Perfect (Chapter-9)

[Rebec Nunziri]

Chapter-9



Lalchhandami POV




Class ka la zo office lam ka pan lai chuan ka phone a ri a, no hlang atang a ni, a pawimawh takin tih thil thuah ka la a, hmeichhe aw ka hre zawm zat bawk, "Tunge aw?" ka ti leh sep a, "Chhante keimah Kimkimi ka nia, hun i neih chuan kan in hmu lawk dawn em ni?" lehlam atang chuan a rawn ti a, min hmuh duh chhan tur awm ang ka hre lo, "Class ka la zo chiah a, reilote chu ka hman ang" thu pawimawh lovah min hmuh a duh ka rin loh vang chuan ka ti a, "Awle.. in school bulah ka awm a, ka lo nghak ang che" a tih hnuah call kan ti tawp a. Office ah chuan lut in teacher dang te bulah ka chhuah lawk tur thu ka sawi hnuah ka chhuak a, Kimkimi chu a sawi ang ngeiin school bulah chuan min lo nghak reng tawh, "Lunch ei pah in kan sawi dun dawn nia" a tih takah chuan restaurant lam kan pan a.




Eitur ka chah hnuah nui sang in min en a, lo hmachhawn dan mai tur pawh ka hrelo, "Thil ei pahin kan sawi dun dawn nia" hriat nuam zet chuan a ti a, "Awle" ka ti mawl tawp. Eitur a lo thleng a, kan ei nghal, "Ka hmuh duh chhan che chu Zonuna chungchang ah a nia" a ti sep a, Kimkimi chu ka en nghal vat, "I hre tawh tho anga, Delhi a kan awm lai atang tawh in kan in zui tawh tih chu, kan kum a naupang chhe zawk zawk tawh lo bawk a, in neih lam te hi kan sawi tawh a" a tihchuan ka nghing lawih thei, "A nihchu, mahse Ngatinge chutiang thu chu min hrilh a?" ka ti ro halh, ka tawng chhuak thei tawk a ni. Ka thil ei lai pawh ka ei lui thei tawh lo, Kimkimi ringawt chu ka en a, a nui deuh sang a, "Zonuna hian i chanchin hi a sawi nasa thin a, a tan i pawimawh hle tih ka hriat vang a nia ka hrilh che" a nui har har a, kei erawh ka nui lui thei tawh lo hrim hrim.




"Zonuna pawn hrilh che chu a tum tho ka ring, mahse ka lo sawi hmasa a nihchu" thil ei pah chuan a ti leh a, helai hmun atanga kalsawn vat hi ka mamawh takzet a ni, thaw chham a la thih hma ngei hian. Kimkimi chu a la tawng tui ngang mai, U Zonuna nen a phai an awm laia an awmdan te, an in zui nasat thin thu te chu a sawi a, a ni tan sawi nuam viau mahse ka tan erawh thil hriat hreawm ber a ni thung. Ka tuar thei tawh ngang lo, "Chawhnu lamah class ka neih vangin ka kal a ngai tawh a, min hrethiam dawn nia" ka ti ta ringawt a, "Awle, keipawh hnathawh na lamah ka let leh a ngai tawh tho a, Zonuna'n min lo zawng leh nasa tawh ngawt ang, min hmuh loh chuan a buai nghal vek zel a" a ti a, chhang tawh lemlo chuan harsa ti zetin ka nui lui hram a, kan kal hran hnuah chuan ka thaw chhuak kawk kawk a.




Ka thu hriat te khan min thawng lutuk mah mah a ni, nizan ah mai khan U Zonuna chuan a thusawi awih turin min ti a, zankhua in ka mut theih loh phah nghe nghe, ka rilru kilkhat chuan chance vawikhat tal pe leh turin min ti a nihkha, min va han bum nawn teuh ve le, U Zonuna hi eng ang mihring chiah nge maw a lo nih le, engtinge keihi in fiam nan min hman a tum theih zawk. School ban hnuah chuan inah ka haw nghal a, vawin a Kimkimi nen kan in hmuh a a thusawi te chuan min ti chau vek a, ka nu hnenah ka nawm loh deuh thu sawiin room ah mu turin ka lut ta daih a, khumah chuan ka mu a, engdang mah ka ngaihtuah theilo. Ka thinrim a, tih theih ka nei bawk silo chu nep ka in ti ru hle bawk, ka muhil lai chu Tlanchhuahi'n min rawn kai tho.




"U, Anu in han kai tho rawh a ti a, chaw kan ei dawn a, I ei ve peih a ngem?" a ti sep a, "Ei lo mai ang, ka lu a la na deuh a, mut hahdam ka duh, chuan ka nu hnenah kha damdawi ka ei tawh thu sawi nghal bawk la aw" ka ti a, a nui hak hak hak, ka nu hi chu kan damloh tawh hi chuan a mangang hma thin si a, damdawi ei duh lo pawh ni ila min ei luih tir hram zel. Tlanchhuahi a chhuah hnuah pawh ka thut ngai chuan ka la thu reng a, ka phone a rawn rik chuan ka la phu zawk zui, U Zonuna a lo ni, ka ner nghal nawk, la lovin ka off nghal hmak a, mahse a rawn ti nawn zel tho, ka ning lutuk chu ka phone la lawk in U Zonuna chu ka block ta daih a, ka phone pawh ka switch off nghal daih bawk. Nupui nei mai tawh tur a ni a, kei min rawn tih buai tum lovin a nupui hual chauh buaipui rawh se.




Chaw ei kham awm vel ah chuan ka nu chu room ah a rawn lut a, "Bawihte, i nuamlo viau em ni?" tih pahin ka chal a rawn dek a, "Nuamlo lutuk lo ve, ka lu a la na deuh mai mai mawle, nu ngaihtuah ka ngailo a nia, tihian ka awm hahdam deuh anga ka zia mai ang" ka ti nghal vat a, "I damdawi ei chuan a chhawk tawh hrim hrim che em, engmah ei lova awm tawp chu a ṭhalo, soup ka lo siam ang che, in la i zia deuh mai ang" a tihchuan ka hnial duh lo, hnial pawh ni ila a tilui dawn tho tho. Ka nu a chhuah hnuah chuan mu chungin inchung lam chu ka en vung vung a, engtik ah nge U Zonuna ka duhna hi a reh ve ang le, nupui a nei dawn tih ka hriat ringawt pawn hetiang khawp hian ka na a ni si a, nupui a neih hunah phei chuan engtinge ka hmachhawn tak ang.




Ka nu chu a soup siam nen a rawn lut leh a, ka lo nuih sang, mahse ka nui lai chu ka tawp leh rang ngei mai, ka nu hnungah chuan U Zonuna a rawn kal ve a nihchu, ka nu chuan soup chu dawhkan te ah a dah a, "Bawihte, heihi rawn in zo la a sat lai hian, Zonuna hian a rawn kan che a nihhi, Zonun lo thu rawh, Bawihte nangpawh rawn tho chhuak la" ka nu chuan a ti leh zung zung a, phur lo zetin ka tho chhuak a. Soup chu ka hawp a, a tui nge tui lo pawh ka hrelo, ka nu leh U Zonuna chu an la awm ve reng a, ka hawi chhuah apiangin U Zonuna chuan tak run in min lo melh thin a, ka en rei duh ngailo, min en vanga zam ni lovin heta a rawn la kal ngam vang hian ka thinrim hlur bawk, mahse ka nu a la awm ve reng vangin ka thinrim na tih lan a rem teuh bawk silo.




Soup ka hawp zo a, ka nu chuan plate ruak chu a lo la vat, "Tikhan lo inkawm rawh u" tih pahin a chhuak nghal a, ka nu a chhuah hnuah chuan khum lamah ka kal lehnghal a, U Zonuna chu biak pawh ka tum lo, "Na lai I la nei em?" a rawn ti sup a, khumah ka thu mu a, "Neilo, mut hahdam ka duh, chuvang chuan min lo va chhuahsan ta che" ka ti hmak a, "I that tawh chuan thil sawi pui duh che ka nei a" a tih leh chuan a sawi tum awm ang chu ka hre nghal mai, ka ngawi reng a. Khum lam pana a rawn kal chu ka lo en reng, ka sir ah chuan a rawn ding thim khup a, "Vawinah Kimkimi nen in in hmu em ni?" a ti leh sup a, "In hmu e, min hmuh duh thu a sawi a" ka ti tha ve mai, "Eng chungchang nge in sawi?" a va dil chhut tak e aw, "Kimkimi zawt mai ta che, chuan min chhuah san tawh rawh, ka mu hahdam duh tawh" ka ti leh hmak a, an inneih na tur chungchang vel Kimkimi'n min hrilh tih ka sawi duh tawh lo a ni.




"Bawihte, lo dam vat rawh aw, zanin chu tihtur tul ka nei a, I damlo tih ka hriat vangin ka rawn kal a nihhi" a tih leh pawh chuan ka chhang peih tawh lo, kawngkhar in khar thawm ka hriat takah chuan ka thu chhuak vat a, ka awmdan pawh hi ka hrethiam tawh lo, U Zonuna hi hnaih ka duh tawh lo ti chung si hian hmeichhe dang a hnaih chuan hreawm ka ti tho bawk si, tun atang chuan ka rilru ka siam fel a ngai takzet tawh a ni. Nupui nei mai tawh tur a ni a, chuvang chuan hetiang hian ka awm thei lo, ka ngaihtuah na ka kawm melh melh lai chuan ka lo muhil daih a, zingah chuan ka tho hma khawp mai, inhnuai ah chhuk in rawng ka bawl nghal mawlh mawlh a, U Mami chu a rawn tho chhuak ve vat, "Mate, enge I an?" a ti thuai a, "Ka tha tawh lutuk, nizan ka mu hma bawk sia, tukin chu ka tho hma deuh a nihhi" alu vel mawlh mawlh chung chuan ka ti a.




Min rawn pui ve zung zung a, midang pawh an rawn tho chhuak sap sap a, chaw kan ei lai chuan ka pa in "Mate, vawin chu school ah rawn kal lo mai ta che, i dam tha silo a" a ti sup a, "Pa ka tha tawh lutuk, ka kal zawk ang, kum a tawp tep tawh sia, tan a ngaih hunlai tak a nihhi" ka tihchuan min hnial biklo. School kal tura ka in peih fel hnuah room atang ka chhuak a, Tlanchhuahi chuan min lo nghak reng tawh, in atang kan chhuak a, kan in be pah mawlh mawlh, school kan thleng a, scooty ka park fel hnuah Tlanchhuahi chu an room lamah a kal a, keipawh office ah ka kal nghal. Class ka lak lai te chuan nidang ang ka nilo, ka mood a off em em a, naupang te pawh in mak min tih hmel hle, mahse ka mood fuh loh vang mai mai a naupang ho tullo lutuk a hauh chiam ka tum hran lo, nidang angin class ka lak laiin fiamthu vel ka thawh lo tih a nimai.



Zonunsanga POV




Thinrim zetin office ah chuan ka thu a, engtinge Bawihtei a lo va hmuh ngam zawk, Bawihtei hmel ka hmuh khan Kimkimi hian eng emaw a sawi tih ka hre nghal bawk, ka office ah ka koh avangin a rawn lut vat a, kawr nghawng a hnute lang tep khawp a zau a ha a, kekawr pawh a mal phiat mar tang tur a ha bawk, nui sangin ka table hmaah chuan a lo ding a, ka melh ngar "Nimin ah Bawihtei i hmu tih ka hria, enge i sawi?" ka ti hmuk a, "Oh.. kan in hmu tih a hrilh che a nimaw?" tiin a ner sawk a, "Enge a bulah I sawi sawi mai rawh" ka lo ti leh nghut, "Eng vak mah ka sawilo, a hrim hrim in a va che rang ve, kan in hmu tih a hrilh che pawh ka lo ring lova" nui hak chungin a ti leh a. Ka kut chu hum ruh tak ka ni, "Vawikhat chiah ka sawi leh ang, Bawihtei bulah enge i sawi?" chiang fek fawk chuan ka ti leh a, "Kan in neih tur thu ka sawi mawle" ka thutna atang chuan ka ding chhuak nghal zawt.




"In neih, nang leh kei hi maw?" nui hul hak chungin ka ti a, "Ni e, nang nen hian kan in zui na a rei tawh a, kan naupang chhe zawk zawk tawh lo bawk, chuvang chuan in nei pawh ni ila enge a pawi na tur awm?" zak map lovin a ti a nihchu, "Lalrinkim, theihnghilh suh, nang leh kei hian eng in zawmna kan nei tawh lo, hnathawk dun satliah mai kan nih tawh hi, chuvang chuan nang leh kei hian in zawmna kan nen ang maiin engmah sawi tawh suh" ka ti chhum hmuk a. "Ka pawm lo ka tihkha, engtinnge hetiang mai hian kan in zawmna a tawp theih ang, khatiang khawp khan kan in zui nasa a, tunah awlsam takin kan inkar I ti tawp ang maw?" a ti tuar a, ka lo ner sawk, "Ka sawi nawn tawh lovang, nang leh kei hian eng in zawmna mah kan nei tawh lo, chuan Bawihtei pawh vawikhat mah lo hmu tawh suh ang che" ka ti chhuak leh hrawk a.




"Engvangin maw, kha hmeichhia rawn lan hnu atang khan engvanga danglam ta vek nge i nih a, engvangin nge hetiang hian i awm, ka tan hian a fair loh zia i hria em, a hma te kha chuan ka tello in reilote pawh I awm theilo kha a ni a, kha hmeichhe rawn lan hma kha chuan eng buaina mah kan nei loh kha" mittui tling pam chung chuan a ti a, "Ngawi hmak rawh, engkim hrechiang ber tu i nihkha a tir atangin bialnu ka nei tih i hria, chuti chung chuan beidawng duh lovin min zar buai reng a, ka rilru kal sual in nangmah vang phiangsen hian ka hmeichhe hmangaih chu na takin ka siam a sin, tunah chuan natna pek leh ka duh tawh lo, chuvang chuan lo in thiar fihlim ang che" ka ti nghet charh a, ka sawi mai mai lo tih hre turin kan in hrechiang tawk tawh bawk.




"A teuhlo, ka ta chauh i ni, kha hmeichhia lakah khan ka chan dawn reng reng lo che, a ni ai khan sulhnu kan nei tam tawh zawk, chuvang chuan ka beidawng lovang" a ti leh that a, "I duh duh chu ti rawh, mahse nangmah vang mai mai hian ka hmeichhe hmangaih hi kalsan ka tum tawh lo, a tir atang a ka hmeichhe duh leh hmangaih awm chhun chu Lalchhandami hi a ni, hmeichhe a I nilo tih ka hria, chuvang chuan engmah buaina siam lovang che, mipa nangmah hmangaih tu diktak chu I la tawng em em ang" ka ti a, ka rilru diktak ka sawi bawk, Kimkimi hi hmeichhe chhelo leh mahni lu zo veh vawh tak a ni a, a phu tawk mipa chu a hmu dawn lutuk. Beidawng hmel zetin min en a, "Ka neih theih nan che ka theihtawp ka chhuah a, khatiang chiah khan ka ti leh ang, nanghi ka chan theilo che, chuvang chuan ka beidawn mai mai ring suh, kha hmeichhia nen khan hlim taka in awm ka phal ngai lovang" tiin ka office atang chuan a chhuak a.




Engpawh ti rawh se, mahse ka hlawhtlin tir ngai lovang, kum 5 kal ta khan amah vangin Bawihtei na takin ka siam tawh, kha vang khan ka in thiam thei ngailo a nihkha, kan in zawmna ka chhut chah tirh kha chuan ka hlim dawn emaw ka ti a, a chhan pawh Kimkimi kha ka duh zawk ni a ka hriat vang a ni, mahse chutiang chu a nilo, hun a kal deuh a, Bawihtei ka theihnghilh ngailo, ka thuthluk na siam avang khan a ni tel in ka in chhir a, ka nu in Bawihtei damloh thu leh damdawiin lama an awm tih a rawn sawi phei kha chuan mahni inthiam lohna in ka khat a, mahse engkim a pawi tur ang zawng zawng chu a pawi tawh si, biak ka duh a, mahse ka be ngam bawk silo. Chhungril hlim silo khan pawnlam ah hlimna ka zawng a, Kimkimi chu ka bulah a awm deuh chawt thin bawk, a pawi tur ang a pawi vek tawh tho tiin Kimkimi nen chuan kan la in zui ta zel a, mahse ka hlim ngailo, Bawihtei nen a kan in ngaihzawn lai ang khan hlimna ka nei tawh ngailo.




Bawihtei nen kan in then atanga thla thum a ral meuh chuan ka tuar thei tawh lo, Bawihtei no ah ka call a mahse a la thei tawh lo, hmalam a pan tawh a ni ngei ang ti rilru chungin biak leh tumna ka nei tawh lo, chuti chung chuan ka theihnghilh ngailo hrim hrim thung. Kimkimi pawh ka in luah lamah a rawn kal fo thin, mipa leh hmeichhia a fal a awm a, ven thawn tur awm lo na na na kha chu nupa inkar a thleng tur ang chu kan inkar ah a thleng ta a, ka tan chuan a hmasa ber a ni, mahse Kimkimi tan erawh a hmasa ber ka nilo tih ka hre nghal, mahse ka buai na a nilo. Vawikhat in vawihnih na a hring an tih ang deuh in kan awm fal dun apiangin kan chesual ta ziah a, mahse in venna ka hmang ziah thung.




Bawihtei ringawt chuan ka rilru a luah, Kimkimi'n kan in nei tur anga a bula a sawi nachhan pawh chiang takin ka hria, Kimkimi leh Bawihtei an in hmuh hmasak ber khan Kimkimi hian tunge a nih tih a hre hauh lo, mahse a hre vat thung, Bawihtei hmuh ah chuan mifel tak angin a lang a, mahse a chhungril takah chuan nula fel a nihloh zia chu kan in hrechiang ve tawh bawk a, ka hrechiang hle. A duh naah chuan zah a hrelo, a nasa hle bawk, Delhi a kan awm lai pawh khan hmeichhia min beisei ve deuh tu te chu a hnar bo hmak zel, min ta neih tawp a, ka hlat ah a awm ngailo, hei vang tak reng hian a ni ka hne em em, ka bialnu a ni chung khan ka pehhel fo, min hmuh tawh hlek chuan midang an awm ve tih pawh hriat loh hian min bawh huam huam zel.




Delhi atanga ka rawn haw hma deuh khan kan inkar ka chhu chat vek a, ka rawn haw a, a zirna a la zo velo chungin min rawn zui haw a, a chhungte an hausa bawk a, ka hnathawh naah a rawn thawk ve reng bawk. Hna kan thawh lai pawhin min zar buai reng a, hnar pawh ka hnar ngun, a chang leh ka mit la tak tur thawmhnaw rawn in bel in a rawn kal thin a, engah mah ka ngailo tih hi hria se a ti tawh miah lo ang mawle, engpawh nise tunah chuan Bawihtei ka nun ah a rawn lang leh a, a hma khan ka kaltir pawh a ni maithei, na takin ka siam tih pawh ka hria, chuti chung chuan ka thiltih sual te kha siam that a ka bula awm tir reng ka duh a ni, tunah chuan kal tir leh tumna ka nei tawh lo hrim hrim, ka ta a ka siam hma chu ka beidawng lovang, a chhan chu min la duh ve reng a ni tih a mitmengah khan ka hmu thei tlat a ni.




Inah ka haw a, ka pa in min biak a duh thu a sawi vangin an room ah kan in zui lut a, ka nu pawh a rawn lut ve nghal, "Ka sawi tlang nghal mai anga, i bialnu kawp lai hi mo atan ka duh lo, chuvang chuan thlah vat ang che" ka pa chuan a ti a, ka nu pawh chuan ka p thusawi pawmpui zetin a lu a lo bu nghat nghat a, "Pa, kan inkar ah engmah a awm tawh lo, tunah chuan ka hmeichhe duhtak ka tawng tawh a, chhuah tumna ka neilo" ka ti sup. Ka nu chuan min rawn en vut a, "Mama tunge chuchu?" hriat chak hmel zetin a ti nghal a, "Nu... naktukah ka la in hmel hriat tir ang che" ka tihchuan an ner nang a, ka lo nuih suk, "Ni e, Mama nu, kan fapa hian hun a tih ah chuan min la in hmelhriat tir ngei ngei ang, mahse Mama ka ring che a, kan chhungkaw mualpho na thlen thei tur hmeichhia chu i kawp loh hram ka beisei" a tihchuan ka lo bu nghat a.




"Chhantei hi ka duh mawle, kan veng nula fel tia lar hat a nih piah lamah amah a in ngaitlawm bawk si, engvanga in then reng reng nge maw in nih le?" ka nu chuan min en chungin a ti a, ka ngawi reng, a chhan chu keimah vang a ni miau a, "Khaih Mama nu hun kal tawh a nihkha, an in kawp ve lai kha chuan an la naupang dun em a, tunah chuan puitling ve ve an ni tawh alawm, ni e i sawi ang ngeiin Chhantei tluk chu an awm bik chuangin ka ringlo, mahse a nih tur ang a ni vek tawh alawm, Mama ka sawi tawh ang khan i bialnu chu min in hmelhriat tir vat ka beisei a nia" nui sukin ka pa chuan a ti leh dap dap a. Ka nu te room atanga ka chhuah hnuah ka room ah ka lut a, ka necktie awrh lai chu ka phelh thawl nghal bawk, khumah chuan ka thu thla hnawk a, vawin chu ka chau ve deuh a ni.




Varanda lam atangin hmeichhe aw ri ka hriat chuan ka tho chhuak nghal vat, varanda ah chuan ka dak chhuak a, ka tana mi pawimawh em em mai chu a room ah phone hmangin a vei kual lai chu ka hmu ta chiah, a hlim hle a ni ngei ang, a thil sawi zawng te chuan a nui leh hak hak thin, a nui hmel hmuh aia hmuhnawm saw ka tan chuan a awm chuanglo. Phone a hmang zo a, ka dinna lam chu rawn hawi miah lovin a thawmhnaw bawm chu a hawng nghal a, a hai nghal mawlh mawlh a, inbual zo hlim tih hriat takin a sam chu a tuam a, bathrobe a ha bawk, a bathrobe hak sawn a ti lang sexy takzet bawk, a kawr hak tur ni ngei tur chu a la chhuak a, a sam tuam na chu a phelh a, a hru nghal mawlh mawlh, bathrobe hrui a phelh a, bra a ha tawh, bathrobe ah a la in khuh deuh vangin a taksa chu a hmuh chiang theih loh bawk.


Zawmna



Veranda lam chu a rawn hawi a, chutah kei min hmu thut chu a beisei lo bawk nen a meng phawk khawp mai, a duhawm hluah hluah a ni, ka lo nuih suk a, rum zet a min melh chungin veranda lam chu a rawn pan a, engmah pawh sawi lovin parda a zar nghal hmak, ka nui chhuak hawk a, a chet dan hi a chang chuan a nuihzat thlak thin. Keipawh chu ka thawmhnaw te phelh in bathroom lamah in tifai turin ka lut a, ka zawh hnuah lu hru mawlh mawlh chungin ka chhuak leh a, ka phone a rawn ri ve chiah bawk, ka thianpa a lo ni, "Hello" ka ti nghut a, "Thiana zanin kha aw, rawn kal ngei ngei ang che" a sawi awmzia ka hrelo takzet, khawi a kal turin nge maw min tih ni, "I theihnghilh em ni?" ka ngawih tak rengah chuan a rawn ti leh a, "Enge tihtur awm?" ka tihchuan a chek tlat tlat a.




"I buai lutuk hi engmah i hre rei theilo, ka chhungte an zin a, kan inah party ka buatsaih dawn ka tihkha, zanin a ni tawh a, rawn kal ngei ngei ang che" a tihchuan ka hre ve leh chiah, ka phur teh chiam lo khawp mai, mahse kal turin ka lo in tiam tawh avangin kan kal ve ta poh a niang chu. Ka kal tur thu ka sawi hnuah phone kan dah a, inhnuai ah ka chhuk a, chaw ei a hun tawh vangin chaw kan ei nghal, eikham ah room ah ka chho lehnghal a, Sangkima te in a kal tur chuan ka in siam nghal, "Mama khawiah nge i kal dawn a?" inhnuai a ka chhuk rual in ka nu in a lo ti a, "Ka thianpa te inah ka kal lawk dawn, ka lo haw tlai maithei aw" ka tihchuan fimkhur turin min chah a. Sangkima te in chu a hlat vak loh avangin ka thleng nghal thuai, mi a sawm tam viau a ni ngei ang, an lo ri hut hut tawh a, a chhungah ka lut a, Sangkima'n min hmuh veleh ka lam ah a rawn kal nghal.




"I va rawn thleng har ve" thawveng zet hian a ti a, ka lo ner nawk, a kai leh tawh hle mai, zan a la rei loh nen hetiang chuan a chat thla leh vat ang, "Tihtur ka nei tam deuh a" ka ti ringawt, "A nihchu, kan mi buaia I ni miau alawm, engpawh nise helamah hian rawn kal ve rawh, kan thian dang te pawhin hmuh che an chak a nia" a ti a, midang lo thut khawm na lamah chuan kan phei nghal. College kan kal pui thin te an ni hlawm a, kan in kawm em em ngailo a, in huat na pawh kan nei hran lo bawk, "Zonuna chu I dam maw?" tih pahin Thari chuan min rawn chibai a, midang te nen pawh chuan kan in chibai a, college kan kal lai te chu kan sawi a, kan thawm a tha ham ham viau, kan zing a mi Rinchhana hi Kimkimi cousin a ni nghe nghe.




Zu chu ka lem ve leh zeuh thin, an rui tawh hlawm bawk a, tawng an in chuh nak nak hlawm mai, "Thiante u" tih ri ah chuan ka thiante chu a thawm a reh dak hlawm a, aw lo chhuah na lam chu kan en vek, Kimkimi a lo ni, kawrfual chhing te a panty lang thei tep khawp a chhing leh a hnute bu lang sar tak thei tur a zau kawr chu a ha a, "Hey, Kimkim I dam maw, in hmuh lohna a rei tawh hle mai" Midang chuan an lo be nghal a, kei erawh ka ngawi reng thung. A rawn kal hnai a, ka bulah min si chet in a rawn thu nghal, "Dam alawm, kan in hmu khat hlawm bawk sia, in ngaihawm thei khawp mai" Kimkimi chuan nui har har chungin a ti a, kan vai hian hna kan nei vek tawh a, mahni tawk ah kan buai ve vek avang hian kan in hmu khawt hlawm khawp mai.




Chuan Kimkimi hi midang pawh hian an hre tha hle hlawm a, Rinchhana nau a nih vang a ni pakhat, Delhi ka kal dawn tih a hriat vanga a ni pawh rawn kal ve a ni bawk, "Nangni pahnih hi in in zui na a rei ve tawh bawk a, tih huk lam te hi a hnai tawh lo maw?" Tea chuan a lo ti ve bawk a, "Lo nghak deuh ula, a sawi theih miah loh a nia" Kimkimi chuan a ti a, midang hian kan inkar ah engmah a awm tawh lo tih an la hrelo, Sangkima chiah ka la hrilh. Sangkima chuan min rawn en vat a, "Nia... han in nei vat teh u, in naupang chhe zawk zawk tawh lo ania" nui hak hak chungin midang chuan an lo ti a, engmah in zawmna kan nei tawh lo tih sawi chhuah chak viau mah ila sawi chhuah a rem teh teuh bawk silo, Kimkimi lah chuan ka ngaihsak phut fahran in min melh a, ka haider lui hmiah thung.




"A mak ngawt mai, Rinchhana makpa I ni dawn chu a ni der mai sia" Thari chuan min en pahin a ti a, a nuih a zat hmel em em lehnghal, ka lo rum nghut a, "Tikhan tilo ula, hma hun engmah a hriat hleinem hetiang hun kan thleng dawn tih kan hre bik lova" Nuam tih hmel fe in Kimkimi chuan a ti leh ham ham a, ka thinrim chu ka in sum hram hram. Sangkimi pawh chuan engmah a sawi tawh biklo, Delhi ah khan kan kal dun a, kan in kawp deuh chawt thin, Chhantei kalsan a Kimkimi ka thlang pawh kha min dem viau a, rei tak chhung min biak duh loh phah nghe nghe a nihkha, tunah pawh midang an nuih hawk hawk laiin a ni chu a thutak run a, nichina a rui hmel te kha hmuh tur a awm tawh lo hrim hrim. Kimkimi lah chuan kan pahnih inkar ngawt chu a sawi reng a, ka dawhtheih loh chin a thleng a nih vaih chuan a zak hle ang.




"In hriat kha, Zonuna te chuan min kalsan thei hleinem, kei aia hmeichhe tha hi chu a hmu tawh dawn lo tih a hria a, min kalsan dawn reng reng lo" dawt muhlum lutuk chu thudik ang maiin a sawi a, a hmelah chuan zamna pakhat mah hmuh tur a awm lo bawk. "Kimkim, thudik sawi rawh aw" Sangkima chuan a ti ta nghut a, Kimkimi chuan a en nghal vat, a nui tawi tak a, mahse a la zam hmel chuang loh, engmah ka la sawilo thung, "Sangkim thudik ka sawi tihchu i hriat kha, nang phei chuan i hrechiang ang chu, Delhi kan awm lai pawhin Zonuna nen kan in zui nasat thin zia hrechiang ber tu i nihkha" nui hak chungin Kimkimi chuan a ti leh a, Sangkima chuan a melh no lo viau, kan thiante dang chuan boruak in thlak chu an hailo tih hriat takin an ngawi thap tawh hlawm a.




"Ni e, ka hrechiang alawm, chuan Mizoram a kan let leh hmaa thil thleng pawh kha ka hrechiang hle bawk" Sangkima chuan Kimkimi melh ngar chungin a ti leh hmuk a, kan thiante chuan min melh tawn zak zak hlawm a, "Enge awmzia?" Thari chuan a rawn ti ta reng bawk. Ka thaw chhuak hawlh a, tuna sawi hi a tha ber ang, "Kimkimi nen hian eng in zawmna mah kan nei tawh lo, Mizoram a kan lo let hma khan kan in then fel tawh" ka ti ta a midang chuan mak an tih hmel hlawm khawp mai. Kimkimi chu a ngawi ngal a, a zak a ni ngei ang, nichin mai ah khan kei nen in zawmna nei ang hrim in midang bulah a sawi a, dawt a sawi chian zia an hre ta vek hlawm bawk si, engpawh nise a duh leh lo zak ve mai mai rawh se, ka buaina a ni hrep lo.




"Mahse Kimkim nichin maia I thusawi kha enge awmzia?" Mawitei chuan a ti ta reng a, Kimkimi chu an en thap bawk, engmah sawi ka tum tawh lo, "Ih englo" a ti bah nuai a, "Ka kal phawt mai ang, kal kawi na tur ka la nei si a" tiin ka ding chhuak a, midang ho chuan min en thup, ngaihsak tawh lemlo chuan ka kal ta daih a. Pawn ka thleng a, ka thaw chhuak hawlh hawlh, ka motor dah na lam pan mai ka tum lai chuan Kimkimi chu rawn tlan chhuak dawr dawr in ka banah a rawn man a, ka lo rum nghut, "Engvanga khatiang sawi kha nge i nih, min tih zah zia i hria em?" thinrim zetin a ti that a, "I zah leh zah lovah ka buai lo, thudik sawi nila khatiang zahna kha i tawng lovang, tun atang chuan fimkhur la, thudik chauh sawi tawh ang che" tiin ka kut a vawn na chu ka la sawn a, ka kalsawn nghal, min au zui lawm lawm na pawh chu engah mah ka ngai lo.

Cont....

Like kha min han tihsak ve leh hram hram ula aw..