Politician nupui S2

[Cck Lalchhuanawmi]

Politician Nupui Hring nun
S-2
Chapter-9
Ziaktu: Cck Lalchhuanawmi


Min fawp vawng vawng, a khua a lo har ṭhinzia tur ka ngaihtuah ngam lo. Ka laktlak lo em a ni.


Ngaihtuah loh tawp tur ka tihna a ni lo, Lal Fanu ngaihtuah kha chin tawk lo hre tur hi ka nia.


Sammy-a pawh Party-ah a hming chauhin a awm ti ila a sual lo ang.


Kan dam ṭhat hma khan min ngaihsak ta lo em a, ka tui tawh lo. Sammy-a chuan, "Ṭhat chhuah ṭhulh chuang loh tur", a ti a.


Sawisel a phal ngai lo, MLA a nih theihna tura Inthlana din phal saktu te an ni tlat a.


Ka mawh lo, nimahsela; min duh lohna an lantir mah mah. Tuar harsa ka ti, "Chawlh a zawhah kan la mamawh dawn a, tuar hram hram rawh", tih hi min hrilh ngun ber.


College-ah a kir leh rih a, Politics kan la chawlhsan rih.


"Party dangah insawn ang", ka tih lahin, "Ngaihngam deuhin awm rawh, tunah min duh lo mah se; kan chunga an ṭhatna kan theihnghilh tur a ni lo", a ti tlat bawk a.


Chuta chin ka sawipui duh ta lo.


Politics-ah kan chawl a, ka tum ruk dan erawh chuan nau hi han nei phawt ila; a leikân hnuah Politics-a kir tir ka tum leh.


Tin, nasa takin nitin keimaha sual awm hi ka bei a.


Ka hneh ve tial tial bawk.


Ka hlim chuan in chhung boruak a nuam. Nu ber kutah in chhung hlimna leh hlim lohna a innghah nasat zia ka chhar a.


Chumai a ni lo, Nu berin in chhung a tihhlim theih nan Pa ber mawhphurhna pawh a sâng.


Sammy-an a hre reng a, dawhthei takin min dawm; Fanu duat tak te hian min duat.


Siamtea leh Freddy-a pawh an ṭang nasa, tihhlawhchham ka duh lo. Ka insiamrem zel a, ka nui hmel an hmu zing tawlh tawlh.


Ka nui riin in chhung a fan ruai a, an pafaa min duat em avang hian ka muthilh hma chu ka intipangchang hi a ni ringawt.


Nu Papuii lahin min duat.


Thenzawl leh Hnahthial aṭangin Thei leh Thlai, tinreng hi min lo thawn bawk.


Nu Papuii pawh a ṭang nasa, tlai khat chu, "Nau i neih hnu hi chuan ka chawl tawh ang, Puipuii pawhin chawl tawh turin min ti a", a ti mai chu, ka nghilh dup theiin ka hria.


"Nu, Sammy-a i hrilh tawh em?",


"La hrilh lo, i hnenah ka sawi lawk a nih chu. Phallo dawn mah ula, chawlh ka duh tawh a ni", a ti seuh seuh.


Ka en a, Upa a ni ve ta reng mai.


Chawlh a mamawh tawh, a ngaihawm dawn; kan thlamuanpui bawk si.


"Nautê awm turin i lo kal ṭhin ang chu tiraw?", ka ti sep a. Lung lam a chhia.


Sammy-a mai bakah, Lalfela te; ka nu leh pa ten hre ta se, an ui ngawt ang. Chelh beh theih a ni tawh lo, chawl tawh rawh se.


"Hausa sa emaw i ti ang e, an ni hauh lo; an thawkrim teh asin. Hetiang dinhmun an thleng thei hi kei aia lawmpuitu an awm chuang lo ang. I nu leh pa te hnathawka an chhuah hlanin, an unau liin an School bâng hi anmahniin inah an awm ṭhin.


An lêng ngai lo a, lehkha an zir melh melh ṭhin. Ka thlen hian min lawm thiam em em a, "Anu lo thleng", tiin min kuah ṭhin", Nu Papuii chu a inhru a.


A chhûi let a, a lung a leng. Lunglenna thamin an inhnaih tawh tlat.


"Sammy-a School kal an awmpui emaw ka ti a", ka ti a.


Hei hi ka hriat dan a ni.


Nu Papuii chuan, "A dik alawm, Politics-ah a hming te a lar si a; a langsar fal ta a nih hi. Hmangaihi khan nu leh pa chan a chang hawt a, Lalfela leh Hriatpuia mai bakah; Sangpuia chen hian an zah thei lutuk. Tun thlengin an U hi an zahin a thu an hnial ngai lo tih i hmu thei ang", a ti seuh seuh a.


Kei chu, nuam taka an awm ka ring a; ka ring sual hle a ni.


"An lo puitling chho zel a, zirna lamah Hmangaihi beidawngin a chawl tawp a ni a. Sangpuia Phaiah a zawm a, a zu awmpui nghe nghe. Lalfela leh Hriatpuia te hetah an awm a. He in hi an luah tirh aṭangin a la ruak lo, anmahni hian an luah khat hi a ni ber", Nu Papuii lungchhia ka kai a, ka hnar chhung a za mer mer.


A thaw hap a, "An naupan lai ka ngai, tunah zawng; chhungkaw hran ṭheuh an nei ta si. Hmangaihi chauh hi a ni ta mai a, ani pui roh hi; fa lu hloh lova lên a tum hlen ta a ni ang", a ti sep sep.


U Hmai tan zawnsak ila kan hmuh mai ka ring. A inpeih leh peih loh a ni mai.


Sammy-a hrilh lo turin min ti a, ka thup thei em ang chu a.


Siamtea leh Freddy-a an lo haw a, thingpui in zawhah Racket nen Freddy-a phei chu a chhuak daih.


"Lo haw har tawh suh aw", Siamtean a au zui ṭawk ṭawk.


Sports lam hi a timi vak lo chu a ni, "Homework ti daih la, zanah men rei a ngai lo ang a", ka ti a.


Min hnial lem lo, "Kan ngah hlek a, zana men rei aiah ka'n ti lawk ang e", a ti a.


Tun hma anga ṭhutpui a duh tawh lo, an intitlangval tawh a nia. Tlangval tia chhiar theih an ni ṭan mek a ni si a.


Ka vûng a zia hret hret a, mahniin ka kal ka kal thei tawh.


Ka hah hma ta thung, pum a len(lian) belh theih bawk si lo.


Sammy-a a lo haw a, "Darling, Darling", a lo ti lut a. Eng ka hria nimaw, ka melh ralh.


"Eng nge ni ta?", ka biang a fawp a, "Tu nge Darling tiha i koh chu?", a bengah ka pawt.


A nui ruh ruh, "Min thlah la ka hrilh ang che".


Ka hmuiah a fawp a, "Hmar lungliani, Hmar hrangsie Lalnu ngat", a ti a. Ka nui duh lo.


"Ti teh, inbual ang", ka ṭang tlat.


"Chhuanpui Darling, My Darling; come on, let's go",


"Sâp ka ni em ni?", ka ti hlak.


Ka ning ṭhin alawm, Sâp Ṭawng hi an uar lutuk.


Nui ruh ruhin ka ṭhutna aṭangin min kaitho a, min kalpui chhet chhet. Ka kal chak thei lo tih hre hek chuan.


"Ka inbual duh lo",


"Chutiang a theih loh", a ti hmak.


"Tu nge Darling tiha i koh kha?", ka ti leh.


A nghawnga towel pahnih bâtin khum chunga ka ṭhu min lo pan a, lo kun hniamin, "Khawvela fanu duhawm ber min hrinsaktu tur mawle", a ti a.


Ka lâi ringawt nia mawle!


Nui sen senin ka hmai ka hup, "Inbual ang le", ka ṭap ringawt bawk.


Ka ṭap tih a hriat chuan min kuah a, a nui ruh ruh. Hahthlak min ti ve ṭhin ngawtin ka ring.


"I duh chen ṭap rawh, inbual erawh i ṭhulh dawn lo", ka insût hrawih a, "Ka ṭap zo, inbual ang", ka ti ṭuau a.


A nui huah huah, "Nui suh", ka ti hlak a. Ka ṭahkhum nghek dawn mawni?


Kan inbual zawha kan inthlak chuan Darthlalangah ka inthlek kual, ka pum lian thei lo hi buaithlak.


"Sam, ka pum hi a lian thei lo reng reng", ka ti a.


"A lian chho ve zel mai ang", min lo kuah a. Ngaih a ṭha em em ringawt.


Sammy-a sawi ang tak takin a lian chho ve zel, hmeichhia ka nei tak tak dawn a ni ang, keimah chawp chawp hian a bialin ka bial.


MBSE Office dawr turin Hriatpuia a lo phei a, Hmingi a lo hruai tel.


Chuta Hmingin min hmu chu, min nuih ta vak vak mai a. In chhungah A nui khâwk rum rum mai a nih kha.


"Marble i ang lutuk", min ti a, dul dawm meuhin min nuih. Ka ngei lutuk chu Hriatpuia bulah, "In nu tel loa lo kal tur che alawm", ka ti ram hmak.


Hriatpuia lahin a dar a kân ak ringawt a, a kalsawn daih.


Ka bula ṭhu lah chu nuih tawp chin a nei thei lo, "Chhuanpui, Marble i ang e", a ti awl lo.


A tawpah phei chuan a hnungah ka chum tawh, "A na", pawh a ti duh lo. Sual thiam lutuk mai.


Nau a pai laiin ka nuih ngai tawp si lo, Marble te min ti.


Min lo hnaih sawt sawt a, "In pa hian engtin nge a awmpui theih zawk che le", a han ti leh mai a nih kha.


"Lalhriatpui?", ṭial tawkin ka ko nghek.


Hriatpuia a lo kal thuai, "Eng nge?", a lo ti a, "In nu hi hruaibo rawh", ka ti hmuk. Ka ṭawng peih tawh lo.


"Ka fiam che a nih kha", Hmingin min lo kuah a, ka mit tui a tla ringawt.


Min fiamna zawng zawngah, "In pain engtin nge a awmpui theih zawk che?", a tih chuan min tina ber.


Marble ai pawhin ka bial ang, ka la hrethiam; Sammy-a a hmer tel.chu ka ngaithiam lo.


"Chhuanpui, ka tihpalh lutuk; fiamthu a nih kha. Ka tihpalh", ka mit tui ka hru a, Hmingi ka nam sawn.


Ka ding a, "In chau awm sia, intifai rawh u; ka mu lawk dawn", pindanah ka kalsan a.


Darthlalangah ka inen a, Marble ai pawhin ka bial. Khawvel ang hian ka bial a ni zawk mah.


"In pain engtin nge a awmpui peih zawk che?", tih chu ka bengah a kiu a, chu zawhna chu ka inzawt mawlh mawlh.


Engtin nge min awmpui peih zawk le?


Taksa lan dan chu engpawh nise, rilru lamah enkawl ngaiin ka la awm zui.


Sammy-a ka call dawn emawni aw ka ti a, phone ka hmer ngawt ngawt. Eng chu nge maw ka hrilh ang le?


Hmingi fiamthuin min tihthinrimzia ka va Zualko hrep dawn tihna a ni a.


A nutling hna lo em mai.


Pindan kawngka a inkik a, "Chhuanpui, i rilru tihnat ka tum lo; ka tihpalh tak zet zet. Khawngaihtakin min ngaidam rawh, lo chhuak hram la; ka nu leh pa ten Naute kawr tur an lo thawn che a nia aw", ka mit tui ka hru a.


"Lo lut rawh", ka sawi zawh rualin a lo lut a.


Puan a pawm ṭun, min lo pan a min kuah nghal, "Ka tihpalh lutuk, i rilru tihnat ka tum miah lo a nia aw", a ti thâm chhal a.


Ṭah a tum mawni?


"A ho lutuk, ka rilru dik loh avang a nih kha",


"Ni lo e, fiamthu hun hi ka hre ṭhin lo a. En teh hei, Naute puan leh kawr tur a nih hi. Ka nu leh pain an ṭhui tir a, Hnahthiala Puanṭhui thiam ber ṭhui a nih hi aw", a ti seuh seuh a.


Min hmuh zung zung, "Mipa nge hmeichhia a nih dawn a hriat si lo a, tu emaw zawk zawk lo piang pawh nise an hak theih turin Puan pawh hi kan thlang", a ti leh a.


Rawng vâr lam hlir a ni, "An nalh hlawm lutuk", ka ti a. Lukhum leh kutkawrte a awm.


"Ka naupuan pek che ka tum nen, u Hriatpuian, "Nau kan neih leh huna hmanah dah rawh, pek pek a ngai lo", a ti teh tlat a. Ka ngaihtuah a, keini aiin in hausa zawk bawk a; u Hriatpuia ka hnial duh lo a nih hi", a ti a.


Anni nupa hi an inthurual thei si.


"Neih leh in tum em ni a?",


"Tum leh e, u Hriatpuian fa pahnih lek neih a duh lo alawm. A hrin chhuah lam a ngaihtuah tawh lo reng reng, a hahthlak tehreng nen", Hmingin a ti a.


"Ka hmabak chu a ni si a",


"Mahse maw, nau an chhuah chiah hian na zawng zawng a bo vek a; fa dang neih leh kan duh zel. A mak lutuk, chuvang a nia; u Hriatpuian fa dang neih a duh vang ni chuang loin, kei pawh hian neih belh ka duh", a ti leh seuh seuh a.


A sawi chu a dik a, tawnhriat a nei tawh alawm.


"Marble ai pawhin ka bial tiraw?", ka ti phawng a, Hmingi a phu zuk.


Kan titi thupui ka thlak daih.


Hmingi chuan, "Bial e, kei chu ka cher a; ka awt che. Fa dang neih duh mah ila, nau pai hian ka cher thei lutuk a, ka huphurh deuh", a ti a.


"Sammy-a hian engmah a sawi ngai lo a, chhia min ti ngawtin ka ring", ka biang ka dawm a.


Chhia min ti ngei ngei ang.


Hmingi chuan, "Ka awihlo ber ang, i awhawm ka tih kha. I bial ker a, a lawmawm zawk. Min hriat kha, nau ka pai laia ka chhiat theih bik zia kha; ka dumin ka cher si, meihawl tlawn herh kawi ka ang thei tak tak a ni", a ti hmiah hmiah a.


Meihawl tlawn herh kawi a intehkhin chuan nuih a tiza.


"U Hriatpuian min han duat mai mai khawp a, a nuam lo a nia aw... School-ah nula hmelṭha leh pian nalh tak tak a hmu zut dawn tih ka hre kar a, School a kal te kha ka phal lo ṭhin; a chhia chhia khan min fawp duh tho, u Hriatpuia ni lo pasal dang nei ila chu aw, ka Nuthlawina a rei tawh ang", khuma mu thlain a thaw halh.


"I Nuthlawi chhan tur a awm lo e",


"Awm e a, nau ka paiin ka chhiat theih em kha. I pasal aiin ka pasal a felin a ṭha zawk, i pasal chu a meng rum thei si; ka ṭih ru tlat zel", a ti leh hmiah.


Sammy-a bulah a awm tam lo a, a hre tlem em mai.


"A hlauhawm loh", ka ti a, "I tan te chuan hlauhawm nang, a nupui i nia", a ti leh hmiah.


Zanah mut hmunah Hmingin a ṭih ruk te ka hrilh a, "Nangin min hlau em?", mi han ti a.


"Hlau che ila i fanu tur ka pai tawp nang", a nui chhuak hawk.


Min fawp zeuh a, "Thaw dik phian a", a ti a. Ka intithei mai mai khawp.


"Sam, Marble angin ka bial ker si a; engtin nge ka bulah i awm peih zawk?",


"Eng zawhna nge ni ngai?", a chek hlak.


"Chhia min ti lo mi?", ka ti leh.


A chek tlawk tlawk, min exam kual a nih ka ring. Ka mitah tak min en bawk si.


Sammy-a chuan, "Hmangaihna vang a nih hi, chu chauh ka sawi ang. Ka hmangaihna che hi ring la, pawm la ringhlel ngai suh", lungchim tak hian min thlek a.


A thusawi chuan min hneh ngei mai.


Hmangaihna hi hriatthiam phak bak a ni a, sawifiah theih lah a ni lo.


"Sam, min hmangaih tih hi ka ringhlel ngai lo. Min hmangaih avangin ka lawm em em asin",


"Kei hi alawm lawm tur chu, min pawm lo la chu mahni ka intichhe tawh ngei ang",


"Sam, chutiang tur em ni?", ka ti thuai.


Mahni intihchhiat maw ni a? He thil hi mipa puitling tak tih turah ka ruat ngai lo. Mipa tawh phawt i ti teh ang, mahni intihchhiat hi mipain an ching.


Hma lam pan tumna an nei ngai lo hi ni, an huatawm ka tih ṭhin.


Sammy-an, "Eng emaw, sual turah min ngai ang e. Mahni intihchhiat ka tih awmzia chu, nun hrehawm ti khawpin ka siam ang che. Khawiah mah ka kaltir phal dawn si lo che a", a ti a.


Min phuar hlawm tawp pawh pawi a ti dawn lo a nih chu.


"I va han sual", ka ti pek a, "Mafia Hotupa min tih kha", a ti bawk si.


Nia, Mafia Hotupa ka ti ngei a nih kha.


Bial ker mah ila min hmangaihna a sâwi nghing pha lo. Hmingi naupai cher chhe tak pawh Hriatpuian a kuah tlat tho alawm.


Ka theih ang angin ka kuah, min awih mut nan, "Chhuanpui Darling, ka hmangaih che", a ti a.


A âw a dam si, thla a muang thei em!


Hmingi nen kan pahnih chauhin inah kan awm a, kan titi dun melh melh.


Min sawi ṭhaih hi ka ti mai, nau vei natzia leh hrin chhuah bawr lai hahthlakzia ngawt thu min hrilh.


Thlarau nun a chawm lo.


Han hlauh chang nei mah ila, a zawng a zaa hlauh chiam mi lah a ni lo.


An haw hmaa Hmingin min bazarpui a duh tehreng nen, "A la inzo ṭha lo em mai", Sammy-an a ti tlat a.


Min bazarpui thei lo.


Zirtawpni tukṭhuan ei khamah kan invai liam. Hnahthial panin an tlan rum vung vung.


Hmingi aw ta lo chu khua a har.


Sammy-an, "Ka nu leh pa ten nau puan an lo thawn chu a ṭha hlawm emaw chu?", necktie awrh pahin a ti a.


"Ṭha lutuk, lo en la", drawer aṭangin ka la chhuak.


A en a, a bu nghat nghat. Ṭha a tih thu a sawi nasa.


"Bazar hmuna chhuak turin ka la phal lo, nakinah; kan la bazar dawn nia. Nau puan lei nan hma ka la ti bawk si a, i duh chuan Online aṭang pawhin i duhzâwng chah la", pheikhawk bun pahin a ti leh.


Ni tak, Online aṭangin a chah theih vek tak alawm.


"Hun i tih-ah zawk le, Sam; vawiin hi",


"Ka theihnghilh lo, College-ah ka kal phawt anga ka lo hruai ang che".


A biang a lo dawh hnai a, ka fawp zeuh.


Inentir ni a ni a, kei hian theihnghilh ka ching zawk a; a theihnghilh ngai lo. Inentir ṭan phat aṭangin min la kalpui char char.


Fanu duhawm tak han nei tawh ila aw...