The Feared Crimson King 28

[B.laltlanhlui]

Alice POV

Ni sawmpahnih a liam leh meuh chuan Dan leh hrem theih an nih na tur ka siam hnem khawp mai. Zanriah kil laiin Lal nen kan inhnial leh bap bap ṭhin a, hma pawh kan sawn chak viau mai

Ka mite hrem theih an nihna tur siam chu har ka ti hle mai. Mahse lehlam zawnga ngaihtuah chuan keiin ka siam loh chuan Lal hian zahngaihna nei miah lovin ro a rel ngei dawn si a

Vengtu sipai zinga bel sang deuh chuan zalenna an hlawh chhuak thei ang, chu pawh chu inbeihnaa an dam chhuah chauh in a ni ang. Vengtu bel sang vak lo chuan Walzenor ah thawk rih in an zalenna hlawh chhuah nan hun a duh deuh ang

Lal nen kan inhnial fe hnu pawh chuan Walzenor mi an lo thah ve tlat avangin a rilru a sawhsawn thei tlat lo. Theodore a'n a mite zinga vengtu emaw lo nei mi pawh nise Lyrian ho in an thah chuan khaihlum tur a ti tlat a

Tihtur a la tam si a, ni chhuah aṭanga tlai ni tlak thleng chuan a pbek keu in kar hnih chhung chu ka buai ve zak zak. Zanriah ei dawnah chauh Lal nen kan inhmu a, kan chau lutuk a, kan inbia in kan inhnial tawh lo hrim hrim

Kan inmil lo viau chungin kut chu kan inthlak em lo. Mut mu ka hmu ṭha lova, dan thar kan siam avang chuan ka harh kur reng mai. Nimin tlai zanriah kan kil lai khan ka meng ṭha hleithei lova, Lal in ka room thleng min hruai lut anih kha

Ni reilote liam ta ah khan Lal fapa Jaxon dan zirna room ah a rawn kal a, zaidam tak ni mahse Theodore ang bawkin a mitah chuan natna thuk tak a hmuh theih

Lyria chungchang min zawh chuan chhan har ka ti angreng mahse kawm nuam ka ti. A patea a tlawh thu leh a rawn thlen hnua a pum nat thlengin min hrilh a

A hmaa dan an lo zam tawh te chu a dik leh dik lo te ka chhiar nasa mai. Boruak a nuam khawp mai. Ni zung in min rawn chhun zawng te hian room chhung hi a kah eng phut a, ka inrin hma in kawngka an rawn hawng thut

Chair ah chuan ka ṭhu a, thu ṭhenkhat chu hriatthiam tumin ka han chhiar nawn leh a, tu emaw rawn ṭawng chuan min ti harh zawk mai "Ka pu dan siam avangin i buai tih ka hre mai" a ti a

Lal chu a rawn lut a, ka chair hnungah rawn dingin min rawn ngheng zeuh a, kan inkar ah hian boruak alh deuh chu a awm a ni. Min rawn hnaih leh deuh in lehkhabu hlui tawh tak chu a rawn en ve a

"A thil thlir dan hi ka rilrem zawng tak a ni. Min puih theih mial takin ka ti a" ngaihtuah thui lem lo in ka chhang a

Lal chu a tawlh hnung deuh a, ka lo thaw chhuak halh "A dam lai khan indona a hmachhawn ngai lova, a puih theih che pawh ka ring lo" a ti liam puat a

"Tihsak theih che ka nei em le, Aw Lalber?" Tiin lehkhabu ka khup thawk a, Lal pawh hian helai room min kawhhmuh aṭang khan a vawi khat rawn lan lehna a ni

"Min tih sak theih tur maw?" Chimawm deuhin a rawn nui a, dawhkan a rawn kal hual a

Chair bân nei ah chuan ṭhu in dawhkan chu a rawn hnaih tawh hle "Ka khuai naute buai em em hi ka rawn endik mai ania, ka chenna hmun a ni miau a" a ti a

A mizia chimawm dan aṭang hian a mood a fuh a ni ngei ang, engtik aṭangin nge hming lem te min lo phuah sak le?

Ka hmaah a rawn ṭhu chu ni dang a ang ta lo tlatin ka hria, a mita inrintawkna leh lallukhum zawng zawng nen amah a lo sang ṭha bawk nen a fuh vel vek

"Engkim a kal tluang vek maw?" A ti a

A thu min zawh chuan min ti phu deuh zawk. Dawhkana lehkha darh nuai chu ka melh zeuh a "Engkim a kal tluang e, Aw Lalber. Hah lutuk a thawh chu ka tum lo a, mahse thla bial hma chuan peih hman ka tum ang" ka ti a, kar khat chhung ka la nei anih chu, hnu ka khar fel thei ṭep tawh e

"Alice" Lal chu a rawn thutak deuh hlut a, thil ṭha tak chu a ni dawn lo tawp mai

"An lo thleng tawh a" a tih chuan a sawi awmzia ka man nghal mai. An mi man te an rawn thleng tihna. Ka la tifel chiah lo asin le. Ka mitah tak min rawn en laiin lungngaihna in min rawn tuam hlup hlup mai

"Ni eng zat nge ka la neih?" Ka ti a, Lal Theodore hian mi tang dangin an rawn belh dawn chuan a awm sa te hi tih ruah vat a duh ngei ang, a hmaa kan inhnial pawh khan hmanhmawh taka chet a ngaih thu a sawi a, chuti ni lo se chu a that duh vek mai ang

"Ni thum" thutak deuhin min en leh a

"Awle engkim peih fel hman ka tum ang" tiin ka lehkha ziah ho chu ka bih nawn leh a

"Hawihhawm lo pawh min ti viau maithei a, mahse aw Lalber khawngaihin min lo chhuahsan mai ta che" rilru hmanhmawh hah deuh takin ka zawt a

Lal chu a tum deuh bur a, mahse lu bu zeuh in min chhuahsan daih. Ka bula awm hi nuam a ti ve aniang a, mak ka ti zawk hle mai

Ka hmanhmawh a ngai. Ka ziah zawh hnuah dan hmun khat ah ka chhu kai leh ang a, heng dan te hi ziah zawh vek an nih hnuah Lal mi rin tak hnen a thleng leh anga

Chumi chuan dan chu zawmin mi tang te chu tihtur a hriattir ang. Tan inah mi zathum chuang an leng thei ang a, chu pawh chu ni khat chhungin a tih theih vek ang. Ni hnih chauh hun ka nei tawh

Lal in a remtih tawh ho chu ka dah hrang a, a remtihna ka lak a ngai zel dawn a, hun chu a duh rei ve deuh hlek ang

Darkar a liam leh hnuah hmanhmawh takin Lal hnen chhiahhlawhten min hruai thleng a, zanriah kil hun ka tlai leh ta anih hi

Zanriah kilna hall chu ka va tlan thleng a, Lal kianga ka ṭhut rualin lehkha phek ho chu dawhkan ah ka nghat a, chhiahhlawhte hnenah lawmthu ka hrilh bawk

"Ka lo tlai avangin min hrethiam hram mai dawn nia!" Inthiamlo deuhin ka han ti a

Lal chuan ka chet dan chu en liam ve maiin hmuhnawm thlirin min lo thlir a "Eng lehkha nge i rawn ken a?" A ti a

"Heng dante hi i remtihpui a la ngai a, Aw Lalber" hah deuh in ka thaw chhuak hak a

Lal chuan a hmaa thawh tur tam lutuk a hmuh chuan a rum nghut a "Zanriah ka ei phawt thei lo em ni?" Lawm lo zetin a phun bul bul a

"I duhzawng a ni lo tih chu ka hria alawm mahse hun ka nei tlem tawh si a, rei pawh a ni lovang" ka han ti leh hram a

Lal chu a lawm lutuk lo tih ka hria, min melh reng a

"Khawngaih takin aw? Min en sak hram rawh" Min hauh hlau tak siin ka han ngen a

****

Chhunzawm tur