The Feared Crimson King 23

[B.laltlanhlui]

Alice POV

Ka chakna zawng zawng sawm khawmin a sawi zawh hma chu ka la ding lui ṭang ṭang. Biak ka duh lo asin le "Ka...!"

A sawi awmzia pawh ka man lo

"Anih chuan ti nge Bathlar kha i nghen a? Hnuai lam i melh tlat bawk si a, a lan dan chuan..." a ngawi leh vang vang a

A sam a hui leh pawp a, vawiin chu lallukhum a khum lo tlat

"Zuan thlak mai duh hmel i pu alawm" a ti a

Zuan thlak ka tum emaw a ti ani maw?

"Ka tum hleinem" ka ti tham ṭiak a

Lal pangngai tak leh invawng thei em em kha tun hunah hi chuan a tet hmel ngawih ngawih. Engemaw sawi tuma a kâ a ang chu a hmui a chip leh daih

"Anih chuan eng nge i tih? Engvanga ka let leh hun tur zawt nge i nih?" A ti a

Ka man lovin ka lungawi lo hle "A chhan chu!" Ka ti a

"A chhan chu eng nge?" A rawn ti leh a

"A chhan chu mahnia awm ka duh a, ka hlatah awm la ka duh! Ka thaw ṭha hleithei lova, thudik chu hmuh che ka duh lo" ka mittui a rawn tling kuang a

Ka beidawng hle a ni. Ka ṭah a chhuak, ka ning tawh em a ni

"Ka tihpalh lutuk aw!" A rawn au ti tih a

Ka thaw halh a, min pawisa lutuk lovin a sawi zawm a "Kha pa kha i hmuh laia that tur ka ni lo asin. Tharum i ngaina lo tih ka hria alawm" a ti a

"Chu chu maw pawi i tih chhan!?" Ka ti a. A ruka mi a thah loh avangin pawi a ti maw?

Ka thu hriat hi ka awih thei lo hial zawk

"I mitah hian nunna hian hlutna a nei ve lo em ni?!" Ka vin hrep a, engtin nge a nunrawn theih em em zawk le?

"Min puh ngam elo Lyrian nu" ka lam rawn pan in min kawk a

Hnung lamah ka tawlh ṭawk ṭawk a

"Kei ni lovin nang leh kha ram mi zawng zawng te kha thinlung nei lo zawk in ni" a ti a

"Thu awihawm loh lutuk anih chu! Nangmah hi alawm chhan awm lova mi that ṭhin chu, huatna bak i thinlung ah khan engmah a awm ve lo!" Ka ti a

Ka ti thinrim tih ka hria alawm mahse ka insum thei tawh thlawt lo. Mi tam tak an thi a, tumahin an hau ngam der mai si lova, ka chhia leh ṭha hriatna hian a en liam mai mai thei lo

Ka lam panin rum lutuk in min melh a, ka lo melh let ve ngat. A mitmeng ah chuan thinrimna a rawn alh chhuak a, ka hrechiang ve tawh khawp mai

"Ka sawi chu MIN PUH RINGAWT SUH!" A ti leh a

"Ka puh ang che. Mi pa, fapa, fanu leh unaute i that ṭeuh alawm. Mi chhungkua i ti chhia a, nunna tam tak i laksak bawk" ka ti a

Ka kawr awm ah ṭham in a lamah min pawt hnai a, kan hnâr a insi lek lek "IN LAL IN KA PA A THAH TIR LAI KHAN TUMAH IN KAN CHHUNGKUA KHA ENG AH MAH MIN NGAI LO" a ti a, a meng sen rum a, lungngaihna nasa takin a rawn thlak leh a, ka kawr awm chu a thlah daih

Min ṭhawng lutuk ringawt "I pa maw?" Ka ti a. Lyria ah chuan he thu hi an sawi ngai lo re re. Theodore a pa thihdan kha thuthang chu a awm ngei a, ṭhenkhat in an in chem vai naah a thi an ti a, a ṭhen erawh chuan thih dan pangngai lo in a thi an ti a, tu emaw min hrilh dan phei chuan Crimson lal hian thuneihna a duh avangin a pa a that te ati a, helai hmun ka thlen thleng pawh khan ka ngaihtuah chhin ngai lo re re

Lal chu inher in tapchhak bula chair ah chuan a ṭhu a, a chauh hmel takzet, a bân a thlak thla hnuang a

"I pa kha thah a ni maw?" Zawi te in ka lo zawt a, ka khawngaih ve zawk viau mai

A sawifiah hma chuan a ngawi deuh det a "Kum thum kalta khan ania...ka la upa lutuk lo" a tih lai chuan ka va pan hnai a, a hmai a hup a, chumi hnuah a sam a kek leh ringawt

"Jaxon....ka room ah ṭap chungin a rawn lut a, thil dik lo a awm tih a rawn sawi a, ka lo ṭawng thlamuan a, Jaxon a awm chu a na telh telh" a ti leh a

Min bia pawh a ang tawh lo, amah chuan a phun bul bul a, mahse chu chuan ka hriat chakna a tihreh phah lo

"Jaxon a awm a na maw?" Ka ti a

"Ka sawi thiam bik chiah lo, mahse ka pa kohsak ka intiam a, ka va thlen chuan nunna nei tawh lo tih hriat deuhin khumah a lo mu reng a" a ti a

Lal mutna khum chu ka en ve nghal vat a

"A ṭha em tih chu ka va chian ngei alawm mahse a taksa a hliam leh hrawk an zaina thi hnuang ka hmuh khan thah ngei a ni tih ka hre nghal. Ka hmuh tawh ah chuan a la rapthlak ber ang" a ti a

Lal chuan chair chu a ngheng ṭha sauh a, tihbuai ka duh loh avangin ka ngawi reng ringawt

"Ka pa hmu hmasa ber tu ka ni. Tualthattu kha room chhungah a la awm reng a, ka hriat hma in i mite zinga mi khan min rawn rek a" a ha chang a ṭhial bawp bawp a

"Deuhsawh deuhin min nuih a, Lyria an chak reng tur thu a sawi a, khata ṭang khan ka pa phuba ka la ang tiin ka intiam a ni. Khami zana min zuah chhan kha ka hneh ngai loh tur zia nemngheh a tumna a ni ang" a ti a

A chhungte tana lehkhathawn a ziah kha ka hrethiam ta chiah mai *"Min rawn thlir ta ula, chhuang deuhin ka dar ah in vuan thei ang nge lungawi lovin min hawisan ang?"* tih a ziah tak kha mawle

Lyria a huat chhan pawh a chiang chho ta viau mai mahse zahngaihna neilo taka a chetdan erawh ngaihdam theih a ni chuang lo

"Ka tihpalh" ceiling lam thlir mek Lal hnenah chuan ka ti zawi sap a, khami ni kha a ngaihtuah chhuak leh a ni ngei ang

Ka hmaa ding Lal naupang tak hi ka khawngaih thar riau mai. A chet dan hian chhan a lo nei reng si a, thil chiang deuh pakhat chu ka pa khan Theodore a pa a thah tir ka ring miah lo. Mahse awmzia a nei chuang lovin ka hria

Indona chungchang hi ka hrethiam ngai lo, Lal lo that lawh nise Lyria tan hlawkna a awm lovang. Indona chhuah hma khan bungrua an in thawn tawn ṭhin sia, tu in nge kan lalram hming hawh a mi that duh ang? Chu aia pawimawh zawk chu eng nge Indona an chawh chhuah chhan ni ta ang?

*****

Chhunzawm tur