Mikhual Hunter - 11

[Vtei Jahau]

Zomuanpuia's P.O.V




"Hmela i ngawi tawh lo a nih chuan ka that ang che, Jail tan ka hlau emaw i ti em ni?" Police ho chuan min dawm bet ran tawh a, Ngaihdami pa pawh chu an vuan bet ve tho, "Dawt ka sawi emaw i ti em ni? Thudik tak a nih chu ka sawi lo ngaithla rawh u, hmeichhe nun nêm leh zaidam tak anga in hriat mi pawisawi ngai lo anga in hriat saw hmeichhe duk dak lo ber a nih saw, ka nupui thar fapa a lo lem vel chu chu mai nilo in ka customer te pawh a lo chhaih buai fo, a tawpah sâwn a pai ta nge nge a, tu fa ber nge pawh hriat ni ta lo chu keipawh in kut ka thlak ngei, mah se a hnuah a sâwn pai chu ngai ngam leh si lo in a ti tla leh a, chumi hnuah Result nghah chhuanlam in kan veng a a mualpho vangin helamah a rawn tlan chhia a nih hi, kapi leh pu te rilru nat hi ka hlauh vangin a tîrah pawh engmah ka rawn hrilh duh lo che u a nih kha, tunah chuan kut kan thlak ṭhin chhan chu a chiang tawh in ti em?" a tih leh chuan ka che thei tawh lo, eng in emaw min mawlh a, ka ding ngawi reng ringawt.






Kapi pawh chu a thu hriat thar chuan a ṭhawng hle a ni tih hriat zetin hian thawk la deuh kawk kawk chungin leiah chuan a ṭhu nuai a, in ti harh vat in kapi chu ka zu buaipui vat a, kan rilru buai zual a reh hnu chuan Ngaihdami pa an hruai lût ta bawk nen kapi nên chuan haw turin Car lam kan pan a tu zawk mah mah chu kan in be lo.






Mah se Car kan luh hnu chuan Kapi chu a han thaw deuh kawk a, zawi sep chuan "A ni lo ang tiraw" min bia awm pawn a awm chuang lo na in "Dawt bak a sawi lovang, khatiang mihring kha chuan an ham ṭhat nân chuan dawt muhlum pawh an sawi thei ang" tiin kapi chu ka en a, ṭah rin hlau tak hian a scarf in a hmui a hup a, a lo in hnit deuh faih faih a, "Pi a ni lo ang, tunah chuan Ngaihdami khaw lamah haw pui ila a dam ṭhat a a hriatna a neih lêt leh veleh thu kim chang kan hre thei mai ang" ka ti a, kapi pawh chu la bâng chuang lo in a lu a lo bu nghat nghat a.








Car chuan in lam pan in kan tlan haw a, ka rilru ah eng eng emaw chu a rawn lût zut zut a, thil awm ang lo tak tak te ka ngaihtuah a, ka thinrim lutuk chuan steering chu ka hum leh ngawt ngawt a, Ngaihdami pa khân thudik pawh sawi ta tehreng se khawi lai emaw ah khan dawt chu a sawi tel tho ka ring a ni.






In ka luh dawn chuan in piah lama ka mi va hmuh te vang chuan ka ding deuh chawt a, ka en reng ringawt, Apa thusawi te kha thu dik a ni angem? Nge ni a Ngaihdami sawi chhiat a duh vang mai mai ni ang? Ni e ka thu hriat te khân min ti na takzet a ni, mah se khatiang mi kha Ngaihdami a ni theih ka ring phal bawk si lo, a ni lah in a thiamthu sawi turin engmah a hre tawh der bawk si lo.






"Muanpui in lo haw tawh elo?" an ban vai lauh lauh chungin min lo au a, kei erawh in chhang lem lo in ka in her a, inchhungah ka luh san daih thung, tunah rih chu a hmêl ka hmu thei rih lo a ni, nia keimah hi ka in dem a ni, kha leh chen kha ka zawng hmu lo lui a, apa sawi ang kha lo ni tak tak pawh ni se keimah vanga a nun hi dik lo taka kal chho niin ka hria.







Ngaihdami te Aizawl a an pem hnu khân kum tin school chawlh apiangin Aizawlah ka kal ziah a, ka duh a nih phawt chuan ka zawng hmu thei ang, engtin tin emaw kawng a awm leh mai ang, mah se engmah sawi lo a min kalsan vang khân ka lungawi lo a, zâwn chhuah ai chuan hmeichhe dang duh tum in hmeichhe hrang hrang ka kawp kual nasa a, kei aia upa leh naupang te pawh, mah se Ngaihdami dinhmun luah thei tu erawh ka hmu lo thung.





Health Care lam zir a Aizawl a ka awm kum Nikum hmasa khân Milinium Centre bulah a mah ang deuh chu ka hmu ngei a, ka um a, mah se mipui an tam bawk si nên ka hloh ta daih a, kha ta ṭang phei kha chuan ka hmuh leh pawh ka ring tawh lo a nih kha.







"Zomuanpui" ti a ka kuta rawn chelhtu an awm vang chuan ka thil ngaihtuah aṭang chuan ka harh zawk a, ka en vat a, Ngaihdami chu chu min rinchhan in ka bâna vuan chungin a lo ding reng a, min lo nuih var var bawk.





"Ngatinge a mah in i kal tîr a" tiin U Bebeti chu ka en a, Ngaihdami chu pawm mai ka tum a, a lo duh lo nasa, "Aih aih aih, ti khan ka rin theih tîr khân awm zawk rawh ka in sawi a nih hi" a tih takah chuan ka thil tih tum chu ṭhulh in a hmêl chu ka en ta reng ringawt.





"Tui ka'n in lawk" tiin U Bebeti chuan a mit min siai deuh sak chungin choka lamah a kal a, Ngaihdami chuan, "A va mak min rawn kaih ve loh te chuan" tiin U Bebeti chu a au deuh lâng lâng a, keiin dawhthei lo zetin ka lo pawm kâng nawlh thung, "Zomuanpui, i mak emai, ka in sawi zawi ka tih ka tih chu" tiin ka mitah tak chuan a rawn en a, kei erawh in engmah sawi lo in ka lo melh run ringawt a, a ni pawh a ngawi ve deuh hmak, mah se ka rilruah thil dang bawk a rawn awm leh a, Ngaihdami taksa ka deh rual chuan mipa dang in a an khawih vel tur chuan ka mitthla a, ka thinrim lutuk chu ka lo ṭang deuh ṭung thei.






Ngaihdami's P.O.V




Chutia kan in en tlawk tlawk lai chuan thil eng emaw ri deuh bur hian min ti harh zawk a, ka va hawi phei chuan U Bebeti chuan a ke a lo dawm vung vung tawh a, a chhuih a ni ngei ang, "Chhunzawm ru" ti a nui chung a a pindan lamah a bai phei auh auh a, a liam fel hnuah Zomuanpuia nên chuan kan in en leh a, kan nui ta tawp, zo zet chuan ka pindan lamah min pawm chho a, "Naktukah zing kârah kawt velah khuan ka kal kual pui dawn che nia" a tih takah chuan lungawi deuh chuan ka awm ve leh ta mai a, ka khumah chuan min nghat in Zomuanpuia chuan "Doctor ka be tawh a, Naktukah kan khuah kan haw chho thei dawn a nih chu, check up chu online pawn a tih theih dawn tho a, i hmasawn dân hrilh vel kha a ni mai a, khi lam Doctor pawn report min ziah sak thei tho bawk nên" a tih chuan lawm zet chuan ka lo bu nghat nghat a, helai hi nuam lo ka ti tihna ni lo in, kan khua an sawi fo ah hian ka kal châk tawh lutuk a ni.







"A ṭhat hlauh chu mah se chhunah em ni kan haw ah" ka tih chuan a lo bu nghat a, "In sawi zawi kha theihnghilh suh aw, vawiin tlai pawh khân ka kal thei teuh tawh lutuk a nia" ka tih leh chuan nui deuh sak in, "Awle ka tho hma ngawt ang" a ti a, kan nui dun var var, "Kan haw tur chu nuam i vân ti awm ve?" min thlêk ha chunga a tih chuan "Nia a chhan pawh ka hre lo ka phur ve tawp" ka lo ti mai a, thil ka hre chhuak zaw, "Takin, kan khuaah bialpa ka nei em ni? Ti em em a ka phur hi a awmzia ka hre lo" ka tih chuan Zomuanpuia nui hmêl chu vawm bo ang hmak a ni, a ngawi rûn bawk, "Mawh.." ka tih leh chuan "Nei lo, nang chu lerh pawh i lerh ngai lo, Patil ang in i khawsa ṭhin" a ti hluk hluk a, a thinrim deuh niin ka hria, a cute takzet.








"Engnge? Thil nuihzatthlak engmah ka sawi lo, tinge i nuih?" a ti bul leh hmuk hmuk a, chu te hlei hlei chuan ka nuih a ti za a, ka nui chhuak ta nge nge, "Ngaihdam" a rawn tih takah chuan ka hmui ka chîp hmak a, ka hmui chu ka pet ren rawn a, Zomuanpuia chu in thlahrung deuh in ka en a, a lo la tum hmak tho, "I thinrim khân i cute a" ka tih chuan a ner deuh nawk, "Ka thinrim lo" a ti a chhuah daih a la tum zui.







"Mah niin ka awm peih lo" ka lo ti vat a, Zomuanpuia chuan "Bebeti ka lo ko a" a ti a, a chhuak nghal daih, he misualpa hi chu aw, mi hi a hrethiam duh lo nge a hrethiam lo tak tak zawk pawh ka hre lo.








*Time Skip*






"Tho rawh le" ti a ka hmaia beng thek thek tu an awm vang chuan ka harh riai riai Zomuanpuia chuan min lo en reng tawh, "I thawhna a rei tawh êm?" tiin ka puan chuan ka in lu khuh lehnghâl daih a, "Darkar chanve ka en char char tawh che" a ti a, ka puan chu a rawn hlip leh thawk, "Tho vat rawh in sawi zawi duh tu zawk i nih kha, nangmah vangin ka tho hma a" a ti a, mah se ka tho duh lo in ka puan chu ka la dap ta tho a, mah se ka in rin hma hauh in ka kâng nawlh a, ka meng nghal kawk, Zomuanpuia chuan min lo pawm a, ka kawnga a dawmna chu a hit mem mem hian ka hria, chu chuan a ni ngei ang min ti harh kawk ni.







"Hei i dul te a kiar vek tawh a lawm" tiin ka dil chuar deuh lai a khawih chu a melh zauh a, zâm chhe zet chuan a kut chu ka sik nghek ringawt a, a ni lah a la nui huk zui, "In thlak rawh le" zaidam zet a tiin chhuatah chuan min in nghat a, a zaidam ve lutuk chu mak tak a ni, ka theih tawp a rang chuan ka inthlak a, Zomuanpuia chu hnunglam hawiin a lo ding khur thung a, body guard te pawh a ang zawk mah.







"Vawiin ah chuan kan haw leh thei lo ang" ka in thlak zo tih ka hrilh rual a rawn hawi pah chuan a ti ta daih, "Tinge?" ka lo ti vat, "Kan motor biak kha a remchâng lo a, naktukah zawk haw kan ngai dawn a nih chu" a ti a, Naktuk a ni tho bawk a tiin lung lohah ka la lem lo, tukin ka tho chu ka tho harh ang reng riau a, ka ke pen pawh chu a zâng chho viau a, nuam chu ka ti takzet, Zomuanpuia bulah erawh la kal ṭha hleithei miah lo ang in ka awm a, lai chhe viau mah ila, min pawm hian min dahthlak hnuah nuam ka ti veng veng zel a, chu thil chu ka thlahlel a ni.







Kan in sawi zawi zawh chuan ka pindan lamah min pawm chho leh a, A Patea leh Nutei te, kapi te mitmei pawh ka veng em em tawh lo, an ni pawn ngaiah an nei tawh a niang, thingpui in in an lo ṭhu khawm ṭhap a, mah se kan in pawm chu en pawh min en tawh lo.






"Duati zanin kha" tiin ka pindana kan lut fel chiah tihah U Bebeti chu thawh phan hmel zetin a rawn tlan lut ve a, mah se Zomuanpuia a hmuh rual erawh in a ngawi nghal hmak thung, nui lui sâng chung hian engmah sawi zawm lo a chhuah a tum a, Zomuanpuia chuan "Lalsangkim" Zomuanpuia aw ah chuan dawhtheihna a neih loh zia a lang, U Bebeti chu a in puan mai hlau in ka lo ṭawng khalh vat, "Zomuanpui, i u zawk a nih kha aw, a hmingpum te in i koh a" tiin ka lo chhan a, kut zaizirin chhuak vat turin ka signal nghal a ni pawh rang zetin a tlan chhuak, a thil sawi tum kha hre lem lo mah ila zan a tih vang khân ka ngaihruat thiam a, chu chu Zomuanpuia hian a rem ti dawn lo nasa lutuk.







"Engnge zanin ah tih in tum?" a mit ka en chuan ka khur thei hial dawn in ka hria, a mit ti zîm sân chuan min la melh char char zui, "Ihh" ka ti dêk dêk a, "Ihh ti lo khan sawi chiang rawh" a ti leh hmuk, a thinchhe lutuk hi a lawm ka nin, a nau te pawh ka ang, "Spicy ei kan tum a" ka ti a, awih loh hmel zet a min en vang chuan sawi tur dang ka ngaihtuah leh a, "Ih a hâng sia ka la dam ṭha si lo a, ei i phal kan ring lo a, mah se a rûk a ei kan tum a" ka ti a, a hmelah engmah a lang chhuak in ka hre lo, a awih nge awih lo pawh ka hrethiam lo e a.







Vanneih thlak deuh in a ṭawng leh hma in a phone a rawn ri hlauh a, a phone screen chu a en vung vung a, ka va bih ve a, Es-a tih a niin ka hria, rang zet a a phone a lâk sawn daih vangin ka hmu ṭha hman lo, pindan varandanah s chhuah pui zui daih a, an ṭawng pawh engmah ka hre pha lo, a chhuah veleh U Bebeti chu a rawn tlan lut a, Zomuanpuia bih zawk zawk chung chuan, "Vawiin ah in haw leh dawn lo a, zanin ah kan kal mai dawn mi?" a ti a, a hmêl a Zomuanpuia a hlau hmêl chu ka khawngaih takzet, dik tak chuan keipaw'n ka hlau, ka dam lo a engtin vak mah min tih ka rin loh vanga tih luih tum ka ni, "Aw ka kal ve chhin chak bawk sia" ka ti a, kan nui dûn var var a, "Nichin khân eng chhuanlam nge i siam a" a tih laiin Zomuanpuia a rawn lut thut a, chang fel fawl in, "Spicy ei a la ṭul lo, Ngaihdami a la dam ṭha lo a, bakah nangpawh i pum a chian loh thu i sawi a i rak reng kha" a rawn ti a, U Bebeti'n min rawn en vat a, ka lo nui tawp, ka chhuanlam siam chu a hrethiam turah ka ngai.







"Aaaa, awle, a nih chuan Duati te thlah nan chhang kan ei mai dawn nia" a ti a, kan in en leh a, za lo deuh chuan kan nui dûn ta ringawt a, Zomuanpuia chu a phone kheuh mawlh mawlh in a chhuak ta daih, "Mah se Zomuanpuia hi in tlan siakna ah a tel ve ṭhin i tih kha, a rawn kal ve palh a nge aw, ka duh miah lo a nia" ka ti a, U Bebeti chuan a lu thin mat mat pah in, "A kal tawh ngai lo, lungngai suh" a ti a, zâna Bike in tlan siakna a kal tur chuan ruahmanna kan siam ta sauh suah a, kawr pawh U Bebeti'n min hawh tîr dawn a ni.








Nileng in Zomuanpuia chu a rawn lang leh ta lo a, zâna ka in fit loh ka hlauh em vangin ka pindan ah chuan keimah in ka vei sek a, U Bebeti chu ka bulah awm reng mah se a puih ka duh lo a, a chhan pawh eng pawh puih ngai reng nih ka duh loh vang a ni, zanah kan chhuak ru dawn lehnghal si a.






"Zanah dar 10 ah ka ṭhiante pahnih in min rawn lam dawn a nih chu" a phone a message type mawlh mawlh pah in a ti a, ka lo bu ve nghat nghat, "Zomuanpuia hian min ringhlel angem?" ka ti phawng a, a bulah chuan ka ṭhu thla ve nghal a, "Ka hre bik lo, a fing ker kawr sia e, awm lo la chu ka kal lui ngam lovang, a naupang zawk a ni nang in eng eng emaw kawngah hi chuan ka u zawk ang hian a awm a, ka ṭhat na turin thil a sawi reng ṭhin" a tih chuan ngaihnawm ti deuh hian ka lo ngaithla a, U Bebeti chuan "Enteh Zomuanpuia hi i duh em?" a ti hlawl a, ka phu deuh zawk thei, chhan pawh ka chhang mai thei lo nghe nghe.









"In in duh ve ve ni chuan ka hria a ka en che u hian, mah se nangmah zawk hi ka hrethiam chiah lo che" a tih chuan "A nih Zomuanpuia chu i hrethiam tihna maw?" ka lo ti vat a, "Hrethiam bik chiah lo e" a ti leh daih lawi a, "Dik tak chuan ka duh in ka hria, thinchhe viau mah se a bula awm hi nuam ka ti tho" ka tih chuan U Bebeti chuan "Ka ring rengah" a ti hluai a, a hlim em vang chuan keipawh ka nui ve ringawt, "In in hmeh dawn lutuk" a ti a, mah se a hmelah chuan eng emaw hriat chhuah nei ang hian a rawn awm a, a nui hmêl a bo ngal riai riai, "Mah se Zomuanpuia hi khanu kha a theihnghilh tawh angem le" a ti a, a thu tak em vang chuan ka lo en tawp ringawt, "Kum 17 a nih a Aizawla a rawn zin hmasak ber khân rei ve deuh a rawn châm a, kan in kawm nel hman hle, mah se a mah ah khan khawhar rukna a awm tlat a, a tîr chuan a chhûngte a ngaia a lunglengah ka ngaihsak mai a, mah se a rawn in nawn leh in min hrilh a, a tet lai aṭanga hmeichhe duh deuh a nei a, mah se a kalsan a a la theihnghilh thei lo tiin, mah se theihnghilh tumin a bei a bialnu hrang hrang a nei ṭhin, anu pawh in Chatuantawi-a a tih phah hial a sin" a ti a, a sai pah chuan a nui a kei erawh ka thu hriat vang chuan ka nui ve thei lo, Zomuanpuia'n hmeichhe duh deuh a nei a nih chu.





~~~~~~~~~~~~~~~~~~~~~~~~~~~~~~


"Zanin chu ka lêng chhuak dawn a nia aw, naktukah kan haw dawn sia, ka ṭhiante tlawh kual ka duh a" Zomuanpuia'n chaw ei laia a tih chuan U Bebeti nên chuan kan in melh nghal zawk a, "Khaw nge i len dawn?" U Bebeti chuan min melh zawk zawk chungin a zawt a, kan awm dân chu min chîk ngat se eng emaw thil tih tum kan neih an ring thiam ngei ang, "Engnga tan nge i tih?" Zomuanpuia chuan a ti leh hmuk tawh a, a patea pawh in, "Dik chiah, tlangval an nia, nula te pawh rîm an duh ve thei a" tiin a lo nui hawk hawk a, damdawiin ka chhuah hnu a a vawi khat nan dawhkân ah chaw ka ei chhuak ve a, ka lai ṭut bawk nên ka kham hma takzet.




"Duati i puar hman em ni?" tiin Zomuanpuia Nutei chuan min lo au zui vat a, "Aw ka puar lutuk, in siam tui si" ka lo ti vat a, U Bebeti pawh a kham ve nghal a, a dawhkân ti fel vel chu ka pui ve a, midang ho in min rinhlelh loh nan chuan ka kal bai lui sauh sauh a, U Bebeti nên kan awm fal erawh in nui kar kar in pangngai deuh in ka kal ve leh mai a.








Zan tîr aṭangin U Bebeti pindanah kan in khung a, kan riak dûn dawn kan tih vang a ni, bakah U Bebeti pindan aṭang hian chhuah rûk a awl ber bawk si a, chuan zan tir aṭanga dar 10 nghah chu rei duh tak a ni, U Bebeti nên pawh kan in thlak kual nasa hman hle bawk.







"A rawn thleng a nih chu" U Bebeti'n phone a hman zawh chuan chhuak ru turin a tuk verh lam chu kan pan a, U Bebeti'n make Up min hnawih ve bawk nên hmêlṭha chu ka in ti ve reng mai, "Eheu, in va chhelo dûn ve" U Bebeti ṭhiante awmna kan thlen chuan an lo ti a, mipa pahnih an ni a, bike ve ve an keng bawk, mah se a lawn chu ka huphurh takzet, "Shhh, in ṭawng ring lutuk" U Bebeti chuan a ti hlak a, a ṭhianpa pakhat bike a ka lawn dawn chuan min lo pui a, ka huphurh ang ai chuan a lo harsa lem lo.









"I hmelṭha hle mai" kan tlan chhuah hma chuan a ti a, ka chhang lem lo, eng pakhat mah a awm lo a, ka hmêl pawh a hmu thei dawn lo hrim hrim a, ka awih lem lo hle, "Bethsy nau maw i nih" a tlan laklawh ai chuan a rawn au lawng lawng a, "Aw" ka lo ti ve mai, "In chhelo unau hle mai" a tih chuan ka chhang tawh lo.






Rei fe kan tlan hnuah khaw pawn fe a Bike in tlan siakna hmun chu kan thleng a, mi pawh an lo tam reuh khawp mai, "Awi ka ngai tawh lutuk" U Bebeti chuan a ti hluaia kan in en a, kan nui dûn hak hak, "An in tlan siak tak tak phei chu a hmuh nawm thei lutuk, mah se Accident an awm in a rapthlâk ve thung" U Bebeti chuan hawi kual ruai chungin a ti a, "Tinge a?" ka lo ti vat a, U Bebeti chuan "Chhelo tih theih deuh ka nei a, a awm ve em ka zawng kual?" a lo ti sam et a, keipawh chu ka hawi kual ve nghal ruai bawk, mah se chutia ka hawi kual chuan mipa pakhat min lo en reng tu hi ka va hmu a, reng zet chuan ka hawi sâwn nghal a, mah se a ni erawh in min lo la en reng a ni tih ka hre thung, nuam lo chu ka ti rilru hle.







"U Bebet, hmun dang deuh ah kal ila" rei ve hnu pawh a chupa in min la en tlat vang chuan ka ti ta nge nge a, U Bebeti hrilhhai hmêl zet a lo hawi chu mipa min en reng tu awmna lam chu ka kawh hmuh ve a, a ni pawh in a lo hrethiam ve mai, "Awle, kal daih ang" a ti a, kan awmna chu kan sawn a, in tlansiak an ṭan tawh tur thu sawi a an rawn au tak lang lâng ah chuan in tlan siak lai hmu chiang thei tur ang ber chuan a hma lamah kan ding a, kawng puiah chuan bike 10 dawn an rawn in tlar ta pât mai, mah se nghah nei ni awm tak hian ṭan an la tum mai hauh lo, chung in tlan siak tur zîngah pawh chuan nichina a min en reng tu kha a lo ding ve reng tih chu ka hmu a, a helmet khum chung pawh chuan min lo bih leh dâk dâk ṭhin chu ka hmu, a hmêl hrechiang thei lo mah ila a kawr leh a pian vel aṭangin ka hre thung.







Chutah Bike nalh fel hian helmet full face khum mipa pakhat hi a rawn thleng thar a, bike pakhat lênna âwm an lo dah awlah chuan a rawn ding deuh chat a, a pian chu a nalh hle a, ka hriat hnu a ang hle bawk, ka hnung aṭangin U Bebeti chuan "A ni thei lovang" a rawn ti a, "Tu maw?" ka lo ti a, U Bebeti star pa kha a nih ka ring, "Zomuanpuia a van ang ve" ti a an phun deuh nak nak chu ka hria a, U Bebeti chuan s mitmeng a tlanchhe nghal dui mai, "Hawh Duati haw mai ang, Zomuanpuia a niin ka hria" a ti a, min kai in min kal pui mai a tum a, mah se vawikhat tal Zomuanpuia in tlan siak lai ka hmuh chak em vang chuan U Bebeti chu ka pawt lêt a, "An rawn thlen leh dawnah haw mai ang, a in tlan siak lai ka hmu ve chak a lawm" ka tih tak tlângah chuan min pawm pui ve leh a, mah se a hmasaah kan ding ngam tawh lo.








Count down an nei a, a vawi thumna ah chuan an Bike chu an khalh chhuak nghal fua a, Zomuanpuia ringawt chu a tlan liam thleng ka lo en a, chhelo ka ti zual takzet, ka duhna pawh a pung thûr thûr niin ka hria, "A chak angem?" ka ti a, U Bebeti chuan chhuan hmêl fe hian, "A chak lo ngai lo" tiin an rawn tlan pheina tur kawng chu an lo melh rân a, an in tlansiakna hmun hi danglam taka siam a ni a, kawng a kual in a awm a, in tlansiakna tur liau liau a siam a ni tih a hriat reng a ni, "Saw le an lo lêt e" rei vak lo hnuah chuan U Bebeti'n a ti a, mah se tu zawk mah chuan kalsawn kan tum lo, a hmasa berah Zomuanpuia a rawn tlan a, Finishing line a rawn pelh rual chuan a helmet glass chu a ti chho a, muangchanga tlan chungin chiang zet chuan ka mitah min rawn melh a, keipawh in ka lo en ve reng.







Chhunzawm leh tur.