Mikhual Hunter - 14

[Vtei Jahau]

Ngaihdami's P.O.V






A thusawi kha zawm ka duh lo pawh a ni lo, ak in thlahrung a, hmeichhe dang an lo kal a ka bula ṭhut an rawn tum chuan ka lo tawlh zel a, kan ṭan phei chuan a lehlam sirah ka ṭhu daih tawh, in thlahrung deuh in Zomuanpuia ka han en a, min lo en ve reng, a lungawi loh hmel hle bawk, thinchhepa hi a, "Ellie ka nia, min la hria em?" ka bula ṭhu chuan a rawn ti sar sar a, "Duati" ka lo ti ve sep, "Ka hria che a lawm" nui var var hian a rawn ti leh sar sar a, "Kan in kawm ṭhin em ni" ka lo ti ha a, "Imm Zomuanpuia bialnu ka nia, kinah ka hrilh chiang ang che" a ti a, ka meng deuh kawk bialnu a neih thu emaw ka hre ngai miah si lo a, ka bîng deuh chûk chûk niin ka hria.





Ka bula ṭhu vang chuan thu hril tu thusawi pawh engmah ka hre mumal lo, a thil sawi ringawt ka ngaihtuah a, Zomuanpuia chu ka han en ṭhin min en duh tawh miah lo lehnghâl a, a chang leh a muthlu em maw ni, a lo kun leh ngur ngur ṭhin, bialnu a neih chu ka ring tho a, mah se bialnu nei turin ka ring phal si lo





Inkhawm kan bâng a, la vai deuh ruai chung chuan ka chhuak a, ka kal muang hleee, ka chhuak tur chu Zomuanpuia'n min lo nghak reng a, a nui hmêl hmuh tur a la awm chuang lo, "I ṭha em? Na i nei em ni?" tiin ka dârah chuan a rawn vuan a, mah se ka dara a rawn vawnna kut chu ka lo thing thla vat a, midang chu an chhuak zo vek tawh, Zomuanpuia chuan hamhaih zetin min en a, keipaw'n a mitah chuan ka en ve kar.






"Muanpui, thingpui lo in ula" tiin Biakin chhungah Ellie kha a rawn lût leh a, Zomuanpuia bânah a rawn vuan chat bawk, a thusawi kha a dik a niang, Zomuanpuia pawh chuan thin thlak emaw pawh a lo tum lem lo, mah se Ellie nên an in biak mawlh mawlh lai chuan Ellie ban awmna chu ka lo en reng a, chuthil chu Zomuanpuia'n a hmuh rual chuan Ellie kut chu a dah sâwn ta daih, mah se nuam ka tih loh vang in Biakin aṭang chuan ka chhuak hmasa ta daih a, pawn a ka chhuah rual rual chuan kan luh dawna min lo be ti bawk khân min lo be leh, "Duati, i ṭha em?" ka hmêl chu a lo dik lo hle a niang, "Aaaa aw ka ṭha e, ka chau deuh mai mai a" tiin ka nui lui a, a mit zim sân chuan min lo en kar thung.






"Min hria maw?" sawi tur ka hre lo lutuk chuan ka ti haw a, a nui deuh hak, "Hria ee, mah se kan in hrechiang lutuk lo, Masanga ka nia" a tih lai chuan Zomuanpuia leh Ellie an rawn chhuak a, Ellie chuan "U haw ho ila" nui var var in a rawn ti a, an kut chu ka lo en hmasa ber mah se an lo in kai tawh hauh lo.









"Awle, Duati lo kal rawh" tiin U Masanga nên chuan a hmaah kan kal dûn a, Zomuanpuia leh Ellie kan hnungah an phun sap sap thung, "I ṭha zel tiraw?" U Masanga chuan a rawn ti a, lo bu nghat in "Imm, ka ke hi a la na deuh ṭhin a, mah se ka ṭha viau tawh" ka tih chuan a ni pawh a lo bu nghat nghat a, "A lawmawm hle mai, zanin chu naupang ho test tur Question set ka ngai sia, zan dangah thingpui ka lo in ang aw, i phal chuan" a ti leh a, keipawh chuan "Aaa i duh te chuan" tiin ka lo chhang ve mai bawk.








An pênna tur an thlen chuan Ellie'n "Hmunphiah kehna ah chuan lo kal ve ngei ngei rawh aw Duati" a rawn ti a, thusawi awmzia pawh chu hre chuang lo mah ila ka tum tur thu ka sawi ve ringawt, an kal liam hnu chuan Zomuanpuia chuan, "Inkhawm lai khan Ellie nên khân engnge in sawi a?" ngawi reng a a kal hnuah a rawn ti a, ka phu deuh zawk, "Aaaa, eng vak mah mawle a hming te min hrilh a" ka ti a, ka ke chu a na reuh hleee lehnghâl, pheikhawk sâng deuh hlek ka bun vang a niang.








"I ke a na em ni" Zomuanpuia hnunga kal in ka ke ka chhum leh dat dat ṭhin a, a lo hria a niang, "Ihhh aw na deuh, ka pheikhawk hi ka phelh a nga a zia mai ang" tiin ka kûn a, ka pheikhawk chu phelh ka tum a, mah se Zomuanpuia chu rawn kûn hniam ve in ka pheikhawk chu min rawn phelh sak a, ka kut che lai chu a tawp hmak, "I la fit tâwk lo a nih hi, pheikhawk sâng i bun kher bawk sia" a ti a, ka pheikhawk chu min hlih sak leh in a mah chuan a keng ta daih, "Ti khan engnge a an" min kal pui leh pah chuan a ti a, "A zia deuh" tiin ka nuih var var a, mah se min pawt ding dat in ka hmaah chuan a rawn kûn hniam leh a, a awmzia ka hre lo hle, a hnung pharh ṭha zet chu ka lo thlir mawl tawp.








"Ka pua ang che" ka chêt lawk loh vang chuan a rawn ti a, "Awi a ngai lo" ka tih laiin a rawn tawlh hnai a, min si lek lek chuan a rawn awm a, "Vat" a ti leh hmuk tawh, ka hnial ngam tawh loh vang chuan a hnungah chuan ka lawn kai vat a, min zo zet chuan a ding a, mah se a din hnu lawk chuan "Awi awi awi, ka kâwng a na lutuk" a rawn ti a, a eu vel a, Zomuanpuia a uan ve ngei vang chuan ka hamhaih bawk si tlak ka hlau bawk si chuan ka lo beng vak vak, "Hey eu vak vak suh" ka ti chûl a, a nui suk suk tih ka hria.







Min paw chung chuan muangchangin in lam chu kan pan a, a ngawih leh vung vung hnuah "U Masanga nên khân engnge in sawi a" a rilru kap tu ni awm tak a ni, "Ka ṭhat zel leh ṭhat zel loh te min zâwt a" ka tih chuan a la duh khawp lo tih hriat zetin, "Chuan" a lo ti vat a, "Chuannnnn, engtik zanah emaw kan in a thingpui in min dil a" ka ti a, "Engtinnge i chhan" a ti leh ta hmuk mai, "Aw ka tih mai loh te chuan" ka lo ti nâng nang a, a ngawi ta hmak, engmah a sawi loh chuan ka be ngam tawh lo.







Kan in kan thlen chuan a hnung aṭang a ka chhuk theih nan a kûn hniam leh a, ka pheikhawk a la khai reng vâng chuan a bulah ka la ding ve reng, ka dil ngam lo, "Ihhh, thingpui lo in la" sawi tur ka hre leh ta lo lutuk chuan ka ti a, "Thingpui ka in ngai lo" a ti hmuk a, a bân chu rawn phar in ka pheikhawk chu a rawn dah hnai a, ka lo ban vat, inchhung ka luh thleng chuan min la thlir char char tih ka hria a, mah se ka hawi lêt duh tawh lo.







"Bialnu a nei" U Bebeth-i call ka lak rual rual chuan ka ti nghal a, ka khumah chuan ka ṭhu hnawk, "Awi ka awih lo, Zomuanpuia'n bialnu nghet a nei ngai lo" a rawn ti vat, "A nei a lawm, a pha lo" ka ti leh a, ka beidawng niin ka hria, "I zawt em ni?" hniam ruih chuan a rawn ti ve, "Aih, a bânah te a kai a, engtinmah a ti lo" ka ti a, U Bebeth-i chuan "Awi zawh pawh i zawh loh chu, bakah Zomuanpuia te chuan hmeichhe khawih vel engah mah a ngai lo, ran in an dek ang bakah a ngai ngai lo" a rawn ti hlawih hlawih a, ka thu hriat vang chuan ka phur leh ta deuh in ka hria.








"Aaa ka hre lo, U Bebeth-i hma ka la lo law law dawn em maw ni ka ti, hmeichhia zawk ka ni bawk si, bakah ka hmelchhe si" ka tih chuan U Bebeth-i'n, "Ngawi mai mai teh, nang bak bak an awm chuang lo, in zahpui tawh suh, i hmelṭha ber, nangbak mo atan ka duh lo kei chuan" a rawn ti a, a thusawi te chuan min thlamuan takzet a ni.








"Chuan engtikah nge i rawn kal dawn" tiin kan thupui chu ka thlak ta daih, "Ihh kar lehah ka rawn ka dawn, an phal tawh a" a ti a, a aw aṭang pawh chuan a phur tih ka hre thei, kan in biak laklawh lai chuan message ka dawng a, ka en leh rih, Zomuanpuia a ni, "Naktuk tûk leh ah hmunphiah kehna ah i kal ve peih em?" tih a ni, "I kal dawn em?" tiin ka reply ve vat, "Kal dawn lo ila ka sâwm lovang che" a rawn ti a, ṭha deuh te hian sawi ve mai ṭhin se, "I kal dawn chuan ka kal ang" ka ti a, "Okay" ti chauh in a rawn reply tawh.






"Naktuk tuk lehah KṬP hmunphiah keh hnatlang ah min sâwm a" ka ti a, U Bebeth-i chu ka hrilh ve zel, "Zomuanpuia'n maw" a tih chuan "Imm ni e" ka ti a, U Bebeth-i bawk chuan, "A ṭhat chu chu mi hunah chuan a ngaihsak reng ngai che in awm la, i bulah awm tîr tlat ang che, in awm tlan tam pauh leh in in pawh a ni mai" a ti a, ruahmanna min siam pui char char a, keipawh chuan a sawi anga ka tih tur thu chu ka lo hrilh ve bawk a.





~~~~~~~~~~~~~~~~~~~~~~~~~~~~~~





"Naktuk chu i rawn kal ve hman ang tiraw" tlai lam a ni tawh a, U Masanga chu kan in ah a rawn lang hlawl a, Maian ka lo hih lai tak a ni, "Eng chu?" ka lo ti leh ha tawh, "Awww hmunphiah keh kha" a tih leh takah chuan, "Eee aw ka tum ve a lawm" ka lo ti vat a, ka phur tawh reuh hle.







"Ka lo sâwm ang che aw" in thlahrun hmêl deuh chuan a rawn ti, "Aaaa Ihh Zomuanpuia nên kan kal dawn a" ka tih chuan, "Aaa aw, kan kal ho thei tho a lawm tiraw" a rawn ti a, "Nia, a theih tho ang" ka ti a, a ni pawh chu a nui ve leh tawh.






"Naktukah dar 9 ah in nghah khawm tur a nia, dar 8 leh a chanve vel ah chuan ka rawn thleng tawh ang" tiin a chhuak a, Zomuanpuia khân a ngeih tehchiam lo in ka hria a, mah se a fel bawk nên ka be chhe ngawt thei bawk si lo a.






Zomuanpuia's P.O.V






"Bawiha, bungrua Aizawl a thawn tur saw, i lo enfel sak lawk dawn em niang" kanu chuan a rawn ti a, ka in siam peih vek tawh, "Ka hnatlang dawn a sin" ka lo ti nui nui a, kanu chuan "Ooo va ti lawk la, i rei nang" a ti a, hnial tawh lem lo in ka phone ka ban a, Hruaitluanga ka text, *Ngaihdami kha lo va sâwm la, in nghah khawmna turah lo va hruai rawh ka rawn kal har lo ang* tiin, Hruaitluanga chuan, *Min hre tawh dawn lo a sin, bakah i thik leh ang* a rawn ti a, *Kal vat mai teh, nimin ah U Masanga an in ah a kal a, ka lo sâwm ang che te a ti a nia* ka ti leh a, *Awle Bawiha, i tan te chuan* a ti ve leh mai bawk.







Motor lian hnunglam a Aizawla bungraw thawn tur ka en fel lai vel chuan Ellie a rawn lang hlawl, "Kal rual ila" nui var var in a rawn ti a, " Ka la hman lo" ka lo ti hmuk, "Ka lo nghak ang che" a ti leh ṭalh a, "Ngaihdami ka phur dawn" ka ti leh a, a tum deuh bar, "Ka ke hi ka tina deuh a, halai aṭanga Biakin thleng tal te chu" a ti leh a, ka chhang tawh lo, min nghak lui leh dawn tho.






Ka thil en fel tur ang ang ka en fel hnu chuan ka bike ka la chhuak a, Ellie nên chuan Biakin lam pan in kan in phur a.






Ngaihdami's P.O.V





Zomuanpuia nghak chuan pawnah chuan ka lo ṭhu reng tawh a, mah se U Masanga zawk a rawn lang hmasa, "A la rawn thleng na nge" nui vur vur chuan a rawn ti a, ka bulah a rawn ṭhu ve nghal, "Umm a la hman lo deuh a niang" ka lo ti ve mai a, rei pawh kan la ṭhut hma chuan U Masanga chuan "A tlai tawh riau a sin, muangchangin ka lo va kal hmasa mai dawn em niang" a ti a, ka duh chiah lo, Engmah hrilh lo a kalsan ka duh lo.








"Bâkah a ni chu Bike in Ellie nên an rawn kal dawn tho a" ka chhan tak lohah chuan a ti leh a, Ellie nên an rawn kal tur thu ka hriat takah chuan kal mai chu pawi ka ti ta bik lo, "Khawi i bag kha a rit ang" tih pah chuan U Masanga chuan ka bag chu min pawh thlak sak a, hnial hman pawh a ni lo, mah se, nuam chu ka ti vak hran lo thung.








"Tawhsual in tawh hma thil kha hriat chhuah i nei tawh êm?" a ti a, eng emaw hriat a nei a nih ka ring, midang chuan ka dam lo tiin an hre vek si a, U Masanga hi chuan tawh sual kan tâwk tih. hria, "Tawh sual kan tawk tih i hria a maw?" ka ti ha a, a nui hak, "Aw hria e, rawn hmu tu che u zingah ka tel a lawm" a tih takah chuan ka bu deuh nghat nghat, "Tlêm tlêm chu ka hre chhuak a, mah se a chiang lo lutuk" ka ti a, chu lam chu min zâwt zawm ta bik lo.






In nghah khawmna tur kan thlen chuan an lo awm far tawh a, hnatlang tur an tam vak lo a niang, sâwm panga bawr vel bak kan la awm lo, kan kalna tur pickup pawh kan bulah a ding vâng tawh a, Zomuanpuia te erawh an la rawn thleng ve thei lo.






"Duati" ti a ka hnunglam aṭanga min lo tu vang chuan ka hawi lêt vat a, ka hre ngai lo thung, "Hruaia ka nia, i têt lai aṭanga i ṭhian ve tho" tiin a kut chu a rawn phar a, a hmêl ka en chian tak ah chuan eng emaw hriat chhuah ka nei, ka lu chu a rawn na leh ut ut a, ka hnar pawh a rawn thi leh ta ṭuam ṭuam tawh, "Ehe Ngaihdam i ṭha em" tiin Hruaitluanga chuan min lo dawm vat a, ka thil hriat chhuah chu ramhnuaiah Hruaitluanga nên hian kan lo in zui a, chuan mi tam vak lo kan pawh a, Zomuanpuia pawh a awm, ka kal ṭhat theih lohna an te Hruaitluanga chuan min kai a, tih vel ni.







"Ngaihdam" ka hnunglam aṭanga ni in rawn vawn pah a ti tu aw chu ka hrechiang hle, "I ṭha lo haw mai ang" tiin min din ṭhat tir chu a tum a, mah se ka scarf chuan ka hnar chu hmeh pin pah in "Aih ka ṭha reng a lawm, hlauthâwng suh ka awm thei ang" ka ti ve tlat a, "Hriat chhuah tlêm ka nei a" ka tih zawm zata a, Hruaitluanga leh Zomuanpuia chuan min hnaih nghal, "Hruaitluanga nên hian ramhnuaiah kan in zui a, ka chhuk theih lohna laiah te min lo kai a" ka tih chuan Zomuanpuia chu a lo ner deuh nawng niin ka hria.






"Leee kal dawn ila, motor ah khân lut rawn le" tiin KṬP leader chu a rawn au lauh lauh a, Pickup lam pan ve mai ka tum lai chuan Zomuanpuia chuan ka kutah a rawn vuan a, "Nang chu ka bulah bike ah chuang rawh, Pickup ah chuan an chuang ṭeuh dawn sia ii ka fit lo emai" a ti a, Ellie peih loh hmel zet a Pickup a a lawn chu ka va en a, Zomuanpuia chuan a bike lam pan in min kai ta daih.









Kan kalna kawngpui chu a khu ṭha hle, kawng an lai bawk si kawngpui chu vut hlir in a khat a ni ber mai, "A hreawm em?" Bike chu
a ti ding a, thei leh thei lo in a rawn hawi, "Mask emaw ken na chang ka lo hre lo a" ka lo ti niah niah, ka scarf chuan ka hnar leh ka vel chu ka hup a, "Nia kawng an lai kher bawk sia" a ti ve a, "I scarf khan I hmai kha tuam zawr rawh" tiin ka scarf chu min lak sak a, ka scarf a ka thisen tlem kai te chu engah mah a ngai lo a niang a khawih bawrh bawrh a, ka hnar leh hmui zawn velah chuan min rawn suih sak a, kan tlan chhuak lehnghal.








Pickup bul kan thlen chuan midang ho chu hmunphiah kek chuan an lo buai nak nak tawh a, huan a mi ni lo, kawng kam vel a hmunphiah kan kek a ni, a hu ho a tih takah phei chuan a nuam riau lehnghal.









"A nuam I ti viau em ni" ka bula ding Zomuanpuia chuan a rawn ti hlawl a, nui var var in, "Imm a nuam ka ti reuh lutuk" ka ti a, a ni pawh chu min en vung vung in a nui deuh sak a pa tak a ni.








"Helai vel a mi hi chu a tâwk mai ang a, hma lam kan pan leh dawn em niang" tiin midang ho chu pickupah an lawn leh sap sap tawh a, kei erawh in ka hma a lian ṭha ve deuh ka hmuh chu hla deuh mah se lak hram ka duh, "Lo kal rawh le" tiin Zomuanpuia chu a in her a, mah se a in her chiah chu ka rah lai lei chu a rawn tla thut a, keipawh chu a hnuai lei tla hniam ah chuan ka zuk ṭhu chawrh a, ka hnang a niang au pawh ka au chhuak thei mai lo.









"Ngaihdam lehhh" ti ṭhawt in Zomuanpuia chu ka awm na ah chuan a rawn chhuk a, ka la hnan deuh awl awl vang chuan ka la ṭawng chhuak thei lo, chu chu a hrethiam a niang ka hnung chu a rawn chûl hauh hauh a, ka kawng lah chu a na ut ut lehnghâl, midang Pickup lawn tawh pawh chu an rawn chhuk leh sap sap hlawm a, ka zak ru hle.








"Engtizia nge" an rawn ti sap sap hlawm, ka zak lutuk chu ka bula rawn ṭhu ve Zomuanpuia awmah chuan ka hmai ka phûm a, chutiang chuan ka awm ngar ngar, "A lei rah a pial a, a tla a" Zomuanpuia zawk chuan a lo ti a, "I chhuak thei angem" tiin min rawn be leh a, ka lo bu nghat nghat, mipa ho chuan dim deuh in min kai chhuak a, ka zah a la reh lo, Zomuanpuia ban chu ka vuan reng ringawt, midang zawng zawng buaipui ngai a ka awm reng bik chu nuam lo ka ti ru hle, ka kal tawh miah lo ang maw le.









"I khawi lai nge na" Zomuanpuia'n a rawn ti a, "Ka kawng hi ka herh in ka hria" ka lo ti sap a, a na lutuk tak tak, "Ka hmet chhin ang aw" tiin ka kawr hlim mai chu a tum a, ka ser te ka hrechhuak zawk a, KṬP leader chuan, "Hmuaka hian mi zût chu a thiam a sin" tiin a bula mi chu a kawk a, Hmuaka a tih pawh chuan, "Nia, khawi ka lo zût chhin ang che" tiin min rawn hnaih a mah se Zomuanpuia chu ka en vat a, ka ser chu tuma hmuh ka duh lo a ni, "U Ramte, keimah pawn ka zût thei a lawm, U Hmuak keima'n ka lo zût ange" a lo ti ve vat a, ka mitmeng kha a chhiar thiam ve a ni mah na ka lawm hle bawk.








"Awle, a nih te chuan" an ti ve mai bawk a, Zomuanpuia chuan min ṭhut hliah deuh in ka kawr hlîm chuang lo chuan ka kawng chu a rawn hmet det det a, a na lutuk chu ka lo eu zawk thei, "A na viau em ni?" a rawn ti sup a, ka lo bu nghat nghat, a hma aia dîm lehzual chuan a rawn hmet leh a, a kut lum ham ham chu ka hria a, ka ṭang nghal ṭung thei, ka mit chhing in ka kut chu ka hum vak ringawt a, a ni erawh engtinnge a awm ve ka hre lo, min khawihna chuan min ti danglam chiang a ni.





Chhunzawm leh tur.


https://chat.whatsapp.com/FTWdZnMSJRRKuHSnHoTimr

WhatsApp group join duh tan aw, information pêk nan.