Perfect (Chapter-4)

[Rebec Nunziri]

Chapter-4



Lalchhandami POV




Ni a kal ve beuh beuh a, exam pawh karleh mai hi a ni tawh, First Term mai mah nise an tang hlawm em em a, an tih that hlawm ngei pawh ka ring, question paper ka peih fel vek tawh a, naupang ho extra class ka kalpui reng a, vawin hi kan kal tawp na ber tur a ni ta. Subject dang zir tur an nei tam ve tawh bawk nen mathematics subject ringawt a an in sawr bing chu ka duh lo a ni. School ban hnuah extra class kan kal leh a, an thiam loh lai te min zawt tura ka tihchuan an rawn kal liam liam a, ka class naupang te a mathematics harsat ber chu Puia hi a ni a, a ni pawh hma a sawn tawh khawp mai, test ka neih tir ah a fail ngai tawh lo. Dar 4:30 ah ka ban tir a, naupang ho an chhuah sap sap laiin Tlanchhuahi chu a la thu reng a.




A bul hnai ah chuan ka kal a, "Tlanchhuah haw I la tum lovem ni?" a phu deuh zawk a, a bula ka kal hnai pawh kha a hre miah lo a nih hmel. A lehkhabu te chu a khung fel mawlh mawlh a, a chevel chu chik zetin ka lo en ran, an ina ka kal hnu khan eng hliam mah a taksa ah hmuh tur a awm tawh lo, mahse ka ngaih a that phah ngai chuanglo a nihkha, "Ti rawh, I thiante pawh an haw vek tawh a nia, ka thlah ang che" ka ti a, "Miss a ngailo, keimah in ka haw thei alawm ka tibuai lutuk ang che" a inthlahrung thei lutuk hi ka khawngaih thin. Nui sak in "Buaina tur a awm hleinem, in in a hla tham ve bawk si a, a tlai tawh, lo kal rawh le" class atang chuan kan chhuak dun a, ka scooty ka lak chhuah lai te chuan hnuailam bih in a ding ran a.




An in lamah kan tlan a, an chhungkaw chanchin zawh ka tum tawh lo, ka sawi tawh a, harsatna lian tham a nei a nihchuan min hrilh em em ang, "Exam i huphurh em?" ka ti a, scooty a chuang kan ni bawk nen ka tawng ring khawp mai, "Huphurh ve tho, har deuh lo chhuak lo se" ka nui hak a, "Lehkha i zir that a I thiam phawt chuan engmah a har dawn lo, i lehkha zir hunah thiam loh lai I neih chuan min rawn zawt dawn nia, ka lo hrilh zel ang che" an in kawtah chuan scooty ka ti ding a, a u hmeichhia leh a nuhrawn te chu tual ah an lo awm a, min hmuh ve lel a nuhrawn chu a lo kal a, "Bawihi i lo haw tawh a nimaw, Miss Chhantei chu i va fel ve, i rawn thlah a" nui sangin a ti a, ka sawi nawn leh ang, a hmel ah hi chuan nu fel leh tha tak hmel a pu a ni, mahse kan lan ang ngawt kan ni ngailo an tih thin kha.




"Ni e, tunlai chu school a rawn bang tlai thei sia, in lo ngaihtuah thin viau ang a" ka ti sep a, "Nia.., a rawn haw tlai hi chuan ngaihtuah a na ve thin a, mahse extra class i kalpui tih kan hria a, engmah a pawina a awm chuanglo, an exam a hnai tawh bawk si, Bawihi han in thlak la, i nutei te an rawn kal dawn a, chuan i U Mama a pu te khaw lamah nihnih vel cham turin a zin a" a tihchuan rang zetin Tlanchhuahi chu a rawn hawi chhuak a, "U Mama a zin maw?" a aw ah chuan lawmna aw ri ka hre thei, "Aw.. a pu in angai ve tawh a ni awm e" a nuhrawn chuan a ti leh a, Tlanchhuahi chu a hmel a eng sawt in ka hria, awm rei hman ka nih loh vangin ka mangtha a, ka in khalh chhuah dawn chuan Tlanchhuahi chu ka en leh hram, a hmelah chuan a thlamuang hle tih ka hre thei mai, a u awm dawn loh vang te pawh a ni ang.




In ka thleng a, ka nu in Nu Zualtei vawinah a chet sual thu a sawi chuan ka beng khawn ran hle, "Engtinge a chet sual theih a?" a bulah chuan ka thu thla a, "An in hnung lama a huan siam ah a kal a, a ke a chhep sual a, an step ah a lum a ni awm e, a thui lo hlauh a, a tihzia tak tak a ni, a ke a bilh a, a lu a sawh deuh bawk a, hlauhthawn awm lutuk a ni lo bawk nen damdawi inah pawh awm lovin an rawn chhuak lehnghal, zanah kan va kan ve dawn em ni, I hman angem, i pa chu committee turin a chhuah a ngai a, Mami nen va kal ang u hmiang?" a tihchuan ka hnial hran lo. Nidang aiin chaw kan ei hma, U Mami nen kan che leh zung zung a, ka pa a chhuah hnuah room ah ka lut a, Nu Zualtei te inah kan kal dawn vangin ka phone charge chu ka la a, ka chhuak lehnghal.




Nu Zualtei chu an khumah a lo mu a, a ke chu an lo tuam a, a lu erawh an tuam hran lo, ka nu chu Nu Zualtei bulah a va thu a, keini erawh an room a thutthleng awm ah chuan kan thu thung. Pa Ropuia chuan a chet sual dan chu chiang zawk in a lo sawi a, ka nu in Nu Zualtei bulah chuan fimkhur turin a chah a, keini erawh kan awm rei deuh hnuah sitting room lamah kan va thu phei a, U Zonuna hmuh tur a awm lo, Nu Zualtei nau Nu Mapuii chuan min lo be bawrh bawrh a, school lam te min zawh chuan chhan ka lo phur leh khawp mai, ka hna ka thawh atang hian naupang ho chanchin hi sawi nuam ka ti ta ber a, kan inah pawh chhungkua a kan titi laiin ka class naupang te ringawt ka sawi thin. Nu Mapuii pawh hi zirtirtu a ni ve thin a, mahse a thawk rei lem lo thung, reilote chu min zirtir ve hman bawk.




U Zonuna chu a rawn lut hlawl a, min hmuh chuan mak a tih hmel deuh, "Bawiha I lo haw a nimaw, hei Chhantei te nufa an rawn kal a, i nu kan turin" Nu Mapuii chuan a ti nghal a, "A nihchu ln va fel ve" ti sup in ka hma zawnah chuan a rawn thu thla a, min en ran bawk si ka zam lehnghal der mai. U Zonuna rawn thut hnuah ka tawng leh mang tawh lo hrim hrim, Nu Mapuii leh U Mami te chu an titi a, U Zonuna lah chuan enge a hriat ni ka en apiangin min lo melh kur zel lehnghal, awm dan tur thiam a harsa takzet, ka thutdan te chu tullo pui ah ka siam tha ka siam tha ringawt. Ka phone a rawn ri ta hlauh a ka lawm zia chu ka en chuan Christ-a a lo ni, "Lo in bia ula ka va chhuak lawk ang aw, a pawimawh a" ka ti a, ka thutna atang chuan ka tho nghal, pawn lam pan a ka kal lai te chuan U Zonuna'n min en zui reng tih ka hria.




"Hello" ka ti sep a, "I va la har ve, I buai em ni?" Zang vah hian lehlam atang chuan a rawn ti a, ka nui hak, "Buai love, kan thenawm ah damlo kan kan a" "A nihchu, in in lamah ka rawn kal a, vawikhat mah ka lo la leng silo a, ka lo tlawh kawi dawn che mawni ka tih vang ania, mahse a pawi chuanglo" a ti a, "A nihchu, a van pawi inah ka awm silo a, kan len phei na a la reilo bawk sia, han haw nghal mai chu a la chi loh deuh a, zan dangah I la rawn leng mai dawn nia" kan in be ta reng a, a nau in lehkha a zir tha em tih te chu ka zawt a, a zir that thu leh a tan zia a sawi chuan ka lawm khawp mai. Kan in biak rei tak hnuah chuan phone kan dah a, kan dah hmain fiamthu a thawh leh hman hram pek a, ka nui vur vur mai, biak hi a nuam thin a nia.




Inchhung ah luh tuma ka in her chiah chu U Zonuna ka hnung lawk ah a lo ding vangin ka phu dawrh a, ka kat zui nawk bawk, "Nge khatah te I lo din?" ka thin zawn chu ka dawm a, misual emaw ka ti dawn alawm, "I hlim hmel hle mai" a aw chhuak chu nidang ang a nilo, a ngeiawm lam lek lek a ni. Chhang lova kal pelh mai ka tum chu ka kutah a rawn man a, "I inthlak danglam tak tak tih hi awih har ka la ti a ni" a ti sup a, a sawi awmzia ka hrelo, ka en reng ringawt a, "Bawihte" a rawn ti leh a, ka thaw chhuak hak, "U Zonun ka sawi tawh kha, tikhan min ko tawh lo la ka lawm ngawt ang" ka aw chhuak chu a zawi hle, "Engvanga khatianga ka koh duh tawh lo nge i nih, oh.. mipa dang i neih tawh vang em ni?" a nui hul hawk a, "Khatiang khan engvanga min ko nge i nih zawk, mi hrang kan ni a, eng in zawmna mah kan neilo bawk, puitling ve ve kan ni tawh bawk, khatianga in koh kha a mawi lo tih i hriatthiam ka ring" ka ti leh a.




Hmai tuai puat in chunglam a hawi a, a chil lem zawnga a hrawk bawk che ralh chu en nin a har hle bawk, "Khatiang khan ka ko fo che tih i hria alawm, kan chhungte zawng zawng pawhin an hre bawk, chuvang chuan a mawi lohna ka hre lo" enge maw a hriat ni, hun kal tawh ah kha chuan min ko thin pawh a ni mahna, mahse tunah chuan engkim a danglam vek tawh tih hi engvangin nge a hriat duh miah lo. "Khatiang khan min lo ko fo tawh pawh a ni mahna mahse tunah chuan khatianga min koh kha ka duh tawh lo, chuvang in vawikhat mah khatiang khan min ko tawh suh, hun kal tawh vek a nihkha, tunah chuan kan puitling tawh a, engkim a in thlak danglam vek tawh tih pawh kan hre ve ve bawk" ka ti ta fak a, ka sawi duh ngailo, mahse min tihdan te avang khan ka hmaah zamna nei miah lova a la in lan ngam te hi mak ka ti a ni.




Engmah a sawi tak loh avang chuan inchhungah luh tumin ka kal pel a, mahse ka banah a rawn man a, an in sir lamah chuan min kai kal dawr dawr a, "Enge i hriat a min thlah teh" midangin kan thawm an hria ang tih ka hlau bawk si nen chuan ka au ring ngam lo, thim chin laiah chuan a ding a, ka dar ah rawn man in bangah chuan min nawr bet a, hnai zetah min rawn melh bawk, ka thaw tha ngam tawh lo hrim hrim, "Ka danglam tawh I ti a, mahse i la danglam loh zia hi ka hria a sin Bawihte" a ti thawp sup a, "Min thlah teh" engdang mah ka sawi theilo, a mitah lah ka en ngam hek lo, engvanga hetianga awm hi nge maw a nih le, "Keimah ang bawkin i la danglam lo" a ti leh sup a, ka tal nghek a, min thlah ve mai, "Nilo, i hre sual a nihchu, kan danglam tawh, kan pahnih hian kan danglam ve ve tawh, hun kal tawh a Lalchhandami leh Zonunsanga kha kan ti tawh lo" ka aw chu a khur lek lek, mahse ka hlauh vang erawh a ni lo thung.




"Ka kal tawh ange, chuan heihi hre bawk la ka duh, nang leh kei hian in zawmna hriat reng tlak loh kan lo nei tawh pawh a ni mahna, tunah chuan engkim a danglam vek tawh a, thian kan ni lova, in hmelhriat satliah mai kan ni tawh tih hi khawngaih in theihnghilh tawh suh ang che" ka kalsawn nghal daih bawk. Inchhung ah chuan ka lut a, "I va rei ve, tunge i biak a?" U Mami bula ka thut thlak rual chuan a lo ti a, "Ka thian mawle, thil kan sawi a" min zawt chhunzawm tawh biklo, U Zonuna pawh a rawn lut har lo, kan bulah rawn thu tawh lovin a room lamah a chho nghal daih, ka nu chu room atangin a rawn chhuak a, U Mapuii nen chuan an in biak leh hnuah in lamah kan let a, la hma tho mahse room ah mu turin ka chho nghal, khum a mu chung chuan U Zonuna thusawi chu ka ngaihtuah let, engtinge khatiang khan a chet ngam zawk ni.





Zingah chuan hma takah ka tho a, ka chhungte an la tho lo, ka tlan leh a, ka haw hnuah rawng ka bawl a, U Mami pawh a la rawn tho lo, thawh a hai a ni ngei ang, dar 7 dawn ah U Mami chu hmanhmawh hmel zetin choka ah a rawn lut a, a sam a tawng mawlh mawlh bawk, "Awi.. rawng i lo bawl a nimaw, thawh ka hai chiang lutuk" a rawn ti lut zung zung a, "A ho lutuk siam tur em em pawh a awmlo, a thing a rin theih dawn a, alu ka kang a, lo vil lawk mai rawh aw, ka han in bual ange" choka atang chuan ka chhuak nghal a. Tui in ka chhip atang a rawn leih huh takah chuan ka dai sawng sawng thei, ka in bual zawh chuan bathroom atang ka chhuak a, ka thawmhnaw ka hak fel hnuah inhnuai ah ka chhuk lehnghal. Vawin chu inrinni a ni bawk a, inah nileng in ka awm thei tihna.




Chhun a ni a, room ah movie ka en a, ka nu a rawn lut a, "Mate, I u Mami nen in bazar lawk mai dawn em ni, mamawh kan nei tam leh tawh riau a" a tihchuan ka lo aw ve mai a, ka nu chu a chhuak lehnghal. Bazar tur chuan ka in siam a, ka in peih hnuah in hnuaiah ka chhuk a, U Mami chuan min lo nghak a, ka nu in lei turte min hrilh hnuah in a tang kan in zui chhuak a, bazar kan thleng a, a lum bawk si mi an tam bawk nen thawk a harsa lek lek, chawhhmeh te chu kan lei a, ka nu thil min chah ho lah hi kal kual zel a ngai bawk si, darkar 3 vel bazar a kan awm hnuah kan in lei kim ve thei ta hram a. Ka scooty dahna lamah chuan kan kal a, kan thil lei ho chu seat hnuaiah kan dah a, U Mami hnenah ka thiannu dawr ah kal lawk ila ka tihchuan a lo rem ti ve mai a.




Thawmhnaw dawr a hawng thar a, a in hralh thei ve hle tih an sawi, ka thiannu chuan min lo lawm thiam khawp mai, a thawmhnaw zawrh te chu lei ve turin min ti a, a man chanve chauh in min lei tir dawn bawk, U Mami hnenah chuan a kawr duhzawng thlang turin ka ti a, a hnial viau na in hna ka neih hnuah hian engmah ka la leisak lo tih ka sawi a, a ni pawh chuan a thlang ve mai, keipawh chuan ka kawr tur ka thlang a, ka nu ta tur ka leisak ve nghal bawk, mipa thawmhnaw a zawrh leh zawrh loh ka zawh chuan a zawrh thu min hrilh a, mipa thawmhnaw bik an dahna lamah min hruai a, ka pa tan kamiz ka laksak ve bawk. Haw mai lo chuan kan awm ve ta reng a, in leng a nei neuh neuh thin avangin kan in be tam hman meuh lo, "Kan awm ta ro ro, kawr hi kan ha leh chhin teh ang" U Mami chuan a ti a, nichin ah pawh a ha tawh reng, nalh a ti ngang a nia nge..




"Mate lo kal lawk teh" U Mami chuan inthlak na atang min rawn ko a, ka kal nghal vat, a kawr hak chu min enfiah tir a nichin ah pawh ka en vek tawh, engmah dik loh na lai a awm lo kha a nia, "I in hmeh lutuk engmah dik loh na lai a awm lo hrim hrim, in thlak la kan kal tawh mai dawn nia, a tlai ve tawh bawk sia, ka nu in min lo ngaihtuah leh tawh lutuk palh ang" ka ti a, U Mami pawh a in thlak vat, kalsawn tawh lo chuan ka lo nghak a, a inthlak zawh hnuah kan chhuak a. "Pek kan kal mai dawn a sin" ka mi hmuh te avang chuan ka tawng lai ka tawp chawt a, U Zonuna leh Kimkimi te an ni. An ni pawh chuan min rawn en a, "Aw, in lo kal a, a lawmawm lutuk a nia aw" Peki chuan a ti a, U Zonuna te ka en na atang chuan ka mit ka la sawn a.




"Nidangah kan lo kal leh dawn nia" ka ti leh sep, "Zonuna chu hetah te enge i tih ve a?" U Mami chuan pangai takin a ti a, "Ka thiannu hi thil ka lam pui lawk a" a ti tha ve mai, keimah ringawt chu min la en zui. Kan bag te chu kan la a, pawn thlengin Peki chuan min thlah a, in lam panin kan in khalh haw a, in kan thleng a, kan thil lei te chu kan dah tha nghal mawlh mawlh, khua a lum bawk a, in tleuh turin bathroom ah ka lut nghal, U Zonuna leh Kimkimi ringawt ka mitthla ah a la awm zui, ngaihtuah zui tawh loh ka tum pawn ka thei thak lo. Rawng kan bawl a, ka phone a rawn ri ve chiah bawk, Christ-a ka la a, zaninah rawn len a duh thu a sawi chuan ka hnial lem lo, ka in awmna lai a hre bawk a, harsatna a awm lo turah ka ngai hmiah bawk.




Chaw kan ei kham a, kan chhungkua in tv kan en thap, door bell a rawn ri a, Christ-a a nih ngei ka ring, U Mami thawh a tum chuan ka lo thawh khalh vat a, "Ka thianpa a rawn leng dawn a, ka va hawng ange" tiin kawngkhar lam chu ka pan nghal, nui sangin ka hawng a, Christ-a a ni awkawng lo, U Zonuna zawk a lo ni. Mak ti zetin ka en a, "Min luh tir i tum lovem ni?" a nui suk a, ka awm sawn vat, a rawn haw atang kan inah a rawn la kal miah lo. Ka nu te thutna lamah chuan a kal phei a, ka chhungte chuan an lo be vat, muangchangin ka thu ve a, "Zonuna ve teh mial chu, i rawn lang hlawl a, I lo haw atang vawikhat mah I la rawn kal silo a, ka lo lungawi lo ru hman viau a sin" ka pa chuan a ti a, "Ni e, hnaah ka buai ve bawk nen duh angin ka rawn lang hma theilo a ni" U Zonuna pawh chuan pangai takin a lo ti ve mai a.





Ka chhungte nen chuan an in bia a, U Mami pawh a tawng ve zeuh zeuh bawk, kei erawh ka ngawi reng. Doorbell a rawn ri leh a, ka kal vat, Christ-a a ni, lut turin ka sawm a, midang thutna lamah chuan kan in zui a, Christ-a chu ka pa in a hre tawh a, a lo be vat reng bawk, ka nu te hnenah in hmelhriat tirna te ka nei a, an be nghal bawrh bawrh a, Christ-a lah tawng duh tih takah nuam a tih hmel hle, thingpui lum turin choka ah ka lut a, thingpui tur ka chhuang fel chiah tih ah U Zonuna chu choka ah a rawn lut ve a, tui a in dawn a niang, ka ngaihsak zui lem lo. "Saw pa saw em ni I bialpa chu?" ka bulah a rawn ding a, ka dar ka kan ak ringawt, bialpa nei angin ka lo in sawi tawh bawk si, mahse Christ-a saw chu ka bialpa a ni bawk silo a, aw tiin ka chhang theilo a ni.




"Ka lo leng chu hun lo i ti viau lo maw?" ngeiawm zetin a nui ri suk a, ka melh ralh a, chhan pawh ka chhang buai peih lo, "Zantin ka rawn lang ziah tawh maithei a nia, ngaiah neih I lo tum dawn nia" enge maw a sawi le, "I duh leh rawn leng ziah la, pawi tihna leh pawi tih lohna ka nei hleinem" ka ti ve ngat , ka thingpui chhuan lai chu ka vil chhunzawm nghal daih bawk. Ka bulah chuan a la ding ve reng a, enge maw a hriat tak tak ni, "Va chhuak tawh ta che, enge I la tih ve reng?" nin hmel zet chuan ka ti leh a, "Awle, ka kal ang, mahse saw pa awm chhung saw chuan ka haw ring bik suh ang che" tiin choka atang chuan a chhuak nghal nal nal a, duh chen chen awm se enge pawi, zaklo lutuk mai. Ka thingpui chhuan a so chuan no ah ka thli chhuak a, choka atang chuan ka chawi chhuak nghal bawk.




Thingpui chu an lak theih turin an hmaah ka dah a, Christ-a bulah chuan ka thu thla nghal zat bawk, "Christ I nau chu in sawisel na te a la nei em?" ka pa chuan thingpui in pahin a ti a, "Nei tawh lo, tunlai chu a dam that lai tak a ni e" a lawmawm hle mai, exam a hnai tawh si a, a damlo a nihchuan a tih chhiat phah thei tlat a ni. "I dam maw, in hmuh lohna a rei ve tawh a, Chhanchhani u kha I ni tiraw?" U Zonuna en pah chuan Christ-a chuan a ti a, ka nui chhuak tep a ni, U Zonuna chu a lungawi loh hmel hle, Christ-a zawhna chu chhan tum hmel pawh a pu loza en run run a, a ka a chip hmuk bawk si, ka nuih chhuah mai loh nan ka in sum tang tang a ni. "Ni e, Zonuna leh Matei hi chu unau ang mai an nia, thisen a in zawmna erawh an neilo thung" ka nu chuan nui hak hak chungin a lo ti a.




Thingpui an in zawh hnuah thu dang an sawi a, U Mami'n thingpui in na no ruak vel a sil thung, choka atang a rawn chhuah hnuah mu turin room lamah a chho nghal daih bawk. Dar 9 a rik chuan ka nu te pawh mu turin an room lamah an lut ta a, mi pathum chauh kan awm ta, Christ-a nen chuan kan in bia a, a chang leh min fiam leh zuk zuk zel bawk a, ka nui leh hak thing. U Zonuna lah ngawi rengin a lo thu ve ran a, haw daih mai se, kan awmdan chu chiang zetin min en a, a kut a hum tlat bawk, dar 10 rik dawn ah Christ-a chu haw a tum ta a, pawn thleng ka thlah a, "Nidangah I u awm tawh loh hunah ka lo la leng tha dawn nia, a veng tlat bawk si che a, ka sawi tum pawh ka sawi theih loh phah" nui vur vur chungin a ti a, "Awle.. I lo la leng leh dawn nia" ka ti ve mai, bike in a rawn kal a, a tlan liam hnuah inah ka lut ve ta chiah.




U Zonuna chu a thut dan ngaiin a lo la thu reng a, "Haw i tum lo a mi, a tlai tawh em hi?" thutthleng a thut thlak pah chuan ka ti a, min melh khui a, "Min va ning awm ve?" a ti nghut, "A dik alawm" dawt ni miau hek lo le. Nui sukin a ding chhuak a, "I mizia ka duh na lai deuh pakhat chu zep tit tet awm lova i ri chhuak phawng phawng thin hi a ni" a ti a, ka ner sawk, "Ka haw ange, zan dangah ka rawn la leng leh dawn nia, pawn thleng min thlah dawn lo em ni?" a tihchuan rum zetin ka melh a, "Engvangin nge ka thlah ngawt ang che?" ka ti ram hmarh bawk, "Christ-a I ti em ni, khapa pawh kha I thlah tho a, engvangin nge min thlah loh bik ang?" mit ko san ak chungin a ti leh a, a va han zaktheilo tak, hetiang em em hian a zaktheilo tih ka lo hre ngai miah lo a.




"Christ-a kha chu ka in leng a nihkha, chuvanga thlah ka ni, ka thlah ve nachhan tur che ka hre lo" ka ti leh hmak a, a thaw chhuak ta hawlh, "A tha e, tunah hrih chuan engmah ka sawi lovang, mahse heihi hre reng rawh, nakin ah chuan engkim a la danglam vek ang" ti supin kan in atang chuan a pen chhuak nghal pawk pawk a, ka en mawl tawp ringawt, a thusawi awmzia kha ka hrethiam leh pek tawh lo, hriatthiam tur ten sawi ve thin tur a nia. Kawngka kalh tha turin ka tho chhuak a, kawngka vawn na ka vuan chiah tih in ka kut ah rawn man tu an awm a, ka phu dawrh a, au ka tum lai takin ka ka ah a rawn hup leh a, a haw daih tawh ang chu tih nak a laiin, ka kut chu lek chhuak in ka ka a hup na kut chu ka han sik vak a, a la sawn rang teh a sin.




"I mawl em ni?" thinrim tak chuan ka ti a, tunlai a chet dan hi ka hrethiam lo, a mak sak a ni tawp, "Haw tawh ta che, enge khatianga I rawn chet phut a" ka ti leh hlar a, a nui suk duh lek, "Ka haw dawn alawm, min ning viau mahla keichuan ka ning ve lo che tih hria la, min hmu peih lo viau mahla keichuan engtik lai pawhin hmuh che ka chak tih hre bawk ang che, chuan i chunga ka thiltih kha min ngaidam dawn nia" a ti sup sup a. Chutiang thil a rawn sawi vang cuan tawng mai nachang pawh ka hrelo, vawikhat mah ka la sawi chhuak lova, amah zawkin a rawn sawi chhuak chu mak ka ti deuh a tin ni. "Hun kal tawh a nihkha, theihnghilh tawh ang, chuan sawi chhuak tawh lo la ka lawm viau bawk ang" ka ti sep a.




"Ka tihpalh tak tak a ni, mipa dang nen ka hmuh dun cheu hian hmuh hreawm ka ti thin, chuvang chuan mipa dang hnaih tawh suh" ka thin a sa zak a, "I thu a awm turin ka engmah I nilo, ka duh duh ka hnaih ang, I sawi theih a awm lo, chuvang chuan ka nun ah thu neih rawn tum buai duh suh" ka ti hmak a, kawngka chu ka khar zui nghal daih bawk. Room ah chuan ka chho a, ka hriat tham tawk lek chuan ka phun bul bul bawk. Ka hmai te ka phih zawh hnuah ka mu a, reiloteah ka muhil nghal. Zanlai ah chuan ti harh tu awm ang maiin ka harh kawk a, muthilh leh mai ka tum chuan ka thei tawh thak lo, khum atang tho chhuak in bathroom ah ka lut a, ka chhuah leh hnuah khumah bawk chuan ka thu mu lehnghal, lehkhabu ka khum bula ka dah chu la in ka chhiar nghal mawlh mawlh bawk.




Zingah chuan U Mami'n min rawn ti harh a, ka thawh meuh chuan dar 8:30 a ri tawh, thawh ka hai chiang hle mai, Pathian ni a ni bawk si, kan biakin lah a hla ve bawk nen hmanhmawh zetin ka che zung zung a, keimah vangin ka chhungte pawh an tlai phah, ka pa car in kan kal ta ngawt hlawm a, tan hma in biakin kan thleng hman hram. Inkhawm kan ban chuan kan chhungkaw te in kan haw leh a, chhun thil te kan ei hnuah "Nu uite en tur chuan U Mami nen kan kal dawn nia" ka ti a, ui hi ka ngaina a, mahse kan nei ngai miah lo thung, kan in atang a in hnaih te ah hian ui lak tur a awm a, ka hriat tirh in ka chhungte ka hrilh nghal, an ni pawhin ui vulh chu an lo rem ti ve mai bawk nen thlan tur awm laia lak ka duh a ni.




U Mami nen chuan kan in zui chhuak a, ui note te chu kan en a, an vaiin pali an ni a, an hmeltha hlawm em em lehnghal, a var nalh zet a harh lo ber chu ka thlang a, a neitu te nen kan in be leh a, kan kal dawn tak ah chuan lawmthu ka sawi mawlh mawlh a, kan uite lak chu ka pawm a a chik nger nger bawk, in kan thleng a, ka nu te pawh chuan an lo lawm khawp mai, bawng hnute ka pek chuan a duh hle a, a puar hnuah ka room ah luh pui in ka bual leh bawk. Zanah chuan a hming tur ka ngaihtuah a, nalh deuh ka duh vangin ka thlang uluk hle, a tawp ah poppy tih chu ka thlang ta a, ka chhungte hnenah ka sawi chuan a nalh thu an lo sawi ve bawk, mut naah te chuan ka mut pui a, a la tlang nel lutuk lo bawk nen ka khawngaih reuh hle.




Exam tan ni a nih vangin nidang aiin ka kal hma a school ka thleng chuan naupang ho chuan lehkha an lo chhiar mawlh mawlh hlawm a, tha taka an pass vek ka duhsak a ni. Tan a hun chuan office atangin ka chhuak a, class-10 leh 12 ho exam na ka veng dawn a ni, answer paper tur ka sem hnuah an fill up a, an zawh hnuah ka check leh vek, questions paper ka sem zawh hnuah "In chhang tan thei e, tha taka in chhan ngei ka beisei, hriatthiam loh lai in nei a nihchuan min zawt dawn nia" ka ti a, Miss Rci a rawn lut ve chiah bawk, kan pahnih chuan kan veng a, naupang ho chuan an chhang mawlh mawlh. Naupang pakhat hi a rawn ding chhuak a, ka kal hnai vat, "Miss hemi hi kan la zir miah lova" a tihchuan ka en chuan a, "Awle, a dang kha lo chhang phawt la sir ka lo zawt dawn nia" a thu ve leh nghal mai a.




Miss Rci bulah ka sawi hnuah Sir Rama duty na hmunah chuan ka kal a, ka zawh fiah chuan a tihsual thu a sawi a, mark 5 lai a pu a, mark 5 an hmu sa ang a nihchu, ka let leh hnuah tih sual a nih thu leh mark 5 an hmuh sa thu ka sawi chuan an lawm hmel hlawm viau mai. Nikhat danah an in exam zel a, kar hnih hnuah an zo a, school pawh an chawl leh tawh, answer chu inah ka check char char a ka chawl hman meuh lo a ni, tihsual palh a awm ang tih mawlh ka hlauh avangin vawihnih ka check nawn ngei ngei. Class-12 ho answer paper ka check zawh hnu chuan ka thaw huai thei, keima subject bikah chuan tumah an fail lo, ka lawm takzet a ni, class -11 ho chhan na ka check mek a, pakhat chiah fail a la awm, ka pa hnenah ka sawi chuan a lawm hle a, zirtirtu tha tak ka nih a rin tlat thu a sawi te chuan phur na nasa tak min pe a ni.


Cont....

Click leh comment a that chuan Friday zanah kan dah leh dawn nia aw...