MANAGER MAMUANA By Ziki_nu (Completed)

[Ngaia]

#mary
#nuthlawi
#hmangaihna

Khawvel mihring zingah hian duhthusam neilo an awm ka ringlo, tute pawh hian hlim kan duh vek a, mahse kan duh ang diak diakin thil hi a thleng thei bik bawk silo.

Duhthusam chhete ka nei ve a, thil danglam vak pawh a nilo, a hmasa berah chuan tha taka lehkha zira hna tha tak neih ka duh a, chumi hnuah ka hmangaih ber pasal atan neiha chhungkaw hlim tak din a ni.

Ka han tleirawl chho a, khami ni, ka nu leh pate accident a an boral atanga ni 3 ni chiah kha ka tan chuan ni rapthlak ber a ni kumkhua tawh ang.

Tumahin ka putea fa ka pai tih an hrelo a, sawi chhuak pawh ni ila an awih kherlo ang.

Kum naupang te in 'sâwn' ka pawm a, khawtlang titi lah ka siam hnem, duhthlang thei dinhmunah ka ding lo a, ngawi renga tawrh bak tih theih ka neilo. Pathian ah bak beiseina ka nei tawhlo a, kei leh ka naute te hmalam min panpui thei Tu tur ka dil tawp mai thin a ni.


MANAGER MAMUANA
By Ziki_nu



Chapter-1


“Khawvel hrehawm i tan min ti” tih hla chu sa rut rut pahin ka pu rawtuai khehna hmun hnawk chu kho tha vaklo ah a rut khawm pah malh malh a,chutah rawn ding mar vutin “Awi ka zak e Mary, ka hmu ngam tawh miah lo ang” a ti leh hap a, mangang hmel deuhin min en kher lehnghal.



“Engahmah ngai duh suh, a thleng vek tawh tho” ka tih chuan “Awi khawvel hrehawm” ti leh hluaiin tapchhaka hmunphiah chu a ban zui nghal a, eirawngbawl pahin a che vel chu ka nuih ka nuih mai.


Ka putea fanu Vli hi kar hnih vel cham turin a rawn zin a, kei aiin nau hret mahse a lian zawk a, thenkhat chuan ka u emaw an ti fo. Ka thiante zingah star a nei a, nichin lawk khan dawrah an lo va in hmu aniang, fur lai anih avangin kawng a nal a, tukhum sawh chawrh khawpin a lo va tlu anih pek hi.



Inchhunga Bawihtei leh ka pi te rawn in paw lut chu pan hnai vatin Bawihtei chu a laksak sawk sawk a, “I nutei hi ka zak lutuk a, ka awm daih ang che” a ti vel phawr phawr a, a nui pah uar uar tho sia, zak hmel pawh a pu leh tawh chuanglo,



Ka pi chuan Vli thil tih lai chu a tih zawm ve thung a, inkhawm zan anih avangin chaw ei hma kan duh a, eirawng pawh kan bawl hma lehpek khawp mai.



****



Mary lalpekhlui ka ni a, kum 19 ka ni, kum 17 ka nih lai khan ka nu leh paten car accident avangin min boralsan a, khami kum vek khan ka ngaihzawng ni hauhlo fa ka pai ta bawk!
Khami ni kha ka la hre reng mai, ka theihhnghilh thei tawhlo hial zawk ang.


Ka pi leh pu te an awmlo a, ka pindanah ka nu leh pa te ngaiin ka tap a, chutah chuan ka putea (Vli pa) hi rawn lutin min hnem tum ni awm takin ka khumah a rawn lawn kai ve a, ka chunga thleng tura ka rin phak ngailoh thil chu tiin a tisa châkna chu ka taksa ah a hrithla a, ka theihtawp ka chhuah ve tak naa, awmzia a awmlo.

Ka chunga thil thleng khan tun thleng hian ka nunphung a thlak danglam a, ka putea fa ka pai tih ka in hriat khan thih daih tluka chak ka neilo. Ka nau pai vanga ka mualphona tur zawng zawng ka han ngaihtuah khan tuar zo dawnin ka in hrelo a, ka putea fa a ni tih lah chu ka sawi chhuak ngam der silo. Han puh mualpho tur ngaihzawng ka neilo a, khatih lai khan ka thiantha ber bula insawi thawl tur takngial pawhin huaisenna ka neilo!




Thih ka chak a, ka naupai lah tih tlaktumin thil hrang hrang ka ti kual bawk a, Pathian ka hlau a, mualpho ka ngam bawk silo. Khatih hun laia ka rilru hah leh mangan zia kha tun thleng han ka la feel thei!



Nau ka pai tih an hriat ruala ka pi leh pute mitmeng zuai raih kha ka hriatchhuah apiangin hrehawm ka ti thar a, an fapa chetdan an hriatchhuah huna an na hmel tur phei chu ka ngaihtuah thui ngamlo.


Ka naute pa min zawt a, chhanna ka pe lo!



Pai tlang turin min ti a, ka zirna erawh ka chawlhsan thung. Kan class ah a ti tha ber pawl ka ni thin a, khatianga ka chawlsan a ngai ta mai kha keimah chauh nilo in kan zirtirtu te pawh khan an ui viau asin.



Tunah tihian ka duhthlan ni hauh lovin sáwn ka pawm a, mahse ka fanu hi ka hmangaih a, nitin mai hian ka hmangaih zual tulh tulh a, ka mualpho pui aia nasa hian ka tan malsawmna a nih ka ring tlat bawk. Pathian hnenah ka hlan thin a, keimah chauh chuan ka enkawl zo dawnlo tih ka hriatchian em avangin Pathian hnenah ka hlan tawp mai thin a ni.




*****


“Sangbawihi a awm em?” tih ri ka hriat rualin ka pi ka va melh nghal a, kan mit a in tawng sak mai, pawn lama thawm ri rawk kan hriat rual chuan kawngkapui an rawn pawt hawng nghal huang a, rin lawk ang ngeiin ka thiante an rawn in zui lut leh tham tham tawh.



Hlimpuii chuan ka pu malchunga Bawihtei chu a ban nghal zat a, “Ka fanu te hi ka ngai tawh lutuk” tih pahin a biangah te chuan a fawp pah nawk nawk a, Vli pawh Jacoba a hmuh rual khan a mu herh lutuk pawh a thu ngil nghal ut mai.

Kan thian ho hi mipa pathum leh hmeichhia pathum kan ni a, tette ataga inkawm kan nih hlawm avangin kan inngai a, engkim kan ti ho a, hetiang dinhmunah hian ka din ngailo phei se chuan school kalin atthlak takin kan che leh hlawm ngei ang.


Sitting room lama an rawn thu thla chu ka piin “Zan lamah hian lo kal ziah suh u ka tih cheu kha Engthei, in thiannu hi nangni anga theuleu ve mai mai thei a ni tawhlo” a lo ti leh tawh a, kawta thawm an rawn neih atang khan min melh no lo ka ti reng a ni.




“Awi ka pi Sawii ve vak vak zel hi a, theuleu turin kan lo kal ve ziah lo, waiwai thak kan siam leh dawn, waiwai thak” tih pahin a bag ah lai chu a beng thak thak a, ka pi chu a hlau lo nasa mai.


“Chupawh nise in in nei a, in inah te siam ve mai ta che u, naupang in ti muhil theilo” ka pi bawkin a tih leh chuan ngaihsam hmel fe hian “Va mut san daih ru, Bawihtei chu kan awm pah thei tho” a ti a, a thutna atanga tho nulh pah chuan a bag nen choka lam a pan a, a va in khawih ri zui rak rak mai.



Ka thiante hi school kal lai vek an la ni a, class 12 hi an pass anih chuan kumthar lamah khawpuia an awm vek a ngai tawh ang, ka ngai dawn hlawm lutuk a, ka ngaihtuah thui vak duhlo.


Zan lamah hian kan inah an rawn chhuak khawm thin a, Bawihtei tih harh hlau deuhin veranda ah kan zai thin. Tunlai tak hian waiwai thak siama schoola zawrh an ching a, chupawh chu kan inah a hmanrua vel kengin an lo siam thin. Mipa ho hi chuan an tuipui ve vaklo a, mahse an lo kal ve ziah tho.



“Lalhlimpui naute kha dah la min rawn pui nghal rawh” choka lam atang Muankimin a rawn tih takah chuan Bawihtei chu ka pi hnenah bawk a hlan chhawng leh a, “In mut duh hunah Laljacoba te hi lo pawm tir mai rawh aw pi” tih pahin choka lamah a tlan phei ve nghal a, kan choka hi a va puk deuh avangin sitting rooma awmte nen chuan a in hmuh phak chiah lo a, ka pi men rum dan tur vel an zir chhin nasa leh ngawt ang.


“Kha kha kha, naute hi in chhuanlam vek hlawm a, in awm tha peih tak tak silo, kha la teh, ka mutsan dawn che u” tih pahin ka malchungah Bawihtei a rawn dah a, ka pu TV en lai chu off sakin “Mu ang, hetiang nuai nuaiah i en tui thei dawn chuanglo” a ti a, ka pi hi chu a mak ve ania aw, a mut duh hunah chuan ka pu in engnge a tih tih lam a ngaihtuah tawh ngailo, an mut rual zat zat a ngai a ni tawp mai.

“I pi hi chu aw..” pindana an luhfel rualin Puia’n a ti zui vawng vawng a, Vli’n Bawihtei a lo ban nghal vat bawk


“E taka, vawiin tlai khan i tlu na em?” jacoba chuan a rawn ti hlut a, Vli a en pah ran bawk.

“Aih” ban charh hian a ti ringawt a, a star tih kan hre vek tawh a, Laljacoba pawh zawh loh ve mai tur a nia, a zak leh ngawt ang.


Spa’n bang kila ka guitar hun a lak rualin mipa ho chu pawn lamah an inzui chhuak dial a, an zaithiamlo leh dawn si, zingah ka pi in min hauh pah leh dawn anih hi.


Ka tette atangin music leh zai ka ngaina a, pawl 8 ka pass khan ka pa in keima pualin guitar min leisak ve a, school function leh inkhawmnaah te ka zai ve fo thin.



“Awi ka zak e Mary, ka zak thlawt” rin lawk ang ngeiin Vli chuan a ti leh tawh a, Bawihtei pawm chungin a thaw pah hulh hulh mai.



“A ho lutuk” ka ti liam ringawt a, ‘Hnute siamsak rawh, a hnek zawhah ka lo ti mu ang” a tih takah chuan choka lamah ka phei nghal a, ka thiani te pahnih chu chaw ei dawhkan kilin an lo bei nasa dun ngang mai.



“Hnute ka siamsak anga, Vli’n a awm theih chuan ka lo pui ang che u” ka tih chuan “Ti vat vat rawh” an lo ti thuai a, an bula ka thut hman ve meuh chuan dar 8 a pel thui leh tawh.



“Vli hi chu a awmlo ang tih a hlauhawm ngawt mai, Sangbawihi lahin a duh mai sia” Hlimpuii chuan bati a waiwai thun sa char pahin a ti sap a, “Nia a fel reuh lutuk” tih bakin ka chhanglo.


Ka tawng tam ngai lemlo a, Nu ka nih hnu phei chuan thu ho deuh deuh sawiin ka tawng chiam tawh ngailo. Ka puitling ta sawt e ka tihna a nilo a, ka nun in let thawk avang hian ka danglam ve ta deuh e tih a ni mai.



“Laljacoba hi a duh ve sia aw, ka khawngaih zawk, a ni aia tha an tam tehreng nen” Muankimi’n a lo ti liam ve puat a, “A atchilh ve nak alaia” nui chunga ka tih chuan a thil tih lai dah meuhin min rawn en a, “Bialpa hi ngaihven ve tawh teh” a ti hem mai.

Hlimpuii nen in enin kan ner nawng ringawt a, ka dara min beng thlawrh pah hian “Ka ti tak tak, i rilrua i tum dan chu hre tho mah ila Sangbawihi hi ngaihtuah ve la, Pa a la mamawh dawn chauh ania aw, i la naupang a, i in uluk peih bawk a, naute i nei tawh tih i hmelah a hriat loh hrim hrim” a ti zui duah a, a sawi hnem bawk a a thaw zui halh halh mai.




“Pathianin rem a tih te chuan kan la nei ve ang chu” nui pah deuha ka tih chuan min melh rum ngang mai, “Pathian chuan rem a ti lutuk, nangmah hian i ngaihven lo leh lutuk alawm, Isaka pawhin a duh che a, U remruata pawhin a be chhe lo che tih ka hre vek, Isaka chu lo dah tha ta ila, a ni chu zirlai ve mai a la nia, U Remruata phei phei chuan hna a nei tawh lehnghal ania, i zeilo si ka rilru i ti hah e” a ti leh a, vawi khatah hian a sawi hnem thei ania aw, engmah ka hrilh ngai silo a, engtinnge maw a lo hriat vek zawk ni.




“U Remruata te chu a” ka ti sap ringawt a, Hlimpuii chu Muamkimi angin a phawk vak lo bawk a, min hrethiam deuhin a hmanhmawh thlakloh thu a lo sawi ve a.


“Ti daih ila Bank Manager thar kan neih kha in hre tawh em?” a tih chuan Muankimi bawk a lo phur fal leh.
“A chhe lo em” a lo ti lehnghal zat a, “Ka la hmu biklo, mahse a la upa lo an ti, vawiin ah ka nu Bank ah a va kal a, Manager hmasa ai kha chuan biak a nuam zawk fe a tia lawm, kal a ngaih leh velah ka kal tawh ang” a tih chuan “Ka kalpui ang che” rang zet hian Muankimi bawkin a lo ti leh a, kan pathum chuan in en kual ralh ralhin kan nui ta vak.




“I lerh ve sia aw” fiamthua ka tih chuan “Ka tan a nilo, i tan alawm” a lo ti then a, ka tawng ve hma in amah bawk chuan “Keite chu footballer nupui tur ka nia, ka ngaihtuah awmloh” a ti leh a, ka sawi zawm ta lemlo.



An haw dawn chuan kawtzawl thleng ka zui chhuak ve a, kan veng hi a mawng deuh a, kawngpui pawh kan hmu phak ve lo, kawtzawl zau ve angreng deuh kan nei a, ka nu khan a damlai khan plant leh pangpar a buaipui nasa thei bawk nen a awmloh hnu thleng pawh hian enkawl zui loh theihloh khawpin a uluk a, kan par deuh chuai reng mai zel a ni.



“Anih phawt aw Mary, naktukah kan in hralh that chuan U Eli vur sen kan lo hawn ang che” Hlimpuiin a tih chuan nui ver verin ka lu ka lo bu ve nghat a, mipa ho an hmanhmawh deuh tawh bawk nen an in chhawm haw nghal a, inchhung ka luh leh rualin kawngka bulah Vli a lo lang nghal zat a, ka phu chiam nghe nghe.
Ka rin ang ngeiin “Jacoba khan sawi a nei em?” a ti a, tawngkaa chhanglo a lu ka thing ringawt chu thaw halh hian “A that chu” a ti zuai deuh raih a, a chanchin eng emaw tal a sawi a beisei tih ka hre reng sia.



“Bawihtei chu i mut tir thei mai em ni?” tui dehna lam pan pah chuan ka ti sap a, “Umm a fel ve tawh reuh lutuk, naktuka haw thut a ngai chu ka van peihlo reuh tak, sumo a chuan ka peih chuang bawk silo” ti neuh neuhin bathroom ah a lut nghal a, ha ka nawh zawha ka mut hman meuh chuan zan a rei tawh lutuk ringawt.



Tui deuha muhil ka fanu chu kuahin ka en reng a, Nu mitah chuan fate hi an lo hmeltha ber mai, a sam kir chiat kara a thlan fim lo bawl tiam tiam chu dimte in ka chhem sak a, tui tak leh thlamuang taka a muhil hmel hian ka hah a ti dam sawng sawng thin.



Ka putea laka ka fa mah nise hmelah min chhun zia an sawi fo thin a, ka sam a kir avangin a sam kir ve chiat te hian min ti hlim riau a, ka pai tirh khan phurrit leh mualphona ang chauhin ngai mah ila tunah chuan ka damchhan, harsatna karah pawh chakna min pe tu a ni tawh zawk a ni.


Ka mut a chhuahloh em avangin phone ka en leh a, U Remruata message a lo awm leh vang tawh mai, zanriah eikham hlim ami daih tawh anih avangin ka reply lemlo a, Muankimi sawi dan takah biak chu min be chhe hauhlo.




Kan khaw SBI ah hian hna a hmu thar a, eng ber nge a thawh tak hre lo mah ila loan vel lo buaipuitu ang hi niin ka hria. A la upa biklo a, a puitling hle tih erawh ka hre thung. Ngaihzawng enin ka en ngailo a, a ni pawhin min biak dan tawk a hre lutuk ringawt.



Naupang te ni mah ila fa nei tawh ka ni a, a ni ang chu han beisei ngam chi pawh ka nilo. Ka fanu tan Pa ka zawn sak ngei chu a la ngai dawn tih ka hria a, mahse tunah mai chuan ka la ngaihven thei rihlo a ni.



*****


“Chaw ei khamah Vli a haw a ngai dawn si a, a thawh hma hian Bawihtei nen dawrah a hawn tur eng eng emaw va lei rawh u, chawhmeh tih tham kan thar silo a, hmawmsawm a ngainat deuh ho va en rawh u” zingkarah ka pi chuan a ti zung zung a, dar 6 pawh a la rilo.
“Dawr pawh an la hawng dawn ami?” ka tih chuan banga sana chu thlek zawkin “Pu Nghaka te an tho hma thin alawm, eirawng chu ka lo bawl mai ang, hmanhmawh lovin Bawihtei nen va kal rawh u” tih leh pawisa min pek a rual a,Bawihtei hi a thawh hma thin avangin tum ai hmaah kan tho ziah a, mu rei deuh mahse a pawi loh teh lul nen.




Muangchangin kawngpuiah chuan ka kalpui a, amaha a kal ve bek bek chu a la ngheh loh em avangin a hnunglam atang ka veng reng a, dawr kawt kan thlen chuan mipa pakhat hi step ah a lo thu a, ka hmelhriat a ni pawhin ka hrelo, dawr pawh an la hawnglo tak tak.




Ngainatawm deuha min nuih sukin ka fanu chu a en a, a kut pahnih chu rawn lekchhuakin ‘tumbailek’ ti ni awm tak hian Bawihtei chu a bula kal turin a ko a, ka fanu chuan a ko tupa chu a en ren rawn hnuah uar zet hian a tap ta mai.


Phawk zeta chupa chu en in ka pawm kang nghal vat a, a tap uar lutuk chu mak ka ti zawk. A thutna atanga rawn tho ve uaiin Bawihtei ka awihna bulah chuan a lo tei ve sek a, a inthiamlo tihngaihna hre silo che vel chuan ka nuih a ti za zawk.



“A bang mai ang, hrehawm ti duh suh” ka tih chuan a lu thaklo pui chu hiatin a bana sana chu a en zawk a, “Ka kal phawt ang aw, kan inhmuh leh hunah chuan a tap tawhlo ang” tiin Bawihtei tukhumah chuan a tuai leh zauh a, a tlan liam chu ka en zui a, a inthuam dan atang chuan zing walk ni awm tak a ni.
A kal liam rualin Baiwhtei tap pawh a bang fel a, dawr pawh an rawn hawng ve chiah e.



Thingtlang khua ve mai kan la nih avangin dawrah pawh thil changkang leh dangdai tak an zuar ve lemlo a, Vli hi chu Aizawla haw tur mah nise thilpekah a law thiam a, hmawmsawm a lawm ve bawk nen ka pi nen pawh hian an in kheuh ru leh rek rek zel.



“Sangbawihi chu a va lungawi loh hmel ve” dawr neitu Pu Nghaka chuan a lo ti ve mial a, pa tawngtlem anih bakah a upa ve tawh a, ka fanu hming a lo hre ve chu a lawmawm zawkah ngai teh ang.



“Nia a la lungawi lo deuh anih hi” ka tih chuan bawm chhunga lollipop chu la chhuakin a pe a, kan fate mihrangin min han lawmsak ve thin hi chu a lawmawm ngawt mai.

***
“Merte Vli chu kaitho tawh rawh, a phone a rik tluk tluk kha” inchhung kan luh leh rualin ka pi in a lo ti leh nghal zat a, kaitho paha a phone screen ka en chu ka meng zau kawk mai.
Jacoba hming a lo chuang vang a, phak chuala a rawn meng chu a hma zawna phone ka lek kan rualin a rawn meng nghal kuau mai.

Phone chu la in bathroom ah a tlan lut nghal a, ka nuih a za ngang mai, lo in be ve pawh nise zahna tur a awm der silo a, a naupangchhia thei ania aw...


Tukthuan ei khamah Vli haw na tur motor chu kan inkawtah a rawn tlan phei a, sumo a haw ngailo in kan chhungte Aizawl kal tur an lo awm remchang hlauh a, motor a rui thin bawk nen tum ai hma in a haw phah dawn anih hi.



Kan in vai liam fel hnuah inchhungah kan in zui lut leh a, “Vawiin chu Bank ah va kal ang che, i pu hlawh thla hnih ngawt a rawn lut tawh lo a, kan ngaihven deuh loh te chuan kan nghei mai dawn asin” tiin ka pi chuan ro a rel lehnghal zung zung a, ka pi hi chu kan chhungkaw pasaltha a ni rinagwt, te tak te ni chung hian hlauh a neilo reng reng, a sawi tawh chu kan zawmlo ngamlo.


“Bawihtei tunge lo awm anga, vawk chaw zawnga chhuah ve ve in tum bawk si” ka tih chuan “Hruai mai rawh, a tahbelh chuangloa a harsa lovang, i pu nen kan kal ve ve loh chuan tunkar daih ka la theilo ang” a ti deuh tlat a, dar 10 velah in atang kan chhuak a.


Manager tharte kha a awm an tia, Muankimi a kal ve chak ngawt ang. Ka fanu chu pua in muangchangin ka kal a, kan ei hmuhna chu ka pu pension hlawh chauh anih avangin thla hnih khat a lo luh loh chuan kan buai nghal der zel a, Bawihtei a lo hautak ve bawk nen, ka pi leh pute an hah hle tih ka hria a, ka tan inhlawhna zawn a la harsa bawk si.



Bank ah chuan ka rin ai daihin mi an lo tlem a, U Remruata pawhin a thutna atang min rawn ko nghal zat mai. Amah be tu in a thawh san rual chuan a tho zui ve nghal a, min rawn panin Bawihtei chu a lawm nui leh uar uar phawt a, kan kal chhan kan sawi chuan Manager be turin min hrilh a, Bawihtei chu pawmin pawn lamah a chhuahpui nghal daih bawk.



Manager awmna lam kawngka chu ti dekin ka nam kau a, laptop phena ka mi hmuh chuan min thawng ang reng khawp mai.


A hma ang bawk khan ngainatawm deuha min lo nuih lehin a hmaa thutna awm ah chuan thu turin min ti a, “Naute hmeltha i rawn hruai nange” min hriat ve pawh ka rin tawhloh laiin a lo ti vat a, “Ahh U Remruata’n a pawm a” ka ti sap a, ka tawng bah deuh niai mai.

“Mamuana ka nia, min hlau suh aw, ka hlauhawmloh” nuihzat hmel taka a tih te chuan ka awm a nuamlo ringawt a, Bawihtei’n a hmuh tirha a tah khum chiam vang kha nge ni a, Bank Managerte nelawm loh thin lutuk vanga sawi anih pawh ka hrelo.


A tawng duh a, biak a nuamin a hmel pawh hmuh a hahdam khawp mai, tei vak loa Bawihtei tap ri ka hriat rual Chuan kawngka atang U Remruata nen an rawn in pawm lut a, a hmui hnuailam thi ser ser chu ka hmu rang khawp mai.


Ka kuta min pek pahin U Remruata chuan “A tlu palh a” a ti sup a, hrehawm a tih lutuk hlauin “A na vaklo ang” ka’n ti tak naa, ka hlauthawng ang reng tho.


Thisen chhuak chu han tih vak ngaihna ka hriat loh laiin Manager zawk chu a rawn tho vat a, a dawhkan hnuai pawhdawh atang lapua rawn la chhuakin min rawn pan a, dim deuhin Bawihtei hmui chu a hruksak a, a tap bang thei miahlo chu ka mangang ru tawh takzet.



“Lo la teh” tih leh ka kut atanga Bawihtei lak a rual a, a awm ah pawm betin a lu ah a dawm a, a office chhung zau vaklo ah chuan a kalkual pui vel a, reilo te ah a tap chu a bang a, chupa darah chuan a khabe nghatin a muhil ta siai siai mai.






End of Chapter-1
(In ngaihdan te lo comment ve rawh u aw)

[Ngaia]

MANAGER MAMUANA
By Ziki_nu



Chapter-2


“Engtinnge maw in tih tluk theih zawk le? A na vaklo a a zia zawk anih hi” Bawihtei hmui en pah chuan ka pi’n a ti hlak hlak a, “A la nghetlo em alawm” ka tih laiin ka pu chuan “Naupangte chu an in ti palh fo alawm, ri hlut zel suh” a lo ti ve a, “Rik hlut leh hlut loh lam pawh a ni lo ve, a vun te a la no a, a tlu na ang tih a hlauhawm alawm, nangpawh hi mi nazawng pawm tir mai mai tawh suh” tiin keimah bawk min hau leh a,


“Aw keini akara kan naute an lo lawm ve duh te chu lawm zawk ta che” ka pu in a tih leh te chuan “Lo chhan ve ziah suh” a ti hlar tawh a, ka pi hi chuan tawng thlawn hi a ba duhlo reng reng, a thinchhe leh lutuk hi amah pawh a hrilhhai letling zawk thinin ka ring.





Zanah ka thiante an rawn lang leh thuai a, vawiin lamah an in hralh tha vaklo aniang Muankimi a tum nasa ber bur emai.



“Vawiin chu in hralh tha vaklo a ni maw” tiin Hlimpuii chu ka melh zawk a, “I sawi peih lutuk, in hralh chu sawiloh, zawrh pawh an phal tawhlo” a ti a, a ni pawh a lungawiloh hmel khawp mai.



Hmeichhe pahnihte biak an chakawm loh em avangin mipa ho chu ka melh kual a, Spa chuan guitar lak kan pahin “Miss Teremi’n a zilh hrep mai” a ti sup a, thil thlen dan vel chu ka hrethiam mai.




“Schoola sumdawn kha chu a fuh vaklo alawm” ka ti sap a, “Kha chen kan zuar tawh alawm, Miss Teremi hi chuan min millo ve hrim hrim, ka la beng ang” Muankimi chuan a la ti tan tan a, a thinrim ve hle aniang a beng a sen vek alawm, a sat hmel lutuk ringawt.



“Ve vak vak che hian aw Muanengthei, i ngamloh tur hi chu sawi sawi ve suh” pindan atang ka pi’n a rawn ti pek a, kan nuih tha hlawm laiin Muankimi chuan,

“Ka ngam chiang emai, muhil mai mai teh Pi Sawi” a ti vin leh hlak a, “Ngawi mai mai teh” a rawn tih leh takah chuan Muankimi pawhin a chhang tawhlo, ka sawi kha maw, ka pi hi chu a hnial dang theihloh reng reng, a ngawi ve mai duh ngailo.



“Hrim hrimin tinge tunlai hian sumdawnna tur ringawt in ngaihtuah a, thil tih tum in nei em ni?” ka ti a, hetianga sum hmuhna tur kan zawn viau tawh hi chuan tu emaw ber birthday ani thin, anih loh chuan picnic a ni leh mai.




“Nakinah i hre mai ang” Hlimpuii’ a tih laiin Muankimi ve thung chuan “Mipa ho nupui man tur mawle” a lo ti zauh a, ka zawhna ber min chhanglo mah se kan nui duai a, ka zawt zawm tawhlo.



Ruah a sur nasat avangin veranda ah pawh kan thu chhuak peihlo a, chhuatah pher pahin kan thu bial thap a, Bawihtei pawhin nuam a ti ve thin khawp mai.



“Tinge a hmui hi” Puia chuan Bawihtei hmui chu en vung vung pahin a ti sup a, “A tlu palh” ka tih chuan mipa ho ngaihdan anih loh hmel ngang mai.

“A va tlu na awm em em ve, hmeichhia ania, ho te te ah ser mawilo deuh a nei thei, fimkhur tluk a awmlo” a ti deuh duah a, kan vai mai chuan kan en thap hlawm.


Puia hi mipa ho zinga chuan a tawng tamlo ber pawl a nia, tawngkam a thiam vaklo hrim hrim bawk, khatianga han tawng duah kha a inhmeh ve lo em a ni.



“Nia Malsawmpuia meuhin a sawi tawh chuan in ngaihtuah chiang hle rawh u, tiraw Bawihte” tiin Muankimi chuan Bawihtei a chhaih zui nghal daih a, “Zai ang u” an tih tak avangin guitar chu ka pawm a, ka perh rik hma hauhin Muankimi bawk chuan “Lawk” a rawn ti leh hluai a, kan ngaihchan thap hnuah “Di rukte kha sa leh phawt ang u” a ti a, mipa ho an phun zui hluk hluk mai.




“Zai ho apiangin i thlang ziah a, a ninawm, Di ruk pawh i neilo” Jacoba’n a tih chuan “Thlan chhan ka nei hleinem, a khuh hawn nan kan sak hrim hrim a ngai” a ti tlat a, an in hnial buai lai chuan guitar chu ka ti ri a, ka zai takah chuan an reh zui nghal a, ka sak tawp hma chuan an tawng leh tawhlo.

“Kha kha eng hla nge? I phuah ami?” tiin ka hau hian min en kher hlawm kher a, “Ziah chu ka ziak a, a puitling leh ngut lo ang” tiin ka nui hak a, music ka ngainat avangin lunglen deuh changa hla han ziah ve mai te ka ching a, mahse mi angin ka talent ve vaklo aniang, a riral leh thin.



“A va nalh reuh ve, phuah zawm la, music video te kan siam ang a” Hlimpuii’n phur deuha a tih laiin Muankimi chuan “Nia model ah min hmang anga” a lo ti thung a, a ti ho zo leh vek tawh.



Dar 9 rik dawnah ka pi zung turin a rawn hnar haw hlawm a, bawihtei pawh chhuatah a mu zawi ngiai tawh mai.


“In zai vang anih hi ruah pawh a han theih reng reng loh, a tlem lai hian va haw rawh u” a tih chuan an tho tham tham a, “Pi Sawii zun ngah lutuk hi chu a” Spa’n a ti zauh chu ka pi in a hre hman pek a,
“Lalrosang” fiak thawta a tih rualin a silipar a rawn thlawk phei fua a, tumah phei chu min vawm fu lemlo.


“In kam te hi a tam lutuk, va haw mai mai teh u” tiin a pheikhawk khing khai chung chuan a rawn kal hnai a, “A pi Sawii chu min van dimlo thei tak” tih pahin Spa chuan a silipar chu a chharsak a, a la bun tir thlap zui.


“Muttui aw Pi, naktuk zanah kan lo leng leh ang” tiin mipa ho chu an tlan chhuak nghal dial a, ka pi pawh a nui ve leh tho.


An chhuah vek hnu chuan kan awmna hmun hnawk te ka ti fel zung zung a, bawihtei mutchhuak a te a te tawh bawk nen hmai pawh ka phih hman ta lo.



***


“Vawiin chu Bawihtei hruailo mai rawh, vawkchaw chhum vil pahin ka lo awm thei mai ang, va tih fel ngei ngei tum tawh teh, ken tur tul ang ang kha keng nghal la” ti mawlh mawlh pahin ka pi chuan tapchhakah mei a zu khu deuh hlat hlat a, ngawi rengin ka lo en tawp.

Ka pi hi chu pasaltha ka tih kha maw, ka pu zawk pawn mei a zuk loh laiin a zu leh bik tlat a, a mak ve ania, kan inchhung ah na na na hi chuan a lal ve thlawt.


Phur lo deuhin ka insiam a, insiam han tihah, thuamhnaw fai ka inbel a, Bawihtei hruai a ngailo bawk nen ka sam kir buk ve ang reng tak chu ka thlah ve ngei a, fa neiha han chhangchhiat deuh chuan kan tawn tawm tawp a, han thlah mawi ve na hun pawh hi a awm thinlo.


“Inrinni a ni tho sia, ka thiante ka sawm ve dawn em mawni le?” ka tih chuan ka pi in tul a ti leh pek lo va, “Nangmahin kal la i rang zawk ang, i thiante nen chuan eng eng emaw in ti kawi anga, in rei thin” ti mah se Muankimi chu message ka thawn ta hram tho.



“Min lo sawm phei rawh” a tih avangin ka sawm kawi a, inchhung ka luh rualin Nu Edeni âng thawm ka hre nghal a, sawm chhuah a va huphurhawm leh dawn tak.


“Ehe i lo thleng der a law” ti hluaiin a nu awmna bathroom lam chu a melh zawk a, chutah ring mangkhengin Nu Edeni chuan “Muanengthei, i tui pipe off rawh ka ti a ni lawm ni” a rawn ti vak a, bathroom ah phone call a hmang pahin ka hria,



“Lo thu lawk rawh aw, Edenthari mood a uih lutuk a” tih pahin a tui pipe off tur chuan kawmcharah a chhuak zui nghal a, bathroom atanga Nu Edeni rawn chhhuak chuan min hmuh a in ring vaklo aniang, “E Mertei chu, kan va inhmu khat ve” a lo ti hlut a, Lalmuankimi hian a lo dil lawk leh peklo aniang,a hirha ber hi a nu a den ber a, sawm chhuah a huphurhawm thei rapthlak.



“Nia Bank ah kal ka ngai a, Muankimi min kalpui rawh ka tia” ka tih chuan ‘Anih chu, buh thap rawh ka tia, Mahse a then kual vel chhung nen chawhma ah chuan a thap leh hman chuanglo ang, va kal rawh u” a lo ti hloh a, kawmchar lam chu thlek zawkin,

“I va rei ve, i thiannu in a nghah reng che hi” a va ti vin leh tuar a,”Lo nghak lawk rawh” tiin pindan lamah min luhsan nghal bawk.


Nu Edeni hi Muankimi nu a ni a, nikum lawk khan an pa’n a boralsan avangin Muankimi leh a nau mipa Jony-a te a hmeithai pui a, nu thinchhia leh áng hlawk hlawk thin ni mah se thlarau mi tak a ni ve thung a, nu fel tak, mahse thinchhe tak ang chi kha a ni mai.


A fanu nen kan inkawm ngeih bawk a, a ni pawhin a fa ang maiin min en thin tih ka hria a, mize ni zawk zawk ka ni ngai lemlo bawk nen kan thianho ah chuan min ring ber thin. Mahse, a pa pawh hriatloh fa ka pai atang kha chuan ka hrelo le, min hmuh dan te pawh a dang ve deuh mai thei a ni.


“Ka hman e, Hlimpuii chu sawm lo mai ang, a insu” tih leh pawna chhuah a rual a, dar 10 a pel thui leh tawh lutuk.

“Manager thar ka hmu chak tawh den, nimin khan i hmu em?” a tih chuan “Hmu e” tih zawngin ka chhang a, “Biak a nawm chuan ka tih pui ang che” a ti leh nghal ringawt tawh.


Ruah chu sur chiahlo mah se khawpui a ri dur dur reng a, nihliap ken nachang lah chu kan hre derlo lehnghal.


Bank kawt kan thlen chuan U Tlanpuia a lo awm a, fa ka neih hma khan min rawn rim ve thin, sipai a ni a, khuaah a awm vak ngailo.

“Bank dawr in tum em ni?” tiin min lo be ve a, “Aw thil tih fel lawk tur kan nei a” ka tih chuan Muankimi zawkin “Engtiknge i lo haw?” a lo ti vat a, “Nimin piah ah, E Mary, naute i nei tih ka lo hria a, zanah lo len a rem angem, eng emaw ka lo hawnsak a” tiin keimah bawk min rawn en leh a, “Theih tho e” ban charha ka tih hnuah kawngka atang manager kha a rawn chhuak a, min hmu chu mak ti awm pawhin a awm tawhlo.


“Lo va lut rawh u, inchungah ka han kal lawk ange” tiin kawngkhar sira step ah chuan a pen chho zui pawk pawk a, Muankimi’n “Lut ang” a lo ti ve sek bawk nen U Tlanpuia nen pawh mumalin kan inbe tawhlo.


“Tlanpuia ka ten zia hi chu aw, a lerh si, naute i nei tih te chu a lo haw hmasak pawh khan a hre reng, zawh kher pawh i ngailo” a ti zui hlak hlak a, thutna awla kan thut thlak rual chuan “Khawnge manager thar chu?” a tih zawm nghal zat bawk.


“Nichina pawna lo chhuak kha” ka tih chuan “A hmel ka lo en lo” a ti leh daih a, “I la hmu em em ang” ka ti ta ringawt.



Bank chhung boruak hi chu a uap deuh churh thin avangin nuamlo ka ti thin a, a tul fe ah lo chuan ka kal duh ngailo bawk.

U Remruata chuan dawrtu a neih vang nge min lo be lem lo a, pawi pawh ka ti hranlo, cashier U Josepha’n min lo fiam leh zuk zuk tawh a,
“Engtheii chu i va thau sawt ve” a tih chuan “Engtheii ka nilo” a lo ti hlar a, ‘Muanengthei’ tih hi tu koh dan ber nge pawh ka hre tawhlo, mi zawng zawng hian ‘Engthei’ kan ti vek a, a haw em em reng mai a ni.


“I engthei an ti lawm, khawimaw han in ti eng chhin teh” tiin U Josepha chuan a fiam leh thin a, ka thiannu chuan “I over e a” a ti tawi tak ringawt tawh. A nu ang mai hian a tawngkam te hi a na a, mi a ti fawk fawk zel, hrechianglo tan chuan a ngeiawm ve thin ngawt ang, mahse hrechiang tak tak tute chuan engahmah an ngailo thung a, an chhaih thinrim poh leh an lawm a ni mai.

Manager a rawn luh lehtakah chuan a thutna lamah ka zui phei leh a, U Josepha te an awm bawk a Engtheii chu a ngaihtuah awmloh, khawi hmunah pawh awmse a tlangnel em em thei zel.


A hmaa thu tura min tih hnuah “Khawiah nge naute?” a lo ti ve mial a, “In lamah ka piten an awm a” ka tih chuan “A hmui chu engnge a an?” a ti leh a, “A vung ve deuh a, na lutuk chu a nilo” ka ti a, a office chhungah kan buai deuh hrep bawk nen min zawt chu mak pawh ka ti lo.



“Nizan lamah hotute ka be kual a, zirtirtu pension chauh nilo in department hrang hranga pension hlawh a tang nasa a, Bank lam chuan tih theih kan nei vaklo, mahse sorkar lam nawr kal tumin theihtawp an chhuah anga, in hmu vat turah ngai ang” a tih chuan ka lo bu nghat ringawt a,
“Mangang lutuk suh u” ti leh supin a dawhkan pawhdawh chu a pawt hawng a, lollipop pakhat rawn la chhuakin ka hmaa rawn nawr phei pah chuan “Naute kha i hawn dawn nia”: a ti a, a kiai zui suk chu ka en tha ngam tawhlo.



“A...Aw a van lawmawm ve” tih paha la in ka thutna atang chuan ka ding nghal vut a, rawn ding ve nghalin a kut a rawn phar chhuak a, ka chibai thuak hnuah ka chhuak zui nal nal.


Mawl min ti ngawt ang, lawmthu pawh ka sawi leh tawhlo, a office chhung boruak kha ka zo lo lam lek lek a ni, ka lungphu a rang a, chhan awmlo in ka zak chem chem ringawt.




Muankimi chu U Josepha dawhkan bawh run chungin an lo inhnial leh tawh a, min hmuh rual chuan ding mar vutin “In zo a mi?” a rawn ti a, ka bu nghat chu U josepha’n “Mangang lutuk suh Merte, kawng han zawh luih luih se a lo lut leh mai ang” a lo ti fiamthu a, za lo deuhin ka nui ve ringawt.




Pawn kan chhuah chuan ruah a lo sur nasa tih ka hre chiah, rin ang ngeiin min dang dawn anih hi.


“A va han sur hunlo ber mai tak em” ti hluaiin Muankimi chu thutna an lo dah ah chuan a thu thla dawt a, Bawihte ka ngaihtuah ve deuh tawh bawk nen a hunlo tak tak a ni,

Minute 15 vel lai kan nghak tawh, ka pi ka call a, a la chhang thei miahlo zui, rangva inchung neih chuan ruah a surin a bengchheng thei lutuk a, ka pi te ang rual tan chuan phone ri han hriat mai te pawh a harsa ve ang.

“Keichu Manager thar kha pastor a ang ka ti” Muankimi thil sawi vang chuan ka nui chhuak hak a, “A tawng dan te kha a pastor ruih mai, a dam thlup a, a hmeltha vung bawk si, sualna nei miahlo hmel a pu” a tih leh chuan tawng zawi turin ka lo khap vat a,”Nupui a la neih loh chuan chhai thluk kan tum dawn nia” a aia ring maha a tih leh phei chuan a hmui hupsak thawk mai ka duh rum rum tawh.



“I tawng ring thei si, an lo hria anga sin” ka tih chuan “Ho e” a ti liam puat a, ka dinna hnunga kawngkhar a rawn in hawng chiah phei chu ka phu nasa lutuk ringawt.



“Ruahin a dang cheu a ni maw” a tih chuan Muankimi’n “Manager kha tiraw” a lo ti vat a, “Mamuana” ti supin an in chibai zui a, “In hmanhmawh chuan ka nihliap in hmang mai dawn em ni?” a tih chuan “A ngailo” ka lo ti vat a, ka sawi dan ang chiahin “A van tha” a lo ti thung a, ka thiannu mah ni se min ti zak thin a ni.




“Sangbawihi i ngaihtuah tawh em kha, inthlahrunna hun pawh a nilo” tiin min la hau zui, Manager Mamuana chu enin za lo deuh hia ka nui ringawt a, ka zak a ni.



“Ka han la ange” tiin inchungah bawk chuan a chho leh a, ka thiannu chuan “Bank chungah hian a cheng ami” tiin ka beng bulah a rawn phun sar sar a, a chhohna lam chu a melh pah vung vung bawk.



“Aw a hmaa manager te pawh an chen ve tho kha, quarter ang deuh a ni mai” ka tih chuan a bu nghat nghat a, engmah a sawi zawmlo.



Nihliap nen a rawn let leh lam chu kan lo en reng a, “Pakhat chiah hi ka nei a, in inzawn thei tho ang” tiin min pe a, “Kan lawm e aw Manager Mamuan, kan lo pe leh vat dawn che nia” ka tawng ve ngai hauhlo in ka thiannu chuan a ti zat zat a,
kan kal tur chu “Mary” tia min rawn koh leh avangin ka ding leh dat a.






End of chapter-2
(A la tir bawk si, a tir lamah chuan ka ziak ngaihnawm thiamlo tih in hriat kha )


Show post links
Top

[Ngaia]

MANAGER MAMUANA
By Ziki_nu



Chapter-3



“Awiiii a duh chiang che alawm, a en dan atang che khan ka hre thei, nahhh a van man tak” kawng tluanin chu thu chu a sawi tawh, ka thiannu hi chu kawng engkimah hian a over em em zel mai a ni.



Ni e, kan manager thar khan ka number min dil miau alawm, khatia min koh din leh khan thil dang vak a sawi lo, “BiaBiak pawh theihna tur che min pe rawh” a ti a, pek phalloh ngawt thu awm heklo, ka phone number ka pe a, ‘Ka lo be dawn che nia’ tiin min thlah thlap bawk.



Kei aiin ka thiannu hian nuam a ti daih zawk, Ahh nuam tih chiam chhan tur pawh ka neilo hrim hrim, mak ka ti a, lawm tur nge lawm loh tur pawh ka hrethiam lo.


“Mak ka ti e keichu, tlangval ve uaiin hmun leh hmunah ka number min dil ringawt ania, hriat pawh kan la in hrechiang lo a, a zaktheilo i ti ve lo em ni?” ka tih chuan ka tukhuma min nam bu lawp pah hian, “I mawl e a, zak rual pawh a nih tawhloh kha, tlangval thankin tawh, lehkhathiam hlawh nei tan keini thingtlang nula number dil chu harlo ve e” a ti vak a, a dik ve reng mai.



“Min lo biak tak tak i ring em?” ka ti leh a, “A hriat chho mai dawn alawm, lungngai suh a biak che ka ring” a ti a, ka lungngai pawh ka ti tawp silo.



An inkawt thleng ka thlah hnuah keimahin ka haw a, ruah lah chu a sur tam tulh tulh emaw tih tur khawp a ni tawh, in ka thlen chuan a lo reh deuh thap a, ka pu thutthleng seiah a lo muhil a, Bawihtei leh ka pi chu pindanah an awm anih ka ring.

Ka ke lam a huh nasat em avangin bathroom lamah ka lut hmasa a, ka in hruk hul hnuah pindan lam ka pan ta chauh..


Ka pi hnungah Bawihtei chu a lo muhil a, tukverh eng ringin ka pi chuan Baibul a lo chhiar malh malh, “A lo suallo maw” ka tih chuan a rawn hawi vut a, “I va rei em em ve” min ti leh nghal ringawt tawh, “A.. Bible i chhiar lai em te chuan min hau lo la, ruah a sur nasat em hi” tih pahin a bulah chuan ka thu thla a,
“Engnge chanchin?” a lo ti vat, “Hlawh lut lo te chu Bank lam tan tih vak ngaihna a awmlo hrim hrim a, a sawi dan chuan department hrang hranga pension hlawh pawh a tang nasa a, sorkar lam nawr an tum a tia, nghah deuh tawp a ni mai” ka ti a, ka pi pawh a ngawi vung vung mai.


“Sorkar pawh hi a” a ti hlut a, engmah a sawi zawmlo, ka pi hi chu âng hlawk hlawk thin mah se midang chungchang a chhe zawnga sawia rel chiam hi a duh ngailo a, sorkar lam thleng hian a sawichhe vak vak duh ngailo, a kawng a nat hlauin Bawihtei chu ka puak chhawk nghal a, ruah a sur bawk nen a mutui khawp mai.



Hei zawng hi kan khawsak dan chu a ni mai, ka pu pension hlawh kan ring a, hlawh a lak reiloh deuh leh rilru a hah deuh a, vawk te chu han vulh ve bawk mah ila duh duh hunah a talh ve ngawt theih bawk siloh, kan nufa in chawmhlawm tawp kan ni a, Bawihtei a lo hautak ve tulh tulh bawk si, nakin zelah phei chuan engtinnge kan in enkawl ang ka ngaihtuah thiam thinlo.



Ka nu te unau hi pahnih chauh an ni a, ka putea chu engtikawng pawha belh ka tum ngailo, ka chunga a thil tih leh ser min siam zozai vang hian a inchhir ve angem tih te ka ngaihtuah a, a tawpah ka thinrim leh nge nge thin.
Nau ka pai lai khan vawi khat chu an rawn zin zuai a, a bak chu tun thleng hian a hmel ka la hmu leh lo, kan inbe ngailo a, biak chakna lah ka nei heklo. Ka nu lamah chuan ka pi leh puten tihian min enkawl a, ka pa te lam ve thung chu an awm nual na in ka pa hi hemi khuaa mi a ni lo a, an unau ah amah chiah mipa a awm bawk, ka ni te lam hian min ngaihthah thei viau a, ka nitei, ka pa te unaua naupang ber phaia awm hian min rawn be ve zeuh thin tihloh chu an reh thei khawp mai. Nula senior a ni a, a khawsak a harsa lo bawk nen Bawihtei mamawh leina tur min lo thawn ve leh zauh thin a, an lak atang beisei ka nei hauhlo na in chutianga a rawn thawn chang chuan lawm takin ka lo pawm mai thin.



Ka khawvel hi a zim a, hma hun eng tak pawh ka beisei ngam lo, ka pi leh pute hian min hmangaih em a, mi tha tak pawh lo tawng ila, kei leh ka naute chauh ngaihtuahin ka pi leh pute hi chu ka thlahthlam ngawt theilo ang.

Mal ngawih ngawiha in hriat chang ka nei ve fo a, ka hmeichhe rilru no a chhuah chang phei chuan tuma hriat lohna hmuna bo vang vang mai hi ka duh thin. Mahse ka fanu, ka pi leh pute hi ka hmangaih a, an tan hian ka theih tawp chhuah ve ka duh a ni.



Ka sawi ngai hauh lo in kan thianho group ah vawiin thilthleng chu Engtheii’n a sawi vek a, mipa ho chuan an ngaihven ve vak lo, Hlimpuii’n a hmuh ve chak thu ngawt a sawi a, Engtheii’n min biak tawh leh tawhloh min zawt chhen bawk.


“Nihliap hi engtikah nge kan pek ang” ka tih chuan “A lo biak hun che nghak phawt rawh” an ti tlat a, zanin chu ruah a sur duh bawk nen tumah pawh an rawn leng peihlo.

Dar 9 a ri dawn tawh a, min la rawn be chuanglo reng reng, min lo bia se ka ti viau pawh a ni chuanglo, mahse ka beisei ve tlat lawi bawk si a, ka awmdan hi ka in hrethiam tawh biklo.


U Remruata zawkin min lo bia a, vawiin lama min biak that loh vangin ngaihdam min lo dil leh ringawt tawh, hei hi ania U Remruata ka ngainat lutuk thin theihloh chhan, a fel viau a, mahse ka duh ai chuan a fel mah mah thin, min ti hrilh hai thei emai.


*Dawrtu ka nei laklawh sia, min hrethiam dawn nia* a tih chuan *A pawi hleinem* ka ti mai a, Bawihtei chungchang min zawh phawt hnuah *Manager thar chu engnge a an?* a rawn ti teh daih a, *Biak a nawm viau kha* ka tih chuan seen reng mah se min reply lawk lo.
*I lo ngaizawng ringawt ange* tia nuilem a rawn dah chu a duh leh vaklo aniang a delete leh daih a, ka hmu hman vek tho sia,

*Tak takah Mary, kan inbiakna arei ve tawh a, nangpawn i hria ang, ka biak dan atang che hian* a ti a, hrethiam lo rual pawh ka nilo mahse, hetianga min biak hian nuam ka ti ngailo reng reng, khawsak phung leh dinhmunin a zir loh chuan thil ho te ah pawh mahni insit a awl a, U Remruata te ang lakah chuan ka in hmu hniam leh rawk rawk thin.



Ka chhan lawk loh vang nge amah bawk chuan *I sawi thei rihlo anih pawhin a pawilo, ka nghak thei che ania” a rawn ti leh a, min muttui nghal bawk.
Keimah ngawt chuan thutlukna han siam mai ka ngamlo hrim hrim, ka duh ve em pawh ka hrelo a, Bawihtei vang tal pawh hian ho lam deuha ngaihzawng nei hman ka ni tawhlo hrim hrim bawk, ka nei anih chuan keimah chauh nilo a ka fanu nena min pawm thei tu tur ka mamawh.


Zing dar 5 rik hma in Bawihtei tapin min ti harh a, peihlo deuhin ka thawhpui leh hna hna, diktak chuan a harh hma thei lutuk hi chu a nu mah ni ila a ninawm..


Nizan lamah ruah a sur nasat ang aiin zing boruak chu a thiang a, kawl eng pawh a mawi ruai ruai khawp mai.


Meichhem nan la hma deuha ka hriat avangin Bawihtei chu pawnah ka chhuahpui a, kawngdunga ka kalpui mai mai laiin mi pakhat exer la ni awm tak hi kan in kawngah chuan a rawn tlan phei a, a hmel ka hmu chiang chu ka ip deuh chawih mai.



Kan awmna zawn a rawn tlan thlen chuan ding in min nui sang a, ka nuih let ve ringawt, Bawihtei chu en in a hma zawnah chuan a thu hniam a, a biang lehlam lehlamah chuan dawmin a hmui chu uluk deuh hian a en a, “A vung pawh a zia deuh tawh hi, damdawi te i hnawih em” tiin min rawn en leh a, lu ka thing ringawt, kan khawsak phung en hian hetiang leka damdawi hnawih zel tur nei hmel pawh kan pu em mawni le, atthlak lutuk!

Bawihtei chu pawm kang nawlhin kan dinna sir, kan in piah deuh lawk kawng sira ka pu in thing hmanga thutthleng a siamah chuan a thut phei pui a, ka zui zel ringawt.


“Fanu tho hma deuh neih chu a nawm dan a dangdai viau lo maw” keimah pawh min en lo chuan a ti sup a, “Nia duh ai chuan a harh hma thin” ka ti a, ka nui pah hak bawk.


“Sam in nei mawi dun nufa hle mai” tiin bawihtei sam chu a chul sak thuak a, “E taka, nihliap kha” ti in ka ding hluai a, “Ka va la lawk ang aw” ka tih chuan a lo bu ve nghut a, kan in lamah ka tlan phei nghal hlawk hlawk.




Nihliap nena ka let leh lam chu ka thil hmuh vang chuan ka ding dat a, Manager Mamuana bula ka fanu nui har har chuan ka hah a lo ti dam sawng sawng mai. Pa han nei ve se, tiang hian infiam dun ve se tiin duhthu ka sam fo thin a, ka fanu hlim hmel leh nui ri te hi a pa vang ni ve thin se ka ti takzet.



“Anu a lo let leh ta e” tiin min rawn pan vat a, “I vannei hle mai” min tih chuan hrethiam lo zetin “Tinge?” ka lo ti vat a, “Mi tamtak fa nei duh ngawih ngawih nei theilo an awm laiin fanu duhawm deuh i nei bik a” a tih chuan ka chhang lawklo, chutiang chuan ka lo ngaihtuah ngailo reng reng, Ni e , tam tak chuan fa neih an duh ngawih ngawh laiin an nei thei lo a, keichuan fanu duhawm tak ka nei a, lawm tur ka ni.



Nihliap chu ka pe a, Bawihtei min pek hma chuan “Kan inhmu leh vat dawn nia aw” tiin a chalah ka fawp zauh a, a kut atanga ka lak hran hnuah ban min vai leh zauhin a tlan liam lehnghal a, zingkar atanga a hmel hahdam thlak zet hmuh chu a hrehawm lem loh e, lawm loha ka nui vur vur chu duhlo in inchhungah kan inzui lut a.




Pathianni a ni bawk nen ka piin chaw ei hma a duh leh ang, tapchhakah mei nun in tui ka chhuang hmasa a, ka pi pawh a rawn tho chhuak ve chiah.



A sam sei leh tlem angeng tak chu vial tawm nawk nawk pah hian “Kan nula chu a va tho hma awm ve” a ti a, “Nia pawn ah exer kan la zak zak tawh” ka lo ti vat.


Thingpui kan in hnuah vawk chaw pe turin kawmchar lamah ka chhuak a, Vawkpui rai lai pakhat leh a pa pahnih kan nei a, chaw an heh hlawm si, an hautak lutuk ringawt.

“A ek kha hawlh thla nghal vek ang che, Nupuii phei kha chu a rit tawh a, a duh duh naah a mu mai mai tawh ania” ka pi’n a rawn ti lang lang a, kan tih tum sa reng ‘tirawh’ an rawn tih leh kher hian ka ti peihlo zo vek zel.



Kan vawkpui hi ‘Nupui’ tiin kan ko mai zel a, ran dang anga han khawi fin viau erawh an har khawp mai.

Vawkchaw ka pek fel hnuah eirawng ka bawl leh a, Biak in kan hlat bawk si, in peih hma a ngai thei bik lutuk ringawt.


Hlimpuii’n min lo sawm a, Engtheii kan sawm phei leh thin.

“A lo la be lo che em ni?” tia Engtheii’n min zawh chuan ka bu nghat ringawt a, “Mahse zingah khan kan inhmu” ka ti chu a ner nawng nawng pawh a rawn nui leh nghal sun sun mai, a va han over thei tak.


“Khawiah?” Hlimpuii’n a lo ti vat a, “Kan kawt ah, a zing walk nen kan intawk a” ka tih chuan “Sunday ah pawh a awllo a ni maw?” an lo ti rual duai a, “Aniang chu, mahse zing karah ania, tu vak mah an la tho lo ang” ka tih laiin Engtheii bawk chuan “A taksa a nalh reuh ngawt ang” a lo ti leh vang vang tawh a, “In ninawm e, a hmel ka la hre ve bawk silo” Hlimpuii’n a lo ti hlar thung. Anni pahnih bulah hi chuan pangai tak pawhin thil a sawi theihloh, tak deuha thil sawi dawn chuan mipa ho an awm ve vek ngai.



Inkhawm banah mipa ho in min lo nghak a, kan in lamah kan inzui phei leh tham tham.

“Kan Manager thar chu kan vengah lo inkhawm ve se tha tur ania, veng a in an loh chuan a buaithlak e” Hlimpuii’n a ti nang nang a, a hmu ve chak lutuk hi ka khawngaih zawk.



“Nizanah Remruata’n sawi a nei a ni maw” Spa’n a tih chuan min en thap hlawm a, “Engmaw?” ka lo ti ha thung.

“Remruata te chu a fel a, i duh ve phawt chuan kan duhpui che” a ti leh a, hmeichhe pahnih chuan “A bem che em ni?” an lo ti vat.



“Bem chiahlo” ka ti a Spa chu en in “I bulah engnge a sawi a?” ka ti leh a, “A duh thu che” a tih chuan ka thaw chhuak hak ringawt.



Ka rilru hria ni awm takin Hlimpuii chuan “U remruata chu fel viau mah se Bawihtei leh Mary tan chuan amah aia puitling hi ka duh zawk, hrechiang vak chuanglo mah ila a la naupang a, Mary tan chuan pasal tlak a ngai alawm” a lo ti vat a,
“Ngawi mai mai teh u, hriat hnu vek in sawi a, hmasawnna tlak engmah in sawilo, tunah chuan Remruata hian tangkaina pakhatmah a neilo, kan Bank Manager thar, manager Mamuana hi a tha, a hmel ka en khan ka hre thei, chuvangin kan kherh thlu ang” a ti a, a in hum ruh nasa mai.


“A hming te i lo hre leh hman elaw?” Puia’n a tih chuan in ti thei hmel fe hian “Kan in chibai thlap tawh” a lo ti then a, kan in kawt kan thlen chuan kawngkhar a lo la in kalh thap mai, ka pite hi chawhnu an inkhawm tlang dawn chuan chawhma banah an lo haw ngai lemlo a, kan in a hla deuh bawk nen an thiannte inah an lut kawi mai thin.



“Chawhnu chu ka inkhawm peih tawhlo ania” inchhung kan luh rualin Jacoba’n a ti nghal zat a, “I inkhawm ngailo hrim hrim” Hlimpuii’n a lo ti chu an inhnial zawm nghal a ni deuh mai, Pathianni chawhnu inkhawm hi chu keini ang rual tan chuan a peihawm loh ve bawk em a ni.




“Ka ning ee keichu, ka Nu Edeni a strict bawk si, ka inkhawm loh chuan tlai chaw min nghei tir leh tak tak duh ang” a ti hlak hlak a, ka sawi kha, Nu Edeni a den si, a fanu a ho bawk si, kan thianho hi chu kan tawk thei ania aw...




Noodles kan chhum khawm a, heipawh kan tih ziah dan a ni, Bawihtei a mut avangin thawm dim a ngai a, mipa ho chu pawn lamah an insawn chhuak leh vek tawh.



“Dar 1 a ri dawn tawh a nia, inkhawm i tumlo em ni?” tia Engtheii ka zawh chuan banga sana in tar chu thlek zawkin “Vawiin tlai chu chaw ka nghei mai ang” a ti a, chawhnu inkhawm hi chu a peihawm loh ve bawk a ni.




Bawihtei mu tho chu Jacoba’n pawn lamah a pawm chhuak a, an va in ti tap lo turah ngai teh ang.

“Star thar ka nei a” Hlimpuii’n a tih chuan Engtheii nen “Tunge?” kan lo ti vat a, “Sir Zautea” a tih chuan kan au nasa ngang mai.
“Engtinnge i duh theih?” tiin Engtheii chu a ner nawng nawng reng a, “Sir Zautea chu high school zirtirtu a ni a, keini pawh min zirtir ve hman.
Tlangval senior a ni a, a hmelchhe vaklo na in hmel tenawm deuh ang chi hi a ni mai, kei pawhin ka ten!!!



“Niminah dawrah kan inhmu a, ka hmu tha thut alawm, a fel ve reuh sia” a tih te chuan Engtheii’n a tukhumah a nam bu leh lawp thin a, duh hlarh hlarh viau mah se kan tuipui thlawtlo a ni.



Spa chuan kan thil sawi chu a lo hre pha aniang kawngkaa rawn dak pahin “Zaubala maw i star thar, va ropui lo ve” a rawn ti ve zauh a, “Lo tawng ve suh Lalrosang” a ti vin hlur ringawt. Kan duhpui lo hlawm emai a sawi nawn leh duh tawh pawh ka ringlo.



Ka pi te chawhnu inkhawm bang chu Nu Edeni ho in an rawn in zui lut a, kan hmu thut chu kan phu zawk hlawm vekin ka ring.


“PC lalmuankim, engvangin nge chawhnu inkhawm hi i tlanbo ziah?” a rawn ti a, a kut zungchalin a fanu chu a kawk pah sawk sawk bawk.



“Dar zat ka lo en lo a, ka tlai alawm” a tihte chuan “Dawt sawi tum ziah suh, min bum mai mai lo ang” a ti vin leh hlur a, tiang taka den si engtinnge a inkhawmloh ngam zawk thin le....




An nufa chuan an in hnuk haw a, a tlai deuh tawh bawk nen midang ho pawhin an zui chhuak ve nghal a, Bawihtei te reng chu pawm kang pahin ka pi chuan “In hmana in dam anih chuan inkhawm zat zat rawh u ka tih thin cheu kha, Bawihtei pawh a lian tawh a, duh chuan a inkhawm pui theih lutuk ringawt, ringtute tan chuan inkhawm tam tluk a awmlo, nangni ho ngat phei hi chu inkhawm tluk tluk tur in ni ringawt” min ti zui duah a, chhangchhe lo ila chuan ka pi pawh hi Nu Edeni ang a ni mai, inkhawm turin min ti reng mai ang.



Eirawngbawl vak a ngaihloh vangin Bawihtei chu veranda ah ka thutchhuahpui a, ka phone rawn ri chu enin number hlang ringawt anih avang chuan ‘Hello’ ka ti liam puat a, lehlam atanga “Lo len a rem em?’ titu aw mawlh chu!!!!


End of chapter-3
A hnuaia ads hi vawi khat min click sak la, like leh comments kha aw...


Show post links
Top

[Ngaia]

MANAGER MAMUANA
By Ziki_nu


Chapter-4



A aw atang chuan tunge anih hrilh hran ka ngailo reng reng, mahse hrelo ang maiin “Tunge aw?” ka ti sap a, lehlam atang chuan a rawn nui ri suk!



“Mamuana” a tih chuan ka thaw chhuak vak a, “Aw len theih e” ka tih lai te chuan ka in hum ruh tung ringawt, “A that chu, ka lo leng dawn a” a ti leh ringawt a, sawi ve tur a vang duh ania aw...

“Awle” ka ti ta ringawt a, ka off zui nghal daih bawk.


Manager Mamuana kan inah rawn len a tum amaw, tlaiah leh nghal..
Engtheii leh Hlimpuii message ka thawn nghal a, an la seen theilo ve ve zui, a lo kal laia veranda a lo thut chu ka nghahhlelh hmel lutuka ka hriat avangin Bawihtei chu inchhungah ka pawm lut nghal a, inleng ka la neihloh vangte pawh a ni mai thei, ka za cheng mai.




“Tunge lo phone tu che kha?” ka pi’n a tih chuan “Lo len a tum” ka’n ti nghal ringawt pek a, “Tumaw lo leng dawn?” a tih leh chuan “Manager mamuana, Bank manager” ka ti leh a, ka thaw rang lutuk a ka thin a na vek tawh.


“In in hria em ni? Lo awm thar chauh a niin ka hre sia” a ti leh a, ka pi dilchhut thin lutuk hi chu ka ning ngawt mai.


“Aw... bank ah te ka va kal a, hriat chu hre ve e” ka ti a, kawngkhar kik ri in a zawm nghal bawk.

Phawk deuhin ka pi chu ka va melh a, “Engnge?” ti ni awm takin min lo melh ve kur mai.


Ka aw ka then kharh kharh hnu ah “Lo lut rawh” ka ti a, awi ka rei a rawn leng tak tak!!


Min hmuh chuan a nui sak a, “Lo thu rawh” ka ti thei tawk a ni...

Bawihtei chu banin ka pawm lai chu a la nghal a, ka thutna bul chiahah a rawn thut pui nghal bawk.
A kawrlum ipte atang chuan lollipop pakhat a rawn phawrh a, Bawihtei pawhin a lo ban vat, min rawn enin “Sangbawihi tiraw?” a ti sup a, “Aw Lalliansangi” ka lo ti vat.
Mi hming hi a hre thei e,,, ka hming te, Bawihtei hmingte hi tu hnen atangin nge maw a hriat ni...


Thutthleng lehlama thu ka pu chuan “Kha Merte, tunge i thianpa chu?’ a lo ti ve a, “Ka” ka ti hman chauh tihah “Lalmuanpuia ka nia, Mary thianpa” a lo ti vat a, ka pu chu pan hnaiin a va chibai thlap bawk. Ka pi pawh choka lam atang a rawn lang ve nghal a, “Bank Manager thar hi maw i nih” a la ti kher zui.



Bawihtei pawm chung chuan ka pi leh pute nen an titi char char a, tar duhzawng titi a vawrh thiam phian leh nghal. Keichu ngawi rengin ka lo thu ve chawrh chawrh ringawt.



“Kum engzat nge i nih tawh?” ka pi phone hmanga a kal sawn zawk hlan chuan a ti sup a, min la en chiang em em lehnghal...


Sawi nghal mai duh bik lo in “Tinge?” ka ti hmasa ve a, a dar chu chhin akin “Ka hre duh a” a ti leh sup a, “Kum 19” ka tih chuan “Pasal i nei thei tawh anih chu” a lo ti leh daih a, ka nui chhuak ta hak.



“Fa pawh ka neih tawh hi” ka ti deuh nghat a, tun maia a thil sawi kha chu ka tan chuan inhmuhsit na ang mai a ni, dawnsawn dan tur ka hrelo, tawngkam pangai tak ni mah se ka nat pui tho!



“Nilo e, ka sawi awmzia i hrethiam lo, Sangbawihi awm tawh mah se kum i la tlin loh chuan pasal i la nei thei chuanglo a, tunah chuan i nei thei tawh a, a lawmawm” a ti a, “Anih leh nang?” ka lo ti thung.



“Engmaw?”
a ti deuh ha a, “Kum engzat nge i nih?’ ka ti ve ngat, a naupang zawk zawk tawhlo tih chu a hmelah a hriat vek a, zawh ve hrim hrim ka chak.


“Han ring chhin teh” a tih chuan “Sawi mai mai rawh” ka lo ti hlak a, nui chhuak hawkin Bawihtei chu a malchungah a dintir a, “Anu hian ka kum zat a hre chak a, kan hrilh duh angem?” a ti a, ka fanu lah chuan “no no” a lo la ti zui.


“Hei Sangbawihi pawn No a ti tlat mai, hre rih lo mai rawh” min ti a, “I phakar emai” ka ti tawi tak ringawt tawh.
“Tak takah, thla leh ni 15 hian kum 26 ka tling ang” a ti a, “July ah maw?” ka tih chuan “Mak i va ti awm ve” a ti a, “Bawihtei pawh July ni 15 ah a piang a” ka ti sap.


“Ehe kan birthday a in ang anih chu” tiin Bawihtei chu a chhaih te teng tung a, a zahawm hmel khep khup nen naupang chu a ngaina ve viau anih ka ring.


Kawngka in hawng dar huang lam chu kan hawi vat a, Hlimpuii a lo lang heu mai, “Enge i lo tih dawn?” ka tih chuan “Ka lo kal zuai a” a ti ringawt a, ka bula thu pa chu a melh zui vung vung bawk, henu lo kal chhan hi ka hrechiang lutuk, ka message kha a hmu a, a insum zolo a rawn kal anih hi, a va han peih mai mai tak.



“Englo, inleng te i nei sia ka kal leh nghal mai dawn” tiin luh pawh rawn luh lo chuan a tlan leh nghal daih a, “Lalhlimpuii em ni? A va han mawl teh tuh ve” ka pi’n a rawn ti hlak hlak a, “I thiannu maw” tia ka bula thu pa in min zawh chuan ka lo bu nghat.



A sana bun lai chu en zawkin “A tlai tawh sia, ka va haw phawt ange” a ti a, Bawihtei la pawm reng chung chuan a thutna atang a tho zui nghal bawk.


Ka pi chuan chaw ei turin a sawm mawi ve a, a hnial ve tlat thung, “Nidangah le...inkhawm zan te a ni sia” a ti ve ngei a, “I inkhawm ve thin em ni?’ ka tih chuan ka sam rawn tuai zauhin “Inkhawm ngailo ka ang deuh a ni maw?” a ti a, ka inthiam lo leh hnuhnawh viau.




“Aih, helama i rawn awmna a la rei silo a” ka ti sap a, “Thawhpuite an fel a, min ti tlang nel zung zung mai” a ti a, amah hi a tlangnel hma ve bawk hrim hrim niin ka hria, tunah pawh a rawn leng ringawt ania.


Kawtzawl thleng ka zui chhuak ve a, Bawihtei chu min pawm tir pahin “Nidangah lo len leh a pawi em lo ang chu maw” a ti a, “Pawilo e” ka tih chuan nui sukin ka fanu bawk chu a en leh a, "Anu thu lo awih la, ka lo kal leh vat ang aw” a ti a, Bawihtei’n a ngaina lutuk hi a mak ve ngawt mai, a hmuh hmasak berin khati khawp khan a tahkhum nasa a, engtin vak a ti ngai pawh a ni bik tawp silo.


“Thli a thaw nasa vuk vuk emai, lut daih rawh u, a damlo ang” a tih chuan bu nghatin inher mai ka tum a, “Mary” a rawn tih leh avangin ka ding leh rih,
“Chaw ei tui u” a ti sup a, a nui deuh chu a lai ve deuh nge mawni, “Aw le, chaw ei tui le” ka ti a, thildang a sawi tawhlo bawk nen kan luhsan nghal a.

Kan awmna veng a in hlat ve angreng si a, ke in alo kal nge mawni le...A khawngaihthlak zawk.



“Thian i va nei fel ve Merte” inchhung kan luh leh chuan ka pu’n a lo ti vat a, ka chhan hma hauhin ka pi chuan “A fel hmel viau mai, mahse i hriat chian hma chuan ring nghal ngawt suh ang che, mipa lakah hi chuan fimkhur tluk a awmlo” a lo ti a, sawilo mah se ka rilrua awm ang chiah tho a ni.


Keichu ka putea khan ka zahawmna mai nilo in ka rinna thlengin a ti chhe zo vek tawh a, hmangaih ka tawn hma atang hian hmangaihna hi ka hlau ru riau tawh, hmangaihna chu a hlu a, a ropui bawk a, chu chu misualte hian an ti khawlo zo vek thin ni ber hian ka hria.



“Bawihtei nen hian an in ngaina riau a, a lo leng ve mai mai anih kha” ka ti a, ka phone ka en chuan kan thianho group ah message a lo awm leh tuar tawh.


Rin ang ngeiin kei leh kan Manager thar chungchang bawk an lo sawi khawm leh tawh a, sawi khawm han tih ah, Engtheii leh Hlimpuii char char an tawng tho.


“A duh chiang alawm, a len chilh nghal hmak ngam ania, chhuah chi a nilo hrim hrim” Engtheii’n a tih chuan “Nia keipawh a duh hmel ka ti, a hmel han pa zia kha, Sangbawihi a pawm a, chhungkua an ang vel tawp” Hlimpuii’n a lo ti ve thung a, an titi a la naupangchhia thei a nia aw....




Zanriah kan ei laiin ka pi chuan “Vawiin chu i nu Zovi te inah kan lut kawi a, an fapa sipai pawh a lo haw leh tawh kha, hman deuh khan a lo leng ve thin a ni lawm ni” a ti hlawl a, Manager ngaihtuah lai laiin Tlanpuia lo sawi te chu a..



“Leng ve thin tho e” ka tih chuan “An be tha che anih chuan lo biak chhiat miahloh tur ania, nangmah chauh ni lovin Sangbawihi nen in ni tawh a, duh khirh viau kha a tha berlo, in nufaa hmangaih taka enkawl thei tu tur cheu in hmuh chuan neih hmak tur” a ti leh tawh a,

“Ka pi chu i in ti thu thei e, mi tha ka hmuh te chuan ka nei ve bawk ang chu, mahse nei pawh ni ila engtinnge in lo awm anga” ka tih chuan “In ti thu ang chu” a ti vak a, ka pu chu melh zawkin, “Keini chu ngaihtuah kan ngailo, Sangbawihi’n pa a la mamawh dawn chauh a, i thiante sawi danin mipa i ngaihven lutuk lo a nih hmel a, a tha berlo, nu i ni tawh a, lerh chiam thei i nih tawhloh rualin ngaihven loh leh lutuk chu a tha chuanglo, mi tha zawng la a ni mai, pasal a chhia a tha chu i la nei ngei ngei dawn” a ti leh duah a, ka sawi zawm tawhlo.


Ngaihven lo tawp phei chu ka ni bik hleinem, ka tawn chin engmah min hriatpui lova, mipaa rinna nghah ka harsat tawh zia pawh min hriat pui tawp lovang.



Kan chaw ei na bul chhuata ka fanu amah chauha a infiam melh melh chu ka en reng a, hetianga hmeichhe naupang duhawm tan hian Pathian pawhin zah a ngai anga, a Pa tur chu tha deuh min la pe em em ang.




Zanah pawh kan chhungin kan inkhawm leh a, Engtheii chu kan bulah pawh a rawn thu lo, Nu Edeni nen nu ho thutna ah an thu a, tlai chaw kha a nghei tak tak angem tih ka lo ngaihtuah daih.



Hlimpuiii nen kan thu dun a, Bawihtei pawh inkhawmnaah chuan a fel thin khawp mai.



Kan ban rual chuan Engtheii’n min rawn pan vat a, Bawihtei chu pawm kang lawpin “Sawi rawh le” min ti a, “Engmaw?” ka lo ti ha chu min melh hrep phawt a, “U Mamuana mawle mawli” a ti a, Hlimpuii pawhin hriat chak hmel deuhin min lo en ve bawk.



“Min lo call a, ka lo leng dawn a tia, a lo leng tawp” tih zawng ka sawi a, “A van che patling ve, a message kan lo chang reng a, a biak duh hunah che chuan a lo call mai alawm, a tha phian mai hepa te hi, a number chu save ngei ngei ang che” thutak hmel deuh hian Engtheii’n a ti ve ngei a.



Mipa ho din khawmna lam kan thlen phei chuan U Tlanpuia te thiandun an lo awm ve a, “Lo len kan tum a, a rem em ang chu” a lo ti a, “Umm” ka ti ringawt, tun ang hun ah phei chuan lo lenglo mah se pawi pawh ka ti vaklo asin mawle...



Inkhawm ban lam tawh anih avangin hmeichhe pahnih te chu an rawn leng kawi ve tawhlo a, mipa ho zawng leh U Tlanpuia te thiandun an lo leng thung.


“Ka va inthlak lawk ang” tih leh pindana luh ka rual a, Bawihtei chu Jacoba nen an in pawm rih.

Ka inthlak zo ka chhuah rual chuan Spa’n thingpui lum turin min lo ti leh nghal zat tawh a, ka pi chuan “Ni e han thlit rawh, keini i pu nen chuan kan mu tawh ang” a ti a, ka pu TV on tum mek pawh a on loh phah ringawt.

“Muttui aw Pi” Jacoba’n a tih chuan “Lo tawng ve sek suh Lulian” a ti deuh zek a, mipa ho an nui dar dar thung.

“Mary pi hi chu a sial ve ania” an ti a a fel zia an sawi rualin a thinchhiat zia an sawi tel kher bawk.



Thingpui ka lum lai chuan chokaah U Tlanpuia a lo phei ve a, sipai tih takah Palianpui mai hi a ni a, ka bulah chuan rawn ding ve in “I lo dam tha maw?” a ti sup a, “Aw dam e, i dam tha zawk em?” ka tih chuan “I ngaihawm thin khawp mai” a ti leh daih a, chiang deuha amah chu enin ka nui ta ringawt.




Thingpui ka thlit chhuah ruala ka dara min rawn khawih thut chu ka phu zawk a, no pakhat chu ka vai thla ringawt bawk.


Kan thawm chu hria in ka thiante an rawn lang nghal zat a, Puia chuan min rawn pan vatin “Engnge a?” a ti sup a, U Tlanpuia chu a melh nghal run bawk.



“Englo, no ka ti tla palh” ka ti a, ka khur titih ringawt chu ka duhlo kher mai.



“Thil tih i nei em ni Tlanpui?” ti nghutin Spa chu a rawn kal hnai ve a, an in din chilh nghal run mai.


“Chutiang a nilo Sp” ka ti sap a, “I hlauh hmel em kha mawle,,ngaithla teh Tlanpui, ka hrilh lawk tawh che kha, Mary hi hmeichhe dang ang a nilo,, i insiamrem thei dawnlo anih chuan hnaih lo law law rawh” tiin Tlanpuia chu a en run a,engthu nge a lo hrilh tih chu ka hre chak khawp mai.



Ngawih rengin U Tlanpuia te thiandun chu an chhuak nghal a, Bawihtei a lo tap ve bawk nen Jacoba kut atang chuan ka laksak thuai a, “Hnute pe rawh, thingpui chu ka rawn thli ang” Puia’n a tih avangin sitting room lamah kan phei san a, pindan atang ka pi a rawn chhuak ve chiah bawk.


“In thawm a va na em em ve?” keimah min en ran pah chuan a ti a, “Keimah anih kha Pi, no ka ti tla palh” tiin Puia chu choka atang a rawn au lung lung a, “Khawihah nge Zovi fapa te kha” a tih chuan Spa’n “Haw an ngai thut a” a lo ti ve zat a, choka lama a phei hnuah mipa pahnihte nen chuan in en in kan nui ta vak.

Hemi te hi ka thiantha te an nih hi, kan in hmangaih tawn a, min ngaihtuah em em bawk a, ka tan tih hreh an nei ngailo. Chu... Puia pawh no a tihtlak avangin ka piin a hau mek e...



Hun a kal ve bek bek a, kan manager pawhin min rawn be ve leh zeuh thin mahse min biak ve chang pawhin Bawihtei chungchang deuh hlir kan sawi a, ka la nel lutuk ngamlo na in mi tha tak chu a niin ka hria.



*Sangbawihi chu a kum engzahna tur nge?* a tih chuan *Kum 2 na* ka ti vat a, ka message chu seen reng mah se min reply lawk lo.



Rei fe ka nghah vang vang hnu ah *Zanah lo len ka tum ang* a rawn ti a, a vawi hnih rawn lenna tur chauh ni mah se ka phur lutuk ringawt.




“Vawkho chu chaw i la pe lo em ni a?” ka pi’n a rawn tih takah chuan harhchhuak zawkin kawmcharah chuan ka tlanchhuak nghal a, an nguk ring hlawm ropui sia engtinnge ka hriat loh theih zakw le...



Zanriah kan ei kham chuan ka pu in “I thiante hi tunlai an lo va lang khat ve” a lo ti ve a, “Nia an exam lai ania, an reh ve anih hi” ka tih hnuah “E pu, zanin chu U Mamuana, a awmzia chu Manager Mamuana kha lo len leh a tum a” ka ti a, ka pi zawk chuan “In in be thin em ni?” a lo ti leh tawh.


“Be thin vak chuanglo” zawi ang reng tak hian ka ti sap a, min zawt zui chuanglo.


Dar 7 velah a rawn kal a, khawhar inah ka pi a kal avangin ka pu TV en thawm bak chu thawm dang a awm teh vak lo.



Chhuatah Bawihtei ka thutpui a, thutthlengah pawh thu lo in chhuatah chuan a rawn thu ve a, Bawihtei lollipop pek pah chuan “Min lo ngai em naute” a ti sup a,ka lo nui hak mai.



Ka pu chu pa tawngtamlo tih takah sawi tur a hre lemlo a, reilo te ah pindan lamah min luhsan ta daih bawk.

“Tunlai chu sipai chhuti in a hel deuh thin che tih ka lo hria a” a tih chuan “Engmaw?” ka lo ti vat a, “Tlang sawi vel hi ka hrethei a nia, a bik takin i chungchang phei chu ka hrethei lehzual” a ti a,


“Ka van hrethiam lo” ka tih chuan thaw chhuak hakin thutthleng pangaiah chuan a thu chho a, “Hmeichhia i ni a, duhzawng leh duhtu te pawh i tawng ang, mahse” a ti chiah a, kawngka a rawn in hawng a, ka pi a rawn lut ve chiah, a va rawn haw hunlo mai mai tak e aw.....



End of chapter-4
Ads click, like leh comment kha aw...


Show post links
Top

[Ngaia]

MANAGER MAMUANA
By Ziki_nu


Chapter-5



"Engtinnge Laltlanpuia chungchang chu a lo hriat ve daih theih le... Tunge hrilh ang?" Engtheii chuan a la ti vawng vawng reng a, hmanni a lo len khan sipai chhuti in min hel tih a hriat thu a sawi a, ka chungchang a hriat theih viau thu a sawi bawk anih kha.



Ka fanu hian pa a neilo tih pawh a hrechiang khawp ang, pa neih chu sawiloh, a pa pawh tuman an hre ve lo, fel viau mah se min hmu tleu viau mai thei a ni. Ka dem hranlo, ka ngaina a, mahse ani pawh hian midang ang tho in min ngaih ka ring.




"Engnge i ngaihtuah leh tak vung vung a, I ninawm e... lo pending leh vung vung zel, tichuan engtin zel nge, duhzawng vel a sawi laiin I pi a rawn lut thut a" Engtheii bawk chuan a ti leh hluai a, "Engnge awm leh vak se I tih a, ka pi a awm tawh te chuan engmah sawi zawmna chi a ni tawh hleinem" ka lo ti hlak.



"A va rawn lut fuhlo mai mai tak Pi Sawii chu" tih pahin Hlimpuii chuan Bawihtei chu pawn lamah a chhuah pui a, ka pi leh pu te in neihna lamah ruai an theh dawn avangin kan inah kan thianho hian chaw ei khawm kan tum a ni.



"Engpawh ni se chutiang thleng thleng a sawi kai tawh chuan kan manager hian a duh deuh che tih a chiang reng tawh mai, nang engnge I dinhmun" Engtheii chuan a ti leh tawh a, hepa chungchang hi chu a sawi ning thei thlawt lo a ni ber.



"Engtia dinhmun?" ka tih chuan tthawchhuak hawkin "Sawi fiah zel a ngai te hi ka ning, I dinhmun ka tih awmzia chu U Mamuana hi engnge I ngaih ve dan, I duh ve deuh tho tiraw?" a ti a, thutthleng ah ka thu a, ka kap kar a chhuatah a thut avangin hmai zangthal haw in min la en kher zui



"Ka duh leh duhloh pawh ka hrelo, a fel ve a" ka ti a, ka duh leh duhloh ka hrethiam lo tak tak, chubakah duhna hi chuti maia awlsam in a lo thleng thut thin pawn ka hrelo, mipa, mipa ang taka duh ka la neihloh vangte pawh a ni mai thei.



"Engpawh ni se mipa leh hmeichhe In kara In duh tawnna hi chu in biak zin atang te, in hmun tam atang te hian a lo piang ve bawk thin a, Sangbawihi ngaihtuah chung zelin hepa hi chu kan chhuah tur a nilo, I in duh tir anga, nangpawhin I duh ang" a ti leh tawh a, "Ka mipa duhzawngte chu ka thlang ve bawk ang chu" ka tih chuan "I duhlo chuang hleinem" a lo ti then a, ka dang leh der mai.




Mipa ho ar zawng pawh an rawn haw ve chiah a, Jacoba chuan ngawi rengin bathroom a pan tlang nghal a, a lungawi loh hmel em avangin Spa chu ka signal zauh a, "Tinge?" ka tih chuan "Kan ar lakna nu khan ar inah a luh tir a, a man tir a, an ek khum nuai mai" a ti a, Engtheii nuih a ti za fal leh pek khawp mai.




Jacoba bula va phei ve pah chuan "Ar ek chu eng nge a an? Khawi lai lai ah te nge an lo chirhtheh che a?" a va ti vak vak a, Engtheii leh Jacoba te hi chu an in sawisa hneh ve thin hrim hrim.



"Talh sa in rawn lei mai dawn emaw ka tia" ka tih chuan "A to alawm, tihian a pum in lei law law ila naktuk zing ei khawp nen a ni mai" tiin Spa chuan a talhna tur chem leh chawhtawlh te a va la zung zung a, kan in ah hi chuan tumah hi an mikhual tawhlo, hmanraw hriam lam phei chu kei aiin mipa ho hian a awmna an hre daih zawk.



Pawn lamah mipa pathum in ar an buaipui a, Hlimpuii leh Bawihtei hi khawi lamah nge an len pawh ka hrelo, Engtheii nen eirawng kan bawl a, a bulah hi chuan ngaihzawng bak a sawi theih vakloh, a titi duhzawng chu mipa an nia, mahse lerh viau e tilo hian bialpa tak chu pakhat chiah a la nei, chu pawh kan ât lai khan a nia, naupan lai thil ni mah se sawi chhuah chang chuan a rilru nat thu a la sawi ve ziah tho.




"Footballer nupui nih hi ka chak em em ringawt a, kan khuaah ringawt hi chuan ka pasal tur awm ang ka hmu lo, inkhelh ngaina ve deuh ho lah hi an chhe ve hlawm sia, ka ning tlat, khawpui awm hunah tha deuh law law ka zawng ang" hmarcha then mawlh mawlh pah chuan a ti siam siam a, ka lo nuih leh ringawt thin.




A phone ri chu en vatin "Engnge?" a ti nghal thawr a, min rawn melh zawk hnu ah a kalsawn pui nghal daih bawk.



Rei vaklo ah a lo let leh mai a, "Engnge I kalsawn vel kher a?" ka tih chuan ka alu vel lai leh chem ken lai te chu min dah sak sawk sawk a, "Va in tifai hmasa rawh, rawng chu ka lo bawl mai ang" a ti deuh tlat a, a chhan ka zawh lah chuan "A tlai tak tak hmaa inbual a tha zawk" tih zawng a sawi a, nichina lo call Tu kha ka hre chak tulh tulh mai.




Inbual tho tho a la ngaih dawn avangin min nawr nasa bawk nen ka inbual San a, ka zawh hnu ah pawh Hlimpuii te chu an lo la haw lo.



"Lalhlimpuii hian khawi lamah em em nge maw a lenpui le" ka tih chuan "Va inchei ve deuh rawh" min lo ti daih a, "Nichina lo call Tu che kha tunge Muanengthei" ka tih chuan meng kual ralhin "Tumah?" a ti sap ringawt a, ka tawng leh hmain a mah bawk chuan "Va inthlak vat vat mai teh" tiin pindan ah min nawr lut nawk nawk a, a awmdan hi ka hrethiam thlawtlo.





Ka inthlak lai chuan Bawihtei te thawm ka hria a, Engtheii'n 'U Mamuan' a ti ri ka hriat rual chuan ka sam khuih lai chawl dat in ka ngawi vung vung a, a aw ka hre leh chiah phei chu ka ding khawng awt mai.




Hei vang hi a ni maw Lalmuankimi'n inchei tura min lo tih ve chhen, engnge maw an hriat hlawm ni, ka duh ai chuan min hman hmawh pui mah mah.




Pindan atanga ka chhuah chuan U Mamuana leh Bawihtei pawh an lo in pawm leh tawh a, Engtheii ka va melh hrak chu hrelo ang maiin Spa nen chuan sa an siam mawlh mawlh a,


"I inbual ve chauh a ni maw?" ti sup Tu chu en vatin "Ahh Aw,, bual ve chauh" ka ti bah niai mai, Hlimpuii chuan boruak thlak tum zet hian "U Mamuana nen hian kan in tawk a, amahin a awm tho sia ka lo sawm ve anih hi" a lo ti vat a, "A pawilo ang chu maw?" keimah min en chung chuan a lo ti ve nghal zat bawk.




"Pawilo e, mahni A ei tlawng ai te chuan nuam pawh i ti ve zawk ang" ka ti a, Bawihtei'n chhuah a ngen tlat avangin pawn lamah an in kai chhuak leh nghal a.




"In mawl ami? Tinge in sawm ve ringawt a?" ka tih chuan choka lam atang Engtheii'n "In inhmuh tam theih dan tur kan hisap alawm, hauh tur hrim hrim i duh chuan Hlimpuii kha hau rawh amah kha ania min lo call Tu" a rawn ti zat zat a, Hlimpuii ka en chuan za lo deuh hian a lo nui thaw ringawt a, khua a van varlo hlawm tak.




Mipa ho chu an inkawm thei mai zel a, U Mamuana pawh upa fal deuh mah se Spa te nen an inkawm thei khawp mai.



Chaw ei dawhkan kan kil thap tawh hnu ah Engtheii chuan "Tunge tawngtai ang?" a ti a, Hlimpuii'n "A upa ber hi" tih pahin U Mamuana chu a melh zawk a, mit ka lo chhing sawk ringawt. Ka thiante hian zah an hre miahlo tih chu ka hria a, mahse an zahloh vang ngawt hian midangte zaklo tur ah an ngai ve ringawt thin hi chu ka dem.




"Nuamlo a ti palh anga sin, khawi keimah ka lo tawngtai mai ang" ka tih chuan "A pawi lo" A lo ti sup a, mak ti deuha ka va en lai chuan nui suk hian A thutna atang a tho a, "Kan tawngtai ange" a Ti a, ka inrin ve hma in a chham zui nghal mawlh mawlh bawk.




A tawngtai zawh chuan ka hau hian kan en thap hlawm a, Engtheii chuan "Pastor I ni em?" A ti leh leh tawh a, Spa te'n lo khap vat mah se U Mamuana chuan nui chung hian "Commerce student ka nia, lehkha ka zir sang vak hleinem, Bd ka zir a, mahse hei Pathianin ka hna tur a tihah ka rawn thawk leh daih anih hi" a ti a, Puia chuan "I la upa hmel vak bik silo a, engtinnge I tih bik?" a lo ti vat.




"School ka lut hma a, engtin vak tilo e" tih zawngin a chhang a,zawh zui vak tul ka tih loh laiin Engtheii bawk chuan "I thil zir leh tuna i hna thawh lai chu a in mil vaklo hle mai, mahse ni e, Pathian remruat zawkte pawh a ni ang, nupui I la neilo tiraw" a rawn ti leh a, ka bul chiahah a thu bawk nen dawhkan hnuai atanga a ke ah ka va tlawh sawk a, min la en duh miahlo zui.




"Min va ngai chal awm ve a Engthei" pakhat chuan a lo ti ve khauh a, "Engthei min ti ve ringawt, engpawh nise Tunlaiah chuan naupang te te in an innei sup sup hlawm tawh sia ka ti mai mai, I la neih phei chu ka ring chuang miahlo" a ti zat zat a,
"Bialnu pawh I neilo em ni?"
Hlimpuii thil lo sawi leh phei chu tul lo ka ti takzet tawh, Puia chuan thutak deuh hian "Chutiangin mimal chanchin an in zawt vak vak ngailo, ei mai mai teu Sangbawihi tlei lai hian" a rawn ti ta hlauh zawk a, U Mamuana pawhin engmah a sawi zawm biklo. Thingtlanga awm ve mai kan ni bawk nen mawl min ti hlawm viau mai thei a ni.




Tun ang kumah, a ni ang tlangval pangai tak phei chuan ngaihzawngte pawh a nei ve ang chu, ka thiante hi duh ai chuan an tlang mah mah, min ngaihtuah tih ka hria a, kei mah chauh nilo in ka fanu hi an ngaihtuah takzet tih ka hria, mahse an ti lutuk ve thin bawk a ni.



Zanriah ei kham ah ka pi te pawh an lo haw ve a, kan thianho zinga U Mamuana lo awm ve chu mak an tih hmel ang reng khawp mai, mahse pangai takin an lo bia a, naupangchhia kan ni tawhlo bawk a, ka pi te pawhin min hrethiam khawp mai.




Ka pi bulah Bawihtei a mu a, keini thianho chu sitting room ah pher pahin kan thu bial leh laih tawh, dar 8 a pel thui tawh a, U Mamuana pawh a la awm ve reng.





**


ZAWMNA


Eng eng emaw sawiin kan titi nak nak reng a, Engtheii thusawi kan ngaithla a ni mah zawk.



"Qruel Temtation in hmuh duh chuan kan school ah lo kal tawp ru" a ti a, a mahin a nui zui duai a, "Keimah hi misualnu ka nia maw, awi kan class ho rapthlak zia chu a" tih pahin Hlimpuii nen chuan an in en a, an nui leh thin chu tuman kan hriatthiam pui ve bawk silo, mipa ho takngial pawhin an thusawi awmzia chu an hrelo.




Dar 9 rik dawnah Puia'n haw a rawt a, "Zingah kan lo ei leh dawn ania, I pi lo hrilh rawh, nangpawh lo ei phei leh daih la" tiin Spa chuan U Mamuana chu a sawm ve leh a, "Zingah em em chuan ei phei tawhlo e, dam chuan zing walk pahin thingpui sen ka lo in kawi dawn nia, Sangbawihi'n a kaitho leh em ang che chu maw" tih pahin keimah zawk min rawn en a, "Kai tho leh em em a, in ngei ngei rawh" Engtheii'n a lo ti leh thawt thawt tawh, in be tam turin min ti a, min biak ve changin amah pui hian min lo tawng khalh leh daih zel bawk si.



"Nia I lo inkawi thin dawn nia, thingpui te chu kan neih ve zawng alawm" ka ti mawi ve a, an haw tur chu kawtzawl thleng ka thlah liam hnuah ka luhsan ta hlawm.



Ka intihfel zawh hnuah Bawihtei chu kan pindan lamah ka sawn thla a, a mut dawn khan U Mamuana nen an in chhaih nasa bawk nen a chau ve deuh aniang a mu tui khawp mai.



*Min ngaihthah thei lutuk hi a mak ngawt mai*
U Remruata message chu ka en vung vung a, vawiin ah ringawt pawh message min lo thawn hnem tawh lutuk ringawt, phone khawihna hun ka neihloh avangin engmah ka reply lo va, a lungawi vaklo ani mai thei.



*Nia ka buai lutuk a* ka tih chuan a seen nghal vat a, *Branch dangah min post lai lawk a, naktuk ah kal nghal ka ngai dawn* a rawn tih chuan an post na branch te chu ka zawt mawi ve a, kan khua nen chuan a in hlat vang vang dawn khawp mai.



*Kan dam anih chuan kan la in hmu leh em ang chu, tha tak leh dam takin lo awm la, ka lo biak reng hman loh che pawn ka rinawm dawn tih lo hre tawp rawh* a rawn tih chuan reply mai lovin ka en ren rawn phawt a, amah bawk chuan
*Ngai kawi lo la, ka rilru I hriat tawh kha, Sangbawihi nen dam takin lo awm ula, thil tha deuh ka lo hawn ang che u* a rawn ti leh a, ka nui ta ringawt.




Zingkarah Bawihtei'n min ti harh leh tawh a, ka thawh chhuah pui rualin U Mamuana ka rilru ah a lo lang nghal zat bawk.




Tapchhaka mei ka nun hnu ah Bawihtei hruai in pawn lamah ka chhuahpui a, fur lai mah ni se zing lam boruak hi chu a nuam thei phian a, exer la duh tan pawh ruah hi chuan a ti buai vaklo ang.



Kawtzawl ah chuan kan in kai kal dat dat reng a, ni pawh a chhuak tawh, U Mamuana chu a lo lang tawh ta lo emaw ka tih hnuah kawngpui ah a rawn tlan phei a, Bawihtei pawhin a hre tawh khawp mai.



Kan bul a rawn thlen rualin zo deuh hian ka fanu chu a pawm kang nghal lawp a, "Anu nen hian min lo nghah na a rei tawh em?" a tih chuan "Umm" a ti ve reuh a, min rawn en a a nuih suk takah chuan keipawh ka nui ve ta ringawt.




"Lo lut la, thingpui a awm" ka tih chuan min hnial buai lovin kan pathum chuan inchhung lamah kan inzui lut a, thingpui ka siam lai chuan sitting room lamah an lo in chhaih te leh nasa tawh mai.




Thingpui no hnih chawia ka let leh chuan chhuatah an lo thu sawp niai tih ka hre chiah, "Chhuat hi a fai vaklo asin, I bal ang" ka tih chuan "Ka bal sa alawm" a lo ti then a, Bawihtei hlim lutuk chu a rak ring bawk nen a in thlahrung ve deuh aniang, "I pi te an la mu sia, veranda ah kan thu chhuak daih dawn em ni? Kan nula hi a rak ring ang reng bawk si" a tih chuan ka hnial duh ta biklo a, veranda ah kan in chawi chhuak leh rih.




Ka sawi tur hrelo chuan "U Remruata hmun dangah an post em ni?" ka ti a, "Umm,, a la nghet chiahlo bawk nen tiang hi chu mahni branch nilo ah an post deuh phawt thin a, kum hnih khat hnuah chuan a lo awm leh thei mai ang" tiin tha deuhin min chhang a, "Anih leh nang, I nghet em?" ka tih chuan "Eng kawngah pawh" a lo ti a, min be bo lutuk chu ka hmelah a lang chhuak aniang, ka chalah na vaklo in a rawn kuk keuh a,
"Ka nghet aw keichu" nuihzat hmel ang reng tak hian a ti leh sup a, ka bu nghat ringawt.



Kan ngawih deuh vang vang hnu chuan "E nizan kha" ka ti deuh hluai a, ka sawi leh tur nghak ni awm taka a mithmul a san zeuh hnu ah "Engnge nizan?" a ti nawn leh a.



"Ka thiante chu an lan ang tawp kha an ni mai, I hriat angin thingtlang ah kan awm a, kan nundan leh rilru put hmang te pawh a la mawlmang I ti mai thei, zawhna maksak deuh deuh an zawh che pawn hriatthiam tum hram hram rawh aw, an rilru chu a chhe miahlo ania, an fel lutuk" ka ti duah a, a hming tala ka sawi fiah loh chuan a lo ngai khawlo vek ang tih ka hlau.




"Ka hria alawm" a ti ringawt a, "Engmaw I hriat?" ka ti let hu ringawt.


"An suallo tih" tih zawngin min chhang leh a,sawi tur dang ka ngaihtuah leh mek laiin amah bawk chuan "Thingtlang mi kan nia tihvel kha chhuanlamah hmang tawh suh, thingtlang mi pawh ni ula mihring tho in ni, kan hlutna a in ang vek a, kan hlutdan kawng a hrang deuh e tih a ni mai" a ti duah a, a sawi tum tak pawh ka hrethiam lo.



"Anih leh Bd ka zir kha I tia, engtinnge tuna I hna chelh lai hi I thawh daih theih a?" ka ti leh a, keipawh hi ka dilchhut sawt riau mai.




"Ka zir chhuak hmanlo chiah chiah, Bd ka zir pui tho ka thianpa pa hi officer lian ve ang reng tak ania, amah kha kohhran upa a ni bawk a, synod hruaitu hlun tak a ni bawk, ka thiamna in a tlin dawn nia a rin vangin hemi hna hi min sawipui a, Pathian ruat ani aniang hei ka thawk tluang emai" a ti a, "Kan khua hi I post hmasa ber em ni?" ka tih chuan a bu deuh nghut.



Ni sa in kan awmna a rawn chhun eng sur tawh a, ka pi leh pute pawh an lo tho chhuak tawh, "Ka va haw phei phawt ange, I thiante pawh an lo thleng phei leh dawn tawh ang" a tih chuan hrechhuak zawkin "Nangpawh eirawng bawl chawp leh ai te chuan ei ve nghal law law la" tiin ka sawm nawn leh a, min hnial deuh tak tlat avangin a inthlahrung ve aniang, ka sawm lui duh ta biklo.




Kan in mangtha hnuah Bawihtei nen inchhungah kan lut leh a, ka pi'n min lo zawt chik leh pek khawp mai.



"He tlangval hi a rawn tlangnel sawt riau mai, kawm tur a neih vak loh chuan lo kawm ve thin rawh u" ati ve ngei a, "Bawihtei pawn a ngaina lutuk" ka tih chuan min en vang vang hnu ah "Zovi fapa hi a lo va leng ngai ta lo ve" A ti leh tawh a.



"Pi.. " ka ti vak a, ka sawi zawm peihloh tehreng nen ka pi bawk chuan "Ngah nge maw I duh loh viau le, sipai ania, tunah phei chuan a hlawh tam viau tawh asin, a duh phawt che chuan neih tlak ania" ati leh a, "Hlawh tam mah se min lo duh tak tak lo thei a, bakah ka duhzawng pawh a nilo, Bawihtei pa tur atan chuan a ni aia tha deuh hi ka duh" ka ti a, tiang lamah hian ka hnial ngai em em bawk silo nen, ani pawhin engtinmah a sawi zawm chuanglo.


Ka thiante rawn thlen phei hnuah chaw kan ei zui a, tumah an awm reilo, an haw leh vat hlawm a.

Ka pi leh Bawihtei an in awm a, kawmchar lamah vawkchaw chhum vil pahin buh ka thap a, ka phone rawn ri dat dat chu ban vatin ka putea hming ka hming rual chuan ka thu khawng nghal awt a, ka chhang ang nge chhang lo ang tih ka ngaihtuah laiin call chu a tawp zui ta daih bawk.




Ka thaw chhuak vak a, rei lo te ah ka piin min rawn ko a, amah zawk chu rawn chhuakin "I putea'n biak lawk che a duh a, ngah nge phone I lak theihloh" a rawn ti hlak hlak a, phur lo deuhin ka pi phone chu ka ban zal zal.




"Hello"
Ka ti sap a, "Naktukah ka lo chho dawn a, mamawh I nei em?" a rawn ti nghal dut a, "Neilo" ka ti tawi tak chu a ngaihdan a ni vaklo aniang, "I fanu khan mamawh a neih chuan sawi rawh, ka pe ang" a ti chang deuh bawl a, "A mamawh ber chu Pa a ni mai, chutiang chu I pe thei dawn anih loh chuan kei leh ka fanu hi min biak chhen tum lo mai rawh" ka ti a, inchhung lama ka pi ten ka tawng ri an hriat ka hlauh avangin ka tawng zawi viau thung.




"Luhlul chhuah reng na hun a nilo e, I pasal tur chu ka zawng khawp ang" tiin amah zawk chuan a off zui nghal a, ka awm tawt lutuk chu dawnin ka ka in ka thaw chhuak vak a, ka mittui rawn hnai ringawt chu duhlo in chunglam melh chung chuan ka khap let sak sak a.



Pasal min zawnpui tur chuan ka duh kherlo, Bawihtei pa chungchang ka sawi chhuah chhan chu amah ka huat em vang chauh a ni, a ni khan ka fanu pa tur chu min thlan sak lul lo ang.



"Engnge i putea chuan a lo sawi a" inchhunga ka va luh rual chuan a lo ti vat a, "Engteh vak mah, naktukah lo chhoh a tum a, mamawh kan neih leh neihloh a ni mai" ka ti a, "I neih chuan sawi hreh lo la, I putea bak ngaihsak Tu che pawh I neih tawhloh hi, I ni te lam lah hian an hre tawhlo che nge mawni, thawm reng reng an rawn nei duh tawhlo mai" a ti zui hlak hlak a, "Ka nitei te chuan min la rawn be ve zeuh zeuh alawm" ka tih chuan lung awi loh hmel deuh hian a hawi deuh nghalh nghalh a, engmah phei chu a sawi zawmlo.




Zanah U Mamuana hnen atangin message ka dawng ve leh nulh a, message ah hi chuan min rawn be khat viau asin,
*Engtinnge Nautei nen kan birthday chu kan lawm ang* tih hi a rawn thawn a, *Ka hrelo, engtinnge niang?* tiin amah chu ka zawt let ta hlauh.



Karleh lehpek daih la ni mah se a er ve ngar ngar khawp mai, eng emaw chang hian asawi chhuak ve leh nulh thin.



A kum khat birthday kha ka pi leh puten min ngaihhlut pui a, ruai puitham vaklo in kan siam a, chhungkhat hnaivai te leh ka thiante nen kan ei ho ve a,a bak chu beisei pawh ka beiseilo hrim hrim.





Chhungkaw awmthei tak kan nih loh avangin thil tul leh tangkai lo ah chuan sum hman mai mai a uiawm a, keini ang tan phei chuan birthday tih vela in senso vak kha a remlo hrim hrim.



*Inrinni a ni tho a, hun inlo insiam theih chuan hmun nuam deuhah kan kal dawn nia* a ti a, mak deuhin ka phur nghal hawrh mai!!


Ka tleirawl tirh pawh khan huau huau ka lawmlo a, mihring introvert tak ka ni tawp mai, ka lengchhuak peih ngailo.




*Nia,,, a tha ngawt ang* tiin ka chhang let a, thildang engmah a sawi zui tawhlo.


Zingkarah ka pi in min rawn kai tho a, Bawihtei harh loh tuk berah, ka haw reuh tak tak a ni, tum burin ka tho chhuak a, "I pa Hlima ten vawk an talh a, va chang ve rawh" a ti a, dar 6 a ri vel chiah..



"A la hma em hi" ka tih chuan pawisa leh bag lian vaklo min pek pahin "Mi ho hi an chuhhelh ania, I va thlen phei meuh chuan an lo tam leh tawh viau ang, I putea lo chhoh a tum bawk a kg 2 va lei rawh, kan rep then dawn Nia" a ti zung zung a, hmai pawh ka phih hmanlo.




Hmanhmawh vaklo in ka kal a, veng lehlam daih a ni bawk nen a ninawm ve thin ania aw...


"Nuthlawi hmeltha Mertei chu I va tho hma ve" kawngsira zu rui pahnih te chuan min lo chhaih leh tawh a, hemi te pahnih hi chu ka ning ngawt mai,kalsan mai ka tum chu pakhat zawk thil rawn sawi leh vang chuan ka ding leh chiang khawp mai.



"Nuthlawi hmeltha mah ni la, I sâw pawmlai pa tal te hi chu sawi ve la mawle" a lo ti a, ka nghing deuh lawih mai!!



Ka din dan ngaia ding reng chung chuan ka kut ka hum ruh ngawt ngawt a, "Sawi dikloh ka nei em ni a Hmelthanu, huhhh I fanu te sawn nakinah a pa a la zawt che anga, I zep reng thei chuanglo ang" min han tih khum leh sak a, ka na a ni!!



"I tawngkam hman kha fimkhur ang che"
Chu aw ri vang chuan ka mitchhing ngawt ngawt tawh chu ka mengchhuak leh kawk a,ka dara min rawn kuah rualin amah chu ka en chiang vat bawk.




Min thlamuan tum ni awmtak hian a mitmeng dam thlup chuan min lo en ve ran a, a nui suk chu ngaihtha taka awm tura min tihna ang mai a ni.




"Tunge I nih a nang pa hi? Ka la hmu ngailo che" ti chhur chhurin kan awmnaah chuan an lo kal hnai zel a, "Tunge ka nih in hriat kher a ngailo, hmeichhia khatianga chhaih nawmnah tur khan eng zahawmna mah in nei bik lo ve, midang in hmuhsit hma in eng dingmunah nge in din mek tih ngaihtuah hmasa thin tawh rawh u" a ti a, a vin hauhlo, mahse a thilsawi te chu chiang tak leh nghet tak vekin a sawi thung!




"Ve lutuk a" tiin zu rui pahnih te chu an in kuah pai chawn chawn a, an kal liam hnu thleng kan thlir zui.



"U Mamuan" ka ti hap a, tun lawka theng vang khan za lo deuh in ka nui ro hawlh ringawt, sawi tur pawh ka hre lo!







End of chapter-5
WhatsApp group lamah hian info mumal kan in pe thin aw....
https://chat.whatsapp.com/J9Mq1ulA3Jx9klwcpJ4Ixd


Show post links
Top

[Ngaia]

MANAGER MAMUANA
By Ziki_nu


Chapter-6


"Khawiah nge Sangbawihi tel lo in kal I tum?" a tih chuan ka kawrlum ipte chhunga pawisa chu hum khawr vak pahin "Sa ka chang dawn" ka ti a, ka aw ri te chu a sak deuh tung mai thei a ni.





Thaw chhuak hawkin ka ipte zen lohna lam banrekah a rawn man a, zingkar ni a chhuak tawh bawk nen kan piah deuha thing hlim hnuaiah chuan min kai phei dat dat a, ka zui mawl ve tawp.




"Zing ni sa hi chu thlasik ah lo chuan a tha lo" a ti sup a, min en chiang lutuk chu hmun dang hawi sawn pahin "Ka hmanhmawh deuh asin" ka ti sap a, nichin lawka thil thleng vang khan lawmthu ka sawi dawn nge engmah ka sawi zawm dawnlo tih pawh ka hrethiam lo.




"I rilru a na em?" a ti deuh khawl ringawt chu ka en leh ta nge nge a, ka chhan let hma hauhin amah bawk chuan "Khatiang ho vang mai mai khan I rilru ti na suh ang che, diktak chuan dawt engmah an sawi lo, mahse chumi vang chuan I rilru tih nat ka tum tihna a nilo ania" a ti hmasa te te a, a dik alawm, khang zurui pahnih te khan thil nihna diktak vek a ni an sawi ni.



"" Keichuan Sangbawihi pa chanchin hi dilchhut pui viau ka tum hranlo, a pangai hian awm la, thil thleng tawh vangin hrehawm tuar duh hauh suh, hmalam pan tang tang ang che" tih pahin ka darah a beng zui thak thak a, ngainat awm deuhin min nui pah vur vur bawk.



"Awle" ka ti a, sawi tur a vang tawh bawk nen "Mahse tinge ka chungah hian I that em em a?" ka ti deuh tawp a, nui chhuak hawkin "I la hre mai ang" a ti duh lek a, a ngeiawm thiam thei reuh tak tak.



"Pu Hlima te ta ami sa chu I lei dawn" a tih tak ah chuan ka lo bu nghat a, "Lo kal rawh phei rual ang, tukin chu thawh ka hai deuh a, tlan pawh ka tlan thui hmanlo" a ti a, thingtlangah chuan khawpuite angin gym la awm ve heklo, zing karah kawngpui reh laiah te an tlan mai zel a, dumbell leh a kaihhnawih hmanraw tha vak awm ve lo mah se awhna em em pawh kan neiin ka hre chuanglo.




"Zan ah lo len a rem em?" a tih chuan "Rem tho a, mahse ka... " ka ti a, ka putea hming lam rik ringawt pawh hi ka hreh hluah hluah a ni tawp.



Ka ngawi rei deuh nge "Tinge?" a lo ti vat a, "Ka putea lo zin a tum a" ka ti sap a, "A rem vakloh chuan sawi hreh suh" a tih chuan "A rem" ka ti leh hluai tho sia, lo leng se ka ti em em ringawt hi a chhan ka hrethiam tawh biklo.



"Umm ka lo leng ang" a tih hnuah kan in mangtha a, sa pawh chu ka pi sawi ang tak tak in an lo chang thup hlawm mai.



Rei angreng tak ka nghah hnuah ka hun a thleng ve ta hram a, nu leh pa ho karah chuan sa duh lai han thlan zat zat a rem ve bawk silo, duh vakloh pawh duh anga lan a ngai thin a, a hrehawm duh ang reng thin khawp mai.



"I va rei ve mawle" in ka thlen rualin ka pi'n a lo ti leh nghal zat tawh a, "Ka nghak rei em alawm, pa Sanga'n a lo sat ve a, a vun min pe tel teuh mai, hei hi ania ka kal peih loh thin nachhan, nu leh pa ho bulah chuan sa duh lai thlan chiam chiam a mawi ve bawk silo" ka ti ve hlak hlak a, ka thinrim ve tehreng nen "A vun te chu kan rep dawn nia" a lo ti then a, hei hi nia ka pi danglamna, mi hi a han hau vak vak thin tak naa, midang thatloh na kan sawi deuh chuan thildang a sawi a, a rel duh vak ngailo reng reng.




"Vawkchaw zawngin ka chhuak anga, I pu chu a hritlang emai lo kal ve lo mai rawh se, in vel lo ti fai la I putea lo thlen a tum kha" atih chuan ka zuai leh nghal ruih mai, tunah chuan ka putea hmel hmuh tluka hreh ka nei rih kherlo ang.



Nilengin ka buai a, Bawihtei a tlei duhlo bawk nen hma a sawtlo khawp mai, tunlai chu a zia a thlak riau a, ho deuha tah vak a ching thar lutuk hi a buaithlak ber.


Chawhnu lam dar hnih velah ka putea chu a rawn thleng a, motor an neih avangin sumo velah an chuang ve vak ngailo. Amah chauha a lo chhoh chhan hi rindan pawh ka nei thiamlo e, a lo zin khat hrim2 a, a nupui fanaute tel lo phei chuan a lo kal mang ngailo.





Ka pi a lo la haw loh avangin keimah vekin ka lo dawnsawn a ngai a, a hrehawm duh ang reng khawp mai.




Ka pu chuan a inbualna tui lumsak tur in min ti a, Bawihtei tana thil a lo lei sak te chu tul pawh ka ti lo, amah hi ka haw so bawrh bawrh a, ka hmu peih thlawtlo a ni.




Ka pi lo haw hnu chuan "A tlei duhlo sia, ka lenchhuah pui lawk dawn" tiin Bawihtei chu ka chhuahpui a, kalna tur em em pawh ka hrelo, ka tawt up up a, kan ina let leh chu ka putea vangin ka huphurh ngawih ngawih tawh.




Insawi thawlna tur ka duh a, ka thiante in pan mai tur ka nih laiin ka rilru ah U Mamuana a lo lang hmasa ber a,ka call ta ringawt bawk.



"Hello" A rawn ti thum dut a, "Ka.. " Ka ti hluai a, sawi ber tur pawh ka hre chuanglo...
"Engnge ni ta?" a rawn ti leh a, "Englo,,, I buai em?" ka tih chuan "Buai lo e, kan bang deuh chiah" a lo ti sup a, "Bawihtei ka chhuah pui mai mai a, hmuh lawk che ka duh deuh" Ka ti a, ka zam ve em em ringawt chu ka hre thiam tawh biklo.




"Khawiah nge kan in hmuh ang, ka awmnaah in lo kal mai dawn em ni? Lo hruai in ngai em?" a rawn ti zung zung a, ka nui ta ringawt.



"Kan lo thleng tep, lo kal duh lo law law mai rawh" ka tih chuan a lo pawm ve mai a, kan inbiakna kan tih tawp rualin Bawihtei chuan "Apa" a rawn ti sap a, ka beng a verh nghal zar mai.




"Bawihte, tunah khan engtinmaw i tih?" tiin ka zawt nawn leh a, "Apa" a ti nawn leh zat bawk, Pa tha tak hi chu a phu ve asin mawle.



U Mamuana chu pawnah a lo ding reng tawh a, min hmuh rual chuan ngainat awm deuh hian a lo nui leh suk bawk.




Bawihtei chuan a pan hnai vat a, zo deuhin a lo pawm kang zui lawp.

"Lo lut rawh u, khi khua a dur leh khup khup tawh mai" tih pahin step ah chuan a chhoh pui zui hmawk hmawk a, a inchhung chu ka vawi khat luhna a ni.



A zaulo naa, engkim mai chu a felfai thlup vek a, furniture pawh a in rem khat mawi tawk khawp mai.


"Engnge min hmuh I duh chhan chu? Thil thleng a awm em ni?" ti supin Bawihtei la pawm reng chung chuan min en ran a, "Aih awm chuanglo" ka tih chuan rinhlelh hmel fe hian min en a, "Ka ti tak tak ania, kalna tur ka hrelo lutuk a, ka lo be mai mai che" Ka ti leh a, za lo deuha ka nui chu "I nuih pawh a zat tak tak loh kha" min lo ti a, ka hmui ka chip nghal riai riai.


"Tak takah, ka putea a lo zin a, ina awm ka peih rihlo" ka ti sap a, "I Putea chu tinge I ngainat loh?" tia min zawh chuan chhan ngaihna ka hrelo, Bawihtei chu ka en a, min zawt Tu pa chu ka en leh thin a, a harsa a ni.



"Mary?"


"Englo,, ka ngai na lo em em pawh a nilo, chhungkaw thilah ania" ka tih chuan a bu deuh nghut a, "A cham rei angem?" a tih chuan ka hriat loh thu in ka chhang a, "Zanah lo len ka tum hrim hrim a, I thiante ho lah an exam lai ani bawk sia" a ti sup a, "Nia, an awmloh chuan kan reh ruih zel a" ka lo ti ve nghal zat.




Eng eng emaw sawiin kan ti ti ve reng a, ka awmdan chu ka sawifiah thiam chiahlo na a, a bulah hi chuan ka hlim a ni, ka thla a muang a, thu ho deuh pawh sawi se amah anih chuan ka nuih pui bawk bawk thei mai thin, hepa hi chu a danglam a ni!


Khawpui rawn ri dur vang chuan ka beng hupin ka rak that a, mit ka men leh rual in Bawihtei leh U Mamuana chuan phawk zet hian min lo en a, Bawihtei arawn tap zui hlawp hlawp bawk.



"A van zia lo tak, ka au vak kha a hlau aniang" tiin a kut atanga lak sak chu ka tum a, U Mamuana nghawngah chuan kuah bet tlatin ka pawm chu a duh ta hauhlo. A tap ring mai bawk sia.




"A zia lo e" tiin ka phi deuh chung tawh a, "Lo thu mai mai teh, a bang mai ang" tiin a thawh pui a, inchhungah chuan a tei kual pui vel a, zawi te te hian a thlem pah ve sup sup bawk.



Ruah a rawn baw zui nghal hawk bawk nen, dar zat a la hma ang aiin khua a thim khup a, current a on a, Bawihtei pawh rei vaklo ah a bang ve leh mai.




A tah tawhlo hnuah pawh chuan ka pawm a duh ta tlat lova, "Ka au vak vang khan min la hlau aniang, ka phu nasa lutuk a" ka ti sap chu nui hawk pah hian ka samah a tuai zauh a, "I fanu hian nang aiin min duh zawk dawn tlat" tiin intihtheih hmel fe hian min melh vel a, a darah ka beng pawp ringawt.



"A tlai tawh sia, ruah chu a van sur hunlo tak" ka ti a, ka inthlahrung tawh bawk si, "Chaw ei ve mai rawh u" a tih chuan "Aih" ka ti vak a, "A chiloh, a han mai ang" ka ti leh hnuhnawh chu ngeiawm deuh hian min melh kher a, "Chaw lo ei ve daih rawh u aw Sangbawih" tiin ka fanu zawk chu a zawt leh ta daih.



"Ngeiawm viau lo teh aw, a zahthlak emai" ka tih pawhin "In inah pawh ka lo ei tawh kha" a ti deuh tlat a, ka pi phone turin min ti chhen bawk.




Ruah a sur tam bawk nen muangchangin ka phone chu ka phawrh chhuak a, "I be hreh em? Keiman ka lo be dawn em ni?" a tih chuan "Be hreh lo ve" ka ti a, heti taka a zaklo hi mak ka ti, ka sawi awmzia chu a zaktheilo ka tihna nilo in, a huaisen, diktak chuan a Pa ka ti a ni.




Ka pi in phone a lak rual chuan "Khawiah nge in len daih a?" a rawn ti nghal chiam a, speaker ah ka dah ang tih ka hlau lutuk.



"Hei U Mamuana in ah kan leng a, ruah a sur nasa sia, chaw ei mai rawh u a tia" zawi te hian ka ti sap a, "I putea lo haw tlai berah ngahnge in len chhuah reng reng? Veng a in hlat si, tih ngaihna a awm chuang hleinem, chaw ei ula, ruah a han velah lo haw ang che u" a ti a, a ân zui hlak hlak hnuah a off ta daih bawk.




"A lo hau che em?"
Bawihtei pawm ran chung chuan min en reng a, "Hau em em chuanglo e" ka ti hman chauh tihah ka phone bawk a rawn ri leh a, ka pi hming ka hmuh rual chuan ka ngaih a thalo nghal hle ringawt.



"Hei I putea'n motor in ka va hruai ange a tia" a rawn tih chuan U Mamuana zawk ka melh vak a, ka awmdan diklo chu a lo hrethiam aniang phone chu min laksak a, ka pi hnenah chuan "Ruah a la tam sia, chaw ei ve mai se a pawi hleinem, zan lamah keiman ka rawn thlah phei anga" Ati dam thlup a, a hnuah chuan "awle" tih vel bakin a chhang tawhlo.




Phone min rawn pek leh pah chuan "Ngaihtha in awm rawh, chaw ei kham lamah muangchangin ka thlah phei ang che u, motor ka kawl alawm" ati sup a, "I va khalh chhuak khat awm ve" ka tih chuan "I hmuh loh lamah hlir ka khalh thin" Alo ti then a, ka nui ta ringawt.



"Chaw pawh ka la chhum hleinem, mahnia awm chuan ngaihsam a awl lutuk a" ti supin a lu thaklo pui chu a hiat a, "A la tlai hleinem, tih tur sawi la, keiman ka lo ti ang" ka ti a, Bawihtei a malchung atang a chhuk duh tlat bawk silo, tunlai chu a sual thiam thei lutuk a,, a manganthlak.




Choka lamah kan inzui phei a, Bawihtei pawm reng chung chuan cooker leh buhfai awmna te a lo kawk kual zel a, a hlimawm phian mai.



"Chawhmeh pawh ka neilo, zingah chaw ka ei hmanlo a" ti supin fridge chu a hawng a, "Arsa hi kang tawp mai ang" tih pahin a rawn la chhuak a, kan eirawng bawl pawh kan thawm a tha khawp mai, ka hlim takzet a ni.


Dar 7 velah chaw kan ei hman ve hram a, ka fanu pawhin min duh ve leh tawh e, kan pathum chuan chaw ei dawhkan kan kil ve thap a, vawi khat mah ka la tawn loh chhungkaw din ve ang maiah ka in ngai hial!



"Mary" a tih chuan "Umm" ka lo ti vat a, "Pasal neih hi I rilruk ve ngai reng reng em?" atih chuan ka chaw bar tur thulh meuhin amah chu ka en a, min lo en ve reng a, "Pathian in rem a tih chuan ka la nei ve leh ang chu" ka ti sap a, tawng pawh ka tawng ringlo.



"Umm neih ngei chu a tha alawm" a ti tawi tak a, engmah a sawi zawm takloh ah chuan "A nih leh nang, nupui neih I tum em?" ka ti a, nui sukin "Umm, ka tum ruh lutuk ringawt, a theih phei chuan fanu nei tawh neih ka duh" a ti a, phawk deuha ka en chu nuihzat hmel deuh hian min lo en ve a, "I awver emai" Ka ti ta ringawt, ka biang a sa hat hat a, a fiamthu mai mai pawh ka lo laihpui ringawt chu ka duhlo tak tak.




Zanriah kan ei kham chuan ruah pawh a han zui ve mai a, dar 8 a pel thui tawh, ka piin min lo phone chhen tawh a, ka putea'n min lo hruai ka hlau lutuk chu U Mamuana pawh ka tur chhen tawh mai.



"Motor ka lo la chhuak ang, hetah hian lo awm rawh u" tiin inhnuai lama a kal chu kawt ah kan lo nghak a, Bawihtei pawh vawt a ti deuh aniang a khur bap bap mai.



"Ehe Mary te nufa chu, tun ang hun ah engnge hetah in tih a?" ti tu chu ka melh vat a, U Tlanpuia ka hmu thut chu ka phu zawk mai.



"Nia chaw kan ei a" ka ti sap a, Spa te nena an lo kal zan bak kha kan la in hmu leh ta miah lo, kan in thlah dan a fuh vaklo bawk nen hmuh nawn leh ka chak viaulo asin mawle..


"Helai hnaiah chhungte in neih awm ka hre silo a" a tih chuan "Min lo va zir chiang nasa awm ve, kan lo nei reng mai thei asin" ka ti ve ngat a, midang chungchang lo ngaihven hawrh thin te hi ka ngaina theilo, chhungkaw thilah ngat phei chuan.




Inhnuai garage lam atang car a rawn tlan chhuah rual chuan kawng sir lamah kan lo ding phei ve a, car atanga rawn chhuakin U Mamuana chuan "Lo kal rawh u le" a ti sup a, keimahni min be mah se U Tlanpuia ngawt chu a en thung.




Cara kan thut luh hnuah kan veng lam panin kan tlan chhuak nghal a, "Kan sipai pa chu kal leh tawh se a va tha ve" a ti deuh nghut a, "Engtinnge in inhriat a?" ka tih chuan "Ani chuan min hre ve vaklo, keichuan nangmah atangin ka hria" a lo ti a, "Hmanni a lo len khan ka thiante nen an inhmu thiam vaklo a, biak leh hmuh chakna pawh ka neilo" ka ti a, a laka ka insawifiah zung zung chhan hi ka hre biklo.



Chutah nuih zat hmel deuha min rawn en in "Keichu nangmah aiin i thiante ka tlawn nasa zawk dawn, in in tan hlawm si, I thiante tih lungawi loh ka hlau" a ti vel a, ka nui leh ta nge nge.

Kan in kawt kan thlen chuan kawngkapui a lo la in hawng huau a, ka va han haw peihlo tak e aw...

"A tlai tawh sia, ka lo lut lo mai ang" a tih chuan "Reilo te tal lo lut rawh" ka ti deuh tlat a, keimah chauha ka chhungte hmachhawn chu ka zuam rih thlawtlo.



Bawihtei a muhil tawh a, inchhung kan luh chuan thutthleng seiah ka putea a lo thu a, ka pi leh pute ka zawng nghal ruai mai.



"In va rei em em ve" a lo ti nghal hlur a, chhan pawh ka chhang peihlo, "Lo thu lawk la, Bawihtei ka mut zawhah thingpui kan in dawn nia" tia U Mamuana ka hrilh hnuah pindan lamah ka luh san a, ka va chhuah lehchuan ka putea bawkin "Hei tunge i thianpa hi?" a lo ti leh tawh a, theih se chuan amah runluih nan hrim hrim pawh 'ka bialpa' tih ka chak takzet.




"U Mamuana" ka ti sap a, tha te te a an in chibai hnuah a dan pangaiin ka putea chuan zawhna a zawt leh tan a, "U Mamuan, lo kal lawk teh" tiin choka ah ka lut tlang a, min lo zui ve mai dawn emaw ka tih laiin ka putea hnen ah chuan "Mary chu a fel khawp mai, chutiangin i ngaih anga khaw lo a nilo" a tih ri ka hria a, ka thaw chhuak vak ringawt.



"U Mamuan" tiin ka ko nawn leh a, a lo phei ve ta e, thingpui ka chhuanna bulah chuan a lo ding ve a, "Min mamawh em ni?" atih chuan "Ka putean i bulah engpawh sawi se awih suh ang che" ka lo ti nghat a, thaw chhuak suai suai in ka dar tawn tawnah a rawn dawm a, kan in hmachhawn ran mai.



"Ka ring che, chu chu hre tawp rawh, I nundan ka thlir reng a, midang thusawi vang mai maia ka ngaihdan che a danglam phah ring suh, I putea I huat em em chhanah hian chhan tha tak a awm ka ring a, I duhthlannaa min hrilh anih loh chuan zawh luih che pawh ka tumlo, hrehawm tilo la, ka pui zel ang che" a ti sup sup a, ka va han thlamuanpui ngawih ngawih tak!





Ni a liam ve bek bek a, ka putea pawh ni hnih bak a chamlo, Vli a damloh nasat avangin a tum aia hmaah a haw phah a, Vli chu ngaihtuah viau mah ila a haw hma chu kei tluka lawm an awm lovang.



Naktuk mai hi Bawihtei leh U Mamuana birthday a ni tawh a, ka pite chuan lawm pawh tul an ti vak tawhlo, keipawhin tihluih ka tum em em lo va, mah se U Mamuana'n 'kan lengchhuak dawn nia' a tih tlat avangin ka pite pawh ka dil lawk thlap tawh.




Engtheii'n "Kan telloa lawm in tum bik hi chu ka lawmlo thlawt, mahse in pahnih tan chance tha lutuk a ni bawk sia" a ti reng a, hmeichhe pahnih in min phur pui rualin mipa ho erawh chuan fimkhur tur in min chah mawlh mawlh reng a, Puia berin "U Mamuana chu mipa nghet tak lehfel tak a nih hmel a, mahse mi hi rin bur loh vek a him ania, fimkhur tluk a awmlo" a ti a, fimkhur chu ka tum ve khawp mai.



"Khawi hmunah nge hruai cheu a tum le, hmun nuam deuh a tia, kan khuaah ringawt hi chuan hmun nuam a vang e" Hlimpuii'n a ti vang vang a, "Hmanni ah min zawt alawm, hmun nuam ve deuh, reh bawk si a awm em a tia, eng eng emaw chu ka hrilh ve" Jacoba'n a lo ti ve niap niap bawk a, kei aiin ka thiante hi an phur hmel daih zawk.




An haw hnuah ka mu fel nghal a, naktuka ka hak tur pawh ka thiante nen kan thlang fel diam tawh.



Tiang lam hi ka lawmloh tehlul nen ka phur lutuk hi keipawhin mak ka in ti hial.


A ina chaw kan ei tlai khan chhungkua ang mai niin ka in ngai hman a, tunah kan pathum bawkin hun kan hmang ho leh dawn a ni a, min ngaihdan chu hre ve miahlo mah ila ka hlim em em tho.




Zing dar 5 rik hmain ka phone riin min ti harh a, U Mamuana hming ka hmuh rual chuan ka meng nghal kawk.


"Hello" ka ti a, thawh phan pawh ka neilo, "Vawiin kha cancel mai a ngai ang, thil pawimawh a awm avang in tunah Aizawl ka pan mek" a rawn ti a, ka lungphu a diklo nghal vek thei.


"Engthil nge a?" ka tih chuan "Nakinah ka lo be dawn che nia" tiin a off nghal a, ka bula tuideuha muhil ka fanu chu ka en a, ka lo suangtuah ve nasat tehreng nen, thil pawimawh vanga kal chu ni mahse ka rilru a na in ka hria!!





End of chapter-6
Typing mistake a tam maithei a, min ngaidam rawh u aw..
In zavaiin Krismas chibai ule


Show post links
Top