Mikhual Hunter - 7

[Vtei Jahau]

Zomuanpuia's P.O.V




Ngaihdami Thingkung a lo in khai zawi hniang tawh chu ka va chawi lawp a, "Pa helamah lo tlân teh u" tiin mangang zet chuan ka au chiam chiam a, mipa meuh pawh ka in ti pachang thei lo, ka in rin hma hauhin ka biangah mittui a rawn luang zawih zawih a, ka mittui te chuan an rawn luang chhuah vangin engkim an siam ṭhat theih an ring a ni mahna.








Tih theih dang nei lo a, ka lo din khurh zawih zawih lai chuan kapa min au thâwm ka hria a, "Bawiha khawnge i awm?" a rawn ti a, aw khur dat dat in "Pa, helamah lo kal thuai ru" ka ti thei hram a, rang tak chuan an rawn kal a, kan dinhmun an rawn hmuh takah chuan rang takin Ngaihdami chu kan la thla a, zawl lai ah chuan kan mut a, a mar te chu ka en nghal vat a, zawi tê a a lo la phu ve det det ka hriat takah chuan rang zetin Ngaihdami chu ka pawm nawlh a, car lam chu ka pan pui nghal, rang takin damdawiin lamah chuan kan tlan phei pui ta nghal a.







"Muanpui hahdam rawh a ṭha mai ang" ka vei sek chu Patea'n min lo ti ding in a ti a, a ni pawh a rilru a hah ve tho tih chu a lang reng mah se puitling zawk a nia, a in thunun mai mai a ni, ER pawnah chuan kan lo nghak ṭhap a, Doctor chu a lo chhuak har hrep lehnghal.









"Station ah khan lo kal lovin a bulah khan lo awm tlang hle hle ila aw" ka ti leh ṭhin a, mah se tun a ka in chhirna te chuan sawtna pakhat mah a nei tawh si lo, "Muanpui, a ṭha mai ang" tiin Hruaitluanga pawh chuan min lo hnem ve bawk a, "Nia, Pathian kan nei a lawm Muanpuia" U Masanga'n a rawn tih ve chuan kan bulah a lo la awm ve reng a ni tih chu ka hre ve chauh.








"Masang, a tlai tawh emai, i chhûngte pawh an hmai zahawm lo va haw tawh mai rawh" Kapa chuan a ti a, U Masanga chuan, "A dinhmun tal hriat ve ka duh a" in thlahrun hmel fe a a lo tih lai chuan Doctor pawh a rawn chhuak ve tawh, "Doctor engnge a an" tiin kan lo hnaih nghal tuau tuau hlawm a, Doctor chuan "Kan theih tawp chu kan chhuah a, mah se hetah chuan hmanrua a awm ṭha lo bawk nen" tiin a chawl leh daih a, ka lo ngai thei leh pek lo, "Chuan engnge" vin lam lek lek chuan ka lo ti a, "Zomuanpuia" kapa chuan a rawn ti ve nghal hmuk.







"Tûnah chuan a la ṭha lo, a la harh lo a, tun aia tlaiah hian lo kal pui phei ula chu kan chhan hman kher lo ang" a ti a, a hmelah chuan eng emaw zêp ṭhen a nei tih chu tu te pawn kan hai ka ring lo, Putea chuan, "Doctor engmah sawi hreh nei suh, ngaihthlak kan in peih e" a ti ta chiah reng a, "Hetiang ho hi chu an rawn harh chhuak leh a nih pawh in rilru lamah harsatna an neih phah tawh ṭhin a, in fanu harsatna tur pawh hi ka sawi thei lo a ni, harh pawh a rawn harh tawh lo zawk maithei a ni, mah se la a rilru lam pang erawh chu a vanneih leh vanduai ah a in nghat tawh a niang chu, a rang lamin Aizawl lam pan pui ula a ṭha khawp ang" a ti leh a, ka rilru mangang lutuk chu ka lo thaw chhuak leh hap ṭhin, Putea chuan ka dârah a rawn vuan a, "Doctor kan va hmu thei angem?" a ti a, Doctor chuan pahnih chauh kan luh theih tur thu a sawi takah chuan Putea nen chuan kan lut a.









Kawngkhar bulah chuan kei chu ka ding deuh dat, a hmui la duk deuh chur mai te ka hmuh chuan min vit ngut ngut ni mai hian ka hria, "Duati, ngatinge khatiang tih duhna rilru te i put tak mai leee" Putea pawh chu a in sûm zo ta bik lo a, a mittui chu a rawn luang zung zung, Ngaihdami hian tun a a buaina kan hriat chin aia thuk hi buaina a la nei ngeiin ka ring a ni, midang bulah phei chu ka sawi duh chuang lo a, mah se a taksa a lang chhuak ser te chauh lo pawh hi sernung engtikah mah dam thei tawh lo tur a neiin ka ring tlat a ni, a rawn harh hunah ka la zawt thei ang chu.








"Pute sum lamah chuan buai suh u, Aizawlah chuan naktukah kan tlan thlâk pui nghal dawn nia, keimah niin senso engkim chu kan buaipui vek ang" Putea pan phei pah chuan ka ti a, Putea erawh in, "I a mai mai emai, kan tunu enkawlna tur sum te chu kan nei ve a lawm, Muanpui, i thiam loh engmah a awm lo a nia aw, hahdam deuh in awm rawh ka tih kha" a lo ti ve thung a, chhang tawh lem lo mah ila ka rilru chu sawh sawn ka tum chuang lo a, kanu leh pa te pawh biak chu ka tum ruh khawp mai.







"Mipa in riahpui a theih loh a nih chu" tiin Kapa a rawn lût a, "Kanu va hruai a ngai dâwn a nih chu" Patea'n a lo ti vat a, "Kannu riak zawk rawh se, kanu chu a chak vak tawh lo emai, damlo riah pui tur em chuan" kapa chuan a lo ti ve vat bawk a, "Pa kanu chu va hruai lawk ila" ka lo ti a, Aizawl kal dan tûr vel sawipui ka duh vang a ni.









U Masanga Motor bawk chuan Putea tih loh chu kan haw leh ta ṭhap a, min thlah hnuah Hruaitluanga U Masanga pawh an haw ve nghal mai a, Kapi leh pu te pawn kan ruala kal chu duh ve vang in an in siam chhûng chu kan nghak leh te te a, kanu in siam tur chu kapa nen kan zui haw ve a, kan in kan thlen hnu chuan "Nu, Pa, naktukah hian Ngaihdami hi Aizawl lam pan pui nghal a ngai dâwn a" ka ti dêk dêk a, kanu chuan, "Nangni pafa hi an mah ni a kal tîr emaw te kha in tum a nge, nei lua lo mah ila kanu te ai chuan kan khawsak pawh a zia zawk a, chuvângin pawisa sen ngai zawng zawng pawh tum sak vek ang che u, ka la in thiam thei lo a ni, Kanu chauh kha chu awm se ka hrethiam a, an in a ka awm ve lai rengin hetiang hi a thleng a nia" kanu chuan a ti a, a ṭap leh rih a, kapa chuan kuah in a hnem mawlh mawlh, kanu chauh riah tîr chu ka tum lo nasa.








Kan hman tlân hnuah chuan kan vaiin Damdawiin lam kan pan a, midang zawng motora an chuan laiin Scooty ka keng thung, eng emaw thil hmanhmawh thlâk a awm palh in Scooty a ṭangkai zawk miau a ni.









"Hmeichhia a mah chauh chuan kan riah tîr thei lovang, min hrethiam mai rawh u, kan dinhmun ho a serious a, zan lai ah te eng emaw buaina awm ta se mawh in phur ngam dâwn em ni?" tih zawngin ka nawr a, midang zawng chu Ngaihdami bulah an awm tawh a, kei erawh chuan Nurse ho ka la dawr ngat ngat, ka ṭawngkam vang chuan an ni pawh chu an zâm deuh tih ka hria, "Mah se tlangval" an tih leh pawh in, "Min hrethiam mai rawh u" ka ti ve tlat a, an ni pawh chuan min phal sak ve ta hram a, Ngaihdami ka hmuh phak loh a dah chu ka tum tawh lo.








Ngaihdami awmna Ward a ka va luh ve chuan min lo en ṭhap hlawm a, "Khawnge i kal daih a?" an lo ti vat, "Nurse ho" ka tih lai chuan kanu in "Tun ang hunah Nurse ho lo va bem vel na hun a niin i hria em, Chatuantawi" a lo ti chhum hmuk a, chhan tum chuan ka ka ka ang zuau a, ka peih leh lo, nutling hlir an awm a, sawng pawh saw hmeichhia anga en vek ang min ngai a ni mahna.









"Kanu min hnial tawh lo mai rawh u, hetiang kawng tala kan puih ve loh che u chuan ka dam chhung hian ka rilru a nuam tawh lovang, Aizawlah chuan in enkawlna ṭha ber ber hmangin Duati chu kan enkawl anga a ṭha ve leh mai ang, chuan hei Zomuanpuia hian engkim a pui tur che u in a zui dâwn che u nia, in ah a ṭangkai tak tak chuan lo" kanu chuan a ti leh hram a, ka lo tum nasa hle a, mah se tuman min ngaihsak lem hlei lo a.







Midang zawng an chhuah vek tawh hnu pawh a ka la awm tlat chu kanu chuan "Kal ta che an kalsan vek tawh che saw" tiin min en kar a, "Ka riak dâwn" tiin khum ruak pakhat ah chuan ka bawk nghal hmak, "Ve ringawt a che, an phal loh kha aw, zanlaiah hnawh chhuah te i ngai a nge, ka peih miah lo a nia" kanu chuan a ti a, kapa pawh chu a lo lêt leh, "Lo kal ta che" a rawn ti ve leh a, Nurse te ka dil vek tawh ka riak ve dawn, Pa nangpawh Putea te inah riak mai rawh an thla te a la muang lovang" ka ti ta daih a, kapa chu min hrethiam tak in chhuah nghal mai a tum a, kanu erawh in, "I fapa I hruai te che maw le" a la ti ṭalh a, kapa chu ka kut a kal tur a ka tih hnuah kanu bulah "Ngaihdami kha o ti phâwk lek a nge" ka ti leh a, kanu pawh chuan min melh no lo khawp mai.








"Ka ngei che a nia, Duati chung a i sual theih zia te kha ka ngaihtuah lêt uar uar a" a ti a, ka lo nui ringawt, chu chuan a ti thinrim zual a ni ngei ang, "Chatuantawi, ka thusawi kha ngaihtuah chiang rawh aw, nui mai mai suh" ka bul a rawn ṭhut pah chuan a ti a, "Kanu ve si min vân hrechiang lo tak" ka lo ti hluk thung, "Ka hrechiang ve tawk che" a lo ti bawk si, ka lo chu ka thing nawk a.








"Min hrechiang lo a lawm le, khatianga ka awm chhan te kha chu" ka tih laiin kanu chuan, "Ka hre vek che, Ngaihdami i ngaihsak zia pawh ka hria, mah se dawihzep takin i che a, i lan chhuah tîr ngam lova, i hnaih theih nan i chhaih nawm nah ṭhin tih pawh ka hre vek" kanu in a tih leh tak zêlah chuan ka en haw ringawt, ka awih lo, Hruaitluanga'n a hrilh chiang lutuk, "Lalhruaitluanga ṭawng theih zia hi chu aw" tiin ka phone chu ka ban vut a, kanu chuan "Hruaitluanga'n min hrilh teuh lo, inu ka nih hi ka tih chu hre mai rawh, i rilru thleng hian ka chhiar lo chauh zawk" nui deuh chung chuan a ti leh a, chutiang a a lo hriat vek tak ro ro ah chuan tiin "Ka ngam thlawt lo a ni" ka ti a, kanu chuan "Eng chu maw?" a lo ti vat, "Ṭhian ang bawkin ka hnaih ngam lo, a lak a ka rilru put hmang te hi engtinnge ka lan chhuah tîr ang" tiin ka hûi pap pap a.








"A ngai lo, i lerh ropui si, Ngaihdami rilru i ti na ang" kanu chuan a lo ti daih, "I mak" ka ti hluk ringawt, "Kan khua a mikhual nula hmelṭha deuh hlek an rawn awm tawh chuan i rim nghal chawt a, Kan khua a nula te hi i bialnu hlui nilo mang pawh an awm lovang, chutiang khawp chu i nia" kanu chuan a tih zawm leh a, chhân ngaihna ka hre lo, thudik a ni miau sia.









"Ka sim tawh" chu ka ti hram tho, "Chatuantawi-a nih hi nang bak bak a in hmeh pawh an awm lo" a ti leh a, kanu nen chuan kan mut chhuah hma chu zawi te te in kan ti ti a, thil ho deuh deuh kan sawi ,Ngaihdami chu mo atana a duh viau thu te pawh a sawi nual mai, tu neih ve vat vat tawh a chak thu thleng in a sawi nghal ringawt a, kum 20 em pawh ka la tling lo a nia, kanu em em hi chu.






Zing khua a lo vâr a, Ngaihdami chu a dinhmun a la ngai reng a, Aizawla kal pui tu tur ber ka nih vangin in siam tûrin ka haw a, Dar 9 velah kan chhuak dâwn a ni, hmanhmawh ang reng takin ka haw a, rin loh deuhin kapa in ka thawmhnaw chu a lo khung fel vek tawh, ka mamawh tur ang zawng zawng nen, tih tur a tlêm phah sawt vang chuan ka lawm ang reng hle, "Pa ka kekawrte i thun em?" ti a bual pindan aṭanga ka au lâng lang chuan kapa in "Aw dah e, Hei Ellie a rawn leng a" a ti a, ka chhang lo, henu te hi chu ka khawngaih tlat ṭhin, ka bialnu hlui a nia, min la thlah thei bawk si lo, eng ang pawn bialnu nei mah ila, min zui tlat tho zêl.









Ka in thlâk zawh hnu chuan ka chhuak a, a lo la awm ve reng a, kapa erawh a lo awm lo thung, "Aizawlah chuan i kal pui dâwn a maw?" a ti a, hnuailam chu a melh ran, "Imm" tih ringawt in ka chhang, "Aizawl i awm chhûng in nupui nei miah suh aw, bialnu chu nei rawh mah se nupui kher kher chu nei suh" a ti a, ka chhang lo, Ngaihdami a harh hma te chu engtinnge nupui ka neih theih ang ni, mo tur ber a la harh miau loh chuan.








"Min chhang ve la" a tih takah chuan, "Imm" ka ti leh ta ringawt ka bag chu ka ak a, chhuah san mai chu ka tum a, "Chaw pawh I ei si lo a, I chau lutuk ang, heihi kalkawngah ei rawh" tiin eng chhang chhang emaw leh in tur lam hi paper bag ah min pe a, ka la ve mai bawk, "Duati chu dam deuh in i lo haw pui leh dâwn nia aw" a ti leh a, ka bu nghat a, ka chhuah san zui nghal, ka chhang ṭha vak duh ṭhin lo, beiseina ka siam sak anga ka tih hlawhtling thei dâwn bawk si lo.







Kan motor chuan damdawiin lam kan pan leh a, Kapi nen Ngaihdami chu Aizawlah kan kal pui dâwn a ni, Kapu leh Putea chu an in thlahrun vangin an kal ve duh lo niin ka hria, engkim tum sak vek kan tum si a, an in thlahrung niin a lang.










Ambulance a kan kal dâwn vangin Ngaihdami chu Ambulance ah chuan kan dah lût a, tûnah chuan pipe hmangin oxygen kan him tîr tawh, a thawk a buai deuh vang a ni, kan haw lai khan a thawk a lo buai deuh a, Doctor in a lo vuah sak a lo ni, kanu chuan ka kal hma in, "Ipi leh Duati hi lo thlahthlam miah suh ang che, i awm duhdah tih thu ka dawn vaih chuan" a ti a, kapa chuan a lo khap vat, "Tlangval a nih tawh kha, awmdan a hre em em, ka fapa a nih hi" tiin, keipawh chu ka lo nui ve ringawt.









Dar 9 a rik takah chuan keini pawh kan tlan chhuak ta nghal a, kapi chu a hmaah a ṭhu a, kei leh damdawiin a thawk mipa pakhat erawh chu a hnungah Ngaihdami vengin kan ṭhu thung, "Ṭhianpa, i bialnu em ni?" ka bula ṭhu chuan a ti a, ka chhan dân tûr ngaihtuah in ka ngawi vang vang a, "A hmel ṭha hle mai, mah se a taksa a ser ho hi" tiin zawhna ngah hmel tak chuan min en a, a ser te a zahpui theih zia ka hria a, a puan sin lai chuan ka khuh ṭha vat, "Chu lam buaipui suh" ka ti hmuk a, rin thu bak chuan a chhan ka hre bik miau lo a tin ni.









Ka ṭawng tak hmuk hmuk ah chuan min be zui ngam tawh lo a ni ang, a ngawi ta reng a, kan kum chu a in rual reng ka ring, mah se kei aiin a te a, a hâng deuh zawk bawk, "I thawhna a rei tawh em?" nuam lo tih hmel deuh a awm rêng vang chuan biak tlângnel tumin ka ti a, "Rei lo e, kum khat pawh a la ni lo ang" a lo ti ve vat a, keimah zawk chuan ka bia ka bia a, kan in biak kan in biak takah chuan kan sawi duh zawng te pawh chu a lo in ang viau a, kan thlen thleng chuan kan ti ti barh barh a, ka rin aiin kawm pawh chu a lo nuam phian lehnghal a.









Damdawiin kan thlen chuan thawktu te chuan min lo pui vat a, Cabin lamah Ngaihdami chu kan dah lût a, Doctor pawh chuan hmanhmawh takin min lo bawihsawm nghal a, kan khaw Doctor khan min lo biak sak tawh a ni ngei ang.









"A thisen hi test tîr a ngai dâwn a nih hi, a test theih theih kan test a nga, result lam turin tu emaw zawk khan min lo zui dâwn nia aw" a thisen lak mawlh mawlh pah a Doctor in a tih chuan kapi chu lo awm turin ka ti a, keimah chuan Doctor chu ka zui vat, "Doctor a ṭha leh a ngem" ka ti a, Doctor chu a ding deuh dat, "Pathian kan nei a, a mahah rinna nghat phawt mai ang aw" tiin Doctor chuan ka dârah a rawn vuan a, Thisen test result lamna tur te chu min kawh hmuh a, thisen test tur a pêk hnu chuan Doctor chuan min kalsan a, kei erawh in ka lo nghak ta ran, rei vak lo ah chuan thisen test result pawh chu a rawn chhuak a, hmanhmawh takin Doctor bulah chuan ka kal pui lehnghal a, Doctor in test result a en rual chuan thawk a la deuh kawk, "Ka rin ang chiah a ni, a damdawi bar vang a nih hi" a ti a, kapi nen chuan kan in melh zawk a, tu zawk mah mah chuan ṭawng chhuah kan tum lo.






Chhunzawm leh tur.