai atanga ka kawm ve thin Sawmi chuan min kuahin min tahpuia.
Ni te liam ve zelin, tunah chuan ka pa thih atang karkhat lai a ni ve ta

Ka nu chu ka bulah lo thuin lehkha phek khat hi min lo pein "I Pa'n a dam loh laia a ziah,nakina lo pe tura min tih a nih hi" a tih chuan chu lehkha chu enin ka mittui a tla ta zawih zawiha.

Huphurh taka chu lehkha ka han keu pharh chuan ti hian a lo inziak a

"Ka fanu, he lehkha I hmuh hunah chuan he leiah hian ka awm tawh lo ngei ang. Engtin nge ka han sawi tan ang aw, I pa hi nilo I pa nih tling lo tak hi min ngaidam dawnnia aw. I tetlai atang kei chuan hreawmna chauh ka thlen che a, duat takin ka pawm ngai lo che a mahse maw he I pa lakthlak loh thlak hian ka fanu I nih hi ka lawm thin a sin. Ruihhloin min tihbuai changa innufaa kut ka thlak thin che u kha ka harhfim meuh chuan inchhirnain ka khat thin a, min biak duh lo te kha I pa thinlung hi a rum ve thin a sin! " tih ka chhiar thlen chuan chhiar zo ngam tawh loin ka tap khur ka ngar ngara.

Ka pa kha ka lakah pa chanvo a hlen loh avangin ka dem vaiu thin a nih kha mahse kei a dem tu pawh hian fanu chanvo chu vawikhat mah ka hlen ngai bik lo. Ka lo zahpuiin ka lo haw thin a, vawikhat pawh duat takin ka ko ngai lo. Kei hi a ni misual chu tiin ka awm chhum chuan ka rum vawng vawng a. Ka han chhiar chunzawm leh chuan tihian a inziaha " Bawihte, ka dem ngai lo che i Pa hian i lakah ka mawhphurhna ka hlen ngai loh vang hian ka thih dawn thlengin hreawm ka ti a sin. Biak che ka chaka mahse ka be ngam ngang lo che a ni. Lo inenkawl tha la, I nu hi hamngaihna ka pe lo zamwg zawng kha lo pein lo duat ang che aw. I Pa hi min ngaihdam theih chuan ka awmna hmun chu eng pawh nise hahdam takin ka awm thei ngei ang " tih hi a lo ni a.

Ka Pa lehkha ka chhiar zo chu mahni inzahpuinain ka khat a ni. Ka pa a hnukchhah lai pawh ka dawm hman loh leh engmah ka tihsak ve hman loh avng chuan ka rilruna lutuk hi sawi ngaihna pawh ka hre lo.
Ni te lem ve zelin keipawh ka hnathawhna hmunah thawk leh tawhin taima takin ka thawka, ka nu pawh nitin be thin in ka theihtawpin ka ngaihsak thin.

Kum 5 meuh a ral hnu chuan Aizawlah ngei keima pualin Dawr ka nei ve tawha.Pathian zarah ka dawr chu lunin huang pawh zauh zelin tunah chuan a hmaa Aizawl veng dai kil kar ami kha mite zah ni tawhin ka nu pawh nuam sa takin ka siam thei tawha mahse ka hlimna hi a famkim thei tawh ngai lo a chhan pawh ka Pa ka duat ve hman loh avangin.

Thusawi tura miten min sawmna leh Biakinah ngei pawh ka sawi thin chu Nu leh pa hlutna hi a ni. Ka pa kha duat hman loin kal tir mah ila ka nu erawh duat taka enkawlin ka pa chunga ka tih loh te kha ti vekin chatuan ram min pansan hun pawha inchhirna ka neih loh nan theihtawp ka chuah dawn a ni

"Faten nu leh pate lakah duatna leh ngaihsakna kan beisei ang thoin nu leh pa te pawn an fate lakah an beisei ve thina. Chuvangchuan,I theih lai leh I nu leh pa ten an dam pui lai ngei che khan nasa takin I hamngaihna tilang thin rawh. An thih tawh hnu chuan eng ang pawn hamngaihna tihlan tumin thil tihsak tum mah la I tithei tawh dawn chuang lo. Nun hi a tawia mit khap kar leka thi thei kan nih avang hian hman that tum la, a pawimawh ber I nu leh pa ngaihlu thiam ang che. Khawvel tawp pawh fang chhuak mah la, I nu leh pa thluka hamngaihtu che an awm lo. Pa emaw Nu tia koh tur I neih ringawt pawh kha a hlu tih hria la,Pathian thuin 'Naupang te u, Lalpaah chuan in nu leh in pate thu zawm rawh u' tih hi nunpui hram i tum dawn nia" a ziak tu thubelh.

A TAWP TA.