Perfect (Chapter-5)

[Rebec Nunziri]

Chapter-5



Lalchhandami POV




School luh a hun leh tep tawh, hnaah kal a la ngaih loh vangin inah ka awm nileng mai zel a, a ninawm lek lek thin, zan dar 9 a ri tawh a, ka phone a video ka en mai mai lai chuan Tlanchhuahi hnen atang call ka dawng a, kan in be zeuh zeuh thin a, a that thu min rawn hrilh a, nihnih lai chu ka be tawh lo, ka chhang a, lehlam atangin Tlanchhuahi tap thawm ka hriat chuan ka thu chhuak vat, "Hello Tlanchhuah ka tawng i hre thei em?" ka biak na pawh chu min chhang lo, a tap ri chauh chu ka hriat theih awm chhun chu a ni, ka mangang tawh hle, "Enge thleng, tinge i tah, hlauh I nei em ni?" ka ti leh sawk sawk a, engtik in nge khum atang ka thawh pawh ka hrelo, "Miss" a aw chu a khur deuh dar dar a, "aw.. enge nita, hlauh i nei a mi, enga tinge i tah?" ka ti leh zung zung a.




"Miss I lo kal thei a ngem, ka hlau, khawngaih takin lo kal vat vat rawh" tap chungin a rawn ti bah nawk nawk a, "Awle, ka lo kal dawn ka lo thleng vat ang, in inah em ni i awm?" ka room atang ka chhuak a, "Aw.. khawngaihin lo kal vat vat rawh, ka hlau" a ri deuh rawk rawk a, mipa aw ri ka hre ruai hman phone chu a tawp daih a, muangchan chi a ni tawh lo tih hria in inhnuai ah chuan ka chhuk vat a, ka nu te an lo la meng, ka chi ai hmel lutuk an hmuh chuan ka nu chu ka lam panin a rawn kal vat a, "Mate, enge thleng, ngatinge i hmel a va dik lo ve" a tihchuan, "Nu ka kal vat a ngai, ih, Tlanchhuahi'n min rawn bia a, a hlauhthawn hmel takzet a ni" ka sawi tum ang pawh ka sawi tha theilo, "A nihchu, ka lo kal ve dawn em ni, nangmah chauh a kal ai chuan" ka pa chuan a ti a, "A ngailo, keimah in ka va kal phawt ang, thil awmdan te ka rawn hrilh zawk ang che u" ka hmanhmawh tawh em avang chuan ka pa chu ka hnial a.




In atang ka tlan chhuak nghal, kawngka ka pel fel chiah tih chuan U Zonuna nen kan in tawk hlawl, biak na hun ka neilo, ka kal pel a, kan garrage lam chu ka pan a, "Khawiah nge i kal dawn?" ka kutah a rawn man a, min rawn zui tih reng reng ka hrelo, "Thil pawimawh lutuk ah chhuah ka ngai, ka kut hi thlah vat teh, ka hmanhmawh a nia" ka kut chu thin thlak mai ka tum a, a lo vuan nghet sawt. Tunah tak hi chuan a ni nen a in hnial buai nan hun ka neilo viau a sin mawle, "U Zonun ka kut hi thlah vat teh, ka hmanhmawh a nia" min thlah duh bawk silo chu ka au deuh vak a, chik zetin min en a, chutah min kai kal ta dawr dawr mai a "Enge i hriat a, kalna tur ka nei ka tihchu" ka ti tuar, "Ka hria, I kalna turah chuan ka hruai ang che, scooty khalh thei hmel pawh i put loh kha" a ti hluk a, kan in kawtah a car a lo awm a, a hna bang a rawn tlang nghal a ni ngei ang.




Ka hnial duh ta biko. Tlanchhuahi te in thlen vat ka duh ber, ka kalna tur hmun chu ka hrilh a, tlan chak tura ka tih avangin a tlan chak hle, rei lovah kan thleng nghal mai bawk a, motor a tih din rual rual chuan ka tlan chhuak nghal. Tlanchhuahi te doorbell chu ka hmet a, tuman min chhang lo, ka ngaih a tha tawh hlawl lo chuan kawngka chu ka chum ta vak vak a, tuman min chhang chuanglo, Tlanchhuahi chu ka call a, a la thei chuanglo, U Zonuna chu ka bulah a rawn ding a, "Enge thil awmzia, tute in nge a nih?" ka chet dan mak tih hmel zet chuan a ti a, "Tlanchhuahi ka class naupang a mi te in a nihhi, mangang takin min rawn bia a, an inah kal turin min tih vangin ka kal a, mahse tuman min chhang thei bawk silo, kawngka chhunglam ah a in kalh daih bawk si, engtinge a awm ang, enge ka tih dawn ka mangang tak zet tawh a ni" beidawng zet chuan ka ti a, ka mittui a tling pam bawk.




"Awle, hahdam tum rawh tihdan tur kan ngaihtuah ange" a ti sup a, ka hahdam phah der lo, hun a liam zel a, Tlanchhuahi nen kan in biak laia mipa aw ka hriat kha a unaupa ni ngeiin ka hria, Tlanchhuahi laka a chet thin dan ka hria a, chuvanga hlauthawng zual em em pawh ka ni. Thawk leh khatah U Zonuna chuan kawngka chu a tlawh bur a, a in hawng theilo, vawithum vel a tlawh leh takah chuan a in hawng ta a, hmanhmawh zetin ka tlan lut nghal, U Zonuna pawh chuan min rawn zui lut ve nghal bawk. An in chu a lo thim thuap a, thawm engmah hriat tur a awm lo, mahse Tlanchhuahi a awm ngei tih erawh ka chhungril ah hian a hre tlat a ni. Ring zetin Tlanchhuahi chu ka ko a, min chhang tu an awm lo, inhnuai lam a room te chu ka en kual a, tumah hmuh tur an awm chuanglo, U Zonuna chuan eng emaw a hmet ri khap a, a eng ta uar mai.




Inchhung chu a hnawk em em a, mahse tumah hmuh tur an awm silo, "Inchung lam khi kan han en chhin dawn em ni?" U Zonuna chuan a ti sup a, kan chho nghal, Tlanchhuahi room ber ka hriat loh vangin room lo hmasa ber chu ka hawng a, tumah an awm lo, a dawt leh chiah a room ka hawng tur chu thawm ka hria a, ka tawp chawt, U Zonuna pawh chuan a hria tih hriat takin min rawn din hnaih hrut a, kawngka herh hawn na ka herh chuan a in hnawng mai thei ta tlat lo, hmeichhe thla phang aw ka hre leh a, Tlanchhuahi ngei a ni, "Tlanchhuah Miss Chhantei ka nia, kawngka hi lo hawng la, ka lo thleng tawh a nia" kawngka chu ka chum dat dat a, thawm hriat tur pakhat mah a awm lo, aw ri kan hriat pawh kha a reh hmak, ka ngaih a tha lo zual sawt, "U Zonun kawngka hi ti chhe leh mai ang" ka ti ta tawp a, ka awm sawn a, U Zonuna chuan kawngka chu a tlawh leh bur a, a in hawng nghal.




Room chu a lo eng vek a, ka thil hmuh chuan min thawng takzet, Tlanchhuahi chu khumah saruak vekin a lo mu a, chet mai nachang pawh ka hrelo, U Zonuna zawk chuan Tlanchhuahi lam chu va pan in puan chuan a khuh tha vat a, Tlanchhuahi chuan hria ang pawhin a awm lo. Inchung lam en in a meng a riai a, a bekah mittui a luang thla ngiai ngiai bawk, "Bawihte" U Zonuna chuan min rawn sawi a, ka harh chhuak ve ta chauh, "Tlanchhuahi hian a mamawh che, ka lo va chhuak ange, pawimawh a awm a nihchuan min rawn ko dawn nia" ti supin room atang chuan a chhuak a, Tlanchhuahi chu ka en leh vang vang phawt, engmah sawi lo mahse a chunga thil thleng awm ang tur chu ka hrethiam nghal vek, muangchangin ka pan a, a mutna bulah chuan ka thu thla a, ka mittui ka dang theilo, a lu ah chuan ka khawih a, hria ang pawh in a awm lo.




"Tlanchhuah" tah chhuak in sum zetin ka ti a, "Bawihi" ka ti leh sep, a en ngai chu a en reng a, a mittui chu a hul bik lo, sawi mai tur pawh ka hrelo, "I tha em?" ka ti leh tawp a, a that loh zia chu ka hrechiang hle si, "Tlanchhuah keimah Miss Chhantei ka lo thleng tawh a nia" ka lam chu a rawn hawi a, a mitah chuan natna hlir ka hmuh sak thei, ka hmel a hmu chiah chu in sum buai lovin a tap chhuak hawk a, "Miss" tiin min rawn kuah a keipawh chuan ka lo kuah let vat a, "Engkim a tha vek, ka awm tawh hi, hlauthawng suh, i bulah ka awm tlat a nia" ka ti sep sep a, chhuak zetin a tap a, ka kawr chu a huh tih ka hre thei. Chutah ka phone a rawn ri a, ka pa a ni, ka la vat a, Tlanchhuahi chu a la tap char char, "Pa" ka aw chu a lawi rut a, "Mate, enge chanchin?" a rawn ti nghal zat, sawi dan mai tur pawh ka hrelo, "Pa nakinah ka hrilh ang che, kan lo let tep, min lo nghak dawn nia" phone chu ka dah nghal.




Tlanchhuahi chu a tap nasa lutuk a a zawi vek tawh, "Rilru fim put tum hram hram rawh, engkim a tha leh vek mai ang, le tho la kan in lamah kan kal dawn nia" ka ti sep sep a, chet sawn nachang pawh a hrelo, keimah chuan ka kaitho a, ka tih ang ang chuan a awm tawp, a thawmhnaw bawm ni ngei tur lam chu ka pan a, thawmhnaw ka hmuh hmasak ang ang chu la in Tlanchhuahi chu ka hak tir a, "U Zonun" a lo lut vat, "Kan kal mai dawn em ni, heta awm rei chi a ni lovang" ka ti a, Tlanchhuahi chuan hliam a neih deuh nual avangin a taksa chu a zawi zual a, kal pawh a kal tha theilo, U Zonuna chuan a pawm kang lawp a, Tlanchhuahi chu a rak ta tuar tuar a, "Miss min pui rawh" a rawn ti bah nawk nawk bawk, "U Zonun dah thla leh phawt mai rawh, a thil tawn in a la thawng lutuk a chuvang a niang" ka ti a, U Zonuna pawh chuan a dah thla vat, Tlanchhuahi chuan min rawn kuah nghal vat a.




"Hlau suh le, i bulah ka awm tlat dawn ka tihkha, le kan pahnih in kal dun ang aw" ka ti a, ka awm ah a la bei reng, inhnuai lamah kan chhuk a, nghet zetin min kuah a, a kal tha theilo bawk nen step a kan chhuk thlak chhung pawh rei tak a ni. Pawn ah kan chhuak a, motor hnunglam ah chuan Tlanchhuahi ka thut pui a, U Zonuna chuan ngawi rengin motor a khalh a, kan in zawnah motor a tih din chuan kan chhuak a, kan in lam kan pan lai te chuan min la kuah reng a, hlauh nei ang maiin a thaw leh kawk kawk zel bawk. Doorbell ka hmet ri a, U Mami chuan a rawn hawng vat, U Zonuna te nen kan in zui lut a, ka chhungten Tlanchhuahi an hmuh chuan an lo buaipui vat a, Tlanchhuahi erawh ka bulah a awm tlat. Tlanchhuahi chuan hahchawlh a mamawh vangin ka room lamah ka chhoh pui ta phawt a, ka chhungte hnenah min lo ngaichang turin ka ti ta tawp a.




Khumah chuan ka mutpui a, a muhil thei mailo, hriat tham lovin a phun leh sep sep thin a, a chang leh a phu zawk thin bawk nghet zetin min kuah a, a thlamuan theih nan a hnungah ka chul hauh hauh a, a hnuah a rawn tap leh a, "Miss" a ti tiau a, "Enge ni?" dam tak chuan ka lo ti a, "Miss, tinge I lo thlen har em em, ka unaupa hrawn khan keihi nasa takin min sawisa a, ka nu leh ka u an awm bawk silo, bathroom ah ka awm a, ka unaupa hrawn chuan min pawngsual tum in min um a, kan in biak lai khan bathroom kawngka chu rawn ti chhia in, ke.. keihi" a tap leh a, "Keihi bathroom atanga min hnuk chhuak in room ah min pawt chho a, ka theih tawp in ka lo sual let ve, mahse ka hneh silo a, ka room ah min hruai lut in khumah min theh thla a, min sual a tum a, mahse ka lo tan tlat avangin a thinrim a, min hnek a, a rem lai mai ah kut min thlak a, ka taksa na lutuk ka tha ka hman theih tawh loh hnuah min pawngsual ta a ni, chuan in lo thlen hma deuh khan ka room tukverh atang a chhuak a" a tap hawm hawm a, a tap thawm hria in ka nu chu ka room ah a rawn lut vat a.




"Mate, in tha maw?" mangan hmel takin a rawn ti a, "Aw.. kan tha e, nu nakinah ka lo chhuk ang" ka tih hnuah ka nu chu ngaihthat loh hmel takin a chhuak a. Tlanchhuahi chu a muhil ta a ni ngei ang, a thaw sek sek a, a rawn phu leh zawk zawk thin, ka la kuah reng a, a thusawi te khan min thawng takzet, engvanga lo thleng vat lo nge ka nih, keimah ah in thiamloh na nasa tak a awm a, tihtheih engmah ka nei tawh silo. Tlanchhuahi hmai chu ka en a, a duk deuh ruih a, a taksa dangah pawh hliam a awm nual bawk, kha mipa tenawm khan engtiang chiah in nge kut a thlak ka ring thiam lo, engpawh nise a thil tawn te hian nasa takin amah ah nghawng a nei dawn tih ka hria, chutih hunah chuan a bulah ka awm zel tawh ang.




A muhil nghet tawh a ka hriat avangin thawm dim zetin room atang chuan ka chhuak a, inhnuai a ka chhuk chuan ka chhungte leh U Zonuna te chu an lo la thu thap a, an bulah chuan ka thu a, "Mate, Tlanchhuahi chu a muhil thei maw?" ka nu chuan ngaihtuah hmel takin a lo ti a, "Aw.. muhil thei e" ka ti sep. "Thil thlen dan te chu han sawi la, Zonuna hian tlem a zawng chu min lo hrilh tawh tho a" ka pa chuan a ti sup a, thawk ka la halh a, Tlanchhuahi min hrilh ang zawng zawng chu ka chhungte hnenah ka sawi ta vek a, ka nu leh U Mami chuan rapthlak an tih hmel hle, "A va han khawngaih thlak ve aw, a la naupang si a" ka nu chuan a ti vawng vawng a, "Engtia hmalak chi nge ni ang aw, a chhungte biak mai tur an awm em?" ka pa bawk chuan a ti leh a.




"Ka hrelo a hma khan chhungte an neih vak loh thu chu a sawi tawh a, ka lo zawt tha leh dawn nia" ka ti sep, "Ni e, khua te han var se tihdan tur kan ngaihtuah dawn nia, kan mu phawt ange" tih pahin ka nute chu an room lamah an lut a, U Mami pawh Inchungah a chho nghal, "Keipawh ka va haw ange, a tlai tawh si a" tih pahin u Zonuna chu a ding deuh hluai a, keipawh chu ka ding ve nghal. Kawngka thleng chuan ka thlah a, "Zanin kha ka lawm lutuk a nia aw, ka rualin lo kal lo la chu tih ngaihna ka hre awm der silo" ka ti sep a, ka ti tak tak, min lo zui a tum khan duhlo viau mahila a lo kal tello ang tih mawlh a ni ka hlauh ni. A nui suk a, "Engmah a nihloh kha, chuan zirtirtu tha tak i niin ka hria, i student te i ngaihtuah si a, nang ang zirtirtu an nei che hi vannei in ti hluah hluah tur an ni" a tihchuan ka lai lek lek, "Ka tihtur ve reng alawm, chuan ka lawm tak tak a nia, muttui le" ka ti a, a kal nghal mai dawn emaw ka tih laiin a la ding reng a.




Kawngka han khar khum tawp lah thil mawi a ni bawk silo nen ka en haw a, "Ka kal ange, naktukah ka rawn kal leh ang, muttui le" tiin a kalsawn ve ta a, a motor chhunga a luh lai chu ka en zui reng, lo la in ngaizawng reng ta ila tih ka ngaihtuah a, mahse tunah chuan engkim a danglam vek tawh. Kawngka chu kalh tha sawk sawk in inchung lamah ka chho a, ka room ah ka luh chuan Tlanchhuahi chu a lo mutui hle, bathroom ah ka hmai te ka phih fai hnuah thawm dim zetin ka mu a, ka muhil dawn tep tih ah Tlanchhuahi chu a rawn au chhuak vak a, ka tho nghal vat, mangang hmel takin a au chel chul a, U Mami chu room ah a rawn lut vat, "Ngatinge?" khumah chuan a rawn lawn kai a, "Tlanchhuah I tha em, hlau suh engmah hlauh tur a awm lo a nia" a biangah chuan ka beng thek thek a.




A mit chu a rawn meng a, a meng a ruai bawk, "Miss" a tap leh ta hlawp hlawp a, ka lo kuah vat, U Mami pawh chuan Tlanchhuahi awmdan chu lainat hmel takin a lo en ngawt ngawt a, "U Mam zanin chu kan bulah lo riak ve mai ta che" ka tihchuan a lo pawm ve mai. Tlanchhuah chu a laiah a mu a, a thaw leh siai siai tawh mai, mahse a mu nghet lo hle tih a taksa rawn che leh thut thin ah chuan a hriat. Zingah pawh chuan kan harh hma hle, U Mami chu inhnuai ah rawngbawl turin a chhuk a, kei erawh room ah ka la awm thung, Tlanchhuahi pawh a rawn harh ve tep tawh ang, room chhungah amah chiah in a awm tih a hriat chuan a hlauh ka rin vang a ni. Dar 7 dawn ah chuan a rawn meng riai riai a, "I harh tawh maw?" ka lo nuih var var, min chhang lo, nizan ai ngawt kha chuan a ngaihtuah na te pawh a fim ve deuh tawh ang.




"Tho la, inhnuai ah kan chhuk dawn nia" ka ti a, chet pawh a la che sawn lo, a melh ngai chu a melh reng a, "Tlanchhuah lo kal rawh le, inhnuai ah chhuk ila" ka tih leh takah chuan muangchangin a rawn tho chhuak a, a taksa chu a la na deuh aniang a che tha theilo, kal pawh harsa a tih hmel hle, ka lo kai vat a, inhnuai ah chuan kan chhuk a, ka chhungte an lo tho vek tawh, "I lo tho tawh maw, Tlanchhuah hetah lo kal la, hei thingpui in tur a awm a nia" ka nu chuan a lo ti zung zung a, Tlanchhuahi erawh a la tawng lo hrim hrim, ka nute thut na lamah chuan ka kalpui a, "Vawin chu damdawi inah kal ka lo rilruk a" ka nute bul a kan thut rual rual chuan ka ti a, "Ni e, va kal rawh u" ka pa chuan a lo ti sup, nizan thil thleng chungchang an sawi lang lo hrim hrim.




Zing chaw kan ei a, Tlanchhuahi chuan a la ei mang lo, nizan ah khan an in atang a kan chhuah dawn khan a phone ka keng tel a, ka bag a ka dah kha ka la la chhuak lo hrim hrim, chaw kan ei kham hnuah room ah kan chho leh a, a phone chu ka la chhuak a, a nuhrawn hnen atang miss call lo tam khawp mai, call back lem lo chuan bag ah bawk chuan ka dah lut leh ta daih a, U Mami te nen ka pathum in in entir turin kan chhuak a, damdawiin kan thlen chuan doctor ka pa hmelhriat cabin awmna lam chu nurse in min lo kawh hmuh a, kan lut vat. Tlanchhuahi chu a check a, an zawh hma chu kan lo nghak ran a, a hliam te kha damdawiin kan kal hma in ka en sak a, a nak bawl vel phei chu a duk vek a, engtin chiah nge a unaupa hrawn tenawm zet khan a lo sawisak tih pawh ka ngaihtuah thiam lo, doctor in a fal a min biak duh thu a sawi avangin U Mami leh Tlanchhuahi te chu an lo va chhuak a.




"Ka en dik na atang khan a thil tawn tur ang chu ka hrethiam vek a, a taksa ah khan hliam lian tham tak tak a awm a, mahse hlauhthawn awm lutuk erawh a nilo thung, a nak zawn ah khan na tak a chhir a ni a, a nak ruk tliak lo mahse a pelh deuh a, engtinnge khatiang hliam nei chung khan khatia a la awm theih pawh ka hrelo. Engpawh nise a tuar chhel takzet a ni, damdawi ka chawh ang te hi tha takin eitir ula chuan kartin in check up turin in rawn hruai thin dawn nia, ka sawi duh leh pakhat chu a chunga thil thleng te kha thil dik a nilo a, police hnenah kalpui ula a tha in ka hria, a taksa mai nilo a rilru lam thleng in nghawng a nei thei a, chuvang chuan tha takin in enkawl dawn nia" Doctor chuan a ti a, ka chhuah dawn chuan lawmthu ka sawi a.




In kan thleng chuan ka nu leh pa hnenah chanchin te ka hrilh ve a, hun a kal tam hma in Tlanchhuahi biak vat a ngai a ni. Zanah chuan Tlanchhuahi chu ka pa in a be ta a, a ni pawh chuan tha takin a lo chhang ve zel bawk, "Engpawh nise i chhungte dang hi biak tur an awm em?" Tlanchhuahi chu a ngawih vang vang hnuah "Awmlo, ka nu leh pa te hi fahrah ve ve an ni a, tumah chhungte han tihtur vak kan neilo" kun ngul chungin a ti a, ka khawngaih takzet, "Awle, engpawh nise, kan thlahthlam dawn lo che a, kan inah I awm dun phawt chuan pawi tihna kan neilo, kan fanu angah ka en che a, chuvang chuan inthlahrun na tur a awm lo a nia, chuan i chunga thil thleng te hi thil pangai a ni lova, chuvang chuan police hnenah report ngei tha in ka hria, enge i ngaihdan, I duhdan a nih loh chuan kan tilui chuang lo anga" ka pa chuan a ti leh dap dap a.




"Report ngei chu ka duh, ka unaupa hrawn pawh nise ka chunga a thil tih te avang khan ka ngawi liam mai mai theilo, a thiltih sual man chu a hmuh ngei ka duh a ni"a ti ta a, ka pawm zawng tak a ni. Ka pa in a nu te lo be turin min ti a, naktukah ka kal ang, Tlanchhuahi nen chuan kan mu dun leh a, nizan ai ngawt chuan a mu tha zawk. A tuk lamah chuan Tlanchhuahi te ina kal turin ka in siam a, Tlanchhuahi'n erawh kal ve a duh loh vangin inah a lo awm dawn thung a ni, ka in peih hnuah inhnuai ah ka chhuk a, sitting room ah chuan U Zonuna a lo thu kur a, enge tun ang hunah te a lo tih ni, hna a kal daih tawh ka ring a nia, "I hman chuan kan kal dawn em ni?" a thutna atang chuan a rawn ding chhuak a ka lo en ho, enge rawn tih ve a tum ngawt ni, "I lo kal ve dawn maw?" ka ti haw "Aw.. I rual a kal turin ka lo chah a nihkha, vawin a hnaah a chawl dawn tho a, thil thlen na hmunah khan in pahnih in in kal a, mit ngei a hmu tu in nih mai bakah an inah nangmah chauh a kal ai chuan a that zawk ka rin vang a nia" ka nu chuan a lo ti zung zung a.




Ka hnial lo khawp mai, diktak chuan Tlanchhuahi te ina mahni chauh a kal chu ka huphurh a ni, in atang kan chhuak a, a car in kan kal a, engtinnge min lo dawng sawng ang tih lah ka ngaihtuah thiamlo, an lawm hauh lovang, Tlanchhuahi nuhrawn khan tha tak tak in min lo be thin mahse tunah chuan a dan a dang tlat a ni. An in zawn kan thlen chuan motor a ti ding a, ka chhuk nghal vat, doorbell ka hmet a, an lo hawn hma chuan ka thaw chhuak leh hawk a, "Lungngai suh, engkim a tha vek mai ang" U Zonuna chuan a lo ti sup a, a lo kal tel ve chu ka lawm hle, kawngka chu Tlanchhuahi unaunu hrawn khan a rawn hawn a, min hmuh chuan mak a tih hmel hle., chutah nelawm loh zetin min en a, "Enge in lo tih dawn?" a ti hmak bawk.




"I chhungte an awm em, biak kan duh a" tha tak chuan ka ti a, min luh tir ve mai, Tlanchhuahi nuhrawn chu sitting room ah a lo thu a, "Miss Chhantei chu enge in lo tih dawn a?" a ti a, nidang aiin a aw chu a nelawm loh bawk, "Kan lo kal chhan chu sawi nghal mai ila Tlanchhuahi chungchang ah a nia" ka ti a, "A nihchu, inah a awm lo, a u nen kan zin chhungin khawiah nge a lo kalbo pawh kan hrelo, mipa dang a um bak a nilo ang, ka rindan sa reng a nia ka call pawh a la duh lo" a lo ti hlak hlak a, "Nu a hma atang ka sawi tawh kha, i duat lutuk a chuvang vek a nihhi" A unaunu pawh khan a lo ti a. Tlanchhuahi chu kan hnenah a awm tih an hrelo tihna a ni phawt a, mahse chutiang thil chu engvanga sawi nge maw an nih le.




"Ka pi i ngaihdan chu a diklo a nihchu, Tlanchhuahi chu kan inah a awm" ka ti fak a, "Enga in inah a awm amaw, chutiang te chu engvanga min rawn hrilh vat lo nge in nih, keini hetah amah ngaihtuah reng reng in kan lo awm a, Mama phei chuan a bo zan khan a zawng vak a sin" A nu chuan a ti a, ka lo ner nang, "Engvanga hruai nge ka nih maw, chu te chu i fapa kha i zawt thei alawm, zan tlai tawh takah hlau thlabar in min rawn call a kan rawn thlen chuan pawi tur ang zawng zawng a thleng vek tawh, a unaupa anga a lo ngaih chuan a thianghlim na a laksak tih in hria em?" ka ti that a, ka in sum hman meuh lo a ni. An nufa chuan min en kawk a, "Tunah khan engmaw i sawi, ka fapa hian Tlanchhuahi a pawngsual i tihna maw, awihawm loh hian, ka fapa hian chutiang thil tenawm a ti duh reng reng lovang, Tlanchhuahi te chu a unaunu angin a sin a en" a ti ve hlar a.




"Tlanchhuahi ngeiin a sawi, chuchu dawt i tihna maw?" elhsen set chuan ka ti leh a, "Kha mi hur nu thusawi kha ka awih nachhan tur ka hrelo e, zan tlai tawh tak tak ah in atang chhuah a chhing a, khawiah nge a kal kan hre ngailo, chuan amah zawk khan ka fapa hi a thlem thin zawk, chuvang chuan ka fapa hi dawt a rawn puh chu tum lo mai rawh u" a nu (Pi Nghaki) chuan a ti leh tawn tawn a. Chutih lai tak chuan kawngka a rawn in hawng a, Tlanchhuahi unaupa hrawn ngei mai chu a rawn lut a, "Mama, I lo haw chu a tihzia hlauh e, hei Laltlanchhuahi Miss hian Tlanchhuahi i pawngsual thu a rawn sawi a nihchu" a nu chuan a lo ti a, "Enga, keihian ka nau ka pawngsual anga maw?" awih loh hmel fe chuan a ti a, a mitmeng ah erawh a pawngsual ngei tih a hriat hmaih theih loh, "Ni e, Tlanchhuahi ngeiin a sawi, chuan nizan hmasa khan U Zonuna nen hian in inah kan rawn kal a, thil awmdan chu kan hrethiam nghal vek bawk, chuan heihi lo hria la, Tlanchhuahi duhdan ang ngeiin police hnenah kan thlen dawn a ni" ka ti fak fak a.




"In duh ang chuan che rawh u, hlauhna ka neilo, Engthil sual mah ka tilo a, finfiah na pawh in neilo" ti fuh in ti zet chuan a ti a, "Awle a tha alawm, finfiah na maw, Doctor in Tlanchhuahi a check na atangin pawngsual ngei a nih thu chiang takin a lang a, chu mai pawh nilo a pawngsual tu chi ngei chu hmuh tur a awm bawk, chuan Tlanchhuahi ngei pawn nangmah ngei hian i pawngsual thu a sawi bawk a, chuchu finfiah na atan chuan a tha tawk" mahni in ring tawk tak chuan ka ti a, ka sawi zo chiah chu a mitmeng a in thlak danglam nghal vek thei, "Engpawh ti rawh u, kha mi hur nu khan a u zawk hi tenawm tak tak in a ti fo va, ka en liam mai zel a, mahse enge kan tihtheih chu in la hria ang" Pi Nghaki chuan a ti ta fak fak a, "Ni e, kan hre mai ang, chuan i fapa thiltih thup nan a thil tih zawk te Tlanchhuahi thil tih ah puh tawh suh, tu zawkin nge tenawm tak tak a ti thin zawk chu in hrechiang ber, chuti chung chuan in en liam a, in ngawih bo pui mai mai a, hetiang thil thlen chhan hi a bul pui ber chu nanghi I ni" tiin Pi Nghaki chu ka en ran a.




"Nang... nangnu khan engmaw i sawi a?" a thinrim ngang aniang a tawng chu a seh chilh nawk nawk a, a kut zung tang a min kawh na pawh chu a khur deuh dar dar bawk. Hlauhna chhete mah ka neilo, "Ka thusawi chu he thil thleng ah hian thiamloh na I nei ve ka ti a nihchu, in in a ka rawn kal hmasak ber atang tawh khan Tlanchhuahi i en dan hi ka hriat loh i ring em ni, I fanu angin i en ngailo, chhiahhlawh ang bakin I en ngailo, i fapa in Tlanchhuahi a tihdan pawh hi i hrechiang lutuk, chuti chung chuan i en liam a, chuvanga hetiang thil thleng hi a ni, i fapa thil tih sual chu hmu duh lovin Tlanchhuahi ringawt i dem a, hre rawh u, Tlanchhuahi hi a mal lo a nia, i fapa hian a thil tih man chu a hmu dawn chiang khawp mai" ka ti ta fak fak a.




"Engmaw i sawi, nanghian engmah tih theih I nei lo, Tlanchhuahi hi ka fanu a ni a, ka enkawl sen len a ni bawk, chuvang chuan kan chhungkaw buaina ah hian rawn in rawlh tum lo mai rawh u" Pi Nghaki chuan a ti leh a, a mitmeng ah chuan a fapa in hremna a tawk ang tih a hlau tih ka hmu thei, "An miss ka ni, chuan ka naupang te chu ka ngaihven tur a ni bawk, chuan fanu maw, I fanu angin i en ngailo, I fanu angin en nila i fapa hian tenawm tak tak a a tih thin lai khan en liam lovin i khap thin ang, mahse chutiang chuan i tilo, i en liam a, chuvanga hetiang thil pawi thleng hi a ni bawk, chuan Tlanchhuahi ngeiin amah khawih chhe tu chu hremna pek a duh bawk" A fanu anga a la sawi ngam chu zaklo ka ti khawp mai, a fanu anga a en ngailo zia chu amah ai bakah hrechiang tur an awm lo.




"Engpawh ti rawh u, ka fapa hian chutiang thil tenawm chu a tilo tih ka hrechiang, Tlanchhuahi pawh rawn haw tir ang che u, in rawn haw tir lo a nihchuan keimah zawk hian in laka FIR ka theh lut ang, chutiang thil ka tih in duh lo a nihchuan vawin ni ral hma ngei hian rawn haw tir ang che u" kan haw tir loh tur zia hria se chuan hetiang hian a tawng tawp lovang. Ka nui hak a, ka thinrim lutuk vanga nui ka ni, "A rawn haw tawh lovang, kan hnenah a awm tawh dawn, he in nasa taka tih duhdah a tawh na ah hian a rawn haw duh tawh bawk lovang, chuan FIR maw, awle i theh lut dawn nia, hlauh na chhete mah kan neilo, i hriat angin Tlanchhuahi hian kum a tling tawh a, a duhdan in a awm thei tawh, chuvang chuan i duh ang ngei chuan FIR chu theh lut rawh, mahse hneh na chan erawh in beisei suh ang che" ka ti leh hmak a.




"Nangnu hi" tih paha Pi Nghaki'n min rawn ben a tum chuan U Zonuna chu a rawn che chhuak vat a, Pi Nghaki kut ah chuan man in chiang zetin a en a, "Tunge I nih a, ka kut hi thlah vat rawh" Pi Nghaki chuan a ti tuar a, rum nghut chungin a thlah hlawk a, "Vawikhat mah i kut kha lek chhuak leh tawh suh ang che, chuan nizan hmasa a thil thleng ah khan i fapa hi a bul pui ber tih kan hria, Tlanchhuahi taksa ah hliam tam tak a awm bawk, chuvang chuan i fapa hi thiam chan tir tum suh, tunge Tlanchhuahi chung a rawng taka che tu chu kan hriat ang bawkin in hrechiang, police hmachhawn turin lo in puahchah ang che u" tih pahin keichu min rawn en a, "Kan kal dawn em ni?" nichin a a aw chhuak nen chuan danglam tak a ni. Pawn lamah chuan kan in zui chhuak a, "I tha maw?" motor a kan chuan luh hnuah a ti sup a, "Tha e, in lamah let vat ila, ka chhungte hnenah thil thlen dan te kan sawi dawn nia" ka tih takah chuan ngawi rengin motor a ti nung a, kan tlan chhuak nghal bawk.


Cont....

Click leh comment a that chuan naktuk zanah kan dah leh dawn nia, a that loh chuan kan awl thung ang aw...