Perfect (Chapter-8)

[Rebec Nunziri]

Chapter-8

A hnuai a note min chhia sak rawh u aw...

Lalchhandami POV




"U Zonun ka sawi chiang tawk tawh in ka hria, khawngaih in min chhuahsan tawh rawh, mut hahdam ka duh a ni" ka ti sep a, min en vang vang hnuah a rawn tho chhuak a, ka hmaah tak chuan a rawn ding a, "Awle, ka kal ang, mahse i thinlung ka neih let leh hma loh chu ka beidawng lovang" tiin kawngkhar lam chu a pan nghal nal nal a. Beidawng zetin a chhuak lai chu ka en tawp, eng ang pawn sawi mahila ka thusawi a zawm dawn chuanglo, a duh ang ang chuan chet han la phawt mai teh se, mahse a duh ang chuan ka awm mai mai bik lovang. Inchung ah chuan ka chho a, ka room a ka luh hnuah khumah ka mu nghal tawp, mut hmunah chuan U Zonuna thusawi ringawt chu ka ngaihtuah a, engvangin nge hetiang a a rawn awm leh tih hi ka hrethiam theilo, ka buai nuaih nuaih a ni ber, U Zonuna ka haw hlur bawk.




U Zonuna chu a sawi ang tak tak in kan inah a rawn leng lut zing hle, keimah nen tak phei chuan kan in be ngailo, ka chhungte nen an inkawm ber thin, U Mami pawh chuan engkim a hrethiam vek a, mahse engmah a sawi ngailo thung. Tlanchhuahi pawh school a la kal tluang zel a, buaithlak ta ber chu a nuhrawn leh a unaunu hrawn ten hmuh an rawn tum thin hi a ni, kan hriat lovin vawikhat chu an lo hmu tawh a, an lo vo a ni awm e, mahse engmah an tihtheih loh zia kan hrechiang a, Tlanchhuahi pawn a hlau hran lo, ka pa in Pi Nghaki te nufa chu hmaichhan ah a hmu a, Tlanchhuahi hmu tawh lo tur leh vo tawh lo turin a hrilh a, an hmu leh a nihchuan police hnenah ka report tur thu chiang takin a sawi a, Pi Nghaki te pawh an reh hmak, a lawmawm takzet a ni. Chuan thil pakhat leh Tlanchhuahi chuan Pi Nghaki te in atanga chhuak tura a tih khan kut lawng mai chuan a chhuah tir biklo, a pa in a tana sum a lo khawl sa chu a pe vek bawk a ni.




Naupang te test paper ka check zawh hnuah engmah thil dang ti tawh lovin khum lam ka pan nghal, ka muhil tep tih ah ka phone a rawn ri a, ka lak peih tawh loh avangin ka ngaihsak zui lem lo, mahse rawn rik nawn tak sek ah chuan ning zetin ka phone chu ka ban a, Christ-a a lo ni, tun ang hunah min rawn call ngai miah silo, mak ka ti ru hle, "Hello" ka ti sep a, "Chhanchhan a tlai tawh viau nangin chanchin rawn hrilh ve hrim hrim che ka duh a, ka nau a ṭhalo thut a, tunah doctor ten an en mek, beisei a awm loh hmel hle a ni" a rawn ti zuai raih a, ka harh kawk thei, nimin lawk ah kan kal a, a dam tha hle kha a ni si a. "A va zialo, ve, kan lo kal ve nghal ang" khum atang chuan ka tho chhuak nghal vat a, "Lo kal kher a ngailo, ka lo hrilh ve hrim hrim che a nihchu, I chau awm sia, mu hahdam zawk rawh, chanchin dang a awm chuan ka rawn hrilh leh zawk ang che" a rawn tihchuan ka lo hnial vat a.




"Kan lo thleng har lovang, ka dah phawt ang aw" tiin phone chu ka hmet tawp vat a, khua a vawh tan tawh avangin kawrlum ka hmuh hmasak ber chu ka la a, ka ha nghal sawk sawk bawk, ka room atang chhuak in Tlanchhuahi room lam chu ka pan a, ka kik dat dat tho phang tih hriat zet hian a rawn hawng a, "U" a mit a nuai deuh chat chat a, "Tlante, Mary a tha lo thut a ni awm e, damdawi inah ka kal dawn a, ka rual in I kal ve duh em?" ka ti a, a lo aw vat, "In thuam lum deuh la aw, ka pa te ka zu hrilh ve ang" ka ti leh a, inhnuai ah chuan ka chhuk nghal, ka pa te ka hrilh chuan ka pa pawh chu kal ve a tum a, ka nu leh U Mami te inah an lo awm thung dawn a ni. In atang kan chhuak a, ka pa chuan chanchin min zawt chiang a, Christ-a min hrilh ang ang chu ka sawi a, pawi a tih hmel hle.




Damdawiin lam thleng a, Mary awmna room kan hre tawh bawk a, kan kal nghal vat, Nu Sangtei chu a lo tap hawm hawm a, ka ngaihtuah na ang hi thleng lul suh se, Christ-an min hmuh chuan kan lam a rawn pan vat a, a ni pawh a mit a sen rum mai, "Enge chanchin?" hlauthawng ru tak chungin ka ti a, "Doctor chuan zanin pawh a daih kher a ring tawh lova, a chhe ber thleng a tawk thei reng turin in buatsaih turin min ti" zuai raih in a ti a, ka lainat takzet. Doctor chu a rawn kal leh a, "Ka sawi tawh ang khan a hun tawp lam a ni tawh a, hetiang thu ka sawi ngai hi pawi ka ti hle mai, in duh a nihchuan in hmu thei ang" a ti leh sup a, Nu Sangtei chu cabin chhungah a tlan lut nghal a, keini ho pawh chu kan lut vek.




"Bawihi, harh tawh la, i nu ka lo kal a nia, tang fan fan rawh aw, I dam leh em em ang, I tello chuan kan awm theilo tih hria la, tang fan fan rawh aw" tap chungin a ti a, Mary chu a rawn meng diar diar a, a chauh hmel hle, "Nu" hmui phun chuan a ti a, "Aw... Bawihi enge sawi rawh" Nu Sangtei chuan a lo ti vat, "Nu... ka ngai dawn lutuk che u, mahse ka kal a ngai a ni, ka chau tawh lutuk, van atangin ka lo thlir thin ang che u" a aw chu zawi hle mahse room chhung a awm te chuan chiang takin kan hre vek thung. "Nilo e, Bawihi, tang fan fan rawh, I tello chuan kan awm thei lovang" Nu Sangtei chuan lu a thing nawk nawk a, "Nu.. a na lutuk, ka tuar thei tawh lo a ni, min ngaihtuah lo ula, hlim takin in awm dawn nia, ka ngai dawn lutuk che u" a mittui chu a rawn luang ngiai ngiai a, ka mittui chu ka hru a, ka in sum thei biklo a ni, Mary chu biak tlak a awm tawh lo, Nu Sangtei kohna pawh chu a chhang tawh lo, pawn lamah chuan kan awm leh thap a, chanchin kan lo ngaichang a ni.




Keini pawh chu kan la awm ve reng a, zinglam dar 2 vel ah chuan Mary chu a zual leh ta thut a, doctor leh nurse te chuan an buaipui vat, pawn lamah kan lo nghak reng a, minute 10 hnu velah chuan Doctor chu a rawn chhuak a, a hmel chu a nguai raih bawk, "A pawi kan ti khawp mai, kan chhan hman ta lo a ni, zing dar 2:03 ah chatuan ram min pan san a ni" a tihchuan an chhungte kal khawm chu an tam hawm hawm a, room chhungah chuan an lut a, kei erawh chet mai nachang pawh ka hrelo, naupang te a la ni asin, hma hun eng tak a nei a, mahse hetiang maia a nun na a chan mai chu pawi ka ti takzet a ni. Tlanchhuahi pawh chu a tap khur dar dar a, ka pa chuan a lo hnem mawlh mawlh bawk, thenkhat in an chhungte chanchin an hrilh a, damdawiin atang chuan Mary te in lam kan pan a, kan chhungte hnenah chanchin kan sawi ve bawk.




Mary te in kan thlen chuan an lo tap hawm hawm a, in an lo singsa fel vek tawh, kan awm ve ta reng a, YMA hruai tu ten thu sawina te an nei a, mipui kal khawm pawh an tha viau, zinglam dar 6 dawn ah chuan kan haw ta chauh a, in kan thleng a, ka nu leh U Mami te pawh an lo tho tawh, thil thlen dan vel te chu ka pa in a sawi a, kei erawh ka chau nghulh a, tawng ka peih thlawt lo. Room ah ka luh hnuah khum ah ka mu thla a, ka awmdan hi ka hrethiam lo, Mary chu ka mitthla ah a rawn lang a, school a kal lai te khan a thiante nen an in fiam a, a nui duh em em bawk a, tupawh mai khan an nel a nihkha, ka lo chhing sek a ni ngei ang, ka harh leh chuan ni a lo tlang sang tawh hle a, inhnuai ah ka chhuk a, "Mate, i pa nen hian Mary te in lamah chuan kal kan tum a, in ah lo awm ula zan lamah in kal ve thung dawn nia" ka nu chuan a ti a, "Nu.. kal ve ka tum a, Tlanchhuahi leh U Mami te pawn kal an duh ang" ka ti sep, min hnial biklo, ka pa car chuan Mary te in lam kan pan a.




Thut na awl ah chuan kan thu a, vuina hun hman a hun a, tawngtai na te an nei a, kuang an chhin dawn te chuan Nu Sangtei chuan a fanu chu a kuah bet tawk tawk a, " Aih.. ka phal lo, Bawihi lo harh leh hram rawh, i nu hi i tello chuan a nung zo lovang, khawngaih takin rawn harh leh hram rawh" a ti tawk tawk a, midang te chuan Nu Sangtei chu an man bet a, a fanu kuang an chhin dawn te chuan a rak tuar tuar a, chulai hmuna awm te chu insum thei kan awm lo. Thlalak na te nei in zirtirtu dang te nen chuan thla kan lakpui ve a, ka class naupang te nen pawh thla kan la bawk, Christ-a pawh chu nidang angin a hmel a nung sarh lova, tap lem lo mahse a nau boral na chu a tuar hle tih a hriat theih, Nu Sangtei pawh chu a tap bang thei meuh lo.




Thlanmual thleng chuan kan zui ve zel a, thlanmual atanga kan let leh lamah chuan Christ-a bulah ka kal hnai a, "Christ" ka ti sep bawk, min rawn en a, a nui deuh suk a, "In lo kal a, a lawmawm takzet" a aw chu nidang ang a nilo a zuai hle a, a awmdan chu ka hrethiam takzet. Ngawi rengin a bulah chuan ka kal ve zel a, kan pahnih chiah in kan ni tawh, a thaw leh deuh hawk zel a, han hnem dan vak ka hrelo, Mary ringawt chu ka rilru ah a awm, chutiang bawk chuan Christ-a pawh a nih ka ring, an in kan thlen dawn chuan a ding deuh chut a, ka ding ve mai, "Ka nau a awm tawh lo tih ka hriat hian awm ngaih na ka hrelo hial dawn in ka hria, kan inchhung ti nuam tu ber a ni a, tunah chuan a awm tawh silo, kan inchhung saw a reh vek hial in ka hria, he khawvel ah ka nau kha a awm tawh lo tih ka hriat in ka a mai dawn in ka hria" a ti zuai leh raih a, ka lainat takzet, unau pahnih chiah an ni a, tunah chuan amah chiah a ni tawh bawk nen a hreawm dan tur ka hriat thiam pui phak lo zawk.




"Christ engpawh nise Mary chu hmun nuam zawk ah a awm tawh alawm, a hreawm ang tih ka hria, mahse tunah chuan natna nei tawh lovin a awm a, hlim takin van atang khian a lo thlir ngei ang che, hetianga I awm hi a hmuh chuan hreawm a ti dawn lutuk, chuvang chuan in ti pachang la, hlim takin awm tum rawh" ka thiam ang tawk chuan ka hnem ve a. A nui deuh suk a, "Ka lawm e" a ti sup a, in lam ah chuan kan kal lehnghal, Nu Sangtei chu hmuh tur a awm lo, room lamah a chawl hahdam te pawh a ni maithei a ni, U Mami te thutna lamah chuan ka kal a reilote kan awm leh hnuah kan haw ta a, Mary chanchin ringawt chu kan sawi a, Tlanchhuahi pawh in a thiannu boral na chu a tuar hle, a chauh thu sawi in room lamah a chho a, sitting room ah U Mami te nen kan la thu thung.




Mary chanchin ringawt chu kan la sawi a, awih a har a ni, school a chawlh atangin thla hnih chiah a la liam a, tunah hetiang hian khawvel a chhuah san chu a ni sia, a mak a ni, mihring nun na lo chak tawk loh zia hi, Mary kha kan inah a rawn leng lut fo, ka sawi tawh ang khan Tlanchhuahi nen an in kawm nasa a, kan in lamah pawh a tlang nel hman viau a nihkha. A puitlin hunah doctor nih a tum thu a sawi nasa thin em em a mahse a nih chak ber pawh ni hman lovin hetiang hian mual a liam mai chu a ni sia, mihring rilru ah chuan a fair lo ve thlawt a ni. Tlai chaw ei hunah pawh chuan Tlanchhuahi chu a room atang a rawn chhuak lo hrim hrim, kan hrethiam hle, a thian tha ber in a kalsan a ni a, hun a mamawh a ni.

..


Mary boral atang thla khat lai a liam leh tawh, Christ-a pawn ngai a awh tan viau, mahse a nau boral na chu a la tuar hle tih a hriat hmaih theih chuang loh, Nu Sangtei ber hi a khawngaih thlak, chaw a ei theilo a, a fanu room ah nileng in hun a hmang mai thin, Christ-a leh a pa rilru a hah thin viau. October thla kan chuang kai a, U Zonuna pawh a ngai te bawk in a rawn la leng reng, kei nen tak phei chuan kan in be ngailo hrim hrim, ka chhungte an mut tawh hnuah pawh U Mami emaw Tlanchhuahi chu la mu lo turin ka ti tang tang zel. A leng rei thei em em lehnghal, dar 11 dawn ah te a haw chauh a, mahse kan pahnih chiah in kan awm ngailo a a zia hlauh zawk, zanin chu a rawng lang lo ve teh mial a, ka lawm rilru hle, la duh hle mahila a awmdan hi ka ngei em a, hmuh ka peih thlawt lo a ni.




Christ-a nen kan in be tam em em a, a nau thlan ah pawh vawi hnih ngawt ka kalpui tawh, a nau thlan a kan kal apiangin ngawi rengin thlan chu a en ngawt ngawt thin, mipa a ni a, a rilru a awm zawng zawng a sawi chhuak ngailo, mahse a nau hi chu a ngai hle tih ka hria a ni. Tlanchhuahi pawh hian a sawi lang leh thin, a ngaih thu te a sawi a, a chang phei chuan a tap lek lek zel. Tlanchhuahi birthday a ni tep tawh, kei erawh December thla tir ah a ni thung, Kum 19 a ni ve tawh dawn a, a upa ve tawh takzet, chhungkhat laina hnai te leh Nu Zualtei te chhung te nen lawm kan rawt a school lama a thiante thenkhat a sawm ve bawk, ka thiante pawh rawn kal turin ka ti a, hmaih an lo tum lo nasa, huau huau hi chu an hmaih thei thlawt lo, Tlanchhuahi pawh an nau angin an en ve vek tawh bawk.




Break lai chuan U Mami nen kan chhuak dun a, Tlanchhuahi birthday a nih vangin present tur kan lei dawn a ni, U Mami chuan sana simple zet mai Tlanchhuahi in hmeh deuh tur chu a leisak a, ka duh ang ka la hmu ve mailo, chawhnu lamah class lak tur ka neih tawh chuang loh avangin ka hmanhmawh em em lo bawk a, en kual na hun kan la nei tam bawk a, kan hmanhmawh lem lo. Thi an zawrh na dawr ah chuan kan lut a, silver thi nalh zet, simple ru em em mai chuan ka mit a la nghal chat a, ka en chiang a, Tlanchhuahi'n a duh ka rin vangin ka la ta a, ka pa hnenah ka let hman tawh loh tur thu ka sawi a, a lo rem ti ve mai bawk, inah kan haw tlang a, ka nu chu a lo buai khawp mai, tihtur tul ang ang chu kan ti nghal a, rawngbawl a ngai dawn lo thung, ka pa in catering kan ti dawn a nia a tih vang a ni.




School ban a hun tawh, Tlanchhuahi chu ka pa nen an lo haw dawn a, an lo thleng tep tawh ang, midang pawh an awm nual tawh a, Nu Zualtei chu chhun atang khan ka nu a lo pui tawh bawk. Tlanchhuahi te an lo haw a, in vel kan chei dan chu nalh a ti ngang mai, inthlak hmasa lovin thla te a la a, a thiante pawh in a an haw phawt hnuah an rawn kal tur thu a sawi bawk. Tlanchhuahi room lamah a chhoh hnu reiloteah ka nu chu an room atangin a rawn chhuak ve a, paper bag a keng bawk, "Nu khakha enge a?" a thil ken melh zeuh pah chuan ka ti a, "Tlantei ta tur a ka lei a nia, a inthlak dawn tho chuan heihi ha rawh se, a in hmeh ngawt ang" phur zetin a ti a, inchung lamah chuan a chho nghal bawk. Christ-a pawh a rawn kal ve dawn bawk a, Tlanchhuahi hi a nau ang chiah in a en a, Mary a awm tawh loh hnuah phei chuan Tlanchhuahi hi a nau diktak ang maiin a en a, Tlanchhuahi pawhin a ngaina hle.




Ka thiante an rawn thleng a, present an rawn keng vek bawk, "Khawiah nge kan birthday girl chu a awm a?" an ti nghal a, "A room ah inthlak turin a chho a, a rawn chhuk tep ang" ka ti a, kan inkawm khawm a, Christ-a pawh a rawn thleng chawp chilh ve nghal, ka thiante nen an la in hmu miah lova, Sawmtluanga tih loh chuan, ka thiante bulah chuan hruai in in hmelhriat tirna te ka nei a, an lo be nghal thuai hlawm a, Christ-a pawn nuam a tih hmel hle. Tlanchhuahi chu a rawn chhuk a, ka thiante bawk chuan an lo chhaih a, a lai nasa mai, present te an pe hlawm a, lawmthu a sawi ve sap sap bawk, a thiante an rawn thlen takah chuan an inkawm khawm a, "Christ-a hian a en duh tawp che, enge in inkar ah hian awm a?" Nunpuii chu ka beng bulah a rawn phun sap a, ka lo nghawk zeuh.




"Ka thianpa alawm, engmah kan inkar ah a awmlo" midang hriat loh tur chuan ka ti hlak a, "Ka awih lo, a duh chiang che alawm" a ti leh talh, a ni pawh hi U Mami ang mai, "Ngawi mai mai rawh" ka ti leh hlak a, a nui ruh ruh a. U Zonuna hmuh tur a la awm lo thung, a la bang lo pawh a ni maithei, khaw thim hma deuh chuan U Zonuna pawh a rawn thleng a, Tlanchhuahi chu present a pe ve bawk, midang bulah chuan a awm a, ka ngaihsak lem lo, kan thian ho chuan kan tawng mawlh mawlh a, Christ-a chu ka bulah a thu a, ka thiante nen pawh an titi a in rual khawp mai. Nui hak hak chunga ka hawisawn chu U Zonuna'n chiang zetin min lo melh run a nihchu, ka hawi sawn rang teh a sin aw, en tawh lemlo mah ila min la en reng tih ka hriat na avang chuan awm nuam in ka awm tawh lo hrim hrim.




Hun serh hman ka pa in a rawt takah chuan kan thu tha sap sap hlawm a, kan thian ho chuan kan thu a, ka bulah Christ-a a la thu ve zel bawk, ka pa chuan tawngtai na hun te a nei a, chaw kan dawh a, rin ai takin kan tha hnem. Chaw ka ei teuh, an siam tui em bawk a ni, chaw ei kham lamah programme dang a la awm vangin tumah an la haw lo, in tih hlimna te kan nei a, kan kawt a zuau bawk a, khua a vawt ve tawh tho bawk nen mei pui ka chhep a, a bial a thu in kan zai ho a, ka nute erawh inchhung lamah midangte nen an inkawm thung, cake cut a la ngai a, mahse a la hma mah mah, kan zai zawh chuan kan titi nak nak hlawm a, "Motor ka rawn keng a, Tlanchhuahi thil tur ka va la lawk ange" Christ-a chuan a ti sup a, a thutna atang chuan a tho nghal zat bawk.




Ka thiante ka biak lai chuan ka bulah thu an awm tih ka hria a, Christ-a a nih ringin "I va rawn let hma leh si ve" tih pahin ka sir lam chu ka hawi a, Christ-a a ni reng reng lo, U Zonuna zawk a lo ni, a then suk a, a hmel chu a thim ruih bawk, "I beisei loh zawk ka lo thu a va ang ve" a ti nghut a, ka chhang let lem lo, "Khapa kha i tan enge a nih?" zawi sup hian a ti leh a, midang chuan an hre pha ve kher lovang, "Enga tan nge I tih?" a zawhna pawh chhang chuanglo chuan ka lo ti hmak a, "Min chhang mai rawh" a ti leh hmuk a, "I hriat a tulna a awm in ka hrelo" ka ti leh hmak.A hriat a tulna a awmlo tak tak bawk a ni, a rum deuh nghut a, engah mah ngailo anga lan tum chuan ka thiante lam chu ka hawi leh daih, a ni pawh a tawng chhunzawm tawh biklo.




Christ-a a rawn let chuan eng emaw thil phek lam hi a rawn keng a, a tuam tlat avangin enge a nih ka hre theilo thung, Tlanchhuahi lamah chuan kal in a va pe a, Tlanchhuahi pawh chuan a lo hawng nghal, a hmuh chiah chu a au chhuak deuh hluai a, a lamah kan hawi thap, Tlanchhuahi mittui chu a tling pam a, Christ-a thil pek chu a en ngawt ngawt, "Ka nau ziah a nihkha" Christ-a chuan a ti sup a, midang ho chu kan lo ngawt thap, "A mawi lutuk" tah chhuak aw zet hian Tlanchhuahi chuan a ti tham chhel a, "U.. hei U Christ-a present min pek hi" tih pahin ka lamah chuan a rawn kal a, ka lo en ve vat, midang pawh chuan an rawn en a, lem ziah a lo ni a, Tlanchhuahi leh Mary te an ni, a tak ang maia nalh a ni a, Mary khan lem ziah a tui tih ka hria, mahse a lem ziah ka la hmu miah lo, a ziak thiam takzet a ni.




"U Christ ka lawm lutuk aw" Tlanchhuahi chuan a ti leh a, Tlanchhuahi thian dang te rawn kal pawh chuan an thiannu an ngai tih hriat takin an mittui a tling pam hlawm a, "Tunah te hian awm ve se, nuam a tih dawn nen" Rintei Tlanchhuahi thiannu chuan a ti sep a, "A ziah na a rei ve tawh a, school a chawlh hnu deuh lawk a a ziah a nihkha, pek che a tum reng a, mahse damdawi inah a awm ta reng bawk nen pek na che hun remchang a nei ta lo a ni, i kawl tha tlat dawn nia" Christ-a pawh chuan a lo ti sup a, Tlanchhuahi mittui chu a luang thla pap a. Kan boruak a ziaawm tak deuh hnuah chuan Tlanchhuahi te thian ho pawh an thutna ngaiah thu in lem ziak chu an en a, an in be sep sep bawk, Christ-a pawh chu kan thutna lamah a rawn kal a, mahse U Zonuna a hmuh takah chuan thutna tur dang zawngin a hawi kual a, Nunsanga chuan a lo ko vat.




"I thianpa thut naah ka thu chu pawi I ti em lovang chu maw?" U Zonuna chuan ka beng bulah a rawn ti leh sup a, a rawn kun hniam rual chuan ka beng a nul thuak bawk, ka lo tim deuh chawih a, mahse a hria ang tih ka hlau lutuk chu ka in siamtha nghal vat thung. A nui nghawr dat a, "Enge hetah te i rawn tih ve, inchhung lamah awm ta che" ka ti ve ta nge nge, a rawn thu ve a, ka thiante tawng bawrh bawrh pawh an ngawi dak tawh hlawm mai, "Inchhung chu a nuamlo, pawn lam hi a nuam zawk alawm" a la ti ham ham zui, hetiang ang em em a mize ngeiawm hi a nei ang tih rin ngaihna ka nei ngailo, "Tihtur a awm lo e, game khel ang u" Adami chuan phur zetin a ti chhuak deuh hluai a, kan lo rem ti tlang khawp mai, bur ruak chu a la a, a hmawr hian a kawh kawh chu zawhna midang in an zawt dawn a ni.




Bur hmawr chuan keima chu min kawk ta vu mai, "Helai hmun a awm zingah hian i bialpa atan a i duh deuh an awm em?" tiin Sawmtluanga chuan min zawt a, "Awmlo" ka lo ti awlsam et, midang ho chu an lo au dial dial a, an va han over thei tak, ka thusawi chu an awih loh hmel hlawm khawp mai, mahse dawt ka sawilo, tuna awm zingah hian ka bialpa duh ang an awm lo miau. U Zonuna ni e, U Zonuna hi chu ka duh alawm, mahse a mizia hi chu ka bialpa atan a ka it loh lam tak a ni thung. Chuan Christ-a a ni hi ka thian ten min duh pui tih ka hria, mahse thian ang bakin ka en lova, bialpa tur ang phei chuan ka en ngailo. Ka thian a ni a, chutiang chu ni reng bawk se ka duh, "In bengchheng hlawm emai, ti leh tawh rawh u" ka ti hlak a, ka bul a mi chuan min en ngur tih ka hria, mahse ka hrelo der hmak thung.




Bur chu an ti vir leh a, midang chu a kawk a, zawhna an in zawt a, chhanna kan han hria chu kan nui chhuak hak hak hlawm a, an nawi ve thin em a ni ka thiante ho hi chu, bur chu an ti vir leh a a tawk ah U Zonuna a kawk a, "In duh duh min zawt thei ang" a ti chhuak sup a, "Awle, keiman ka zawt ang, bialnu I nei em, bialnu I neilo a nihchuan tunah hian hmeichhe duh deuh te i nei em?" Nuni chuan a ti a, a chhanna hre chak zetin an ngaichang thup hlawm a, "Tunah hi chuan bialnu ka neilo, chuan zawhna hnuhnung kha, aw... hmeichhe duh ka nei a, chuan chu hmeichhia chu ka nghak mek bawk, ka bialnu... nilo ka nupui a nih hma chu ka awm mai mai lovang" a thusawi awmzia chu ka hrechiang hle, chuan engmaw nupui maw, hah.. rapthlak hian a, dawt chiang tak a sawi tih ka hre bawk, a ni hian bialnu a nei reng.




"Rawn lut tawh ula, a tlai tawh emai" ka nu a rawn au zui lang lang a, "Lut phawt
ang u" ka ti ta sep a, kan thutna atang chuan tho chhuak in inchhung lamah chuan kan lut a, U Zonuna bulah ka awm duh tawh loh avangin ka thiante bulah hnai te ah ka awm bawk. Cake cut na te kan neih leh hnuah kan thiante chu an haw hlawm a, Tlanchhuahi chuan kawngkhar thleng thlah in lawmthu a sawi mawlh mawlh bawk. Ka thiante an haw dawn chuan pawn thleng in ka thlah a, Christ-a pawn haw ve nghal a tum bawk, an haw mai theilo, sawitur kan ngah hlawm lutuk a, tawng kan in chuh luai luai a ni ber. "U Zonuna nen khan enge in awmzia?" hriatthiam loh hmel zetin Sawmtluanga chuan a ti sup a, "Engmah a awmlo" ka ti ringawt.




"Zep i tum tihna em ni?" lungawi loh hmel zet chuan a ti leh a, "Chutiang pawh a nilo, nakinah chiang deuhin ka la hrilh ang che, tunah chuan midang an awm ve bawk si a, sawi a rem lo emai" ka ti duah a, lu a bu ta nghut, an haw hnuah inchhung ah ka lut a, Nu Zualtei te chhungkua erawh an la haw ve lo thung. Tlanchhuahi leh U Mami te chuan present hawn loh ho chu an lo hawng mawlh mawlh a, an bulah kal in ka hawn pui nghal mawlh mawlh, a dawng tha hlawm khawp mai, midang rawn kal khawm hmain U Mami nen kan present leisak kha chu kan pe tawh, "Tlantei chu nuam i ti em?" nu Zualtei chuan a ti a, "Ti lutuk, ka birthday ni reng mai se ka duh" Tlanchhuahi chuan phur zetin a lo chhang a, "Keini pawh hi kan haw tawh mai dawn em ni?" Nu Zualtei chuan a ti a, "A pawi lovang" pa Ropuia pawh chuan a lo ti dut.




"Muani kan haw mai ang aw, a tlai tawh si a" ka nu en pah chuan a ti nghal zat a, "A la hma alawm la leng ula" ka nu chuan a lo ti vat, "Kan pa hi naktuk lamah a zin chhuah a ngaih hmel a, kan haw phawt zawk ang, remchang dangah kan la rawn leng leh zawk dawn nia" Nu Zualtei'n a tih takah chuan ka nu leh pate chuan pawn thleng an thlah a, U Zonuna chu a la awm thung. "Ka dawn that hlawm zia hi" a thil dawn te en pah chuan a ti a, a dawng tha hlawm takzet a ni, "Nu heihi Mary ziah a nihhi, U Christ-an min present a" lem ziah chu ka nu a en tir a, "A va ziak thiam ve aw, i room bangah tar la, roh hle rawh aw" ka nu pawh chuan a lo ti a. Lem ziah chu a en leh vang vang a, a thiannu a ngai tih ka hria, a awm lutuk school lamah khan an in kawp deuh chawt thin si a.




Dar 10 a pelh tawh avangin ka nu te chu room ah an lut a, U Mami pawh a chauh thu sawiin room lamah a chho nghal daih bawk, Tlanchhuahi chuan a present ho chu a dah fel mawlh mawlh a, a mu ve daih ah tih ka hlau ru hle, U Zonuna chu ngawi rengin a thu ngar a, tawng pawh a tum hmel loh, enge hetiang hian a awm ve ziah ni. "U keipawh ka room ah ka chho dawn a nia, lehkha zir tur ka la nei sia" ka hlauh ang ngei ngei in ka ti rilru a, rilru bet zan lo ka bu nghat a, inchung a a chhoh hnuah pawh ka la en zui reng, "Tunah chuan kan pahnih chiah in kan awm thei ta" ti supin ka thutna bulah chuan a rawn thu a, "U Zonun in hnial ka peih miah lo a nia, chuan keipawh ka chau deuh a, mut tawh mai ka duh, I haw tawh mai dawn em ni?" ka awmdan chu a mawilo tih ka hria, mahse kan pahnih chiah a awm ka duh lo.




"Ok.. ka haw dawn alawm, mahse hrilh duh che ka nei a, min lo hnial lo la, ka sawi lo ngaithla rawh, kei hian bialnu ka neilo, nang lo chu hmeichhe dang duh ka neilo, Kimkimi nen kan in ngaizawng angah I ngai tih ka hria, mahse kan inkar ah engmah a awm lo, hna kan thawk dun a, ka thian mai a ni bawk, chuan ka beidawng dawn lo tih hre bawk la ka duh a ni" a ti nghet charh a, chhan tum a ka ka ka ang zuai tawh chu a thawh chhuah deuh hlawl takah chuan ka chip leh chiang ngei mai, "Ka kal ange, chuan ka thusawi kha theihnghilh lo la, beidawn san mai mai che ka tum lo takzet a ni, i chunga ka thiltih avang khan ka in thiam thei tawh ngai dawn lo, mahse khawngaihin hun tha vawikhat chiah min pe leh rawh, lo in ngaihtuah la ka duh a ni, muttui le" tih a pen chhuak nghal pawk pawk a, ka en liam tawp.

Cont...

Click leh comment kha aw.. tan min han lakpui hram hram te u, a chhe thei lutuk a, comment a tam viau chuan Friday leh Saturday dah kan tum dawn nia, a that vak loh chuan Friday emaw Saturday zanah a awm thung ang aw...