*Simple Dimples * ch~6 by~Natasha Hrahsel

[Natasha Hrahsel]

*Simple Dimples* ch~6




Pu Duha tr in kalkawng chu a diak per pur khawp mai a,tui tling khawp hiala kawng khuar lai a awm bawk nen kawi zawk zawkin kan thleng hi ani ringawt.
Chirh kai nuanga kan thlen chu thuhran,tawlhthluk kan hlauh vangin kan huh zawr hneh viau."Ipa chu a rawn haw tawh kha, kan nihliap a hawh a"anlo la ti deuh deuh a! Kan kal thlawn chiang kher mai.




"Khawiah emaw akawi aniang a" ka inthlahrung deuh chuan ka ti sap a,a huh nasa zawkah atang bawk si ka inthiamlo takzet.
"Nihliap hi ahrang ve ve in kan khum mai dawn mi?" Te chu kan ti tha leh hnuhnawh a,kal lam atang khan lo khum hrang ve ve ilang kan huh zawr lo deuh tur ania.
"Kan huh tawh tho tho,tih hul leh kha abuaithlak mai mai" a ti mai thung.






"U Raymond ngaihzawng inei em?" Ka ti sap a, hmeichhe kawplai nei reng si in kalo nel mah mah ang tih ka hlau ani.





"Hmeichhia chu neilo" a tih chuan ka pênlai ka tawp chawt. "I gay ve deuh tihna mi?" Ka ti deuu hâ..
"Gay a!"




"Hei mahni mipat pui duh tlat ang hi"a kut in ka tawnglai chu tawp turin minlo ti nawk nawk, "a awmzia chu ka hria alawm, ka gay lo ania"nui chung hian a ti a, ka zawhna min chhándan in zir heklo."Ngaihzawng itih khân mi kan ngai ang i sawina hi maw ka ti" a ti leh sup a, ava in tuha lo tak.Ngaihzawng ti na na na a mi ngaih ka hriat duh a ring emawni?





"Tinge chutiang min zawh a?" Te chu a ti hnuhnawh leh a, "tu emaw thin ka tihrim ka hlau" ka ti mai thung.A dik tak tak tho bawk a, mi inkar a tlákzeh ka duhlo hrim hrim.






Kan in alang thei tan dek dek tih ah chuan ka ding chawt a "tinge?" Alo ti vut.
"Ngaihzawng ka neih leh neihloh i hre duhlo ami?"ka ti chhuak tawl.Ka ngaih anga minlo ngaih veloh vaih chuan ka zak dawn lutuk ringawt.
"Ka hria alawm" alo ti thên a, "star ve deuh reuh che ho in ngaihzawng i neih an ring anga, thenkhat in ipa vang ringawtin an neih phâk ah an ngailo bawk ang che.Tha ti a lo duh ve che tute ho in Pastor fanu inih vangin an hnaih tha ngamlo bawk che anga, tiang hi chu an dawng lel duh alawm" a tih chuan dik ka ti viau.

Higher kan kal lai a mipa thenkhat minlo duh der ve deuh tu te ho sawi leh ka hriat dân in 'Nunpuii chu hmeltha ve tho mahse ka bêm ngamlo, min duh dawn chuanglo' te anlo ti thin a, min ngaihzawn chuan Pathian pawi sawi tlata in ngai te pawh an awm mawle!






"Anih nangin ...engtin nge min hmuh ve?" Chhânna dawn inbeiseilo zet chuan ka zawt ta tho.






"Kei aia phû che an awmin ka hrelo" a tih chuan thim viau mahse ka melh vak tho. "Min duh itihna maw?" Ka ti hâ a, "duh che chu duh e, ka hman remchân hunah ka bem ang che" a tih chuan ka thaw deuh halh.
"Min bawl mai mai niberin ka hria" ka ti halh a,hetiang teh thlawt hian hmeichhe bulah an tawng ngai ka ringlo.A mize maksak lutuk hi a!






Kan in chu a rawn êng pup a, current a awm leh tawh anih ringin în dang ho chu ka en kual a mahse anla thim vek tho.Kan inverter chu ka pa'n a fit chawp tihna mawni?






"Haw phawt teh ang" ka ti ta tawp a, min duh tih a sawi a hlim viau tur ka nih nen ka beisei loh dan zawkin a sawi a ka hnual phei chu ka tilo, mahse a sawi holam leh lutuk a ka ringlo.Minlo bawl mai mai anih chuan a châklo ang chu aw..







Kan huh zawr em vang chuan "nu hrukpuan minlo pe, kan huh vek" veranda tang ka ti lauh a, min rawn pe ve mai bawk.
"Ka pa alo haw tawh mi? Pu Duha te in kan thlenin alo awm tawh reng reng hleinem " ka tih chuan, "in chhuak chiah tih khan a rawn haw zui mai, ph i keng silo a rawn biak ngaihna cheu ka hrelo a, in thiante lah hian i thianpa nb hi an nei bawk silo" a ti zui nak nak a, ava awihawm loh tak! U Raymonda nb an neihloh ngaihna awmlo hrim hrim.







Inchhung kan lut a, "pa inverter chu i fit thei ta mi?" Ka pa ka hmuh rualin ka ti var.
"Teuhlo kha Siamkima khan min fit sak anih kha" ka nu zawkin minlo chhâng.


"Kha in huh phah vek ani maw? A zialo hle mai kei nihliap hawhin kawmchhak ah ka pêng kawi daih sia"ka pa'n alo ti ve thung a.Siamkima leh Bza chu abe zui mawlh mawlh.
"Electrician inilo maw?" Ka pa chuan Siamkima melh chungin a ti a.







"Nilo ,ka tui em a tette tangin electric lam ka khawih nasa a, plug tam tak chu ka hawlh puak tawh" ava den tak! A sawitu ber lah chu ala inchhuan hmel em em zui!







"Anih eng hna nge in thawh thin hlawm"ka pa chuan a ti leh a. "Tunah chuan IAS kanla ni hrih a, nakin ah chuan MPAS te pawh kanla ni ang" rawn ti tu chu BZA ani ve thung.U Raymonda chu alo nui tut tut a, kei ka pa leh ka nu te ho erawh a thusawi kan hriatthiamloh em vang chuan kan inmelh kual ralh ringawt.

"IAS chu ka hria a,MPAS tak chu kava hrelo ve" ka pa chuan an thian ho melh kual in a ti dap.







"i IAS hriat leh BZA IAS hriat a inang lo ang, BZA sawi awmzia chu IAS,ina awm satliah ania.MPAS chu Makpa ina awm satliah"Siamkima zawk chuan a rawn ti leh a, ka pa chu anui hawk hawk "BZA chu ava fing reuh ve"ka pa ber chuan nui hawk hawk in ala ti zui! Awi! An va inkawm tawk hlawm tak.



"Pu Pastor "Bza chuan a ti khauh a,"Pa Chhan emaw Dam min ti mai rawh" ka pa'n alo ti zeuh.






"Pa CH D ,ka pastor hriat tawh ho zawng zawngah chuan ila puithu lo ber ang" Bza bawkin a ti leh a, a thiante U Raymonda pawh tiamin an thlawp ani tih lantirnan an lo bu deuh nghauh nghauh.

"Aaa nia, Pastor nih vanga tak ngul reng tur ani hleinem." Ka pa chuan a ti mai. "Siamkim, inhlawhna tur te i duh lo maw? Library tur ah sawn wiring tihthat angai a,inchhunglam wire ho pawh hi ahlui tawh an tia,fimkhur tluk a awmlo nen thlak ka duh khawp mai"ka pa'n a ti leh a, "atha tak ang, kei electric kal sual tih te hi ka hlauh zawng tak ani" ka nu'n alo ti ve bawk.






Siamkima chuan athiante amelh hrek a, "min ringngam dawn ami?" A rawn ti chhuak nawlh! "Rin ngam loh chhan tur che a awm hleinem,bakah electrician pangai pakhat kan ruai tel anga " ka pa chuan a ti a.Siamkima chuan "apawi hleinem" alo ti ta thên mai.







Ahma tawh vakloh vangin an haw a,ti ila khawpui ah chuan awm ila thingpui in hun vel chauh ala ni.Thingtlang ah chuan dar kua hi mut hun a ni deuh ber a, zing lam an tho hma leh thung.
"Pa i ring ngam tak tak ami?" An haw takah chuan ka ti ve ta ngat. Keizawng ka ring ngam thlawtlo, "rinngam loh chhan tur a awm hleinem, athiam pangai kan ruai tel anga.Engmah manlo helper a rawih tel ai chuan Siamkima khan chinchang a hre tam bawk a,kan tan pawh ahlawkthlak zawk dawn.Kan inverter reng a fit awlsam mai" a tih chuan ka thaw deuh hak, kala ringzo chuanglo.Rui deuh bual in a rawn thawk anga, inchhung a hawlh puak rem rum ang tuh te thlengin ka la hlau.







"An fel hlawm kha, rawn leng ziah se atha ang" ka nu rawn lutin a rawn ti ve bawk a! Sintext chhin hawngturin a chhuak kha ania, ruah ahân tawh a a surlai khan a sur tam em a a sur belh leh pawh ka ring tawh hrihlo.
"Ka hmarcha muh tur lah min mal zawh sak vek a" a tih leh chuan "hmarcha kan chhuah hlân khan ilo mal tir maw?" Ka ti deuh vak!







"Ka mal tir pawh anilo, mal turin ka chawi phei a minlo pui zawk " a ti awlsam et a, ava zahthlak thei tak. "Nu Bza tak phei kha chu a rui deuh phual kha i hria em?" Fân raih hian ka ti a,min melh run run a "rui mahse mi sual anih loh tawp kha.That hun anla nei ve ngei ang, kawngtha lam an zawhna kawngah kanlo puihtheih phei chuan chu tluk a awm nang" a ti a.
Ka chhungte ai hian ka ngaihdan alo kawi zawk anih hi, rui deuh phuala pakhat alo kal vangin ka lo enghelh ve em em a.Ka nu leh pa te erawhin anlo lungkham vaklo!U Raymonda pawh kawm tam ka tîm lutuk tawh dawnlo e.






Hritlang chu ka kai ta tak tak a, ka khua sik ser ser reng bawk.Nizan lam ruah ka in nan tir leh bawk nen pik tak hi ka ni ringawt, ka nu khanghu hel rawt rim takngial pawh ka hre theilo.

"A û Ongbaka i hria em?" Kan chaw ei lai in Hmingmuana'n a rawn ti nawlh a, "hria e" kalo ti mai.
"Putar tawngmak deuh misualpa tawng ang khan i tawng mawle!" Mak tih hmel zeta min en in a ti leh a, "i chaw kha ei hle hle rawh" ka ti hmak. "Kha amak e" hnâr ping aw ala hrelo emawni?





"Hmingmuanpui"minla nuih cheu vang chuan ka ti that a, "a u Ongbak ongbak" nui vak vak chungin ala ti hrâm.Ka fian ken chuan ka khawng keuh a, "Nunpui i mak lutuk, i fate rual lek hi khing khing zel sub" ka nu'n rawn ti that. 'i fate rual ' han tih ava sawi awmangli thei tak! Ka rai pawng zawk dawn mawni.

"Ni e, Hmingmuan nangpawh chawei lai in uan loh tur.I û rualin school kal tawh ang che"ka pa'n a tih chuan Hmingmuana pawhin ahnial ngam biklo.






Ka pa hi atam zawkah dam dupin tawng mahse,khauh fak a atawng tawh hi chuan Hmingmuana thlengin kan hnial ngamlo.Ka nu chiahin ahnial ngam, mahse ka pa'n ka nu a hnial ngam miahlo thung a.






Naupang ho hritlang ka kai ka hlauh vangin mask ka vuah a, lum thei ang berin ka inthuam bawk.Pawn kan han chhuak a,ni sa tha vût lo mahse hmeichhe tleirawl ho tihloh chuan kawrlum an ha lo.Mak ka tih deuh chu school naupang abikin hmeichhe ho hian khawlum em em lai pawn kawrlum an ha tlat zel hi ani.Han an hlauh vang anih theih rualin chu chu achhan ber anih ka ring chiahlo a, achhan pawh form an hak loh chuan kawrlum an ha leh ngai miau lo.Mithiam ten la zir chiang mai mai se atha ang, ho viau mahse a chhan hriat ve reng reng pawh achâkawm.






Nileng chuan ka tlingtla ve thei mai a, explanation pek a tawngvak ka peihloh vangin vawin chu note ka zirtir hlawm tawp.Last period ka chan vangin 'athiam thiam haw hmasak' kan ti a, minute reilo te ah note phek khat leh chanve vel chu an rawn thiam zung zung mai.An rilru chak dân chin hriat ka duh vang hrim hrim a ti ka ni pakhat bawk.Zir taima si, tlema thiam har deuh ho chu ka chhinchhiah a achanve an rawn sawi chuan ka haw tir ve nghal mai bawk.Naupang rilru chak dan a inanglo a, thiamthei deuh rilru chaklo te, rilru chak deuh ti tha ngai chuanglo te, thiam theilo zir peih chuanglo te thlengin an awm a, byheart system lamah chuan angkhata zirtir chi an nilo.Ruahmanna fel tak siamin an zir dan tur kala ngaihtuah ang.






Kan gate ka lut dawn chiah tih in kawmchhaknu hian ring em em mai hian "ateuhllooo thil holam mai mai itih nan hian chengkhat pawh ka seng tawh dawnlo. I zir duh apiang 'ka hidden talent ani e ' itia , sum kan inseng hnem zozai tawh lutuk.Puanthui ,kuttin chei ,sam tan iti lawr hnem tawh lutuk chhawrtlakin izir chhuak tak tak lo" a ti ri chuan min ti ding chawt.

"Ka hidden talent ti na na na hmuhtheih khawpa a rawn lan i ring ami? Hidden anihna angin a hidden kumkhua ang chu.Cake siam te chu ngaihtuah la ahlawk dawn lutuk, cake a birthday lawm loh chu kan khua ah pawh an duh tawhloh hi" ti vak tu chu Kimkimi ve thung ani.







"I zir nguar ang " Kimi nu chuan ati leh vak a, Kimkimi chuan achhâng tawhlo nge a reh daih a.Nui hak a luh mai ka tum rual chuan "C.V.L nunpui" min rawn ti lauh vangin ka ding leh rih.



"Inu i chhaih kawlh animaw?"nui heu in kalo ti.





"Cake siam zir ka duh a,aphallo bur anih khi.Kinah kala dîl leh ang.Anih U Raymonda nen chuan engchen nge in thlen tawh?" Phur hmel zet hian a ti zui a, gate bawhin a awm a, chhunglam ah ka awm ve thung.






"Engchen mah" ka tih chuan "awihawm loh " alo ti vak.





"Ta sawi tawp chi pawh anilo lo lut teh" tiin gate chu ka pawt hawng a, ka room ah luhtlangpuii nizan lama thil thleng chu ka hrilh nghal mawlh mawlh.Thurawn lakna tur leh insawichhuahna tur ka mamawh pakhat bawk a.Ka thurawn lak tumna berkher erawh hi ka ringlo viau thung, ani lo han hrilh tur chuang ka hre bawk silo.






"Ava buaithlak" ka sawizawh chuan a ti halh a, "min bawl kual mai mai te anih ka ring ber tawh" ka ti deuh tawl.





"Ka hre biklo chu tak chu ,mi bawl hi chu ahrat ve a mahse abawl ngam dawn che mi? Ahma in hmeichhia ala ûm duai duai ngai hleinem.Bakah hmeichhia abem awm thawm pawh kala hrelo! Hmeichhe ho hi chuan kan bêm nasa a, kei pawn ka bem tawh ka tih kha.Zak taka asiam loh leh tawifel takin abêm tu ho asiam thin " a tih chuan ka thaw hluai ringawt.


"Nghak ve deuh la atha ber ang, hmeichhia kan nih chuan induh larh tur.A bêm hun che nghak rawh" a ti leh a, nghah deuh tawp pawh chu a.Laklawh deuh inngaizawng silo in kan awm reng ang tih te pawh ka hlau.







Tawnhriat kala nei bawk silo ,ka lerhlo ka ti miahlo.Mi kawngkal tha hle hle lai lo star ringawt te pawh ka hrât, mahse ngaihzawng ang zawng hian tumah kala en loh piah lamah kala neilo.






"U Raymonda hi I star chiang mai!"awi! Ava hawihlo tak! Ka sawidan ki atang ka star tih te chu hriatthiam ve tur ania. "Enge ka chhaih che te khan i phat kual vel a" te chu ala ti ta deuh deuh a! Ahahthlak e, ka thurawn lak tumna chu ani ve sia maw?







"Hmeichhe lamah alerh em? Ngaihzawng te hi alo nei ru reng lo maw?"tiin ka zawt a,ka hlauh ber ani he thil hi.





"Lerh te chu lerh ve ang,' kan khaw nula chu a bêm chhuak vek tawh' an ti" a tih chuan "chu chu adik ang, amah pawhin apha lo "kalo ti zeuh.
"Umm mahse ngaihzawng ang tak hi aneih pawh ka ring chiahlo.E taka!U Sangtei"



"tunge chu chu?" Kalo ti thuai.






"Kan khaw nula senior ania, senior ultra ang kha chu ala ni chiahlo.Mahse U Raymonda hi ata chei deuh bur amaw, den lutuk.A fate rual pawh U Raymonda an lo star tih a hriat chuan a thuai nek duh ania" a ti duar a, ahmel chu a siam ner kual pah vak bawk.
"Ava den" kalo ti sep





"Awi aho e, hlau suh ka awm hi"an ti leh lawi a! A den thu a sawi zo chauh a! "I hlau lo mi?" Ka tih chuan "a teuh nang, naupang te te lo chuan engah an ngailo.KTP ah a over tep tawh a, pitar stage akai tep tawh tihna anih chu ani chu lungkham duh leh suh.Ho lutuk " a thusawi hi a inkawlalh nuaih zel a hriatthiam ahar.






"Inrinni ah tuikhur te ah insu ang aw,suk tur kan ngah tawh lutuk" kha maw! Kan thu khel lai hi angaipawimawh lo reng reng.
"Ka hritlang ka theih ka ringlo" ka ti hlak a, "i dam hman dawn lutuk.Bakah kan khua ah chuan tui aharsa a , ruahtui dawh teuh mah ila fûr ah pawh tui lei hi kan ngai zeuh zeuh zel ania.Tui renchem te kha zir rawh u" ati a, tui ber athat loh chuan nuam kan va ti dawn lo tak ka ti rilru.






"Inrinni chu ka rawn sawm ang che.Chhûnah inkhel kan en bawk anga, ka han chho phawt zân ah ka hman chuan kalo kal ang" tiin a chhuak zui a, "Nu Hma dawltawm ka nu'n a bai dawn ania , rawn suak ru aw" a ti chhuak zui lawng lawng.






Ka hritlang chu a zia chho viau a, U Raymonda nen inbe ve zeuh zeuhin an la rawn lêng lehlo thung.Siamkima pawh ka pa'n karleh atanga thawk tan turin a ruai a, 'Bza'n hlawh em em neilo in ka lo thawn ve ,minlo dilsak' a ti ani awm e.Ka pan huan mawnglam pal pingah a ruai dawn bawk.U Raymonda te chu rawn thawk ve law law se ka ti khawp a, mahse inhlawhna mamawh hmel pawh apu lo tih ka ngaihtuah chhuak leh hnuhnawh.An in leh lo enin an harsa dawnlo tih ahriat reng a, nge anlo harsa ru reng zawk!






"Nu tuikhur ah Kimkimi nen insuk kan tum asin"





"I hritlang pawh ala dam fel loh kha" a ti var a , "insuk zawhah inkhel en kan tum bawk a" ka ti tel leh chu "ta deuh deuh chuan" a ti deuh hlak a, a phalloh thu a sawi chuanglo.





Kimkimi chuan êm lian khat hnawk hi a rawn inphur a! Keiin êmpai chanve ai tam hret chauh suk tur ka nei thung.
"Ninawm lutuk, ka nu'n 'tuikhur in pan dawn ro ro chuan' a tia puan nuam min kentir "tûm hmuk hian a ti a, ka puan nuam tûnkar te tâna ka sinchhuah chu sukturin ka keng ve nghal zat.






Tuikhur chu a awmna ahla vaklo ania, Pu Duha te inlam kawnga kal ani a, tuikhura eiah tiin Kimkimi'n nihawichi dawrah alei kawi a"i chip hman dawn ami?" Ka tih chuan "i hre mai ang" a ti awlsam et!





"Dimples "




"Eh...a ko duat vel che e" Kimkimi'n alo ti hmanhmawh.





"Tuikhurah insuk in tum ami?"U Raymonda chuan bike chunga thu ranin a ti sup.Êm kan phur lian dûn si a,hnuailam hawia chunglam melh ngar ngar ang kan ni.

"Inneihna a kal tur kan ang em?" Kimkimi chuan a ti hlar a, pangai tak hian an inbe ngai manglo reng reng!





"U Raymond in inkhel pawh kan rawn en hmanlo ang cheu, hei suktur kan ngah emai " Kimkimi bawk chuan a ti leh a, U Raymonda chuan "achi nang, nang chuan min rawn enlo mahla apawina awmlo.Mahse Dimples min rawn en loh in" tiin keimah zawk chu min melh ngur.Ka enloh chu ahlauh hmel tak tak lutuk.






"Suk tur hi a tam sia" kalo ti ve sep a, ka sûkpui ang cheu" ti dutin kawngsir ah abike chu a hung tha te te a, kan bulah rawn kalin ka êm phurh chu a chawithla nawlh!
"I phakar"Kimi'n a tih rual deuhthaw in Kimkimi êm a puannuam chu ka êm ah a sawn bawk a, "tikhan a zâng hawk ang"a ti dut.






"Khawi kalo phur leh zawk ang"ka tih chuan pawm hlûnin "kal mai mai rawh, insu vat vat ila inkhel min rawn en ang cheu" ati a.Amah zawk chu akal nghal nul nul.





Ka awmdan chu ahrehawm khawp, ka hrawk chu a za mer mer a hritlang damlam khuhpuak ka neichho tan bawk nen, ka khuh puak ang tih hlau in ka hrawk chu ka thian ka thian ringawt.Star te hma a khuhpuah chu azahthlak dan a ni zar dawn a, ka duhlo hulhual.

Kan insu deuu zung zung a, U Raymonda'n kan nuai sa apiang tui thâl chhuakin alo tleuh zung zung bawk a.Keini aiin a ti hnem zawk daih.
Dar sawm chuan kan insu zo fel thei ta vek mai! Kan ken hnem nen! Lalkimkimi nihawichi leichhan chu ka hre ta chiah bawk. Kan insuk rit lutuk a kan phurh haw loh nan tlangbân an siam chawp ah chuan kan bâng thlir thlawr phawt a, chumi nghah pah chuan nihawichi chu kan chip mial mial.





"Haw tawh ang u" a ph bih zeuhin U Raymonda'n a ti deuh chhen tawh.Dar khat ah inkhelh an tan dawn ani awm e.
Kan puansuk tam zawk chu a phur a, ala huh deuh vangin a kekawr mawng leh kawr hnung chu reilo ah a huh nghal vek.Kimkimi êm alen zawk vangin aphur ve thung a.Êm phurh azak miahlo te chu ka duh zual sawt, thingtlang pawh ni mahse mipa êm phur ta lawp lawp hmuh tur an awm mang tawh miaulo.






Kan in thleng min phurhthlen sak thak a, "ka huh emai ka haw tlang nghal mai ang" a tih chuan ka hnial lo.A hrehawm per pur ngawt ang.

"Ka rawn hruai ang che" a tih erawh chuan "Kimkimi nen kanlo kal zawk ang" ka ti thuai a, a aw ve mai bawk






Kan in pho zung zung a, field a kal tur mah ni ila ka inbual ta tho.Ban chuap a awm hi ka thiam lo a,atul anih chuan ka thei tho nangin ka confi lo zo vek zel.
Tshirt dum nghawng V taksa phuar chi chu ka ha a, Jogger panta vutbuak rawng ha in ka kawr hak chu ka bilh lut bawk.Ka sam erawh a la ro loh vangin ka thlah hniang thung.Crocs vâr lawk zet ka bun bawk a, Kimkimi thawm ka hriat rualin ka chhuak vat.






"A û Ongbak kalo kal ve "choka ka luh rualin Hmingmuana'n alo ti nghal! Lalkimkimi anui zui chiam a, rum zetin Hmingmuana chu ka melh tûnkar chhung zawng Ongbak tih hlirin min ko a, ka ngei lutuk ringawt.
"Naupang kal ve na chi ani lo" ka tih chuan ka nu bulah ava zualko nghal a, ka nu'n alo phallo aniang atap zui bai bai.Ka nau mah nise ka nu te hian tianga kan chhuah dawn hian min hruai tir ngailo.An châk viau chuan an mahni'n an hruai mai zel a, kan hruai duh chuan min hnial ngailo bawk.






"Thuthleng hniam aiah chanchinbu thutur ka rawn keng ve thung.Ko tlâng lamah kan thu ve thung dawn nia, en pawh anuam zawk.Khua leh khua inkhel tur an nia, thlirtute lam kan tang nasa dawn ania theihtawpa au turin inring rawh" a ti mawlh mawlh a, kâwn ah Muri mix inkhelh en pah a ei tur kan lei a.Nu Liani ta erawh anilo, an chawlhni ani sia a inhawng biklo aniang.





Field kan thlen chuan anlo awm nak nak tawh a, minute sawmpanga dawn ala awm vangin anla tam lutuk lo thung.A en nawmna lai ber tura kan ngaih ah Chanchinbu phah in kan thu nghal chat a, tan hma hauhin kan ril atam tawh nen muri mix chu kan ei nghal mawlh mawlh.
"Tinge hetah in thut?" Kan hnunglam atanga U Raymonda'n a rawn tih chuan kan hawi thuai a, a rawn kal ve chauh aniang Jersey dum bawk ha in bike chungah athu vang.Engtin nge keimahni kan ni tih ahriat theih zawk le?






"Ta tang hian en anuam dawn alawm" kalo ti ve thung.Kimkimi chu atawng hmanlo muri ahmuan hnem lutuk ringawt.





"Mi an rawn tam dawn asin, khutah khuan awm leh zawk ula" tiin ahma a kan awmna thin lam chu a melh a, "duh angin alang chianglo a, bakah ahnai lutuk a ball in min fuh te ahlauhawm alawm" ka ti zel a, kan awmna lai hi inkhelh en nan chuan duhthusam ani.





"Anih lo kalsawn suh ang cheu, ka rawn hawi chhoh apianga ka hmuh loh cheu chuan ka rawn zawng dawn cheu nia" ava ti mak tak! Naupang pawh kan ni lo a.
"Aw i ho, zu chhuk rawh khu i thiante an inbin zak zak tawh a" Kimkimi'n a rawn ti ve ta nge nge .A ngawi rei thei ka ti reng ani.







U Raymonda pawh atlânthla zui ve mai.Mipui chu an rawn kal hnem tial tial a, reilo ah field ko ah kan thu khat deuh vek tawh.Hnunglam ah ding tawk an awm a, kopang khuar laia thu tawk an awm.
"Le le le , naupang ball liam chhar tur kha in awmhmun tur ah awm tawh rawh ule. "Commentator in a rawn tih chuan naupang te reuh te te te chu an tlân darh sap sap hlawm a, "a chhar apiang hetah sweet kanlo pe zel dawm cheu a, chhar ngun ber lawmman te kan siam dawn ania" ka nui hak hak.A va han ho tak e aw! Naupang ho lah an phur hlawm ngang mai.






"Players te Pavillion hma ah rawn ding ru le, substitute thu tluan tur chiang sa Valrema te pawh kha rawn ding ve tho ula"mipui anlo nui nghal hak hak hlawm.
"Atir lama Pu Huapa te ho inkhel an kekawr inpawhthlak sak khawpa inkhelh ang kha chu vawin ah chuan a rem tawh dawnlo a, fair takin in khelh in tum dawn nia" a ti leh dap dap a, "kan khua kan chak tur ani, akhaih! Khua leh khua final ah kan intum dawn tlat a, he inkhelh hian kan inthian thatna ti bo lo sela tih ka tumna zawk" mipui khaw thenawm atanga rawn kal pawn a fiamthu tih hrethiam in an nui leh dar dar hlawm.Pa fiamthu duh ve tak chu ani ngei mai.







Inkhelh an tan a, lehlam pawl ho chu ka rin aiin an thiam zek mak! Proffessional tak tak te pawh an ang zawk.An striker pahnih te chu an tlânchak in ball an thiam a, an inpass zung zung mai.U Raymonda te lam in ball an chang hman meuhlo chu ani ber.
Lehlam striker pakhat chu an thaitlu nawk a, penalty anla hmu zui. Goal khatna an thun ta der, U Raymonda te lam tang nih pawh chu a tuiawm loh chho viau mai.






U Raymonda'n ball a chan fuh chuan a tlang ve nghal zawk zel tho a, mahse ahma ang bawkin an bawr nghal luih a a thlengthui pui hman tak tak chuanglo.
Khawthenawm team ten goal hnihna an thun leh der a, kan nguai tawh hlawm hle. "An chaklo mai ang a" Kimkimi bulah chuan ka ti sep a, "chak dawn nang, kan khaw thenawm team ah khuan club a khel pathum an awm a, hneh ngaihna an awmlo.Huau huau hi kan lawm em a atam zawk hi chuan achak tur hre sa in kan en ang" alo ti thên a, a khaw neitu diktak zawk pawhin an chak chu an beisei lo ania!






Khawthenawm team lam chu an hawi deuh vah vah hlawm tawh, U Raymonda chuan kan thitna lam chu a rawn hawi chho a kalo tûm khum hmuk thung.A kutzungtang pathum hi a rawn ti pir chho vah a,kiai suk in a tlânsawn zui nghal.

Half time a zo a, an tan leh ta.An chak zawh pawh ka ring tawhlo 2-0 ngawtin hma an hruai tawh a, goal hnih te chu vanneih thil thu ah khung ve mahse an lehthal zawh tawh ka ring lo.






U Raymonda'n ball a chan chiah chuan a tlânpui nghal par par a, ahma a lo awm te ho chu mawi zetin a bum kual zak zak hlawm.
Lalpa! A pet goal mawi lutuk ringawt! Mipui thawm a ring tha kher mai.

"Khu khu Pu Liansailoa fapa kha ani lawm ni?a tleirawl chhuah hlim pawh khan inkhelh athiam viau kha maw, a khel tawh ngailo a kan lo theihnghilh a alo la thiam hle mai!" Kan hnunglama ding pa pakhat chuan hrilh bik pawh neilo in a ti chuar chuar a,kalo hlim ru ve em em ringawt.







Game chu atang chho viau a, ball pawhin awmlam anei hmanlo.An in pass kual zak zak hi ani ber.U Raymonda puihna in a team ami pakhat chuan a ti goal veleh a, kan thu hle hle thei tawh biklo.Kimkimi nen chuan ahnunglam ah dingin kan ai tial rei ruai tawh.

"U Raymonda chu alo va bawn tak" Kimi pawhin a ti deuh chhen.







Hun tawp man minute thum vel chiah a awm tawh, anla in draw a ,penalty an pet vaih chuan U Raymonda te team lam dinhmun chhe zawkah an tang ngei dawn.
Mahse le, U Raymonda ball khalhlai chu an nem thlu ta pawp mai! Refree in a nemthlu tupa chu red card pe in penalty ape zui a, anemthlu tupa chu thinrim zetin refree chu ankhum zui mahse a thiante'n anlo dang thuai.
U Raymonda chuan hun khawral hman anilo tih ahria nge penalty pet tur chuan a inpuahchah zui thuai.An chak ta! Hun atawp ve chiah bawk.







Mipui thawm chu a ring tha hle a, khawthenawm atanga rawn kal ho erawh anaupang zual ho chu an phun nak nak hlawm a, thenkhat erawh achak zawk lawmpuia kut beng dur dur te pawh an awm bawk.
U Raymonda chuan kan lam bawk rawn hawichho in anui var a, kalo nuih let ve sak.Inkhelh ka en tawh ah chuan ala hmuhnawm ber in kala tang ber tum ani ngei ang.







A thiante ho lawmman dawng tura an kalkhawm laiin a bah ala a, abike ah lawnin a rawn tlânchhuak zui daih! An au nghal chel chul hlawm.
"Ninawm ee, rawn kal atum anih khu ka thirdwheel peihlo ka kal dawn" Kimkimi chuan tiin ka pawh beh hma in a chho nghal nul nul!







"Lo kal rawh le" ka bul a rawn thlen rualin a ti sup a, a lawm ve bawk aniang a nui ve deuh reng mai.
"Kimkimi akal daih a" lawn mai lo chuan ka ti sep, "athat hlauh chu, lo lawn rawh" a tih chuan field lam chu ka hawi thla a, anlo hawi chho thup mai!







"Lawmman khu zu dawng ve phawt la" ka tih chuan "aho em mai khutiang" a ti duh lek chauh! Ka lawn ve ta nge nge.Ka thutfel rualin "khawnge kan kal dawn?" Ka ti sap a, "ka bêm dawn che" a tih chuan ka tang nghal teuh mai.