Mikhual Hunter - 12

[Vtei Jahau]

Ngaihdami's P.O.V









"Ka rei leh, haw nghal ang" Zomuanpuia'n min en tih a hriat rual rual in U Bebeth-i'n min kuai her lawp a, mah se ka thil hmuh vang chuan ka hawi lêt leh ngat, Zomuanpuia bianga lo fâwp nawk nawk tu hmeichhia chu a hmêl hmuh chian ka duh vang a ni, Zomuanpuia pawh chuan min la en ve reng tho a, "Ṭang tlat suh, Zomuanpuia sâwn min pawt sawm vek duh hmêl a pu tawh a nia" tiin kûn kât kât chungin U Bebeth-i'n min kai kal dawr dawr a, ka awm chu a nuam lo nghal vek thei niin ka hria, ka ke te chu a zawi zo ta vek niin ka hria, "Duati ngatinge?" ding deuh dat in U Bebeth-i chuan min rawn en chiang vut vut a, ka lu chu ka lo ṭhing nar nar a, ka ṭha tih hrilh nan a ti ka ni, ka ṭawng chhuak thei lo.







"Bike bulah sâwn min lo nghak mai rawh Muana te kha ka'n va ko lawk ang" ti zung zung in U Bebeth-i chuan min kalsan a, min kalsan na hmunah chuan ka la ding deuh ren râwn a, ka thil hmuh kha ka mitthlaah a rawn lang leh ṭhin a, ka âwm te chu a tawt up up a, ka thaw ṭha thei lo hial a ni, rei fe chutia ka din ren râwn hnu chuan ka âwm tawt up up chu chum deuh dat dat pah in thawk ka la kawk kawk a, bike kan dahna lam chu ka pan chhat chhat a, mah se ka hnunga mi an kal tih ka hriat rual erawh in ka ding chat thung, tunge a nih ang ka ring thiam lo, hawi pawh hawi lêt duh lo chuan Bike lam pan chuan ka kal chak sauh a, mah se chutia ka tlan ti tih tawh lai chuan ka hnunga min zui tu chuan ka dar aṭangin min pawt her lawih a, ka hmêl a hmuh chuan a meng deuh kawk a, kei erawh in ka hre ngai lo thung, "Duati i ni tiraw, Ngaihdam" a ti mawlh mawlh a, ka bân leh lam leh lam ah chuan vuan rûn in min thing deuh nawk nawk a ni ber, mah se kei erawh ka hmêlhriat pawh ni lo in chutiang a min ti ringawt chu ka hamhaih in ka hlau hle.








"Mi,, min hrethiam teh, ka hre ngai lo che" bah nawk a ka tih lai chuan tha chak zet hian min rawn pawt dawr a, a hnunglamah min din tîr in hmelhriat loh pa chu a hmachhawn nghal run a, hnunglam aṭang pawh chuan Zomuanpuia a ni tih ka hre thei, "Thlâwk bo nghal rawh" Zomuanpuia chuan a ti hmuk a, hmêlhriat loh pa chu a nui huk, "Zomuanpui, heihi hneh thei tu che an awm lohna in tlan siakna a ni lo a nia aw, ro i rel thei lo, Ngaihdami kha biak lawk ka duh mai chauh a ni" a ti a, ka hmingpum chena a hriat vang chuan ka meng deuh kawk kawk a ni ber.








Zomuanpuia's P.O.V






"Rs, zanin a ka mi hmuh hi i awih thei lo zawk ang, in tlansiakna hmunah Ngaihdami ka hmu a nia aw" kan piah deuh thim laia mipa ṭawng ri ka hriat chuan ka ṭhiante min biakna pawh ka ngaihsak thei tawh lo, "Aih a pum a puar lo hrim hrim" a tih leh phei chuan ka ṭhian te chu engmah sawi lo in ka kalsan ta ringawt a, mah se thim zual lai ka va thlen chuan tumah ka hmu tawh lo, rang takin ka bike lam ka pan a, bike chuan U Bebeth-i leh Ngaihdami chu ka zawng kual nghal a, rei vak lo ah U Bebeth-i chu ka va hmu a, mah se a bulah Ngaihdami a awm ve lo, rang zet chuan ka pan a, tlan chhiat a lo la tum zui, "U Bebeth khawnge Ngaihdami?" ti a hlauhthawn hmêl zet a ka ṭawng takah chuan a tlan chhiat tum ûk tawh pawh chu a in siam ṭha vat a, "Bike dahah min lo nghak turin ka tia, ngatinge thil ṭha lo a thleng em ni?" a tih takah chuan min biakna pawh chhâng ve tawh lem lo in Bike dahna lamah chuan ka in khalh phei lehnghâl a, Bike dahna thlen hma deuh a mipa pakhat nên an lo in chai buai chu ka va hmu a, rang taka bike aṭanga chhuk in ka va pawt ṭhen vat.






"Dawngkim, ṭha deuh a kalsawn tura ka tih lai che hian kalsawn rawh" ka ti leh a, U Bebeth-i leh a mipa ṭhiante pahnih pawh kha an lo thleng ve leh tawh a, Dawngkima pan hnaih ka tum chu min rawn dang nghal vat, "Ngaihdam, Duati min hre lo a maw, keimah i U Dawnga ka nih hi, i U Rsa ṭhianpa" en pawh min en lo in Ngaihdami chu a au lawm lawm a, Ngaihdami erawh eng emaw hrechhuak ang pawn a awm lo a, a danglam eih lo thung, "Duati min hua ang tih chu ka ring, mah se kan ngaihtuah lutuk che a nia, Rsa pawn a zawng nasa lutuk che" Dawngkima'n a ti leh a, Ngaihdami chu a buai leh hlau in Dawngkima chu ka pan a, "Ngaihdami hi a dam lo a, tumah a hre tawh lo, ṭha taka kan awm tlan i duh chuan kalsawn vat mai rawh" a kawr awm a ṭham nawk pah chuan ka ti a, Dawngkima mak ti hmêl chu ka hmuh hmaih hauh lo, "Engtin chiah nge a awm a?" tiin ngaihtuah hmêl deuh in Ngaihdami chu a en a, U Bebeth-i chuan "Tawh sual a tâwk a" a lo ti hman chauh tihah ka lo pawt chat a, "I hriat ve vek a ṭul lo, kal bo rawh" ti leh hluk in Dawngkima chu ka paih thal ṭhuai a, ding vat in a in beng fai thut thut a, a kalsawn ve mai bawk.







Dawngkima a kal takah chuan U Bebeth-i ka melh leh a, min lo en lêt ve chiah bawk nên ka hauh a hlau lutuk chu a ṭhian hnungah chuan a biru a, eng emaw a hrilh ru su su a, a ṭhianpa pawh chuan a bike a la chhuak nghal a, "Muanpui kan lo va haw hmasa ang aw" tiin Ngaihdami chu kaih sâwn mai a tum a, "Ngaihdam" bul hmuk a ka lo tih vang chuan Ngaidami kaih a tumna kut chu a dahthla rang hle, "A nih chuan lo haw pui mai rawh aw, Duati, tuar fan fan rawh" a ti leh zung zung a, tim deuh daia min rawn en leh te te in a ṭhianpa bike ah chuan a lawn nghal a, "Haw tlang ang che, nangpa kha, in i thlen pui nghal loh chuan i hre viau ang" tiin a chuanna bike khalh tu pa chu ka kut zungchal in ka kawk vah a, min hlau bawk a, bu nghut nghut in min tlan chhuah san nghal a, tunah chuan Ngaihdami nên chauh kan awm ta.








"Ihh ka kal ve châk lutuk a" ṭi dêk chuan a ti a, hauh chu a in thlahrunawm rum rum, "Zanin kha awm ta lo ila engtia tih nge i tum ang?" bûl hmuk chuan ka ti ta tho, a hnuailam a bih a, a kut hnung a suih a chhan pawh min chhang lo in a ke chuan lei chu a thai kual a thai kual ringawt a, "Ngaihdam" ka tih leh takah chuan "Ka ṭap ang" a rawn ti chhuak sep ni hian ka hria, "Maw?" a ṭawng zawih lutuk vangin a thusawi chu ka hrechiang thei lo a, ka zâwt nawn leh ngat, a hmasa aia ring deuh zawk chuan, "Ka ṭap ang" a rawn ti leh a, rawn hawi chhuak in a biang chu a nuai tawk a, ka bike head light ah chuan a mit sen râm chu ka lo hmu nghal chat, a hlau hle a ni mah na, "Khatiang emaw thil dang hrim hrim pawh a thlen ka hlauh vangin a nia in kal ka phal loh, mah se hei in kal lui ta tho a" ka ti a, kawng dawm meuh in vân lam chu ka en a, ka thin chu a rawn rim thar leh thut lehnghal, "Tih palh" a rawn tih sep lai chuan, "I ke pawh kha a dam tawh viau kha, ke pawn in i thleng ṭhak thei tawh dawn a nih kha" ka tih chuan Ngaihdami chuan ka mitah tak min rawn melh chho a, mittui tling piau chuan min rawn en a, "Aw i phurh haw ka ngai lo, ke ka nei ve reng" tiin min au khum tuar a, in her hmak in kawngpui thim vekah chuan a kal nghal mawp mawp a, keipawh ka beisei loh dân lutuk a thil thleng vang chuan chêt mai nachang ka hre lo.







Ngaihdami's P.O.V







A bul aṭanga ka kalsawn chiah chu ka mittui a tla nghal zawih zawih a, a chhan pawh ka hre lo, ka aw rawl erawh ka chhuah thei lo a, ka mittui chu a ngai reng in a luang zawih zawih thung a, a hreawm tak zet a ni, chutia thim zînga engmah ngaihtuah lo a ka kal lai chuan ka hnunglam aṭangin êng in min rawn chhûn a, Zomuanpuia a ni tih ka hria a, ka kal chak sawt thung, "Ngaihdam" ka zâwnah a rawn ding dat a, ka theih tawp chhuahin ka tlân nghal vak a ka mittui a tla chu hmuh tîr ka duh lo a ni, "Engnge maw i hriat leee, tiin min rawn pawt her lawih a, Bike aṭanga chhuk in a ke in min lo um chu lo niin, mah se ka tlan ṭha thei lo bawk nên ka lo thleng thui teh chiam lo ania'ng, a bike eng pawh chuan min la chhun pha reng, "Ngatinge?" tiin ka bianga ka mittui tla chu a rawn hru a, chu chuan ka ṭah a ti chhuak zual a, min kuah ngat phei chuan ka in sûm zo ta lo a, a âwm a bei chung chuan ka ṭap ta chiam a, ka ṭah nasat dân em em chu kum tam tak ṭah tawh loh hnuah ṭap ve leh ta ang mai hi niin ka in hria.







Rei fee ka ṭah hnu chuan Zomuanpuia chuan ka lu a chul deuh hliau hliau chung hian, "Ka tihpalh a ni, ka lo ti mah mah a ni, khapa i hlauh dawn tehlul nên khan ka lo vin belhchhah hrep bawk si che a" a rawn ti a, mah se chu chu ka ṭah chhan dik tak a ni lo tih erawh hrilh ka tum lem lo, nia ka thinlung hi a na takzet a ni, Zomuanpuia bula hmeichhe awm ka hmuh khân ka na takzet a ni, a biangah te kha a la fâwp zui a, ka aaa lo chauh hi a ni ber, mah se tih theih ka nei bawk si lo, a ni lah hian a ṭhian leh a nau ang bakin min en si lo.







Ka ṭap ka bân ve takah chuan a bike lamah min hruai phei a, mah se ka ke na lutuk vang chuan bike hmaah chuan ka ṭhu hnawk, ka in ring hman lo, ka ke chu a rawn zawi thut a tin, "La dam ṭhat loh nên i chhuak awt awt a, i la tlan lehnghâl" Zomuanpuia'n a tih lai chuan rum fe in ka lo en a, sawi sawi a ṭullo lutuk, ka hmêl a hmuh takah chuan a ngawi ve mai bawk a, a la nui zui lehnghâl, "I mut a chhuak tawh viau em? Taxi kan ko mai dawn em ni?" tiin ka bulah a rawn ṭhu thla a, ka lu ka lo thing rang hle, "A buaithlâk mai mai chawl hlek ila ka kal ve leh thei nghal mai ang" ka ti tlat a, phûl laiah kan ṭhu bawk nên vân dum pâwl raih chu a cham phei pût a, arsi an de neuh neuh bawk nên a nuam reuh phian mai.







"Nichin a mi kha" a ti a, ka en vat a, mah se vânlam hawi chungin a mit chu a hup a, ṭawng zawm a tum hmêl lem loh, "Sawi zo ve law law la" ka ti a, a hmêl chu ka en reng a, a hmelṭha tak lak aṭang chuan ka mit ka ka sâwn thei lo, "I hriat hnu ang i ti em?" min chhang tawh dawn lo emaw ka tih hnu feah chuan a ti ve leh hlawl, "Hriat ngai awm pawh ka hre lo, mah se a hmêl ka hmuh khân ka thinrim" tiin ka rilru diktak chu ka sawi a, awih loh hmel zet chuan a nui hawk lehnghâl, "I ṭah ṭuau kha, kha kha I thinrim ve dân em ni?" tiin a ṭhu chhuak a, min nuih zui char char lehnghâl, "I va han sual tak, a rawn lang thut a, ka hlau a nih kha, bakah ka ṭap ṭuau kher lovang" tiin ka ṭhu chhuak ve a, nui sâng chungin min lo en reng a, keipawh chuan ka en lêt ve kar, ka mit ka la sâwn thei bîk lo a ni, mah se chutia a hmêl ka en reng lai chuan hmeichhe pakhat in a bianga a fawh kha ka hrechhuak a, ka hawi sâwn nghal hmak, "I biangah khân lipstick a kai a" tiin dawt ka sawi a, ka ding nghal hmak, "Haw ang" a ti hmuk a, rawn ding chhuak ve in a hmai chu a nuai nawk nawk a, Bike ah chuan a lawn a, "Chuang rawh le" a tih chuan in kuangkuah rân in ka melh rum hle ringawt, "Engnge i hriat, lawn ta che" a tih leh takah chuan, "Hmeichhe dang ṭhutna hnuah ka chuang peih lo" ka ti a, hmalam pan in ka kal nghal daih a, a kawng chu a phelh a, seat hnung a hru fai mawlh mawlh chu ka mit sir in hmu reng mah ila hmalam pan in ka kal lui tlat a, Zomuanpuia awm dân vel chuan min ti hlim hle, ka lungawi loh a hlauh vanga ti niin ka hria a, chu chuan ka awm a ti nuam veng veng mai a ni.








"Lawn tawh rawh a fai tawh" ka bulah chuan a rawn ding dawt a, chhang lo in ka kalsan leh, "Ngaihdam ka haw san tak tak dawn che a nia" tiin muangchangin min ûm zui a, kan awm dan chu lem tih rûk riauna ka nei a, nuam ka ti tho bawk si, "Ngaihdam" a ti chu ka hria a, ka hawi lêt lo mah se hnunglam aṭang chuan tha chak zet hian min chawi kâng lawp a, ka hamhaih vek, chêt pawh ka che eih lo, a bike hnungah chuan min ṭhut tîr a, a ni pawh chu a rawn lawn nghal a, ka chhia leh ṭha hriatna a ka kir leh meuh chuan kan lo tlan chhuak fel dim diam tawh, Zomuanpuia'n ka kawng a vawnna lai lah chu a sa deuh ham han reng ni hian ka hre lehnghâl, "Zingah i thawh theih loh vaih chuan kan haw san ang che" a ti a, ka chhang lêm lo.









~~~~~~~~~~~~~~~~~~~~~~~~~~~~~~





Kan khua kan thlen chuan kapi in an thlalak min hmuh tawh kaputea leh Kapu chuan min lo lâwm in min lo chiau au thuai a, an hmelah chuan hlimna tak tak ka hmu in ka hria, ka hmuh châk em em ral khat aṭang pawha min ngaihsak em em tu Zomuanpuia nu pawh chu ka hmu thei ta, a hmelṭha ka ti takzet a ni, Zomuanpuia pawn a chhun ka ti viau bawk.




Zomuanpuia's P.O.






"A mah zawng tu chu kapu engtinnge a hmêl a awm? A hming te a sawi em?" zawhna ngah fe chuan ka ti a, kapu erawh in, "Nei lem lo, mah se Duati awmna hrilh tur khân min ngen ngawih ngawih a, mah se IPutea'n a hruai chhuak ta a nih kha" a ti a, ka rilru chu a buai map mai, mah se Dawngkima thusawi kha ka ngaihtuah chhuak zawk, tu in nge Ngaidami a zawng char char niin a sawi kha, rang takin ka phone ka la chhuak a, Rosy-i chu ka call nghal, a ni pawh chuan a lo la rang ngei mai, "Dawngkima number min lo pe teh" ka ti teh tawng a, "Engnga tan maw?" a rawn ti ha, "Buai lo la, a number chu min rawn thawn mai teh" ti leh hluk in ka ti tawp a, a ni pawh chuan min rawn thawn ve nghal a, Dawngkima chu ka call ve leh a, a la la thei mai lo lehnghâl.








Mah se a la tawh dawn lo emaw ka tih hnuah a rawn la a, a ṭawng hauh lo thung, "Dawngkim, Hello" ka tih takah chuan "Aw tunge aw?" a mah aw ngei chuan a rawn ti a, thu chu ka pehhel kual vel peih lo, kapi te ho in min lo en ṭhup bawk nên, "Ngaihdami nên khân in in hre ngai em ni?" ka ti a a ngawi leh vung vung phawt a, "Ka hre chiang lutuk" ruih hmêl fe chuan a rawn ti leh a, zu in a ni mah na, "A nih chuan min hrilh thei angem?" ṭawngkam mawi hnai taka ka tih takah chuan a rawn nui hawk a, "Zomuanpui, min fiam em ni" a ti a, min thawn chu a tum hmêl loh kher mai, "Khawngaih in min hrilh rawh" chang zet a ka tih takah chuan "A chungah khân engnge thleng min hrilh phawt rawh" a ti a, a hriat ang ang hriat ve vek ka duh vangin Ngaihdami chunga thil thleng chu a pawi lo tur chin a ka ngaih chu ka hrilh ve ta vek, a lo chek deuh tlak tlâk tih ka hria.









"Awle ka hrilh ang che, Apa khân kut a thlak nasa thei em em a, mah se vawikhat chu nupui thar apa khân a nei a, a nupui thar chuan fapa Ngaihdami aia upa a rawn chhawm bawk, kum hnih dawn lai chu Ngaihdami te nên an awm ho a, apa pawh in kut chu a thlak khât ta deuh, Ngaihdami pawh chuan a u mipa thar chu a ngaina in a ring em em a, mah se chu a rin em em a U chuan Ngaihdami rinna chu a tichhe ta vek a ni". Dawngkima thusawi chu kan ngaithla ṭhap bawk si nên kapi leh Kapu te chu an thu hriat chuan a ṭhawng takzet tih chu an hmelah a hmuh theih, an ni mai ni lo, kei leh Putea pawh chu min ṭhawng takzet a ni.







Chhunzawm leh tur.