Politician nupui S2

[Cck Lalchhuanawmi]

Politician Nupui Hring nun
S-2
Chapter-6
Ziaktu: Cck Lalchhuanawmi


Politician Nupui nih chu sawi loh, a ngaihtuah lah ka ngaihtuah ngai eih loh, Mizoram Legislative Assembly House-ah, Sammy aiawhin ka han ding rawih a nih kha!


Sammy-an lehkhaphekah ka thusawi ṭanna tur te, kan Bial tana hna kan thawhna bakah, House-a kan inhmuhkhawmna chhan ber sawi chhuah dan tur te min ziah chhuak sak vek a.


Chu chu vawngin, a hmaah ngei enlawkna ka nei nghe nghe a.


Sammy-a lungawi hma leh, kei ngei pawhin entawn loa inringtawk taka ka sawi theih hma chu kan inenlawk char char.


Chuvang chuan, buai chhe hauh loin House-ah ka tlangnel phah.


Ni khatnaah chuan ka zam hlek, Ni Hnihna aṭang erawh chuan ṭang tawh tak ka ni.


Kan Party hi Sawrkarna chang kan ni lo a, Debate ang chiahin Opposition Party kan ni tih ka hre hnuhnawh. Sammy-a puh ngawt theih a ni lo.


Zawh nachang ka hre lo pah a ni.


Speaker-in, "Tunah, Serchhip Bialtu MLA Samuel Remsangpuia i lo sawm ang", a tih chuan ka ding a.


"Pu Speaker, ka lawm e. Pu Speaker leh kan ṭhian duhtak helai hmuna awm te, Session ṭan a niha ka sawi tawh angin, Pu Samuel-a âw ngaihnobei tak hi Khuangpui ang chiaha ngai turin ka han sawm nawn leh che u a ni e", ka ti hmasa phawt.


An nui dar dar a, Hmeichhe awm chhun ka ni a, diau ka tum bik lo.


Kan Bial kan enkawl dan chu a diak diakin fel leh tling mah suh se, mahni tawkah leh theihtawp chhuahin, phak ang tawkin kan dik a.


Hawi sang vahin, "Pu Speaker, kan Bial hi kan hmangaih a, hmasawnna tam tak hmuh tur bakah, chhinchhiah tur leh hriat reng tur kan hnutchhiah tih, inchhuang takin kan sawi ngam a ni", nui sen senin ka ti a.


Sammy-a dam ṭhat loh hnu hian, eiruk theihna a tam.


"Min ṭanpui a nih chuan, i pasal enkawlna tur atan i dawng ṭeuh thei ang", tih hi, min fah ngun ber a ni.


Sammy-a enkawl theihna tur atan chuan, dawn mai ka remti ṭhelh ṭhin.


A damna ka duh ber tlat alawm.


"Min hrethiam teh u, ka pasal enkawlna tur khawp chu kan thawk chhuak ve bawk e. Nimahsela, ṭha taka hna in thawh chuan ṭanpui che u hi kan inhuam reng tih in lo hre dawn nia", tiin, ṭha takin ka thlah ṭhin.


Thinrim tak chunga inthlah châng a tam.


Ka bulah Sammy-a a awm tlat a, ka hlau eih lo.


Session tawpna ber, kan Term kan hmang zo dawn ta. Sammy-a ka hruai, Wheelchair aṭanga kaihthawh ka tum chu a duh lo.


Kan intilui lo bawk, ka bulah a awm a. A hma aiin inrintawkna ka nei nasa. Ṭawng sual ka hlau lo a, huai takin ka ding.


Pathian khawngaihna zarah Term khat kan hmang zo ta a, Session tawpna ber a ni a, Sammy-a thuziah ka chhiar chhuak.


"Pu Speaker, Harsatna hrang hrang karah pawh, min duhsaka min lainattute zarah, tluang takin Term khat kan hmang zo thei ta a, kan Bial mipui zawng zawng bakah, Mizoram mipui i han ti teh ang, helai hmun aṭang ngei hian lawmthu ka han hrilh che u a ni e. Kei, Serchhip Bialtu MLA Samuel Remsangpuia hian, He Term khat chhunga in duh loh dana hna ka thawhna a awm a nih chuan, min ngaidam turin in khawngaihna ka dil bawk a che u. Pu Speaker leh he House-a ka ṭhian duhtak te u, in hriatpuina ngeiin, ka hmangaih em em ka nupui Lalchhuanpuii...", ka ngawi deuh vang vang.


Ka âw ka thian kharh a, "Min enkawlna leh ka aiawha min dinsakna zawng zawngah lawmthu ka hrilh a ni. Tin, a chunga zah in lo ngaihnaah in chungah lawmthu ka sawi bawk e".


Kut min ben sak hluah hluah a, biang lum thla pap pap chungin ka ṭhu thla a, Sammy-an lungchim taka min en reng tih ka hriat phei chuan ka mualpho lo chauh a ni.


A kut ka va vuan a, kun deuhin ka mit tui ka hru.


Party Office-ah kan kal a, "Serchhip mipuiin an duh em em che u a, in ding nawn leh mai dawn em ni ang? Ṭanpui che u kan inhuam reng a nia", an ti a.


Sammy-a hi ṭawng a tum si lo.


Tumahin a ṭawngthei tih leh, a Tha a chakin a hmang thei ṭan tih lah an hre lo. Amah hian, puangzar lo turin min ti tlat a.


"Kan Party aṭanga ding tur a ṭhat em hi. Keini zawng, kan lo Chawl rih ang e. In lam aṭangin theitawp kan lo chhuah ang", mawihnai thei bera ka hriatin ka chhâng hlawm a.


"Ni e, a dik, chawlh in mamawh ngei mai. Nimahsela, MP inthlan a hnai a, hemi atan hian kan hual che u", min ti ta mai.


MLA mah a hahthlak a nia, MP phei chu.


Sammy-a ka en a, min en ve miah lo. "Kan la ngaihtuah dawn nia", tih bak sawi tur ka hre tawh lo.


Thu dang, thu hlimawm lam an sawi tak avangin ka thawl huai huai.


Ka va zawm a, ka nuihpui a, chutiang chuan Party Office-ah hun kan hmang a. Kan haw har lo.


Assembly House-ah ṭhuin, thu ka han sawi ta chu a ni a.


Dam man hi a va han awm chiang tak.


Zanriah einaah, hahipin ka sawi a, ka chhungten tui ti takin min ngaihthlaksak, khi ṭhawin min en kar hlawm a. Chaw kan ei rei phah.


Mutnaah pawh ka sawi zel. Sammy-an min ngaithla kar.


Nuam ka va han ti tak, Politician Nupui ka ni a, MLA zawk mawle. Bial ka fang a; hna thawkin Chhawmdawl hna ka thawk a, Mizoram Legislative Assembly House-ah ka pasal aiawhin ka ṭhuin ka ding bawk.


Sammy-a a dam fel dawn ta a, engtikah mah ka tawng leh tawh lo ang.


Ka Hring nuna hriat reng tur an ni tawh.


"Sam?", ka saisir a, "Lo boral pawh ni ila, ka Ruang chungah ka Politics zinkawng tawi tak hi min sawi chhuahsak rawh aw", a rum nghut.


A hmui hnuai a pet a, "MLA inthlanah chuan ding leh mai ila?", ka ti a.


Min chhâng lo, insangmar ṭeuhin, a bek a pawng ṭalh ṭalh a. A thinrim tih ka hre chauh.


Engin nge tithinrim ni aw?


"Sam, i thinrim chhan eng nge ni a?", ka thusawi ka ngaihtuah let a, thinrimna tur ka sawi si lo.


Ni dawn tak e, ka ruang chungah ka tih kha. Kha ngei khan a tithinrim chiang mai.


"Sam", ka bawh a, a âwmah ka bei hnâp. "Kan boral hun tur kan hre si lo a, chuvang chuan; dam lai hian min hmangaih hle rawh aw", ka fiam tih hrethiam ang maw?


A rum leh nghut a, ka nui sak.


Ka ngawi ta reng, Sammy pawh a ṭawng chuang lo.


Engin nge min mawlh tehreng, pindan chu a ruak huai a, thawm hriat tur a awm si lo. Min hmangaihtu kianga awm reng chungin, ka hmangaih ka zawng ruai ruai.


Sammy-a-ah hian tawp ka tum a, ka thei lo.


Hmana min nghaisak dan te, taksa leh thinlung min lo hliam dan te khan min run tharin, min vit ngawih ngawih.


Hun ṭha dang pe inti chung siin, keimah ngei hun ka inpe lo.


Sammy-a a che lo bawk a tiin, inngaihtuah nan hun ka hmang. Khawvâr hun lo thlakhlelhawm ṭhinzia hi.


Khua han vâr chiah sela, ka hawikir tawh lo ang. Hmangaih ngei tumin ka ṭang ang a, amahah ka intulut deuh deuh ang a; ka duat hle bawk ang.


A tawpah zawng, min hmangaih ang chiahin ka hmangaih let tawh ang.

*******

Ni leh kar a liam a, ka ṭang bawk a, Sammy-a chuan hma a sawn chho zelin ka hria.


Tin, amahah ka intulut deuh deuh zel a, khang hun ṭha lo tak kan lo hman liam te kha ka chhui kir ngai ta lo.


MLA inthlan a zo leh ta a, Serchhip Bialah chuan kan Party mi ni lo a tling thung.


Eng Party aṭang pawhin ding se, dik leh rinawm taka hna a thawh dawn phawt chuan ka vui lo.


Sammy-a nen Party Office-ah lang zauh zauh mah ila, min lo hre ṭha duh tawh lo. Kan kal apiangin rilru na takin kei phei chu ka haw.ziah.


Inah Sammy-a hian, "An rawng kan bawlsak theih loh chinah chuan, min duh tawh lo a nih kha", a ti mai zel a.


Rilru hi a na veng veng zel.


"Ka Vânglai ka ngai mang e ka ti! Putar ṭawp tak ka ni ta si a", a ti chu, ka ṭap nui ver ver.


"Putar ṭawp tak ni loin, Tlangval ṭawp tak zawk alawm", ka ti a. A duh leh bawk si lo.


"Ṭawp kha chu hmang tawh lo la",


"I hman hmasak a nia", a vei nuih suk.


Ka biang a dawm a, "Hlim taka awmtir che ka va duh em! Ka tihsual siam ṭha turin hun min pe a, thawk chhuak turin chakna ka nei leh si lo", a ti a.


Lungchim takin min thlêk ngawih ngawih.


"I thawk chhuakin i siam ṭha mek alawm. 'Puipui' tia min koh hian mithar mai ni lo, mikhual angah ka inchan ṭhin. A chhan chu", ka thaw hap.


Tlang taka sawi ka duh.


"Manoi nena in inṭhen chhan a ni a, kan pahnih min ṭhenhrangtu a ni ve ang tih ka hlau em a ni. Tunah chuan, 'Puipui' tia min koh ka thlahlel leh tawh zawk. A chhan chu, ka hming tawpah 'Pui' a awm tlat a. Hei chen kan thleng tawh a, kan tuar chhuak ṭep ta, vawikhat dang leh chu han ṭang leh ila",


"Lo hnai teh", ka hnaih a, ka hmui ka dawh.


Min fawh a duh ang thoin fawh ka duh ve tlat.


Kan Lehkhabu Dawr chu min chawmtu a ni ta mai a, MLA hlawh kan khâwl nen. Inrenchem taka nun chhoh dan kan zir.


Ngaihtuahawm tak kan ni ta lo a, u Hmai pawhin ngaihngam takin min hawsan thei tawh.


Hnahthial lama Inpuiah an mamawh.


Hriatpuia tan nupui zawnsak an tum hnai a, ka ṭhiannu Hmingi sawi luh ka tum zet naa, Hriatpuia nena an inkar ka hriat chian loh avangin ka sawi duh ta lo.


An inkarah eng emaw tak a awm a nih chuan, Hriatpuian a sawi ngei ang.


Naupang School kal hlanah kan nupain kal kan inzirtir a, Bân tha hman dan te nen.


Khaberuh tihchak nan, a Ha a hman ṭhat theih nan a ni zawk mah, Surpi ka sehtir ṭhin.


A chilthli hi a far duah duah zel a, engah mah ka ngai lo lui tlat zel.


Chutiangin Sammy-a pawhin, a chilthli tlain a âwm chhuk thla a bual huh zuihte chu pawi tihna a nei lo.


Krismas leh Kum Thar Aizawlah kan hmang nghe nghe.


Party lamin min lo uksak ta lo.chu, Sammy hnenah ka vui thu ka thlen ṭhin.


"Bâng ila, Party dangah lut daih ang", ka ti ṭhin a. A nuih a za thei a nia aw.


"Min ngaihsak loh avang maia bân a ṭha ngai lo. Bân chhan tlak a awm a ngai, bân i duh viau leh, a chhan zawng rawh", a ti a.


Bân chhan tlak han zawn chu. Eng nge ni ta ang le?


Ka hre ta.


"Sam, ka hre tawh. Kan Party hi chuan eiruk an hreh miah lo. Bânna lehkha ka han ziak ang e aw", nui ver verin ka ti a.


Kan Party mi leh sa te ngeiin min kawhhmuh a tam zawk.


Office-ah ka tlan lut, A4 paper ka la chhuak a, ziah ṭan ka tum chu Sammy-a ka tlansan tih hre chhuak thutin ka hruai lut ve leh thuai.


Dawhkan hmaah a ṭhu a, "Engtin nge ka ziah ang?",


" 'To," tia ṭan tur",


" 'Ka Pu, "tih thleng ka ziak tawh", kiai sakin min en vung vung.


Ziah tur ka hre tawh lo, "Sawi vat teh",


"Finfiahna i nei em ni? Eiruknaah kan fihlim lo a nih chuan, Party dang emaw ina an sawi chhuah hun nghak zawk teh ang. Eiruk in pawisalo tih ziah lan a ṭha lo a, bân i duh chhan chiang tak leh mawi takin ziak rawh", a ti ta a.


Ka thaw halh ringawt. Kei aiin a lo ngaihtuah thui daih mai.


Party ṭha taka awmna tur dilin ka ṭawngṭai mawlh mawlh. A hun takah, kan awmna tur tak Party a lo lan ngei ka beisei.


Sammy-a nen naupang School bâng kan hruai a. Chumi hnuah Dawrah kan pêng.


MLA kan nihna a tawp a, Motor Driver chhawm a bo nghal hmak. Kan Motor neih chhun min enkawlsaktu Rotean min la thlahthlam em lo.


Dik takin, Duhsaka a ngaihawm ṭhin.


Tuk khat chu, Lal Fanuin Pencil a neih tawh loh avangin Dawrah ka leipui a. Kan haw lamin a reh ṭhuap.


Nu Papuii ka hmu bawk si lo, naupang pindanah ka kal a, hawn ka tum chu phun ri mur mur thawm hi ka hria.


Ka ngaithla chiang deuh a, "In nu bulah naute in duh thu sawi rawh u", Nu Papuiin a tih chu, ka ṭek chhawk thei.


"Ngati nge?", Freddy-an a ti a. "In nuin naute a neih chuan in pain a duat dawn alawm",


"Lal Fanu hi naute a ni lo mi?", Freddy-a bawkin a ti. Siamtea chu, ṭawng a tum ve lo a ni ang, a ngawi em mai.


Nu Papuiin, "Lal Fanu a len(lian) tawh em hi, nau dang in neih chuan nangni pawh in hlim sawt sawt mai ang", a ti leh a.


Freddy-a bawkin, "Anuin naute a neih chuan min duat tho ang em? Anu tak a ni si lo a", a ti chu, ṭek nasa tak ka ni.


Ngaihthlak reng ka duh ta lo. Ka kalsawn a, Lal Fanuin a Pa a chei chu ka va enpui.


Nu Papuiin engvanga naute nei tura min hrilh tura Siamtea leh Freddy-a hrilh nge maw a nih ang le?


Copper-T lak chhuah aṭangin engtin mah kan la awm lo tih ka hre chhuak.


Sammy-a chu khum kotlang nghengin a ṭhu a, Lal Fanuin a chei mial mial. Ka makeup dahṭhat a phawrh chhuak a, a tichingpen vek.


Hmun biru thei berah ka dahṭha emaw ti mah ila, Lal.Fanu hian a phawrh chhuak leh nge nge zel.


"Chhuanpui, in lo haw tawh maw? School an tlai ang e", Nu Papuiin a lo ti a.


Lal Fanuin a Pa a cheina tihfai a phal si lo, pindan aṭanga kan chhuak chu an nui ṭiah ṭiah.


"Apa hi, a hmelṭha sin, ka chei a nih hi", Lal Fanuin inchhuang takin a ti a.


Freddy-an, "I va han thiam lo tak, Ramhuaiah i chhuah daih alawm", a ti pek a. Lal Fanu a ter at.


"Anu, Freddy hi. Nang aiin ka thiam", a ti hlar.


Siamtean, "Chaw ei ang u, School kan tlai palh ang", a lo ti a. Nu Papuii a haw tawh nen.


Siamtea nen chaw ei kan siam a, Freddy-a leh Lal Fanu an la inhnial char char.


Sammy-a pawhin chaw nêm a ei thei tawh a, feeding tube hman(hmang) a ngai tawh lo.


"Inah ka lo awm ang e", Sammy-an a ti a. Naupang School kal ka thlah.


Amah chauha ina awmtir ka duh loh avangin Dawrah pêng buai loin ka haw tlang.


Kan pahnihin kan inawm a, exercise lak loh chhungin Lehkhabu kan chhiar. Keima'n ka chhiar a, min ngaithla thung.


Ina kan kawl ho hi kan chhiar chhuak chu a ni ta mai.


Dawr aṭanga hawn ka nei ta zeuh zeuh.


Final Exam kan thleng ta.


Lal Fanuin, "Kg-1 ka ni tawh dawn", tia a lawm em em laiin, Freddy-an, "Nursery nih leh ka duh e", a ti thung.


"A u, inthleng ang", Lal Fanuin a ti hram. An unau hnihin inthleng tumin an infuih phur nasa sauh sauh.


Siamtea pawhin tihngaihna a hre tawh lo, a lu a thing ringawt. A nau te pahnih chu a enliam ta mai mai.


Chhungkuain School aṭangin kan haw a, a ngaitein hma lamah Pa ber a ṭhu a. A hnungah kan nufa zain.


Chutah, Freddy-a chuan, "Anu, engtikah nge naute i neih dawn? Naute nei vat vat rawh", min ti ta mai.


"Bawiha, exam chauh ngaihtuah rawh", phawk hrain ka ti a. Ka insiamrem thuai. Nu Papuiin a hrilh a, a sawi chhuak har ka ti tawh reng a ni.


Siamtean, "Dik chiah, Lal Fanuin nau a nei ang a, Freddy-a nen an inhau tawh lo ang", a ti a. "Kan inhau lo e a", Lal Fanuin a lo ti vat.


"Apa pawhin Anu a duat sawt ang a, a nuam ngawt ang", Siamtean a ti leh. Lal Fanu meuhin, "Anu, naktukah naute chu nei la, ka khumah kan mu dun dawn alawm. Elsa-i te nen kan infiam thei ang a, a nuam dawn lutuk", a ti tawh.


Ṭah an tichhuak e a, an hlim mai sia maw.


Kei chauhin naute ka nei thei lo, an Pa bulah sawi ve sela ṭha tur. Sammy-a lah, a ngawi ngal mai sia.


Lehkha zir chawlh laiin Waiwai bawl kan ei a, Lal Fanu leh Freddy-an Naute chungchang ringawt an sawi.


"Naute in sawi leh chuan ka nei miah lo ang", ka ti pek a. An nui thlêr duai duai. "Anu chu, naute nei vat vat rawh. Lal Fanu aia duhawm leh hmelṭha", Freddy-an a ti a.


Lal Fanuin, "Chuti, Anu, mipa nei rawh aw. Kei chu", a ṭhutna aṭangin a tho a, a Pa a va kuah, "Apa Lal Fanu ka ni reng dawn", a ti a.


A Pa hmuiah a fawp zeuh. A biangin a Pa biang a siktir a, a ha lang ṭhe ṭhawin a nui ver ver a. Sammy-a pawh a vei nuih seih seih.


Hmingin min lo call chu ka kalsawn. Chokaah awmin ka chhâng a, "Chhuanpui, hrilh tur che ka nei. A hmanhmawhthlak bakah a buaithlak lutuk", a rawn ti a.


A ṭawng rang lutuk a, a hmanhmawhthlak bakah a buaithlak tih ka hre mai.


Thil hmanhmawhthlak leh buaithlak a tawn tawh chuan a ṭawng a rang ngei ngei. A chang chuan a hriat theih ṭhin mang loh.


"Sawi vat vat rawh, i nu a dam ṭha lo em ni?", a nu a dam ṭhat loh thu a sawi ang tih ka hlau. A nu a dam ṭhat loh hlek chuan a phi cheng zel a, a muhil thei ngai lo bawk.


Hmingi chuan, "A damṭha lutuk. Eng lo, u Hriatpuia zawk hi nia", a rawn ti a. A ṭap velin ka hria.


"A hau che em ni? Chutiang a nih chuan ka hau ang, min han hrilh teh", ka ti chul.


"Chutiang a ni lo, en teh; a nu leh pa bulah a bialnu angin min sawi a nia aw. In lo hre tawh em? Nichinah a nuin min lo bia a, ka zak lutuk. 'Aw ni e' ka ti ve hmiah. Chhuanpui, ka zak lutuk, engtin nge ka tih ang?", a rawn ṭap ṭuau.


Ka nuih za lutuk chu ka insum ngar ngar, "Engtin nge ka tih dawn? Min pui teh",


"I nih loh thuin chhâng ta che",


"Ka tum alawm, 'Aih' tih turah 'Aw' ka ti palh. U Hriatpuian min lo la be si lo, a nu chuan inneih te a sawi a nia aw", a rawn ṭap leh ṭuau.


"Ka bulah i lo awm duh em?",


"I phal chuan ka awm duh",


"Driver ka lo tir ang aw", ka ti a. "Ngai lo, u Hriatpuia ka bia ang a, sawifel vek turin ka ti dawn", a ti a.


A rawn ṭap uar nasa telh telh bawk si. Buaithlak kual vek tawh.


"Hming, ih maw; in inneih chuan kan pahnihin kan inkawm thei ang a", ka ti chu, "Khatiang sawi suh", a rawn ti nghek. Hei hi, a hmaa ka ngaihtuah kha a ni.


"Kum sawmthum i nih tawh kha aw", ka ti leh a, "I chawh a nih chu a, i ni ve tho. Kei aiin kum sawmli i ni hmasa dawn. Naute i nei har si, i indang nge, in pa nen in mu dun ngai lo hrim hrim zawk? Naute nei vat vat rawh", a lo ti duah.


Ka sawi hma ka ngai asin aw...


"Chutiangin a theih ngawt hleinem",


"A theih, a theih, in pa te kha thlêm ve la; in nei vat mai ang", a lo ti leh zel.


Hnial ngaihna ka hre tawh lo.


"Chhuanpui, u Hriatpuian min lo call, ka hau hrep dawn", ka chhân hma hmain a titawp daih.


Lehkha zir zawha kan mut hnaihah Hmingin min lo call leh.


"Inngaizawng turin min thlêm char char, engtin nge ka tih dawn?",


"I duh ve mai lo'm ni?", ka ti a. "Ka hre lo", a rawn ṭap leh ṭuau. Ka nuih a za lutuk.


Hmingin, "Ka chhungten pasal nei turin min nawrchhen tawh sia, inngaizawng loin inneihpuiah ka sawm mai dawn em ni ang?", a rawn ti ṭuau a.


A insût hlawp hlawp.


Ka nui chhuak ta nge nge, "Lo nui suh", a ti hlar. "Hming, kum sawmthum kan ni ta reng mai tiraw?",


"Chu chu lawm, u Hriatpuia chu...", ka hrethiam lo kher mai.


"Ngun deuhin ngaihtuah la, keiin ro ka relsak thei lo che. I dam chhung hun hman dan tur a ni a, i kutah a innghat",


"Khatin min ti a, i nu leh pain i pasal neihna an ruat a ni lo'm ni?",


"A nih, i nu leh pa va sawipui rawh. Inneih ni loa inngaihzawn chauh tur chuan, va sawipui a ngai kher lo", ka ti a.


Sawi tur ka hre tawh lo.


"Chhuanpui, tunge i biak?", Tiang hawlin a lo kal auh auh a. "Hmingi mawle, lo va mu rawh, ka lo mu har lo ang", ka ti a.


Thuawih takin a kal ve mai, "U Sammy-a mi?", Hmingin a lo ti a.


"Ni e, naupang mu tur a thlah lawk a",


"Naute neih kha, theihnghilh miah suh. A changkang tawh a, zantin thlem char char rawh",


"Zohmingsang, i rapthlak lutuk. I u Hriatpuia bia la, sawifel rawh u", a lo nui ar ar.


Thlunglu hi a hai ṭhin ngei mai.


"Naktukah chanchin ka lo hrilh ang che, mu tawh rawh u. Naute kha aw", a la ti hram.


An inthurual vek emaw tih a awl.


Naupang ho chu ka thlah veleh phawt. Pindanah ka lut a, an muhil thuai.


Dim takin kawngka ka khar a, Lal Fanu pawh kar loah kum sarih a ni reng dawn ta mai.


Sammy a lo mu fel diam tawh.


A taksa a nalh ṭan leh tawh a, a hma zawng aiin a inuluk ta bawk nen; a insawi dan takah, a kum sawmparuk mi hliah hliah.


Kum sawmparuk pelh kan tum lo bur.


Sammy hnenah Hmingin min lo hrilh ho ka hrilh chhawng veleh.


"Ka naua chu a va zei ve", a ti chu ka ṭhu chhuak leh ngat.


"I hre vek maw?", a hriat a rinawm reng a ni.


Sammy pawh a inbengkang a, "Niang chu, min hrilh alawm. Amaha ṭang turin ka hrilh ta a nih kha, hun a duh rei phian a", a kiai sak.


A muthla leh thuai, "Min hrilh ve ta che", min kuai thlu a, "An buai buaiin buai rawh se, puitling an ni tawh", a ti sam et.


A ngaihsam mai sia, ka ṭhu chhuak leh a, "Sam, Hmingi pawhin naute nei vat turin min ti tawh a nia. Ka indanglo ka tih pawhin, "I indang", min ti tlat a, hnial ngaihna ka hre tawh lo", dâwt vâr ka telh zeuh.


Inbengkang lehin, "An duh duh sawi rawh se, i buaina a ho em mai. Mut a hun tawh", a ti sam leh et.


Ka ngei lutuk chu bathroom-ah ka kalsan daih.


Zak chung chungin ka sawi ve em em a, naupang pawhin an sawi an sawi a, amah ngei pawhin, "Lal Fanuin chhang nei tawh rawh se", a ti a.


Darthlalang hmaah ka ding a, Ha ka nawt vak vak ringawt. Ka ngei lutuk. Lal Fanu bulah ka mutsan daih mai dawn mawni?


Bathroom aṭangin ka chhuak a, a lo muhil vang vang. Chhir thawh zawt ka châk lutuk.


Thawm dim ka tum lo, khum chungah ka zuang lo chauh. Na zetin puan ka phih a, Sammy-an a sin pha leh si lo chu ka sin ṭhattir leh.


Ka thawm a len(lian) tehreng nen, a che eih lo. A muhillo tihna, muhil tak tak se, a che tawh hrim hrim.


Ka thinrim tawh, puan chu ka tawm khawm vek. Keimah chiahin ka sin.


Nui kur kurin a lamah min pawt hnai a, ka muhil der ve hmak. Puan a phelh a, min kuah hle hle.


"Lungawilo taka i muthilh ka phal reng reng lo a nia, ka hmangaih che", ka biangah a fawp a.


Ka nui deuh sen sen a, min hriat ka hlauh avangin ka tal laih. Min kuah nghet sauh thung.


"Chhuanpui Darling, ka Hmar lunglien; Hmar hrangsie, Puipui, ka hmangaih che", ka chal a fawp a.


Duhtawk mai loin ka biang leh hmui a fawp a, ka hmai chu a fawp kual dun dun.


"Kal teh", vaikiangin ka ti ta nge nge.


Ka dulah min dêk a, "Duhtawk rawh, duhtawk rawh", ka nui ar ar.


A duhtawk ve mai bawk, min kuah ṭha leh sauh a, "Ka hmangaih che. I muhil tawh ang tiraw?", ka nui seih a, ka bu nghat.


Ka hmui a tawk chiah chu ka thlah phal lo, a inla hrang tur chu, "I duhtawk hma em mai", ka ti a.


"Tlaivar i inhuam em ni?",


"I huam phawt chuan", ka ti vah.


Min fawp a, ka fawh let hmain a inla hrang daih. Min kuah ṭha sauh a, "A tlai tawh em mai, muhil tawh zawk ang", a ti a.


Ka mu hle hle tawp tawh.


Ka en a, ka lainat hnuhnawh. Dam chiang var tiha sawi tur a la ni si lo a, a inhuam lo emawni?


A inhuam tak tak hma chu nawrluih tum tawh lo teh ang.


Ṭha takin ka kuah let a, "Ka hmangaih che", ka lu a tuai heuh heuh. Ngaihthlak a va han nuam tak.


"Sam, min hrilh leh rawh",


"Ka hmangaih che", mit chhingin ka nui sen sen.


Inawihmut nan a ṭha dawn tlat, mut a chhuak mai ka ti. "Vawikhatin", ka ti zel a, min hmangaih thu min hrilh ve zel bawk.