The Feared Crimson King 34

[B.laltlanhlui]

Alice POV

Ka ṭawng thlamuan thei ang em le? Ka beiseina hnuhnung ber a ni tawh maithei a ni

"Aw Lalber?" Ti a ka han koh chuan min chhang miah lo, mahse a kutah chuan engemaw a keng a, han en chian chuan chemte a lo ni

Ka lungphu a rangin ka luak te a chhuak vek
"Inbia ang aw, a pawi lo tiraw?" Ka bân chu ka phar chhuak a

Kailawn tawp ber a rawn thleng a, feet thum chiah in kan inhlat tawh ang

"Tehreng mai" tih pahin a chil a chhak a, "Inbia ang hmiang" tih leh chemte hmawr lam chuan ka bekbawr ah a rawn tin a, min hnawl kiang leh in chhuatah chuan ka tlu khut a

"NANG MI NUNRAWNG RAPTHLAK PA" Parcival chuan a kut thlunna chain khawng ri in anchhia a lawh bawrh bawrh a

Ka lu a hai nasa in a na ngut ngut mai. Ka rum chhuak nghat a 'aargh' tiin a rawn ri chhuak ve a

Ka chal aṭang chuan thisen lum pup a rawn luang a, ṭhut chhuah ka tum mek bawk

Lal chuan min rawn chhuk en a, a mitah tak ka han en chuan ka hmu chiang ta, ka hmuh hmasak ber ni ang mai kha a ni. Huatna bak a mitah chuan engmah dang a lang lo

"Vawi khat pawh i kut hmawr in han tawk leh teh, ka khawih ve ngei dawn che ania" tiin Parcival chuan a vau leh a, a thinrim lutuk chu a hmai a sen vek. Mahse Lal erawh chu a zam phah eih lo

Min rawn melh leh khui khui a, ka hmu phir vek. Hahdam taka thawk lak ka tum a "I ṭawng hman tawh em?" Ti a min rawn auh leh hnuah Parcival awmna lam a pan a

"Khawngaihin tawp rawh" ka lu na chung in ka au leh hram a

Chhuata Parcival ṭhu chu a awmah a ṭham a, bangah nawr bet rawkin a hrawkah chemte in a tin a, Parcival chuan chetna hun a nei lo re re, a pian dik ve viau mahse lal lakah chuan tehkhin chi a ni lo, bakah hliam nasa tak a lo tuar bawk nen

"Vawi hnih ka zawt nawn dawn lo che ania" tih leh Parcival hrawk ah chemte in a thai zeuh a, ka unaupa chu a ngawi hmak a, mahse lal chu a melh rum lutuk ringawt

"TUNGE I NIH?" A rawn tih leh chuan ka mittui leh thisen chu a inpawlh nuk mai. Ka lu na lutuk hi a puakkeh ṭep in ka hria

"Lal fanu" ka ti zawi sap a

"ENG A?!" Lal chu a thinrim thar ngei mai

"Lyria lal fanu ka ni!" Ka au leh a, Lal chu mak tiin a meng zau kawk a, ka lu chu a rawn tur leh ut ut a, ka han dawm leh vang vang a, ka kutah thi a kai nual mai

"Nangmah hi maw? Thil atthlak lutuk anih chu! Eng vangin nge Lal in hetah a rawn tirh phal ang che?" A ti a

"Ka htilh tawh che kha, inzawmna hi a ring tlat alawm" ka ti chhuak ṭawk ṭawk a

"Alice!" Parcival chu Theodore a'n a vawnna lak aṭanga tal chhuah tumin a rawn au ve bawk a

"I sawi awmzia chu ka lalram ah hian lal ka ni tih hre sa in i lo lut tihna tiraw?" A ti leh a

"Ni e, inzawmna hi ka ring ve tho a! Khawngaihin ka unaupa kha kaltir hram rawh" ka khaw hmuh chu a fiah tawh lo chungin ka dil hram a

Lal chuan min rawn en leh a, ka unaupa en ve leh in "Kan la hria ang chu Alice, chu chu i hming tak a ni reng em pawh ka hre lo" tih leh Parcival a tin na chu lak thlak a rual a, thlan chuan a rawn bual a, chutah a thawkna dawt ah a tin leh vang a

Beisei bo takin ka lo thlir a "Thuruk dang i la nei em?! Dawt min hrilh tawh suh ang che!" A ti a

"Awm lo!" Ka ṭap chhuak hawk a
"Alice-i chu ka ni ngei e, Lyria Lal fanu ka ni a, chumi tih loh thil dang kha chu a dik vek. Ka ngen a che, ka chungah i thinrim chuan min tina mai rawh, midang tina lovin" ka hliam chu ka dawm leh a

"Ni lo, ngawi rawh!" Parcival chuan min lo au a, a hliam tuar nen a ding rei tawh bawk si chu a hmai a dâng lap a

"Eng infiamna nge khelh in tum?" Lal chuan biak bik nei lovin a au a, a nui ṭep in ka hria

Parcival chu chhuatah a theh leh thlawp a, kawngka lam a pan a, ka unaupa nen chuan kan inmelh zawk a, thil thleng tur kan hriat loh em vang a ni

"Nang kha" Lal chuan vengtu pakhat chu a kawk a "Tan inah khung rawh" a tih chu ka hriat tawp ber a ni. Parcival bulah kal ka tum lai takin vengtu pahnih hian hmun dangah min hruai daih a

Parcival mit aṭang hlauhna a hmuh thei, a rawn phun sup a, a thil sawi erawh engmah ka hre lo. Thil chu a ri mum mum a, bân tha chak tak pali in min chawi sawn a, parcival chu ka hmu te telh telh

Kailawn ah kan chho a, ka lu na lutuk chu ka mit ka chhing vang vang a, bei let tur pawhin chakna ka nei lo

Rei pawh kan kal lo, tanin thim mup ah chuan min awm tir a, ka kut veilam a na ut ut bawk

An kalh fel hnu chuan thimna leh khawharna chuan min tuam mup a, ka che sawn eih lo, chhuat vawt raih ah chuan ka thaw sek sek a, ka thisen la chhuak pawh chu ka hria

Ka na a ni. Ka hriatna te hi a dul vek, ka mu chung chuan engkim hi a vir muai muai a, mit chhin ka tum leh ka luak a chhuak zel bawk si chu ka meng leh ringawt

Ka lu chu a na leh fek fek a, ka bân rek hi ka herh a ni maithei mahse ka thinlung na nena khaikhin chuan nep te a ni. Min haw em em tu ka hmangaih a, ka va in khawngaih tak

Chu aia la ṭha lo leh zawk chu amah hmuh ka la chak tlat leh insawifiah ka la duh ṭalh hi a ni. Thil engkim hi siam ṭhat a, zanriah ei dun leh te kha ka chak zek zek

Mahse chu chu thil theih a ni ngai lovang. Chu thil chu ka hrechiang a ni. Engmah ka nei tawh lo tih ka hrethiam. In ka nei lova, hmangaih tu pawh ka nei lo, nun chakna pawh ka nei tawh lo

Ka tha zawng zawng pawh a zo vek. Parcival awm lo se chu ka chunga thleng engpawh ka pawm thei ang. Ka ṭap nasa lutuk bawk chu ka chau zo vek. Ka na tawrh hian min tiharh thei tawh ang em?.....

****

Chhunzawm tur