PATHLAWIA (NEVER LET YOU GO) Chapter 1-17

[Te-i Mrs Ambrose]

Pathlawia (Never Let You Go)
By: Te-i Mrs Ambrose

Chapter 13




Hmangaihna lipuiah min luhtir a, min luhtirtu ber lah chuan a derin min hmangaih thu a sawi a, li thuk lamah min nawr lut a, kei lahin a thukzia reng dâwn lovin ka hmaa mipa chiah ka thlir a, ka pil riai riai a, ani lah chuan lui kam aṭangin min thlir vel mai mai si. Ka hmuhtir atang khan ka lo atchilh tawh a nih kha. A rei deuh hnuin ka theinghilh ta emaw ka ti a, mahse, a lo lan leh rual khan engkim a thar leh nghal vek anih kha.










Engtik aṭang khan nge ka hmangaih ka hre lo. Mahse, tuna thudik ka hriat hnu hian a ni, ka hmangaih nasat tawh zia ka hriatchhuah chauh ni. Thudik hi ka hrechhuak tlai hret, tunah chuan atpui tham hial khawpin he mipa hi ka hmangaih tawh.










Hmangaihna li thukah ka pil riai riai a, a thuk zia ka hre lo. Ka thlakna lek phei ti chuan tawpna a neih ka ring lo. Hmangaihzuala han min hmangaih ve lo tih hre mah ila, thlalh thei tur khawpin ka chak tawk lo. Jarson chu lo dahṭha ta ila, amah Hmangaihzuala kalsan tur hrim hrim hian chakna ka nei lova, ka ngam hek lo. Ka dinhmun leh keimah chu nep ka inti, mahse, ka daithui laklawh tawh em a ni.










Mi thenkhat chuan kalsan vang vang awm pawh min tihsak maithei. Mahse, ka tan chuan a harsa tawh lutuk. Khang dawt thu min lo hrilh zawng zawngte kha dawt mai an ni tih ka hriat hnu pawh hian ka la hlimpui cheu a, a chhan chu khang dawt thu mawi tak tak min fahtu kha tudang ni lova Hmangaihzuala a nih miau vang a ni.










Ka hlat chuan ka na ber dawn tih ka hria, ka duh tirh aṭang renga ka buai phahna mipa kha a ni miau a, a der mah ni se, ka tan chuan kha bak baka damlai pialral kha a awm tawhin ka ring lo. Kalsan ai chuan a dera a thusawi ho avang pawh khan ka hlim zawk ang tih ka hria.










Mihring thinlung te chu a inthlak danglam thei alawm, tu mihring mah hi danglam thei lo kan awm lo. Hmangaihzuala pawh hian a fapa avangin min hnaih a, nakinah chuan he a dera min duhna hi duhna takin a la thlak ve maithei asin. Ka beiseina chau rau tak chu keima dap chawp, a kila en pawh eng ṭha mang lo ka dapchhuah a ni ber. Tlawm hi ka inti ngawih ngawih. Mahse, hmangaihna avanga tlawm ral ta ṭhak pawh an tam a, kei pawhin a tawpah vanneihna changin ka hmangaihna hi chhan let a ni ve mahna.










Jarson ka mal nghenga ka mut tir chu a rawn che a, Hmangaihzuala te thusawi ka hriat zawh khan pawn lama ṭhutthleng lam ka panpai daih kha a nia. Ka bianga mittui tla chu ka hru a, Jarson pawh mit nuai chat chat chung hian a rawn meng a, "Ama, ka muthilh lai khan kan in bulah kan lo awm daih maw?" a tih chuan "Imm, i muthilh lai khan motor kha a tlan char char a, in lam pan tawh ang aw" ka tih chuan a ding a, a kuta kaiin in lam chu ka panpui a.
Hmangaihzuala bulah hian ka insum zo ang em? A hmaa ka ṭah ka hlau ber.










Jarson lah chuan mut a kham loh hmel em em zui " Bawiha ina kan luh hunah i khumah ka mutpui ang che aw, thawnthu ka hrilh dawn che nia" ka ti av"imm, mut kha a nuam lutuk" a ti ve a, han harh tum viau mahse, a mut a la chhuah zia ka hre thei.










Inchhunga kan luh chuan Rinfeli'n min lo be nghal a, ṭha takin leh mumal takin ka chhang em ka hre lo. Hmangaihzuala thung chuan uluk takin min en reng, "A mut a la chhuak sia, ka va mutpui lawk ang aw" tiin a room lamah ka luhpui nghal a.










Khuma ka muttir chuan a bula mu ve turin min ti a, ka mu ve nghal mai. Ka chau ru takzet. Jarson chu ka kuah a, ani pawn a mit a chhing nghal. Chutia minute sawmhnih dawn ka mutpui hnu chuan a muhil nghet leh hle tawhin ka hria. Ka thochhuak a, Hmangaihzuala te pawh be lovin choka lam ka pan nghal a. Eirawng ka bawl nghal zung zung.










Ka che hmanhmawh bawk a, rin aiin ka zo hma. Mi pathum tan lek ka bawl vang a ni pakhat. Hmangaihzuala a lo luh chuan biak pawh ka be lo. Min lo kuah a, "thil dik lo a awm" a rawn ti nghal, a hmaah hian ṭah ka duh lo. "motor ka chuang fuh lo deuh a ni ang" ka ti ringawt. Min nuih sup a, ka chal fawp vang vangin "tinge rawng te i bawl duh kher. Hahdam tur che ania" a tih chuan "Ann-i ka hawtir daih sia lawm, a khua a lo har ka hlau a" ka ti pangai ve mai.










Nidang ang khan a bula awm ka chak lo. A hmel ka hmuh hian a thusawi tinte khan ka beng an luh ngut ngut zel, a luh tam ngaihtuahin a chhuak a awm mang tlat lo hi a ni buaina chu. Rinfeli lo lut ve pawh chuan "Chhingpui, i van bawl rimtui hlawm ve, ei a chakawm rum rum alawm" a rawn ti a, nuihin "a van lawmawm, i ei theih loh hlauvin alawm ka thiam ang tawka ka bawl" ka lo ti ve a.










Rinfeli chhuah leh hnu chuan "ih, ka haw hma thei mai ang em?" ka ti a, Hmangaihzuala chuan min melh deuh vang vanga, "i awm a nawm loh chuan mu la, i inthlahrun a ngai lo ania, ka in chu i in a ni" a lo ti a, lu thingin "in lamah zanin chu ka haw hmat a ngai lutuk zawk" ka ti leh a, a phal theih nan chuan eng chhuanlam pawh ka siam mai ang.










In lam pan chuan ka haw ta nge nge a, in ka thlen chuan ka chau nghulh. Ka chhungte chuan chaw an lo ei ṭep tawh a, ka haw min hmu thut chu mak an tih hmel khawp mai. "Bawihi, i lo va haw hma ve" ka pa chuan min ti a, "Imm.. vawiin chu in ruala chaw ei ka chak a" ti letin a bulah chuan ka ṭhu thla nghal a.










Chaw ei laia ka nuin "Jarson chungchang kha i pa nen kan lo sawi zui a" a tih chuan ka nu chu ka en nghal a, "kan lainat tak tak a ni. Mi a nel ve bawk sia" ka nuin a tih zawm leh a, U Mimi chuan min melh ralh a, "in lamah i lo hruai a maw?" a ti ta reng, lu ka buk nghat chuan "hmm" a ti deuh hmak, ngaihven lutuk lo angin lang mah se, kan pahnih chauh chuan awm ila, sawi tur a ngah viauin ka ring a ni.










"Nu, ka nau hian min khum der a nia" tiin ka nu leh pa chu a melh duh ralh ralh a, ka u hian sawi a tum chiang lutuk. Ka hrilh hun a ngak ve thei mai lo emaw ni. "Aw, u zawk pawh nauin an lehpelh chang a tam ve ṭhin alawm" ka nu chuan a lo ti mai. Ka u chu ka en reng a, chutah "Nia, min lehpel chiang lutuk, ngaihzawng min neihkhalh pawh tih mah nak laiin, pathlawi min neihsan der ania" tiin min melh a, ka chhing sawk.










Ka nu leh pa bula hrilh ka la inpeih lo asin. Chhin reng theih ni hek lo le, ka mengchhuak a, ka chhungte mit chu ka chungah a fu ṭhap. "Bawihi i hnathawhna pa hi a ni em?" ka nu chuan a lo ti a, ka bu nghat. Engmah an sawi zui loh avang chuan ka hahdam huai. Mahse, chaw ei kham lamah erawh eng emaw tal an sawi ka ring.










Chaw ei kham chuan ka nuin min ko ta reng a, u Mimi lah chuan min nuih sak lehnghal, tunlaia kan buaina avanga kan unau inkar hlat tawh zia ka ngaihtuah thleng pha hial mai. A hma kha chuan ngaihtuah ve ṭhin tho mah ila, tun ang hian kan inkar ka lo chhut chet chet ngai lo. A pawi ka ti zawk, heti taka kan kar a hla ta mai chu.











Ka nu bula ka va ṭhut chuan "Bawihi naupang tê i la ni emaw ka tih laiin i lo nula ve der tawh a" a rawn ti a, chutia a tih chuan ka kut ka hum ngar ngar ringawt, nu te bula mipa chungvhang sawi ngai lo khan tunah ka ngaihzawng chungchang kan sawi dawn chu a ni sia. "Mahse Bawihi, i thlang fuh lo ang e" a tih chuan "nu, ka fel lutuk alawm, chuan min duat bawk a, a tan ka pawimawh ve takzetin ka hria" ka sawi zawh rualin tlai lama Hmangaihzuala thilsawi ho kha ka hrechhuak nghal.











"Mipa lam chungchang hi ka sawipui ngai lo che a, tunah chuan ngaihzawng nei rual in ni ve tawh a" a tih chuan ka sa hat hat. "Ka hrilh ngai lo che a, mipa ṭha hi an vang tawh a, tawn fuh loh phei chuan hmeichhe tan chuan kumkhua a daih tawh ṭhin.











Mipa ṭha, kan nihna ang anga min pawmtu emaw kan tihte hi hun a rei hnu chuan an danglam vek ṭhin. A tir, intawntirha ṭha tak anga langte kha a lo rei deuh hnu chuan an ze tak a lo lang a, an zia a lo lan hnu meuh chuan kan lo kal thui lutuk changte a tam a, hmangaih tawh lutuk vanga kalsan thei tawh lo te an awm nawk bawk.









Chuvang chuan vanneih a ngai a, nang phei chu tuna i kawp lai hi tlangval hnakhat a ni tawh lova, fa hial a nei tawh, a tan chuan han kawp zawk a, kalsan leh mai te chu thil harsa a ni dawn lo" a tih lai mekin "hmeichhia a hnaih ve vak ngai lo. Chuan hmeichhe zahna chang a hre lutuk" ka lo ti zeuh.










Ka nu chuan min nuih a, "Duh thlang thei i ni tawh a, i duhthlanna chu kan zahsak che alawm, chu lovah naute kha kei chuan ka lainat reuh emai, khatianga ṭhaa a fapa, nu tel lova a enkhawl theih chuan pa ṭha a nih ngei ka ring a, i thlang sual lo turah ngai ang aw" tiin min nuih a, ka nu nen hian mipa chungchang kan sawi ngai lova, tuna kan sawi ta mai hi a mak a ni. Kan lo naupang chhia zawk zawk tawh lo te pawh a nia nge.










Ka nu berin min duhpui loh miau loh avang chuan ka hahdam ta sawng sawng. U Mimi ka hmuh chuan "U tuna kan awm ang hi chuan awm tawh lovang, a nuam lo, mipa avanga kan inkar hla ta lutuk hi thil ṭha a ni dawn em ni?" ka ti a, u Mimi chuan "A tir aṭangin i hrethiam lo reng alawm, mipa avanga hetia kan awm hi a zahthlak lutuk, chuvang chuan ka thu hi zawm la hnaih lo mai rawh" a tih ve chuan ka ang zuau.









"Na taka siamin a kalsan ang che, mi i rin tawh chu i ring nghet thei lutuk a, a tawpa na tur chu nangmah chiah i ni ang, ani chu a na ve dawn lo. Khapa khan na taka siamin a kalsan ang che, natnaa inbarh loh hian kalsan thuai zawk rawh" a tih zawm leh a. Hmangaihzuala thilsawi ho bawkin ka beng a rawn luh leh ta.










Mahse, han chelh hram hram ila, engtikah emaw a rilru a la dang ve mahna, a rilru chhungrila hmun ka chan ve tak loh leh "ka theihtawp ka chhuah chung pawhin a thinlung ka nei zo ve ta lo a ni" tal ka tih ve theih nan la vawn luih ka duh a ni. Ka lo na ta anih pawhin ka cho chhuah ve reng a ni ang, tumah dem tur ka nei lo.










"U, tun chiah hi chu min hrethiam ve rawh, Hmangaihzuala hi kum tam a rukin ka lo duh tawh. Ka nei thei ngai dawn lo emaw ka tih lai pawh khan ka rilru aṭangin ka paih chhuak thei ngai lo. Tichian kum tam hnuah kan intawng leh a, tichuan hun kal zelin tun hun hi kan thleng ta a ni, ka tana a hlutzia hi min hriatthiampui kher lovang.











Ka tan chuan ani chu Duhthusam thlentirtu ang mai a ni a, beiseina a laka nei ngam ngai lo khan a lakah beiseina tur ka chhar a, ka hnaih theih tura ka rin ngai loh kha a kiang hnaia ka awm thei a, ka tan chuan tuna thil thleng mekte hi Duhthusam thlengdik vek an ni.










Chu Duhthusam ram a taka lo thleng aṭanga pen hran ka phal lova, ka duh hek lo. U nang pawhin bih chiang la, a ṭhatna hi i hmuthiam ngei ang,
ka lo na ta anih pawhin tumah ka dem dawn lo. Ka thiam loh ve reng a ni ang, mahse, tunah hi chian kalsan ka duh lo. Ka natna tur engthil mah a la ti miau lo"
'Ni lo, ani khan nasa takin a bum che a, chuti chung chuan i natna tur engmah a ti lo a maw?' ka rilru chuan a ti nghal.









'a ti lo, ani ina a dera a lo duhna ringawt pawh khan hlimna a pe nasa lutuk che. A derin khatiang khan ti lo se, khang hlimna zozai kha i hmu dawn em ni?' lehlam ami in a lo ti ve bawk.









'Chu reng chuan alawm tina che, bum chein hmangaihna der a hlan che a, nangin i lo hlimpui si a, a tawpah phei chuan chhar tlak pawh awm lo khawpin i thinlung a la ti kehsawm ang' lehlam a mi chuan a lo ti ve leh.









U Mimi chuan beidawn hmel zeta min melhin "I nat hunah ka lam lo pan suh ang che" tiin min kalsan hmak. 'I na lovang' chhungril lamin a lo ti ve leh a 'a na dawn'
'dawn lo'
'dawn' chu thil pahnih chi an inbuk tawn zak zak mai.









Ni a her liam zel a, ka u nen erawh kan inkar a hla tawlh tawlh maiin ka hria. Keiin pawh leh ka tum hmasak chang pawhin Hmangaihzuala leh Jarson chungchang a sawi ka hriat tawh chuan pawh lovah ka tlak ta nge nge zel a, khati khawp khan kan inkar a ṭhat theih nan ka biain thil ka hrilh ve a, mahse min la be duh ve tlat lo. Ani chuan Hmangaihzuala te pafa ka hnaih chhung chu min biak a tum lo a ni ang. Mipa avanga unaua han buai tak mai chu! Mahse, ka thiam lohna ka hriat tawh miau loh avang leh Hmangaihzuala te pafa a duh loh avanga kei thlenga min be duh lo zel chu han chinfel dan ka hre tawh lova, chu mai bakah ka huatah a kal ve deuh tlat tawh.










Hmangaihzuala thilsawi ho kha hre lo ang hmakin ka awm a, a tir kha chuan nidang ang khan ka hnaih thei lo, Hmangaihzuala pawhin a hnu phei kha chuan ngaih ṭha lo takin a chhan min zawt ta reng anih kha. Ka chhanna pawh a mumalin ka hre tawh lo. Hun a liam deuh hnuin a tir ang khan ka hnaih leh thei a, ka lo duh thlu ngang a ni ang, a zunah ka uai nghet zual sauhin ka hria. A der tih hre tho chung pawh hian ka hlimpui em em zel.









Mi thenkhat chuan nep min ti hle ang. Mahse, Hmangaihna nge nge, thumal khat lek, hmangaihna avangin ka nep zo a, ka chak loh phah a, mi â ang maiin tu emaw, a taka min hmangaih ve lo tu hmangaihna der ka dawn chuan min tihlim hle anih hi.









Ka hnathawhna aṭanga ka ban nan nikhat chiahin a dal tawh. Tun aṭang chuan Hmangaihzuala te in hi ka rawn rap zen zen tawh dawn lo. Khua a har lawk veng veng. Hmangaihzuala chuan a hmaa min hruainaah khan min hruai leh a, Jarson erawh a ní Rinfeli bulah a awm thung.









Ka darah a ngheng a "Bawihi, i tel lovin engtin nge ka fapa nen hian kan lo awm ang?" a tih chuan ka chhang lo. "hna thawh ngai tawh lovin, awmpui ang ni tawh lovin ka nupui angin ka kiangah awm tawh la ka ti takzet" tiin ka nghawng a rawn fawp zeuh.










"Hna nei i ni a, ka ina i lo thawh ṭhin ang khan thawh reng a rem lova, chu mai bakah miin kan inkar an hriat ve huna an sawizui dan tur che ka duh lo, mi titi velin i chungchang nuam ti taka an sawi a, an sel che ka phal lo, chumi avanga i ban hi phal mai mai ka ni.










Ni lo sela chuan kan inneih hma chu kan kiang hnai aṭanga kalsawn lo turin ka duh che. I hmel hmu zet lova hna kal ka thiam tawh lova, ka lo haw ruala ka hmuh loh che pawhin ka buai tawh ṭhin" a aw a takna ka hriat avang chuan amah chu ka en a.










"Hmangaihzual, nang hian min duh ve takzet em?" ka ti ta phawng "Bawihi, i ngawl ka vei lo chauh tawh, atchilhpui tham khawpin ka hmangaih che" a rawn ti a, a mitmengah chuan dawt a sawi lo tih ka hmu theiin ka hria. He mipa hian a der chauha min duh lovin a thinlungah hian hmun tlemte chu ka chang ve a ni lo maw?




(A lo boring deuh chuan min hrethiam dawn nia. A ngaihnawm vak lo intib pawhin chapter dangah chuan a ngaihnawm theih tawh ngei ka beisei)

[Te-i Mrs Ambrose]

Pathlawia (Never Let You Go)
By: Te-i Mrs Ambrose



Chapter 14






Kan haw lamin Jarson kan lam nghal a, a ní Rinfeli nena an awm dan te, an infiam nasat ziate chu nuam ti tak hian a sawi ve siam siam a, ka pawm lai mek hian min hmu ta lo deuh thut se engtin nge a lo awm ang? Amah hi Hmangaihzuala ka kalsan phal loh chhan lian tak pakhat a ni ve bawk.










In kan thlen hnuin Ann-i eirawng lo bawl mek chu ka va pui ve nghal a, ani pawhin ka ban hun a thleng dawn hnai tih a hria a ni ngei ang. "Chhing,, i awm tawh loh hunah chuan a reh ngawt ang" a rawn ti a, "keipawn in hmel hmu lova awm chu hrehawm ka ti viau ang, ka lung a leng sa veng veng" ka lo ti ve a.










"Jarson mawlh hi ka khawngaih, a ngai dawn lutuk che hi ka ngaihtuah zawng pawh hian ka ṭap lo chauh. I tan lah la thawh reng a fuh chiah bawk si lo. Mahni a dawr enkawl lai nei i ni bawk si" a rawn ti ve a, amah bawkin "I lo thawh tirh aṭang khan ka lo lawm ve lutuk, pu Hmangaiha hna lamah a kal reng a, a reh thei bawk sia, Jarson hian min ngaina ve tho nangin nang ang em em hian min ngaina lutuk bawk si lova, ka tan kha chuan a khawhar thlak thei lutuk, i lo lang a, ka kawm theih i ni bawk sia, nuam kha ka lo ti lutuk a, mahse, i ban a hun dawn der sia" lungchhe aw tak hian a ti a.










Kan ngawi dun ta rauh rauh, awm dun reng chungin kan ngaihtuahna hran ve ve chu kan kawm a ni ber. He ina awm hovin hrehawm kan tih laiin ka ṭhiante leh chhungte erawh chu an lawm viau thung. Lalnoi phei chu phur tak a ni. A chhan chu dawr lamah ka inlan tawh dawn miau. Mami erawhin engmah a sawi ve lo. Ka awmdan tur a ngaihtuah thlen ve vang a nih ka ring.










Hmangaihzuala'n min lo koh avang chuan choka aṭangin ka chhuak a, sitting room-ah ka hmu mai lo. "pindanah ka awm" a rawn tih chuan a pindan lam panin ka kal a, ka kik dat dat hnuah ka lut nghal, a khumah a lo ṭhu a, a lamah kal tur chuan min hui nghal, a bula ka din rualin min lo ban nghal a, a mal chungah ka ṭhu ta der. Nghet zetin min kuah a, a awmdan chu ka rin loh lam lutuk a nih vang nge chet lawk nachang pawh ka hre lo.










"Bawihi" a rawn ti hniam ruih, "mm" ka lo ti ve mai. "Engtin nge naktuk aṭang ka awm ang" a rawn tih chuan ka ngawi reng. Nupa inthlahlel em em ṭhin, inṭhen hran ngai ta angah ka inchan deuh berin ka hria. "rei tak i hmel hmu lo tur chuan ka insuangtuah thiam lo, min nei tawh mai rawh" a tih pawh chuan chhanna ka la nei lo cheu.









Chiang zetin ka mitah min en a, "Bawihi, engtia rei chiah nge ka nghah che ngai dawn min hrilh rawh, inhremna ang vel a ni, min hrem reng suh" a rawn ti deuh hrawk. Mahse, thinrim lutuk vang ni lovin tihngaihna hre lo, thaw ipik zeta ṭawngchhuak a ni.










Ka ngawngah a hmai a rawn phum nghal ta daih a, "ka nawr lui mah mah ṭhin che tih ka hria. Ka fapa hi ka ngaihtuah em a tin ni" a tih chuan ka kut ka hum nghal vak. "I hria em? A pi ten min chhuhsak an tum nasa a, court a ka kal zin tawh zia min hriatpui kher lovang. Ka chan a chau tawh takzet. Tunah Jarson hian nu a nei tawh lova, kei lah heti mai hi ka ni si. Nitin hna lama ka kal a ngai a, ka fapa ka hruai a rem ṭhin si lova, hei tak hi a pi leh pute pawhin remchangah an la rèng a, engtia rei nge ka fapa hi ka kianga a awm theih ang ka hre tawh lo. Ani hi chan ka hlau, chumi avanga nang pawh nawr che ka ni.










Ka thlakhlelhna che chu thuhran ni ta se, buaina tawk lo ila chuan dawhthei taka nghah che ka inpeih reng, mahse, ka fapa chungchang thu a tel ve tawh miau avangin ka nghahchhuah hma che a ka chan ka hlau." a rawn ti a, ka kut ka hum vak chu ka thlah dul a, engkim fiah taka min hrilh avang leh zep a neih loh avang chuan ka hahdam huai. A fapa avanga min nei duh a ni tih zep lovin min hrilh ve ta a lawm.










"Ka thu ngawt chuan engkim ka kal tlangpui thei lo. Ka chhungte ka rawn ve phawt a ngai. Kan inzuina a la rei si lova, tuna chhana ka pek nghal rum rum che chuan ka chhungte an hrilhhai dawn lutuk" ka ti ve ta nge nge. Tunah min hmangaih kher lo mah se, kan inneih theih hun chuan engkim hi a la danglam mahna.










"Bawihi, ka nawr nat mah mah che chuan min hrethiam dawn nia. Mahse, ka tan chuan ka fapa hi a pawimawh em a ni" a rawn ti a, "Imm, i tana a pawimawh ang chiahin ka tan pawh a pawimawh ve, tu mahin an lahrang lovang" ka ti a, an lakhran ka phal dawn hauh lo.










Zan lamah chuan an pafa in min rawn thlah a. Kan in kawtah kan din lai chuan "lo lut ve ula" ka ti a, Hmangaihzuala chuan lu thing nghutin "kan haw thei tawh lo palh ang" a ti fiamthu deuh a, ngainatawm zet hian min nuih bawk. Chuan ka hmaa ding reng pa hi ka ngai nghal der anih chu.










"Hun ka neih remchan velah ka bungrua ho chu ka lo la ang" ka ti hap. An ina riah ve zeuh chang ka neih ṭhin avang leh nileng hun puma ka awmna ṭhin anih avangin thil ka hnutchhiah nualin ka hria. Jarson chuan min en reng a, naktuk aṭang chuan a bulah ka awm thei tawh dawn lo tih a hrethiam ve der si lo.










Hmangaihzuala chuan min kuah vang vang hnuah "zanah kan lo bia ang che" tih leh min thlaha Jarson kut chu humsak a rual a, ka hmusual nge a hmel chu a ngui ruaiin ka hria. An kal dawn tak takah min fawp zeuh a, Jarson nen an tlan liam thleng chuan ka thlir reng.










Ina ka luh chuan ka nu leh pa an lo la meng a, ka thaw deuh huai. Engdangmah ti hmasa lo chuan ka nu leh pa awmna lam chu ka pan a. Ka thil hrilh tur hi hrilh ka hreh takzet. Ngaihzawng ka nei tih an hriatna a la rei loh nen tunah inneih chungchang ka sawipui dawn chu a ni sia.










Ka nu chuan chik zeta min enin "Bawihi, sawi duh i neih chuan sawi la" min ti a, ka thaw hak. U Mimi pawh a rawn ṭhu ve nghal a. Hreh chung chungin ka nu leh pa bulah chuan thil chu ka sawi ta phawng. "Chutiangte chu a" ka nu chuan a ti hap reng.










Kan ngawih ren rawn hnuah ka pa chuan "Bawihi, a la hma deuh lo maw? I thlan sual a hlauhawm a, inneihna hi chu reilote tan chauh a ni lova, damchhung daih thil a ni. In inzuina pawh a la rei lo si lova" a ti ban charh a.










Thil awmdan chu ka hrilh ve leh ta vek. "Kei pawhin Hmangaihzuala ang thovin Jarson hi chan ka hlau. A pa leh a pute inkar hi a ṭha lova, chumi chuan Jarson lakah hian nghawng a neih ka hlau ber. Chuan ka chiang a, ka thlan sual ka ring lo. Ka lo thlang sual a nih chuan keimah bak tumah ka dem dawn lo. Ka thiam loh liau liau a ni ang" ka ti a, chutia ka tih chuan ka u in











"I zak miah lo em ni? Pathlawi i ngaizawng pawh tih tawh nak laiin inneih chungchang i sawi ngam a maw?" a rawn tih fak, ka nuin "Mimi lo ngawi rih rawh" a rawn ti ve a, u Mimi chu a ngawi lo nasa mai. "In hriat ve vek kha, a mipa hian hmanrua atan lek a hmang anih hi. Nakinah mamawhna a neih tawh loh hnuah chuan bungraw chhe paihin ania a rawn paihchhuah dawn ni. Chumi hunah chuan keiniin kan lo tuamhlawm leh ang maw?










Chutiang thil a thlen loh nan chuan inneih tir loh tawp a ṭha. Mipa rintlak tak a ni lo. A hotel-ah hmeichhia engzat chiah nge a luhpui tawh in hriatpui em? Kha mipa lak aṭang khan Chhingpuii hi a hnuhin ka hnuksawn ang, a hnaih tawh dawn lo hi a ni tawp" a ti piap piap mai. Chutia Hmangaihzuala chungchang a sawi chuan min tina takzet.










Ka nu leh pa chuan U Mimii chu an en reng mai. A thilsawi ho khan a ṭhawng ve dawn em a tin ni. "u, min duhpui loh pawhin a dik lo zawng chuan a chungchang sawi kher mah ta che" rilru na zet tian ka ti a, "dawt ka sawi loh kha" nui sak chunga a tih chuan "finfiahna i nei em ni?" ka ti let ve nghal, "Mi in an sawi tawh chuan eng emaw an hmuh vanga sawi an ni, engmah hmu lo se an sawichhuak dawn em ni?" fiah zeta a tih chuan ka ṭap lo chauh.










Min duhpui loh pawhin ka nu leh pa hmaah chuan a chungchang ni lo baksaka sawi kher hi a ngai lo asin. "Hnaih suh ka tih ṭhin che kha, naktuk aṭangin i hna i bang tawh dawn bawk a, inbe tawh hlek suh ang che u" a rawn tihzawn leh zat chuan "ka thuneihna a niin ka hria" ka ti ve ta hmak. "I u hi min va zah lo ve" u Mimi'n a tih laiin











"Ngawi tawh rawh u, mipa avangin in inhau ania, in zak miah nange? In pahnih khan engmah sawi tawh suh u" ka nu chuan a rawn ti a. A ,awng a ring vak lo nain hnial ngam rual a ni lo. Ka pa chuan "Bawihi, i u sawi hi a dik lo tih i hrechiang maw?" tiin min melh a, ka bu nghat.








"Heti khawpin i u in a duhpui lo che a, a hrilh hnem thawkhat bawk che. Mahse, i thu kaltlangpui i duh chuan kan hnial lovang che, naupang zawk zawk in ni tawh lova, mahnia thutlukna siam thei i ni tawh. I lo tisual ta anih pawhin nangmah duhthlan kawng i zawh tih i chiang tur a ni.










I hlim kan duhsak che a, i thutlukna engpawh kan zahsak che. A ṭhat lohna kan hmuhpui miau loh che avangin i thu kan ngaihthlak sak che, a chhan pawh i hmangaih chu i hrechiang zawk tura kan rin vang a ni. Hmangaihzuala chuan a duh hun hunah palai chu rawn tir rawh se" a tih chuan u Mimii chu lungawi lo zetin a kalsawn nghal daih.










Ka nu chuan "Bawihi, pasal nei tur em chuan i la nau deuh lo maw?" min ngaihtuah hmel zet hian a ti a, ka ngawi ta reng. "Hmangaihzuala chu a upa ve thawkhat tawh a, a zai i ngaih thiam loh hunah eng emaw buaina in tawh ka hlau emai" a tih leh laiin ka pa zawkin "a puitling ve tawh alawm, a tana ṭha tur chu a hrethiam tawh lutuk" a ti a.










Ka pa hi chuan an thuṭha min hrilh ṭhin ho zozai kha kan vawng tih a hriat avangin kan thilsawi tawh hi chu min hnial vak ngai lem lo. Chutia ka sawi avang erawhin kan duh duhin kan nung tihna a ni chuang lo. Kan thu ngaithlak chin leh min thununna chin a nei ṭhin a ni zawk.










Ka nu erawh nu a nihna anga min ngaihtuah avangin khang thu te kha sawi a ni tih ka hria. "ka lo naupang en viau ṭhin che u a ni ngei ang. Pasal nei ngam tur khawpin in rilru a puitling ve ta chu ania" a rawn ti a, "Hmangaihzuala chuan a duat ang che tiraw?" a rawn tih chuan bu nghatin










"Imm,, min duat ang tih ka chiang alawm, nu tunah hi chian Jarson tel ve miau avangin hmanhmawh chuk chuk kan ni. Ani tel lo se chuan Hmangaihzuala pawhin min nghah a la thei ang. Mahse, nu kha naupang kha kei pawhin chan ka hlau em a ni. Chu lovah Hmangaihzuala hi ka ring tawk a, min tina lovang" tiin ka nu chu ka en a, ka nu mitmenga hahdamna chu ka hmu thei.










Ka inbual zawha ka va chhuah chuan ka phone eng thim chiah chu ka va hmu a, a rawn en leh takah chuan ka phone awmna lam chu ka pan a, ka en chuan Hmangaihzuala a lo ni. "Hello" ka tih rualin "Ama, apa nen khan vawi thum kan lo be tawh che a, tunah i la ve chiah" Jarson chuan a rawn ti a, ka nui hak mai.










"Ka inbual daih alawm" tiin ka chhang let a, Video call request a lo lut nghal a, ka accept rual chuan Jarson hmel a lo lang nghal a, a bulah a pa a ṭhu ve bawk, phone chu a kensakin ka hria. "Bawiha i mut a chhuak tawh em?" ka tih chuan lu thing nar nar pahin "ai, apa nen kan mu tlai dawn, kan mut a chhuak lo" a lo ti reuh a.









"Ama, lo thleng hma la naktukah" a tih chuan nui luiin "naktukah chuan khawiah emaw ka kal a ngai dawn a, min hrethiam ang tiraw? Ka hman hmasak berah ka lo kal vang vang ang aw, nangma bulah" ka tih chuan a ngui nghal lapin ka hria. "keimah khan ka ngai tawh che sia" a tih chuan ka ṭap lo chauh a ni. He nau bak baka khawngaih hi ka la nei ngai lo.










"Ka hman velah ka lo kal ang, apu a dam phei chuan i bulah ka lo awm tawh dawn sia, chumi avang chuan apu hi in lamah ṭha deuhin ka enkawl ang a, a dam veleh i bulah ka lo kal nghal ang aw" ka tih takah chuan hrethiam ve awm hrimin a bu nghat nghat a, "Ama, Pupu chu lo enkawl vat vat la, chuan kan bulah lo kal daih rawh" a ngui hmel zawng zawng kha a bo leh vek tawh.










Hmangaihzuala pawh chuan "Bawihi, zanin chu, kan pafa hian kan ngai lutuk che" a rawn ti ve a, "Mm, kan ngai duh lutuk che" Jarson pawhi a lo ti ve nghal bawk. "Kei pawhin in pafain ka ngai lutuk che u" ka ti ve a, Hmangaihzuala chuan zun nei zet hian min nuih a, a bula awm ka chak nghal veng veng.










Rei fe kan inbiak hnuin call chu kan titawp thei hram a, an pafa chuan ka mitthlaah an lo lang nghal, an pahnih hian ka nuna an tlaktlum dan a inang ve ve. Khuma ka mut hnu thleng pawhin eng nge an tih ve ang tih ka ngaihtuah zui rauh rauh.










Zing ni chhuakin ka hmai a chhun chuan harsa ti zetin ka meng a, nimin zan lam ka muhil thei lova, zing lamah ka muhil thei chiah a, ka mit a kham ṭun mai. Ka thochhuak a, ka pindan ka chhuahsan rualin u Mimii ka hmu hmasa ber.










"Hmangaihzuala hi i neih ka rem ti lo" a lo ti nghal hmiah bawk. "U nimin lamah engkim ka sawi vek tawh kha" ka ti ve a, "ka pawm hleinem, i u zawk pawhin pasal ka neih hmain pasal neih i tum nghal hmiah a, i pasal tur lah chu mi thin sa, an duh tawh loh, an hnawl tak avanga thlawi ta a la ni zui. I u nge khapa kha i thlan zawk dawn?" a tih chuan ka u chu ka en ngar ngar tawp.










"U hetiang em em hi chuan kal thui suh" ka ti sep. "Ani kha i nei ngai dawn lo, i neih duh chuan kei min thlang lovin amah kha i thlang angah ka ngai ang" a tih leh deuh hmak chuan ngaihtuahna a vak nghal a, ka u hian eng vanga duh lo lutuk nge a nih?











"u ṭha takin i duh loh chhan hi min hrilh rawh, a ṭhat lohna sawi tur fak lah i nei ngai si lo, heti em em a i duh lova, nangmah nen hiala duh thlan ngai khawpa i duh loh chhan hi hriat ve ka duh. Hriat i neih chuan min hrilh ve vek rawh, engmah zep suh." ka ti ta tawp. Ka u hian eng emaw hriat a neih avangin a duh lo viau hi a ni thei mai ang em?










"Ka duh pui loh chhan che ka sawi kher a ngaiin ka hre lo, nei suh ka tih che chuan nei lo la, i tana tha ber tur a ni" a rawn ti deuh hmak a. Ka thaw hap, "u an pafaa min mamawh zia i hmuthiam lo, ka tana an pawimawh tluk zetin ka tan an pawimawh ve bawk, ka theih chhung chu ka chelh dun tlat dawn.










Engmah sawi tur i neih loh chuan kei pawhin ka thlah ngawt thei bik lo, ka tihpalh" ti sepin kalsan mai ka tum, mahse a thu rawn sawi leh avang erawhin ka ding chawt. "I nat hunah u i nei tawh lo tih hria la, min lo pan hauh suh ang che" u Mimii ka u ngei chuan a ti anih chu.










Ani hian min hrethiam thei hlawl lo nge, keimah zawk hian ka hrethiam lo viau zawk? Ka mittui tla chu ka hrechiang ngang mai. Ka u lam chu ka hawi a "u kan inkar nghawng thei hial thil i sawina chhan mipa hi i duh loh chhan min hrilh chiang ve la, nangin heti em em a i duh loh chuan a chhan hriat ve ka duh.










Chuan, ka thlah ang, kan inkar hetiang em em a nghawng thui thei tur khawp hian ani khan i chungah eng chiah nge a tih? Heti em ema i duh loh, u khawngaihin min hrilh rawh" ka tih chuan ka u chu a mittui a tla ringawt anih chu. A mitah natna thuk tak ka hmuhsak a, mahse a rei lo, a mitmenga natna chu huatna in a thlak nghal a.










"Engmah min zawhchhuah tum suh, ka sawi ngai dawn lo, mahse, hlat rawh" a hmaa a hmela natna lo lang kha a bo rualin a aw chhuak pawh a nelawm lo khawp mai. "Engkim hrethiam rual i ni tawh. Ani khan hmanrua angin a hmang che, engtia rei nge i duhna avang khan i mit i la tihdel dawn? Mengchhuak la, thil thleng diktak hi hmuthiam rawh,










Ani khan eng atan mah a ti lo che, a fapa tana i pawimawh em avangin a hnaih che a, a fapa a chan loh nan inneihpuiah a sawm bawk che, a bak engmah a awm lo. Hmanrua, a fapa chelh nana hmanraw pawimawh tak i nih lai chuan ngaihhlut hmel zetin a bia ang che a, ngaihsakna der i dawng reng bawk ang" a tih chuan ka mittui a tla ve ta thung.











Tuna ka u in a sawi ho zingah hian dik lo engmah a awm miau lo. A fapa avangin min hnaih a, a fapa avangin inneihpuiah min sawm a, a fapa avang thovin a ni heng duatna te hi lak aṭanga ka dawn ni. Mahse, hmahun ka thlak danglam thei. Chumi beiseina avanga a kut chelh tum ka ni.










"I ṭangkaina a zawh hunah chuan ani khan a hnungchhawn nghal ang che a, tuna i din mekna inah hian i lo let leh ngei ang" a tih chuan "a thlen loh nan ka lo ṭawngṭai ang" ka ti sep. Ka u chu ka kalsan ta nghal bawk.










Dawr ka va thlen chuan an lo inhawng tawh a, ka va luh ve rualin Mami leh Lanoi chuan min lo kuah nghal "Mam, i lo inlan ve elo?" ka tih chuan "I rawn let leh ni a ka lo lan lovin" tiin ka darah na lutuk lo hian a beng a.










Kan pathum chuan nuam kan ti tlangin ka hria. Lalnoi pawhin ka awm tawh avanga a hahdam tawh tur zia te chu nuam ti zetin a sawi siam siam a, chutih lai chian David a lo lut ve bawk.










"Chhingbawih, awmpuinui a lo haw e" kan bula a lo ,hut rualin a ti nghal a, ka beng nghal chawrh mai. "Awmpuiah ka ṭansan leh che nga, min lo ngai viau ang e" ka tih chuan Lalnoi kuah thuak pahin "hei, hetah naupang a awm alawm, ka ngai lovang che" tiin mit min kankhum zauh. Chutis a tih avang chuan lehlam ka hawisan deuh hmak.









David kalsawn laiin Mami chuan "Chhingpui, Hmangaihzuala nen chuan in inkar a la ṭha zel em? A duat che em? Engkim hmaichhanah min hrilh rawh, phone aṭang kha chuan a kim lo lutuk a" a rawn ti a, "Imm, chuan a zei leh zei loh te, a sexy ṭhin em tih te, a hot viau em tih te chein" Lalnoi pawh chuan phur hmel zet hian a rawn ti ve a.










Thil thleng, kan inkara thleng ho, an hriat ngai ka tih chin ho zawng zawng chu ka hrilh a, an pahnih chuan min phurpui dun hmel khawp mai. "Waii, chu pasal neih lam a va hnai ṭan ve" Lalnoi chuan a lo ti a, ka chhan hmain Daniel a lo let a, kan bula ṭhut thlak pahin "Hmangaihzuala'n nupui a nei dawn, tun deuh lawk khan post a rawn nei" a tih chuan ka nghing deuh lawih mai.










Hmangaihzuala bulah hian inneih ka pawm thu ka la hrilh miau lo. Ani hian a fapa avangin nupui neih a hmanhmawh tih ka hria a, nupui dang neih a tum mai em ni? "A nupui tur hming te chhiar ta che Mawla" Lalnoi'n a tih chuan "a nupui tur hming a tarlang hleinem, thlalak, chupawh an kut inkai lai chiah a dah" a tih phei chuan ka nih ka ring ta lo bur. Hmangaihzuala nen hian vawikhat mah kut inkaiin thla kan la la miau lo. Hmangaihzuala call a lo lut nghal a. Ani hian nupui tur dang a hmuh tawh thu min hrilh a tum em ni ang?

[Te-i Mrs Ambrose]

Pathlawia (Never Let You Go)
By: Te-i Mrs Ambrose


Chapter 15





Phone chu ka en reng, a ring ral ṭhak, ka chhang ngam lo a ni ber. A lo rik leh takah chuan phone chu ka la ta a, "Bawihi, khawiah nge i awm?" Hmangaihzuala chuan a rawn ti a, a aw ka hriat chuan ka ṭah a chhuak ṭun. "Dawrah" tih chauhin ka chhang. "Ka lo kal mek" a sawi zawh rual chuan call chu a titawp nghal daih.









"Tunge a?" Mami chuan a lo ti a, Daniel thusawi khan a ṭhawng ve tho anih ka ring. "Hmangaihzuala" tiin ka phun sap, "a lo kal dawn em ni?" a tih leh chuan chhang tawh lovin ka bu nghat. "Aw, lo kal teh se, engkim a sawifiah ngei a ngai" a aw aṭang chuan a thinrim deuhin ka hria.








Daniel chuan hriatthiam loh hmel zet hian Mami nen min en dun reng. Hmangaihzuala nena kan chungchang hi a la hre ve miau lo. Hmangaihzuala dawr chhunga a lo luh chuan thin phu dep depin ka lo en. Ka natna tur thu a chhakchhuak ang em? Nge fianrialah, kan pahniha kan awm laiin nupui a hmuh tawh thu min hrilh zawk ang.









Ka biak hmain Mami zawk chuan a lo bia a, Daniel phone chu laksakin "He thil hi a sawifiahna kan duh" a ti nghal a, kei chu ka lo chhing ringawt. Hmangaihzuala thaw hawk ri chu ka hre thei. Ka la meng chuang lo. "Ka rin aiin in hmu hma" a tih chuan awm ngaihna ka hre lo dawn dawn mai.









Ka kut lo humtu an awm chuan ka mengchhuak diar diar. Hmangaihzuala chu ka kut vuanin chhuatah a ṭhingṭhi a, ani hian nupui dang a hmuh tawh avangin ngaihdam min dil a tum em ni ang? "Bawihi, i hmu tawh thova" a tih chuan "Ai, min hrilh suh, khatiang thu ngaithla turin ka la inpeih lo" ka awah ka chiai zia a lang thei hialin ka hria.










Hmangaihzuala chuan lu a thing nghut a "No, i ngaihtuah dan kha ka duh lo" tiin ka kut a vawnna chu a thlah a, "Bawihi, min nei duh ang em? Damchhunga ka kianga awma, ka nupui ni turin leh kan fate tana an nu ni turin ka duh che. Ka tana hmeichhe special tak hian ka enkawl che rem ti rawh.









Englai pawha i kut chelhtu che nih ka duh. I nat lai emaw i hlim lai zawnga i natna leh hlimna ṭawmpuitu che nih ka duh.Min nihtir ang tiraw? Bawihi khawngaihim min nei rawh" a tih chuan ka biangah mittui a lo luangchhuak hial. Ka hlauhthawnna ho kha an thlawkchhuak nghal vek bawk.










"Chhang ta che" Lalnoi'n tih chuan lu ka bu nghat nghat chunga "Aw, ka nei ang che" ka tih chuan Hmangaihzuala ṭhuan zungbun chu la chhuakin ka kutah min buntir a, ka kut a fawp zeuh. "Tum aiin ka post in lo hma bawk sia, romantic deuha purpose che ka tum tehreng nen, hetah rin lo deuhin ka ti thut chu ania" tiin Hmangaihzuala chu a nui sup a, Daniel erawh a meng bial nasa mai.









"Bawihi nen hian fianrial hun min pe lawk thei ang em?" ka ṭhiante melh pah chuan Hmangaihzuala chuan a ti a, keimah zawkin a kuta kaiin "ka kalhranpui zawk mai ang" tih leh bungraw kan dahna lam chu panpui ka rual a, Lalnoi chuan min siai zuk zuk mai.










Hmangaihzuala nen chuan kan inhmachhawn ta ran, kawngka ka kalh daih bawk. "Bawihi, nichina i rilru puthmang ang kha chu pu tawh ngai suh" a rawn ti a, "Eng ang rilru maw?" ka tih let chuan "Nupui dang nei tur angah min ngai, a dik em? I awa hlauhthawnna aṭang khan engkim ka hrethiam vek. Nupui neih chu ka hmanhmawh, mahse, nang lo chu tumah neih ka tum lo, khatiang rilru kha pu tur i ni lo asin.









A hma aṭang ka hrilh tawh ṭhin che kha, ka nunah mi an tam lo, a bikin hmeichhiaah phei chuan nang hi a pawimawh ber i ni. Chu chu hrethiam turin ka duh che. Hmeichhe dang neihsan che ka tum ngai lo, lo tum pawh ni ila, ka thinlung hian nangmah chiah a thlang che, midang chu midang an ni. Ka tan chuan nangmah chiah hi i tawk.










Engtik hunah emaw chuan kan inkar tibuaitu pawh kan la tawk ve ang, chung hunah pawh chuan engkimah min ring tawp la, min ring sual lovang. Hriat chian loh i neih chuan min zawt la, dawt ka hrilh ngai dawn lo che. I rilru dam nana dawt hrilh che pawh ka tum ngai dawn lo. Ka lak aṭang chuan thudik chiah i hre ṭhin ang.









Min rin tawk lohna i neih pawhin min zawtfiah hmasa ṭhin ang che. Nichin ang khan engkim awi nghal vek zel suh. Ka hnen thlen phawt ṭhin la, thil engmah lo avangin i na ngai lovang" a ti dap dap. "Ka hlauthawng a, Jarson chungchang ka hre ve vek sia, inneih i hmanhmawh chuk chuk chhan a ni bawk nen, Daniel-a'n i thil post a sawi khan ka hlauthawng nghal vek,









A chhan chu i zawhna kha ka la chhang miau lo che a" ka tih chuan min kuahin "Mi â nu, nimina i thilsawi dan aṭang khan engkim a felfai vek tawh tih ka hrethiam alawm, kan rem lohna tur a awm lo tih ka hria a, phone aṭanga engkim ka zawhfiah loh chhan che chu vawiinah hian hmun mawi taka kalpui che a, zungbun nen ngeia inneihpuia sawm che ka lo tum a" tiin ka chal a fawp vang vang a. Kei tluka hahdam hi an awm ka ring kher lo.









"Thlalak i post a tih khan min ti hlauthawng zual" ka tih leh sep chuan a inla hrang a, a phone phawrhin thlalak chu min entir a, ka en chuan keimah leh ama kut ngei a ni. A background vel ka en chuan Jarson khum kha a ang viau. Ka kut chu Hmangaihzuala kut chuan nghet zet hian a chelh a, chumi thlalak chu a ni a dah ni. Jarson bula ka mut laia a lak a ni ngei ang.









Engmah lo avang mai maiin ka rilru ka lo tina ve vak ania. Hmangaihzuala chuan ka hmuiah fawp leh vang vangin "ka sawmna che i pawm avangin ka lawm e, ka hmangaih lutuk che" a rawn ti a, ka nuih sen sen. "Ka pate chuan i duh hun hunah palai rawn tir mai tur chein an tia" ka tih chuan nui supin "imm ka hria e" tiin ka hmuiah a fawp leh zeuh.









Kan chhuah leh chuan Lalnoi'n thil hriat chak hmel zetin min melh a, Hmangaihzuala chuan "Bawihi, ka lo kal chhan ber lah tum loh deuhin ka ti tawh sia, ka va kal tawh mai ang, min lo thlah la" a ti a, "Eng nge i lo kal chhan i tih tak chu?" bo deuh hua ka tih laiin "I kuta kha" a rawn ti a, ka kut ka en a, ka hre chiah, ka nui ringawt.









Pawnah chuan kan inzui a, "Jarson lo hruai ve tur che alawm" ka tih chuan ka kut a hum mek chu a rawn tina sauh, amah ka en chuan "tuin nge mi purpose dawn laia fate hruai chut chut ngai, a hrethiam ve dawn chuang si lo" a rawn ti a, "nangmah i ni dawn sin le" ka tih chuan nghal min tih hmel fe hian min melh a.









"A rang lamin palai ka rawn tir ang, i awm si lo va, kan in a reh lutuk tawh, hawi ngaihna pawh kan hre tawh lo, i lo let leh vat a ngai" a car bula kan din rual chuan a ti a, ka lam lo hawiin ka hmuiah a rawn fawp a, "chhun en lai anih hi, chu bakah kawng sirah kan la awm zui" ka tih chuan nghal hmel zeta min nuihin "ka nupui hual te chu ka fawp thiang alawm" tiin min rawn fawp leh ngat.









Miin min en em tiin ka hawi nghal a, tu mahin min lo en lo hlauh. "I la en kim lo, i ṭhiante saw" a tih chuan kan hnung lam chu ka va hawi a, an pathum chuan dawr aṭangin min lo en reng hlawm. Ka thaw hap mai. "Jarson kha ka ngai lutuk tih min lo hrilh sak dawn nia" ka ti a, "anih kei ve hi" a rawn ti deuh hmuk a, hepa hi chet naupan thut chang a nei leh ṭhin.









"Thlawi tawh hnuah tihtauh chu a" ka sawi zawh rualin ka inchhir nghal. A hmel a danglam zawk a, mahse, a rei lo "I tan alawm ka lo thlawi" tiin ka biang a piai a, ka thaw huai. A nupui a hmangaih ṭhin zia miin an sawi nasa a, an inṭhen pawh khan a la na hle bawk anih kha, an inṭhenna lam hawi hi chuan fiamthu hi thawh lo ila, ka ti fuh berin ka ring.









"Nangpawh ka bula i awm tawh loh hunah ka ngai lutuk che tih i lo inhrilh dawn nia" tiin amah chu ka nuih var var a, "Anih ka kalsan theih lai che hian ka va kalsan ang che, anih loh chuan ka nupui hual hi ka ru haw daih palh ang, rukru nih ka duh miah lo" a rawn ti a, ka nuih hak mai. A kal dawn tak takah min kuah leh vang vang a, car-ah lutin a tlanchhuak a, kei pawh dawr lamah ka let ve a.










Tunah chuan Hmangaihzuala bialnu ni tawh lovin a nupui hual ka ni ta der mai. Tun dinhmun hi ka thlen ka ring ngai lo. Pasal neih ka tum ve ta mai pawh a mak nak laiin tunah mi nupui hual ka ni ta der sia, thil mak ve tak a ni.









Dawr chhunga ka luh rualin "Rochhingpui, tinge tunah bialpa i nei tih ka hriat ve chiah" lungawi lo zetin Daniel chuan a rawn ti a, ka nuih tlawn ver ver mai, "tikhan min nuih tlawn suh, ka lung hi a awi hlawl lo, i ṭhian ṭha tak ka ni emaw ka tia" a ti deuh hmuk a, a lungawi lo tak takin ka hria.










"Ka tihpalh, thinrim suh, hetiang lam hi kan sawi dun ngai si lova, ka sawi hreh alawm" ka tih pawh chuan min be duh tawh lo. Nuam lo ka ti takzet. Daniel kher kher hi chu tihthinrim ka duh ngai lo. Tuna a thinrimna pawh hi a awm ka tihpui viau. Kan pahnih hian zep leh thup kan nei ngai mang lo, keiin ka nuna thil thleng pawimawh lutuk ka hrilh loh ngawt chhan pawh kha ka hrethiam love a.









"Thinrim suh aw, a nuam lo lutuk ania" ka tih pawhin min be duh tawh lo. Lalnoi lah chuan "Tikhan tau bur bur suh, hmeichhia pawh i nih loh kha" Daniel lua ben fawk pah chuan a ti a, Daniel erawh a thinrim belh sauhin ka hria. A ding ta thut a, Lalnoi pawh chuan a awmdan chu a man loh hmel kher mai, nidanga a fiam chang pawha lo fiam let a, a tihdan ang anga tilet ve ṭhintu mipa khan engtin mah ti let lovin thinrim hmel a hmuh miau.









Chhuah a tum chuan ka va umzui a, a kuta ka va man chat, "Ka tihpalh, thinrim tawh suh, ka insawifiahna min ngaihthlak sak phawt rawh" ka tih pawh chuan a la lungawi lo hmel rih khawp mai. "a hmasain, lungawi lo hmel min hmuh tawh suh, i thinrim chuan nuam ka ti thei ngai lo, chuan nichina thilthleng kha min hriatpui ve tho kha, ka tan chuan a ni hlimawm tak a ni. I hlim loh chuan ka hlim thei bik lo tih i hriat kha" ka ti hmasa te te.









"Hmangaihzuala nena kan inngaihzawn thu hi Lalnoi leh Mami chiahin min hriatpui ṭhin. Ka nu leh pa pawh ka hrilh ngam lova, chutiang bawkin nang pawh ka hrilh ngam lo che. Hetiang lamah hi chuan tawnhriat ka vawikhat neihna a ni tih i hriat ang hian midang hnena han sawi te pawh hi ka ngam lova, ka hreh viau zel, chumi avanga tumah hrilh lo che u ka ni. Ka nu leh pa erawh u Mimii'n a hrilh avang khan ka sawichhuak ta vek a, ka sawi tirha thawk ka harsat zia chu pui tak a ni.








Chuan nangpawh hrilh che ka ngam lo, a eng ber nge ka ngam loh chhan pawh ka hre lo, mahse, ka hrilh loh avang che khan ka tihpalh" ka nuam tih lohzia chu a hre thei hialin ka ring. Min kuah a, "ka thiannu tê hi a, I lawmawm reuh lutuk, mahse, ka lakah zep nei tawh ngai suh. Buaina vel lo tawk ta pawh ni la, kei chuan puih ngaihna ka hre dawn der lo che tihna a nia, chuvang chuan ka lakak zep nei tawh ngai suh ang che" a rawn ti a, "Imm, engmah ka zep tawh lovang" bu nghat nghat chunga ka tih chuan ka biang a rawn piai a, Daniel hian a chang chuan min nau chei deuh ṭhinin ka hria.








Daniel ber a lungawi tawh a, a nuam leh vek tawh. Mami chuan "rilru na kha kan awm em khâ??" min nuih rah rah chung hian a ti a, "Aw, kut inkai lai a ti anih kha, min ti hlauthawng alawm" ka tih chuan "ni tak e, kha kha eng vanga hlauthawng ve ngawt nge i nih a" Lalnoi chuan hriat chak hmel zet hian a rawn ti a.









"Kut inkaiin thla kan la dun lo hrim hrim a" ka ti sep. "Sawi chiang teh, thlalak naran a hmuh a hmang tihna em ni?" Lalnoi bawkin a ti leh. Mami pawhin hriat chak hmel fein min en a, Daniel erawh chuan a ngaihven ve hmel lem lo. "Ka muthilh laiin ka kuta kaiin thla a lo la a, chu chu thlakakah khan a post a , a tir khan en ila chuan ka buai miah lovang" ka ti a, ka sawi zawng pawh chuan nuam ka ti.









"Awi, ava che romantic reuh ve. Pathlawi nge nge a lo zei anih kha" Lalnoi aw aṭang chuan a phur zia leh nuam a tihzia a lang reng. "rilru na suali lek i lo nih hi" tiin min nuih zawm leh nghal a.









"Chhing, pasal nei chu i inzuam tawh maw? In inzuina a la rei lutuk si lova" Daniel chuan a rawn ti a, "ka ring tawk alawm, chu lovah Jarson hian nu a mamawh ve tawh a, kei chuan ka thlang sual dawn lo tih ka chiang a, kan lo hmahmawh deuh anih pawhin kan awmdun thei hma ting a ni mai." ka ti a, Hmangaihzuala'n buaina a tawh mek hi hrilh hriat ve kher ṭul ka ti rih lo.










Ka dawr lama ka let leh aṭang kar khat dawn lai a liam ve tawh. Ka bungraw la tura Hmangaihzuala te in ka pan ṭum kha ka theinghilh ngai lo. Chuan, Hmangaihzuala nei tura thutlukna ka siam hi ka inchhir loh mai bakah tunah chuan ka lawm tawh zawk, a chhan chu Jarson hian min mamawh lutuk. Ka va kal ṭuma min ngaih tawh zia kha ka theinghilh thei lo.









"Ama, Pupu kha a dam har tawh e, ka ngai tawh che a" a ti ṭiau anih kha. Hmangaihzuala pawhin thlakhlel hmel zetin ka haw dawn thleng khan min melh bawk. Hmangaihzuala hi ka dawra lo luh kawi zawk chang nei ṭhin mah se, an ina ka va thawh lai nen kha chuan kan inhmuhtheih hun chhung a tawi tawh lutuk.









Chuan Hmangaihzuala hian min hmangaih ve kher lo mah se, min duh ve chuanin ka hria. Chu ringawt pawh chuan min tihlim tawk lutuk. Zawi zawiin amaha duhna awm saw hmangaihnaa a la inthlak ve theih ngei ka beisei. Min lo hmangaih let ve thei ngang lo anih pawhin ka hmangaihna hi kan pahniha tan chuan a tawk ka ring.









"Mam, lo kal ve ru aw" tiin Mami te chu ka chah a, zanin hian Hmangaihzuala palai te an rawn kal dawn a, u Mimii lah chuan "awm ve lo angah min ngai ang che u" a ti hmak bawk sia, thingpui tal min lumpui ve loh chuan keimah chauh chuan phurna, zamna leh helhhawlhna te nen hian hmanthlak lutuk pawh ka awm lovang.








Tlaiah Mami leh Lanoi chuan chaw an lo ei nghal a, chaw eikham hnuin ka pindan lamah kan lut bo duak hlawm. Lalnoi berin "palai ho hmaah i nalh viau a ngai, mo hmelchhia ai chuan hmelṭha chu an duhawmin hmuh an nuam nge nge alawm, ka lo chei ang che" a tih tlat avangin ka indawh ta nge nge.









"A hriat loh theih ang ber khan hnawih ang che, lan natural ka duh ania" tiin ka chhing a, Lalnoi chuan min hnawih nghal mawlh mawlh. "Chhing i u Mimii awm dan kha a mak ka ti, lungawi lohna a nei em ni?" a rawn ti a, a sawi zawh rualin ka mengchhuak nghal.









Ka ṭhiante bulah chuan thil thlen dan chu ka hrilh a, tuma bula ka sawi ngai loh ka sawi a, an rintlak tih ka chiang bawk a, ka thawk a veng deuh huai. Mahnia pai reng kha a lo hrehawm bawk nen, sawipuitur ṭhian ka nei hi ka lawm takzet. "Tinge u Mimii chu chutia a awm tlat le, thil danga a rilru a zau ṭhin nen, tuna mi a hrethiam tlat lo hi amak ka ti. Keini takngial pawhin a lungawi lo tih kan hrethei ania" a rawn ti a, pasal ka nei tur min kam bertu chu u Mimii hi a ni.








"Aw, Hmangaihzuala hi a lo duh ve avangin i neih a phal lo a ni ang chu. Ani in chan/neih a duh si ang a, in inkar tihchhiat a duh avangin hetiang hian a awm a ni ang" ngaihsam zeta Lalnoi'n a tih chuan ka ngaihtuahna a vir zawk.









Hetiang zawng hian vawikhattê mah ka la ngaihtuah ngai hauh lo. Chuan u Mimii hi Hmangaihzuala duh tur hmeichhia a ni em tih pawh ka hrethiam der lo. A mipa duhzawng a sawi ngai miau lova, a mit latu a hmu ngai lo emaw tih tur khawpin mipa ṭha a tih thu a sawi lai kan la hre ngai lo.









"Hmangaihzuala te chu a duh dawn em ni? Ani te chu hmeichhe duh khir ve deuh ania, Chhingpuii pawhin lo ngai haw lo sela, Hmangaihzuala chu pathlawi ania, a duh kher dawn em ni?" a ti a, a thilsawi chu dik ka ti viau. U Mimii aia mipa chungchanga duhkhirh hi ka la hre lo hrim hrim.









"A duh vang bakin a lungawi lo lovang, chutiang ni lo se, naute pasal hual duh loh lutuk avanga thinrim tuna, lungawi lo pawh an awm mang lovang, a ruka thinrim te chu an awm thei meuh mai, mahse a thinrimna pawh insum theih lo khawpa a lantir chuan a duh vang bak a ni nang,








I sawi hmangah i nu leh pa bulah meuh i neih loh theih nan hotel-a hmeichhia a luhpui thin thu a sawi mauh mai pawh kha a mak. Nu leh pa bul meuha khatiang a thlen avang pawh khan kei chuan ka ringhlel lutuk. I nu leh pa khan inneih phal se a duh vang tih chiang reng, a duh hrim hrim ang" min chei pah chuan a sawi mawlh mawlh.








A sawitu chuan ngaihtuah zui lo tih hriat zet hian min chei zawm leh a, kei erawhin ka ngaihtuah nasa tulh tulh. Mami pawh a ngawi ve reng a, ngaihtuahna kawm ve tih hriat takin a melh ngai a melh a, a khap leh deuh fak ṭhin.








Kei phei chu ka ngaihtuah hian Hmangaihzuala nena kan inbiangbiak ve tirh lam kha a chhui thleng ta hial mai. U Mimii khan hnaih lo tura min tiin hmeichhia infiamna atan baka a tih loh thute min hrilh kha ania. Ka hnaih a duh loh zia leh Hmangaihzuala'n a fapa awmpui tura min sawmna ka hnawl pawh kha a lawm hmel hle anih kha.









Sawi tur a ni em tih pawh hre lem lo chuan ka ṭhiante bulah chuan ka thil ngaihtuah ho chu ka sawi vek. "U Mimii chu a va mak reuh mawle" Mami chuan a ti ringawt. "A duh anih kha, a duh" Lalnoi'n a lo ti leh hmanhmawh. Ka u hian a lo duh ve reng emaw ni le?

[Te-i Mrs Ambrose]

Pathlawia (Never Let You Go)
By: Te-i Mrs Ambrose

Chapter 16


(a tawi deuh tih ka hria, mahse, inkhawm kan ban atang khan ka type nghal char char ania, in tan liau liau a ni e)





Palai an lo thlen meuh chuan u Mimii chungchang lam reng reng a lang tawh lo. Ka awmdan chu sawifiah thiam har tak a ni. Kan ṭhian ho chuan thingpui chu kan lum a, kan laina hnaite an lo thlen lai kha chuan engtin vak mah ka la awm lo , mahse Hmangaihzuala palaite an rawn thlen meuh chuan ka awmdan a danglam nghal vek.










Thingpui kan sem laiin palai zinga a upat hmel deuh ber chuan "hei hi em ni kan lo kal chhan chu?" zaidam hmel zet hian a ti a, ka chhungte chuan an lo chhang a, "a hmelṭha in a fel hle mai, min phalsak lovang tihte pawh a hlauhawm rum rum alawm, keini lam lahin kan duh thlu nang dawnin a lang a" a ti deuh charh charh a.









Thingpui kan sem zawh hnu chuan reilote kan ṭhu ve a, an thingpui no kan seng zawhin ka pindanah bawk kan pil lut leh vek. An thilsawi ho chu hriat chak ve tho mah ila, kan tana va awm ve reng kha a nawm loh bakah a zahthlak avangin ka pindanah kan lut leh vek.










"Awi, ka awm dan hi a mak lutuk, ka sawi thiam lo zawk" ka tih chuan "Ni reng ang chu, pasal neih i tum thawt thawt alawm" Lalnoi chuan min ti a, kan han nui leh rih. "Ka pasal tur chu ni se, tuna i feelings ang kha ka put ve ka ring, mahse, tun hi chu ka tan tur ni hek lo le, engtin mah ka awm lo" Mami chuan a rawn ti ve a.










"Zanin chu lo riak ve mai ru aw, chhuatah puan kan phah ang a, kan mu ho dawn nia" ohur zet chuan "Imm..a ṭha alawm, chhungte kan hrilh ve lawk ang" an lo ti nghal a, an chhungte ve ve an call hnu chuan riak turin thu an titlu a. Hei aia kan la naupan deuh lai kha chuan riah khawm tih vel kha kan hrat viau ṭhin, mahse, kan kum a tam deuh deuh zel a, riahkhawm kan chin pawh zawi zawiin kan bansan a, a hnu phei chuan kan riakkhawm ta ngai meuh lo.









Palaite an haw hnu chuan kan va chhuak ve a, kan ṭhian thum chuan kan ṭhu ho ṭhap, kan lainate tumah an la haw lova, ka pu chuan "Bawihi, palaite chu rawn nawn mai turin kan ti anih kha, rei an rial ka ring lova, chhungkuate pawh inrawn ve ṭha kan tih avangin engmah kan la sawi fel rih lo" a ti deuh chuar chuar, ka ngaithla ve kar ringawt a, engmah ka sawi.











Chhungte an haw dial hnu chuan keini ṭhian thum pawh ka pindan lamah bawk kan inzui leh a, vawikhat mah u Mimii a pindan aṭang a lo chhuak lova, ka pu ngaih pawh a ṭha lo hman kha ania, ka nuin a lu a nat thu a sawi ta ringawt. Lehlam zawng tak chuan a lo chhuak lo chu a lawmawk zawk. Ni lo se, midang bulah Hmangaihzuala nihna ni lo pui te kha a sawi leh emaw a nia nga, kan chhungte lah hian u Mimii an lo ring ṭhin bawk nen. Eng eng emaw a thlen a hlauhawm.










"Chhing, pasal nei tur anga ka suangtuah che a mak ka ti" Lalnoi chuan kan mut dial hnu chuan a rawn ti a, "Nia, pasal i neih hnuah chuan kan awm ṭhin dan ho tê te te hi kan ching chhunzawm thei tawh dawn lova, inhnaih tak angin lang mah ila kan kar chu a hla ve tawh ngawt ang." Mami chuan Lalnoi thusawi ṭawm chuan a lo tuihnih ve a.










Kei pawhin ka ngaihtuah zui rauh rauh mai. "Tun ang hian awm thei tawh lo mah ila, kan thinlung ber a inhnaih tlat chuan a ṭha a nimai, hlim laia kan kianga awm ai chuan lungngaih ni a kan kianga awm ṭhin ho hi an hlu zawk. Lungngaih ni hian inhnem thei ila, chu chu ṭhianṭha dik takin a tih tur chu a ni. Ka tiam ang che u, in hlimna zawng zawng ka ṭawmpui thei lo che u anih pawhin in lungngaihna tal ka ṭawmpui ṭhin ang che u" ka ti dap dap.










Ṭhian ṭha tak tak chu mangan ni hian an lo lang ṭhin. Mi zawng zawngin min huat lai pawhin kan lam an ṭang tlat zel a, hlim ni chiaha lo lang ṭhin ho hi ṭhianṭha an ni vek kher lo. Kan mamawh lai bera kan kianga awm ṭhin ho hi ṭhian ṭha chu an ni.










Zing lamah chuan ka ṭhiante chuan haw lova chaw ei tlang an tum avangin eirawng kan bawl ho a, ka nu leh u Mimi kan awl tir daih bawk. Kei leh Mami kan buai viau laiin Lalnoi chuan phone a en a, chutah "Chhingpui, enteh hei" phur zet hian a rawn ti a, "ka la buai" tiin ka thiltih lai ka tih chhunzawm thung.










"Hmangaihzuala hian in inhual tih a post kha, khatah khan in pahniha thlalak a dah tel tawh a" a rawn tih takah chuan phone chu ka va en nghal, ka dawra kan awm lai leh pawna kan din dun hnua mi kha a ni. Comment ho chu ka en zuai zuai. Lawmpuitu an tam rualin a lo sel tawkte pawh an awm nawk mai.










"lawmthu te min hrilh dawn miah na nge?" a tih chuan ka thiltih lai chu chawlin amah chu ka en a, "eng chungchanga nge lawmthu chu ka sawi ang a?" ka tih chuan a phone a thlalak chu kawkin "ka laksak che u anih hi. Hmangaihzuala kha ka va thawn a" a rawn ti a, henu hian thlalak hi nuam a ti ve chiang a ni. "kan lawm e" ka ti chiah "het, a inneih em pawh in la innei lova, lawmthu I sawi kep kher a ngai lo" nghal ru zet hian a ti a, chutia a tih avang chuan ka thaw hap ringawt.












Dawra kan luh thleng chuan a khat tawkin Lalnoi chuan min chhaih reng a, Mami erawh a kalhrang tawh thung. Dawr han nghah vel chu a ninawm ṭan riauin ka hre tawh. A hma kha chuan dawr nghah hi nuam ka ti viau ṭhin kha a nia. Tunah chuan nuam pawh ka ti tawh mang lo.









"Chhing, kumin i piancham hi lawm i tum em?" Lalnoi'n a tih chuan ka piancham thlen nan thla khat leh a chan ve vel chiah a ngai tawh tih ka hrechhuak "awi, I sawi hma emai a, thlathar han chuangkai phawt ila, kan la sawi ang chu" ka ti mai. Tun aṭanga han sawi atan chuan a la hma deuh mah mah.










"Sawi mai mai la anih chu. Hman dawn chuan sum khawl te pawh a ngai ve dawn a" a tih chuan ka thaw hap, henu tak hi chuan a hriat hma chu min zawn dawn tih ka hria. "Pathian khawngaihna zara Hmangaihzuala nen kan innei thei dawn anih chuan kumin ka piancham hi ka nulat laia ka piancham ka hman hnuhnun ber a ni dawn a, kan lawm ho ve ang chu, ṭhenrual ṭha tlemte te nen" ka ti ta nge nge.










"A lunglen thlak reuh e a" a lo tih daih chuan ka nui ta ringawt. Amah bawk chuan "I piancham hi Hmangaihzuala nupui hlui thih ni a ni tih i hria em?" a tih zawm leh zat chuan lu ka lo thing a, ka hre ngai lo tak tak. Ka pian niah a boral tih tu sawi mah ka la hre ngai lo reng reng.










U Mimi pawhin Hmangaihzuala chungchang engmah a sawi tawh ngai lova, tin min duhpui loh thu pawh a sawi tawh ngai hek lo. A ngawi ngul ta ringawt a, kan kar erawh a la ṭha chuang lo. Min be duh miau hek lo.










Hmangaihzuala palaite a ṭum hnihnaa an lo len ṭum chuan an inrem fel ta a, Mami te pawh an lo kal ve leh a, min phurpui khawp mai. Kan inneih nan thla hnih vel a la awm. Kan inneih ni tur ka hriat meuh chuan ka lungphu chu rang zaih zaih tak a ni. Ka lung te a leng dawn titih mai.











Hmangaihzuala pawh zan lamah a rawn leng ve leh zeuh ṭhin a, a changin Jarson a rawn hruai ve ṭhin bawk. Jarson a tel loh hi chuan ka nu leh paten rei min ṭhutpui ngai lo. Chutia ka tih avang erawhin an be ngai lo tihna a ni lo, an pindana min luhsan hmain a mawi tawk chuan Hmangaihzuali hi an be hmasa phawt zel. Jarson a lo hruai ṭum hi chuan ka nu leh pa hian an lawm hle a, Jarson pawh hian an lawm tih a hrechiang bawk a, ka nu leh pate hi a pi leh pu neih bik ngawih ngawih zel. Chu hlei hlei chu ka nu leh pain an lo lawm a, Hmangaihzuala ka nei tur chu Jarson avang hian a phur ber berah an ṭang titih der tawh. An pindanah an awmpui a, an mutpui ṭhin thul. Naute awm tur tumah kan awm tawh miau loh avangin Jarson chu an ngaina a, an awm reng peih. An pindana an hruai lah hian Jarson pawh a lo muhil nghet ve viau mai ṭhin a, Hmangaihzuala'n haw a rawt hnuah ka pawmchhuahsak tawp zel.










A ni telin Hmangaihzuala chu ka thlahlel a, min hmangaih thu a sawite hian a thinlung chhung aṭanga chhuak ni lo mah se, ka hlimpui viau tho zel. A chhan chu min duh ve tak tak tawh tih ka hre miau. Min hmangaih kher lo mah se, tuna min duhna hi a tawk ka ti viau a ni.











Mami, Daniel leh Lalnoi lah hian ka piancham kan lawm dan tur ngawt min sawipui tawh a, kar khat vel chiahin a dang tawh miau a, kei pawhin phur zetin ka sawipui ve ṭhin.









Kan ina ka piancham, ṭhian ho nena hman chu kan rel a, ka nu leh pa pawhin kan lawmdan tur min sawipui ve ṭhinin in chei dan turte chenin min sawipui ṭhin. "idea ka nei, ṭhiante hnenah pawh i pianchamah in inneih tur sawmna kan semchhuak ang a, an lawmpui dan che a thuahhnih dawn lutuk" Daniel chuan a ti a, ṭha ka ti ve viau mai. Keimahni lam chuan sawmna card an siam der tawh a, semchhuah mai theihin a awm tawh.










"Ramdina hi a reh tawp, a rawn lawr khat tawh si" Lalnoi chuan a ti a, a sawi dik ka tih em avang chuan ka bu nghat nghat. "A hranpa liau liauin ka'n sawm ang e" tih leh call ka rual a, a chhang tawh dawn lo emaw ka tih hnuah "Aw Chhingpui" hahdam hmel zet tian a lo ti a "Engtik nge ka piancham?" engdang sawi lo chuan ka ti nghal ka tih nghal "Kar thar Zirtawp" a rawn ti ve nghal bawk, "Imm,, i hria a, ka lawm takzet. A hranpa liau liauin ka sawm che nia, lo kal ngei ngei ang che" ka tih chuan "ka lo kal lo phal nang, ka lo kal ngei ngei ang, a hran, a special chiin min sawm bawk si a, ka rawn kal ang" a tih chuan ka bu nghat nghat.










Min hmu thei lo tih ka hriat rualin ka buk lai chu la tawp nghal a. Rei lote hnuah call kan hang up a. Rin loh deuhin Hmangaihzuala a lo lang hlawl mai. "Bawihi" a chauh hmel reuh khawp mai. A bula ka din chuan ka kut chu a lo chelh a "heti hi chuan ka hahdam ta huai mai" tiin ka chal a fawp zeuh.










"Kar thar Zirtawp hi ka piancham a nia, ṭhiante nena lawm kan tum a, I lo kal ang tiraw?" ka tih chuan a ngawi reng. A hnu feah chuan "Imm, ka lo kal loh chuan tu midang nge lo kal ang" min nuih pah hian a ti a. Ka piancham leh a nupui hlui thihcham a lo inang kher chu pawi ka ti hle. Hmangaihzuala pawh hian nuam lo a ti dawn lutuk.










Ka piancham a nihna avangin min hlimpui duh viau mah se, a nupui hlui thihcham a nih miau avangin a hlim reng thei dawn lo. Keimah avang tal pawha hlim der ve duh viau mah se, a nupui hlui a hmangaih em em ṭhin thihcham a nih miau avangin a hlim reng theiin ka ring lo.









"Bawihi, ka sawi chu i hria em?" Hmangaihzuala'n a tih chuan ka suangtuahna ram aṭangin ka harhchhuak zawk mai. "Oh, i sawi ṭha leh thei ang em?" ka ti a, "I piancham in ina kan hman zawhin a hrana ka in lama hmanpui che ka duh. In ṭhian ho zingah chuan Jarson lo hruai ve a rem dawn si lova, i piancham niah chuan a hlim dawn lutuk, i piancham hmanpui ve ngei che pawh a duh dawn. Chuvang chuan kan pathum chauhin hman ho leh ka duh" a tih chuan thinlung lam a hlim veng veng.









"Bawihi, zanin chu kan in lamah chaw i lo ei dawn aw, i nu leh pa pawh ka hrilh tawh" a rawn ti a, ka en reng ringawt. "Kan ngai tawh che, chuvang chuan i lo kal a ngai. Zanah kan pafain kan thlah ang che" a ti nghal zung zung. Amah bawk chuan "Tlaiah i dawrah hian ka lo lam ang che aw, ka hmanhmawh deuh si a, ka kal nghal mai ang" tiin a kal nghal a.









Ka bula Mami lo ding chuan "I piancham leh a nupui hlui thihcham a lo inang kher kher hi a pawi e" Hmangaihzuala chhuah takna kawngka en pah chian a ti sap. "A tan chuan han hlim viau kha a mawi lohna chen pawh a awm dawn a, a nupui hlui thlarau lakah pawh a inthiam lo viauin ka ring a, nuam a ti chiah lo maithei.









Mahse, lehlamah nang i awm a, i pianchama hlimpui loh che kha a duh dawn lova. Awi, a dinhmun saw ka khawngaih reuh." a tih zawm leh a "Kal tawhte chu kal tawh an nia, chu lovah Chhingpuii a nunah a lo lut tawh a, khawvel eng a lo hmuh niah hi chuan a lawmpuiin a hlimpui ve ngei a ngai. A nupui hlui chu a kal tawh, ngaihtuah ngai a ni tawh lo, mahse, a la dam Chhingpuii hi chi a ngaihtuah a ngai" Lalnoi chuan a rawn ti ve a, a dikna chen a awm vein ka hria.








"Ni e, Lalnoi hian thu ṭha leh laktlak hi a phuhchhuak tlem a, tun ami erawh kha chu dik ka ti" Daniel pawh chuan a lo ti ve a, kei erawh chu ka piancham leh a nupui hlui thihcham pawi ka tihna chuan min la tuam reng thung.

____________________________________________

(ZAWMNA)





Hmangaihzuala chuan dar thum bawr velah min lo lam a, "Noi, i duh hunah lo inkhar mai rawh aw" tiin dawr chu ka chhuahsan nghal, Hmangaihzuala te in kam thlen chuan Ann-i a lo la haw lova a, ka va lang hlawl chu a phur hmelin a hlim khawp mai. "I rawn inlan tlem thei lutuk" a lo ti nghal bawrh bawrh mai. "dawr lamah kan buai lutuk a" ka tih chuan a bu ve nghat nghat.









"Khawiah nge Jarson hi" ka tih chuan a room lam kawk zeuhin "a muhil a" a rawn ti a, Hmangaihzuala en chunga "awmpui thar te laksak i tum miah lo a mi?" ka tih chuan lu thing deuh nghutin "amah Jarson ber hian a ngaina leh dawn chuang lo, a tibuai leh ang a, rei pawh thawk lovin awmpui thar chu a bang mai ang" a tih chuan ka nui hak mai. Jarson chu chutianga naupang ninhlei hmel mi a ni miau lo. A nel loh lakah hian a lo sual ve emaw ni?









Jarson a lo harh chuan a bulah ka va kal hnai a, "Bawihte, i harh tawh tiraw?" ka tih chuan mit nuai chat chat chungin "Ama" tiin min lo ban a, kai thovin ka pawm nghal. "Ka mumangah khan ka lo hmu che a, chuan ka harh a, ka bulah ka Ama kha i lo ṭhu reng" hlim hmel zeta a tih chuan ka nuih tawp.









"Imm,, i mumangah khan ka lo kal hmasa alawm" ka tih chuan nuam a tih ve hmel khawp mai. A hmai vel ka phihpui a, kan inpawmchhuak chu Hmangaihzuala'n min lo en reng. "In inhmeh nufa lutuk" Ann-i chuan a lo ti a, he lama ka lo kal chu ka nui deuh reng mai.










Chaw kan ei lai chuan Hmangaihzuala chuan "Engtikah nge bazar i duh? Inneih pawh a hnai ve deuh tawh a" a tih chuan chhan mai dan tur ka hre lo. "Ka chiang chiah lo, zanah kan sawi ṭha zawk mai dawn nia" ka ti a, a bu ve nghut nghut. "Ama, ka Apa nen hian biak inah in inkai dawn ami?" Jarson-a'n a tih chuan ka en vat, Hmangaihzuala chuan hmui phun hian "innei a tihna anih kha" ka en rualin a lo ti a, Jarson-a'n inneih a sawi ve dan chu a lawmawm ka ti takzet.









"Imm, kan inkai ang a, chuan biak in aṭang in in lamah kan inkai lut nghal daih dawn nia aw" ka ti a, a hlim hmel kher mai. "Yes, Ama te nen in khatah kan cheng tawh dawn" tiin a chaw chu a ei nghal ṭeuh ṭeuh mai. Zanah Hmangaihzuala te pafa chuan min thlah a, kan in kawta kan din takah chuan "lo lut ve ula" tiin ka sawm a, Hmangaihzuala zawk chuan "a tlai deuh tawh si a, kan lo lut lo mai ang. Min lo be dawn nia" tiin phone a lek zeuh a, ka chhuk hnu chuan an tlan nghal a.









Ka mut dawn chuan Hmangaihzuala chu ka va call a, a lo la har lo khawp mai. "Jarson ka mutfel tir chiah" a lo tih chuan ka khawngaih ringawt. "In bula lo kal ka chak" ka tih chuan "ka rawn lam ang che" a rawn ti nghal a, a aw a thutak em em lehnghal. "Mi min ngaihdan tur a dik lo vek palh ang. Kar tlemte bak a awm tawh hleinem" ka ti a, 'aw' ti ngat ila chuan min lo lam duh hrim hrim ang.










Kan inbe rei viau, kan bazar hun tur pawh kan sawifel ta bawk. Mo kawr hawh mai ṭha ka tih avanga bazar pawh hmanhmawh hran lo ka ni. Kan inbiak zawh hnuin phone chu ka dah nghal a, ka mitthlaah Hmangaihzuala a lo lang nghal.










Ka hmuhtirh leh tuna kan inkar vel chu ka ngaihtuah a, ka hmuhtirh lai vel kha chuan ka natna kha a ni ringawt. Mi pa ka duh miau si a, ka chang dawn lo tih ka hriatna khan min tina hle anuh kha.









Chuan ka hmu ta lo char char a, ka hmuh leh tak loh avangin ka theinghilh ve tial tial a, ka theinghilh hlen tawh dawn emaw ka tih hnuah a rawn inlan leh thut a, nupui nei tawh lo lehnghalin! Mahse, ka tawn leh hnu pawh khan ka tan chuan ka natna thlentu a ni leh zel tho a.









Min hmangaih thu a sawi khan khawvela hmeichhe hlim berah min siam a, kha a hmangaihna min hlan kha a der mai a ni tih ka hrechhuak leh si a, mahse, ka hriat meuh kha chuan ka tlai tawh lutuk. Thlah thei tawh lo khawpin ka hmangaih tawh.










A dera min hmangaihna kha a der tih hre reng chungin ka hlimpui thei tho a, hmangaihna avang chuan a lo ât theih khawp mai. Min hmangaih kher lo mah se, min duh tih ka hriat avangin ka lawm a, beiseina sang tak ka nei a, chu ka beiseina erawh chu a hlawhtling ngei dawn em ka chiang lo. Min la hmangaih ve mahna tih hi a ni si a.









*Happy Birthday* message chu zing aṭang tawhin ka ṭhiante hnen aṭang ka dawng mawlh mawlh. Mahse, Hmangaihzuala hnen aṭang erawhin eng message mah ka la dawng ve lo. Ka hnual dawn titih a, mahse ani chuan hmai chhan ngeia min hrilh a duh vang a nih ka rin avangin in tihhnual ka duh leh ta lo.










Chhunah dawr lama kan awm lai aṭangin Mami, Daniel leh Ramdina chu an lo lang der tawh. Nidang chu ni se, tun ang hunah hi chuan ka hlim tawh viau ang. Mahse, tunah hi chuan thinlung tak taka hlim a har takzet. Chu pawh ka thlakak dawn vang kha a ni. Hmangaihzuala, a nupui hlui thlan nghenga a ṭhu lai thlalak tu emaw hnen aṭangin ka dawng miau. Ka ṭhiante erawh engmah ka hrilh lo thung.









"Khawiah nge Changtupa hi, a lo lang har ka ti" Daniel-a'n a tih chuan "a, zan lama a hrana a fapa hova ka piancham min hmanpui a duh thu a sawi a, a inbuatsaih ve a ni ang" ka ti a, thinlung lam erawh engtin emaw a awm deuh tlat. A nupui hlui thihcham mah ni se, ka tana ni pawimawh tak hi min theinghilhpui loh hram ka beisei.










"Romantic thei reuh e" Mami chuan a ti a, an nui dar dar mai. Ka nui ve nangin thinlung taka nuih chu a har talh mai. Mami chuan a hnu feah min kaihrang a, "dik lo a awm" a rawn ti nghal bawk, nuih luiin "engtin nge dik lo chu a awm theih ang a, ka puanchamah chuan dik lo pawh a dik chawpchilh vek mai ang" ka ti a, Mami chuan min melh reng, thudik sawi turin min ti a ni deuh ber. A fing lutuk hi chu aw...










"Mam, eng vak mah a ni lo" ka tih pawh chuan "Ka hrechiang che" tih chiah a sawi. Thaw hapin "Hmangaihzuala nupui thih cham a ni ve bawk sia, ka ngaihtuah deuh a" ka ti ta nge nge. Thlalak kha ka ngaihtuah chang apiangin a bula va kal mai tur em ni ang tia ngaihtuah chang ka ngah. Mahse, amah chauha awm a duh ka rin bakah a thin ka tihrim mai mai ka hlauh avangin kal loh ka ti leh nge nge zel.









"A puitling tawh alawm, tawrh dan tawk a thiam em em ang, a chaktawk tih ring phawt rawh" min tih laiin 'thlalakah kha chuan a kehchhe vek a nih kha, amahah khan tha pakhat pawh a awm lo anih ber kha' thinlung lam chuan a ti thung. Mahse, engmah sawi lovin Mami chu ka nuih ta zawk a.









Kan ṭhian panga chuan kan in lamah kan haw tlang dial, dawr pawh inkhar hma tak kan ni. An pangaa chaw lo ei an tum miau. Hmangaihzuala chuan min lo la be lo hrim hrim.









Kan in kan thlen chuan kan thawm a ṭha hlawm khawp mai. Ka chhungte pawh chuan an lo dawngsawng ṭha khawp mai. Ka ṭhiante lah kan ina che tla ngun ber berte an ni bawk a, an inthlahrung lo hlawm viau. Rawng te chu kan bawl ho a, a nuam ve ta phian.









Chaw kan ei lai chuan ka nuin "Bawihi, Hmangaihzuala te pafa kha sawm ve tur che ania" a rawn ti a, u Mimii ka melh nghal. Ka nu thusawi chu hre lo ang hmakin chaw chu a ei zawm mawlh mawlh. "Ih nu, zan lama kan pathuma a hrana ka piancham min hmanpui a duhthu a sawi si a, ka au buai ta lo mai" ka ti a, ka nu chu a bu nghat nghat mai.









"Mahse ava tlai tawh em ve" ka nu chuan hrechhuak thut ni awm tak hian a hnu chuan a rawn ti a, "kan ina piancham hman hi dar kua bawr vela kan zawh hnuin an in lama tlang nghal kan tum a, Jarson-a, he lama lo hruai kha chu a buaithlak mai bakah, puitling ho bulah chuan Jarson a hah kan hlau deuh a, chumi avang chuan an in lama a hrana hman tun kha kan ni bawk a, kan lo haw har lutuk lovang" ka ti a, "in phal ang tiraw?" ka tih sep chuan ka pa zawkin










"A, Jarson pawhin i piancham hmanpui ve che a duh dawn a, i va kal dawn nia" a ti a, ka thaw huai mai. Dar sarih bawr velah chuan ṭhiante an lo thleng ṭak ṭak tawh. Hmangaihzuala erawh a lo la lang lo cheu. A la hman lo anih ringin ka call duh em lo.










Ṭhenrualte chuan nuam an tih hmel hlawm khawp mai. A khat tawkin a ṭhenin "Khawiah nge i pasal hual chu" an ti leh zeuh ṭhin. "A la buai deuh a, a lo lang ve mai ang" ka ti tawp zel. Mami chuan "A ni em em tawh lo, call tawh mai rawh" a rawn ti a, a lungawi hmel vak lo. "a la buai ve a ni ang, a lo lang ve ṭep tawh ang" ka tih chuan min melh rum ṭha ngang mai.










"I duh lutuk mah mah tih hi a inhria ang a, a la induhkhum ang che tih ka hlau. Induh thiam ve deuh rawh" a ti deuh hmak. Ni e, ka duh lutuk mah mah tihte chu ka pha buai thei reng reng hleinem. Mami chuan min kalsan a, a hnu chuan ka call ve ta nge nge. Mahse, a ring ral ṭhak. Ka call nawn leh a, a la chhang thei lo cheu.










Chutih lai chuan message tone a lo ri a, ka en chuan thlalak a ni, chupawh chhun lama mi hnen aṭang bawk. En loh ka tum zet nangin ka en leh ta nge nge. Ka en hma kha ka ngai rum rum. Thlalak chu a thim deuh vek tawh. Mahse, engmah lang thei lo tur khawp chuan a thim chhe lo, thlan bawk kha a niin ka hria. *Hmangaihzuala hian thlan a la chhuahsan reng reng lo, tuna mi hi tlai thim hlim ami anih hi* tih a lo thleng leh nghal.










Ka lungzawn chu a rawn na nghal veng veng. Ka hlauh ang chiahin ka piancham hre lo lekin a nupui hlui thlanah a awm. Ka hlim lo a ni tih an hriat hlau tak chuan hlim hmel ka pu lui hram hram, mahse har tak a ni.
Ka ṭhian te ngaih pawh a ṭha ta ngang lova, "Hmangaihzuala chu eng ngati chen chen nge, call tawh mai teh" Lalnoi chuan a rawn ti a, Mami pawhin min en kar.










"Tunah khan min lo call alawm, a lo lang thei dawn lo anih chu, min rawn lam tur thu erawh a sawi a" ka ti a, an mit mengah awm chuan awm lo an tih hmel kher mai. "Eng em em nge a tih a, chuti taka a buai viau" Lalnoi chuan a ti leh, a lungawi loh hmel kher mai.









"Chhun lamah Jarson-a ninhlei a chhuak a, engmah a buaipui hman loh thu leh tunah pawh a la peihfel loh thu a sawi a, ani pawhin nuam lo a ti ve lutuk, mahse, kan pathuma special taka min hmanpui a duh bawk si a" tiin dawt chiang lutuk ka sawi a, engtin nge khatiang dawt kha ka sawi thiam zawk pawh ka hre lo.









Cake cut dawn hnaih tawhah pawh chuan Hmangaihzuala chu a lo inlan ka ring tlat a, mahse, ani chu thehmeh an sawi ang maiin a reh hmak. Ṭhiantein cake an lo nawr takah chuan chhuahlam siamin bathroom ka hman lawk tur thu ka sawi a, ka let veleh kan cut nghal tur thu sawiin ka kalsawn nghal bawk.









Hmangaihzuala chu vawi engzat nge ka call ka hre lo. "Hmangaihzual, khawngaihin min ti beidawng suh" tiin ka call leh, mahse, min ti beidawng chiang khawp mai, a la lo hrim hrim. A ring char char a, a chhang lo hrim hrim. Ka beiseina neih ve zawng zawng, 'a lo kal ve mai ang' tia ka beiseina êng kha a thim nghal vek. A lakah hian hetiang em em hian ka pawimawh loh chu ka ring lo asin.









A tan chuan eng tihna mah ka lo ni lo a ni ngei ang. Heti em ema nâ hian min la siam ngai lo. Ka pawimawh ve chak lutuk a nunah khan. Mahse, ka pawimawh loh zia chu chiang takin ka hre si. Engtin nge a lakah hian ka pawimawh ve theih ang.









Ka chhuah chuan ka nui lui sang a, Hmangaihzuala vang hian a dera nuih hi ka thiam tawh viauin ka ring. Cake chu ka cut a, duhthu sâm tura min tih chuan ka chhing vang vang, "A nunah khan pawmawhna tlemte tal neih ve ka duh" ka ti sap. Ka ṭah a rawn chhuak nghal teuh bawk.









Amah avangin ka tlawn nawn leh ta vawng vawng e, tlawm theihtawpin min tlawmtir reng mai anih hi. A hlimna min pek zozai kha tuna natna min pek nen hian khaikhin dawn ila, tuna ka natna hi a nasa zawk ngei ang. Ka pawimawh lohna hian min tina em a ni.


(zan lama inkhawm a ngaih dawn avangin tunah ka lo dah a ni a, ka dah chin chin hi ni mai teh se aw)

[Te-i Mrs Ambrose]

Pathlawia (Never Let You Go)
By: Te-i Mrs Ambrose




Chapter 17



(Signal ka nei thei lova, ka awmna khuaah hian a 4g tha lo lutuk, nimin khan story rawn dah la tum reng, mahse, signal a awm si lova, tukinah ka cousin hian signal a nei hlauh a Sunday mah ni se, ka rawn dah tawp a ni.)







Midang chu an haw vek tawh, ka ṭhiante erawh an la awm thung. "Chhingpui, anih kan va hawsan ve tawh ang che aw" Ramdina chuan a ti a, a bula ding Daniel pawh chuan "Ka ṭhianṭha em em nu, anih leh aw, rei tak min dampui ang che" tiin Ramdina nen chuan an chhuak a.










Lalnoi leh Mami pawh chuan haw a tum hnai tawh. "Hmangaihzuala chu ka hmuh hunah a chak lovang" Lalnoi chuan a ti a, ka nuih ringawt. "Engtikah nge a rawn lam dawn che a" a sana bih zeuh pahin Mami chuan a ti ve a, "a lo thleng ve ṭep tawh ang" ka ti tawp, mahse, Hmangaihzuala hian min lo la be lo hrim hrim.









Ka ṭhiante chu ka va thlah a, "ka lawm lutuk aw, nangni ang ṭhian hi ka nei lovang che u tih ka hlau" tiin ka kuah dun vang vang. "Anih aw, naktuk lamah i piancham in lawm dan chu min hrilh ve dawn nia" Lalnoi zawkin a ti a, Mami erawh chuan engmah a sawi ve lo.










An haw hnu pawh chuan Hmangaihzuala chuan min lo la be lo. Inchhung lama luh ka tum zet nangin lut ta lovin taxi lo tlan chu ka phar ta zawk a, ka nu chu ka call nghal bawk "Nu, Hmangaihzuala'n min lo lam a, a tlai ve tawh deuh nen, lo luhpui lovin an in lam kan pan nghal daih ania aw" ka ti nghal a, ka nu chuan a hriatthiam hmel khawp mai. Haw har lutuk lo tur chuan min chah a, Hmangaihzuala biak a duh thu a sawi loh avang chuan ka thaw huai thei.









Hmangaihzuala te in kawt ka thlen chuan a tlai viau tawh. An in chu a lo la êng va a, kawngka ka kik dat dat chuan Hmangaihzuala'n min lo hawnsak a, ka hmel hmuh chu a beisei loh lutuk vang nge, a meng buai nak mai. "Ka lo lut thei ang em?" ka tih chuan kawng min kian a, engmah a sawi lo.










Ka luh chuan inchhung chu a lo pangai vek. Chuan light zawng zawng tieng lovin a ṭhen chiah a tieng a, ka hawikual thuak. "Jarson-a a mutna a rei tawh em?" ka tih chuan lu a thing nghut a, engtin mah min chhan belh a tum hmel lo. Chu chuan ka rilru a tina lehzual.









Chhun lama aṭanga min biak loh avang te, ka piancham min hmanpui tur takngial pawha a lo inlan loh avang te leh ka call khati zozai a chhan loh avang te khan ngaihdam min dil pawh a tum chhin eih lo. A ngawi ngul a, nge kei hian ka lo beisei sang leh mah mah tawh zawk.











"Engmah sawi tur i nei ve lo em ni?" kan ngawih dun vang vang hnua ka tih chuan lu a thing a, a chetdan engkim chuan min tina vek. "Rilru natna i neih chuan, leh ka hnena sawi duh eng emaw tal i neih chuan ka inpeih reng ania" ka ti a, ka tlawm ngawih ngawih. Hmangaihzuala avanga ka tlawm chu pawi ka ti hran lo. Mahse, tha erawh a na ve deuh. Heti taka min pawisa lotu laka tlawm reng mai chu bei a dawng dawn dawn tawh.










Midang inngaizawng chu ni ve ta se, tuna ka dinhmuna ding mek hi chuan a thinrimna leh a lungawi lohna a tilang ngam ngei ang a, a titau ve bar bar thei bawk ang, mi ṭhenkhat phei chuan a mipa hi ngaihdam harsa a ti vein an lungawi lohna a tilang nasa viau ang.









Kei ve erawh chuan eng atan maha min ti lotu ka duhin ka hmangaih miau a, a laka thinrim chu sawi loh, lungawi lohna tihlan takngial pawh ka thei ve lo. Chan ka duh loh chuan engkim hi ka sepui ruah tawrh tlawk tlawk a ngai.










"Sawi tur engmah ka nei lo" a tih chuan ka ṭap lo chau tawh. Ka natna pawh engmah sawi lovin a natna zawk chiah ka ngaihtuahpui a, chuti chung chuan min la hnar fan a, ka tana a beidawnthlak zia chu tu mahin an hrethiam ve kher lovang. A lakah ka inhawng em em a, a tana rawn intukluh(t) kha thil harsa a ni lo. Mahse, min la hnar fan zel a, a tana mi pakhat chu ni ve ila, heti tak hian ka lakah a awm ka ring lo.









"Imm, sawi tur i neih loh chuan a ṭha alawm" ka ti sap, ka ṭah a chhuak takzet. "Vawiin lamah eng nge i tih a?" engmah thleng lo ang mai chuan ṭawng ka tum a, ka hlawhtling ta em erawh ka hre lo. "Nilengin hna lamah ka buai a" a tih chuan ka inrin hmain ka biangah mittui a luang nghal. Kha zawhna ka zawt kher kher kha ka inchhir takzet.









"Tinge kei kher hi min thlan, midang an tam tehreng nen" ka ti a, amah en tawh lovin chhuat ka bih ngar ngar. A ngawih vang vang hnuah "A chhan chu i hriatchian em kha" a rawn ti a, ka nui hak ringawt. Ka hlim vang emaw, a zat vang emaw pawha nui ka ni chuang lo.










"Engtia rei chiah nge min bum i tum a?" ka tih chuan a thaw hawk ri ka hria, mahse engmah a sawi lo. "Hmangaihzual, min tihnat reng hian nuam i ti em ni? Ka duh lutuk mah mah tawh che tih leh ka hmangaih mah mah tawh che tih i hriat avang em ni hetianga ka chung i awm?" ka tih pawh chuan engmah a sawi lo. A la ngawi ngul.










Amah chu ka en a, ka hmu phe ruai ringawt. "Maw, eng emaw tal sawi rawh. Ka hmangaih lutuk mah mah che tih i hria a, sawi kher lo mah ila ka awm dan leh chetzia aṭang i laka ka rilru put hmang hi i chian em avangin leh ka kalsan thei lo che tih hriain em ni nangmah avanga ka nat pawh hian eng atan mah i tih loh, a chhan chu ka kalsan thei lo che tih i hriat avangin" rilru na zet chuan ka ti leh a










"Min hmangaih ve maw?" tiin ka thilsawi pawh min chhang let lo chuan zawhna min zawt let a, ka nui hak, "I hrechiang viau zawk ang chu, i laka awmzia ka neih lohzia ka hriatchian em avangin ka nat lai ber pawhin ka natna ka tilang ngai lo, i laka awmzia ka neih lohzia leh i tana engmah ka nih lohzia ka hrechiang em em chung pawhin ka thlah thei lo che a, ka hmangaih em vang che a ni tih i hre mai lo em ni?" ka ti let a. "Nang hian min hmangaih avangin min kalsan thei lo maw?" a rawn ti leh.










"Hmangaihzual, i lakah hian engtiang chiaha tlawm rala inphah hnuai turin nge min duh? I laka awmzia tlemte tal ka neih ve theih nan eng chiah nge ka tih ngai?" tiin zawhna ka zawt ve a, min en a, mahse lungtum biak ang mai, engmah sawi lovin a ngawi leh daih tawh.










"Tunah pawh hian ka tlawm tawk tawh i ti lo em ni? Tinge heti taka i laka pawimawh si lo chu i nupui atana min thlan kher?" chu zawhna pawh chu zawt lo ang hlauh ka ni. "Thinlung nei lo, na thei lo hmuhin min hmu em ni? Ka thinlung hi infiamna tualzawl hmuhin i hmu em ni? Tinge I laka awmze nei ber anga lem min chan khum a, i tana mi pawimawh ber ni awm hrima min lo cheibawl ṭhin, tunah lah i tan awmzia ka neih loh zia leh i tana engmah ka nih loh zia chiang takin i lantir leh a" ka mittui a luang leh tawh.










"Khawngaihin hetiang hi chuan min fiam tawh suh, ka derdep lutuk, fiam tlak pawh ka ni lo, khawngaih leh tihtakzetin tuna i awm ang hi chuan min awmkhum tawh suh, awmdan ka thiam lo va, dawnsawn dan ka hre hek lo, a hma ang khan awm leh ang" ka ti a, a vawi engzat nan chiah nge tlawm taka a laka ka awm pawh ka hre seng tawh lo. Ka mi biak erawh a la ngawi reng, chu erawh chuan ka thinrim a kaitho titih tawh.










Imm, tuna ka hmaa mipa ding hi ka hmangaih lutuk mah mah tawh alawm, vawi engzat chiah nge amah avang hian ka nat la ngai ang.
"Eng ngati nge 'ka hmangaih che' min ti siin i thinlung min pek tel theih miah loh?" tiin ka en reng, min chhang hauh lo va, a ngawi ngul. Chutia a ngawih rengna chuan ka thin a tirim takzet.









Vawiin hi ka piancham a ni a, Hmangaihzuala hian ka piancham pawh min hriatpui lek lovin a nupui hlui boral tawh thlan lam min pansan a. A kal duh chuan ṭha takin min hrilh ve mai se, ka hrethiam mai tur, mahse, dawt min hrilhin nilenga a buai thu min hrilh zawk anih kha.









"Mawh, Hmangauhzual min chhang ta che, tinge i nupui hlui, nangmah phatsantu che kha tun thlenga i la theinghilh theih loh" chu thu chu sawi ka tum pawh a ni lo, mahse, ani hian min tihthinrim luatah ka sawi palh a ni!









Hmangaihzuala chuan kut a rawn vai vut a, ka biang a ri ta ṭhat. "Ka nun aṭang hian thlawk bo ang che" zawi kha fak si hian a rawn ti a. "Kan inneihna tur chu hetah, tun hunah hian chhutchah a ni e" a thu rawn sawi chuan min deng dawt dawt mai. Ka biang dawmin ka nui ro halh a, "a hma aṭang khan min hmangaih ve ngai hleinem tiraw? I fapa avangin min hnaih mai mai a, a pawi love, chuan ka lawm e, ka pianchama i thil min pek hi ka theinghilh tawh ngai lovang" tiin ka inhersan a.










Kohhran lam pawhin kan inneih tur thu an tarlang vek tawh a, ani Hmangaihzuala erawhin mi hmaa ka mualpho tur zia leh inneih dawn hnaiha an inṭhen tia mi min sawina tur pawh ngaihtuah hauh lovin kan inneihna chu a chhuchat nghal vek ania.









"Bawihi, ka tihpalh" rawn tiin ka hnung lam aṭang chuan min rawn kuah a, a chet dan chu ka beisei hauh lo. A lamah ka inher a, "a pawi hleinem" tiin ka nuih. Hepa lakah hian tunah chuan ka beidawng pumhlum tawh. Min rawh kuah a, "ka tihpalh, a thleng nawn tawh lovang" a tih chuan ka inla hrang a, a meng buai nak mai.









"A thleng nawn tawh dawn lo, i nupui hual ka ni tawh lo, imm, ka hria e, chuan i nun aṭanga tlawk bo turin min to bawk a, umm kha pawh kha ka hrechiang lutuk. Ka hmangaih luatah che ka na hnem tawh lutuk, tunah chuan eng natna mah i lak aṭang hian dawn ka duh tawh lo, i mi hmangaih let ve pawh ka phut tawh hek lo ang" ka ti a, ka ṭawng pangai viau chu mak ka ti.










"Ai Bawihi, khang thil kha sawi ka tum vang a ni lo, ka tihpalh takzet, min kalsan suh" a rawn ti a, a mitah chuan min chan a hlauhna ni awm tak ka hmuhsak. "Tunah hian Jarson hma hun ngaiin em ni hetianga i rawn chet? I fapa chu ka khawngaih viau, mahse, thinlung nei ve tho ka ni, ka thinlung hian nat reng a zuam lo, min hrethiam rawh" tiin ka mit ka chhing a, ka biangah chuan mittui a luang nghal.










"I hria em Hmangaihzual, min neih i duh chhan te, min hmangaih thu min hrilh chhante hi engkim ka hre ve vek asin, i fapa chan i hlauh luatah i hmangaih miah loh hmeichhe hnenah chuan i hmangaih thu i hrilh a, i tana pawimawh ber hmeichhia angah i inngaihtir a, mahse i hriat loh chu maw, kha hmeichhia khan thinlung a nei ve, nangin i bum reng tur a ni lo asin,










ka hmangaih luatah che khang dawt thu min hrilh zawng zawng kha a tak tiin mahni ka inbum reng a, ka hlimpui ṭhin viau. Nangmah avanga ka natna tawrh zozai te hi engmah i hre lo. Nangin chung ka natna tawrh sate chu tizual turin dawt min hrilh a, min hmangaih thu min hrilh a, mahse, ka chian em em chu maw, kha i thinglungah khan i nupui hlui bak kha tumah an leng lo tih hi.










Chuti chung chuan i kut vawn ka la thlang fan a, chu pawh chu engtikah emaw tal min la hmangaih let ve theih ka beisei vang a ni. Ka lo mawl a ni tiraw? Beisei bo ka beisei zantin che a, chu ka beiseina chu beiseina beidawnthlak a ni zantin thung.











Ka tawn tirh aṭang che khan natna min thlen tawh, ka hmuh hmasak berna aṭang khan ka duh tawh che, mahse, nang chu mi pawm lai, mi pa i lo ni reng a, ka natzia kha i hre ve lo. Tichuan a hnuah i lo lang leh a, ka tan kawng a inhawng ve tawh dawnin ka hria, mahse, i thinlung aṭang i nupui hlui kha a la chhuak thei lo tih ka hre leh a, ka natpui leh viau.









Mahse, hun a ral ve leh deuh a, beiseina min rawn pein min duh thu i sawi a, kei chuanin ka lo awi vek, ka hlimpui viau, mahse, a hnuah chung i mi hmangaihna hlante chu a der a ni tih ka hrechhuak a, ka hriatchhuah meuh erawh kha chuan ka lo tlai tawh, thlah thei lo khawp chein ka lo hmangaih tawh che.









Beiseina ka dap a, a hnuah chuan min hmangaih let ve theih beiseina thar ka dapchhuak a, inneih ka pawmna chhan chu maw, Jarson leh ka hmangaih vang che a nih mai piah lamah, eng tikah emaw nang hian min la hmangaih let ve theih ka rin vang a ni.









Zaninah hian a ni min hmangaih let ve thei ngai dawn lo tih ka hriatchhuah tak ni, ka piancham pawh min hriatpui lek lovin i nupui hlui thlan lam min pansan a, i kal duh chuan min hrilh ve la, ka dang dawn lo che, i tana i nupui hlui pawimawh zia ka hre ve miau.









Zing aṭang zan thlengin thlanah i awm a, ka piancham chu eng atan mah i ti ve lo, chupawh ka la hrethiam zel, mahse, dawt min hrilh erawh ka hrethiam thei tawh bik lo. Vawi engzat chiah nge ka lo call che, vawikhat tê pawh min chhang lo, midangin min sawidan i hria em?









'A pianchamah takngial pawh a pasal hual lo inlan ve lo anih hi' min ti a, ka hre lo dera, vawi engzat chiah nge nangmah avang hian vawiin chhunga dawt ka sawi pawh ka hre seng lo. Tunah ka lo pan vang vang che, mahse, nang chuan na tawpkhawkin min lo siam a ni. I laka inhawng taka ka awm lai pawhin min hnar a, nang hian min hnar chiang ta viau e, i tana engmah pawmawhna pawh nei ve lo hian beisei reng che hi a beidawnthlak zia ka hre ve tawh.










Tunah chuan harsa hle mah se ka thlah ve tawh ang che, mittuiin tlakna chang a hre tawh lova, ka nate hi ka zengpui ta emaw tih tur khawpin engmah nâ ka hre thei tawh lo. Tunah chuan ka beisei tawh lovang che, nangmahin tawpna chu i siam chiang viauin ka hria.










A na ber tur ka ni tih ka hria, nang chu i lo na lo anih pawhin pawi i ti ang tih ka hria, a chhan pawh i fapa avangin. Mahse, min lo dem bik suh ang che, ka tawrh theih chin a pel ve tawh. Jarson hnenah erawh ka hmangaih thu min lo hrilhsak dawn nia" ka sawi chhung zawng khan a ngaithla char char ringawt.










Kal ka tum a, mahse, min pawtlet leh "Bawihi, khawngaihin kal suh, ka thiam loh a ni, a thleng nawn tawh lo tak tak ang, min kalsan suh. Chuan vawiin ni, i tana ni pawimawh lutuk ka theinghilh erawh hi chu kei ngei pawh ka inngaidam thei bik lo" a thusawi lai chu pawt chatin "piancham thilpek ka dil che ang a, min pe thei ang em?" ka tih chuan "I duh engpawh a ni mai" a rawn ti nghal a.









"Min fawp rawh" ka tih chuan a meng deuh awk, mahse, rang lutuka ka kawnga rawn chelhin min rawn fawp nghal a, a tir chuan a dam ruih, mahse, ka chhanlet ve rualin a duhthawh telh telh, thawchham dawn lek leka min fawh hnuin min thlah a, ṭawng a tum rualin ka lo khap nghal.









"I piancham thilpek hi ka theinghilh tawh ngai lovang, ka ngaih chang che pawhin ka lo ngaihtuah chhuak ziah ang, mahse, khawngaihin ka hmuhah chuan lo inlan tawh suh ang che aw, ka pianchama min ṭhentu leh nâ taka min siamtu tiha hriat ai che chuan tuna thilthleng kha hriat reng ka duh zawk," tiin amah chu ka en.









"Bawihi, min ngaihdam theih nan engthil chiah nge ka tih ngai ang?" a tih chuan lu ka thing a, "ka ngaihdam nan che eng thil mah i tih a ngai lo, ka nun aṭanga hla takah awm la, chu chu a tawk a nimai" ka ti sap. Mahse, a hmel hmu lova awm thei lo ber chu keimah hi ka ni dawn tih ka chiang.











"I thinrim a reh nan eng nge ka tih ang? Chuan khawngaihin ka nun aṭanga kal bo tur ang chuan ṭawng tawh suh, dawnsawn dan ka thiam lo," tiin a kun a, tuna a chetdan hian a hma khan lo che tawh ni se, ka ngaidam fel leh der tawh ang. "Kei pawhin nichina awmdan ka thiam loh thu leh ka dawnsawn thiam loh thu ka sawi lai khan engtin nge min tih ve, min ngawihsan ngul ringawt a, tunah lem, keiin ka lo ngaihsak chuk chuk ang che maw?" tiin ka nui ro halh.









"I lakah hian ka beiseina neih zawng zawng a bo zo vek tawh." ka tih leh sep chuan Hmangaihzuala chu a rawn dakchhuak a, a mitah chuan natna ka hmuhsakin ka hria. "Bawihi, i piancham hi engtin nge ka theinghilh theih ka hre lo. Ka tihpalh a ni. Chu bak chu engmah sawi tur ka hre lo, ka tihpalh. Chuan dawt ka hrilh chhan che erawh kha chu i nat ka hlauh vang a ni" tiin ka kut a rawn chelh a.










"Bawihi, dawt ka lo hrilh ṭhin avang che khan ka tihpalh. Ka hmangaih lo chung chein ka hmangaih thu ka hrilh ṭhin che a, mahse khatia ka tih chhan kha chu chan che ka hlauh em avang chauhin a ni. Ka duh che, hei erawh hi chu dawt a ni lo, ka duh lutuk che" tiin ka kut a chelhna chu a tina sauh.










"Tuna i thilsawi ho hi a hma khan min lo hrilh la ṭha tur, tunah chuan engkim a tlai zo vek tawh, beisei reng che hi ka bansan ve tawh. Vawiina i chetdan ho hian na tawp khawkin min siam tawh. Ka piancham i theinghilh chhan i hre lo tiraw? Keiman ka hrilh ang che aw, i tan engmah ka nih loh avangin leh ka piancham i ngaihpawimawh loh em avangin i theinghilh mai anih kha" ka ti a, a meng dul nghal vek.










"Ka tana pawimawhna nei lo ang khan insawi tawh suh, ka tan hian i pawimawh lutuk asin" a tih chuan kut ka vai vut, "min bum tum tawh suh, Jarson chu i chan lovang, hmeichhe dang zawng la, nakinah Jarson chuan a ngaina ve mai ang" ka ti a, ka sawi zawng pawh chuan chhunglam chu a na veng veng thei mai.










"Jarson chuan ngainat hun la nei dawn mahse, kei chuan nangmah chiah ka duh che alawm" a rawn ti a, hepa hian tinge tunah hetiang hi a sawi chauh. A tlai tawh lutuk. "Ka tihpalh, tunah chuan a tawp vek tawh. Nang pawhin i sawi chian em kha, i nun aṭanga thlawk bo turin min ti a, ka kal bo dawn ngei alawm" tiin ka nuih hak.










"Chuan kan inneihna i pawt chat bawka tiraw? Ka hrechiang lutuk. Bul ṭan ṭhatpui leh che duh pawh ni ila, i thilsawi ho kha ka theinghilh thei tawh ngai dawn lo. Chuvang chuan natna ser min pe rengtu bulah hian ka awm thei tawh lo" tiin ka kuta zungbun chu ka phelh a, zungbun ka phelh rual chuan Hmangaihzuala chu a khawng nghal vekin ka hria.





A kutah zungbun chu ka hmehbel a, ka hawisawn rualin ka biangah mittui a luang nghal. Tun a chinah chuan Hmangaihzuala leh Rochhingpuii thawnthu hi a tawp tawh ang.