All For Love (Chapter-21)

[Rebec Nunziri]

Chapter-21



Amelia Lalnuntluangi POV




"I va hlim hmel ve" Nicholas-a chu inchung chhoh na step bulah a lo ding reng tawh a, "Hlim tak ka ni" a lamah chuan ka kal hnai a, "I rilru a nat viau ka lo ring a" min fiam tih ka hria, "Engvang ngawt chuan maw?" ka ti a, "Aw... Chhana hian a duh ve thin em che a, nangpawn i duh thin kha" a ti a, a hmel ah chuan nuihzat na ka hmuh sak thei, tih el ka chak ve tlat, "Tlem chuan ka rilru a na ve deuh" ka ti a, ka nuih chu a za hle, mahse ka in sum hram hram, a rum nghut a, nichina a nuihza hmel te kha hmuh tur a awm tawh lo chiang a sin, a tum deuh hmuk a. Ka chhungril ah ka nui ru ver ver a, "Chu.. I lo la duh reng tihna em ni?" a ti hmuk a, en pawh min en leh duh tawh lo, sir lam a hawi daih a, a kekawr ip te a zen hlun bawk nen a awmdan chu a hmuhnawm bawk si, ka nuih chhuah loh nan ka hmui ka pet fan fan ringawt.




"A tha alawm, Chhana chu ka lo bia anga, ka nupui rilru a na a, bialnu chu neilo mai rawh ka lo ti ang" ti hmuk in step ah a pen chho nghal daih a, a hnungah chuan ka zui ve zel a, a kal chak bawk si keilah ka pum a lo lian ve tawh bawk nen ka um pha lo nasa. "Nicholas min lo nghak teh, I kal chak lutuk, ka hah vek" ka ti pawh chuan "Chhana ka bia anga, step a kai chho tur che in ka lo ti ang" hawi pawh rawn hawi let lovin a ti a, ka in sum thei tawh lo ka nui chhuak hak a, kan room kawngkhar chu hawngin a lut zui nghal a, na zetin a khar ri leh bur bawk, keilah step ah ka la chho mek bawk a, "Ngatinge thawm a va na ve" U Tluangi chu choka atang a rawn chhuak a, "Nicholas-a mawle, min fiam hmasa a, ka fiam let a, a titau a nihkha" ka ti a, "A va ho tak, mipa si tihtauh a hrat zawk a" nui hak hak chunga tiin choka ah chuan a lut leh mai a.




Room ah chuan ka lut a, khum ah a lo thu a, a lo la tum hmuk bawk a, a hmaah chuan ka va ding a en pawh min en duh lovin hmundang a melh nghal daih, a awmdan hi a cute thin ania, "Hey" ka tih pawh chuan min la rawn melh duh chuanglo, "Mipa i nihkha, chuta karah pa i ni tep tawh bawk a, titau bur bur thin suh" ka tihchuan lungawi loh hmel zetin min melh khui a, "Tunge titau?" a ti hmuk a, amah a ni tihchu a hre ve reng sia. Nui hak hak chunga ka en chuan a hma ai mahin a lungawi loh hmel zual a, "Nichin a ka thusawi kha ka ti mai mai a nihkha, Chhana te chu ka thian ania, a hma chuan ka duh thin ngei alawm, mahse tunah chuan nangmah ka duh che a, khawvel ah ka pasal aia mipa duh ka neilo, ka hmangaih em em bawk che" ka tih leh chuan min en char char a.




Sawi dik loh ka nei emaw tih mai tur a ni, "Tunah khan engmaw i sawi?" a ti sup a, "Ka sawi tam em kha eng ber khe nge i hriatchian loh?" ka ti a, "Min hmangaih thu I sawi tiraw, ka hriat sual a nilo tiraw?" a ti a, a thutna atang a ding hluai a, nui sen sen chungin ka bu zeuh a, "Bawihi i ka ngei khan han sawi chiang leh teh, nanghian min hmangaih tiraw, I sawi chiang tiraw?" a mitmeng chu a de sawr sawr a, "Aw.. ka hmangaih che alawm, ka hmangaih lutuk che, engtik atang nge ka hrelo" ka ti leh a, ka sawi zawh rual rual chuan chunglam hawiin a nui chhuak hawk hawk a, "Bawihi tuna ka awmdan hi ka sawifiah thiam lo, khawvel a mipa hlim ber ka ni hial ang, ka hmangaih che, min hmangaih ve avang pawhin ka lawm e" tiin ka hmui ah a rawn fawp vang vang a.




In ngeih deuhin inhnuai lamah kan chhuk leh a, Zuali pawh a rawn haw a, sitting room ah chuan kan nupa leh U Tluangi te nen tv kan en a, Nicholas-a chu a mood a fuh hmel hle, kan tv en lai pawh chu a ngaihsak hmel loh, "U Nicholas-a chu i va hlim hmel vur vur ve" U Tluangi chuan a ti a, "Nia.. hlim lutuk mah mah" a lo ti vat a, kan vai chuan kan nui dar dar hlawm a. Tlaiah chuan chaw kan ei a, zan lamah ka pate inah kan leng dawn a ni. Ka pa pawh a tha sawt em em a, in sawisel na a nei tawh meuh lo. Hna pawh a kal leh tawh a, mahse kar tluan in a la kal lo thung, ka pate in lam panin kan chhuak a, U Tluangi a haw tawh bawk a, Zuali amah chauh a awm tir ka rem tihloh avangin kan hruai ve bawk. Ka pate in kan thleng a, kan kal dawn tih kan sawi lawk bawk silo nen min hmu thut chu mak an tih hmel viau.




Inchhung ah kan lut a, ka nau pawh a lo awm a, Zuali chu a lo fiam leh a, Zuali lahin a lo haw ve ting tang bawk si nen an in hnial lai chu kan ngaithla thap a, "I bialnu aia ka hmelthat vang mai a khatia min tih?" Zuali chuan a ti ta hlak a, "Ka bialnu i tluk hlawl lo" Matthew-a lahin a lo ti hluk a, an in ngaih loh dan em em hi ngaihtuah tham a tling a ni. Matthew-a pawh hi hmeichhe bulah a awm tam loh nen Zuali hi chu a ngaina em em a, an in ngeih lo em em bawk, "I ninawm" an in hnial rei hnuah Zuali chuan a ti ta ringawt a, nui vur vur chungin Matthew-a pawh a ngawi ve ta hram, "Pa tunlai in sawisel na te I nei em?" ka ti a, "Neilo ve ka tha lutuk, thingpui in ang u aw" a ti a, Zuali chu a tho nghal tharh, ka nu te hian awmpui an nei ngailo a, pasal ka neih hma pawh khan ka nu leh keimah hi kan che deuh ber thin.




"Keiman ka lo lum ang" tih pahin choka ah chuan a lut a, ka nute ina ka kal hian ka hruai ve zeuh zeuh thin a, a tlang nel ve tawh viau bawk, thingpui a lum zawh chuan a rawn chawi chhuak a, "Bawihte, i naupai chu in sawisel I nei tawh lemlo maw?" ka nu in a ti a, "Aw.. neilo ve, ei ka thei lutuk hi a buaithlak zawk" ka ti a, an lawm hmel viau. Rei fe kan len hnuah kan haw a, in kan thlen hma chuan Zuali tawng kan ngaithla char char, ka nau chu a sawi chhe hneh sawh khawp mai, Nicholas-a lah hian Zuali bawl deuh pahin a lo sawi pui zel bawk si, ka lo nui ru ver ver ringawt. In kan thleng a, sitting room ah kan thu khawmuang leh hnuah Inchungah kan chho a, khuma ka mut thlak rual chuan Nicholas-an min lo kuah nghal thuai a.




"Matthew-a leh Zuali hi an in hmeh riau in ka hria" Nicholas-a chuan a ti a, "Nia.. mahse Matthew-a te chuan bialnu a nei a lawm" ka ti ve sep, diktak chuan Zuali hi ka nau bialnu ni turin ka iai hauh lo, amah a fel a, hmeichhe sual a nilo tih ka chiang a ni. Ka muhil lai chu ka harh thut a, ka pum chu a ri deuh rawk rawk a, ka riltam lutuk ringawt, Nicholas-a ka en a, a muttui hmel em avangin ka kaitho duh lova, a harh hlau zet chuan ka tho a, inhnuai ah chhuk in eitur ka zawng a, chocolate leh apple chu ka la a, ka ei nghal mawlh mawlh, ka ei zawh chuan ka thil tih hnawk vel chu ka tifai leh a, Inchungah chhoh lehnghal mai ka tum chu Zuali room atang thawm ka hria a, ka pan hnai vat, tap feih feih ri ka hriat chuan Zuali room a chuan ka lut vat.




Zuali chu khuma mu chungin a lo tal chiam chiam a, ka pan hnai a, ka va sawi nawk nawk a, a harh theilo, "Zuali" tiin ka au mawlh mawlh bawk, a hnuah a rawn meng deuh siar siar a, a mit chu mittui in a chim khat vek, a thlan hluam bawk. "I tha em?" ka ti a, a thaw kawk kawk bawk si, a khum bulah tui chu ka thli chhuak a a rawn tho chhuak ve mek bawk, ka pe a, a in nghal khawlh khawlh a, "I tha em, enge i an?" ka ti leh a, a awmdan chuan min ti mangang takzet, "Ka tha, mumang thalo ka nei a, chuvang mawle" a ti a, "A tha vek e, mu leh la, i muthilh hma chu ka lo awmpui ang che" ka ti a, khumah chuan a mu tha leh a, a muthilh hma chu a lu ka chul sak hliau hliau a, a muthilh hnuah pawh ka la chhuah san mai lo, ka awm ve ta reng a.




Darkar khat chuang ka thut hnuah thawm dim zetin room atang chuan ka chhuak a, kan room ah ka lut chiah chu Nicholas-a rawn chhuah tum nen kan in tawk a, "Bawihi, khawiah nge i kal a, ka hmu mai silo che a, ka hlauthawng hman a lawm" a ti a, "Ka riltam lutuk a, inhnuai ah thil ei turin ka chhuk lawk alawm" ka ti a, khumah chuan ka mu leh a, "Ka thil ei zawh khan rawn chhoh lehnghal mai ka tum a, mahse Zuali room atangin thawm ka hria a ka va luh khan a lo tal chiam chiam a, ka sawi lahin a harh lawk thei bawk silo, a taksa kha thlan in a bual vek a" ka ti a, "A zia tawh em?" a ti sup, "Aw.. rei fe ka thut hnuah chiah ka lo chho a, a tha tawh turah ka ngai, engtia han tih chu nge ni ang aw, a thil tawn te avang khan a nih ka ring" ka ti sep sep a.




"Hun a la liam tam lo em a, a thil tawn te khan amah ah nghawng a la nei dawn a, chuvang a nihchu, engpawh nise a tha leh vek mai ang, tha takin kan enkawl anga, kan ngaihsak bawk anga, a tha leh em em ang" a ti sup sup a, chuchu ka beisei a ni. Zing kan tho a, inhnuai a kan chhuk chuan Zuali pawh a lo tho chhuak tawh a, nizan thil thleng kha chu a hriat tawh hmel loh, "In lo tho tawh maw, vawin chu in nupa in in tho rual ve ngei alaw?" nui hak hak chungin a ti a, "Nia, chhung lamah mut a duh sawt bawk a, zing lamah chuan a harh hma ve deuh tawh" Nicholas-a chuan nui vur vur chungin a ti a. Zuali chuan thingpui kan nupa chuan min pe a, dining chair a thut pahin U Tluangi nen an eirawng bawl lai chu kan en reng.




Nicholas-a hna kal a ngaih vangin chaw kan ei vat a, insiam turin kan room ah kan chho a, necktie ka awrh tir lai chuan ka hnute a rawn tham leh thin a, "Awm tha mai mai teh, ka ning ania aw" ka ti hlar a, a rawn tih luih leh chuan "Nangmah in in siam rawh, ka ning che" tih pahin ka kalsawn ta daih a, nui vur vur chungin a in siam chhunzawm a, a in siam lai chu ka lo en reng, "Le.. min thlah la" a tihchuan room atang chuan kan chhuak a, pawn ah chhuak in a motor a a luh hma chuan "Vawinah lo che hah lutuk lo la, in chungah chhoh khap tlat a ni bawk tih kha hriat tur" a ti a, kar hmasa khan a rawn haw hma tiin inchung a ka pangpar khawi ho tui ka pe a, mahse nidang aiin a rawn haw hma a, ka pum a lian tawh bawk nen inchung a chhoh a rem tilo a, min man chiang bawk nen nitin hnaa a kal hmain a sawi ta ziah.




Room ah ka chho a, ka pum a na riai riai mai, ka thawh tirh atang ka pum a nuam lo tawh , a dam leh vat ka rin vangin Nicholas-a hnenah pawh ka sawi duh lo kha a nia, khumah chuan ka mu a, a na telh telh, ka thlan a rawn bawl chhuak tiam tiam bawk, ka pum chu ka dawm a, chet pawh ka che tha thei tawh lo, chutia ka pum dawm a ka lo mut ngawt ngawt lai chuan Zuali a rawn lut a, ka awmdan a hmuh chuan hlauhthawn hmel zetin a rawn tlan lut a, "U Amelia I tha em, engtinge i awm, i pum a na ami?" a ti a, ka chhang theilo, a thusawi te chu hla tak atang a hria ang maiin a aw chu a hla tial tial a, U Tluangi a ko chul ri pawh chu ka hre ruai ruai ringawt, ka pum dawn in mit ka chhing ngawt ngawt a, ka naute chungah thil diklo a thleng a nihchuan ka in thiam thei tawh lovang.




U Tluangi a rawn chho a, a hlauhthawn hmel hle, hmanhmawh zetin a phone chu a hmet a, Nicholas-a a call nghal, kan in awmna a fal tih ka sawi tawh kha, hmeichhe pathum chiah kan awm a, pawn ah chhuak ringawt mahila taxi hman tur kan hnu mai dawn lo, "Amelia tuar hram hram rawh aw, U Nicholas-a a lo let mek, a rawn thleng har lovang" U Tluangi chuan a ti a, Zuali chuan ka chal chu a lo hru a, engmah ka sawi thei lo, ka mittui chu a luang ngiai ngiai reng a, "Bawihi" ka pasal aw ka hre chiah chu ka thla a muang huai thei, room ah a rawn lut a, ka awmdan a hmuh chuan min rawn pan hnai nghal rawk rawk, "Damdawi inah kal pui vat a ngai ang" U Tluangi pawh chuan a lo ti a, Nicholas-a chuan min pawm tho nawlh in inhnuai ah min chhuk thlak pui nghal.




Damdawiin hnai berah min kalpui a, Doctor te chuan min check nghal vat, eng emaw in min chiu a, engmah ka hriat zawm tawh lo. Ka harh leh chuan in chung var vek chu ka thil hmuh hmasak ber a ni, thil thlen dan te chu ka ngaihtuah a, ka pum ka dawm nghal vat, vanneih thlak takin a lo la puar a, ka thaw huai mai. Ka harh tih an hriat chuan kan chhungte chuan min rawn hnaih nghal a, cabin ah kan awm bawk, "Bawihte, enge I an, na I la nei em?" ka nu chuan min ngaihtuah hmel zetin a rawn ti a, "Nu ka tha alawm, enge awmzia engvanga ka pum kha na vak nge a nih?" ka ti a, "Doctor sawi dan kha chuan ei sual i nei an ti a, engmah hlauhthawn na tur a awm tawh lo, I naupai lai pawh a tha e" a ti a, Nicholas-a hmuh tur a awm ve miah lo.




"Bawiha chu damdawi lei turin a chhuak lawk a, a lo let ve vat ang" ka nu (Nicholas-a nu) chuan a ti a, tui te ka in a, khum chu tlem in min tih kan sak bawk, Nicholas-a pawh chu a rawn let thuai a, ka harh tih a hmuh chuan min rawn pan nghal vat, "Bawihi, I tha tawh tiraw, na lai I la nei em?" tiin ka taksa chu a en kual a, "Ka tha tawh engmah na ka neilo" ka tihchuan a thaw huai a, kan chhungte chu ka harh tawh bawk a tiin an haw ta a, U Tluangi leh Zuali te pawh an haw nghal, ka pasal nen chauh chuan kan awm a, "I pum a na tih Engvangin nge min hrilh loh?" lungawi lo aw tak chuan a ti a, "A dam leh vat ka ring a, bakah a na em em lova I kal dawn kha chuan, hna lamah thil tihtur pawimawh i nei bawk nen khan ka hrilh duh lo che a nihkha" tim dai in ka ti a, ka thiam loh a ni tih ka hriat avangin ka tawng ring ngam lo.




"Bawihi, ka tan chuan nang hi i pawimawh ber, hna te chu engmah a nilo, eng emaw i chungah thleng ta se engtinge ka awm ang, tun atang chuan na I neih hlek pawhin min hrilh hmasa ber tawh tur a ni" a ti nghet charh a, "Awle" ka tih takah chuan a nui ta suk a, "Kan naute nen hian ka chan dawn cheu emaw ka ti alawm" tiin ka pum chu a fawp vang vang a. "Kan naute hi ka chan dawn emaw ka ti a, mahse engmah a thleng lo hloh a, kan vannei takzet" ka ti ve sep. Doctor a rawn luh takah chuan Nicholas-a chu a awm tha vat a, "Engmah that lohna I nei tawh lo a, in chhuak thei nghal mai ang, mahse i thil ei turah i fimkhur dawn nia, chuan awm hahdam I tan a tha ber a, mut tam I tan a tha ber" doctor chuan a ti dap dap a.




In kan haw hnuah pawh chuan Nicholas-a chuan khumah min mut tir a, Zuali leh U Tluangi te hnenah chaw pawh room a min pe turin a ti a, "A ngailo" ka tih pawhin ka thusawi chu a hai der lui hmiah. Hnaah pawh let tawh lem lo chuan ka bulah a awm ta reng a "Nicholas-a i secretary thar tur interview I ngai a nilawm ni, let tawh la, keichu ka that tawh em hi" ka ti a, "Midangin an lo buaipui thei, ka tan chuan nanghi i pawimawh ber" a ti sup a, khumah chuan in kuah rial chungin kan muhil a, ka harh leh chuan kan khum sirah eitur tui hmel zet zet hi ka hmu a, ka riltam zia ka hrechhuak chiah bawk, kan room kawngkhar a rawn ri ve chiah a, Nicholas-a a rawn lut a,s oup a rawn chawi lut a, "Le.. han ei theuh teh le, I taksa tan a tha vek tur a nihhi, Zuali leh Tluangi ten uluk deuh a an siam sak che a nihhi" a ti a.




Ka han ei chiah mai chu tui tak hi a ni ringawt, "A van tui em em, lo ei va la" ka thil ei lai min reng avang chuan ka ti a, "Ka ei tawh alawm, nangmah khan tui ti deuhin han ei nghek phawt mai teh" a tihchuan nui sen sen chungin ka ei lehnghal a, eitur in chhawp zawng zawng chu ka ei zo vek, "Ka puar zia hi" tiin ka pum chu ka chul a, "I puar chuan a tha a nihchu, tho la, kan inbual dawn a nia" a ti a, khum atang ka tho tur chu min rawn pui vat a, ka thawmhnaw hak tur min lak chhuah sak sa diam bawk a, inbual turin bathroom ah kan lut a, ka sam chu min suk sak a, ka duh ang in ka chet theih tawh meuh loh avang hian min bual tawp thin, keimah in ka in buai thei lutuk tho na chungin ka pasal hian min bual ziah a, ngaiah ka nei tawh.




Karthar kan chuang kai a, Nicholas-a zin hun pawh naktuk mai hi a ni tawh, ka insiam pui a, a cham rei dawn loh vangin thawmhnaw pawh a keng tam hran lo, "A hma thei ang berah rawn haw tum rawh aw" ka ti deuh chhen a, a zin tur chu ka huphurh lawk em em mai ni, rai lo ila chu hetiang em em hian ka huphurh pawh ka ringlo, mahse min duat bawk si a, zan thum chauh cham dawn mahse a tello a mut chu ka thil hreh ber a ni. "Ka lo haw leh vat ang" tiin ka chhip ah a fawp vang vang a, a ni pawhin a zin tur chu a huphurh ve zia ka hria, zantin a awm lum nuam zet a bei chial a ka lo mut tawh thin avangin zan thum chauh pawh nise a pangti lum tello a ka mu tur hi hreawm ka ti em em mai chu a nisia.




Zingah chuan hma takah kan tho a, Nicholas-a a chhuah hma dawn vang a ni, a kal dawn chuan pawn thleng ka thlah a, ka tap mai dawn in ka hria, ka pum chu a dawm vang vang a, "Lo in enkawl tha la aw, ka lo haw leh vat ang, chuan ka thlen ve leh ka lo bia ang che" ka hmui ah chuan a fawp vang vang a, a tlan liam lai chu ka thlir reng, ka mittui ka hru zeuh bawk, "U Amelia-i chu I pasal a kal liam chiah a i ngai nghal der a nimaw?" Zuali chuan a lo ti a, tawi te in ka nui ringawt, chaw ka ei lai te chuan ka ei tui lo khawp mai. Tlem te chauh ka ei a, ka kham ta daih, chawhnu lamah pawh chuan Nicholas-a chu a la reh vang vang, a la thleng lo a nih ka ring, amah chiah in a kal lova, a secretary a hruai tel ve bawk, a secretary thar hi ka la hmu ve lem lova, mahse hmeichhia a ni tih erawh Nicholas-a khan min hrilh tawh.




Tlai lamah chuan ka phone a rawn ri a, ka la vat, Nicholas-a a ni, "I thleng tawh maw, min va lo be har ve, ka lo nghak char char che alawm" ka ti nghal zung zung a, "Nia.. ka buai nghal a, hun ka neih ve leh ka lo be nghal che, vawinah enge i lo tih, hna te I lo thawk em?" a ti a, "Aih room ah ka awm char char, min lo biak hun ka lo nghak reng a" a nui suk ri ka hria, "Ka ngai hle mai che" a rawn ti thawp sut chuan ka mittui a hnai lehnghal kuar nia, ka hru zeuh a, "Kan naute nen hian kan ngai lutuk che" ka ti ve sep, rei fe kan in bia a, zanah meeting an nei dawn a, dar 9 hma chuan min rawn biak hman a rin loh thu a sawi nghal thlap bawk, phone kan dah hnuah inhnuai ah ka chhuk a, U Tluangi pawh Nicholas-a zin chhung chu hetah a riak ve nghal dawn a ni.




"In pa chuan a rawn be tawh che em?" choka a ka lut min hmuh chuan U Tluangi'n a lo ti vat a, "Aw.. kan in be zo chiah, a thlen hnu khan an buai nghal a ni awm e" ka ti a, zing leh chhun lamah khan thil ka ei tha lo bawk nen ka riltam tawh takzet, chaw ei an lo peih sa tawh avangin chaw kan ei nghal a. Hmeichhe pathum chiah kan awm bawk a, sitting room ah chuan kan thu a, ka titi sap sap hlawm a, "Keichu mak ka la ti tawp theilo, Amelia-i leh U Nicholas-a te an inneih tirh chuan maw Zuali an in ngeih lo bawk sia, an in hnial reng a, tunah lah an in ngeih leh em em a, hei nikhat lek pawh an la awm hran hma hauh in an in ngai nghal em em a" U Tluangi chuan a ti a, keipawh hian mak ka ti thin, hetiang em em hian kan in hmangaih ang tih rin ngaihna ka nei ngai biklo.




Dar 7 chauh a la ri a, Nicholas-a a la buai dawn tho bawk a tiin thlahrang film chhuak thar kan en a, kan phu leh zawk thin, U Tluangi lah upa ber e tilo chuan a dawih ber a, amah pawn thu ngam lovin Zuali bulah a thu a, thlahrang film hi chu hmuhnawm ka ti ve a, ka en ve nasa thin lutuk, ka en lai hian ka phu leh zuk zuk thin tih mai loh chu han hlauh zui vak na ka nei tawh ngai lemlo. A tir atang kan en loh vangin a tawp hma a, dar 9 rik hma deuh chuan room ah ka chho a, U Tluangi pawh a mutna room turah mu ngam lovin Zuali bulah a mu dawn a nih hmel, dar 9 a ri ta a, Nicholas-a min lo biak hun chu ka lo nghak ran a, han biak hmasak dawn in a buai lai a lo ni ang tih ka hlau bawk nen min lo call hun chu ka nghak tawp, nghah rei a ngailo, a call a lo luh chuan phur zetin ka la a.




"In meeting chu a tluang maw?" a thaw hawk a, "Kan thu . in hmu hlei theilo chu a ni, naktukah kan chhunzawm dawn a, kan tihfel theih chuan naktip ah ka lo haw ang" a ti a, han tifel thei hloh se aw, ka pasal ka ngai tawh takzet, "I mut a chhuak tawh em?" a ti a, "La chhuak lo, I awm bawk silo a, zanin chu ka mut theih pawh ka ringlo, lo haw vat rawh aw" ka ti a, "Awle... chuan meng rei awih loh ka tihkha aw, kan naute kha ngaihtuah la, i muthilh hma chu kan in be dawn nia, ka ngai tawh hle che a ni" a ti a, "Keini pawn kan ngai lutuk che papa" ka ti sep a. Ka muthilh hma chuan kan in be ta reng a, zing ka harh chuan phone chu a lo in off tawh, choka a ka luh chuan "Vawin chu kan mood a va fuh awm ve" ka nui sak a.




"Zual vawin I lo haw hma angem?" Ka ti a, "Ka hrelo, haw hma ka lo tum ang" a tihchuan "Aw.. dawnfawh min lo lei aw, ka ei chak lutuk, kan kawl tawh bawk silo a" ka ti a, a lo lei tur thu a sawi a, chhu nah chuan Nicholas-a nen kan in be leh zeuh zeuh thin a, vanneih thlak takin naktukah a rawn haw thei dawn tih min hrilh a, zaninah party a hminga an lo buatsaih sak avangin a lo haw thei dawn lo ni. Zanah chuan party a kal hma in kan in be leh a, rui chhe lutuk lo turin ka chah nasa hle, party a zawh hnuah min rawn biak leh tur thu a sawi hnuah kan in biakna chu kan ti tawp a. Zanah Matthew-a a rawn leng a, nidang aiin a mizia a zawi, Zuali pawh chu nidang angin a fiam lo a, a thu ngawi reng ringawt.




Zuali leh U Tluangi room a an luh hnuah "Rilru hahna I nei em ni?" ka ti a, "U.. hmeichhia te hi an lo mak a nihhi" a ti ringawt a, a thusawi awmzia ka hrelo hle, "Han sawi chiang deuh la" ka ti leh a, "Ka bialnu khan min lo kawp reng a, vawin khan ka man chhuak a, engtinge ka lo hriat vat loh theih zawk, nilo engtinge a mize diktak ka lo hriat loh theih zawk ni, hmeichhe nunnem leh rilru tha tak a ni emaw ka ti a, mahse sum vang chauh in min lo hnaih a" a ti a, a aw a natna lang chhuak chu a hriat hmaih theih loh. "Matthew mipa i ni a, chak takin awm rawh, hmeichhia te chu an tam alawm, I tan Khuanu ruat a nilo tihna a nimai, i hrechhuak hma chu lawm zawk rawh, in la kal thui hman lova, i tan tha tura Pathian remruat a ni ngei ang" ka ti a, ka thusawi chu hrethiam se ka ti ber.




Matthew-a nen kan titi zawh hnuah a haw ta a, ka khawngaih takzet, hmeichhe hnaih a nei ngailo a, a hmeichhe duh hmasak berin hetiang hian a chungah a lo ti leh si, mahse ka nau hi ka hrechiang a hetiang mai mai hian a awm dawn lo tih ka hria, chhel takin a paltlang ngei ang. Room ah ka chho a, dar 12 a ri tep tawh, Nicholas-a a la reh vang vang, a haw har loh tur thu kha a sawi si a, dar 1 a rik dawn chuan ka nghak thei tawh thlawt lo ka call ta tawp a rei fe a ring hnuah a la ta chiah "Tinge min va rawn be har ve?" a tawng hma hma chuan ka ti a, zu a rui a ni chiang khawp ang, "Boss chu a inbual a" hmeichhe aw hian a rawn ti a, a secretary kha a ni ngei ang, Engvangin nge Nicholas-a phone a lo chhan ni room hrang ah an awm a nilawm ni, "Tunge i nih?" ka ti a, "A secretary ka nia" a rawn ti leh a.




"Nicholas-a phone pe rawh" ka aw chu a no fahran lo. "A la inbual a, a inbual zawh ah lo be tur che in ka lo hrilh ang" engmah ka sawi leh hma chuan call a ti tawp daih. Thinrim zetin ka phone chu ka en a tun ang zan tlai tawh takah Nicholas-a room ah enge a tih, chu ringawt chu ka ngaihtuah a, Nicholas-a hian min phatsan em ni, chumi ka ngaihtuah zawng ringawt pawh chuan ka tawt up up a, ka phone chu ka en char char a, reilote hnuah call ka dawng a Nicholas-a hnen atangin lak pawh la lovin ka ring ral tir thak a, a rawn tih nawn leh pawhin ka la duh lo, min rawn call tak tlut tlut ah chuan ka phone chu ka switch off daih a, ka be dawn lo hi a ni tawp, a duh leh rilru hah deuhin awm rawh se, enge hmeichhe dang nen room khat ah zan tlai tawh takah an awm dun, lukham hnuaiah phone chu rawlh lut in ka mu hmak a, ka muhil thei pawh in ka ring lo e.


Cont....

Zanin chu ka awl ang ka ti viau na in ka rawn dah hram aw... chuvang chuan click leh comment a that ka beisei viau ania...