The Feared Crimson King 26

[B.laltlanhlui]

Alice POV

Lal pindan ka thlen dawnah chuan ka hmuh huna ka biak dan tur ka ngaihtuah pah a, pindan ka lut chiah, tu emaw hnar suk suk leh taksa khuma rawn insep dawr dawrh ka hmuh chuan ralmuang lo taka ka awm lai pawh a bo chawpchilh nghal duak
________________________________________

Thil na tak tleh pawh kha a reh tawh a, mumang tui tak ka nei lai chu ka harh hlawl mai. Kawrfual sen duk ha in Lal pindan kawngkhar chu ka hawng dek dek a, Lal thinchhe tak, rui bawk si hi a harh ka hlau takzet

Nizana min fawh kha a theihnghilh tawh a ni maithei. Khum chu ka va bih dek dek a, Lal hmuh ka inrin tehreng nen a lo ruak hiau mai

Zing hma taka a chhuah chhan kha ka hre lo re re mahse ngaihven zui duh lovin lal chenna hall lam ka pan a, ka hmuh lohna a rei leh ta hle mai

Huan zawn hmuh tumin ka tei kual sek a, chhiahhlawh hmeichhia ka hmu thut a, huan awmna lam min kawhhmuh hnu chuan pawn lam ka pan nghal a, Theodore nen a hmaa kan awmna hmun ngei kha a ni

Pangpar rim chu boruak ah a leng vel a, khua a la thim deuh nen nuam ka ti phian mai. Phul huh dup chuan pheikhawk a ti hnawng a, mahse pawi ka ti chiah lo

Hetiang hi ka duhdan zawk a ni. Zalenna ka nei ve ta ni berin ka hria, rose var awmna ah chuan ka ding chat a, ka nu ka hrechhuak zawk. A ngaina thei hle ṭhin si a

A hnah chu ka kutzungṭang karah ka chul heuh heuh a, nizana kan infawh lai kha ka mitthla ah a rawn lang leh a, min tihlim in nuam ka ti veng veng. Ka hmui chu ka tuai leh zeuh a, ka harh chhuak leh thut!

Rose hnim tuma ka kun lai takin Ka lam pana rawn kal ri chheng chheng thawm ka hria a, vengtu sipai pahnih hi hmanhmawh deuhin an rawn thaw hlawp hlawp a "Lady Alice!" Ka kiang an rawn thleng a

"Eng nge ni ta?" Ka lo ti a

"Min zui vat rawh! Lal thupek a ni" an ti a

"Awle tehreng mai" ka ti a, ka kal hun nghak in min tur deuh sek bawk

"Tinge in hmanhmawh em em a?" Inralring rengin ka zawt a

"Hmuh nghal che a duh" an ti a

Lal chu a thinur leh aniang a, engthil mah ka tih awm ka hre si lova, tlanchhiat ka tum pawh a ni si lova, tihnat phei chu a teuh lo lutuk. Naupang thil ti chhia, a chhungte koh nghak ang mai ka ni

Rorelna room a min hruai chuan ka zam ve deuh hle mai. Lal ka ti thinrim anih ka ring. Mahse ka ngaihtuah chhuak zo tawh miah lo. Lalṭhutthleng ah lallukhum khumin a lo ṭhu ran mai

A hawi kual vel a, helaia awm zawng zawng pawh hi a ta vek an ni. Ka hak lai kawr te, chhiahhlawh te, he ram leh bang chen hian a ta vek an ni. Keimah thleng hian mawle. Thu a neiin a hlauhawm hle bawk. A mood a fuh lo tih ka hmu thei

Kailawn tawp ah chuan ka ding a, mi zawng zawng pawh an kim vek. Lal chu hmanhmawh deuhin a rawn chhuk a "Zing Chibai, Aw Lalber" nuih luih ka tum a, ka dik thei tawh lo

"Khawiah nge i kal?" A rawn ti ṭan a

"Huanah" tih pahin ka han en a, ka kut ka khal niap niap bawk

"Min dil miah lo" a rawn meng thip ram a

"Engtik thlengin nge i phalna lak ka ngaih?" Zah deuhin ka zawt a

"Ka awm loh laiin eng nge tih i tum ka hriat hma chu khawiah mah kal turin ka duh lo che" a ti a

"Pindan chhuahsan lawk ka duh a" tia ka lo hnial chu ka inchhir leh hnuhnawh viau mai

"Chu pawh nise ka thu i awih loh chuan ka kalh khum ang che, i kal thei tawh ang" tiin thu a pe sam et a

Thinrimna leh rilru natna chuan min rawn tuam nghal a "Engvanga hetia awm nge i nih? Eng thil nge i chungah ka tih?" Ka rilru na chu thup ka tum ve hram hram a

Lal chuan rum zet hian min rawn melh a "Lady Alice, ngaihtuahna dik lo neih tum re re suh. Ka ring lo che a, ka ring ngai lovang che. Ka tan engmah i ni lo, i thil tum hi ka hriat chhuah hunah chuan a pawi viau ang" a ti a

Meng zau kawk in ka en reng a, miin Lal chungchang hi min zawt se chuan a chhe lam zawng hlirin ka sawi ang. Tinge a kam chhuak hi Fei ang mai anih le?

"I kal thei tawh" lawm loh hmel zetin a ti a

Inher in sasua kawngka lam ka pan a, ka mittui chu ka biangah a rawn luang ngiai ngiai a, ka mittui hi ka hmuh tir dawn lo hrim hrim. Ka chak lohna hi a hmu tur a ni lo, chu chu ka hriat chhun a ni
________________________________________

Chumi tlai chuan zanriah kilna hall ah chuan vengtu pahnih in min hruai a, Lal hi hmuh ka duh lo asin le. Mahse duh ka thlang thei si lo. Min ti hrilhhai khawp mai. Rin lawk thiam a har si. A changin a zaidam in mi hriatthiamna a ngah a, a chang leh mi nunrawng leh rawva tak a ni bawk

Tu emaw in pawisa thir vawrin a mood tur a lantir zel ni maiin ka hria. Ka hua nge ka ngaina pawh ka hre thei lo, mahse ka thu chhiar kha ka ngaihtuah chhuak leh thut:-

"Mi tuemaw i ngaihtuah em em chauh in i thinlung na takin a hliam ang che"

Lal kiangah chuan ṭhu in ei tur chu plate ah ka chan a, ka ril chu a ṭam vak lo, ka ṭawng tawh lova, Lal pawh biak ka tum lem lo, he room hi chhuahsan vat ka duh

"Alice" thunei takin min ko a, mahse a dam dap thung

"Aw" tih pahin hnuai lam ka melh a

"Ka tihpalh" a ti a

Infiamna khel turin a mood ah ka cheng hlawl lo, ka eitur chu ka chan te lehzual a, ka hawi chho eih lo

"Tsk" Lal chu lungawi lo deuhin a rum nghut a, a sam chu a hui leh pawp a

"Ka chunga lungawi lo thei i ni miah lo ania" a ti a, amah zawk chu ka hliam ah a ngai a

"Ka nuamsam lova, ka kal thei tawh ang em?" Tiin ka dil a

"Thei lo" a ti leh a

Ka thaw halh a, dawhkan ah chemte leh thir kawm chu ka nghat a

"Ṭawng rawh" Lal chuan thu min pe leh a

"Sawi tur ka nei hleinem, Aw Lalber" ka aw ah chuan hriat tur engmah a awm lo

Lal chu ka mit sirin ka va hmu a, a tho ṭiam ṭiam a, ka chair chu rawn pawt in ka bân ah kaiin min dintir a, min man nghet sia, a nuam ka ti chiah lo. Min kuai her leh pawp a, kan mit a intawng leh siah a, kan insi chet lo chauh

"Ngaithla teh, vawiinah khan thu ngaihthlak nuam lo tak ka lo chhak chhuak a, a pawi ka ti mahse i mizia hi chu tawrh hleih theih pawh a ni lo" min chelhna chu a thlah deuh a, lo buk zeuh mai lo chu tih theih ka nei lo. Duhthlan tur dang ka nei bawk si lo "Thu ka sawi lai chuan min lo en kar rawh" a ti a

Ka hawi chho a, uisathiam zirtir mek ang mai ka ni leh tawh

*****

Chhunzawm tur