The Feared Crimson King 31

[B.laltlanhlui]

Alice POV

Rorelna room ka va bih leh dek dek a, ka chhungte an tel ngei em tih ka hriat ka chak hle a ni. Mahse ka ringhlel ve deuh tho, engmah hre lo anga ka lan a ngai

Ka pindanah ka let leh a, tu nge anih hriatchhuah ka duh hle mai. An lo hresual ve thei tho ania. Sipai bel sang deuh chin, a hmatawng a awm pawh a ni ve thei tho asin

Ka kuttin ka seh mial mial a, room ah ka tei kual sek. Tanina ka thawh leh hunah ka hrechhuak thei tho bawk. Parcival chu ni lo se ka ti hle mai. Ka ngaihtuah let leh pawh hian a pian velah khan a ang ka ti viau mai. Mahse thisen in a bual khat vek bawk sia, hriat chhuah a har ve deuh

Pindan pawn lam aṭang Lal chuan kawngka a rawn hawng a "Alice!" A rawn ti a

Ka hming a lam hi chuan ka hlau deuh hlek ṭhin. Thil tihsual ka neih awm ka hre miah lo, ka nihna a hrechhuak chu a ni em lovang chu maw?

"Eng nge ni ta? Aw Lalber" a pindan ah ka va lut a

Min rawn hnaih pahin a nui ver ver a, boruak ah min vawrh vir chho a "Alice tereuhte, indona chu hneh tluk kan ni ta!" A ti a

A hlim lutuk leh inringtawk lutuk hi lawmpui ka chak mahse chumi awmzia chu ka chhungte zinga mi a man tak tak tihna a ni dawn si a! A bân in min kuah a, lawm lutuk hian "Lyria lal fapa kan man" a ti a

Ka nghilh nghal dup mai, a âwmah ka hmai ka phum avangin min hmu thei lo hlauh. Thil theih a ni lo. Ka unaupa hi ka chhan ngei a ngai. Ka mittui tla tur hi ka dang thei hram

"Tunah chuan Lyria hian an thiltih man an hmu tawh ngei ang. Lalnu leh Lalpa chu ka hmaah inpe turin ka la siam ang. Ka lam ṭan an duh chuan ka dam tir mai thei" a rawn ti chhuak a, min han en chiang in min nuih sak a, ka lo nui lui nasa mai

"Thil dik lo a awm em ni?" A rawn thutak leh ta viau mai

"Ka chhungte ka ngaihtuah deuh hlek a, an chenna hmun te kha a chhe vek dawn si a" ka ti a, dawt ka sawi pawh a ni chiah lo, ka sawi chiang duh lo mai chauh a ni

Lal chu a rawn pangngai leh deuh, min chelh nghet sauh a "Ka hrethiam alawm mahse ngaihdan ka nei. I chhungte chu helai hmunah hian ka rawn hruai ang. Eng nge an hming?" A ti a

"Byron" tiin dawt ka sawi a
"Helai hmunah hian i rawn hruai tak tak ang maw?" Ka ti a

"Tehreng mai. Mahse lungngai suh, ka tana rinawm an tiam chuan mi awmthei takah ka siam ang. I chhungte an ni miau a" a tih lai chuan ka lo nui sen sen a, lawmthu ka hrilh pah bawk

Zahngaihna a ngah hle mai. An rawn chhuahna hmun pawh a hmuh kan thei nia mawle, mahse Lal chhungkua an ni tih hre ngat se chu a hua/haw ve viau ang le

Zanriah kan kil laiin Theodore leh Jaxon a patea'n a rawn tlawh tur thu min hrilh a, Lal Theodore chuan amah hmu ngei turin min duh si a, Lyria aṭanga lo kal ka ni tih hrilh lo turin min chah lawk diam bawk. Engemaw boruak chu a awm tlata hriatna ka nei

Zanlai a ni veleh chuan khum aṭang ka tho vat a, Parcival hmuh tumin ka tho ṭhem ṭhem a, ka mut a chhuak ngang lo a ni. Risk a sang viau nan pindan ah chuan a zawi thei ang berin ka dingdihlip a, Lal pindan ka pelh hnu chuan vengtu an lo awm lo hlauh a, hallway pawh a ruak hiau mai

Zawi thei ang berin ka hawi kual zak zak a, min lo hmutu an awm vaih chuan Lal hnenah an sawi ngei dawn sia, ka chhuah chhan hi sawifiah a har dawn em mai. Mahse pawi ka ti lo, tun huna pawimawh ber chu Parcival a dam ṭhat leh ṭhat loh a ni

Tumah min hmutu an awm loh avangin tanin kawngka ah chuan ka lut leh zal zal a, tun ṭum chu vengtu an lo awm tlat mahse vanneihthlak takin a lo muhil hlauh a, a hnâr ri suk suk chuan beiseina min neih tir a, ka kal pel thei hram e

A chhungah ka han lut a, ka thin a phu nasa hle bawk. Ka thlan a rawn bawl ṭiam ṭiam a, kawngka chu dim tein ka khara, an mi man khawm te awmna ka pan a

Parcival an man tel ve anih chuan khawiah emaw hian a awm ve ngei ang. Tanin hi thir tlawn a siam a ni lova, lunga siam vek a ni. Luhna pakhat chauh a awm a, chu chu thinga siam a ni ve thung

Pawn lam aṭang chuan thingphel zau tak maiin a kham phei zuar mai a ni. Eng ri mah ka hre lo bawk. A reh duk mai a ni. Tumah an lo kal lo aniang. Tukverh tereuhte aṭang chuan ka va bih a, kawr ṭial ha zinga mi kha ka hmu a, a thim tawh viau na in hallway ah chuan meichher a lo de ve ve a, pakhat chu la zeuhin thir kawngka chu ka pawt a

Tanin chhung ka luh hnu chuan a thim in ka meichher ken chuan kailawn hnuai ber mi man te ho awmna chu a en thleng pha lova, ka hawi kual leh hnu chuan mi pakhat chu a bân rek ceiling nena thlunzawm in a lo awm a

Ka va kal hnai a, midang pawh an la ni thei tho tiin ka la inhnem ṭang ṭang. Parcival ni lo se ka duh hle a ni

"Hello?" Ka ti zawi sap a

Chu pa chuan min chhang lova, zawimuangin a rawn hawi chhuak a, a mitah tak ka lo en a

"Parcival!" Ka au ring ṭep, ka hmui ka hup leh a

"Al-Alice?" A rawn ti lawi rut a, ka va tlan a, ṭhingṭhi in ka kuah thlawp mai

"Kan inhmu leh thei chu ka va lawm em!" Tiin ka ṭap chhuak a, ka unaupa duhtak ka han kuah leh theih hi ka lo beisei tawh lo. Kan intawng leh chu a lawmawm mange mahse ka thil hlauh ber kha a takah a rawn chang tihna a ni

****

Chhunzawm tur