The Feared Crimson King 20

[B.laltlanhlui]

Alice POV

General Otis lam ka hawi tawh lova, engmah sawi lo hram se ka ti hle mai. Rorelna hi tluang taka a kal chuan an zalen thei dawn tlat. Room chhungah chuan sipaite leh chhiahhlawh an awm ṭhup a, an zinga mi ka hmelhriat tih an hriat chuan buaina ka tawk ve thei tlat

Lal ka va en chuan a ṭha lo zawngin ka thin a phu dut dut. Lo ring dik lo ta ila, a khaihlum vek duh mai lawng maw? Ka ngaihtuah zawng chuan ka hmulthi a ding sung sung mai

Ring dik hram ila aw

A zaidam ve thei mai ang, amah ah hian ṭhatna a awm ve tlat in ka hria, General Otis hi chhuah thei hram se ka ti hle mai. Ka lam a rawn hawi rengin ka hria mahse ka hawi chhuak ngam tawh lo

"Nang kha! Eng nge i lo en reng?" Lal chu a rawn ṭawng chhuak a, General Otis lam a hawi a, ani erawh chu hnuai lam a melh daih

"Ka rindan vel a ni" Theodore chuan a ti a

Room chhung chu a reh ṭhiap a, Lal in rawn melh leh zeuh a, zam deuh anga lan loh hram chu ka tum

"In vaiin tualthattu in ni" Theodore chu a ṭhu rem sauh sauh a

An hawi sawn vek, ṭhenkhat chu a ṭawng ri ah ringawt chuan an phu zawk a, a bik takin heng ho hi a hrem ṭhin anih ka ring ta, ka ngaihtuah thui ngam lo zawk. A hrem na hlawm viau ang tih ka ring ta

Vawiin chu tumah an ṭawng ngam ka ring lo

Lal chuan a sawi zawm a "Ka mite that in Lal sual tak tan in thawk a, huatna chauh lo chu in tan engmah ka nei lo" a ti a

Ti chuan a ṭha dawn lo tawp mai

"Mahse ka lo sawi tawh angin dik takin ro ka rel dawn a ni. A awmzia chu...."

A mal te te chuan a han melh hlawm a "...duh in thlang dawn a ni" a ti a

'Duhthlanna maw?' Ka rilru in ka lo ti a

"In Lal ah min pawm a, ka tan rinawmna thu in tiam anih loh chuan thih in thlang thei ang" Lal chu ngeiawm deuhin a nui suk a

"In hrethiam lo em ni?" A han ti khawk rum rum a

Tu mah an che ngam lo, ṭawng ngam pawh an awm lo

A thih tir dawn lo maw? Ka thinlung hi a dam phah sawt mai. Ka lo ring dik ngei anih hi. Mi ṭha tak chu a ni ang, ka kawppui a lo ni pawh hi pawi ka ti ta lem lo

Theodore chu a ṭhutna aṭang tho in mi tang ho lam a pan a

"Tu in nge rawn sawi ṭan dawn le?" A ti a

Chu veleh Rorelna room chu a rawn khawk rum rum a "Lalber dam reng rawh se!" A rawn ti luah luah a, Otis-a a lo ni, thu a zawm tur chu a lawmawm hle mai

Lal hmel chu ka hmu thei lo, a hlim veng veng ang tih ka ring mai. Mahse Otis pawh a lo nui ve tho mai

"Lyria tan mawle, nang mi nunrawng pa!" Tih pahin min rawn siai zeuh a

Awi a ni thei lo! Thih a thlang zawk tihna! Ka thin a phu nasa lutuk chu a inthum rawn tlut tlut mai. Ka bengah a ri dup dup, Lal chuan General Otis lam a pan a, a hmaah dingin a biangah vawi hnih a beng a, a hnâr leh hmui a thi sung mai. Awi ka en ngam tawh lo

Room chu a reh ṭhup a, engkim hi a vir muai muai in ka hria

Otis a biang ri chawk chawk thawm bak hriat tur a awm lo. Ka che thei tawh lo, thawk a va har ṭalh ṭalh em. Otis chu a tawlh hnung a, Lal chuan a la hnek char char. A biangah a nghawk ri leh pawp te chuan min ti ṭim sung sung mai

"Duhtawk rawh" ka ti thawp sat a, an hmel ka hmu lo mahse Otis chu a che sawn tawh miah lo

"A tawk tawh" ka ti ṭial rut a, ks khur hlawk hlawk bawk. Kan chhungkaw ṭhian chu thisen in a bual a, a thi mai ang

"Tawp rawh!" Ka theihtawp in ka au a, Lal erawh chuan Otis lu chu chhuat ah a tauh tir reng a, chumi hnuah a rawn ding leh a

Otis chu a che tawh lo, inzi mar tur pawh a awm lo, a thaw tawh lo re re, Lal sual tak chuan a that ta a ni

Ka mittui rawn luang chuan ka sam a hip bet vek, ka hriat loh in ka mittui a lo tla anih hi. Tuna ṭawngkam mil ber tur chu 'Rapthlak' tih a ni tawp mai

Ka thaw chhuak halh a, Lal chu rawn ding ngil at in min rawn melh a, min la hnungchhawn reng tho, a mizia hlauhawm deuh kha a rawn chhuak leh ta

Crimson Lal, ka kawppui nunrawng chu, a meng dur khup a, a biangah thisen a kai hnuang a, a thaw ri hum hum bawk. A bân dinglam ah thisen a kai bawk a

"Tu nge duh ve dang in awm em?" A au ri rum rum a, a kianga mi tang te chuan hlau in hnuai lam an melh vek

Heng hi ka mite an ni asin, ka hlawhchham der anih hi. An thih dawnah pawh tunge ka nih ka lo in theihnghilh a, chu aia fuh lo zawk chu tu nge anih ka lo theihnghilh kha a ni. Engtin nge ka lo at viau theih zawk le?

He pa thinlung ah hian zahngaihna chhete a awm ka lo ring kha ania

"Ka hua che" tih pahin ka inhnit feih feih a, room chhungah ka tlan kual leh a, thaw la hawk in in thin harh ka tum a, ka insum thei lo anih chuan min hrechhuak mai ang. Lal fanu ka ni tih a hriat phei chuan min tirethei dawn lutuk. Chuvang chuan min hrechhuak tur a ni lo.....

Ka duh tawk tawh e, ka hre duh tawh lo. General Otis hi ka hriat theih chinah kan chhungkaw/kua rawng a bawl reng ṭhin. Lal chenna Hall ka thlen phei lai chuan kalna tur ka vai vek. Otis khawngaihthlaka tak chu aw! Ka kalna tur lam chu ka mittui rawn tla nen ka hmu chiang hleithei lo

"Hello Lal fanu" min rawn tlawh apiangin hlim takin min chhawn ṭhin. Ka theihnghilh thei tawh lovang. Awi a ni thei lo

A nui ri te kha ka bengah a la cham reng mai. Sipai zinga pakhat chu ka su dawrh a "Lady Alice?" Min rawn ti a

"...lal fanu", a ti ri chauh kha ka bengah a cham reng mai

Hetiang chuan ka ti lui thei lovang. Nuam ka ti ve ṭan dawn chauh a, mahse min ti hrehawm leh ta anih hi. Engah mah an ngai der si lo. Khang mi khawngaihthlak tak te kha aw!

An tuar nasa asin, ka thiamloh ah ka ngai lo thei lo. Ka hlawhchham a ni. General Otis khan min rawn hmu lo se chu a dam chhuak ve mai tur ania

Awi ka hrethiam thei mawlh lo

*****

Chhunzawm tur