The Feared Crimson King 17

[B.laltlanhlui]

Alice POV

"Ṭhu rawh" zanriah eina room ka luh rualin Lal chuan thu min lo pe a, engtin mah a chet a tum der mai si lo

Engpawh sawi sela, ka mood hi a chhe thei tawh lovang. Ka mite an chhuak ka hmuh khan thlamuanna leh hlimna in min rawn tuam a ni ber mai, vana thlawk der der ang mai ka ni

An zalen tawh avangin ka lawm hle a ni tawp mai. Ei tur an rawn chhawp hnu a ka ṭhutfel thleng in Lal chuan min en lo re re

Tlem ka ei hnu chuan rawmawl in ka hmui ka hru a, ka biak ngei a ngai tlat. Sawi duh ka nei alawm
________________________________________

Theodore POV

Ka rilru chhungril hi a insual buai nasa, mite chhuahtir kha ka tum danah a tel lo hrim hrim. Tu nge thi anga dam ang tih hriat chiah kha ka tum ania, indona kan ṭan chiah a, tanin pawh a khat ṭhap bawk. La awm belh tur an tam hle bawk ang

Engvang nge ni ang le?

Ei tur plate a an rawn chhawp chu ka nawr sawn a

Ka chhuahtir avangin hrehawm ka ti anih hi

Ka thurin bul ber ka hlut em em chhia leh ṭha hriatna hi tun hunah hian a inchawhpawlh kual nuk mai. Bel chhunga chawh kawi ang mai a ni. Lyrian ho hi an inang vek tih ngaihdan ka nei a, ka rilru a buai chhan pawh hi he nu vang vek hi a ni

Tinge ka chhuahtir khan dik tlata ka hriat si le? Alice-i mita hlimna rawn chhuak kha tinge hmuh nuam ka tih em em? Ka â zo vek dawnin ka hria

Hlimna leh thinrimna chuan min rawn tuam a, tihdan tur ber pawh ka hre lo. Jaxon ka biak ngei a ngai a ni

"Lawmthu hrilh che ka duh a" Alice chuan a rawn ti chhuak hlawl a, kan mit a intawng chat. A meng de sawr sawr in ka hria

"Eng chu? Ka rorel dan vang khan maw?" Tih pahin ka thaw hulh a

"Khang mipui ho chunga zahngaihna i lantir avangin" a hmui te tak te aṭang chuan a rawn nui seih a

Hei hi infiamna chu a ni, meialh a infiamna chu! Tu emaw chu an kang dawn khawp, kei ni lovin

"I tana ti ka ni hleinem" ka tih pawhin a nui hmel a bo thei lo

"Ka hria alawm mahse lawmthu hrilh che ka duh tho, ka mite ka sawi awmzia chu Lyrian mite chunga zahngaihna i lantir avangin" a ti a

"I mite maw? I ram awmna hmasa chu i la ngaina hle a ni maw?" Ka ti a

"Ka chenna hmun a la ni reng alawm, Aw Lalber" a ti a

A hmuh tawh ngai loh tur ram tan a la rinawm hle ang tih hi ka ring pha lo hrim hrim. A lehlam zawng erawh chuan Lyria ah awm tur ni ta ila ka pawm theih bik ka ring lo. Kan inan lohna chu Lal chhungkua ka nih avanga rorel ka ni a, ani erawh chu a ram chhunga cheng chauh a ni

Engmah ka sawi chak tawh lem lo, wine an rawn keng chiah bawk nen, a hun tawk viau mai. În tur hian ngaihtuahna pik lutuk ata min ti zalen mahna le

Ka glass chu wine sen in an rawn ti khat a, chhiahhlawh naupang chu let leh tum in a inher a

"Lady Alice khan în tur a duh leh duh loh i zawt dawn lo em ni?" Ka rum nghut a. Ka ngaihven vang pawh ni lovin ka chhiahhlawh a nih angin a ṭha ber ka beisei. Mikhual pawimawh deuh ka neih phei chuan a thinrim thlak alawm

Chu veleh rang lutuk in chibai min buk a "Ka tihpalh lutuk, Aw Lalber" a ti a

Alice-i awmna lam dawhkan a pan a, hmel chu a lo dam dap

"Wine i duh ang em ka Lalnu?" A ti a

"Aw duh ang khawngaihin" a nui seih a

Reilote hnuah a glass chu a khat ve a, naupang pawh a chhuak ve leh mai

Ka tep zeuh hnuah engemaw ka sawi a "Hmeichhe fel deuhin wine an in ngai lo sn tih kha dawt anih ka ring ta" ti chungin ka khi suk a, hriatthiam a har reng a ni

"Ka în ngai lo mahse vawiin hi chu ni danglam bik ania. I thiltih ṭhat avangin kan lawm dawn alawm" ka lam hawiin no chu a chawi kang a, min rawn nuih sen sen

Kan â dun tak tak anih hi

La khi reng chungin a no chu ka va tawk chat a, wine a lem rualin a hnâr chu a hup a, ka tlak ve pawp, engtin mah ka awm lo

"Tinge heng hi in în ṭhin le?" A ti nuah nuah a, a buai hmel khawp mai

"A tui ka ti viau asin. Mi awmthei chhung in ni chungin i în ngai lo anih ka ring" ka ti a

"Ka la tem chhin ngai miah lo..." mutchhuak deuhin a ti a

Ka lo nui chhuak hlawk, a vawi khatna atan min tih phut loh ṭum a ni ang

Kan ei chhunzawm leh a, kan glass chu a zo leh ṭhak "Chhiahhlawh te u" ka koh lai takin Alice chu a rawn zuang tho zawt a

Mipa naupang bawk kha bottle kengin a rawn tlan a, ka în lai chu hmuhnawm ti deuhin Alice chuan min lo en a, a no chu a chelh ran bawk

"Ka în zat rawn în ve i tum anih chuan ka duhtawk mai ang" hnehsawh deuhin ka ti a

Kum tam tak ka lo în ve tawh a, ka rui har ve deuh tawh. Vawikhatna ah pawh khan engtin mah ka awm lo. Juice în ang lek ka ni

"Min cho suh aw, mi chak lo ka ni lo ania" a mitko a rawn san ralh a

"I duh a thu le" ka ti ve mai a

Ka vawihnih în zawh laiin Alice chuan vawikhatna a zo ve ṭep "En la ka rawn umphak ṭep che hi" tih pahin a nui ker ker a

A biang leh beng kawm a sen ṭun tawh "I rui anih kha" ka ti a

A thaw hak a "Aih, aih, aih, ka rui lo, a lum ka ti ringawt alawm" a hmai a zap hliau hliau a

"A ṭha e" tih pahin ka ṭhen suk a

Ka glass chu tikhat leh turin naupang room chhunga lo la ding reng chu ka ko phei a

Khang mi ho ka chhuahtir kha a dik ang em? Tih ka la ngaihtuah reng. Ka ram phatsan ang hi in ka inngai. Lo nei mi te vang khan ka ram ka phatsan em ni le?

"Ka tihpalh, uh...." Alice chuan ka în tur thli tu naupang chu a bia a

"Ngawi teh i hming ka hre miah lo, ka van â tak" a tih zawm a, a sam sei hniang rawn tla leh ṭhin chu a bengah a zep a

"Uh...Arthur ka nia, ka Lalnu" a ti a, a zam hmel angreng. Mi pawimawh tak pawh a ni lova tinge a hming a zawh kher le?

"Awle Arthur, kan inhmu chu ka lawm hle mai, ka no hi i rawn thli khat thei ang em?" A ti a

Alice chu ka lo en tui lutuk a, ka no a liam ṭep alawm le

"En ta che" ka ti hluai a, mi mawl in min hual vel anih hi a

"Aw khawngaihin min ngaidam hram rawh" dawhkan chu kal hualin Alice-i no chu a thli ve leh a, a mit a la sawn eih lo

A no chu a chanve a thlen chuan ka lo inseh ruh a "A tawk e" ka ti a

Mipa naupang chuan a lu bu zeuh in a kalsawn a, Alice chu a melh leh zeuh a "I bula awm hi a nuam lo em mai...." min nuihsawh hmel deuhin Alice chuan a ti a

"Ka pangngai lutuk ania, ka ruih theih pawh ka ring lo" tih pahin a tep leh zeuh a

"Engpawh ni teh se a" ka ti sup a

"Tinge i nelawm loh em em le?" A insawi lu buk buk a

Ka chhan hun pawh nghak lovin a sawi zawm a "Zawhte nelawm loh deuh ang mai hi i ni" a ti a

"Nilo, ngawi teh, i lian deuh zawk a, sakeibaknei nelawm lo deuh ang mai zawk i ni!" A ti leh a

A rui chiang anih hi

"Harhfim la chu min tihdan vang hian hrem theih i ni chiang alawm mawle" ka ti a, a ṭap leh ngei ang a, a ṭap lai hi chu hmuh ka duh lo

A plate ei bang chu a nawr sawn a, dawhkan ah chuan a lu a nghat a, a khi leh ver ver

"A chhan chu Sakeibaknei ang i ni, an ropui a...."

A mit chhing in a rawn meng leh zeuh ṭhin. A muhil ta der mai. Ka lal lukhum tla lo chiah chiah in ka sam ka hui pawp a, Dawhkan ah a muhil thei hi mak ka ti hle mai

****

Chhunzawm tur