The Feared Crimson King 21

[B.laltlanhlui]

Alice POV

Lal pindan kawngka chu ka khar ri bur a, inher leh in ka khar ṭha leh thuai a, hmai ka phih hnuah thawk ka la vak a

Ka hawi kual a, thu ziahna dawhna ka hmu a, kal pelin ka room kawngka chu ka khar hmak a, kawngka siam nan hian hun leh tha an seng nasa ngawi ang, thing chhah tak a ni si a

Eng thil nge ka tih pawh ka hre tawh lo, mahse min rawn zawng anih chuan hmuh ka har ve det ang

Ka awm a tawt up up a, ka mittui a rawn tling ṭan. Tinge Otis a thih kher a ngaih? Tinge a ngawih ve mai loh le? Tinge Lal sual tak kher hi ka kawppui a lo nih....Tinge?

Chhuatah chuan ka ṭhu tawp a, ka inhnit hlawp hlawp bawk. Haw daih mai ka duh. Heng thil zawng zawng thlen hma hun ah khan let leh mai ka duh

Ka ti thei tawh thlawt lo. Mize hnih nei ang mai a ni. A mizia pakhat zawk hi fiamthu duh deuh, mi hriatthiamna ngah deuh a ni a, pakhat zawk erawh hi chu hlauhawm tak leh nunrawng tak a ni. Ka ṭhutna hmunah chuan ka ṭhu kawm ngal a

Ka khua a har hle a ni. Mal takin seilian tho mah ila, Lal fanu chuan infiampui tur dang a nei lova, naupang dang te chu Ball siam anih loh chuan Lal chenna ah an rawn kal ngai lova, Parcival a awm ve avang khan mal takah ka inngai ngai lo. Ka Captain ni bawk in ka ṭhian kawm ber a ni

Infiamna hun kan nei vak ngai lo, lehkha kan zir nasa a, hun thawl kan neih chang erawh chuan an vaiin kan tibuai vek zel. Indo a awm chang chauh in min kalsan ṭhin. Mahse ka nu leh pa kha an la awm tal a, tunah erawh ka mal ngawih ngawih a ni. Ka mite ka tih hlawhchham avangin ka phu tawk ka hmu anih hi

Boruak ka mamawh, ka thaw a chham dawn. Dawhkan chu ka ngheng ar ar a, Lehkha a lo awm a, thu inziak chuan ka mit a la zar mai. Alice tih a lo inziak a

Kawngka chu a rawn ri ṭhuai a, thu ziahna dawhkan chu a nghing dawt. Ka phu lutuk chu ka zuang tho zawt a

"Eng thil nge ni a?" Theodore chu a rawn au lawng lawng a

"ALICE!" A rawn tih leh chuan ka tawlhsawn a

Boruak ka mamawh, tukverh lian deuh bathlar lam kawngka chu ka va pan vat a

"Kawngka hi rawn hawng vat rawh!" Lal sual tak chuan min rawn au a, kawngka a rawn chum leh a, rawn chhut chhiat a tum em maw ni le? Hmuh ka duh rih lo asin le. Engkim hi ka ning tawh, Lal chu a la au lauh lauh a, kawngka ka hawng a "Min tih thinrim hi a hun lo viau ania!" A ti leh a

Bathlar lamah chuan ka tlan leh vak a, ral leh lam chu hmuh a nuam lutuk, a hnuai kawng chu feet sawmruk bawr vel a ni ang, mahse ka thlir hman rih lo tlat

Bathlar chu ka ngheng ar ar a, thli na takin min rawn chhem a, heta ṭang hian khawpui ka hmu thei bawk. Boruak chu ka hip lut ve a mahse hna an thawk nasa tehchiam lo, ka thisen zsm te hi a in pump ṭha hleithei lo

Ka mit ka chhing a, ka hahdam thei hram, lung vawt raih chu ka chelh a, thli in ka sam a rawn chhem siau siau a, Otis khawngaihthlaka kha aw, a nupui tak te kha! Ka hmu tawh a, awi Bianca khawngaihthlaki chu aw, ka mittui a rawn sur leh zung zung a, ka awm a tawt up up bawk

Kut lian tak pahnih chuan ka darah leh kawng ah min rawn kuah a, ka harh chiang lutuk ringawt

"Eng thil nge i tih?!" Tu nve rawn ṭawng chu ka hrechiang lutuk mahse ka lu a hai a, ka buai vek, tal chhuah ka tum a

Bathlar chhuat vawt takah chuan min pawt ṭhu hnawk a

"Shhh" a ti a, a hmel ka hmu lo chungin ka zia phah sawt, kan insawi deuh ruk ruk a

"Thawk la rawh Alice" min hahdamtir a tum a, zawi muangin ka thaw sek sek a, ka rilru vek a ni tiin ka infuih nawn char char

"Ka tihpalh Alice" a aw a lawi rut a

Ka rilru in ka infuih a, ka thaw chhuak a, ka hip lut leh chutianga ka awm char char hnu chuan ka hahdam ta, ka taksa pawh a zia deuh sawt

"I ti ṭha lutuk" Theodore chuan ka beng bulah a rawn ti sup a, ka kawng a vawnna thlah in ka sam a tuai zeuh a, ka ṭhu hle hle, amah ka nghen lai chuan thlamuanna min pe tlat

Eng thil nge ka tih le? Ka ṭhu ngil awt a, ka hnung chhawn hmak. Kan chhungkaw ṭhian thattu bulah hian thlamuangin ka lo awm ang maw? Chik zetin min rawn melh a, a hmai ah chuan thisen a la kai hnuang mai. Tlan leh nghal mai ka tum a "Alice" tiin min rawn au a, a mitah chuan inthiamlohna a hmuh theih

"Khawngaihin min kalsan rawh" ka mittui a rawn tling kuang a, ka biangah a rawn luang ngiai ngiai. Lal pindan lamah lut in ka room ka pan nghal a

Min rawn umzui tawh miah lo

Tlaiah pawh a kianga zanriah kil ka duh lo, mahse ka kal dawn lo tih a hria aniang chhiahhlawh in ei tur room ah min rawn ken a, mamawh ka neih leh neih loh min zawt a, engtin mah ka chhang lo, ka â vek mai, ka ngaihtuah chhuah apiangin ka na nawn zel

A tuk thleng chuan ka room ka chhuahsan lo. Mahni te a awm ka mamawh, a chhan chu he rama tu te mah hi ka ring zo lo. Sunna hun leh ngaihtuahna hun ka mamawh. Ka pindan ah pawh hian kumkhua in ka awm mai ang mahse ka zun a chhuak khawp mai

Dawhthei takin ka nghak a, ka ngaithla pah reng bawk

Lal pindan kawngka ri chu ka ngaithla reng a, chutah le, kawngka hawng a khar leh ri ka hria a, an chhuak a ni maithei. Anih loh pawhin tu emaw an rawn lut aniang, ka la nghak rih deuh a

Reilote chhung chu a reh deuh ṭhuap a, Lal pindan lam chu ka pan zal zal a, ka room hian tinge hallway a zawm mai loh le?

Kawngka lian tak chu ka pawt a, tu emaw an rawn ṭawng a, nidang chu nise ka phu zawk ang. Mahse ka chawmawlh vek tlat. Ka taksa in a mamawh vang chauh a la thaw ve ṭawk ṭawk ka ni

*****

Chhunzawm tur