U ZIRSANGZELA (Short Story) By CVL.Awmpuii

[CVL Awmpuii]

U ZIRSANGZELA
By CVL.Awmpuii


Ka room kawngkhar a rawn rîk rak rual chuan "Û..." tih thâwm ka hre zui zat a. Ka chhang chiah Lawmkima chu rawn lutin a lu hiah nauh nauh pah chuan inthlahrun hmêl zet hian "Thinrim lo la U Zela a lo kal" a ti a. Thinrim lo turin min ti lawk sateh mah se ka thin a rim nghal ṭun thei. Ka hmêlah a lo lang chhuak leh hman tawh a ni mahna "Anu va ko rawh a tia" tiin Lawmkima chu ka hauh zui hlau zet hian a chhuak leh nghal daih a. Thinrim ṭun in ka bula lukham chu ka ṭham vak ringawt a. Mipa chu ni ngat ila bang te hi ka hnek ve chawrh chawrh ka ring. U Zirsangzela ka hnê dân em em hi chu tih ngaihna vak pawh ka hre tawh lo.



Laltluangkimi ka ni a, kan unau zinga upa ber dawttu niin tunah hian ka kum 18-na ka hmang mêk a, ka Nula ve ṭan ék ék tawh dâwn tihna anih ber chu. Ka Nu leh Pa te hian min la dam pui a, ka Pa hi sawrkar hnathawk niin ka Nu hian puan a ṭhui ṭhin a. Kan vengah chuan chhungkaw khawsa ve thei pawl tak chu kan ni. Kan upa ber hi phaiah lehkha zirin a awm a, ka nau mipa te pahnih leh ka Nu leh Pa te nen tunah hian kan cheng ho mêk a. Unau zinga hmeichhe awmchhun ka ni a, duat rawn ka hlawh ve viau. Mahse hmeichhe no leh ti dîm dem ang chî kha ka ni vak lo hlauh a, enkawl ka harsa vak lo. Tunah hian college kal turin ka inbuatsaih ve mêk a. Rilruin a tin zawn dân chuan ka û bulah phaia zir zawm ve ka duh a. Mahse ka Nu leh Pa te hian min awm hran tir an duh vak lo niin ka hria. Ka sawi ve úk tawh a, an phal loh thû sawi dawt lo mah se "Phaia indah chu inngaihtuah a na sia, nang phei chu hmeichhia i ni bawk si a. Mizoram zirna in ṭha tak tak pawh a tam ve tawh tho a" tiin min chhang daih a. Ka la sawi pui leh rih ta lo kha ania.




Ka Nu in sitting room aṭanga min rawn auh leh tâk lang langah chuan ning zet hian ka tho a. Engmah ngaihtuah mang hlei lovin ka khum chu ka'n chhir ngawt pek a, a va han na mai mai tak. U Zirsangzela vang vek a ni. Vawi tam ka duh loh zia ka tilang tawh chung pawhin a hrethiam lo nge a hrethiam lo der pawh ka hre tawhlo, a beidawng duh ṭhak lova, min la hêl char char chu anih ber hi.



Sitting room-a ka va phei rual chuan ngainat awm zet hian min lo nuih suk a, ngai pawimawh lo zetin a epah chuan ka ṭhu tûm luau a, ka nui lui peih vêl lo. Ka chhungte nen an titi na karah chuan ka lo ṭhu ngawi ve reng a. Ka lo awm ve kher chu a ṭul na ka hrelo khawp mai. Ka Nu in thingpui lum tura min tih takah chuan ka tho rang teh e.



U Zirsangzela thingpui turah chuan hmarcha pawlh mai ka nâp, mahse ka ti ta êm bîk lo. Min rawn hêl reng lo sela chuan heti em em hian ka hnê bîk miah lovang mawle. Thingpui chu tray-ah chawi in ka va chhawp a. Min lo nuih reng lehnghal a, ka hnê hluah hluah a ni tawp mai.



Ka chhungte an mut fel thleng chuan a lêng ta reng a, hei chu a tih loh dân pawh a ni lova, ngaiah ka nei lek lek tawh. "Khawiah chuan maw college zawm chu i duh a?" a rawn tih chuan " Ka û bulah" ka lo ti tawi tâk a. A bu nghut nghut a, "A theih phawt chuan phai lama awm chu a ṭha alawm, mihring hian environment thar hîp kan mamawh ve a. Mahse Mizoram zirnate pawh hi a ṭha ve tawh viau asin, Mizoramah hna kan zawng leh dâwn tho tho anih phei chuan mahni ram ngei a zir zawh hi a ṭha mawle" a ti luam a. Ngei viau mah ila a ngaihdan pawh chu ka thlawp ve reng.



U Zirsangzela hi chu la upa lutuk lo mah se a nungchang leh nihna te'n a zir êm avang hian vengchhungah pawh mite zah kai leh râwn kâi a ni ve a. Kei ngei pawhin ka têtlai kha chuan ka ngaisang thei lutuk. Mahse tun hnu hian ka haw thar ngawih ngawih. Ka laka a rilru puthmang vang vek hi ani ka ti lo theilo. Thla ruk liam ta a min duh thû a sawi hma kha chuan ka la hmù pangngai ve viau asin mawle. An chhungkua hrim hrim hi mi ṭha chhungkua an ni a, zirna lamah pawh mi bawn tak tak vek an ni. U Zirsangzela ngei pawh hi kum naupangtê in Ph.D degree a nei der tawh a. Sawrkar zêm zen a la ni zui, tlangval kum 30 râl pawh la kai lo thiltih atân chuan bawn ka ti viau mai. A la naupang ka ti thla zen na in kan rual û daih chu a ni tho a. A kum phû lovin sulhnu ṭha a hnutchhiah hnem tawh.



A lo lên chhung zawng chuan zawhna chi hrang hrang min zawt a, a tawp lamah phei chuan ka chhang ṭha peih tawhlo. Ka ning tlat zel alawm. Haw mai a tum loh avang chuan mutchhuah hmel deuh hian ka hâm der leh ṭhin a. A hrethiam leh pek lo nge a hrethiam lo der pawh ka hre leh tawhlo. Min fuih sauh sauh a, thu ṭha tinreng min fah leh mawlh mawlh tawh mai. Dâr 10 pelh hretah a haw ta chiah a, pâwn thleng pawh ka thlah peihlo. Ka ṭhut hmun aṭangin "Muttui" ka tia, ka duhtawk viau mai. Whatsapp lamah min rawn chhut zui loh hram ka beisei.



Tukṭhuan ei laiin ka Nu in min zilh leh pek a, U Zirsangzela lo be ṭha tur leh a tan awm nuamlo tura awm tawh loh turin min ti a. Ka rilruin ka chhang lêt mawlh mawlh mai. Ka Pa takngial paw'n "A duh ve tak tak che aniang, ngaihzawng neilo rual pawh i ni tawh lova. Zela phei chu a fel si, i tân a ṭha ang" min ti ve teh khiah a. A sawi dik reng, U Zirsangzela chu a fel alawm, mahse ka mipa duh chî a ni thlawt lo. A fai ser sawr lutuk te hi ka ten tlat. Mipa inchengvawng lutuk ang chî hi chu ka ti thei tlat lo. U Zirsangzela ngat phei chu a khirh hmêl si, a pianphung leh hmêl en tawp chuan a ṭha a, a ṭha mah mah zawk a ni. Ngaizâwng tu pawh an kat nuk tih ka hria. Mahse keimahah hi chuan a thawk na teh chiam lo, ka ten hle a nimai.



Ṭhianho kan titi khawm te hian kan mipa duhzawng te kan sawi ve ṭhin a. Keichu mipa fel leh inchengvawng lutuk hi ka duh ngai miah lo. Mipa sual ka duh chu ka ti hauh lo, mahse mipa fel lutuk, mi zawng zawngin fel an tih ang chî hi ka duh ve lo. Mipa hi chuan zu in ve zeuh zeuh thei se, meizial han pak khu luih luih zel bawk se. Ngêng ngal mai sela, a ṭul tâwpkhawkah lo chuan ṭawng mai mai lo se. Mi zawng zawng tana nêlawm loh, ka tân chauha nêlawm nise. Mipa dang ka hnaih ringawt pawha min hnek pawp duh tur ang chî, chutiang mipa chu ka duh zawng an nia. Ka ṭhiante chuan mãwl min ti ṭhin "Toxic relationship neih chiah i hmabak" min ti a. Mahse chu chu ka duhdan a ni ve tlat. Inngaihzawnna kawngah hian tluang vak lo ila, a hlu bîk riau turah ka ngai tlat zel.



Ngaihzawng nei ngai lo tawp chu ka ni bîk lova, naupan ât lai chhût tel phei chuan ka kum phû lovin ka hûng ve thluah tawh. Mahse ngaihzawng tak taka ka chhiar chin chu mi pahnih chiah an la ni thung. Class 10 ka zirlai khan kan class ami ve tho pakhat nen kan inngaizawng ve ngei a, mahse kum khat êm pawh kan inngaihzawn hma in min lo kawp tih ka hrechhuak a. Ka tlâwm lâk zawng tak a ni a, ka ṭhen nghal hmak. Khapa kha chu a lerh ve hrim hrim a, a sual thiam ṭhin viau bawk. Mahse a hunlai khan pâ ka ti tlat a, ka nihpui ve tawp kha ania. Pakhat dang leh class 11 kum tâwp lamah ania, ka bialpa hmasa mize lêt thawk ang kha ani thung a. En tawp chuan hmeichhe ngaihsak hmêl pawh a pu lova. Mipa dam thlup mai, nghet ṭha cherh chawrh tak hi ania. Zirtirtute pawhin an fak ṭhin viau, kan classmate mipa dang ho pawh khan an zah ve ṭhin hle in ka hria. Ṭhiante'n min duhpui êm a, ka nihpui ve ta rawih kha ania. Mahse ka duhzawng ang mipa kha a ni miau lova, ka lo fel zawk zawk lo bawk nen min zilh a chîng êm a. Ka tâna ṭha tur pawh nise ka ngai thei ta tlat lova, ka ṭhen hmak kha ania. Tun thleng hian min lo la biak zeuh a chîng ṭhin a. Ka úksak peih tawh der lo thung. A duh ang tak hmeichhia kha tawng se ka tihpui khawp mai.



Tunah tak hi chuan U Zirsangzela chauh hi ka buaina laimu chu a ni tawh mai. Kei lo midang an tam tehlul nen min la hêl ve ngar ngar chu ania. Kei lah hian tlawmngai paw'n ka ti lui thei ṭhak silo, ten lamah a kal tlat zel. Mi a pak hluak pawh a ni chuang lo, ka ten laklawh hrim hrim a ni ber.



Chhunah ka ṭhiante an lo lêng a, têttê aṭanga inkawm chho ngar ngar kan ni hlawm a. Kan in hi thil tih ho nan ber kan hman ṭhin avangin kan inah chuan mikhual tawhlo tak an ni. An lêng halh mai.



Eitur siam hma in ka room-ah kan awm khawm a, mi panga chauh ni mah ila kan bengchheng leh tawh khawp mai. U Zirsangzela chungchang min zawh chuan a lo la lên char char thû ka sawi a, min nuihzat nasa mai. Ka ten zia an hria a, a chanchin hi min sawi luih pui vak vak zel. Anni hi chuan min duhpui a, fel pawh an ti viau. "I phû loh tehlul nen i duhlo ve khanglang a" min ti nghe nghe a, mahse ka phû lo hi ka lâwm zawk. Ka duh miau si lo a ni.



College kal chungchang an sawi chuan ka nguai nghal vek thei. Ka chhungte hian tinge phaia ka awm chu an phal ve mai loh? Ka ṭhiante'n phaia zawm vek an tum laia zawm lo bîk nih chu ka duh bawk silo. Hmin dân kawng hram ka ngaihtuah a ngai a ni.



Chhunah chuan Noodles leh Momo kan siam ṭeuh a, ei kan thei tlâng bawk a kan ei fai hneh ngang mai. Ka Nu in ka naute ei tur dah ṭhat sak tura min tih pawh chu kan ei zo vek a. A dang ka siam sak leh mai aniang chu. Ka ṭhiante chu tlai eirawngbawl dawnah an haw ta chauh a. Ka duh loh zia hria in U Zirsangzela min chhaih lui vak vak a, kan insual lo chauh a ni.



Zanah chuan a ngai tê in U Zirsangzela a lo lêng leh a. A lo lên chhan ka ni ve bawk nen room-ah lo tawm bosan ngawt thû a awm silo sitting room-ah chuan kan ṭhu leh ṭhap tawh a. Ka Nu leh Pa te nen politics kaihhnawih sawi in an titi bawrh bawrh a. A thusawi reng reng hi a fing felfai thlup zel mai a, duh lo viau mah ila mi ngaihsanawm a nih zia hi chu ka pha thei bîk lo. Ka chhungte an mut fel hnu chuan kan pahnih chauhin kan ṭhu leh ta rân a. Dik tak chuan midang an awm loh hi chuan haw nghal vat zel se ka ti ṭhin khawp mai. Ning viau mah ila ka hnar haw ngam bîk ngawt si lova, ka tuar ve tlawk tlawk zel chu anih hi.



Phone ka khawihsan mual mual lai chuan "TluangTluang" a rawn ti hluai a. Ka va melh chuan mitmeng tak rûn hian min lo melh a, a ngawi leh daih lawi a. "Eng nge?" ka tih nghat takah chuan a rawn ṭawng chhuak veleh chauh a. "Thil hrethiam rual i ni tawh a, i laka ka rilru puthmang pawh tlang takin ka hrilh tawh che a. Ka theihtawp chhuahin hnaih che ka tum a, ṭan pawh ka la nasa. Engmah ka hrethiam lo emaw i tih lai hian ka hrethiam vek ania. Min hnaih thei miah lo mai hi mak ka ti viau tawh ania. I tan eng eng nge ka tih ngai dâwn sawi rawh. Hetia awm ringawt lo hian min zir chiang ve ta che" a ti duah a. A thutak viau bawk.




Chutiang teh tawl a thil a rawn sawi avang chuan ka hamhaih lek lek a, mahse ka ngei leh viau tawh. Chêt zia in ka duh loh zia ka lantir tâwk tawh viau in ka hria a, a hai loh thû a sawi bawk a. Chutiang anih te chuan inthiarfihlim mai se kan hlim ve ve nimai tur. A ṭawngkam mal tin chuan amah ngei zual na leh ten zual na min thlen ti tawp mai ang.



Tunah chuan rilru ka siam fel ta, chiang fek fawk in hrilh tawp ila kan felfai a nimai. "Ka duh lo che" ka ti ta tawl a. Mahse ka beisei loh zet hian a rawn nui chhuak huk a. Ngai pawimawh duh bîk lovin "Ka mipa duh zawng i ni lo, ka duhlo che" ka ti leh ngat a. A rilru tih nat sak chu ka hreh lo ve khawp mai. Hetianga tlang taka sawi mai hi a tan pawh a fair zawk daih ang.



"Ok" tiin a tho vut a, phawk zetin ka han melh chho a, a che chhuak vut chuan min ti hamhaih deuh a ni. Chiang zeta min melhin "I chiang chiah maw?" a rawn ti tak leh rûn a. In ngaihtuah buai ka ngai lo, "Chiang e" ka lo ti nghet ve charh a. "Ok, hlim ang che" tiin min chhuahsan zui nghal daih a. A beidawng ve tak tak ta anih hmêl, ka thaw nghal huai thei nia mawle.



Pathianni tûk a ni a, inkhawm tura ka insiam mawlh mawlh lai chuan ka phone a rawn ri a. Ka ṭhiannu Lalrami a lo nia, ka lâk rual rual chuan "Whatsapp kha en vat teh" a rawn ti nghal a. Thu thar lâm tak, ṭangkai em em si lo a hre leh tawh a ni ngei ang. A pawimawh leh dâwn lo tih hrechiang viau mah ila whatsapp chu ka en nghal a. U Zirsangzela leh hmeichhe pakhat ding dûn lai thlalak hi min lo thawn a. Inhmatawna dingin induh hmêl takin an inmelh a, an innuih sâng lehnghal a. A hmeichhia chu hmêlṭha tak a ni. Ka hmêl nen khaikhin phei chuan hmêlṭha tak a ni ringawt. Chutia ka en lai mêk chuan Lalrama bawk chuan min lo call leh a. "I hmù em?" a rawn ti nghal tawng a, "Hmù e" ka lo ti ṭha ve mai a.



"Engtin emaw i awm ve tho em?" awmze nei deuh hian a rawn ti a, a nui har har lehnghal a. Min tih el lui vêl nge pawh ka hrelo. "Engtin nge ka awm vak ang a, a ho emai a" ngaihsam hmel zet hian ka lo ti hmak a. Dawt ka sawi chiang khawp mai. Phone ka dah rual chuan ka âwm ka dawm vang vang a, dik taka sawi chuan ka danglam chiang alawm. U Zirsangzela ka va duh ta tihna lam ni lovin kha leh chen min lo hêl ve tawh a, min rawn birh tlut tlut a. Ka hnawl na tak tak kha kar khat vêl a liam awrh chauh a ni a. Chutianga awlsam lutuka midang a pan nghal thei mai chu mak ka ti a. Ka thin a thip ve zawk chuan ka hria. Mahse ka thîk chuang hauh lo thung. A tlâwm thlak deuh e tih mai loh chu!



Zan inkhawm banah U Tepuii a lo lêng a, ani hi ka first cousin a ni a. Kan cousin zinga upa ber a nih bakah pianpui unau tak tak a neih loh avang hian nau ang tak takin min en a, min duat hleuh hleuh viau bawk. Ka dik lohna ah min hau hreh ngai lova, fak ka ngaihna ah pawh min fak hreh miah lo bawk.



Ka room-a kan inzui luh rual chuan U Zirsangzela chungchang min sawipui nghal a. Min hau nghal mawlh mawlh mai. Ka hnawl avanga mãwl min tih thû leh min ngei thû a sawi mawlh mawlh a. U Zirsangzela a fak lehpek tawh hle. An inrual khat vêl a, an inkawm nasa bawk a. A ṭan viau pawh chu mak ka ti hran lo. A tir tê aṭang khan min sawipui tu ber a ni char char a. Kei lah hian ka duh thei bawk si lo a beidawng ta kha ania.



"A fel tehlul nen" a tih chuan "A fel tih te chu ka hre ve reng, mahse a...ka duhlo a nimai a" ka lo ti ve vat a. Dik tak chuan U Zirsangzela ka duh loh chhan tak hi sawi ber tur ka hrelo, mahse ka duhlo ve tawp a ni ber mai. "Chuloah ka mipa duh chî a nilo ka tih fo tawh kha, ka ten" uar zet hian ka ti leh a. Ka hnungah min chûm ri nghal awk mai.



"I tleirawl rilru i la paih loh vang mai mai anih kha. Tleirawl lai chuan min ngaizâwng tute hi kan ten tlat zel a, min duh pauh leh kan duhlo tulh tulh emaw tih tur a ni ṭhin alawm. Mahse i han puitling tak tak ang a, i chân ropui zia i hrechhuak uar uar mai ang. Zirsangzela te zawng mipa ṭha anih tehlul nen. Belhchian a dawl bawk si, pasal tlak nghal thlap tur kha ania. I mãwl emai" min ti leh chiam a. Ka mãwl malh malh a ni ber e.



"Aaa...mihring chuan duh zawng te kan nei ve vek a, ka duhzawng a nilo a ni ve mai a. In dem ngawt theih pawh a ni bîk hlei nem. A fel bawk a bialnu fel deuh nei rawh se" ka lo ti ve ngat a. Ka mitthla ah hmeichhe pakhat nen an thlalak kha a rawn lang zawk a. U Tepuii chu zawh ka tum úk úk a, mahse a ngaih kawih ka hlauh avangin ka zawt leh ta lo law law. Hre châk ru viau mah ila ngaihven ang deuha awm chu ka duhlo, ka ngaihven lo reng bawk a.



Hun a kal leh deuh a, ka class XII result pawh chhuak tawhin Pathian zarah First Division-ah ka Pass ve hlauh mai a. Ka zir loh ngaihtuahin rin ai tak chuan ti ṭha ka inti ve viau. Dik tak chuan zirna lam hi chu ka ûnau te ang lo takin ka ti hlei thei vak lo chu a ni. Class 12 ka nih chhung zawng khan Board exam chhiar telin vawi li lai kan exam a, 2nd term leh tun Board exam chiah hi ka Pass. Chung zawng zawng ngaihtuah chuan 1st Division-a ka Pass thei chu ti ṭha tak ka ni ringawt. Kei chang ni lovin ka chhungte pawh an lâwm em em a. Min beisei sâng lo tih ka hria a, an beisei aiin ka ti ṭha tih lah a chiang reng. Chu chu remchangah la in phai lama awm chu ka sawi ri leh zeuh a, min úksak leh lêm lo khawp mai.



College admission tih a hun ṭan a, college hrang hrangah Application form lâk chhuah theihin a awm zel a. Tlai khat chu ka pa hna bâng chuan Aizawla college hrang hrang Application form a rawn hawn nual mai a. A rilru chu ka hrethiam mai e, phaia min dah chu a tum chhin eih lo niin ka hre tawh. Ka ṭhiante chuan sawipui leh turin min kar ngat ngat a, sawipui leh ngei ka lo tum lai tak a ni bawk nen ka hnual nghal rawih mai.



Application Form ho chu min pe a, "Tun kar chhungin fill up zawh tum hlawm la, ka lo submit leh ang" a ti a. "Pa, ka û bulah ka awm ve duh zawk. Ka ṭhiante paw'n phaiah an zawm vek dâwn a. Hmasâwn nan pawh ka zawm ve duh alawm. Mahni chauha helaia lo kal te chu ka duh bîk hlei nem" ka ti ta duah a. "Mizoram college zirlai tam zawk chu Mizoramah tho alawm an kal dâwn, Nangmah chauh i ni dâwn hlei nem" tiin a nui kur kur a, ka thusawi chu fiamthu ah min lâk sak daih a. "Pa...a mak emai..." ka ti thluk vak a, ka lungawi loh zia chu ka hmel aṭangin a hrethiam maiin ka ring. Mahse amah vêk chuan "Va fill up vat rawh, entrance-a tling ngei ngei turin i inbuatsaih a ngai dâwn ania" min la ti fan a. Ka hlawhtling dâwn ta lo anih hmel.




Ka rawtna leh duhna te rem an tih loh avang chuan ni thum vêl chu inchhungah ka titau bar bar a. Châw pawh an rualin ka ei ṭha duh lova, ka Pa ber lah chuan min ngaihsak lo lui emaw tih mai turin min be ngai bîk lova. A luhlul zia ka hria a, mak pawh ka ti hran lo. A hnu deuhah chuan ka Nu in tihtauh in awmzia a neih loh thû leh ṭha taka awm turin min ti nek a. Ka chhang lêt pang pang tho na in ka titau zui hlei thei ta lo. Ka ṭhiante chuan min hnem ve liam liam a. Ka lâwm thei chuang hlawl lo a ni ber.




Hun eng emaw chen U Zirsangzela chu a reh tawh hnu in zan khat chu min lo text nawlh mai a. "TluangTluang, i hmalam hun tur i ngaihtuah fel tawh em?" tih tê mai hi min rawn thawn a. Eng ber a sawi na nge ka hriat loh avangin "Eng maw?" ka va ti lêt hnu a. Ka message chu a châng emaw tih mai turin a hmu nghal a, "College te i zawm dâwn em? I inngaihtuah tawh em ka tihna anih chu" a rawn ti leh a. Ka lo ner nghal nak mai, a tirah khan pangngai taka min zawh ve mai tur ania. Khatianga rawn tih vêl kher kha ṭul ka ti lo kher mai. A zawhna chuan ka duh dana ka awm dâwn loh zia min hriat chhuah tir a, chhan pawh ka chhang peih ta lo. "Min rawn ngaihtuah pawh a ngailo, ka duhlo che" ka ti rilru mawlh mawlh a. Hetiang em em a ka hnê hi a khawngaih thlak zawk.



Ka room-ah college Application Form ka fill up laiin ka Pa a rawn lût a. "I lo la fill up zo lo elo?" a rawn tih chuan chhan pawh chhang duh lovin ka fill up zawm mawlh mawlh a. Ka titau tawh chuang lo na in ka pa nen tak hi chuan kan la inbe mumal leh ta miah lova. Min biak a tum chang pawhin ka pehhel zel a. Ka la ngei tlat vang a ni.



"Hriatthiam loh te i nei em? I neih chuan sawi la, ka lo fill up pui ang che" a ti dam leh thluam a. Ka la chhang duh chuang lo, ngaihsak lo zetin ka thiltih lai chu ka tih zawm mawlh mawlh a. Ka bulah chuan a lo la awm ve reng bawk a. Min melh reng tih pawh ka hria, mahse ka hrelo der tlat thung a.



"Tluangte" a tih leh takah chuan ning zet hian "Eng nge? I va ninawm tak" ka lo ti hlar a. A thaw chhuak hulh mai "I û bula awm ve chu i châk viau em ni?" a ti dam thlup a. Ka rilru a kawi sawi laklawh tawh a, ṭha deuh pawha chhang duh lo chuan "Duh pawh ni ila eng nge? In phal lo a ni lawm ni? Awmzia a awm tawh loh hi. Ṭhiante zawng zawng phaia an awm laiin keichu heti hian Mizoramah ka lo awm mãwl tawp mai ang. A tira min sawipui ṭha duh mang silo, ṭun ataka rawn sawi leh pawh a ngailo" ka ti khur hlawk hlawk a. Ka ṭah a chhuak nghal ṭun bawk. Ka lungawi lohna ziaawm tawh pawh kha a rawn tho chhuak leh vek maiin ka hria.



Chutah ka pa chuan "I duh chuan kan ti leh si mai dâwn em ni?" a rawn ti ta a. Ka rilru a kawi laklawh ka tih tawh kha, "A ngailo, ka phurna zawng zawng a reh vek tawh. Kha..." tiin Application Form ka fill up zawh tawh ho chu ka theh phei a. A ngaihdan a ni ta vak lo aniang "A va mak ve mawle" a ti nghut a. Keia thinrim kaltluang laklawh chuan engmah ngaihtuah tawh hek lo le. Ka pa chuan hrehawm ti se ka ti ngawih ngawih a, ngawih chuh duh lovin ka âng ta hrep a.



"A hnua hetia tikual leh tur si te chu a tira sawipui che ka tum lai te khan ṭha takin min lo ngaithla ve mai ta che. Vawi tam ka sawi alawm, Mizoram Mizoram i ti tlat a. Ka ṭhiante zawng zawng ai ka fing lo bik ang a nimai. Fanu mãwl min nei dâwn anih kha. Fate duhzawng pawh ti duhlo, duh dân leh plan te kan lo nei ve a. Nangmah vangin a buai ta vek anih hi. Ka tan i pawisa i ui anih kha..." thinrim zet hian ka ti khur hlawk hlawk a, ka ṭawng zawi viau lo bawk.



Ka âng thâwm ah ka Nu a rawn lang nghal a "Laltluangkim, i zak lo em ni? Khatianga i pa i ṭawngkhum le" a rawn ti vin ve ṭhat a. Ka pa chu a hmai a sen vek a, min melh rûn a, a insehruh nasat danah a thinrim hle niin ka hria. Inhumruh ṭeuh chungin zâm duh map lo hian ka melh lêt ve ran a. "Laltluangkim" a ṭawng chu a sehchilh nawk a. "Sawi dik loh ka nei em ni? Ka tan pawisa i ui anih kha, ka duh dân pawh min ngaih pawimawh sak loh danah hian in fa ka ni ve lo aniang..." ka tih lai mêk chuan ka biang a rawn ri ṭhawt a, a thip nghal vawng vawng mai. Ka Pa in kut min thlak!



Ka biang dawm chung chuan ka pa chu ka melh haw a. Thinrim insum tih hriat zet hian a ding a, min melh ngur bawk. Ka Nu chuan a bânah a lo chelh ran a, "I va chaltlai em em ve mawle" tiin hahthlak tih hmel zet hian min melh a. Ka pa chuan "Vawikhat mah khatiang zawng khan min nawr tawh reng reng suh" a ti sehchilh nawk a. "Mu rawh, keini pawh phei teh ang" tiin ka Nu chuan bengdaih a lo tum ve vat bawk a. Ka chhang lêt leh dâwn zet a, ka Nu min lo mitmeina chu ka ngai pawimawh ta hram. An inzui chhuah lai chuan ka room kawngkhar bulah ka naute pahnih an lo awm ve reng tih ka hre ve chiah a, zialo ka ti hnuhnawh khawp mai.



Khumah chuan ka ṭhu thla hnawk a, ka biang chu ka tawk de de a, ka pa in kut min thlak tih ka ngaihtuah chhuah rual chuan ka mittui a rawn hnâm nghal ṭiam ṭiam a. Ka rilru a na thar ngang mai. Tha tho lo zetin ka Application Form, chhuata tla darh deuh nuaih chu ka chhar khawm a. Ka Pa nen kan awmdan te chu ka mitthla ah a rawn inlar zut zut a. Ka ṭap chu a ni der mai. Khati em em khan vawikhat mah ka la chhang lêt ngai lova, ani pawh khatianga em em khan ka lakah a la thinrim ngailo bawk.




Ka thawk ipik lutuk chu ka che chhuak vut a. Room kawngkhar chu zawimuangin ka hawng a, Choka light tih loh chu an lo off thim vek tawh a. Room-ah an lût fel ṭheuh tawh anih hmêl. Thâwm dîm zetin pawnah ka va chhuak a. Ka thawk ipik lutuk chu tih ziaawm tumin ka hmalam chu ka pan deuh mawp mawp a. Ka pa hmêl ka mitthla apiang chuan ka ṭah a chhuak zual a. Kal hlawk hlawk pah chuan ka ṭap khur leh dar dar zel a. Rilru fîm pawh ka pu hlei thei lova, a hrehawm duh ngei mai.



Ka hmalam a motor headlight rawn êng va ka hmuh rual chuan ka hmai ka hup vat a, ka ding nghal chawt bawk. Min tlân pêl mai dâwn emaw ka tih laiin ka bul maiah a rawn ding tih a thâwm reh tâk daih danah chuan ka hre thei. Hläu ru deuha tlân phut ka tum lai chuan "TluangTluang" a rawn ti a, U Zirsangzela âw a ni. Ka kut lasawna ka melh na chuan amah a lo ni tak tak a. Min hmù thut chu a hamhaih ngang mai. A bana sana lawk zet chu melh in a phun sup a " Dár 11, tun ang zan rei tawh ah khawlaiah hian eng nge i tih a?" a ti a. Tak rûn hian min melh a, ka Pa min melh dân kha ka mitthla ah a rawn lang leh a, ka mittui hul tawh lam chu a rawn luang thlà lehnghal pap a. U Zirsangzela chu ka ti hrilhai ngei mai. "Tinge? Nâ i nei em ni? Harsatna i nei em ni?" a ti zung zung a. Ka dawrah chuan min chelh nghal rûn bawk a. Min ngaituahna mitmeng te chuan ten a hnêkin ka rilru a ti no zual a. Ka ṭap chhuak hlap hlap a.



Tihngaihna hre vak lo chuan "Tinge mawle...?" a ti fan ruih a, a âwm a min kuah bei lai te chuan hnial chu sawi loh kuah lêt in ka hmai ka nawr vak a. Zah ah pawh ka la thei tawhlo, ka thlamuan pui tih tlat a ni. A khat tawkin "A va zialo ve aw" a ti leh ṭhin a. Engmah ka la sawi thei bawk silo, min hnem vak ngaihna a hre rih lo anih hmel. A hnu deuhah chuan kawngsir rem laiah chuan min kai pheiin mi inkawt step-ah min ṭhut tir a, min melh ren rawn hnuah ka bulah chuan a rawn ṭhu ve chauh a.



"I duh chuan min hrilh thei ania aw" a ti ringawt a, a hma ang em em kha ka ni tawh bîk lova. Ka awmdan teh thlawt kha ka zak leh hnuhnawh viau, mahse zak anga lan chu ka duh miah lo thung.


"Harsatna i neih chuan sawi la, chinfel dân ka ngaihtuah pui ang che. Ka theilo anih pawhin ka lo ngaihthlak sak ang che. Inbunruak tal la i thâwl huai mai ang" a ti leh duah a. Lei lam chu ka bih ngar a, ani'n min lo melh ve rûn bawk a. "Sawi a rem chuan chhungkaw lam em ni? Nge ni a zirna lam zawk. I college kalna tur te kha i tifel thei ta em?" a rawn tih leh takah chuan ka insehruh vak a. College sawi ringawt pawh chuan ka rilru a na nge ka thinrim pawh ka hre tawhlo. Ka tawt nghal ṭun thei.




"Ka thin a rim" ka ti nghat a, ka ṭawng chhuah takah chuan "Ka ngaithla" a lo ti vat a. Ka han melh ren rawn a, min ngaituahna mitmeng chuan engtin emaw riau hian sawi turin min tur a. Zep duh bîk ta lo chuan ka Pa nena kan intih thiam loh dân zawng zawngte chu ka sawi fai ta kelh a. Ka thinrimna te pawh chu ka hrilh ta vek a. Ka âng zui leh hlak bawk a. Min hrethiam ang chu ka tih laiin "I pa chu i chhang deuh mah mah anih chu" min ti daih a. Ka thin a rim leh nghal át mai. "A sawi kual peih em alawm" ka lo ti ram hmarh a. "Dik chiah" a lo ti veleh lawi a, rum zeta ka melh chuan a lo nui hawk a. Ka sam thur bum chu min chûl mâm sak in "Duh ai chuan i rilru hi a la puitling lo deuh ani tiraw, tleirawl rilru paih a hun tawh viau asin mawle" a ti dam thlup a.




"I inti puitling mai e a" ka lo ti hmanhmawh a, a khi suk mai. Thiam chan tumin ka pa laka ka lungawi lohna te chu ka sawi leh mawlh mawlh a. Zualkona tur nei ta lo chu U Zirsangzela chu ka hrilh ta vek a. Heti em em hian a bulah ka la ṭawng duh ngai lo. Zanin zet zawng a awmchhun a ni miau si a, inbunruah nan ka hmang a ni ber.



Chutah U Zirsangzela chuan "I sawi duh i sawi zawh tawh chuan ka lo sawi ve tawh ang aw..." a ti dam thlup a, ka lo bûk nghat rual chuan "Mahse huat awih loh" a rawn ti leh a, a malpuiah ka chum awk mai. Nui suk chungin a sawi duh chu a sawi ta a.



"A hmasa berah chuan eng ang pawhin lungawi lo mah la i Pa kha i tãwng nasa mah mah a ni. In inhauh dân ka rawn hmù lova, a takah ka rawn hre ve kilh kelh lo bawk a. Mahse tuna i sawi kalhmang leh i ân danah ringawt pawh hian i Pa chu i ṭawngkhum hnem dâwn tih a hriat a. Khatah kha chuan i thiam lo hul hual" a tih lai mêk chuan lo pawt chat in "Ânkhum turin a awm alawm" ka lo ti hmanhmawh a. U Zirsangzela chu a phun hluk a "Het! Chaltlai deuh leh zah lo deuha Nu leh Pa te biak kha i inhmeh ve lo ania. Min pawt chat lovin ka thusawi hi lo ngaithla chhuak phawt la, i duh i sawi veleh dâwn ania. I thlîrna tlâng kha thlak chhin teh, an fanu neihchhun i ni a, hmun hran daiha dah che kha an ngai ngam lo pawh a ni thei a. I rilru a kawi laklawh mai mai anih kha, an thlakhlelh vang chein an bula awm turin an duh che anih ka ring. Sum leh pai ui zawng ang phei kha chuan chhuah tawh reng reng suh. I tan ui an neih loh zia chu kha leh chen kha i duhzawng tih tir chein, thâ leh zung, sum leh pai tam tak an lo sêng tawh alawm. I thlîrna tlâng kha thlak la, an dinhmunah lo indah ve chhin la. Han inngaihtuah chiang mah teh" a ti duah a. Kei erawh chhan lêt ngaihna hre lovin ka ngawi reng tawh thung.




Ka Pa ka chhan lêt dân zawng zawngte kha ngaihtuah lêt in U Zirsangzela thusawi nen chuan ka hmehbel a. Thinrimna ai mah chuan inthiam lohna in ka khat tawh zawk. Khatiang teh hrep a chhang lêt tur kha ka ni miah lo asin mawle. Ka ngaihtuahna hrethiam takin U Zirsangzela chuan "Tleirawl lai hi chuan kan rilru a lian a, kan tih zawng hi kan ti bur tawh mai ṭhin a, kan tih loh zawngah lah hian kan sual bawk a. Ka hrethiam lutuk che ania, tleirawl zia anih kha. Mahse a insiamrem theih lutuk" a ti dam leh thluam a. Ka pa hmuh min ti hreh telh telh thung.




Kan inah chuan ke in min thlah thlap a, min fuih pah mawlh mawlh bawk a. Hun reilote mah nise zanin ang em em a U Zirsangzela ngainat hi ka la nei ngailo. Ka khuma ka mut hnu thleng pawh chuan ka ngaihtuahna ah a châm zui veng veng a, mak tak ani.



Zingah chuan mahni inthiam lohna a khatin ka tho chhuak a. Ka Pa bulah chuan ngaihdam dîl ngei ka duh a, mahse ka hreh deuh bawk si. Zân lama thil thleng ka ngaihtuah lêt chuan ka mittui a rawn hnâm ṭiam ṭiam a, ka Pa thinrim hmel leh rilru na hmêl inchawhpawlh nuk te khan min ti na zual. Thil lian tham lutuk angin lang lo mah se ka ṭawngkhum dân khan a ti na viau in ka ring.



Room ka chhuahsan rual chuan choka ka pan nghal a, ngawi rengin ka Nu eirawngbawl chu ka pui a. Biak hmasak ka duh a, mahse sawi tur ka hre bawk silo. Mahse amah zawk chuan "Nizan i mu ṭha em?" min ti a. "Umm..." ka ti ringawt a, heti em em hian chhungte lakah ka la inthlahrung ngailo.



Ka Nu bawk chuan "Nizanah chuan i Pa nen kan sawi dûn leh a, i duh dân anih phawt chuan phaiah chuan i zir dâwn ania. Kan phal loh chhan kha chu kan hmangaih loh vang che a nilo a, i tân ui engmah lah kan nei hek lo. Kan fanu neihchhun i ni a, hmuh phak loh a i awm tur kha kan ngai ngam lo mai ania. I Pa phei chuan nangmah ah a rilru a pêk nat zia i hrechiang hle ang chu. A hrechiang bawk che a, lo awm ting tang ta pawh ni la i lunglên thuai a ring a. A tuar thei lo tur chu nangmah leh i Pa bawk in ni dâwn a. Thil hi i hrethiam lo thei lutuk a, mahse i duh dân anih chuan kan ti ta anih kha. Nizanah khan i Pa chuan i Û pawh a be fel tawh a, karleh lamah a lo tifel ang" a ti duah a. Ka chhungte lakah chuan ka inthiamlo hul hual tawh.



Min hmangaih zia leh min ngaihsak ṭhin zia ka ngaihtuah lêt a. Ka dam loh châng phei chuan ka Nu ai mahin ka Pa a che buai ṭhin. Ei châk zawng ka neih leh neih loh min zawt a, thil vâng tak pawh ni se ka ei châk zawng chu a dap ruai ṭhin anih kha! Eng emaw duh ka neih hlek in beng a chhi nghal vat a. Min tih hlawhtlin sak ngei ngei zel. Ka unaute nen inti thiamlo hlek ila ka lam a ṭang zel a. Ṭawngkam vîn in vawikhat mah min la hau ngai lo bawk. Nizan khan a vawikhat nan kut min thlak a, a thinrim hmel min hmuh bawk a. Chu zawng chu a nimai, kha chu ka cho chhuah a ni a, ka phû ve rengah ka ngai hmiah bawk. Thil thleng te ka ngaihtuah lêt chuan ka ṭah a chhuak nghal ṭun a.




"Nu...hetah ka kal ang" ka ti hnawk ṭiak a, ka Nu chuan min lo melh vat a, "Leh lawi si a, eng nge i awmzia?" a ti nghat a. Ka va kuah nghal thlawp ringawt a, ka ṭap titih der mai. "Ka tihpalh" ṭap âw ṭiau a ka tih chuan "Hriatthiam in har pafa si" a lo ti ve hlak a. A thinrim vang a nilo tih erawh ka hria. A hnu deuhah chuan ka Pa laka ka inthiam loh thû te chu ka sawi a, ka Nu chuan "A ni rêng dâwn asin, nizan kha chuan i ṭawng thui mah mah alawm" a lo ti ve hmak a. "Ngaihdam i dil dâwn ania" a tih leh chuan "Tunah a tho tawh em? Ka va'n be duh" ka tih chuan "Tho daih tawh, nizana kut a thlak vang che khan a inthiam lo lutuk a, zingkarah khan chhuanlam fahrah deuh siamin a chhuak daih, tlaiah bâk a lo haw lovang. A hmù hreh che aniang" a lo ti sam et a. A lo inthiamlo veleh chhawng ringawtte chuan min ti na zual ngawih ngawih.




Nilengin ka Pa nen chuan kan inhmu ta lova, a lo haw hun nghak in zanriah ei hma hret chuan pawnah ka lo hmuak a. Bulṭan mai dân tur ka hrelo, mahse ngaihdam chu dil ngei ngei ka ngai. Khaw thim dawnah a lo thleng ta chauh a, motor a dah ṭhat kai te chuan zâm deuhin ka lo ding reng a. Motor aṭanga a chhuak chiah chu min rawn hmù ta a, a inthiamlo hmêl ka hmu nghal zat bawk. Ka bul a rawn thlen rual chuan a nui lui suk a "I û ka be tawh a, i college kalna tur chu a lo tifel dâwn aw" a ti dam thluam a. Ka lo kuah nghal thlawp thung a, ka'n ṭap leh ringawt pek a. Ka Pa chuan "Heti em em in i kal châk tih hria ila chu ka lo ngaihtuah vat tur ania, ka thiamlo ani" a ti dam leh thlup a, ka hnung a chûl hauh hauh bawk a. Ka ṭah chhan chu a hre miah lo anih hmel.




Ka inlahrang a, "Aih Pa, hetah ka kal duh, hmun dangah ka kal duhlo" tiin lu ka thing nawk nawk a. A meng deuh awk a, "Ti maw? Ka remti alawm, i tân engmah ui ka nei lo ania. Ka fanu neihchhun i nia, ka neih zawng zawng paw'n i duhzawng chu ka ti mai ang" a la ti fan a. Engtin nge min hmangaih miah lo anga ka lo ngaih theih zawk ni? Pa ṭha lutuk ka nei hi lâwmthu sawi mawlh mawlh tur ka ni zawk asin mawle.




Ka Pa bulah chuan ngaihdam ka dîl nghal a, Mizoram lama zawm ka duh zawk thû pawh chiang takin ka sawi a. A la ring ngam chiah lo na in min pawmpui leh ta tho a. Zanriah kan han eikham fel chu ka naute pahnihin min fiam nan tak an hmang a. "Nula ve uai tawh si, rilru puitling pawh pu theilo" min ti ve ngei a. An nghal leh dâwn lutuk a, ka hnial buai peih vêl lo.



Ka mut hma in whatsapp ah ka online zuai a, U Zirsangzela status a lo upload chiah tih ka hmuh rual chuan engtin emaw tak hian ka awm. En nghal mai chu ka hreh ve sia, minute 3 vêl ka nghak phawt a, ka en ta chauh a. Hmeichhe pakhat nena an thlalak hi a lo hmang a, a hmaa Lalrami'n min lo thawn tawh hmeichhia tho kha a ni. U Zirsangzela chuan a darah a kuah a, an nui dûn sâng bawk a. Caption-ah chuan "LalPrincess-i nen" a ti kher a. A hmaa danglam ngai miah lo kha engtin emaw ka danglam ta tlat a. Nizana min thlah haw hnu khan chanchin pawh mi rawn zawt leh ta miah lova. Ka vui ru nghal viau mai. Mahse chutiang tur chuan kan inkarah engmah a awm chuang bawk silo. Ka duh lova, ka hnawl tawh a, tun ataka ka ngaihtuah chu ka inhaw viau mai.




Ka rilru a insual bap bap lai chuan a message a rawn thleng nawlh a "Eng nge i an? I ṭha em?" tih tê mai hi ania. Ka tih tauh rilruk avangin chhan loh ka tum zet a, mahse thil tih chî ah ka ngai leh lo. "Ka ṭha" ka va ti ringawt a, min rawn be zui ang chu ka tih laiin a seen ringawt a. Ka nghah fe hnuah pawh a message engmah a lo thleng tawhlo. Ka awmdan teh nuaih chu ka hrethiam tawh bîk lo.




A tuk zanah chuan ka beisei loh lutukin a rawn lêng leh ta nawlh mai. A hmaa ning viau ṭhin kha ka lâwm ru viau mai a, mahse ka inpawm duh chuanglo. Ning hmel ka la hmuh ta tho a, ka chhungte an mut fel hnu chuan ṭum dang ang lo takin a haw zui ve ta daih a. Kan pahnihin hun thâwl pawh kan nei tawhlo. Mahse chumi zan aṭang chuan a hma ang bawk khan a rawn lêng leh tlut tlut a, whatsapp lamah a reh hmak thung a. A status velah kha hmeichhia nena an thlalak kha a hmang fo bawk sia, ka hrethiam tawh bîk lo. A rilru ka hriatthiam loh tluk zetin ka rilru pawh hi ka hrethiam tawh bîk lo.



Zan khat chu a rawn lêng miah lova, ka khúa a har ru veng veng mai. Mahse a status a rawn update chiah chu inring hman miah lovin ka en nghal thawt thawt a. Khanu nena an thlalak bawk kha a rawn hmang leh a. A lo lên loh chhan chu ka hrethiam ta chiah, khanu Birthday kha an lo lâwm ho chu niin. "Happy Birthday LalPrincess" a ti kher a, phat rual lohin ka thîk zia ka hrechiang ta. Ka rilru a na veng veng a, ka thinrim ṭun bawk.



Status ka update ve nghal zat a, pâwn a chhuak ang takin hmana kan ṭhianho zân lenna thlalak chu ka hmang a. Amah chauh hmuh theih tura dahin "Lêng tlaivar teh ang" ka ti vêl ham ham a. A rawn reply rang ngang mai, "Zan a rei tawh viau ania" a rawn tih chuan "E" ka ti ringawt. A seen leh ringawt tawh, a hma khan min duh hle si a, tunah chuan min chhaih kual mai mai niin ka hre tawh.




Mahse minute 30 vêl a liam leh hnu chuan "I haw tawh em?" a rawn ti leh a. "Ka thû thû" ka lo ti hmak. A lakah hian eng ber nge ka beisei pawh ka hre tawhlo. "Inah lo awm rawh, ka lo kal dâwn" a rawn ti teh ngawt a. Ka thin a phu nghal dup dup mai. "A ṭul lo" ka ti a, data a off nghal anih ka ring ka message chu a in deliver tawhlo reng reng. A lo kal tak tak hlauvin ka call nghal a, a la ring ral ṭhak zui a. Ka call nawn tlut tlut a, a la duh chuang lo reng reng. Hlauthawng lutukin room-ah chuan ka vei tawn sek a. Ka phone a rawn rîk rual chuan ka pick up nghal vat a "Lo kal a ngai miahlo" ka tih rual chuan "Lo chhuak rawh le" a rawn ti ve chiah a. "Inah ka awm lo" ka ti mar pát a, dawt sawi chu ka awlsam ve khawp mai. A nui hul hawk a "I status kha a hlui tawh lutuk, ka hre vek, rawn chhuak teh" a rawn ti leh chiah chu ka ṭhen chawk chawk mai.



"Haw mai teh" ka ti ringawt a, "Ka nghak che" tiin phone chu a hmet tawp zui daih a. Ka va han haw mai mai tak. Minute 5 vêl chu ngawi rengin khumah ka ṭhu a, ka chhuak dâwn nge dâwn lo ka hrethiam lo. Mahse min lo nghah tlat si chuan chhuah loh ringawt chu ka ti bawk si. Ka phone bawk chu a rawn ri leh a, ka lâk rual rual chuan "Hmanhmawh rawh, i rei" a rawn ti leh tawp a. Phone chu a dah zui leh hmak bawk. Tawm bo reng theih ni ta lo chu ka va chhuak ta nge nge a. Kan in kawtah chuan a Bike ngheng in kut kuang kuah hlun chung hian a lo ding a. Min hmuh rual chuan a ṭhen nghal suk a, ka ner nawk mai.




"Eng nge?" a bul ka thlen rual chuan ka ti pawr hlar a, "Thû i va awih sawt tak" min tih chuan "Kal teh" ka lo ti liam puat a. "Zanin chu ka ti hrilhai che em?" awmze nei zet hian a ti a. A lo lên loh chungchang kha sawi a tum tih ka hrethiam ve vek. "Haw rawh" ka lo ti nghat a, nui hawk chungin min rawn pan hnai a, "Ka hlawhtling ṭan a va ang ve" a tih chuan "Kal mai teh" ka lo ti hmak a.




Ngawi renga min melh vung vung hnu chuan "TluangTluang ka ti mai mai lo ania, rilru ka pe takzet che tih i hrethiam tiraw. Vawi tam bansan che ka tum a, ka hlawhchham zel chu anih hi. Ka laka i rilru puthmang danglam tial tial hi ka hai miah lo, inpawm ve tawh rawh" thutak zet hian a ti nghet ta charh a. Sawi mai tur pawh ka hre leh tawhlo. "Bialnu i neih kha" ka ti tawi tâk a, ka thîk zia hria sela chuan min ngainep mai thei ani.




"Game anih kha" a lo ti sam et a, "Eng nge a awmzia?" ka tih chuan "I khawvel dai chin a la zîm lutuk a, i hrethiam kher lovang" inti upa zet hian a lo ti a. "Sawi ṭha ve mai teh" dawhthei lo zet hian ka lo ti hmanhmawh a. "Ka sawi tawh chu, i khawvel dai chin a la zîm lutuk, val senior thluak chu i man pha teuhlo mai. Ka zûna uai tir che chu a har vak lo" fiamthu ti tak zet hian a rawn ti leh a. Val senior tih tur êm chuan a la upa lo tih ka hre ve reng a, chutiang taka a inla senior vek chu ka lo ngai thei ṭhak lo. "I la upa vak bîk lo emai " uar zet hian ka lo ti a, a nui chhuak hawk hawk tawh.



"Kha chu duhtawk teh ang, i rilru dik tak ka hre duh" a rawn ti leh a, a âw chu a fiah in ka chhanna beisei tih hriat zet hian min melh rûn bawk a. Ka zâm leh vek tawh. Ka duh thû in chhang ta ngawt ila ka ring ngam rih chiah bawk silo. Ka duh loh thû sawi ringawt dâwn ila tun dinhmunah chuan dawt ka sawi nghal pang a ni dâwn si a. Ka ngaihtuahna buai zet chu a lo hrethiam lehpek tawh nge "Ngaihtuah buai vak lo khan min duh thû hi pawm ve tawh mai rawh. Min la ring lo cheu anih chuan ka lungawi lo viau ang. Ti tak tak lo ila hei chen ka zar buai peihlo ang che" a lo ti nghet churh a.



"I hriat reng chu" ning zet hian ka lo ti hmak a, ka duh thû chu ka la sawi hreh ngang mai. Chutah U Zirsangzela chuan a lamah min pawthnaiin min kuah ta hle hle a, a tih ang ang chuan ka lo awm mãwl ve tawp. Tihian kan inngaizawng ta tihna chu a ni phawt ang a, ho ka va'n ti ang reng tak. Min thlah hnu chuan "Va lut tawh rawh le" a ti sup a. Kha hmeichhia bawk kha ka ngaihtuahna ah a rawn awm leh a, sawifiahna ṭha tawk tak a nei miahlo chu ka haw lutuk ringawt.



Kar hnih a liam leh meuh chuan college pawh kan ṭan ve dâwn ta. Ka ṭhiante zawng zawng deuh thaw chu phai lamah an liam thlà sung sung a. Ngai dâwn viau mah ila a hma ang khan kal ve chakna ka nei tawh miahlo. College ṭan ni chuan U Zirsangzela'n min lo lam thlap a, ka bialpa anga pawm mai hi harsa ka la ti, mahse ani ve tawh miau sia. College thlen veleh ṭha deuha awm turin min chah a, harsatna ka nei anih chuan hrilh vat turin min ti bawk a. A tlan liam thleng chuan ka thlîr a, tikhan office a kal ang a. Office an bân hma chuan min lo lam leh ang, chutiang anih loh chuan a remchân dân ang angin ka lo haw ve tawh mai aniang chu. Status-a a hman ziah ṭhin hmeichhia kha a ṭhiannu a ni a, ka lo thîk ve em em a pasal nei mai tawh tur a lo ni reng a, min inhmelhriat tir lai phei kha chuan ka va'n zak tak.




Inngaizawng ta chu kan chhungte pawhin engkim min hriatpui vek a, vengchhungah pawh kan lâr chak viau. U Tepuii'n min lawmpui em em a, "A chûl nêl peih bawk che a, hlawhtlin hi a phû rêng ani" a ti a. U Zirsangzela chungchang a sawi tawh hi chuan a hmel a nung sarh zel. Ka thîk thû a chhe em em a, thla khat kan inngaizawng dek dek a, inṭhen ka rawt zing hman viau. Heti em em hi ka ni ngai miah lova, mahse U Zirsangzela ah hi chuan thîk tur ka hmu reng zel. Amah chu a fel a, min ngaihsak a, min duat em em bawk. Buai viau ṭhin mah se ka tán hun a insiam hram hram zel a. Kei ang tleirawl tê thîk thû pe chhe ve tak ngaihzawn hi chu a chang chuan a ning ve ṭhin viau in ka ring. Mahse ning angin vawikhat pawh a la awm ngailo. Ka zirlai ah min pui nasa em em a, ka hriatthiam loh te min hrilh a, min rîm tura a lo lêng ve te hi lehkha kan zir dûn a ni hawt zel.



Thawhṭan zanah chuan zan dang ang bawkin a lo lêng leh a, a tukah test kan neih dâwn avangin lo lên a tum loh thû a sawi a. Mahse keimah zawkin 'Hriatthiam loh ka nei' tiin lêng turin ka sâwm a. A lo thlen hnu rei vak lovah room-ah kan inkhung hrang nghal a. Min hrilhfiah zung zung a, ka thiam theih loh em em laia awlsam deuha a ti ṭhin chu ka ṭah a chhuak tlat pek a. "Ka ning, ka fail mai ang" insut hraih chung hian ka ti ta tawp a. Lehkha zir peih lo chî ni bawk, thiam theilo bawk, ka hnê hluah hluah.




U Zirsangzela chuan zaidam tak hian "Fail dâwnlo nasa, i thiam dâwn alawm" a lo ti dam thlup a. Min duatna âw te hlei hlei chuan ka ṭah a tih chhuak zual a. Dawhkan chu bawhin ka han ṭap ringawt pek anih kha! Nui hawk hawk chungin min lo kuah vat a "A va buaithlak e aw" a ti a. "I thiam ang khan ka thiam velo alawm" ṭap pur chung chuan ka lo ti ṭial ruau a. "Châwl phawt teh ang" tiin a lamah chuan min hnuk hnai a, a malchungah chuan min pawm titih a.




"Ka fail ngei ngei ang" ka tih chuan ka mittui luang ngiai ngiai te chu min tuai hul sak in "Fail dâwn lo nasa, a ṭul anih phawt chuan ka zir tlaivar pui mai ang che" a lo ti nghet churh a. Tlem a ka ziaawm deuh hnu chuan min han hrilhfiah leh a, ka man har ṭhin mai bawk sia. A ning tawh viau in ka ring, mahse ning hmel pawh a la pu lova, zaidam ka ti ngawih ngawih.



Tlêm tlem chuan ka hrethiam ve ta zel a, ka Nu in ṭum hnih ngawt thingpui pawh min rawn pe tawh. Mahni ka inrin tâwk hnu chuan "Ka thiam tawh ang, a tlai tawh si, lo kal rawh ka thlah tawh ang che" tiin ka tho hluai a. Mahse rang zetin a malchungah chuan min lo pawt ṭhu dawt a. Kawngkhar lam hawi chung chuan hlauthawng zet hian "An lo kal thut ange" ka ti a. Ngai pawimawh lo zetin ka biang tawn tawn a chelh chung chuan ka hmuiah min rawn fawp a. Kan infawh vawikhatna ani a, ka dawngsawng thiam lo lek lek. Mahse inlahrang hleka min rawn fawh nawn leh takah chuan ka lo chhang lêt ve vat a. Duhthawh zetin min fawp zui tawn tawn a, min chawi nawlh in ka khumah chuan min bawhbet a. Min fawh zawm leh mial mial a, a zei dân chu rapthlak tak ani. Ka âwm bawr a rawn ṭham deuh salh salh a, ka kawchhung a lum pup pup mai. Chutia rei tâwk fang kan in fawh hnu chuan kham loh hmêl zet hian a inlahrang ta hram a. Ka nghawng ah hmai phumin a thaw chhuak ham ham a, hetiang hrethiam lo rual ka ni tawh bîk lova. Mipa leh hmeichhia kan nia, inthunun harsa a ti ve viau in ka ring.



"I ṭha em?" ka tih chuan "Ka hrehawm" nui hawk chungin a lo ti a. A darah chuan beng thlawp in "Tho teh, midang an lo lût thut ange " ka ti a. A inlahrang ve mai a, a hmêl landan ka hmù chiah chu mitmeng chimawm zetin min melh a, ka bula lukham chu la in ka'n vawm ringawt pek a. A nui hawk hawk mai.



Kan inkawt thleng ka thlah a, zan a rei tawh bawk a mi mitmei veng lêm lo takin min han fawp leh ngawng ngawng a. Ka lo hnar phal bîk silo, reife chu kan han tawi khawmuang leh ren rawn a, a kal liam chiah chu ka khúa a har nghal veng veng mai.



A tuk zingah chuan min lo lam leh thlap a, hnaah a buai lutuk loh chuan college kal tur min thlah hi chu ngaiah kan nei tawh. Kan test tur te chu min sawipui leh a, duhsakna min hlan bawk a. Ka inringtawk sawt mai. Kan han test chu thiam loh pakhat ka nei tih loh chu ka chhang ve thei mai hlawm a, U Zirsangzela'n a pawimawh a a rin ho chu a lo chhuak deuh vek a. A risk fuh ka ti dawn nge a thiam khawp mai.



Kan test zo chu ka call nghal a, ka thiam deuh hlir a lo chhuah thû te chu ka hrilh phûl hlut a, "I hmuh ṭhat viau chuan kan lêng dâwn ania" a rawn ti ve hlut a. Hnaa a laklawh deuh avangin tlai lama min lo lam hman loh tur thû a sawi hnu rei vak lovah kan inbiakna chu kan ti tâwp ta a. Vanneih thlak lutukin chawhnu class an rawn cancel thut a, haw tura intintuahin kan college chhak lawkah Taxi ka châng nghal a. Ka chân lai mêk chuan râl aṭangin U Zirsangzela ka hmu hlawl mai a, auh mai ka tum lai chuan hmeichhe pakhat hian a banah a rawn chelh a, an i nuih sâng a. A Bike dahna lam chu panin an inphur chhuak zui nghal a. Ding khawng lah chung chuan ka thlîr liam ta ringawt a. Ka bula Taxi in horn a rawn pek takah chuan chêt sawn nachang ka hre chiah.




In ka thlen hnu thleng chuan ka ngaihtuah zui a, ka thâ a zawi ngawih ngawih mai. Ka inbual a, ka Nu bulah ka awm nawm loh chhuanlam in ka mu nghal hmak a. Ka rilru na viau mah se ka mittui a hul hlauh thung a. A message pawh seen duh tawh lo chuan phone ka dah hmak a. Vawiin khan min hruai hman loh tur thû sawi in office-a an buai thû te kha a sawi a. Ka hmuh dân nen kha chuan a inpersan mah mah a ni.




Ka lo muhil daih a ni ngei ang ka bula inbe sur sur thâwm ah chuan ka harh riai riai a. Ka Nu leh Pa ka hmu zui zat a, ka harh tih an hriat rual chuan "I eng nge nâ, i ṭha em?" min ngaihtuahna a khatin ka Pa chuan a lo ti nghal vat a, ka pang a rawn dek nghal vut bawk a. "Ka ṭha, nizan ka meng rei sia ka chau deuh ani mai thei" ka lo ti ve vat a. Ka harh hlim hlawl bawk nen ka âw chu a hnawk ang reng.



Ka Nu chuan "Zanriah ka siam peih tawh a, i lo tho chhuak peih ang em?" min ti a. Min ngaihtuah ang aiin ka ṭha daih sia nuamlo ka ti ang reng khawp mai. "Umm...thei e, ka engmah a na lo ania aw" ka lo ti zung zung a. Ka tho chhuak nghal vat bawk a, an ngaih pawh a ṭhat hmel ta deuh e. "Lo inphih fai la, kan ei dâwn ania" ka Nu chuan a lo ti vat a, "Nang pawh rawn inthlak la" tiin ka pa chu a mitmei zui leh zat a. A hna bâng ka room-ah a rawn tlang nghal anih hmel.



Zanriah kan ei fel hnu chuan room-ah ka tawm leh nghal daih a, vawiin ka hun tawn chuan ka nun ram a ti chau vek. U Zirsangzela hi ka lo duh tawh hle ani tih ka hre thar bawk a. Chu chu hria in ka lakah kal pelhe na tur a zawng ni ah ka ngai hial a. Mahse chutiang tur êm chuan ka ngai phal bawk silo.


Ka room kawngkhar rawn ri rakah chuan ka hawi vat a, ka lo ngaihtuah mêk laia a rawn lang nawlh chu mak pawh ka ti hran lo. "Ka phone call i la theilo" a rawn ti lut nghal a. Ka la thei lo ni lovin ka la duhlo zawk a ni reng sia. "Eng nge i duh?" ka lo ti nghat a, ka melh ran bawk a, a lo meng awk mai. Thil fel hlel a awm tih a hrethiam nghal a ni mahna "Kan ṭha em?" a ti dam thlup a. "Inṭhen ang" ka lo ti hmak thung a, a rum nghut mai.




"I lung tih awi lohna ka nei em ni?" a tih chuan ka ngawi reng a. "TluangTluang" a rawn tih leh takah chuan "I lerh" ka lo ti hmak a. A hrilhai ngang mai, "Sawi chiang la" a tih takah chuan zep buai peih lovin vawiina ka hmuh dân zawng zawngte chu ka sawi fai ta phiarh a. Ka âng deuh tawn tawn mai. "Kan thawhpui nu anih kha, pu ten hna thilah min tir dun alawm" a lo awlsam et a. "Chu pawh nise i banah a chelh che kha" ka lo ti hlar a. "Hetiang reng chu ka peihlo, inṭhen mai ang. Ka ning, ka thîk thû a chhia tih i hre vek a, thîk turin i awm zel mai. Inṭhen ila kan tán a ṭha ve ve zawk ang" ka ti leh tân tân a. "A va mak e aw ka sawifiah tawh chu" a lo ti ve hluk a. A ning ve viau tawh anih hmel.



"Anih chu" ka lo tih nghat lai chuan "Thinrimna tur zawng reng lo teh" a rawn ti veleh hluk a. A ṭawngkam bul vut te chuan thinrimna ai mah chuan ka rilru a ti na, zan dang zawng aiin tunah tak hi chuan a dawhthei lo zual emaw tih tur a ni.



Khumah chuan ka mu tau sawk a, ṭah chhuah ka hlauh avangin rizai in ka inkhuh nghal hmak bawk a. "Haw rawh" ka ti tawi tâk a, ka hnung zà mer mer ah chuan a la awm reng tih ka hre thei. "TluangTluang" a rawn tih chuan chhan pawh ka chhang duh tawhlo. A beidawng ta aniang a hnu deuhah chuan a reh zui ta vang vang a. Ka inlet a, hmuh tur a lo awm tawhlo. Thaw huai tur ka nih laiin ka rilru a na veng veng mai. Chumi zan leh a tuk nileng chuan a reh zui ta vang vang a. College kal tur pawhin min lo hruai lova, min lo text miah lo bawk. Biak hmasak ka tum bîk bawk silo, amah demna in ka la khat ngar ngar a. A hma anga min thlem a tum tawhlo lutuk te chu ka la na thar ngawih ngawih. Kan inkar tâwp hlen tura ka ngaihtuah chuan ka ipik ngawih ngawih thei.



Zanah chuan a rawn lang leh nawlh lawi a, la titau reng mah ila min kalsan hlen tak tak ka hlau tawh bawk si pangngai tak chuan ka lo awm ve mai a. Ka chhungte mut fel vek tawh hnu chuan ka bulah a rawn ṭhu a, ka kut rawn chelhin "I la thinrim em?" a rawn ti a, ka lo ngawi reng thung.



"Nimin kha ka thiam loh ani, min ngaidam la. Ka thiam lo hul hual, lungawi tawh rawh" a ti dam leh thlup a. Vawi tam tak ka tihtauh khum ṭhin a, ka tlâwm tir zing ta mah mahin ka hre ve ta. Ka rilru la puitling lo lutuk hi a ning ve thei ngawt ang. "Min ṭhen tak tak dâwn emaw ka tia" ka tih chuan "Ṭhen thû che vawikhat mah ka sawi loh kha, hun thâwl ka pe mai che alawm" a lo ti dam thluam a. "Lawk" hrechhuak thut ni âwm tak hian a phone chu a rawn phawrh a. Hmeichhe pakhat nen an inbiakna hi min hmuh tir a, an thusawi danah chuan nimin lama a kalpui nu kha anih hmel. Rinhlelh tur engmah ka hmu lova, hna thil bâk an sawi lo. Chu mai ni lovin khanu kha pasal fanau nei tawh a lo ni leh zel a, ka zak ru chem chem mai.



"Min ning ṭhin em? Keichu ka naupangchhia leh thut zel a. A chang chuan ka rilru let but hi ka hrethiam ṭhin lo. Ka mãwl leh lutuk a" ka ti bah deuh nuaih a. "Kan inneih vat a ngai anih hi, thîk thû i pe chhe si. Inneihna thû kan thlung vat anih loh chuan min la ṭhen duh tak tak ang tih ka hläu tlat. Ka âtchilh viau si che a" a lo ti daih a.


"Ka la naupang emai" ka tih chuan "Ka châwm zo chiang che emai, innei tawh mai ang" a rawn ti leh a. A uang emaw tih dawnin a thutak viau bawk si. "Awi, miin mak an ti lutuk ang, hna te ka nei ve phawt ang a..." ka tih lai mêk chuan " A rei dâwn emai, i thiam theilo ve bawk sia, i fail phei chuan..." a lo ti uang a. A darah chuan ka chum ṭawlh a, a nui chhuak hawk hawk mai.



A hnu deuhah chuan thutak zet hian "Tak taka i inpeih hun ka nghak ang che. I rilru ka hneh theih nan pawh ka nghak rei viau alawm tiraw, nghah te chu ka tih loh dân pawh a nilo a. Nghah chhuah theihin awm la a dik vek a nimai" a ti nghet charh a. A haw tur chu kan inthlah rei lehpek khawp mai.



A tira duh lo viau si kha kan inngaizawng rei telh telh a, ka âtchilh telh telh a. Tih luihna hmang miah lovin ka thinlung a hneh tawh a. Min hmangaih thû a sawi ṭum phei kha chuan lâwm avangin ka ṭap hial anih kha. Min hmangaihna chu chêt zia in a lan tir mawlh mawlh a. Zirna kawngah lah hma ka sawn phah nasa, ka chhungte pawh an lâwm a. A chhungte lah hian "Kan monu hual" tiin min fiam reng a. Kan inpawh tlâng khawp mai.



Hun a kal a, ni a liam a, kum a liam ve zel a, B.A Final year ka exam ṭum chuan lehkha ka zir ṭha peih leh ta tlat lova. U Zirsangzela ringawt in ka ngaihtuahna a luah khat a, zirlaiah insawrbing turin min ti a, lo lên loh a nei zeuh zeuh bawk. Mahse keimah ber hian ka ngai êm a, lêng turin ka sâwm leh ṭhin a. Ani'n min lo ngai ve tho bawk si, a lo lêng leh ta nge nge ṭhin a. Result a chhuah dâwn chuan ka rilru a hah thar a, awmzia erawh a nei tawhlo hle. A hunlai a ka lo zir ṭha peihlo te kha ka inchhir leh hnuhnawh a. Mahse engmah tih theih ka nei tawh bawk silo. Semester dang zawng zawnga ba nei miah lo kha Final Year berah ka'n fail ta tehreng anih kha! Ka chhungte ka tihnual vek a, ka ngaihzawng nei ṭhat pui min ti reng ṭhin kha fuh lo an ti ta khawp mai. Mahse U Zirsangzela thiam lohah an puh miah lova, an fanu hian ka tih kual hneh zia an hria a. Min hauh nan tak an hmang a. Ka Nu chuan "I tana ṭha tur a duh em em a, inlakhran a tum rih pawhin i kar ngat ngat zel a. Amah pawh a inthiamlo viau ang" a ti a. Ka pa chuan "Nakkumah i exam ṭhat leh a ngai dâwn anih kha" min ti a. Kei erawh chuan thil dang ka lo ngaihtuah daih thung. Lehkha zir leh chu ka peih tawhlo, rilru a hah duh si.




U Zirsangzela chu a inthiamlo lutuk a, kan result chhuah sarhu lai phei chuan a lo lêng ngam miah lova. Lêng tura ka sâwm pawhin "Nakkum exam atân inbuatsaih rawh" min ti daih zel a. A tir lama min âtchilh zia kha tunah chuan ka hrethiam tawh. Tuna ka duh ang chiah hian min lo duh ve ngei dâwn sia, kei lah chuan ka lo be ṭha duh lo ṭhin kha ania.



Kn result chhuah aṭanga kar hnih a ral hnuah chuan a lo lêng ngam ta chauh a. Ka chhungte chuan pangngai takin an lo bia a, ani lah chu a inthlahrung tlat pek a. Ka chhungten an dem loh zia ka sawi pawhin nuam ti tlat hek lo le. Midang an mut fel hnu chuan kan pahnih chauhin kan awm leh ta ran mai.



"Kum khat nghah leh i ngai dâwn ania, zir ṭha rawh ka tih laiin i zir ṭha duh lova " a ti bul bul a. Ka nuih a ti zà ru viau mai, kei ai mahin ka fail hian amah leh ka chhungte ah nghawng a nei nasa zawk anih hi.



Kei lah chuan ka rilrua ka lo vei rûk rauh rauh tawh, ka Pa in min hauh lai pawha ka lo ngaihtuah daih tawh chu ka sawi chhuak ta phawng a. "Lehkha ka zir peih tawhlo, min nei tawh mai rawh" ka ti hmiah a. A hamhaih hmêl khawp mai. "Min nei duh leh lo a nimaw" ka tih chuan "I chiang em?" a lo ti churh a. "Kei te chu chiang e, ka zir peih tawh teuhlo. I sum leh pai ka chenpui tawh zawk ang che" uar zet hian ka lo ti a. Ka nui har har bawk a. La ring ngam chiah lo hian "I ti tak tak em?" a la ti hram a. "I duh leh min nei suh" ka lo ti leh hmanhmawh tawh.



Chutah a lamah chuan min pawthnaiin "A teuhlo, ka nei khawp ang che" tiin min fawp zui vang vang a. Naktuka palai lo tirh nghal a tum thû a sawi chuan "A hma mah mah" ka lo ti vat a. "Anih chuan karlehah, chuti lo chu i rilru i thlak leh hman palh ang. Ngawi rawh karleh pawh chu a la hla mah mah, naktipah aw" a ti deuh nawk nawk a. A hlim hmel chu hmuh a nuam ngang mai.



Karleh lama palai tir tur chuan kan sawifel thei ta hram a. Ka chhungte pawh ka lo sawi hmawr hmuh ve deuh phawt ang a. Chuti lo chu an hamhaih lutuk palh ang. Chumi zan chuan rilru hlim takin ka muhil a.



Ka chhungte bula ka sawi chiah chu min khak deuh hlak a, mahse engah mah ka ngai lo. U Zirsangzela hi an ring tâwk a, an phal dâwn tih ka hrechiang ve emai. Ka Nu lah chuan "I lehkha zir peih loh chhuanlam te hi a lo ni ange" min ti erh a. A nihna chen a awm a, mahse a bulpuo ber chu ka hmangaihna ani tlat. Chuti ni lo se nei turin thutlukna ka siam ngam teuhlo mai.



Palai chu a rawn tir ta ngei a, ka rin lawk ang ngeiin ka chhungte pawh chuan an lo hnial bîk lo. Palai vawihnih an lo kalna ah kan inneih ni turte chu an sawi fel ta vek a. Ka hahdam huai huai mai.


U Zirsangzela ang mipa ka tawmg chu ka lâwm a, beidawng duh miah lova min lo hêl ngar ngar te kha ka vanneihna a ni. Beidawng ta se tun dinhmun hi kan thleng âwm der si lo. Mipa innghahna tlâk lutuk ka nei tur chu ka hlim ngawih ngawih.



Kan inneih hma zanah a rukin reilote kan inhmu a, kan inngaihzawn chhunga a tawp nan kan in fawp a. Chu chauh lo pawh chu kan ti, mahse sex kan hmang hauh lo thung. Naktuk zan atân kan khek ta zawk anih kha!



"I mu miah lovang" tiin min sawi ṭhaih ngar ngar a. Ka hlau der si lo, naktuk zanah chuan ka pasal a ni tawh dâwn a. Kan bulṭanna tur chauh a la ni tih ka hria, mahse U Zirsangzela nen anih phawt chuan engkim hmachhawn ka inhuam ve tlat.



A TAWP TA.