Amelia Lalnuntluangi POV
Chaw ei khawm kan neih dawn avangin kan chhung khat hnai leh kan thiante pawh an rawn kim viau tawh, Remremi te leh ka thiante Thakimi te chu an vawikhat in hmuh na mah nise an in kawm ngeih nghal em em a, an awm ho deuh chawt mai, chutiang bawkin ka thian mipa te leh Nicholas-a thiante pawh, kan boruak chu a nuam a ni tawp. Nicholas-a lah min si lo chuan a awm theilo emaw tih mai turin ka bulah a awm deuh chawt a, midang te chuan kan nupa min fiam nan tak an hmang a, min han fiam deuh zuk zuk lahin Nicholas-a ber ber chuan nuam a ti emaw tih mai tur a ni, a nui suk suk a, a thiante bula awm tura ka tih lah in a duh der bawk silo, a duh ang chuan han awm phawt mai teh se, eng ang pawn sawi mah ila ka thu a zawm dawn lo tih ka hrechiang lutuk tlat.
Chaw kan ei a, Nicholas-a ber a che over leh tawh a, chawhmeh te chu ka thleng ah a rawn suak zung zung a, midangte chuan kan nupa che tla lai chu en in an nui ru vur vur hlawm mai. Chaw kan ei kham a, puitling deuh ho inchhung ah an awm laiin kan thian hovin inchung lamah kan chho a, Chhana leh Nicholas-a pawh an in kawm thei viau, nizan khan Chhana a lo kal ve dawn leh dawn loh min zawt a, a lo kal dawn thu leh ka thian a nih thu ka sawi khan a lungawi lo deuh a nihkha, mahse Chhana chuan Thakimi a duh tih ka hrilh takah khan a lungawi ve ta chiah a nihkha. Puia'n guitar a perh a, kan zai dual dual, mi 20 aiin kan tam a, kan thawm pawh a tha hum hum viau. U Tluangi leh Zuali te pawh an awm ve bawk, nuam an ti ve viau in ka hria, "Kan thian ho zing a nupui nei har ber tura kan ngaih in nupui a nei hmasa ber a, fa hial an pai tawh a nia, rin har in ti ve em?" Zira chuan a ti a.
"A hun kan hria alawm, nangni pawh hi nupui nei ve tawh rawh u, in senior zo dawn" Nicholas-a chuan nui vur vur chungin a ti a, a thiante chuan an ei loh hmel teh a sin, "Nupui i neih dawn a I awmdan kha kan sawi mai tur asin" Awma chuan a lo ti hmuk a, "Hun liam tawh a nihkha" a lo la ti duh lek zui. "A awmdan tur chu ka hrethiam mai, Amelia-i pawh hi pasal a neih dawn khan tap chungin min rawn call thin alawm" Thakimi chuan nui hak hak chungin a lo ti a, rum zetin ka en a, midang ho chu an lo nui hawk hawk hlawm a, "In in neih dawn a in han in duh loh tawn nen Amelia-i pawn rei kan in nei lovang a ti hial a nia, mahse hei kum em pawh in la in neih hma in in in duh hlum lo chauh chu a nia" Thakimi bawk chuan a ti leh a, a thusawi chu a dik ka ti khawp mai, kan in neih dawn khan kan in duh tawn loh zia hrechiang tu te vek an ni, mahse hei tunah chuan engkim a danglam vek tawh a, nupa hlim tak kan ni in ka hre bawk.
Chhana'n Thakimi a en leh zeuh thin chu ka hmu ru reng a, Thakimi chuan a hriat ve hmel loh, a nui uar uar lehnghal. Zan tlai tak thlengin an awm a, an haw dawn takah chuan pawn thleng kan thlah a, "Engtik ah nge hrilh i tum?" Chhana hnenah chuan zawi te in ka ti a, a dar a kan ak a, "Hrilh vat rawh, a nihloh chuan keimah ka hrilh dawn nia" ka ti leh a, "Ka hrilh dawn alawm, mahse nangpawn i hria anga, a awmdan en hian min duh ve hmel loh em alawm" a ti niah niah a. A duhthu han hrilh chiah se chu Thakimi hian a hnar bik ka ringlo, engpawh nise a hrilh hun tur ngawt chu ka nghakhlel. Kan thiante an haw hnuah chuan in chu a reh huai in ka hria, vawin lam kan hun hman te avang khan ka ke a kham thum lehnghal, Zuali pawh a room ah mu turin a lut tawh bawk, keini pawh chu kan room lamah kan lut ve thuai a.
...
Hun hi hriat loh kar in a lo liam zing zing a, ka nau pai pawh thla li lai a ni ve tawh, ka pum pawh a puar ve ak tawh a, zan kan mut dawn apiang hian Nicholas-an ka pum zawnah a beng dah in kan naute chu a be ziah a, keipawn ngai ah ka nei tawh, rai haw chi ka lo ni bawk nen ka thin a chhe hlur a, a chang phei chuan Nicholas-a hi ka vin leh hrep thin, a hnuah ka in thiamlo ngei ngei a, mahse ka pasal hi a fel em a, dawhthei takin ka vin na te pawh chu a ngaithla liam mai thin, ka rai hmaa ka thil ei duh ngai loh te kha ka rai hnu hian ka rawp thar em em a, a bik takin dawnfawh, kawl loh lai kan neilo, Nicholas-a hna atanga a rawn haw apiangin a rawn lei thin a, ka ei nghek zel, chaw ka ei theilo em em thung, mahse thil dang ka ei nasa bawk a, ka taksa ah pawh a hriat, a hma aiin ka thau a, rai haw viau e tilo chuan ka taksa chu a chum buang thung.
"Nicholas" ka pasal chu ka au lang lang a, "Enge nita ka nupui duhtak" rang zetin kan room ah a rawn lut a, "Ice cream ka ei chak lutuk" ka ti leh sep a, "Lo nghak rawh, lei turin ka chhuak lawk anga ka lo let leh vat ang" tih paha chhuah mai a tum chuan ka lo dang vat a, "Ka kal ve duh inah ka awm reng a, chhuah thawven te pawh ka mamawh ve alawm" khum atang chuan ka tho a, khua a lum tawh bawk a, kawrlum pawh ka ha lo. Ka rai tih kan hriat atang khan Nicholas-a chuan dawr kal pawh a phal tawh lo, inah ka awm tlawk tlawk a, dawr han kal luih pawh tum ila a thu hnial theih a nilo. A car in kan chhuak a, ice cream chu min leisak hnuah let leh mai lovin khawpui chhungah chuan kan tlan kual a, nuam ka ti hle, zan boruak chu thiang tha tak a ni.
"Kan haw tawh mai dawn em ni?" hmun reh deuh laiah chuan a ding reng tawh a, ka mut a chhuak tawh deuh bawk nen pawi ka ti hran lo, in kan thleng a, Nicholas-a hnenah lo han chho hmasa turin ka ti a, a ni pawh a chho ve mai. Zuali room ah ka lut a, a lo la haw lo, Nicholas-a hriat lovin chhuah min dil a, kan hnenah a awm rei ve tawh bawk nen nau ang chiah in kan nupa in kan en a, hmani deuh khan rui chungin a lo haw leh a, Nicholas-an a hau nghe nghe, chuvang a nia Nicholas-a hriat lova chhuah min dil nachhan, kum thar atang khan a tuina lam tak lem ziah a zir tha leh a, a zirna man pawh kan tum sak vek a ni, tunlai a awmdan hi a danglam riau a, zing khua te han var se tha deuhin ka sawi pui ang, rilru hah na a nei a ni mai angem tih te ka ngaihtuah a, tunlai a mizia danglam dan en hian chubak chu puh tur ka hrelo.
A tuk lamah chuan inah U Tluangi leh Zuali nen chiah kan awm leh tawh a, U Tluangi nen kan titi mawlh mawlh laiin Zuali erawh kan bulah ngawi rengin a lo thu ve reng a, ka en leh zeuh thin, a chauh hmel em em lehnghal. U Tluangi bazar tura a chhuah hnuah Zuali hnenah ka biak duh thu ka sawi a, sitting room ah chuan kan thu dun a, "Tunlai I awmdan hi ka lo chik che a, i danglam riau in ka hriat eng emaw zep I nei em ni, nge ni a rilru hah na I nei zawk?" ka ti a, hnuai lam chu a bih ngar a, a chauh hmel ngawih ngawih bawk, "U Amelia sawi dan tur pawh ka hrelo" a ti chuai raih a, eng emaw diklo chu a awm chiang alawm. "I u angin min en tiraw?" ka tihchuan a lu a bu zeuh a, "A nihchuan i u ka nihna angin min han hrilh teh le, puih theih na che pawh ka nei maithei asin" ka tih leh chuan a thaw chhuak hak a.
"Englo a nia, in ina ka lo awm hnua zan ka chhuah hmasak ber zan kha, rui deuh a ka lo haw a, min hauh nghe nghe kha" a tihchuan ka bu nghauh nghauh a, "Khami zana ka lo haw hma khan ka chat thla a, ka harh chhuah ve leh chuan ka lo haw nghal tho, mahse ka chat thlak lai khan ka thiante zing a mi ka rin em em in ka video a lo siam a, a duhdan a ka awm lo a nihchuan video chu theh darh sak ah min vo a, tih ngaihna pawh ka hre tawh lo, a duh ang ang chuan ka awm ta a, zanah chhuak tura min tihchuan in mut tawh hnuah a rukin ka chhuak thin, chuan a duh duh danin hun min hman pui a" a ti a, a mittui a hru zeuh bawk, a thusawi chuan min thawng lutuk, eng emaw harsat na a nei ngei chuan ka hria a mahse hetiang a nih rin ngaihna ka hrelo, a lo tuar nasa awm hle mai.
"Ka chhungte bulah ka sawi ngam silo, zu ka in duh tawh lo ka tih in kut min thlak a, a chang leh ka video min thehdarh sak ah min vo reng bawk si, awm ngaihna pawh ka hre tawh lo, zu atangin damdawi hial min tih tir a, tunah phei chuan damdawi ngawl chu ka vei a, tilo in reilo te pawh ka awm thei tawh lo, chuan.." a hmui a pet fan fan a, a mittui chu a hru leh zeuh zeuh thin bawk, a tawrh na chu ka ngaihtuah sak thiam lo zawk, rilru hah reng rengin a lo awm reng chu a ni si a, a taksa danglam na te, a vun nung sarh mai a dan tan em em chhan te chu hrilhfiah chawp ka ngai tawh lo, a damdawi tih thin vang tih ka hrechiang hle. A ni ang kum naupang te, mahni a din chhuah tum tlat mi leh mi tum ruh lutuk in harsatna lian tak a lo tawk a ni a, engpawh tih ngai dawn mahse ka nau lo vo thin tu chu a thiltih man ka hmuh tir chiang khawp ang.
"A duh hun hunah sex min hmanpui a, ka taksa chau te chu engah mah a ngailo, a tirah kha chuan karkhat ah vawikhat chauh te min ko chhuak a, mahse a rei telh telh a, tunah phei chuan zantin min ko chhuak a, a thu ka hnial ngam silo, hmani khan nau ka pai tih ka hre chhuak a, ka hrilh hnuah ti tla turin min ti a, ka duh vanga rai nilo mah ila tih tlak chu ka duh loh thu ka sawi a, mahse video hmang bawk chuan min vo leh ta a, ka ti tla leh ta a ni" a ti a, a in sum thei tawh lo, a tap chhuak hawm hawm tawh a, keipawh chu ka insum thei biklo, Zuali chu kuah in ka tap a, "Chutiang harsat na i tawk tih ka lo hre hauh lova, engpawh nise tunah chuan ka hre ta bawk a, lungngai reng reng suh, Nicholas-a kan hrilh anga, a nin tihdan tur a hre em em ang" ka ti sep sep a, "Mahse, ka video a kawl a, a theh darh a nihchuan ka chhungten khaw eng an hmu ngam tawh lovang" a ti leh a.
"Lungngai reng reng suh, i video chu a theh darh hauh lovang" ka ti a, rei fe kan thut dun hnuah a chauh hmel em avangin a room lamah a lut ta a, thil thlen dan te chu Nicholas-a hrilh ka duh a, phone hmanga sawi mai chi nia ka hriat loh avangin a hnathawh na lam pan turin ka in siam a, U Tluangi a lo let tawh bawk a, Zuali lo en thli thlai turin ka tih hnuah in atang ka chhuak a. Nicholas-a hnathawh na ka thlen chuan a chhungah ka lut thuai a, tunge ka nih an hre tawh bawk a, zahna chibai min lo buk liam liam a, Nicholas-a room ka thleng a, kawngka pawh kik lovin ka lut tlang nghal tawp, a lo buai hmel hle, a mood a tha vaklo aniang a hmel chu a chang deuh rat bawk a, "Bawihi, enge i lo tih dawn a, I lo kal tur thu min hrilh lawk bawk silo" tih pahin ka lamah chuan a rawn kal a.
"Thil pawimawh tak hrilh tur che ka neih vang a nia, phone hmang a sawi mai mai chi pawh a nilo, chuvang in ka lo kal tawp" Ka ti a, ka hmel chu chiang zetin a en a, a ngaih a that loh hmel hle lehnghal. Couch ah kan thu thla a, "Han sawi la" a ti sup bawk, ka kal chhan chu ka sawi ta vek a, Zuali awmdan zawng zawng, a nau tih luih na hmanga a thianpa in a tih tlak sak thu zawng zawng te nen engmah zep awm lovin Zuali min hrilh ang ang chuan ka sawi a. Ka sawi zawh ah chuan mittui tling pam chungin Nicholas-a chu ka en a, a thu hriat chuan a thawng ve tho tih ka hria, a ngawi vang vang a, keimah mai chuan tihdan tur ka hre dawn lo, chuvang chuan Nicholas-a ngaihdan ka nghak a ni ber.
"Chutiang thil chu engtinge a thlen theih zawk?" a aw chhuak khauh zetah chuan a thinrim hle tih ka hre thei, "Engtia hma lak chi nge ni ang, Zuali video a kawl bawk si" rilru hah zet chuan ka ti a, "Lungngai suh, tihdan a awm em em a, engpawh nise Zuali hmaichhan ngei a biak ka duh, a niin a duhdan te han sawi se, hma kan la dawn nia" a ti ta sup a, ka pawm khawp mai. Nicholas-a chuan a hnathawh lai pawh ngaihsak chhunzawm lovin in lamah kan haw nghal a, inchhung kan luh rualin Zuali chanchin U Tluangi hnenah ka zawt a, a room a awm thu min hrilh chuan Nicholas-a chu a va lut a, kei erawh U Tluangi hnenah ka awm thung, ka hmelah chuan thil diklo a awm tih a hrethiam a niang, thil awmdan te min zawt a, tunlai Zuali awmdan hi a hai biklo, Zuali awmdan mak a tihthu pawh min hrilh ve fo tawh bawk.
U Tluangi hnenah chuan ka sawi ve ta vek a, pawi a tih hmel hle, "Chutiang thil chu a lo tuar reng amaw, ka va han khawngaih em aw, a mizia zawng zawng a thlak phah vek a, a hmaa harh vang tak ni thin kha a nun a zawi awi tawh bawk si, a rilru a hah tur zia ka ngaihtuah thiam phak lo" a ti ve sep sep a, a mittui a hru zeuh zeuh bawk. Nicholas-a leh Zuali chu an rawn in zui chhuak a, U Tluangi chuan Zuali a va kuah chawt a, "I lo tuar nasa hle mai, engpawh nise i lam kan tang tlat tih hria la, zam reng reng suh aw" a ti a, Zuali pawh a bu zeuh a, "Tunah police station ah kan kal ang, hmelhriat ka nei a, kan be hmasa phawt ange"Nicholas-a chuan a ti a, a kalsawn zui nghal, Zuali chu ka en thin, a hmel dang bai mai te chu en harsa ka ti.
Nicholas-a rawn let leh hnuah police station a kal tum chuan kan in zui chhuak a, U Tluangi erawh inah a lo awm thung dawn a ni. Police station kan thleng a, Nicholas-an a hmelhriat a tih pa chu kan hmu a, Zuali hnenah chuan a thianpa in a chunga a thiltih dan zawng zawng chu chip chiar takin a zawt a, "A pawi hle mai, hetiang thil hi Mizoram ah a thleng ang tih ka ring pha lo, engpawh chu nise hma kan la vat anga, chu mihring tenawm zet chu a phu tawk hremna kan hmuh tir ang, chuchu i hmingin ka tiam e" Nicholas-a hmelhriat police officer chuan a ti a, a hming chu Lalnunngheta a ni a, Zuali lo vo thin tu hming chu Zonunmawia a ni bawk. Mualpho theih na thil a nih avangin a ruk thei ang berin hma an la a, a rang lamin Zonunmawia chu man turin a naute a tir nghal bawk.
Police station ah chuan kan lo nghak ran a, Zuali chu a khur deuh der der a, a kutah chuan nghet zetin ka vuan a, darkar khat hnuah Zonunmawia ni ngei tur chu an rawn hruai a, a hmelah chuan zam hmel a lang lo hrim hrim, a rawn luh tirh atangin Zuali chu a melh ngar a, a mitmeng hmang chuan a vo ni berin ka hria, Zuali erawh chuan melh pawh a melh tha ngamlo. "Zuali, zam reng reng suh, nang nilovin a ni zawk hian thil sual chu a ti a, chuvang chuan khatiang hmel kha i pu tur a nilo" Officer Nunngheta chuan a ti a. Zuali a vo na te chu thudik a ni em tih an zawh chuan thudik a nihloh thu in a tang tlat a, "Zuali finfiah na tur I nei em?" Officer in a tihchuan Zuali chuan a phone chu min pe a, Officer chu ka pe nghal zat. Password a dah loh vangin awlsam takin a hawng a, zana Zuali a koh chhuah dan zawng zawng te, an in biak dan te chu a la awm vek, Zonunmawia tan chuan phat ngaih na a awm tawh lo.
"Kan lawm hle mai, he thil thleng hi midang hriat lovin a tih theih chuan kan lawm khawp ang, midangin an hriat chuan Zuali hi hmeichhia a ni bawk si a, amah bak an dem dawn silo" ka ti a, "Awle, mipui hriat lovin a ruk thei ang berin case kan siam dawn nia" Officer in a tihchuan thawk a veng hawk thei, in lamah kan let a, U Tluangi hnenah chuan thil thlen dan te chu ka hrilh a, a ni pawh a lawm hmel khawp mai, Zuali chu awm hahdam turin ka ti a, case kha a la fel loh avangin police station ah kan kal a la ngai dawn a, tunah hrih chuan awm hahdam phawt rawh se. Kan chhungte pawhin Zuali an hria a, an in ngaina bawk a, thil then dan te chu ka hrilh hre ve a, pawi an ti hlawm khawp mai, zanah an rawn kal khawm a, kan thiante erawh kan hrilh lo thung, kan chhungte ah pawh upa chin lo chu kan hrilh lo bawk.
Zonunmawia an man hnu thla khat naah police station ah chuan kan kal leh a, judge chuan thutluk na a siam a, Zonunsanga chu kum 15 chhung tang turin a ti ta a, ka duhdan phei chuan damchhung in tang se ka ti mahse hrem na an pe hrim hrim pawh chu kan lawm tawk a tling em em tho. Mipui lamin an hre lova, a chhan pawh Zuali hmeichhia a ni bawk si a, mihring kan in ang lova, Zuali dem tawk an tam dawn tih kan hria, a thil tawn te avang khan a rilru leh taksa in nasa takin a nghawng a, mipui sel na leh zel a tawrh chuan a tan a hreawm zual dawn em a ni. Mizo mipui te hi thil hrechiang lo leh a tuar tu tuar nat dan tur ngaihtuah pui miah lova kan thu hriat chin thudik emaw ti a sawi khu chuk thin kan nih vang a ni pakhat.
Zuali hnenah chuan a chhungte hrilh tur a nih leh nihloh kan zawt a, a ni chuan hrilh a duh lova, a chhan pawh a chhungten an hriat chuan an rilru a nat dawn em vang a ni. A zep reng theilo maithei mahse a theih chhung zep a duh tih a sawi a, kan hnial lo, kan hnenah a la awm chhunzawm zel a, a thil tawn te khan nasa takin a rilru ah nghawng a nei a, a tirah chuan a lang chhuak mai lo, mahse a rei a, case chin fel a nih hnu kar khat na vel atang mahni in tih nat te a ching a, doctor hnenah kan kalpui a, a rang lama enkawl a ngaih thu min hrilh chuan enkawl na tha ber ber hmu se kan duh a, kan ram a Psychiatrist tha ber ni a an sawi chu kan pan pui a, a enkawl a, that lam a pan ve zel tih kan hriat chuan kan lawm hle, midang bula a awm chuan dik lohna a neilo, mahse amah a a awm chiah hian in tih nat chakna a nei thin a, chuchu a buaina ber a ni bawk.
Hun leh ni a liam ve zel a, ka nau pai pawh thla 7 hmel a hmu ve tawh, Zuali pawh a hma ai chuan a tha tawh bawk, ka nau in bialnu a nei ve tawh bawk a, Nicholas-a hnenah thurawn a lak na hmeichhia ngei kha a lo ni. Ka pum a len ve tawh em avangin duh angin ka che zung zung thei tawh lova, Nicholas-a pawh hna atang a rawn haw hma ta ziah. Dawr ah nimin khan kan kal a, ka in check up pahin, engkim felfai takin an kalpui a, hnathawh ngai a awm a nihchuan in atangin ka thawk mai thin, sitting room ah ka thu a, Zuali pawh a thil zir lai a zir chhunzawm leh tawh a, a zir zo ve tep tawh, a thiam sa bawk a khatiang harsat na kha tawk lo se a zir zo tawh ang, "Amelia hei aw, han ei teuh teh" tih pahin U Tluangi chuan a ser bawl chu ka hmaah a rawn chhawp a, phur zetin ka lo ban nghal.
A siam tam nen kan ei zo vek, dar 3 a rik chuan Zuali a rawn haw a, doctor a hmuh pah nghal avangin a rawn haw hma theilo a ni. Doctor thu hrilh te chu U Tluangi nen kan bulah a sawi a, hma a sawn thu te min hrilh chuan kan hlim tlang khawp mai, "Taka, U Tluang heihi vawin a ka ziah ania, ka pe ang che" tih pahin a file ken lai atang chuan lehkha pakhat hi a rawn phawrh chhuak a, kan han en chuan U Tluangi lem a lo ziak chu niin a ziak nalh em em lehnghal, "Awii.. ka van lawm ve, i ziak thiam bawk si" a lem ziah en vang vang chung chuan a ti a, a en ning thei thlawt lo a ni ber. Nicholas-a pawh a lo haw hma leh a, eitur eng eng emaw min rawn hawn leh a, chocolate tih ang reng a ni nual.
Chhana'n zanah min rawn be hlawl a, mut hmunah kan in be ta char char, Nicholas-a chuan mipa ka biak vangin min melh leh run run zel bawk, a thik thu chhe lutuk hi tih ngaihna ka hre tawh biklo. Min melh rum sawt em avangin loud speaker ah ka dah ta ringawt a, "Vawinah ka duh thu ka hrilh a" a tihchuan ka phur kher mai, "Chuan engtinge a chhan che?" hre chak zet chuan ka ti nghal vat a, "Ka sawi zawh hnu khan min en vang vang a, a tlanchhe nghal daih" Nicholas-a chu a rawn nui phuh thawt a, ka awm ah ka lo beng thlawp, "In pa in ka thusawi a hre ve em ni?" Chhana chuan a rawn ti chiah reng a, "Aw hre ve e" ka tihchuan a chek tlat tlat a, "Thiana, chu.. tih ngaihna I va hriat loh hmel ve, i umzui lo hrim hrim tihna em ni?" Nicholas-a chuan nuihzat hmel zetin a ti a.
"Umzui e, ka au zui mawlh mawlh bawk a, mahse min chhan chu sawi loh a tlan char char a, a tlan chak zia lah chu" Chhana'n a rawn tih leh phei chuan kan nupa in kan in sum thei tawh lo kan in en a, kan nui chhuak hak hak, "Nui tawh lo teh u, engtinge ka tih ang, min duh lo tih hria ila chu ka sawi miah lovang mawle" lehlam atang chuan a rawn ti nuah nuah a, "A duh lo che tih a sawi loh kha, hrim hrim in Thakimi te chu bialpa pawh a la nei ngailo a, tihdan tur a hrelo aniang, a duh em em ang che, han nghak deuh la, a lo chhang vat mai ang che" ka ti a, kan in bual na kan tih tawp hnuah Nicholas-a nen chuan kan nui leh nghek a, a tlan chhiat laia Chhana tih ngaihna hrelo lutuk a a awmdan tur thlengin ka mitthla thei.
Zingah chuan Nicholas-a aiin ka harh hmasa a, tho chhuak mai lovin Nicholas-a muhil lai chu ka en reng, a muhil lai mai mai pawh hmuhnawm tham a tling, ka en reng lai chuan a rawn meng siar siar a, ka en tih a hriat chuan a nui suk a, "Tukin chu min thawh khalh a nimaw?" tih pahin min kuah a, a awm ah chuan ka lo bei nghal chial, ka rai hnu atang khan zingah ka thawh khalh ngai meuh lo, "I muttui hmel lutuk a, ka kaitho duh lo che a nihkha" ka ti a, a awm a ka bei leh takah chuan ka muhil lehnghal mai dawn in ka hria. Ka lo muhil leh tak tak a ka harh chuan keimah chauh in ka lo mu leh reng tawh, Nicholas-a chu hnaah a kal tawh a niang, ham bai bai chungin khum atang chuan ka tho a, khum ka siam fel hnuah bathroom ah ka lut nghal.
In hnuaiah ka chhuk a, ka rin loh deuh in Nicholas-a chu sitting room ah a lo thu a, hna kal tur ang pawhin a awm lo, awm hmun nen a la awm vek, tunah dar 10 a ri tawh dawn a, hnaah a kal dawnlo emaw ni, min hmuh chuan a nui suk a, "I tho nuam maw?" tiin min rawn pan hnai a, ka chal ah chuan a fawp vang vang bawk, "Tinge hnaah I kal loh a?" ka lo ti thung, "Vawin chu inah ka awm dawn, kan naute leh ka nupui hi kan awm ange" ka nui hak a, in a a awm dawn tih ka hriat chuan ka hlim ngei mai. Chaw ei turin min lo nghak a, chaw kan ei nghal, "Bawihi, ka secretary kha a ban a ngai dawn a, naktuk lamah ka secretary thar tur interview na kan nei dawn a" a ti a, "Tinge, a fel nen" ka ti sep a, "Phai lamah hna a hmu a ni awm e, a tan pawh a tha zawk a" a tih leh takah chuan engmah ka sawi tawh lo.
"Karleh lamah ka zin chhuah a ngai dawn bawk a, Delhi lamah" a tih leh chuan ka en nghal vat a, "Tinge, a rei dawn em?" ka ti nghal vat a, a zin dawn tih ka hria chu ka hnual nghal rawih mai, "Ni thum vel a ni ang, chu ai hmaa lo haw ka tum dawn nia" a ti a, a kal hma hauh in ka ngai nghal in ka hria. Nicholas-a hnaah a kal lo bawk a room ah awm in movie ka en dun a, ka ham leh bai bai thin, "Bawihi muhil la, nakinah kan en chhunzawm leh mai dawn nia" a tih pawh chuan "Ka duhlo, a tawp tep tawh ang" ka ti tlat a, diktak chuan ka meng hleithei tawh lo, mahse kan movie en lai hi ka muthilh san phal bawk silo, "Duhawm reuh lutuk" tih ri chu ka mang hriat ruai ruai a ni, a hnu deuh ah chuan thil lum nuam zet hian min rawn kuah chial a, engmah ka hriat zawm tawh lemlo.
"Bawihi harh tawh la" ka pasal chuan min rawn sawi dat dat a, ka meng hleithei lo, "Ka nupui chu a mut a la chhuak hle a nimaw, mahse i thiannu a lo kal a a, han ti lui teh le" tih pahin min pawm tho nawlh a, ka la harh hleithei chuanglo. Harh chiang mang lovin room atang chuan min kai chhuak a, inhnuai kan chhuk hnuah Thakimi ka hmuh takah chuan ka harh ve ta chiah in ka hria, a bulah chuan ka thu a, ka la ham bai bai bawk, Nicholas-a erawh a kalsawn nghal daih, "Tinge I lo kal a, chun chun ah lehnghal, hnaah I kal lo ami?" ka ti a, "Kal e, ka awl lai a nia ka lo kal lawk" a ti a, "Enge i lo kal chhan?" ka tih leh takah chuan sawi hreh hmel zetin min en a, a thusawi tur chu ka hre nghal mai, mahse hrelo ang deuh chuan ka awm tlat a.
"Ih.. englo a nia, nimin ah Chhana khan min duh thu a sawi a?" a ti a, "Chuan" ka ti sep, "I thinrim lo ami?" a tihchuan ka nui hak, "Enge ka thinrim ngawt anga, thinrim lo nasa" ka tihchuan a thaw huai a, "I thinrim ka lo ring a" a ti leh mai a. "Pasal ka neih tawh hi, Engvangin nge ka thinrim ngawt ang, chuan Chhana chu i duh ve reng reng em?" a ngawi vang vang a, min chhan hun ka lo ngaichang reng, "Ka hre tawh biklo, ka hnar em em lova, mahse...". ti a, "Chu i hnar bik lova, buaina a awm loh chu, chhanglet hmiah tawh, Chhana hi kan mi hriat chian a nihkha" ka ti a, "Nia.. ka ngaihtuah tha leh ang, ka kal lehnghal phawt mai ang, ka tlai dawn tlat, ka hmu che chu ka thawl huai mai" a ti a, pawn thlengin ka thlah a, inchhung ah chuan nui vur vur chungin ka lut lehnghal.
Cont...
Comment leh click ah hian tan min han lakpui hram hram thin ula aw.. regu in duh thin kha..
