Perfect (Chapter-2)

[Rebec Nunziri]

Chapter-2



Lalchhandami POV




Naktuk mai hi U Zonuna lo haw hun tura an sawi chu a ni ta, Nu Zualtei chu a phur tawh hle a, kan inah a rawn leng lut ngun viau bawk, school ah ka kal reng a, naupang te an fel bawk nen nuam ka ti hle, exam a hnaih deuh tawh avangin karleh atang hian extra class kalpui ka tum a, naupang hovin an peih ka rin loh tehlul nen rin ai takin an lo phur a, a lawmawm takzet a ni. Shool atang ka haw a, ka nu in min lo be vat, "Mate, naktuk kha Zonuna lo haw hun a nihkha aw, chaw ei khawm an tih kha, inrinni a ni tho a, nangpawn va pui ve la aw, an buai viau maithei a ni, i pa nen chhuah kan ngai bawk si a, kan pui hman dawn bawk silo, tlaiah kan lo kal ve thei chauh ang" a ti a, ka phur lo hle, mahse aw ka pawh ve ta tho a, room ah inthlak turin ka chho nghal daih bawk.




Zanah chuan Nu Zualtei te inah U Mami nen kan kal a, an in buatsaih nasa khawp mai, an fapa neih chhun a lo haw dawn bawk a, a awm ve reng, Nu Zualtei phur zia chu a hmel ah a hmuh hmaih theih loh, kan inkar an hre vek ka tih tawh kha, kan in then pawh kha an nupa in pawi an ti hle, kan in then chhan tak chu an hrelo thung, ka thiante leh U Mami bakin an hrelo. Kan haw meuh chuan dar 10 a pel tawh, room ah lutin ka in tifai a, ka mu nghal, ka mut erawh chhuak lo tak a ni ringawt, ka in let tawn sek a, U Zonuna ringawt chu ka rilru ah a awm, ka tan chuan theihnghilh mai a harsa ve bawk a ni, ka sawi tawh ang khan kan tan chuan a hmasa ber a ni a, theihnghilh mai mai theih a nilo, kan thlalak leh a phone no thlengin delete vek tawh mahila ka hriatreng na erawh hi chuan a nawh reh thei chuang silo hi a pawi lai ber a ni.




A kal dawn a a thusawi te kha ka ngaihtuah let a, engmah tih hlawhtlin a neilo, kum chanve em pawh kan awm hran hma in hmeichhe dang nen in zawmna neiin keichu min ngaihtuahna nei lek lovin na takin min siam a, ka hun tawn tawh te khan chhel takin min siam bawk, ni e, U Zonuna chu hmu leh pawh ni ila kan inkar ah engmah a awm tawh chuang lova, hmuh hreh nachhan tur ka nei in ka in hrelo, thil ti sual tu zawk ang maia keiin ka hmuh hreh chhan tur a awm lo ka tihna a nihchu. Zing khawvar dawn ah chuan ka muhil ve ta chiah, ka nu in min la rawn kaitho zui, phak chuap in ka tho a, inhnuai ah chhuk in choka ah ka lut tlang a, "Nizan i mu tha thei maw?" U Mami chuan a lo ti var a, "Mu tha e, mahse mut ka kham lo deuh" ham bai bai chungin ka ti a, a lo nui hak hak a.





Ka nute chhuah an ngaih vangin chaw kan ei hma a, U Mami nen chiah kan awm hnuah in kan tifel leh zung zung a, U Zonuna te in lamah chuan kan kal nghal, an lo buai hle. Chawhnu lamah U Zonuna chu a lo thleng dawn a, Nu Zualtei te nupa chu I Zonuna hmuak turin chhuah an lo tum ve mek bawk, "Mate, lo kal ve ta che" Nu Zualtei chuan a ti a, ka lo hnial vat, an kal hnuah thiltih ngai ang ang chu kan ti ve ta zung zung a, in thenawm kan nih mai bakah kan pate ve ve hi khaw khat chhuak an nih vangin kan chhung hnih chuan kan in pawh hlawm viau. Dar 3 a rik chuan tihtur ang ang kan ti zo tawh, upa deuh hovin rawng an bawl a, thenawm khawveng leh chhungkhat laina hnai te nen chaw ei khawm an rawt a, mi pawh an tam viau, ka nute pawh an lo thleng a, midang te nen chuan an in kawm khawm a.




"Zualtei nen kan in be zo chiah a, minute 5 hnu ah an rawn thleng tawh ang" Nu Ramngheti chuan a ti a, ka thin chu a phu rang leh ta zaih zaih hle mai, ka kut chu ka sik neuh neuh a, haw daih mai te ka duh, U Mami chuan ka awmdan chu hrethiam takin ka kutah a rawn vuan a, "Hahdam tum rawh" a ti sep a, kil khatah ngawi rengin kan thu a, pawn lamah thawm a awm takah chuan an chhuak sup sup a, ka thutna ngaiah chuan ka la thu reng, ka sam te chu ka khawih sek a, hetiang em em hian mi ka hmu hreh ngailo, an rawn lut hlawm a, U Zonuna ngei mai chu inchhung ah a rawn pen lut a, ka lo en reng, a hma ai khan a hmel a tha a, a lang pa sawt bawk, chuan a upat hmel ve ta deuh, thutthlengah chuan a thu a, min la hmu ve lo, kan thut na lai hi a hnung deuh vangin min hmu mai thei lovang.




Puitling ho chuan an be reng a, ani pawh chuan a chhang ve sup zel a, a hmaa ka hriat thin Zonuna nen kha chuan danglam tak an ni ringawt, a hma kha chuan mipa tawng duh leh fel tak nui reng thin a ni a, mahse tunah erawh mipa tawng tlem leh nuih hreh tak a ni tawh, an bia te a nihloh chuan a tawng ngailo. Pa Ropuia chu a rawn ding a, thu te a sawi a, tumah an tawng tawh lo, U Zonuna ringawt chu ka lo en a, hmalam chu a en ngur ringawt, hawi sawn pawh a tum chuanglo, a hma lutuk tawh lo bawk a, chaw ei an rawt chuan U Mami nen tho in kan che ve nghal sawk sawk a, U Zonuna chu a room ah a lut thung. Naupang zual deuhin chaw an ei hnuah kan ei ve ta chauh a, tam erawh ka ei theilo thung, U Mami nen kan awm dun deuh chawt a, ani hi awm lo nise ka haw daih tawh ang.




Chaw ei tur a rawn kal te chuan an ei vek tawh, nula leh tlangval te ka che a, thleng kan sil zo a, hmun vel an lo tihfel tawh avangin eng vak tih a ngai tawh lo, a hma tawh lo bawk nen haw chu kan tum ta a, sawi lova haw tawp chu thil mawi a ni bawk silo nen ka nute awmna lamah ka kal a, mahse ka mi hmuh avang chuan ka tawp chawt, let leh mai ka tum lai chuan ka nu in min rawn ko a, pawi ti lutuk in ka mit ka chhing sawk a, chet mai nachang pawh ka la hre chuanglo, U Mami chu rawn kal vatin ka kut ah a rawn kai a, ka nute lamah chuan min kalpui a, "Zonun hei Matei pawh hi a nula i ti ve tawh viau lo maw, in in hmuh lohna a rei ve tawh bawk si a" ka nu chuan a lo ti zung zung a, U Zonuna lam chu en pawh ka en ngam lo, ka taksa chu a za deuh mer mer mai, "Zonuna chu a hma aiin i puitlin hmel tawh zawk a nihkha" U Mami chuan zang vah in a ti a.




"Tunah chuan a pa school ah hna a thawk ve tawh a, Zualte kan fate hi an lo puitling tawh hle a nihhi tiraw, hna te an nei ve tawh chu a nisia" Ka nu chuan nui hak hak chungin a ti a, "Ni e, naupang te emaw kan tih laiin an lo puitling der tawh" Nu Zualtei a ni, ka awm chu a nuam tawh lo hle haw daih mai ka duh, ka hawi chhuak ngam lo hrim hrim, U Mami kut chu nghet zetin ka vuan a, ka taksa mur deuh ar ar danah U Zonuna chuan min en reng tih ka hrechiang hle bawk, engmah lah chu ka sawi ngam der mai silo, "Nute, kan lo va haw mai dawn asin, Matei hi naupang test paper check a la ngai bawk sia" U Mami chuan a ti ta hlauh a, "Aw... lo va phei rawh u, keini pawh kan awm rei tawh lovang" kawngkhar thleng chuan Nu Zualtei'n min thlah a, lawmthu a sawi mawlh mawlh bawk, in atang kan chhuak tur chu ka hawi let leh a, U Zonuna chuan min lo en zui reng chu niin ka hawi sawn rang khawp mai.




"U Mam ka lawm lutuk ania aw" kan in lamah kan kal hnu chuan ka ti a, "I awmdan kha ka hrethiam alawm" a lo ti mai a, inchhung ah kan lut a, "Zanin chu riak dun leh ila" ka ti sep, "Naupang ho test paper i check dawn lo a mi?" ka nui hak a, "Nizanah ka check nual tawh alawm, naktuk ah ka check chhunzawm mai ang" ka ti a, a room ah a lut leh phawt a, keipawh ka room ah lut in ka lo in thlak a, U Mami a rawn luh chuan mu turin ka lo in peih diam tawh. Khumah chuan mu in kan titi a, ka class naupang te chanchin chu ka sawi mawlh mawlh a, an chanchin lo sawi tur dang vak ka hrelo. Ka class a hmeichhe pakhat chanchin chu ka hrilh a, a hma pawhin ka sawi fo tawh, school a rawn kal khat a, a mizia ka chik a, lehkha thiam thei tur tak a ni mahse eng emaw harsatna nei a ang ka ti thin.




School a rawn kal hi chuan naupang dang aiin ka chik thin a, hmani phei kha chuan a kut ah hliam thar lam tak ka hmu a nihkha, ka han zawh lahin 'ka tlu a' a ti mai a, mahse khatiang hliam kha tluk na vang a niin ka hre theilo thung, "Chutiang te chu engtia han tih chu nge ni ang, an chhungkua ah harsatna a tawk te pawh ani thei a" a ti ve sep a, chuchu ka ngaihdan chiah pawh a ni, eng emaw hlauh nei a ang thin ka ti a, han zawh chian dawn lahin mi chhungkaw chanchin a ni bawk si, ka pa hnenah ka la sawi lova, remchang ah ka la sawi ang, ka nu te lo haw pawh chu kan hria a, naktuk inkhawm a ngai bawk si, a hma lutuk tawh lo bawk nen kan muhil ta a. Zingah chuan U Mami aiin ka harh hma ve tlat, ti harh lova thawh ka tum tehreng nen ka che vel ah chuan a harh ta tho, a room ah in tifai turin a lut a, keipawh bathroom ah ka lut tlang nghal.




Chaw eikham ah inkhawm turin ka in siam a, kan hman hma deuh bawk nen kan chhungkua chuan ke in kan kal a, Nu Zualtei te nupa nen kan kal ho, U Zonuna erawh ka hmu tel lo thung, thusawi tu in thu a sawi mawlh mawlh lai chuan kan hnunga nula thu thenkhat te chu an titi char char a, thusawi pawh chu an ngaithla lo, an la tawng ring em em lehnghal, mak ka ti thin, biakin chhungah kan awm tawh chuan kan rilru chu hmunkhat ah chauh a awm turah ka ngai a, Pathian kan zah lo mah mah ka ti thin. Inkhawm banah sawina hun a la tam lutuk, chuti chung chuan ka sawi loh chuan ka thi mai ang ti ni awm fahran a inkhawm laia an han tawng char char thin te hi ka huat zawng tak a ni, titi an duh a nihchuan inkhawm lovin titi mai se an inkhawm in hlawk na engmah a nei chuanglo bawk a ka ti mai a, ka ngaihdan a ni a, a tha ber em tih phei chu ka hrelo.




Inkhawm kan bang a, chawhnu kan tlang nghal thin avangin biakin atang chuan kan chhuak lo law law a, chawhnu kan inkhawm ban hnuah U Mami nen kan in zui haw a, ka pa committee naah a tel a ngaih vangin ka nu in a thiante ina leng pah in a nghak dawn a ni. In kan thleng a, khua a lum bawk nen inthlak turin room ah kan lut tlang nghal ve ve a, ka thlan a tlak nasat deuh vangin inbual turin bathroom ah ka lut nghal, bathrobe ha in ka chhuak a, ka thawmhnaw hak tur ka la chhuak a, ka sam ka hruk mawlh mawlh lai chuan ka room veranda lam chu ka hawi a, ka phu chiang teh a sin, U Zonuna chuan min lo en reng chu niin chet mai nachang pawh ka hrelo, ka hmu tih a hriat chuan a nui suk a, ka awmdan chu a lai zo vek, bathrobe ka ha tawp a, a hnuai ah engmah ka la in bel lo zui, amah lah chu chet sawn a tum lo tih hriat takin min la en ngar bawk a.




Towel chu khumah ka theh thla a, rang zetin verada a ka parda chu ka ti tla a, min hmu thei tawh lo, ka awm ka dawm vang vang a, kan room hi a in zawn chiah bawk si nen parda zar ziah a ngai tawh dawn a nihhi. Ka thawmhnaw te chu ka ha sawk sawk a, room atang chhuak in inhnuai ah ka chhuk nghal, U Mami chuan eitur a lo siam fel vek tawh, kan ei nghal a, "U Mam tihtur em em a awm tawh lo bawk a, kan leng dawn mi?" ka ti a, "A pawi miah lo, mahse a rei chi lovang aw, zan inkhawm leh a ngai dawn sia" kan phur dun ngei mai, kan thil ei na vel chu keiman ka tifel a, in atang kan chhuah hma in ka nu ka be bawk, kan veng park ah kan kal dawn a, a hla ve deuh bawk nen scooty in kan kal a, U Mami bulah khalh ve chhin tura ka tihchuan min hnial nasa ngei mai, nikum khan khalh a zir ve a, a thiam thei thlawt lo, a beidawng thak a, zir leh tumna em em pawh a nei tawh lo a nih hmel.




Park kan thleng a, midang pawh an lo tam khawp mai, "Naktuk zan kha aw, inkhawm lo mai ang, kan kal loh chuan Sawmtluanga a thinrim leh nasa dawn a nia" thutthlengah chuan kan thu dun a, thla te kan la a, ka thiannu Lalsangi nen kan in be bawk, a ni hi chu bialpa a neih atang khan kan in be khat em a, min hriat chhuah chiah in min rawn be thin ka ti mai. Dar 3 velah in lamah kan haw a, ka nute pawh an lo thleng tawh. Zanah chuan kan inkhawm leh a, inkhawm banah midang te nen kan in be khawmuang leh a, U Mapuia chu rawn kal hnaiin min rawn bia a, a ni hian min ngaizawng a, ka duh lo tih hre mahse a beidawng duh lo, a hmel te hi ka hmu peih lo, kan inah lah hian a leng zing em em lehnghal, U Mami hian ka ngei zia a hria a, min lo biak te chuan a lo nui kur kur a, rum zetin ka va melh ringawt.




In kan thleng a, ka room chu a uap churh mai, tukverh te chu ka hawng a, naktukah test paper sem ka duh vangin ka la check zawh loh ho chu ka check leh zung zung a, rin ai takin an ti tha, ka check tawh te ah fail an la awm lo hrim hrim, a chanve vel chauh ka la check a, check tur ka la nei tam hle, zanin chu ka meng rei deuh a ngai dawn a nihhi. A ti tha zual 5 te hnenah present pek ka in tiam tawh vangin chocolate ka lei lawk sa vek tawh bawk, ka check zung zung a, sana ka en chuan dar 11:30 a lo ri der tawh, ka hnung a na thum tawh mai, ka chawl a, ka zi mar ar ar mai. Check leh ka tum chiah chu tu emaw in min en ang tlat a ka hriat vangin veranda lam chu ka hawi a, U Zonuna bawk chu ka hmu leh, phone a bia ni awm tak a ni, tawng mawlh mawlh chungin ka lam chu a rawn hawi reng a, ka en rei duh loh avangin ka paper check turah chuan rilru ka pe ta zawk a.




Ka check zawh meuh chuan dar 1 a ri hnai tawh, ka mut pawh a chhuak tawh hle, bathroom atanga ka chhuah hnuah khumah ka mu nghal, ka in let a, U Zonuna chu a room veranda ah a lo la awm reng chu niin ka room lam a rawn la hawi reng a, chiang takin min hmu thei bawk, parda zar leh mai ka tum deuh uk na in a lum bawk si, bakah ka tlawm la ve deuh bawk nen engah mah ngailo ang chuang awm in mit ka chhing a, ka chau ve deuh aniang ka muhil zui nghal mai bawk. Tuk dang aiin ka tho tlai deuh a, inhnuai ah ka chhuk chuan U Mami chuan rawng a lo bawl zo vek tawh chu niin chaw kan ei kham hnuah room ah lutin hna kal turin ka in siam a, ka zawh hnuah test paper te chu ka tifel leh a, theihnghilh ka nei in ka in hrelo, scooty chahbi chu keng in room atang chuan ka chhuak nghal.




Scooty la chhuak tura kan garrage lam ka pan chu U Zonuna an ui lianpui nen an in fiam lai chu ka hmu fuh a, kawr a ha bawk silo nen a taksa nalh zet chu en nin a har viau mai, het.. enge maw ka ngaihtuah ni, scooty chu ka la chhuak a, school lam chu ka pan nghal, class-12 room ah chuan ka lut a, test paper ka sem hma chuan fail an awm miah lo thu te chu ka sawi a, test paper ka sem mawlh mawlh a, Laltlanchhuahi hming ka lam chuan a lo kal loh thu in min chhang a, a ni hi U Mami hnen a a chanchin ka sawi thin kha a ni, a ti tha ber a, a lo kal loh vangin a test paper pawh ka la kawl bawk. A ti tha zual pali te chu an rawn chhuak a, ka chocolate ken chu ka pe a, an lawm hmel ve viau, lehkha chu kan in zirtir lehnghal mawlh mawlh a, class banah extra class a awm thu chu ka chhuah hma in ka sawi leh hram bawk.




Zirlai naupang ho chu banah an haw sap sap hlawm a, class-12 students ho chu an class room ah an la awm thap a, zun chhuak leh tui in duh chu an kal a, kan in zirtir lehnghal mawlh mawlh a, an nikhat na te a ni bawk a ka kal rei pui lutuk duhlo, dar 4 ah ka ban tir a, keipawh ka haw tlang nghal, in ka thlen ve leh ka pa in chanchin te min lo zawt a, an zir that thu leh test ka neih tirah pawh fail an awm loh thu ka sawi chuan a lawm hmel khawp mai. U Mami ka hmuh mai loh vang chuan ka nu hnenah a awmna ka zawt a, a nawm min thu leh a room a a awm thu min hrilh chuan inchung ah ka chho vat, U Mami room ah chuan ka lut a, khumah a lo mu a, a muhil a niang ka lut tih pawh a hriat hmel loh, ka kal hnaia a lo muhil tak tak, a chalah ka khawih a, a lo dai dap a, ka thaw huai mai, ti harh duh lovin room atang chuan ka chhuak a.




Ka inthlak zawh hnuah ka nu in rawng a la bawl zawh loh avangin ka tihpui leh zung zung a, zaninah Sawmtluanga birthday kan lawm dawn vangin ka inkhawm dawn loh thu ka nu bulah chuan ka sawi a, pawi a ti lemlo, Sawmtluanga nen hian tet te atang kan in kawm tawh a, kan school ah kan lut dun char char bawk, ka chhungte nen an in pawh mai bakah U Zonuna cousin a ni bawk. Chaw kan ei dawn chuan U Mami room ah ka kal leh a, a la muthilh avangin ka kaitho duh ta lo, chaw kan ei kham hnuah hmun hnawk vel ka tifel leh a, U Mami kal theilo tur chu Sawmtluanga a thinrim em lovang chu maw, an in hre tha ve hle a, kal tur khan a phut ve ropui bawk nen mahse a damlo tih a hriat chuan a hrethiam dawn tho tih ka hria, ka insiam zung zung a, U Mami chu ka room ah a rawn lut a, a pawr fap mai.




Paper bag a rawn keng lut bawk a, "Zanin chu ka kal ve thei dawn silo a, Sawmtluanga hnenah thupha min lo chawi sak mai dawn nia, chuan heihi a birthday present atan ka lei a nia, I lo pe dawn nia aw" a chauh hmel hle. A thil rawn ken chu ka laksak a, "Ka rawn haw tlai lutuk ka ringlo aw, ka kal nghal mai ang" ka in siam zawh tawh avang chuan ka ti a, room atang kan chhuak a, ka nu chu U Mami room a luh tum awm ang takin a lo awm a, "Mami I lo tho chhuak peih tawh a nimaw, hei eitur ka lo ken che a, tlem tal ei tum rawh aw, chuan damdawi I ei dawn nia" ka nu chuan a ti zung zung a, "Nu ka kal nghal mai ang aw, ka lo haw tlai lovang" ka ti a, inhnuai lamah chuan ka chhuk nghal, ka pa pawh a thianpa damlo kan turin chaw eikham khan a chhuak nghal bawk.




Sawmtluanga'n a birthday party a siam na hmun ka thleng a, mi an lo tam khawp mai, a chhungah ka lut a, ka thiante ka hmu nghal, an ni pawn min rawn hmuh in an lama kal turin min hui a, ka kal ve nghal vat, "I va rawn thleng har ve khawiah nge U Mami" Sawmtluanga chuan a lo ti nghal zat a, "A damlo a, a lo kal theilo, chuan heihi i ta tur, pakhat zawk kha U Mami min rawn thawn a nihkha, piancham chibai min lo buk sak dawn nia a ti bawk a" ka ti a, "A va lawmawm ve, hetiang tih kher a ngailo a sin, lawmthu min lo hrilh sak rawh aw lo kal ve thei se a tha tur a nia" a ti a, ka thiante hi kan inah an rawn leng lut ngun a, U Mami pawh an nel hle, an u ang chiah in an en ve bawk, kan thian ho a kan awm chiah chu kan thawm pawh a tha ham ham viau, tuna party hi chu thian hnai te nen chiah a ni a, a nu leh pa te an tel lo.




Kan thian ho hi kan tha hnem ve a, mi sawm lai kan ni, mipa pathum leh hmeichhia pasarih, Adami, Lawmsangi, Nunpuii, Tluangi, Mawii, Hlimi leh kei, chuan kan mipate hi Sawmtluanga, Nunsanga leh Nunmawia te an ni bawk. Kan college kalpui te pawh an awm nual a, kan in hre ve vek na in kan in kawm lutuk lo, a cousin te nen kan vaiin mi 50 chuang kan ni a, hmelhriat loh pawh ka nei nual tho. Sawmtluanga chu kan bulah a awm hman meuh lo, midangin an lo ko peng zel a, "Chhante, U Zonuna a lo haw tih kan lo hria a" Adami chuan a ti a, "Nia" ka ti ringawt, "In in hmu tawh em?" Tluangi ve thung in a lo ti a, "Aw.. in hmu tawh e, mahse kan la in be lo" ka ti leh mai a, "A tha, be miah suh, ka ngei ania, Sawmtluanga hi a awm ve thin bawk sia, a cousin a nihna laiah a hriat ah ka sawi chhe ngam vak silo a, a lerh bawk si, a ni aia mipa tha an tam a nia, biak che emaw a hma ang khan in zawmna siampui ah a sawm che a nihchuan lo hnar tlat ang che" Adami chuan a ti leh hlak hlak a.




Ka thiante chuan beer an dawm far a, ka in ve thin tho na in zanin chu in ka tum lemlo thung, mahni a haw tur ka ni bawk si. Music an play a, a phur fal deuh ho an lam a, ka thiante pawh an lam leh tawh saw, hetiang lam hi ka ngaina ve vak lo, tunah pawh hian ka ning tan der, ka awm rei ve tawh tho bawk a, reilote ka awm leh anga ka haw ang ka ti rilru a, mipa pakhat hi ka bulah a rawn thu a, a thil in rim chu a na em em lehnghal, "Hey.. hmeltha nu I va mal ve" meng hlei lo hian a rawn ti a, min rawn thut hnaih sauh sauh a, "Kan in kawm dawn em ni?" a rawn ti leh a, ka kut rawn khawih a tum chuan ka kut chu ka lo dah sawn vat a. Ka ding nghal hluai bawk, en pawh en tawh lem hlei lo chuan pawn ah ka chhuak ta daih a, a rim kha ka hnar ah a la cham tlat a ka luak a chhuak hlui lehnghal, thutthleng an siam ah chuan ka thu a.




Thli a thaw heuh heuh a, inchhung lam ngawt ai chuan a nuam daih zawk, ka hahdam sawng sawng in ka in hria, van lam ka hawi a, arsi an de thut a, an mawi takzet, mit chhing in thawk ka la leh vang vang a, chutih lai tak chuan thawm ka hria a ka meng chhuak nghal vat. U Zonuna chu ka hmaah a lo ding reng chu niin ka hmu thut chu ka phu deuh zuk a, ka thin a phu rang leh tawh lutuk, a rawn kal hnai a, ka bulah chuan a rawn thu lehnghal, ka thaw tha ngam meuh tawh lo, ka ngawi reng a, ka awmdan chu a lai zo vek, "Tinge hetah nangmah chauh in i awm a?" a vawikhat nan tak meuh meuh, kum 5 hnua a vawikhat nan min bia a, "Inchhung aiin nuam ka ti zawk a" ka ti chhuak thei hram, ka aw chhuak chu a pangai hle a, ka lawm takzet bawk.




"I lo puitling tawh hle mai" a ti sup a, ka nui lui seih, "A hun ve tawh alawm, kum 24 ka nih ve tep tawh hi" ka ti a, kan pahnih chauh a kan awm takah chuan boruak awmdan hi ka zo lo lek lek, ka thawk a sak talh mai, mahse chuchu a hria ang tih ka hlau viau thung. Min en reng a ka taksa hi a za deuh mer mer mai, kei erawh in ka en ngam miah lo thung, hmundang chu ka melh char char a, "De.. hetah i lo awm daih a, ka zawng nasa lutuk che" Sawmtluanga a rawn kal hloh chu ka lawm takzet, ka thutna atang chuan ka tho vat a, a lam panin ka kal hnai nghal, "Nia.. inchhung chu a uap lutuk a, boruak thianghlim dawng turin ka chhuak lawk mawle, kan lut dawn mi?" ka ti a, ka hnunglama U Zonuna thu chu a melh zeuh a, "Kal ang" tih pahin a banah ka vuan a, inchhung ah chuan kan lut ta daih a.




"Ka lo tibuai cheu em ni?" a ti sup a, "Teuhlo I lo kal kha ka lawm zia chu" ka ti thuai a, "De, U Zonuna hi I la duh reng tih ka hria ania, tinge hetianga I awm tlat a, a ni pawh hian a en danah che hian a la duh che tih ka hria, hetia awm lo hian in inkar hi sawi tha vat rawh u" ka ngawi reng a, chutiang thil a thleng thei tawh lo tih hrechiang ber tu a ni sia, "Chutiang thil a thleng theilo tih i hriat kha, a ni te chuan bialnu a neih kha, sawi tawh suh, keipawn bialpa ka nei vat dawn" ka ti a, ka kalsawn nghal daih. In tur chu ka ban a, ka in nghal pawp, ka in ngai lem lova ka hrawk atang chuan ka pum thlengin a sa thla nghal rawih rawih mai, mipa pakhat hi ka lam panin a lo kal a, "Nangmah chiah in em ni i lo kal a, I va mal ve" a ti a, a hmel en chuan a sual hmel lem loh, ka thianpa nen kan kal thu ka sawi ve mai bawk a.




Kan in biak rei tak zelah chuan a lo fel phian, a tawng duh a, fiamthu a thawh reng bawk nen ka nui hak hak thin a, a hming chu Christopher-a a lo ni a, chutia kan lo in biak mawlh mawlh lai chuan min si chet in tu emaw hi a rawn thu a, ka thut na chair atang ka tla tep lehnghal, thinrim zetin tunge a nih en tumin a lam chu ka hawi a, U Zonuna chuan min lo melh run a, "In tawh suh, i in hnem lutuk dawn tlat" ti supin ka no ken lai chu a rawn la daih a, "I bialpa em ni?" Christ-a chuan a ti a, "Nilo ka u a nihhi" rang takin ka lo ti nghal, ka bul a thu pa lah chu a lo rum nghut a, engah mah ka ngai lo, ka bialpa a nilo miau a, U Zonuna chu be lem hlei lovin Christ-a nen chuan kan in be char char a, kan bulah chuan ngawi rengin a thu ve reng lehnghal, kalsawn daih se ka ti ru hle.




"Ka nau hi in school ah chuan lo lut se ka va han ti em, seat a la awm angem, Shillong ah school a kal char char a, a dam that theih loh avangin kum laklawh ah a rawn haw bawk si a, a school luhna turah kan buai lai tak ania" Christ-a chuan a ti a, "A nihchu, naktukah rawn kalpui la, seat chu a la awm theih mai ka ring, ka pa ka lo be dawn nia" a lawm hmel hle, lawmthu chu min hrilh mawlh mawlh a, dar 11 a ri dawn hnai tawh bawk nen haw tawh mai ka duh vangin ka thutna atang chuan ka tho chhuak a. Mipa pahnih te chuan min en haw a, "Christ ka haw mai ang, a tlai tawh bawk sia, naktukah chuan in lo kal dawn nia" ka ti leh a, "Awle, i phone no min pe thei angem, pawimawh ang turte ka rawn zawt che anga" a tihchuan ka pe ve mai a, U Zonuna lah chu kalsawn pawh tum lovin ka che vel chu min lo en reng a, engah mah ka ngai duh lo lui tlat thung.




Christ-a chu ka mangtha leh a, pawn lamah chuan ka chhuak a, ka thil in vang khan ka lu a hai deuh mem mem lehnghal, ka thiante ka hmu mai tawh bawk silo a, kan thian ho group ah ka haw thu ka sawi ta ngawt bawk a, ka khaw hmuh te chu a fiah lo riai tawh, ka scooty dahna lama ka kal mek lai chuan ka kutah tu in emaw a rawn man a, hlauthawng zetin ka hawilet nghal, mahse ka mi hmuh avang chuan ka thaw ta deuh huai a, "Ka rual in haw rawh, i rui bawk si, scooty khalh chi pawh i nihloh kha" a ti hluk a, "A ngailo, keimah in ka haw thei alawm" ka hnial vang nge a rum deuh nghut a, lungawi lo hmel a pu deuh bawkin ka hria, enge maw a lungawi loh ve ngawt ni. Ka kut lah chu a la vuan tlat zui, "Min thlah la, haw vat ka duh ania, ka chhungten min lo ngaihtuah tawh ang" ka ti leh a.




Ngawi rengin min kai kal nghal dawr dawr a nihchu, "Heyy... ka kut hi thlah rawh, keimah in ka haw thei ka tihkha" a car chu a hawng a, luh pawh ka tum chuanglo, "Ka rualin haw rawh, i rui bawk si, accident a tam tih i hriat kha" ka ner nang a, "Ka accident lovang, scooty te mai mai ka khalh thang alawm, khawi min thlah teh ka tihchu" ka ning tawh lutuk chu ka kut ka thing vak a, a thlah chuanglo, eng maw a hriat le. Tawng leh ka tum lai tak chuan a car ah min hnawh lut deuh nawk nawk a, ka tha a zawi bawk si nen ka tan na te chu engah mah a tilo, a ni pawh a rawn thu lut ve nghal zat a, "Ka scooty ka hnutchhiah ngawt thei hleinem" ka la ti talh a, "Lungngai suh, i scooty chu midangin an rawn dah mai ang" tiin a motor chu ti nunhim a tlan chhuak nghal, ka biak duh tawh loh avangin ka ngawi ta reng a, kan in zawn na motor a tih din rual chuan ka chhuak nghal vat a, hawi pawh hawi let lovin inchhung ah ka lut nghal.


Cont ...

Monday zanah dah kan tum leh dawn nia aw, chuan comment leh click kha min han tihsak leh liam liam ula...