Politician nupui S2

[Cck Lalchhuanawmi]

Politician Nupui Hring nun
S-2
Chapter-1
Ziaktu: Cck Lalchhuanawmi

(Zan khat dan zelah dah kan tum ang)

Review S-1:

Naktukah eng nge thleng dawn ka hre lo.


Duhsaka a lo kir ang em? Manoin buaina a siam leh ang em? Term khat hi kan zawh tluang thei ang em? Sammy-a hi a dam chhuak thei tak tak ang em? Thuruk hai chhuah tur eng nge la awm?


Ka hre lo, engmah ka hre lo. Naktuk hun ka hre tlat lo.


Eng pawh hmachhawn dawn ila, min hmangaihtu Sammy-a ka bulah a ding reng dawn tih ka hria e.


"Sam, min hmangaih tak tak em?",


"Ka hmangaih che, Puipui, ka hmangaih lutuk che", ka mit tui luang ngiai ngiai a hru a, ka biang a tuai heuh heuh.


Hun han pe teh ang. Hun khat dang pek kan phu ṭheuh e.


Engtikah emaw chuan, chiang takin, hai leh phat ngaihna reng awm loin Sammy-a hi ka la hmangaih ngei ang.
++End of Review++

<<<Sammy-an Puipuii a hmangaih a, Chhuanpuiin an sawi 'Puipuii' a ni tih a inhre tawh a. Sammy-an Puipuii hnen aṭangin hmangaih letna a dawng ang em?>>>


^^^Lalchhuanpuii pov^^^


Sofa dûp nuam tak chungah ṭhu mah ila, ka hahdam hlawl lo a ni.


Lal Fanu leh Taiṭitan min boralsan hnu aṭang khan, hahdam tik ni ka nei thei ta meuh lo a ni e.


Chuta karah nau ka la pai zui!


An boral dan lah, indawmhlum angin a kal si lo. Min ṭhawng em a, tun thleng hian mumang tura ngaiin, anmahni ka zawng leh ruai ṭhin.


Lal Fanu phei chu, kan in chhung hmun tinah a thlalak ka tar a, nghilh ka duh lo a ni.


Puitling sualna a chunga tlak tir lo tura ka vên nasat tehreng nen, a tawpah zawng; a tuar ta nge nge a ni e.


"Nu, tui i in duh em? Ka lo lak ang che aw", Siamtea tho tur chu a kawr tlanga pawtin, ṭha taka ṭhu fel lehin min en a, "Siamte, min hua em?", a mitah tak ka en ngam lo.


Siamtea chuan, "Ka pa hi ka hua a ni. Tih theih ka nei tlem a, min ngaidam rawh", a ti a.


Ka mit tui a titla leh ta.


A pa huattir ka duh lo a, huat chhan tur atan a awm hek lo. A huat chhan chu, min hawtir duh loh avang hian.


Siamtea bawkin, "Haw i duh tehreng nen, a hmangaih dan che hi mak ka ti ngawt mai. A hmangaih tak tak lo che a ni ang", a ti leh.


Ni lo e, a hresual a ni. Min hmangaih ngei mai, mahse; min hmangaih lutuk a, ka zâi a ngaichang tawh ṭhin lo hi a ni buaithlak ta chu.


Dâwt tam tak hrilh a, ṭawngkam chhe tinrenga ka ânkhum pawhin; engkima ka mawhchhiat chung leh a chunga kut ka lek hial pawhin min haw tir duh lo.


"Nu, tui chu ka lak ang che aw", Siamtea a tho a.


Doctor-in, "Neih pangngaia i neih theih a rinawm loh", min tih avangin chet ka tum lo law law tawh.


"Nu, hei le tui. In rawh le", zim takin kâ ka âng a, straw a rawlh lut.


Ka bulah ṭhuin, TV min en pui a, FTH Official-te meuh pawhin min tihlim zo ta lo!


A hmaa ka nuihpui nasat theih em em, ka hnual changa ka en ṭhin an ni. Ṭah tichhuaktu mai an chang zo ta e.


Ka ṭap chhuak a, Siamtean min kuah thuai a, a darah min beitir.


Tlangval a ni ta der mai a, Freddy-a nen. An pahnih hian ka thlamuanpui ṭhin teh asin. Lal Fanu la dam se zawng, ani pawh tleirawl duhawm tak a ni ngei ang.


"Siamte, engtikah nge Lal Fanu a lo haw dawn? School kawtah ka lam hun min nghakin a ding tawh ngei ngei ang. I nau hruai turin kal ang, tunah kal nghal ang", thawh ka tum ta mai a.


"Nu, School chawlh alawm. Inrinni a nih hi. Mu hahdam turin pindanah kal ang aw", Siamtea chuan min kuah a.


Ka hneh thlawt lo, pindan min pan pui a. Mut hahdam a theih loh, taksa chu khum nuam tak chungah a innghat ngei mai; rilru erawh a hahdam si lo.


"I pain a lo be tawh che em?",


"Be tawh e, a lo haw ṭep tawh. A awm loh hlan hian ka hawpui ang che chu".


Ka mit tui a tla leh tawh.


A zin hlan hi haw hun remchang tak a ni. Engin nge min mawlh tehreng, Sammy-a bula min hawtir tura ka ngen nasat ngaihtuahin, a awm loh laia haw ka duh tlat lo thung.


Haw ka duh tak tak lo a ni mahna.


Chhuahsan duh a, a hmuh loha awm a, a ngaihsakna leh hmangaihna dawn(dawng) pawisa loin, haw(hua) hle chung hian ka bula awm a ka mamawh a ni tlat bawk si.


"Siamte, Lal Fanu bulah kal ang", thawh ka tum a, min nem muin, "Naktukah kan kal dawn nia, a Album en ang aw".


Album a lak chhungin ka lo ṭhu mu a, a lo let chuan ka bulah ṭhuin Lal Fanu thlalak dah khawmna Album kan en dun.


A hmelṭha a nia aw.


Kum kuana a hmang mek a, heti chung hian Tleirawl duhawm tak a ni reng tawh zawk.


Lal Fanu a ni a, Lal Fanu a ni reng ang.


Taiṭita leh Lal.Fanu te thlalak dunna kan keu thleng a, âw chhuah meuhin ka ṭap leh ta.


Ṭah hi ka duh azeng a ni bik lo, nau pai rilru nô nen chuan, ṭah loh hi a har ṭhin.


"In va reh teh ṭhiap ve, Nu? Au Siamte?", Freddy-a inkhel a lo haw ve leh tawh.


Siamtean, "Hetah kan awm", a ti a.


Freddy-a a rawn lang thuai, "Pi, pindanah an awm a nih hi. Nu, Thei tui i in duh em?",


"Lo kal teh", ka kut ka phar a, "Thlan rim ka nam asin", ti chungin min lo pan thuai.


Ka kut a rawn ban chiah chu, a thlan rim avangin ka uak tuarh.


"Inbual fai zawhah ka lo kal ang", meng phawk hrain a ti a. A chhuak zui daih. Luak chhuah ka nei lo tluk a ni.


Nu Papuii a lo kal a, "Vawiin i lo ṭha em le?", ka bu nghat.


Apple zai lep min lo ken a, Siamtea kuta dahin, "Ei zawh(zo) tir vek rawh aw, ka chhuahsan rih ang che u", min chhuahsan a.


Thenzawla ka nu leh Hnahthiala ka nu ten min awmpui inring rengin an awm.


Sammy-an, "Kei ka awm a, a tawk", a tih tlat avangin vui nang nangin, phone kaltlangin min rawn thlamuan fo.


Fai leh rimtui ser sawrin Freddy-a a rawn kal ta a, Siamtea nen min karcheh.


An inkhel chanchin min hrilh mawlh mawlh. Badminton a khel ṭhin a, kan Vengah Hall a awm avangin Veng dang pan a ngai lo.


Tournament-a chhuak tura huaisenna a nei tlat lo hian min tibuai.


Thiam ang tawkin ka fuih nasa, mahni inrintawkna a nei hlawllo hian min timangang.


"Lo chhuak ve ula, mahni chauhin min hnutchhiah a, khua a har em mai", Nu Papuiin a rawn ti chu, ka nuih sen sen.


"Ti ru, i chhuak ang u".


An unauin min kuah phei a, Thla li chauh la ni mah ila, rit tak ka ni. Ka vûng nasa em em. Thau angin ka lang naa, cher tak ka ni.


Ka inzo lo reng reng.


Pen sawm pen tur pawhin ṭanpui ka ngai.


Kan ṭhu fel chiah tihah, Sammy-a lo haw thawm hriat tur a awm ta. Thin a tawt leh up up ṭan, retheihthlak ṭhin asin.


"I lo haw ta maw?", Nu Papuiin a hmuak a. Siamtea leh Freddy-a pawhin, "Pa, i lo haw tawh a ni maw?", an ti a.


An pa chanpual ka ni tih an hria a, an kal sawn thuai.


Sammy-a chu ka hmaah a lo ṭhu hniam a, ka kut vuanin, "I inbual tawh em le?", a ti a.


Nui hmel min hmuh reng te, dam taka min be ṭhin te hian luak an ti chhuak.


A hmel hmuh chu sawi loh, a rim ringawt hriat te hi ka ning. Heti chung hian, haw san ka han duh lo tum hrang a.


"Ka nghak che", a nui suk a.


Keimahin ka inbual ngai lo, amah hlirin min bual ṭhin. Min duatin min ngaihsak em em a, ka haw(hua) ngawih ngawih thung.


"Chuti chu, inbual turin kal ang le, a tlai chhiat hmain", min kuah tho a. Nu Papuii hnenah, "Nu, i zo a nih chuan min hawsan mai rawh aw. Siamtea leh Freddy-a an awm tho kha", a ti lung lung a.


Harsa ka ti, Sammy-a hian min thlah duh si lo.


A mak a nia aw!


Min thlahin, min ṭhen se ti em em chung siin ka ngam tlat lo. Ṭawngka leh a thu maiin ka ngam a, a tak thlenpui turin ka ngam hlawllo.


Sammy-a hian thlen tir tak tak se chuan, min pawm hram tura ngen lawm lawm ka nâp ngei ang.


Thenzawla ka nu leh pa hnena min hruai tura ka tihin, min kuah bet tlat a, thinrim tak hian, "Keima'n ka enkawl thei. Lo inrawlh hlek suh u, ka nupui a nih hi; min inṭhen hrantir thei lo", tiin a auin a au.


Ka nu leh pain, "Chuti, A nau neih hma kan lo awmpui ang che u", an tih pawhin, "Nau an neih hunah in lo kal chauh dawn nia", a tihkhum hmiah.


U Hmai takngial pawhin min awmpui a remti lo.


Hnahthiala ka nu leh pa te pawhin an be ngial a, a sawt lo. Ka pa phei chuan a bêng hial, luhlul ṭha tak a ni.


Tun thlengin min kaltir phal lo.


Min bual faiin thawmhnaw min inbel tir a, khuma min mut âwn tirin, "Ka va inbual lawk ang e, ka rei lo ang", ka chalah a fawp zauh.


Album kan la dah ṭha lo, ka keu a, Lal Fanu leh Taiṭita thlalak mawlh ka thlêk.


Ka ngai a ni, ka hmangaih te an ni tlat a!


"In awmna a nuam awm bik hle mai, min ngai ve miah lo em ni a? Kei chuan, in pahnihin ka ngai lutuk che u a nia", ka rilruin ka be mawlh mawlh.


Pawm thiam harsa ka ti a, ka la pawm thiam thei meuh lo.


Ka ngai em a ni!


"Puipui?", ka hmaah a ding run tawh mai a.


A lo ṭhu thla a, "Sam, naktuk a thleng ngai lo an ti a, a thleng ngai lo tak tak a nih hi. Naktukah an lo haw mai ka ring ṭhin a, an lo haw thei reng reng lo. Khawiah nge an kal ang le? An lo haw hunah chuan, ka hau nasa ngawt ang mawle. Taiṭita phei chu, ka vaw(vua) nasa dawn lutuk",


"Taiṭita chu puitling a ni a, i vaw(vua) tho ang maw? Lal Fanu i vaw(vua) zawk dawn lo em ni?", nuihza hmel takin a ti a.


Lu thing nar narin, "Taiṭita chu puitling a ni a, a ṭap dawn hleinem. Lal Fanu chu naupang a ni a, chubakah; Lal Fanu a ni a, ka vaw(vua) phal lo, ka duat asin. Tumahin an tihnat ka phal lo", ka ti nang nang.


Tumahin an tihnat ka phal lo reng bawk a, chuvang a ni ang; Pathianin Taiṭita ruala a bula a hruai ni.


Sammy-an, "Chaw ei turin chhuak ang hmiang, dar riatah Drip khai pahin Hlimpuia te inkhel kan en dawn nia", a ti.a.


Chaw ei thei lo tawp ka ni em bik lo, "Thla nga hnu aṭang chuan i zia chho mai ang, lu i sûn lai a ni bawk si a", Doctor-in a ti reng a.


A chang chuan, keimaha Nunna Nei hi ka lainat ṭhin.


Chumi hre renga chaw han ei lui lah ka ngah.


Dar sarih a ri ta a, Drip khai a hun.


Nurse a lo thleng a, "Zanin aṭangin Drip kan khai leh dawn a, kan inhmu leh reng dawn a nih hi. Pu Sammy-a phei chuan min ning leh ang chu aw", Dingpuii chuan a hnathawh chawl chuang loin a ti a.


Kei tak hian ka ning dawn, tun apangin ka ning nghal.


Doctor-in Drip khai turin min ti leh tlat a, Sammy-a buaina tur tho tiin ka hnial duh lo.


"LalFreddy-a hi, Tournament-ah te hian chhuak ṭhin ta che. Zing leh tlai tin Batminton khelh ziahin awm zia a nei nang",


"A la hma em mai, tlawm nei map loa Champion char char ka duh dawn a, chumi atan ka inzir", Freddy-an a ti mauh mai a.


Dingpuii nuih a za ngang mai.


Sammy-a melh zeuhin, "A pa a chhun a, a la bawn dawn lutuk. World Champion a la ni dawn alawm", ka ti a.


"Ka fapa a ni tlat a", nui sukin a ti ve bawk. Sammy-a bawkin, "I kut a dam si lo, fim khur rawh aw", Dingpuiin hriau a vit lut tur chu a ti a.


Dingpuiin, "Kan senior tawh, lungphang suh", a ti hmiah.


Siamtea leh Freddy-a an nui kur kur.


Dingpuii a haw a, ding lamah Siamtea ṭhuin, vei lamah Sammy-a.


Vei lamah hriau a bur a, Sammy-an a chul duat asin. Siamtean ka kut ding lam a hmet. Ṭhutna hnungah Drip Stand kan dah.


Ka kar deuh a, Freddy-a ṭhuin, ka ke pahnih chu a hmet nuap nuap.


Min duat lutuk a, pangchang hi a awl ṭhin em asin.


Inkhel an ṭan a, u Venpuii fapa Hlimpuia che tla kan thlir. U Venpuii intihtheih dan tur hi aw.


Freddy-an, "Nu, engtikah emaw chuan u Hlimpuia angin TV-ah Batminton ka khel min la en dawn nia", uang fahranin a ti a.


"Uang uang suh, i inkhelh ngam loh kha", Sammy-an a ti.


"Ngam ele, hun ṭha ka nghak alawm",


"Hun i nghah chhungin Hunin an liam san zung zung che hi", Sammy-an a ti leh.


Siamtea nen kan ngawi reng, Freddy-an, "Class-10 pass hma chu a chi loh", a ti leh a.


"A chauh thu ba rawh em mai", Sammy-an a ti nghet charh.


Siamtean, "Thu dang sawi loin inkhel en teh u, u Hlimpuia chu, a hmun ngeia ṭawiawm a châkawm", a ti ve bawk.


"Hun a la tam em mai. Mawh, Pa, Hun a la tam, lungngaih loh tur, Grape Juice No khatin a that vek thei", Freddy-an a ti chu, Sammy-an a tukkhumah a beng hlak a.


Freddy-a chu nui hak hakin hma lamah a bu nghek.


"Grape Juice mai mai ni loin, Champhai Grape Wine-in alawm", Sammy-an a ti pek a.


Hriam takin ka melh chho nghek, pha deuh dai hian, "Sawi mai mai", Sammy-an a ti a.


"In pafaa in in tih ka hriat ringawt pawhin, in nasa lo khawp ang", ka ti a.


Freddy-an, "Nu, i sawi tlai em mai. Kan zung chhuak vek tawh. Tiraw, Pa?", a lo hawi chho a.


Sammy-an, "Ni lo, ni lo. Inkhel khi en rawh", a ti hmuk.


An fiamthuah lah nui hmel ka pu thei lo, chhungrilah chuan ka nui nasa asin. Nui chhuak turin chakna ka nei lo.


TV hunna chunga Lal Fanu thlalak daih a ni, kei chuan ka en.


Lakthlak an tum ṭhin a, ka phal tlat lo.


Kan zingah hian awm se, Chhungkua kan kim mai turan!


"Lal Fanu, i pa Taiṭita kha duat hle rawh aw".


An pahnihin an awm a, hah a dam deuh.


Ngaih erawh zawng, ka ngai bâng dawn lo a ni. Ka hmangaih te an ni tlat a.