"Wine in an phalsak lo che" Ka ṭhutna aṭang ban vai pah a ka tih chuan ner nawngin min rawn en a, chutah mawi fahranin min nuih a, a nui hmel chu ka vei zui leh vawng vawng dawn a nih hi.
"Tuin maw wine in chu min phalsak lo a?" Ka ṭhutna bulah rawn ṭhut pahin a no ken chu a tiche kual a, kan inawm hnaih tawh bawk a, a inchei dan pawh ka hmu vek a, inhmeh tih piah lam a ni. Kan boruak tawn milhin a inchei a,mipa tana zuamawm tur a ni hauh lo! Hmeichhe chu hmeichhia an nihna ang hian an mawi tawk em em a, mipa hip nan thawmhnaw tawngchham zet an inbel a ṭul hek lo! Mizo an nih avangin an kalna hmun apiangah 'puan an bih tur a ni' tih a awm kher lo va, mawi tho siin zahawm takin inchei se, an ṭawngkam leh hawiherah fimkhur se mipa tan chuan a tawk em em. Khawvel changkanna in incheina dangdai tak tak a rawn chhawpchhuak zel a, chumi mil tur chuan kan hmeichhiate pawh an insiamrem ve zel tur a ni mahse hnampui zawk te tih dan entawna uchuak taka inchei erawh kan khawtlang nun nen a inrem lem lo a ni.
"Keimah ka ni maithei a ni" Nui suk pah a ka tih chuan lu thing nghutin a nui ve mai a "Khawiah nge I ṭhiante?" Wine lem pahin a ti a, a hmui ringawt chu ka lo en a, a zia lo tak tak.
"A chhungah an awm a nih kha,nang pawh khawiah nge I ṭhiannu tê kha?" Ka hmu apiang hian an inzui deuh reng a,zanin chu ka hmu lo ve teh mial. "In chhungah a lam a ni kha,ka kohsak dawn che em?" A ti zui a, fiamthu mah ni se ka lawm lo tak tak.
"Jay a ka call sak ve ang che" ka tih chuan ka ban puamah min rawn beng pawp a, no ka ken lo lai a ni hlauh a, chuti ni lo se ka huh vek anga,hun lo deuh a haw te kha a ngai anga, chutiang tur chuan tun hun hi hlu lutuk tlat. "I sual ngawt mai,Jay a ka sawi tawp si lo" tiin min melh khui khui a,"Kei paw'n koh rawh ka ti bik lo a" Ka ti ve nghal zat. "I zawng ru tho alawm"tiin bawp a khawkherh nghal a, a kawr hak tlem a rawn tawm chho bawk nen a mal vâr paw phek chu a rawng lang a, ka hawisawn rang teh e!
"I hna ah I tluang maw?"Ka tih chuan thawvel hmel zetin "Tluan lohna tur pawh a awm hlei nem" a ti zui a, a mi chhan dan te lah chu ṭhenkhat tan chuan a intham lo thlakin a huatawm ta ve ang.
"Ka inkhelh ilo en ve ang chu tiraw?" Ka tih chuan ka mitah tak rawn melhin "Ka remchan lai a nih chuan ka lo en dawn nia,a hun te min lo hrilh anga" tiin ka chhanna beisei lo deuhin min rawn chhang a, ka hriat sual emaw ka ti lek lek.
"Luh lehnghal i tum em?"Ka tih chuan meng kiau in "Tinge?Khawiah nge i kal dawn?" tiin zawhna ka dawng nghal a, ka zawhna chu zawhna bawkin min chhang a nia, thu khunkhan sawi chu kan la hlat viau.
"Heta awm reng ai chuan tei vel mai mai ka tum deuh" Ka tih chuan "Ka lo kal ve dawn, lawk aw in tur kan lei leh lawk" min rawn zui ve a tum vang chuan dawr sirah ka lo nghak a, ka ṭhiante'n min rawn zawng em lovang chu.
"Kal ang le" Kalna tur hria ang hrimin a rawn ti a, ka sirah chuan a rawn kal ve zel a, min lo hmutu te chuan min en hrek hrek hlawm a;mahse, ka pawi ti lo..mipa ka nihna angin hmeichhe kalpui chu ka tan a rem lohna a awm lo. "Khawi thleng nge kan kal dawn?Ka hah tawh e" Thui pawh kan la kal lo a, a hah nghal em em ringawt. "Kan la kal char char dawn" Ka tih chuan ka banrekah rawn vuanin "Let tawh mai ang,ka peih tawh lo"a ti leh nang nang a.
"Saw lai deuh ah sawn park a awm a, kan ṭhu dawn nia..Ila kal peih em?" Keimah zawkin min chelhna chu phelh sakin a banah ka chelh sak a,"A awm tih chu I chiang maw?"Min tih chuan ka nuih ta tawp. "A awm ngei alawm Kapi,lo kal rawh ka pua ang che" Ka tih chuan "Puak ka duh lo,Kapi pawh min ti suh"
"I leng ngun a ni maw?Helai hmun te I hriat" Ṭhutthlengah kan ṭhu a, thingkung hnuaia ṭhu kan ni bawk nen hnah thel pawh a khat tawkin a rawn tla a, concert na hmun lama zai ri pawh zawi te tein kan awmna aṭang chuan a hriat theih a, boruak pawh zanin kher chu a dai nuam khawp mai.
"Leng ngun bik lo e,hmun nuam hi chu ka hre thei alawm"
"Ka va han awih tak che em,kha in ve rawh" tiin beer can 1 hi min pe a, "Ka in lo ang,ka lawm lutuk tho e" Ka tih chuan mak tih hmel zetin min en a, a awih lutuk lo a nih hmel. "I in ngai lo maw?Nge I duh lo?"
"Ka in ngai lo! Nang paw'n in tawh suh,a hrisel loh kha" Rin aiin in tur lam hi a lo ti thei a nih hi! Nichinah wine a in a,tunah beer a in leh a, a lan danah chuan tun hnai mai a in ṭan chu a ni hauh lo.
"I duh lo chuan keima'n ka in anga nimai lawm,mipa ve si beer te I in loh" tih leh tlak pap a rual a, can 1 chu a in zo der!
"In tawh suh! Paih rawh" tiin beer can chu ka laksak a, a rui ṭan tawh tih lah chiang reng.
"Nang hi I bialnu nih a hahthlak ngawt ang" Tih pahin min melh khui khui a, "A hahthlak em tih hre tur chuan I ni dawn mi niang?" tiin a mitah tak chuan ka melh a, chhanna ṭha dawn phei chu ka inbeisei lo;mahse ka laka a rilru put hmang hriat ve hrim hrim ka chak vanga sawi ka ni.
"Ka duh lo e a! I lerh reuh hle mai,Pooja be chungin chutiang chu ka bulah I sawi leh a" a ti hlak hlak a, kei erawh a thusawi chu thinrim pui aiin ka nuih a tiza daih thung a,Pooja ka biak thu a sawi lang a nih chuan ka lakah hian a ngaihtuahna tlem tê tal a seng ve tihna a nia, ka lawm tawk a tling em em.
"Pooja chu ṭhian biakin alawm ka biak" Ka tih chuan rang fahranin "Dawt!In inbiak dan pawh a sawi vek,lerh lutuk mai" Kan ṭhutna ah kut nghah pahin lei lam chu a bih a, ka zuk bih ve chuan a pheikhawkin lei chu nâ vak lovin a chhir a, a rui che vel chu duhawm ka ti tak tak. Hmeichhe rui hi ka hmu khat khawp a, ani leh ka ṭhiannu Lucy te hi ka hmu awmchhun an ni!
"Engtin nge a sawi a?" Pooja thusawi ka hriat chak vang ni lovin Norah in ka laka a rilru put eng emaw chen ka hriat theih ka inrin vang a ni. "Ka sawi peih bawk lo" A lo ti leh nghut a, nuih insum chu har tak a ni.
"Pooja chu I thik deuh tihna em ni?" Ka ti leh ngat a,rum mangkhenga min melhin "Ka thik bawk lo!I duh leh be char char rawh,eng atan mah ka ti lo" Rui nawi lutuk a nih loh avangin a rilru pawh a la fim deuh a,sawi chin tawk pawh a la hre viau e.
"Ka thlah tawh ang che aw,a tlai mai dawn" Dar sawm leh chanve a ri tawh a, concert na lamah let tawh lovin haw tawh mai se a fuh ber ang. "Dar engzah nge a?" Tih pahin a phone screen a hmet eng pap a,a screen lock ka hmu chuan ka ner suk. Mipa ngo veng mai,sam pawh sei ve tak hi a hmang a, black and white a ni bawk nen eng mi nge a nih tih lah ka hre thei der lo.
"Keimahin ka haw thei ang,thlah ka ngai lo" tih leh thawh a rual a, ka ding ve nghal zat. "Ka ngaihtuah che alawm, haw ka thlah ang che" tiin a banrekah ka chelh zui a "Lo kal suh!Pooja I hmu duh vang a nih kha,in 2 hian ka ning tlat che u" tiin ka vawnna chu thin thlak a tum a mahse ka ti nghet ve sauh thung.
"Dik tak chuan Pooja chu zan khat bak ka be lo,kan inbiak chhung pawh chuan beisei awmin ka awm lo bawk! Thlah ka tum chhan che pawh ka ngaihtuah vang che a nia, mahni in haw tir ringawt che ila tawh sual I tawk thei. Lo tawk palh ta la ka inthiam thei tawh lovang,chuvang chuan Pooja hmu risk kha chu I ngaihtuahna ah khan tham ral se,ka thlah che chu duh mai rawh" Ka insawifiah a ni ringawt. Pooja nen kan inkarah engmah a awm lohzia hria se ka ti em a ni.
"I va han ninawm tak" Ti hliai in a kal nghal nul nul a, kei pawh muangchang lovin ṭhutṭhlenga a bag dah chu laksakin ka umzui thuai bawk.
.
"Let tawh rawh,hei hi nia ka thlenna chu" Hotel pakhat kawtah kan ding a, nichina kan awmna aṭang khan minute 20 kal vel a ni.
"Lut phawt rawh chuan ka let ang" Ka ti ve tlat a, ka kal hunah lut lovin hmun dangah a kal lovang tih tunge sawi thei?
"I tih a tam,let mai mai rawh" tiin a ṭang ve tlat a, ka luhlul zia a la hre lo a nih hmel.
"I luh loh chuan ti hian kan indin chilh tlaivar anga nimai lawm" tiin kut ka kuangkuah zui a, hahthlak min tih hmel zetin a dar chenah ban pharin a thaw hliai ringawt.
"Min thlah a,ka lawm e luhlulpa" tiin a inher zui a, ṭha ka tih dan angin ka che chhuak ve nghal a.
"Eng nge I tih hi?Ka thu lovin min kuah ringawt a nia,I va han zak lo tak" tiin ka kuahna aṭang chuan tal chhuah tumin a tal vak vak a, chu erawh a thei bik lo.
"Kan inhmu leh hma chu dam ṭha takin lo awm ang che" tiin ka kuahna chu ka tinghet sauh a, ka thusawi vang chuan nge a tal tawp hmak bawk. "Thu min pe tihna em ni?" A ti zawi sup.
"Umm ka thu pek hi theihnghilh miah suh aw,lut tawh rawh...ka hman chang apiangin ka rawn be dawn che a, Pooja vang mai mai a min biak duh lo vel kha phal a ni lo aw" tiin a chalah ka fawp zui a, ani pawh a lo dawh mawl tawp.
NORAH POV
Room chhung eng rawn zam lut vang chuan mit ka meng riai riai a,phone a dar zat ka en chuan rang zetin ka tho a,khumah ka ṭhu leh rih. Nizan khan lu nâ tur khawpin ka in si lo a,tuna ka lu awmdan chu eng emaw thil rit deuh chhipchhuan ang mai ka ni. Lu thing nghutin ka mit chu nghet zeta chhingin ka meng leh a, beer can 1 chauh ka in kha a nia,nidangah hetiang em hian ka lu a nâ ngai tawp si lo.
Bathroom ah lutin shower ka herh haw a, tui vawtin ka taksa a phuh chuan ka harh kawkin ka hria. Hun ka ngah tawh lo avangin ka sam pawh hmanhmawh em em in ka su a, nidanga ka hun hman dan nen chuan inthlau tak a ni. Breakfast pawh ei tawh lovin ka insiam nghal a, keini chu kan pawn lam lan dan an ngaih pawimawh em vangin eng anga hun chepah pawh kan intuai hnum reng angai a, ka vannei a siamin ka hmai hi chhah tawka hnawih ngai a ni lo hlauh a, ka mit leh hmui erawh hi chu inhnawih turin min hrilh ve fo. Mit hnawih lamah erawh ka thawhpui hnam dangte ang lo takin ka zei lo em em a, anni in an vawi khat hnawihna ah an hnawih fuh chat laiin kei erawh chu hnawih ṭhat a ngai ziah a, hun ka duh rei thung.
"Ila hman lo elo?" Pooja in a rawn ti lang lang a, ani chu a hman fel der tawh."Hman ṭep,min nghak rih rawh"Tiin ka mit chu ka hnawih chhunzawm leh a. "Nizan khan Frenkie a'n a rawn thlah che ni maw?Kawtah khuan kan intawk a,nangni 2 hi a rukin in ni chiang?" Darthlalang aṭang chuan rinhlelhna a khatin min rawn en a, kei erawh a rawn sawi avang chuan ka nui hak.
"Zep vel a ngai lo a nia,ka rilru pawh a nâ lo. Ka lawmpui daih zawk che,ani ang mipa chu an vang si" Engmah ka sawi ve hma chuan a ti zuah zuah a, engtin nge kan inngaihzawn a rin theih ni? "Kan ni hlei nem,nizan te chu tlemin ka kai deuh a,min rawn thlah alawm" tiin ka inkhung fel a, tihian ka inpeih chu a ni der.
"Kan ni lo ti chungin I chalah a fawh tho che kha,in mak emai! Ka hmu vek che u lawm" a tih chuan thil ka hrechhuak zawk. Frenkie khan Pooja vanga call pick duh loh tihte kha a sawi a, a hre pha dawn tih chu a chiang a, engtin nge a ngaih ang le?Mizo ṭawnga a ṭawng miau avangin a zawng a za chuan a hrethiam dawn lo a mahse hming a lam ri miau a, eng emaw chu a ngaihtuah hrim hrim.
"A nih chuan kan thusawi i hria em?" Dil chhut zet chuan ka ti leh a, lu thing nghutin engmah a hriat loh thuin min chhang a, lirhthei veivak ri bakah ka beng bula sawi a nih vangin a hre pha lo te pawh a niang.
"Kal ang,kan tlai dawn" Hotel lobby ah kan thawhpui dangte nen kan inhmu a, Mizo vek an ni na chungin kan innel lo hle a, ka sawi thiam dan berah chuan anmahni aṭang hian ka hrang ka ti mai. Kawm nel ve tumin ka be ve fo a mahse a rul tawk lekin min chhang a,engmah min zawt let ve ngai lo. Mahni hnampui te awm reng lai a hnam dang kawm daih nuam ka tih loh avangin ka be ve hram hram a mahse vawiin thleng hian eng kan ang thei lo. Bday leh eng emaw lawm changte hian sawm chu sawi loh hriat pawh ka hre ve hman lo,kei ai chuan ka ṭhiannu Pooja hian a hre hmasa zawk ṭhin. Tun hnuah hi chuan 'min be duh lo aniang/min ngaina lo a niang' tiin ka be tawh hlawm bik lo a, an bulah pawh tel ve phet ka tum tawh ngai lo.
Airport kan thlen chuan kan pilot ho pawh an lo thleng tawh a,ka hmu ngai lo te pawh an awm a, uniform inhmeh fe fe lah an tam!
"Ka ning e,kan kalna lam a inang leh ta lo" Ke per tan tanin a ti a, ka tello a hna thawh a peih lo ang chiah hian kei paw'n a tello hi chuan ka peih bik lo. Ani chu Bangalore lamah a kal dawn a,kei rawh Mizoram lamah a ni thung!
"Nakinah kan inhmu leh dawn nia aw" Kan thu a nih miau loh avangin Pooja nen kan inṭhen hrang a, ka kalpui tur ho chu hotute lamin midang an rawn telh a nih loh chuan Mizo hlang kan ni. Mumbai aṭang Mizoram panin kan chhuak a, Mizoram tlawh tura kal hnam dang pawh an tam khawp mai. Mizoram lama kal dawn hi chuan a nuam viau na in Mizo te hi kan luhlul lutuk a,kan luhlul dan lah hi a atthlak zawng hlir a ni zui. Seat belt hreng tura kan inhrilh mawlh mawlh chung paw'n zawm duh lo tawk hi an awm leh ṭhin a, hreng tura hrilh chu kan hna a ni na in hrilh sek lah kan tam a nuam bawk si lo.
"Nimin a Peksanga chhiatlohzia kha"Kan awmna bikah ka luh laiin ka thawhpui Mizo zing ami Sentei'n a lo ti a,ka lut chu min en ṭhup lehnghal. "Kei chu Frenkie kha chhe lo ka ti daih zawk, a inkhelh pawh ka en char char tawh dawn" Hriatpuii'n a lo ti zui a, ami sawi pa lah chu ka hrechiang mai sia,awm a nuam lo tak tak. Tihian kan tih tur ṭheuh kan tih zawh hnuah air hostess ho awmna bikah lutin kan awm ve tawp a, kan titi tlangpui ṭhin a,vawiin erawh ka titi pui theih tur awm ang an awm lo. Mite ngaih ah chuan hnampui te bulah meuh duty chu a nuam dawn lutuk;mahse zep lo ah chuan hnam dang ho bula duty nuam ka ti daih zawk. Sentei te ho titi chu pawh duh bik lovin a sir ṭhutna awmah chuan ka ṭhu a,thlawhna chhunga awm kan nih avangin hmun a zau lo a, an thusawi pawh ka hre pha vek.
"Lalhriatpui kan duh a inang ziah! Frenkie kher hi chu nang aiin ka hre hmasa a, lo duh ve lo mai rawh" Pakhatin a rawn ti leh a, ka rilru chuan 'Rin aiin a luck daih' ka lo ti hmanhmawh. "I zak lo e a, nang aiin min lo duh zawk thei a" Hriatpuii'n a ti ve ngat a, an inchuh vel emaw ni?
"A tawk!In bengchheng bawk si..kei tih loh chu Frenkie a induh vek!Kei chu Peksanga ngawr ngawr" tih pahin Sentei chu a tho tharh a, toilet lamah a kal nghal daih.
"Frenkie chu a single in ka hria a,engtia hmalak chi nge ni ang?" Tiin an inrawn vel a, a ṭhenin "A inkhelh en phawt ila,chuta ṭang chuan kawng a inhawng chiah ang" an ti bawk a, a inkhelh chu en an tum hmel viau bawk. "Bialnu pawh a lo nei ru reng thei a" Pakhatin a tih leh chuan "Neih se eng nge ni vak?Ka inṭhen tir awm tho e,awii ahh..lo nei pawh ni se hmelṭha lem lo,tê deuh,ṭhing ve tak bak a ni lo ang,footballer ho hian tiang ho hi an duh tlangpui ṭhin a, an duh mak thei a nia" Hriatpuii'n a ti hlak hlak a, kei hi rapthlak ka inti viau a mahse Hriatpuii hi kei aiin a rapthlak leh chhawng. Mihring hi kan duhna ah chuan eng pawh tih kan lo inhuam a, kan ngam vek chu a nih hi.
"Eitur sem a hun tawh,tho r'u" Sentei a rawn tih takah chuan kan ṭhutna aṭang kan tho sang sang a, eitur kan pek tur chu a tihsatna aṭang la chhuakin a nawrna ah ka dah zung zung a.
"Kapi hei in eitur" tiin ka sem zui mawlh mawlh a,"Liankhuma,hotel Zote neitu fanu I ni em?" Pa pakhatin a tarmit vuah siam ṭhat pahin min zawt a, Kapa hmelhriat a ni maithei. "Aw ni e"Ka tih chuan a ṭhenin mak tih hmel deuhin min en a,an awih vak lo emaw ni?"I pa nen chuan ṭhianṭha tak alawm kan ni,I pa I chhun hle mai"a ti zui a, Kapa chu hmelṭha mahse mipa a nih miau vangin an hi ka duh ngai lo a, ka naupan lai phei chuan ka ṭap hial ṭhin.
"Tui in tur kan va duh ve" Nu pakhatin a rawn tih avang chuan eitur dahna lamah ka let a,"Ai a!A nâ lutuk..fimkhur ta che,I mawl ami?!"Hriatpuii rawn chhuak tur nen kan insu a, ka tilui ang hrim chuan a rawn ṭawng nghal a. "Ka tilui a ni em ni?I kalna I en loh man a nih kha" tiin ka kawr hma huh niai chu ka thing zui a, soup a nih vangin ka kawr chu a bal bakah ka awm chu a sa hat hat a,a kang deuhin ka hria.
"Nangmah zawkin a nih kha min rawn su,ngaihdam dil nachang pawh hre lo,I chapo ve khanglang a" a ti zuah zuah a, ṭawngtam chi ka nih loh avangin keh pawp mai chu ka nap a mahse passenger ho awm lai a nih vangin ka insum hram hram a, chuti ni lo se ka kutah hian a sam zai eng emaw zat a awm tawh ang.
"Ngaihdam dil ngai chu nangmah zawk alawm" Su her lawpin ka kal pelh a, bathroom lamah ka tlang nghal. Darthlalangah ka inen chuan ka awm zawn chu a val kulh a, dahniya(coriander)hnah sin te te a chan te chu a bet bawk a, ka inhnim chhin paw'n soup rim hlir a ni ka hriat. Ka kawr nghawng chu pawt kau in ka inenkual a, ka awm vel chu a sen bakah a sa hat hat bawk. Ka kawr chung chu phelh sawk sawkin ka spaghetti top vâr hak nen chuan ka awm a, first aid box chu hawngin kang a hnawih chi oinment chu ka inhnawih a, a thip hlur bawk. Ka kawr chu hak nawn leh chi a nih miau loh avangin eng emaw thut a hak tura an dah ṭhat zing ami 1 chu lachhuakin ka ha nghal a, ka kawr bal ami ka hming chu lathlain ka kawr hak tharah chuan ka thil zui a, kawrkilh pawh a full in ka kilh thei tawh lo.
"Eng ang paw'n hausa rawh se ka hlau ther te lo, a pa sum hmangin a inla vei ve khanglang a" Ka chhuah lai chuan Hriatpuii chu a lo la ang hlak hlak a, engtin mah a awm loh chung paw'n a la phun a nia, ka tuar ai kha tuar se a rak chulin ka ring. Nichin a tui min diltute kha tui pe turin ka chhuak a "A zia lo hle mai,keimahni vangin in inbakkaih ringawt a" Tui min diltu khan a lo ti siam siam a,a inthlahrun hmel takzet. "Engmah a ni lo, ngaihtuah zui suh..tui deuhin in ei dawn nia" tiin ka let san a, room ka luh chuan rum mangkhengin min rawn melh a, zam duh bik hauh lovin ka melh let ve ngat a, a thinrim lutuk chu a sen awp awp maiin alawm.
Lengpui airport chu dar 2 ah kan thleng a, zanin Aizawlah ka riak anga,naktukah ka let leh dawn a ni. Kapa in driver rawn tirin min rawn hruai tir a, mahni in chhung leh eitur pawh a vir tawk lekin ka tem leh dawn a nih hi.
In ka thlen chuan kan nula ho chauh an lo awm a,hna ban hun a la nih loh avangin kan inchhung chu a reh ruih mai. Kanu hi doctor niin hospital lamah a awm a,Kapa leh u Hluzuala te erawh hotel lamah an kal a nih hmel. "Eitur kan siam chhungin lo han inbual la tiraw?" Kan nula te zinga 1 u Remi'n a ti a, ani hi kan bulah kum tam a lo khawsa tawh a ni. Kan nula te hi thingtlang lam chhungkaw rethei tak tak aṭanga lo kal an ni hlawm a, tihian kan bulah hlawh neihin a ṭul ṭul an ti ṭhin a, thawh hreh hi an nei lo reng reng.
Ka room ah lutin ka thawmhnaw te ka thlak zawh ah inbual turin bathroom lamah ka tlang nghal a, inbual hmasa phawtin ka sam te su leh a, ka hmai phih a darthlalang ka inen chuan nizan thil thleng kha ka hrechhuak a, ka chal ka nuai lai te chu ka kiai suk suk thei nia mawle. Ka mit ka chhin lahin ka mitthla ah a hmel pa zet leh a mitmeng fiah kalh te, infiam mi a nihna tichiang tura a vun uk kharh te kha a inhmeh bik hliah hliah. Mipa dang ni se hang tiin ka iai ngei anga mahse ani chu a inhmehin a pa pui ngawih ngawih.
Nizan leh vawiinah kan la inbe miah lo tih hrechhuakin hmanhmawh zetin bathroom aṭang ka chhuak thuai a, ka bag hai rak rakin charger leh phone kengin plug awmna lam ka pan nghal a,nizan aṭang ka la charge miah lo avangin a lo thi tawh a,min rawn be duh pawh ni se min be thei dawn lo hrim hrim. Battery nghah chhungin ka inha vat vat a, ka sam huh chu sam chhem rona in ka chhem ro bawk a, ka inbual zo chu ka harh sawng sawng maiin ka hria.
"Rara eitur chu kan peih tawh aw" Kawngka rawn kik ri kauh kauh pahin a ti a, ka room ah hian luh mai mai ka phal loh avangin pawimawh a awm paw'n pawn aṭang min rawn hrilh mai zel. Ka khirh ṭhin em vang hian Kanu leh Pa in min hrilh ve fo a mahse ka tihdan ṭhin a nih vang hian nge ka sim thei der lo. Phone chu ka hman duh miau vangin power bank ah charge in inhnuai lamah ka chhuk a, eitur rim ka hriat chuan ka ril lo ṭam tawh zia ka hrechhuak ve chiah.
"Black pepper I telh em ni a?" Ka tih chuan a bu nghat a, ka ngainat lohzia hre ve awm tak. "Kha paih vek rawh,vawi 1 mah black pepper telna min pe tawh suh" tih leh thawh ka rual a, ka rilṭam tehreng nen thinrim lamah a kal daih tawh. "A dang ka lo siam ang,ka lo theihnghilh palh a" a lo tih chuan ka chhan hma hauhin "Remi a ngai lo,a eitur chu a duh kha insiam rawh se" hnung lam aṭangin a rawn ti a, tunge tih chu ka hming ka chian tluk zetin ka chiang.
"Nuuuu" a rawn haw hun lo takzet. Awmpui ho hi a ṭan thei lutuk a, amah vangin an huangtau ka ti mai.
"Nula I nih tawh kha,midang tihbuai kha duhtawk rawh" tiin an room lamah a phei zui a, ka zui ve nghal zat. "Anni ho bulah sawn min ṭan ve ta che, black pepper ka duh lo tih pawh an hre vek, chuti chung chuan an telh tho a,an telh ngamna chhan pawh I duat lutuk vang a nih hi" ka ti tan tan a, Kanu lah chuan engah mah angaih hmel bawk si lo. "I duh an siam emaw siam lo emaw I eitur chu nangmah insiam tur a ni" tiin a bag dahna ah chuan a bag khai chu a dah zui a, Kanu mah ni se min tih dan vel chu ka ngei tak tak. "An tihtur zawk alawm,hlawh kan pe lehnghal"
"I va mak ve mawle,an hriatah te khan I sawi a nge..a chi lo viau ang. I eitur chu inhnuai restaurant ah va order mai rawh,pawisa I nei em?Pek I ngai em?" A ti zui a, ni dang ang chu ni se pawisa chu i he lovin ka la ang mahse zanin tlai hi chu ka thin a tirim deuh tlat. Engtin mah chhang lo a ka chhuah avang chuan hnung lamah Kanu chu a lo chek hlak hlak a,kan awmpui hoin min en dauh dauh reng bawk.
Zanriah ei hun nghak tur chuan ka ril a ṭam tawh em vangin kan inluah te restaurant ah ka zuk order a,dawrah pawh ei lovin in lamah ka keng chho ngat a, Kanu'n min hauh chak hmel zetin min melh bawk.
"A va ṭam awm ve aw,I hak a nge" Kapa aw ka hriat chuan kawngkhar lamah ka hawi thuai a, nuih insum zeta min melhna chu rum zetin ka lo melh let ve ngar. "Vai nula ei hmu ngai lo a lo haw a ni maw?" U Hluzuala'n a rawn ti lut ham ham a,an vai chuan min nuih hak hak hlawm a, ka va han ngei mai mai tak.
"Ka rawn haw ve em em a,tumah pawh in lo awm lo a" Ka ti nui nui a,u Hluzuala lo ner nasa mai. "Haw pawh a ni lo,I rawn hotel thlen ringawt alawm" titu chu u Hluzuala bawk! "Uuu ṭawng thei viau suh" Tissue paper nen ka hmui vel hruk pahin ka tho tharh a,ka ei hnem bawk a,puar tawh tak ka ni. "Mama I inkhelh leh dawn em?" Kanu'n u Hluzuala lam hawiin a ti a "Inkhelh leh dawn e,vai nula kha a rawn kal ve peih em?" Inchung chhona kailawn aṭang ding meuhin a rawn ti a, a hmel a siam dan te lah chu chimawm tak a ni.
"Vai nula min ti ziah suh,nupui pawh i hmu zawh loh tawp kha!"Ka tih chuan ka u chauh ni lo, Kanu leh Pa pawh an nui ve tho. U Hluzuala hi kum 31 mi niin a zawh hnuah Kapa thu angin kan hotel a enkawl zui a, hna a tlin ve khawp mai a,a kuta a awm hnu hian sawiselna aiin fakna kan dawng tam a, mikhual lo thleng ṭhin te aṭang paw'n thu hriat nuam tak tak hlir a ni kan dawn;mahse, a nu leh pa,a farnu te tana innghahna tlak leh sumdawnna a hlawhtling em em hi kawppui tur hmeichhia ngaihven lamah a hlawhchham leh hle thung! Fapa mal a nih bakah a kumin a lo tlin ve tawh bawk nen Kanu leh pa hian nupui neih tawh turin an hrilh ṭhin a,ani lahin 'Nupui nei hman ka ni rih lo' hi a ti tlat ṭhin a, tihngaihna a vang ṭhin khawp mai.
U Hluzuala inkhelh turin a chhuak a, Kanu leh pa erawh Kanu pangpar khawi te thlithlai pahin inchung zawlah an chho a,awmpui hoin eirawng an bawl a, tihtur ka van em avang chuan room ah chho lehin khumah ka mu mai mai a, nichin khan Frenkie in min rawn biak leh biak loh en tum kha ka nia mahse ka thil ei fuh lo lutuk vangin ka theihnghilh zui daih a,whatsapp ah lut lehin message 3 a lo hnutchhiah chu ka chhiar nghal a.
*Tui deuhin I mu dawn nia*
*Morning..vawiin chu khawi lamah nge I kal dawn tak?*
*Min reply ve tal la,ka hriat lovin ilo thinrim leh reuh em ni?*
Min rawn thawn hnuhnun ber dar ka en chuan tlai lam dar 4 velah khan a ni a,min rawn thawn zawh ah a out nghal tih chiang takin a last seen nen chuan dar zat a inang thlap lehnghal. Battery neih lo vanga reply lo ka nia,ani lah chuan ka thinrim angah a lo ngai a, ka thinrimna chhan tur mawlh chu eng tak ni ang maw?
*Ka phone a lo thi daih alawm le*
*Vawiin chu Happiest state lamah ka kal a,eng nge i tih ve?* A online lo avangin a buai ka ring ve ta tawp a,message a hmu hunah chuan min rawn be ve mai ang chu maw?
Ka lo muhil daih chu niin,Kanu'n zianriah ei tura min rawn kaihthawh chuan zan dar 6 a lo pelh tawh a, u Hluzuala pawh a lo thleng der tawh. Zanriah ei zawh ah Kanu leh Kapa inkhawm turin an kal a, ka u nen mahni room ve ve ah kan tawm leh ta bawk.
Frenkie a message engmah a awm lo avangin phone pawh khawih lo chuan room chunga ka thil tar mawi ho chu ka siksawi a,hman hunah room chhung hi ka chei ṭha ang. Dar 9 velah Frenkie a hnen aṭang phone call ka dawng ta hlauh a,ka lo chan deuh reuh avang chuan a rik rual rualin phone chu la kang a, lo nghak anga lan ka duh leh si lo avangin rei deuh hlek ka nghak leh te te a, ka awmdan chu ka ngaihtuah let chuan keimah ka ang lo tak zet.
"I mu tawh em?" Cool ruih hian a rawn ti a, concert zana ka chala a fawh lai hunah khan ka let leh nimaiin ka hria. "La mu chiah lo,nang I mu tawh em?" Tih pahin khumah chuan a vang zawngin ka mu thla a,tunah tak hi chuan a bula awm ang mai ka ni. "Zanin chu kan training rei deuh alawm mawle,khaw en lai a sat theih em vangin zan lamah kan am deuh a,I message pawh ka lo hmu lawk lo a nih kha" tiin a rawn insawifiah a,hetiang te chu mipa in an bialnu te bulah an sawi ṭhin a ni ngai a, ani hi min bem si lovin min lo bialnu ngaih hmiah tawh emaw ni dawn le? "Zanriah I ei tawh em?" Chhan dan tur a van em vang chuan thu dangah ka pakai daih a,a ei tawh thu bakah a inbual zo diam tawh tih chu a rawn sawi leh hram a,eng nge maw kan awmzia hi le?
"Lo let tawh rawh,I ngaihawm emai" Kan ngawih veng veng lai chuan a rawn ti a, ka meng kawk mai. 'I ngaihawm' tih ai chuan tlang takin 'ka ngai che' te han ti se tiin ka lo ngaihtuah hmanhmawh. "Lo let pawh ni ila min hmu thei dawn hlei nem" Nui chunga ka lo tih chuan ani pawh a nui ve tho. "Phai ah I awm hrim hrim hian a nuam ve a,kha lama I awm daih kha chuan a hla lutuk" A thusawi dan vel chu tlang taka sawi si lovin min hmer tel tho bawk si,zawh dawt lahin ka zak ve tho bawk sia. Sawi tur em em pawh hre lo chuan minute 45 ngai lai kan inbe hman a, kan inbiakna kan tihtawp dawn a lungkuai zeta 'Lo haw vat vat rawh,nghah reng hi ka thei lo' a tih kha ka bengah hian a ri tluk tluk mai a ni.
Spelling mistake ka check hman lo a,chhiar dan lo thiam mai r'u aw 
Ads click