The Feared Crimson King 5

[B.laltlanhlui]

Alice POV

Ka khup kuah nghet sauh in ka kun char char. Tumah hi hlim hmel ka hmuh thei lovang, thawmhnaw bawma awm reng chung hian, zawn chhuah theih loh nih reng mai ka duh

Pen thum vel an kal hnuah thawmhnaw bawn kawngka an rawn hawng ri ṭhuai a, a chhe hial maithei a ni. Ka hawi chho ngam lo, tunge anih ka hre tlat. Ka khur char char a, second reilote chhung chu engmah thleng lo ang mai a ni. Ka bân ah min rawn pawt tho a, min hruai chhuak daih

A hmer nat em avangin min vawnna chu phelh ka tum a, ka la meng ngam chuang lo. Ka taksa hi tih nat a duh chuan tih theih ka nei lo, chhantu ka nei bawk si lo

Min rawn chelh nghet sauh a, ka rum leh nghut, a mitah tak en turin thu min pe a, ka khap nghal sawk, meng zau kawk in ka en a, ka thin a phu ri dup dup mai. Amah a sang si a, min khuh hlup maiin ka hria

Kan mit a intawng chat a, reilote chhung chu a ngaihtuahna ka hre thei hial mai. Eng nge ni tih ka hriat hma chuan ka hmai a beng ri chawrh, ka rum nghat a, a vung nghal in ka hria, tun ṭum phei chu a tha zawng zawng a hmangin ka hria, a thip sa vat vat mai alawm

Ka mit ka chhing tlat a, min rawn ben leh ngei ka ring mahse engmah a ti tawh lo tlat. Ka bân a vawnna a thlah a, chhuatah chuan ka ṭhingṭhi thla hnawk. Ka ip nghal chawih chawih

Ka mit hi thip viau lo se chu ka ṭap tawh hrim hrim ang. Natna dang a lo kal leh dawn em ni? A tir chauh a la ni em? Thawk ka la leh hluai a

Ka beisei loh lutuk in a tawlh hnung a, ka meng zau leh kawk a, a hawisawn a, a kal hma chuan engemaw a sawi a "Ni thum chhung chaw i nghei ang. Chhiahhlawhte leh sipai te'n an chhuahtir che anih loh chuan hetah hian i awm reng ang, i hrethiam em?" A ti a

Rang lutuk in ka lo bu nghat a "I HRETHIAM EM?" A rawn ti nawn leh a

"Awle, Aw Lalber" ka ti zawi sap a, min chhuahsan ta, ka thawveng nghal huai mai. Tun ṭum chu ka thawmhnaw min phelh tir a tum tawh lo tlat, a lawmawm zawk viau mai

Ni thum chhung chaw nghei chu ka thei ang em le? Chumi zan aṭang chuan chaw mumal ka ei ta lo char char, ka mitthla ah ka nu a lo lang a

"Duhtak Alice, thil i ei tur alawm" ka nu Lalnu ni bawk chuan min ngaihtuah tih hriat takin min en a

"Lal Theodore kher i kawppui a lo ni chu a ṭhawng hle mai che tiro, mahse i dam ṭhat kha a pawimawh ania" a tih zawm a

Ka pa hian khuanu ruat chungchang hi a ngai thutak si a, chhan a awm chu ani phawt ang

Awi a ni thei lo

Ka van haw tak em. He lalram leh Lal in chhunga cheng zawng zawng chawp hian ka hua/haw hluah hluah

Ka tho a, khum lam panin lukham ah chuan ka lu ka phum a, ka au nghek mai. Kawngka an rawn kik hma loh chuan ka tawp mai lo

Ka ding a, ka rilru na bawk si chu ka biang a sen vek, ka dang a ro hle bawk

Kal sawn turin ka hrilh thei bawk si lova, tinge an rawn kik kher le? Ka nghak leh phawt a, kawngka chu zawi muangin an rawn hawng a, nu upa lam deuh hi a rawn dak a

"Hello, Lady Alice" a ti a. Tunge anih le? A hmai a bial a, a chuar ve deuh hlek, tawi te in a rawn nui a

"Hello" ka aw a lawi vek, ka au na lamah aw chhuak tur pawh ka nei tawh lo

"Ka lo lut thei ang em?" A ti a

Lo bu nghat in "Thei tehreng mai, khawngaihin lo lut rawh" ka ti a

Tun hi mi nunrawng ni lo ka vawikhat biakna a ni hial awm mange, thu a la sawi hnem lo viau na a, a zaidam dawn tih ka hre nghal mai. Room ah chuan a rawn lut a

A inthuam dan plain changkang si aṭang chuan chhiahhlawh a ni ngei ang

"Ka van â tak em, ka inhriattir theihnghilh che, Jane ka nia, chhiahhlawh te zinga a lu ber ka ni. Lal Theodore a'n bual tur che in thu min pe a" a ti a

"Kan inhmu chu a lawmawm hle mai Pi Jane, Alice ka nia" tawi te in ka nui a, chakna pawh hi ka nei meuh tawh lo

"Kei deuh hi alawm lawm chu, khawngaihin min lo zui ta che Lady Alice" a ti a

Ka lo bu deuh nghat. Kawngka ah zui chhuak in hallway lam kan pan a, ngaihtuahna ka nei thut

"Pi Jane, khawngaihin thil ka dil thei che ang em? Chuan Alice tiin min ko rawh. Walzenor ah hian nihna ka neih ka ring lova" ka ṭawng pah chuan hnuai lam ka melh a

Rawn nui seih in, min rawn chhang a "Tehreng mai Alice, mahse rem i tih chauh in. Kei ngei pawh hian khuanu ruat hi ka ring a, ka pasal hian hlimna min thlen ngei alawm. Chuvang chuan engtik niah emaw Lalnu Alice ka la tih che ka ring tlat" a ti a

Ka hawi kual a, Lyrian mi hian a hmelma kianga ro a rel tur ka mitthla hian ani thei dawnin ka hre lo, ka lu ka thing ringawt

"Ka chiang ngam lo, Pi Jane" ka ti a

Inbualna room zau lian tak kan thlen chuan kan tawp nghal chawt. Pool zau lian tak ah chuan thil dahna a lo awm a, oil chi hrang hrang leh sahbawn sawmhnih chuang vel an dah tlar ṭhut a

Pi Jane-i chuan basket tereuhte a keng a
"Khawngaihin i thawmhnaw kha hetah hian i dah dawn nia" a ti a

A chhuah hun nghakin ka lo bu nghat a

A che eih lo

Ka kal kual leh char char a

"Eng nge dik lo a awm em ni?" Pi Jane-i chuan hriatthiam loh hmel zetin min rawn zawt a

"I sawi awmzia chu hetah hian i awm ve dawn em ni?" Ka ti bah nuai a

Min rawn melh leh a "Awm dawn e a, ka bual dawn che alawm. I inbual na ah ka lo pui ang che" a ti a

Lyria ah chuan a hranin kan inbual ṭhin kha ania, tumah an inpui ngai lo

"Awle" ti bah nuaiin ka inphelh ṭan a, a hnuah phei chuan ka kawrhnuai leh panty nen chauh ka ding teu mai

Hmanhmawh lutuk in Pool chhungah ka lut nghal. Pi Jane-i erawh engtin mah a awm lo. Tui ka dai chiah chu ka rin loh lutuk in a lo lum tlat

Ka dam nghal huai huai mai, Pi Jane-i'n ka lu ah hriak chulh in min rawn massage a

Hei hi vanram a nih ngei dawn hi. Ka natna leh hlauhna te a bo zo vek. Tui lum nuam takin min han dek a, Pi Jane-i kut a lo dam bawk si, reilote chhung vanram kai ang ka ni

Ka taksa pum chuan min bual a, ka bân a hmu chiah a "Kha chhinchhiahna kha khawiah nge ka hmuh kha aw. Triquetra tereuhte kha Lal in a nei ve in ka hria, ka la hmu chiah chuang lova" a ti a

"Lal chuan hemi ang hi a nei ve maw?" Ka inrin hma chuan ka kâ aṭang a chhuak hman vek

"Aw, chhinchhiahna kha maw? A inang chiah chiah" a tawp leh det a

"Thuthang ka lo hriat danin Lyria ah chhinchhiahna inang pasal a nei lo chu hrem theih an ni, an ti a, thudik a ni ngei em tih min hrilh thei ang em?" A ti a

*****

Chhunzawm tur