A pang chu deh sakin a khua lah chu a sik ang hluah a. Ka tha a khur nasa in ka hlauthawng hle... Damdawiin kal lah chu a duh der lo lehnghal! Thleng kumah tui vawt leh towel lain a chal leh a nghawng te chu ka deh sak zung zung a.Theih leh theih loh hian a rawn meng tawk tawk a, a thaw zawi sawt hle... "Hey! In ti harh hram hram rawh ka inah hian chahthlak tum reng reng suh!" ka kut te chu a khur deuh der der a.
First aid box ka kawl kha va zawng nghal vatin ka thut chilh nghal vat a. A hliam lai ka hmuh chuan ka tim leh deuh, mahse hetiang a awm thei ka ni lo. A nunna hi ka kutah a in nghat a, chiai hman ka ni lo! Khur deuh dar dar chungin a hliam lai chu sil vai tumin ka tin uai a, ka ban rekah chuan a rawn man bet chawt, harsa taka a lu kanin min rawn en thla a "I hliam hi ka enkawl dawn alawm... " ka tihchuan min vawnna chu thlahin a lu a nghat zui nghal zat.
Inti huaisen in a hliam chu ka sil fai zawh hnuah damdawi ka neih ang ang chu ka hnawih sak a, ka tuam sak nghal bawk. Thui tir chu a ngai ngei ngei ang! Ka zawh fel hnu chuan a muhil zui nghal a, keipawh ka tlan a tla hial, ka kut leh sofa ah te chuan thisen a kai deuh nuai a, ka kawr hma pawh a bang chuanglo. Towel chu ti huh lehin ka sawr a, a chal ka deh sak vang vang bawk.
Bathroom ah chuan va lutin ka inti fai nghal zung zung a, ka kawr pawh ka tlang nghal vat...a lu zawn a chhuatah chuan thuin a khawsik zia awm deuh theih nan ka dep char char a. Vawikhat mah damlo la buaipui ngai lo ka ni bawk a, ka zei loin thisen ka hmuh phei chuan ka chiai vek zel. Mahse zanin chu huaisen ka inti ve hle..
Hetiang taka na tuar tur hian engthil chiah chu nge maw a tih le.. Engtin nge ka apartment awmna te a rawn hriat chat theih? Tinge hetah kher a lo kal... Mr. Rodrick sawi ang khan mi hlauhawm tak a lo ni ve reng zawk em mi? Zawh na tam tak ka nei a, mahse min chhang thei an awm si lo....
Ka mit ka meng riai riai chuan towel humin sofa ko tlang bawhin ka lo mu thlu tih ka hre ve chiah.Ni chu a chhuak tan siar siar tawh,sofa ah chuan Rune a lo awm tawh lova,ka hawi chhoh chuan thu chungin min lo thlek vang vang.Ka kat dawr a, ka meng phawk hru.... "I... I.. Eng nge i an?" ka ti chhuak tawk,a hliam kha a nat hmel sia nikhua hrelo in a la mu reng ang chu tihnak a laiin fiah taka meng chungin min lo en kar thung.
"Ka tha" a ti bul nghut a, a hliam ka tuamna lai chu a dawm zui vang vang bawk....Thilthleng chu zawh chak viau mah ila ka hlau ve deuh "I phone ka lo hmang lawk" tia ka lama a rawn hawi thlak leh chuan ka lo thu ngil zat a. A mit ko a san at chuan ka phone ka zawng nghal vat, ka bul lawka first aid box phenah chuan lo awmin ka pe nghal thawr. A hmui ti sawi pah zeuhin a la a, muang changin a ding chhuak a,keipawh ka lo ding ve nghal vat.
Ka phone ah chuan password ka dah ve lem lova a hawng nghal mai bawk. Tu emaw a call ni awm tak a ni phone chu a beng bulah a dah a, kawngkhar lam panin a kal hla deuh "Ka tha... Tunah rawn kal rawh" a tih te chuan ka din na ngaia dingin ka lo en kar a. Nizan khan a kamis phelh sak daihin thisen a kai hnem em avangin bathroom chhuatah ka theh thla tawp a. Tunah pawh kawr ha loin a la awm, a dar a hlaiin a sa a tha a, tha hrui a ngah hmel hle..
Chutia ka lo en ngawr ngawr lai chuan a rawn in her a, ka mit ka la sawn rang hle.. Ka lampan a a rawn phei te chuan ka lo melh tha ngam lova, bang ka en loh leh chhuat ka en thul..engtin emaw ni tak hian ka zam ru hle. "Ka lawm e" phone chu a rawn lek kang a, a mit ah pawh en loin ka la ve nghal mai bawk. A hliam ka tuam na lai atang chuan thisen chu a la rawn put tho a,mahse far tham chuan a ni tawh lo.
"Ih... I hliam hi thui tir a ngai ngei ngei ang... " zawi sap a tiin ka kawk pah zeuh.Ka en chhoh chuan a lo kiai suk a "Ka nunna min chhanhim sak a ni" a lo ti thum dât a. A hmel chu la dâng hle mahse a that hmel tawh viau tho... "Tinge...?" ka ti zawi sap a, zawhna mitmengin min lo en "Tinge hetiang hliam i neih?" ka ti ta nge nge. "Ka in hliam fo alawm" thaw halh pah chuan a ti ve mai a. Mahse inhliam satliah a ni lo tih chu hai rual a ni lo, ka hriat sual loh chuan chem a fihna hnu hma ngei a ni.
A taksa chu ka en kual a, ser pawh a nei nual a, a then phei chu kut zung tang chen dawn dawn an ni. A nak sir lamah chuan tattoo a chhuk thla zawng a eng emaw ni inziak hi a nei bawk. Mahse eng thumal nge a nih tih ka hmuh chiang thei lo "Ava hmuhnawm awm ve" a rawn tih chuan ka lo thlek nasa viau a ni tih ka hrechhuak chiah. Rang lutukin ka hawisawn nghal a, a hmel ka han en chhoh chuan a mitko san atin a lo kiai suk. Ka zak rum rum mai "Kawr hak tur ka lo laksak ang che" ka zah zel ah tiin ka room lamah ka kal phei nghal rawk rawk a.
Olivia-in a bialpa kamis a rawn riah tum khan a theihnghilh a, a dang ka leisak leh mai ang. Room atanga ka chhuah chuan tukverh bulah lo dingin pawn lam chu parda tlem keu kau in a lo en a. Va pan hnaiin ka aw ka thian kharh a "Hei... I ha tawk angem ka hrelo... " en pawh ka en ngam tawh lo ka kamis keng chu ka en tlawk tlawk ringawt.A rawn in her tih a ke atang ka hmu thei bawk.Kawr chu la ve maiin a hak lai chuan a hnung chhawn zawngin ka ding nghal zat,ka va han en tawh awm lo chiang tak!
"Engtin nge ka in number i hriat theih?" ka ding ngaia la ding reng chung chuan ka zawt a "Min hrilh kha.. " a lo ti sam et.Khami zan a min thlah tum te kha chuan a veng hming leh building awmna lai bak ka sawi lo hrim² ka apartment awmna floor leh number kha chu ka sawi lo chiang alawm "Ka in number ka sawi lo reng reng!" tiin ka in her vut a, a lo ha fel diam tawh.A ha tawk chiah a nih hmel, a ban kawrkilh kilh pahin a rawn pen hnai a ka beng bulah rawn kun hniamin "I chungchang engkim ka hre vek" a ti ri sup a, min melh zui zeuh bawk.
Ka hmul thi te chu ding uarin ka hit mup² ni ber in ka hria... Phawk zet chuan a mitah tak ka melh zui nghal. Ding ngilin sofa a,a coat chu lain a ha zui zat "Tinge ka chanchin i chhui zui a? Ka lakah hian duh in la nei em mi? Engtia min tih nge in tum?" zawhna tam tak ka nei a ka hlauthawngin hman zana mipa pahnih ka hmuh hnuah a ni a rawn lang ve leh a, ka him lo riau in ka in hre tawh "Eng vangin nge hetah i lo kal?" ka pan hnai hret a, a chhanna beisei takin ka en kar bawk.
Thawk la halhin a rawn hawi thla a "Ka hmu duh che a" tih zawngin min chhang, a hmel chu a thutak hle thung.A chhanna chuan zawhna min neih belh tir sauh "Eng vangin nge min hmuh chu i duh?" kawngkhar lampan a a kal chu ka zui phei ve zel a...chhanna ka mamawh takzet.A ding duh loh avangin a kawr banah chuan ka man bet a, ding ve nghal chatin a lu a rawn her phei deuh.
Thlah leh vatin hnuailam ka bih ngawt "Min hmu turin subway station ah khan i kal ziah thova tinge hmu tur che a ka lo kal chu mak i tih viau?" a rawn tihchuan ka hawi chho chiang hle... A ni pawhin ka mitah tak min lo en ve kalh.Khang hun chhung zawng khan a lo hre vek tihna a nimaw! Eng emaw sawi tumin ka ka chu ka ang leh zuau thin, mahse sawi tur ka hamhaih zo vek.
Chutah kawngkhar chu tuin emaw a rawn kik ri dat dat a, ka en nghal vat. "Boss.. I awm em?" rawn ti thum dut in a reh zui nghal.Ka dar tawn tawnah chuan rawn dawmin ka hmai zawnah a rawn kun hniam a "Fimkhur rawh.. I him lo" chiang tak hian a ti sap a, ka dar a hmer nghet sauh bawk.Kawngkhar chu rawn ri leh dat datin a ding ngil a, kawngkhar lam chu a pan nghal vat.Ka din na ngai ah chuan ka ding khawng reng ringawt.
Kawngkhar a hawng chuan reastaurant a mi Usher kha a lo ni "Boss i tha maw?" a lo ti nghal vat a, keipawh chu min rawn thlek zeuh "Kal ang" ti nghutin Usher chu thu awih takin a kal nghal a, Rune a chhuah hma chiah chuan a rawn leh hawi a "Ka veng him ang che" a tihchuan ka lo en tlawk² ringawt. Chhuak zui nghalin kawngkhar chu a khar a. Thilthleng te hi ka hrethiam lo tak zet.
Engvang a khatiang din hmun a a ding laia min hmu duh nge a nih? Tinge ka veng him ang che a tih? A tan a eng nge ka nih? Tunge i nih Rune Declan?
Rune pov
"I hliam na viau em?" car seat hnunglama ka thut luh rual chuan Usher-an min lo zawt nghal zat a.Ka thut rem hnuah thawk la halhin mit ka chhing vang vang "Ka tha... Chemah khan damdawi an tah vangin nikhua ka hrelo mai a ni.Mr.Barnet kha lo awm turin hrilh rawh" tiin car seat hnunglam ah chuan ka lu ka nghat a. Damdawi hna tawh vang khan ka lu pawh a la hai deuh chhup bawk.
Ka room ka luh chuan Mr. Barnet, ka doctor chu sofa ah a lo thu vang tawh a. Khum ah chuan mu turin min ti nghal zat bawk "I hrisel in i la chak tha bawk a i hliam hi chu a dam vat ang... Mahse an damdawi hman khan i taksa a lo fan nasat deuh avangin lu hai leh luakchhuak te chu ila nei ve deuh ang nga... Ka damdawi pek che hi i lo ei tha viau dawn a nia.. " ka hliam bawihsawm mawlh mawlh pah chuan a ti charh charh a. Kum 60 lai ni ve tawhin ka tan rinawm takin a la thawk char char a ni.
Ka hliam te a bawihsawm zawh hnuin room atang chuan a chhuak a, Usher chu a lo lut zui nghal vat bawk "Tute nge tih i hre chhuak tawh em?" khum sir a Usher ding chu ka zawt a "Boss...khami te kha Mr.Rodrick a tirh te an ni lo" a tih chuan Usher a ka en chho nghal vat "Mr. Morana zawk a ni" ka mit a en kalh chung hian a ti thum dat a.
Thaw chhuak halhin ka hmalam ka melh bing ngur a. Eng vangin nge a ni kher? Maven Lunette.....tinge ka hmelma lian ber fanu i lo nih kher?
(Ziah khawl sa ka nei si lova ka han ziak chawp nawk nawk a,school chawlh veleh ka lo ziak lawk teuh ang nga ka lo ti thui deuh tawh ang
)SMERALDO
BY
KENNELLY.B