THE FIRST NIGHT WITH DUKE BY Bee Hlutei (Completed)

[Ngaia]

Ka lo ngaihdan chuan he thu "Thawnthu bu ah ka harh" tih hi thawnthu ah chauh a thlen ka ring ṭhin. Kei pawh chu ka harh ve tlat mai

"Miss Ripley thawh a hun e"

Eng a? Ka mumang a ni maw? Studio ah ka muhil khan ka hre sia

"Miss Ripley i thawh a ngai ania"

Ripley maw? Tunge chu chu?

"MISS!!!"

Ka harh chiang lutuk

"I ti ṭha e! Hmai i phih duh ang em?"

Ka mumang chu a tak a va ang ve,

A vawt hle mai, mumang ah pawh hian lum leh vawt a tak ang chiahin a hriat theih a ni maw?

"Miss? Vawiinah Miss Etoile piancham an lawm dawn a hmanhmawh la inpeih vat a ngai"

"Tu maw?"

Ngawi teh Etoile tih chu ka hre tawh chiang mai

"Baron fanu Etoile De Hailey, Vawiin a piancham ania"

A hming tawp pawh chu ka hriat tawh a va ang ve

"I sawi mi chu khawizu ang maia buang sam nei, a mit pawh tuipui ang maia pawl ruih, a hmui pawh thisen ang maia sen ruih..... Baron Hailey fanu tiraw?"

"Miss khawi aṭang nge chutiang ṭawngkam duhawm lutuk chu i hriat?"

Hmangaihna thawnthu aṭang mawle

"Aw, Miss Etoile sam buang, mit pawl piancham ania"

"Chumi awmzia chu....."

"Fahrah mal tak a ni a, vawi khat chu Baron nunna chu a hun takah a chhan sak a, tichuan fa atan a la ta a.... khami kha tiraw Miss Etoile chu?"

"Awi leh! Engtin nge i hriat vek theih a? Thawnthu sawi ang mai alawm le!"

A chhan chu thawnthu kalhmang a ni tlat alawm

THE FLOWER OF ERNEL

A dik chiah hei hi thawnthu kha a ni. Baron te inchhunga awm chu changtunu a ni, Duke hmelṭha deuh, sual deuh, thil atchilh bur nei chi nen an intawng a

Hmun pakhatah tang dun in, Duke naupan lai lungchhiatthlak deuh a hria a, a duh ta a, Misual te thikna vangin a thih phah ṭep a, Mahse Lal chuan engtin emaw a lo hria a, a hun takah a chhan ta a ni. An pahnih chuan an in duh thu an sawi a hlim takin an awm dun ta a ni

Chu chu a thawnthu tlanglawn ania, Thil thleng rual inzawmna nei vek a ni, a thawnthu in a thlur bing ber erawh changtupa chhiat loh zia leh changtunu fel zia a ni

Anih chuan chumi thawnthu ah ka awm tihna a ni thei ang em? Mahse ti teh ang tunge Ripley chu ni re re? A thawnthu ka ngainat em avangin ka chhiar ngun a, Ripley tih tak hi chu ka la hre miah lo

"Min lo hrethiam lawk la...."

"Aw, Miss Vawiin i awmdan hi a va mak ve"

"Ani maw? Ka la harh chiang lo aniang"

Ka fimkhur a ngai. Chuti lo chu mi â dahna ah min dah palh ang

"Chuan"

A hmasa in tu taksa ah nge ka awm ka hriat phawt a ngai

"Miss Etoile piancham a min sawm tur khawpin eng nge kan inlaichinna i hria em?"

"Tehreng mai, Miss Etoile unaupa Dimitry nupui hual Miss Juliet unaunu Miss Julia ṭhian Miss Ripley i nia lawm"

A va thui kual vel ve. Anih chuan Ripley chu thawnthu a lo tel ve mai mai anih dawn chu

"Tunah chuan eng kawr ber hi nge piancham lawmna ah chuan i hak ang? Thlang ila? Nge i thawmhnaw inhmeh tur tlereuh i inbel phawt ang?"

"Heng zawng zawng hi ka ta vek maw?"

"Aw ka pi, Count fanu neih atan chuan a tlem mah mah kha i ti ṭhin sia"

A lal dan indawt chu
Duke
Marquess
Count
Viscount
Baron

Count fanu ka ni. Ka awih thei lo. Changtunu Baron fanu ai pawhin ka chang sang zawk anih chu

"Zinga i ei ṭhin pangngai cream soup, carrot juice ka rawn la dawn mi?"

"Aih, a chi dang ka ei dawn, chhang ur thar leh bacon, salad, artui leh coffee nen aw"

A va nuam tak em. Hetah hian chen reng mai ka duh

Baron Hailey te in

Ka lam thiam bawk si lova tihtur a van vang. Kum 22 college kal mek tan chuan lam thiam ngaihna a awm lo hrim hrim. Ka ngaihtuah nasat viau pawhin thawnthu ah hian ka lut anih ngei ka ring ta

Finfiahna maw? Mi zawng zawng hi sam buang mit pawl an nei vek. A ziaktu hian sam buang leh mit pawl a atchilh an tia. A changtu ni chiah lo te pawhin an nei vek

Ka hriat dan a dik chuan hei hi thawnthu inṭanna niin ka hria. An intawn aṭanga an inneih thlengin hun an nei zel tawh ang

Chumi awmzia chu Kei Extra hi chu hlim takin Count fanu ka ni dawn tihna ania! An inneih zawh ah mi zawng zawngin lawmpuina an hlan zawh vek hnu chuan ka khawvel ah ka let leh thei dawn ni lawm ni?

"Miss Ripley!"

"Aw"

Ni e, Miss Ripley ka nia lawm

"Helai i rawn thleng thei chu ka lawm hle mai"

"Uh...."

Tunge anih aw, kan nui phawt mai ang e

"Ka piancham thilpek min thawn kha ka lawm lutuk ania"

Thilpek a sawi chuan Etoile a ni tihna

"A ho lutuk, thil lian tham pawh a nih loh kha"

"Hun nuam deuh i hmang dawn nia"

"Ngawi lawk..."

"Eng nge ni?"

Changtunu hlimna hlim taka awmtir ka duh si a..... Misualnu Rose-i'n Cake a pek che chuan ei suh ang che. Thawmhnaw siam tu in inneih thawmhnaw ah buaina a awm a tih chuan kal suh. Duke rilru ti buai zawngin awm suh a chhan chu a thik thu a chhe lutuk

"Piancham chibai le Miss Etoile"

"Ka lawm e"

Thawnthu awmsa tihdanglam chu a ṭha lovang. Ka hrilh loh phawt zawk mai ang. Mahse hlim reng se ka duh. Kei chuan Duke aiin Wright ka duh daih zawk

Ngaihtuah takah chuan vawiin hi an intawn ni tur kha ania, Duke chu khawiah nge a awm ang le? A awm ve hrim hrim ang. Ka hmu thei lo mai mai

Ka thil in hi a van tui em em. Mi hausa te in chi a nih ngei dawn hi

"Min lo hrethiam ula, a dang ka lo duh leh ang"

Ka khawvel a ka let leh hma in zanin chu kan in tak tak mai ang e

Chu chu ka tum dan ania Mahse......

"Eng nge i en? He taksa hi nizana duhtaka i chul kha ania. Thil thar a awm vak hleinem"

Eng thil nge thleng a?

*****

Chhunzawm tur

(In bo loh nan uluk deuha chhiar tur)


Show post links
Top

[Ngaia]

"Chuan nang hi he ram awptu Zeronis De Inglid....Duke i ni em?" Ka ti a, awi ka chhe ta vek mai, changtunu nen intawng tur zawk ka lo mutpui daih mai

Eng nge ka hrilh tak ang? Thil thlen dan hi engmah ka hrethiam lo mahse hmeichhia hmangaih tur i nei a, kei chu engmah ka ni lo, engpawh chu nise engmah thleng lo angin kan awm daih ang e......

"Eng nge i ngaihtuah buai em em a?" Duke chuan min rawn hnaih viau "Engmah a ni lo" tiin ka chhang a

Duke ka ti thinrim tur a ni lo. A chhan chu thawnthu ah khan a hmelṭha in a sual em em a, a naupanlai thil thleng vang khan mi hi a ring mai mai thei lova. Thil tih sual zeuh pawh a ngai thei lo. A eitur ah bawlhhlawh tlem lo awm zeuh avangin ei siamtu kha a ban nghal a, lu mettu pawh bakcheh hum tawh ngai lo turin a dawr a khar sak anih kha.

Thawnthu ah lang vak lo mahse chhungkaw hausa deuh te pawhin an tihbuai chuan a tichhe nghal vek ṭhin. Hmeichhe chungah pawh a ngilnei vak lo. Chu lo ah misualnu in changtunu a tihbuai khan na takin a hrem bawk, a duh loh zawnga ka awm vaih chuan Erenel ah hian lungmuangin ka awm lovang. Min that daih mai ang. Emperor tih loh ah chuan Duke hian thil a tithei ber a, tuna kan awm dan chu kan duhdan ve ve a va ang ve?

Party aṭang kan chhuah laiin min hmutu an awm lo mi le? Puitling karah chuan thil thleng thei ania lawm

"Puitling karah chuan thil thleng thei ania tih i tum tiraw?" Awi engtin nge a lo hriat le, a ṭha e ka beisei ang chiahin mangṭha tih a awlsam dawn anih hi

"Mangṭha tih sawi a kal tum suh ang che. I tih vaih chuan thil ngaihtuah thei tawh lo turin i lu tereuhte hian a tuar mai ang" Duke chuan ka chal chu a kawk zeuh a"Ka lu maw?" Ka inveng nghal vat

A mizia aṭang hian changtupa ngei chu anih hmel e

"Zan hun kan hman zawh ah engmah thleng lo anga awm chu i tum ngam tak tak ang maw?" Min zawt pahin a nui deuh suk a "Chutiang tih chu ka ngaihtuah ngam hleinem, ka zan hmasa berah min hrethiam hle mai, ka lawm e" za lo deuh chuan ka nui a, ka ngaihtuah buai lai chuan min en char char mai

Khawngaihin min zuah hram ang che aw

"Hmeichhe tan zan hmasa ber a pawimawh ang tho in mipa tan pawh a ni ve tho alawm" a thutak em em mai "Ni e i sawi dik alawm, mipa tan pawh..... ngawi teh i tan a hmasa ber ve tho maw?" Mak ka ti ngei mai

"Engtin nge min lo ngaih a? Hmeichhia mutpui dun dun turah min lo ngai em ni?" A lawm loh hmel khawp mai. "Aih chutiangin ka ngai hleinem" ka ti sap a

"I tan zan hmasa ber a ni ve lo a mi?" A rawn ti leh a "Ni ve tho e" tiin ka chhang a. Duke chuan min rawn ko leh a "Lady Ripley?" Kei pawhin "Aw Duke" ka ti a, Duke thu rawn sawi leh tur hi ka ring lo zawk

"Kan virgin tawh lo ve ve si a..... mawhphurna la dun ang hmiang" ka va phu chiang kher em

***

Eng thil nge ka tih tak? Eng nge ka ngaihtuah a? Duke nen kher tinge? An inah lehnghal Duke nen maw?

Chhuah dan tur ka va hre lo tak. Duke zan hmasa ber engtin nge anih theih? Chu loh bakah a vei em em lehnghal

Ngawi teh ngaihtuah lawk ang, a thawnthu kaldan ah kha chuan nimin kha an intawn ni a ni sia, an inhmu em le?

Nimin khan ka in nasa lutuk a, hriatchhuah ka tum pawn ka thei lo re re. A thawnthu a inthlak daih chuan eng nge ka chungah thleng ta ang?

Tihian lehkhabu ah ka tang reng dawn em ni? A ni thei lo, lehkhabu ah ka tang reng thei lovang. Ka ngaihtuah chian a ngai

Baron Hailey inah kal phawt mai ang

"Miss Ripley ka lo beisei lo che asin. Eng thil nge ni ta" Etoile chuan nui sangin min lo chhawn a. "Ka lo kal nachhan chu nimin i piancham lawmna ah khan ka lo in nasa lutuk a, buaina ka siam em? Tih hriat ka duh a"

"Engmah buaina i siam lo.Dik tak chuan i hlim lutuk vang khan party boruak pawh a nuam sawt alawm" pphur deuh chuan min hrilh a. Awih a va har em

"Thil vawrh vir i thiam lutuk kha mak ka tia" Etoile chuan a rawn sawi chhunzawm a "Thil vawrh vir maw?" Ka lo ti vat

"Aw, serthlum kha i vawr a i dawng chat chat bawk, party i ti hlimawm lutuk" a nui ver ver a. Count fanu tih atan chuan a va mawi lo em......

"Chuan intur i siam pawh kha a tui lutuk" a ti leh a "In tur ka siam maw?" A va mak lehzel ve "A hmingah pawh 'Puak thei thil' i vuah kha. Champagne leh Vodka i pawlh a, an duh hlawm lutuk a an intlar put kha

'Puak thei thil' ka siam a, ka sem kual maw? Ka rin aiin ka va che nasa ve "I piancham lawmna ah chutiang thil ka tih vang chuan min ngaidam dawn nia" inthiamlo deuhin ka ti vat a

"A ho lutuk, nangmah vangin hun nuam deuh kan hmang a, a lawmawm zawk. Boruak kha a nuam lutuk, Duke ngei pawhin no hnih ngawt a siamtir che alawm" a nui ker ker a, a van ngainatawm tak "Duke maw?" Ka ti hu a

"Aw, a tirah khan i pawm lo va, va in tlar ve turin i tia, mak ka ti asin aw" a ti leh a "Ka ti tak tak maw? Engtin nge a landan min hrilh thei ang em?" Ka zawt titih a

"A lungawi loh hmel deuhin ka hria, ka hrethiam chiah lo" a ti sap a

Awi, engtin nge ka la dam theih zawk le?

"Duke nen kan la inbe miah lova diktaka sawi chuan ka hre lo tlat" Etoile bawk chuan a rawn ti leh a. "I la be ngai miah lo maw?" Min va ti phu em

"Aw thil pangngai tak ania lawm. Ani chu Duke ania thuthang kha i hria em?....." a ti leh a. Awi a ni thei lo, a piancham lawmna a intawng tur an nia sin le

"Ṭhian hi ka ngah vak lova mahse a lar em avangin thuthang ka hre ve a" a ngaihtuah buai hmel deuh a "Thuthang maw?" Ka ti phawk hru a

"A tam mai, Ei siamtu ha kha a pawt thlawn vek a, Lu mettu pawh a lu an tan sak daih kha?" A ti chuai raih a. Ani lo asin le, Ei siamtu kha an ban mai chauh ania, Lu mettu pawh a dawr an khar sak chauh a nih kha. Engtin nge chutiang thuthang te chu a chhuah theih le?

"Kawtthler a thusawi ka hriat dan chuan hmeichhe ngainat pakhatmah a neih loh avangin buaina a neih an ring asin" a rawn kun hniam deuh a ka beng bulah a rawn sawi a

"Chu chu a chhan anih ka va ring lo ve, han sawi takah chuan a taksa saw tha hlirin a khat alawm, a hrisel lutuk ringawt" thingpui chu ka in pah a "Khawi aṭangin nge i hriat a?" Etoile chu a bo hmel viau

Awi leh a pawi zo ta

CHHUNZAWM LEH TUR...


Show post links
Top

[Ngaia]

Kei pawhin thuthang ka hriat ve dan tho ania, a hrisel in a tha tho lutuk alawm... fiamthu a lak mai mai chi a ni lo" ka thlan a rawn tla hluam mai

"Tak tak maw?" Etoile chu a bo hmel lutuk

Duke nen intawng tur an ni bawk a, hmeichhe dang a mutpui tih hre lo se a ṭha zawk

"Engpawhnise, chutiang lamah buaina a nei lova chuvang chuan i rilru ti hah lutuk suh aw" ka ti tak khawp mai

***

"Aw duhtak Miss Ripley, engvangin nge Duke vanga ka rilru a hah ang? Etoile chu a nui ver ver a

"Hma lam hun a hriat hleinem tiraw? Engpawh nise Duke Inglid hi eng angin nge i ngaih hrim hrim?" Ka sawi zawng chuan ka thin a phu dut dut mai

"Duke Inglid maw? Ka chiang chiah lo...." a ngaihtuah vung vung a, thingpui ka in khawlh mai

"Dik tak chuan maw Duke ang hi tumah an awm lo i hriat kha? Emperor dawt chiah an nia, an awm thei a, a hmelṭha em em bawk" phur deuh chuan ka hrilh a

"Anih duh hmel hle mai" a biang a dawm pah a

A ṭha dawn e

"Pasal ṭha tak anih theih i ring em?" Ka hlim tawh viau mai

"Aw, mahse a mizia kha" a rawn ti leh khauh a, ka en reng ringawt

"A mizia hi a khauh chi ania, i hriatchian hunah chuan an sawi ang a nih loh zia i hre mai ang" ka thlan a rawn chhuak leh ṭiam ṭiam

"Thuthang awm mahse mi fel tak anih dawn chu a" inthiamlo deuh chuan a ti a

Etoile hi mi ṭha tak anih dawn hi, a zaidam in a ngilnei bawk sia

"Mi fel tak ania lawm" ka nui sang a, "Anih chu mawle" mak a tih hmel viau

"I lo ngaihdan chu eng pawh ni se la, mi te a hnuaichhiah ngai lova, artui pawh chhum rei deuh turin a ti ṭhin, a lo hmin chiah loh pawhin engmah a sawi ngai lo, a sual lo bawk, hmeichhia an mahni chauha hawtir a duh loh avangin lirthei in kan in thleng min thlah tir thlap" Awi leh ka inpuang ṭep mai a

"Engtin nge chung zawng zawng chu i hriat a?" Mak a tih hmel ngei mai. "Thuthang aṭang ve tho mawle, zawn tak tak hi chuan a lo awm zel alawm" za lo deuh chuan ka nui a, ka thlan a bawl ṭek ṭek

"Mite hlauh Duke Inglid thuthang ah pawh a ṭha lai hlir i lo en a, thinlung ṭha tak i nei anih hi. Miss Ripley ka lo hriat ṭhin dan che chu Count fanu ang chauhin a ni a, nimin a mi leh vawiin a mi hi chu rilru hneh tak i ni" a nui sen sen a

"Chuti maw?" Extra kha ka ni miau a a awm viau mai. "Ka ngainat zawng tak i ni" a rawn tih leh chuan ka meng phawk ngei mai "Engtin a?" Ka ti vat a

"I hlim thei a, i bula awm a nuam bawk, Duke miten an hlauh em em pawh a chanchin ṭha lai hlir i sawi a, inkawm fo ila Miss Ripley" a kut suihin min ngenngawl khawp mai

Etoile hian thawnthu pangngaiah khan ṭhian a nei em le? Ka ring chiah lo deuh

"Inhnaih tur kan ni lo in ka hria.... chu chu a nihdan tur a ni lo....." ka kut chuan ka inveng deuh reuh a

Thawnthu chu a inthlak tawh a, Etoile hian kawm tur a nei si lova, Misualnu lo lan hunah engtin nge niang le.....

"I duh lo maw? Min hrethiam dawn nia, sawi awm lo tak ka lo sawi a, Engtin nge Baron fanu hian Count fanu ṭhian nih a tum ngam zawk le" a hnual deuh ruih a

"Aih, ka duh lo pawh a ni lo....." ka sawi zo hman lo

"Chu lo ah, mi ho hian nihna ka duh vangin Baron ka tlawn angin an sawi bawk a" a mittui a rawn tla a

"Tu in nge chung thu chu sawi a? Mi ṭha tak i nihzia ka hria, nangman chhiat pui rup dawn mah la puih ngai an awm chuan i pui ṭhin. Baron pawh kha i ṭanpui mai anih kha. Thudik pawh an hre hleinem, tute nge an nih? Min hah hrilh teh, Zirtirna kan pe hlak ang e" Ka sawi zawh chuan ka sa phat mai

"Miss Ripley..... hmeichhe dang ho chuan ka hnungah min rel ṭhin a, mahse nang chu....." a sawi zawm hleithei lova

Awi leh, a bu ah khan a lo sawi tak e, Etoile khawhar tak mai hian ṭhian siam a harsat a tih tak kha mawle ka van khawngaih tak

"I ṭhian ka ni ang Miss Etoile" a kut ka vuan a, min en tawp ringawt

***

Ka haw lam chuan lirthei chungah ka chuang a

Buaina ka siam leh ta. Thawnthu kalhmang thlaktu te chu an khawizu ang sam leh mit pawl ruih an nei ṭhin anih loh pawn tangkarua sam rawng an nei a van thengreng ang deuh hi an mit rawng ania an sam a dum hlap in mitmeng paw ruih an nei a, an mawi em em ṭhin

Ripley tuna ka taksa hman hi chuan Sam carrot leh hmarcha sen inkar rawng sen leh mit hring ka nei a. Engtin nge changtupa mutpui hmasak ber leh changtunu ṭhian hmasa ber ka nih theih?.....

"Lalpa leh! Kan ngaihtuahzia che hi i hria em? Ka hmaa nupa sam sen ka nu leh pa ni tura ka ngaih te chuan min hau dun a

"Miss Etoile piancham lawmna ah khan ka lo muhil tlang daih a" inthiamlo deuh chuan ka ti a. Duke inah zawk ka riak reng sia mahse sawi ngam chi a ni lo

"Engtin nge nula puitling tawh chu a duhna hmun hmunah a riah theih a? Kan ngaihtuahzia che hi i hria em? Hetiang hi i ni ngai si lova , min va ṭhawng ve" ka pa chu a ang bawrh bawrh a

Ngawi teh tun hun tak hi hetianga chet hun a ni "Ti teh pa Ripley hi i hauh nasat lutuk chuan a hlau ania, ka mittui a tla dawn ania" a banah chuan ka chelh a, naupangchhia deuhin ka awm vel a

Heti hian an sawi chiah ang a "Duhtak Ripley inchhungah lut ila thil ei ang" an ti mai ang hahaha

"I pa in ka zilh lai che hian inchhir hmel i pu tur asin" ka pa chuan a ti nghut a, "A sawi dik chiah, engtin nge chimawm deuh a i awm theih?" Ka nu chuan min hauh chhunzawm ve bawk

"Ripley ka study room ah min zui nghal rawh. Hmangaihna a zilh i ngai anih hi duhthlan tur a awm lo" ka pa chuan a ti bul hmuk a

"Eng a?" Ka ti ringawt

Ka pa tinge hmelhriat loh chu hmangaihna a zilh min tum a?

Ka ngal chu a vung luk mai. Khumah chuan ka bawk a

"Eiah a na" kan awmpui chuan ka ngal a zut a "Tinge hmun dangah i riah? Min hrilh teh, nizanah eng nge i tih?" Min ngaihtuah hmel khawp mai

"Eng nge i sawi awmzia? Ka muhil daih alawm" ka beng chu ka tun hra a, "Mahse tinge ribbon ka suih ang chiah khan a awm loh? I kawng a fek rat theih nan ka bei nasa asin" puan huh chuan min rawn dep leh a

"Party naah ka ei ṭeuh theih nan ka suih thawl alawm" ka ṭhen sak a

"Engtin maw? Chawhmel a tui lo i tia i sawi buai ziah sia i ei ṭeuh maw?" Mak a tih hmel khawp mai

"Ka ṭhan belh theih nan mawle..." ka thlan a chhuak leh phat mai. "Kum sawmhnih pahnih i nia, eng nge i sawi awmzia?" A bo viau mai. " Ni e ṭhanglai ka la ni alawm" zahzel ah ka nui a

"Min lo hrethiam lawk u" kawngka an rawn kik a, Sylvia chuan a va chhawn a an inbe mawlh mawlh a

Tinge Ripley ka nih? Lawmawm deuha awm ka tum laiin tinge min hrem kher?

"Miss? Inleng i nei a....."

"Inleng maw? Tunge ni?" Ka hawi nghal vat

"Count Jenkinson chhungkua aṭang Miss Rose ania" a rawn ti a

"Misualnu kha maw?" Ka lo ti leh a

"Miss Rose hi a chang chuan a khirh ve deuh a, misual tih tur em em chu a ni lo" a nui tawp a

A sawi dik alawm. Sylvia sawi ang khan Rose chu Count chhungkua ah chuan khirh tak a ni. A suangtuah pawh Duke nupui nih a ni. Mahse Duke chuan Etoile a thlang a, khawlaia an chhuak dun a hmuh in thikna in a khat anih kha. Etoile hrehawm taka awmtir a tum a, a tawpah phei chuan thah hial a tum kha ania. Thawnthu a misual chu a ni chiang alawm. Etoile chunga a thiltih te sawi dawn pawhin tui a theh te, a thawmhnaw tihchhiat te, mi hmaa tihzah te a ni

Chung te chu a te zual an ni. Etoile nunna derthawnga awm tir, man tir, tura hrai leh tuia tlak hlum tir te a ni. Erenel a misual ber tih tih thinrim loh hram ka tum ang. Fimkhur takin ka awm ang.

Mahse

Second reilote hnuah

A huh vek

"He ka zahna hi ka hrereng ang, ka rul let ve ngei ang" Rose chu kawr huh hnuang thinur deuhin a chhuak nghawng nghawng a

Ka chhe vek. Misualnu huat ber ka ni ta

***
Chhunzawm tur


Show post links
Top

[Ngaia]

He thil thlen hma khan

"Inhriattir lawk lo a ka rawn lang thut hi min lo dawngsawng ṭha hle mai ka lawm e Miss Ripley" a hmaizah ken chuan a inzap a

"A ho lutuk, engmah a ni hleinem" grep tui sen chu ka in khawlh a

"Ka lo kal chhan ber chu Duke lirthei in tukin zingah i haw tih ka lo hria a, thudik a ni em?" Chiang zet chuan min melh kawr mai

"Engtin nge....." ka hamhaih zo vek mai

"Anih chuan a dik a ni maw? Count Liverpool hian Duke a kan ngai si lova eng tikin nge a inah i kal?" A in seh ruh ṭun a, "Etoile piancham lawmna ah khan Duke rualin i haw em?" Min melh leh run tawh mai

"Uh......ka hre miah lo" ka kut chu ka khawih niap niap a, eng nge ka sawi chuan ang? Ka ruih em vang khan ka hre tawh lo tak tak alawm

"Thuthang ka lo hriat dan chuan Duke bula hmeichhia chu a lirthei ah khan a luak an tia, i ni mial em Miss Ripley?" Min chhimbu dawi deuh reuh a

"Ka luak maw?" Ka ti chhuak phawng. A pawi mange

"Anih chuan Duke lirthei ah chuan i chuang tak tak a ni" in melh nasat lutuk vangin thih theih se chu ka dam zo miah lovang

"Ka chiang lo" ka thlan a rawn chhuak ṭiam ṭiam a

"I in nasat lutuk avangin engmah hre tawh lo ang khan awm re re suh" a ding deuh hluai a

"Khami zana thil thleng kha ka hre tawh lo tak tak alawm" ka lu ka thing a

"Duke nen zan hun in hmang dun tiraw? Ani em? Inhmang ngei ang. Duh lo ang deuhin i awm vel a, i va zakthei lo ve" no chu a ban a

Hetianga a chet chuan "Ngawi teh" min theh a tum chu ka lo indang vat a, amah zawk a per let chhuai mai

"Eng thil nge i tih?" A huh hluam a, a thinur khawp mai

"Aih keimah ka ni lo, Miss Rose nangma tih zawk alawm" Hmaizah chuan ka la indang reng a

"Vawiina a thil thleng hi ka la rul let khawp ang che" thinrim deuh chuan kawngka lam panin a pen hlawk hlawk a

***

A tukah chuan

Engvangin nge thil hi a buaithlak vek le? Inrawlh ve tawh lo ila a ṭha ang. Engmah ka ti tawh dawn lo

"Miss, Miss Etoile i'n lehkha a rawn thawn che, kha le" tih pah chuan a lehkha ken chu min pe a

"Ka tan maw?" Lehkha char chu ka hawng a, ka chhiar nghal

Duhtak Miss Ripley
Vawiin chu boruak a nuam hle mai. Ṭhian kan ni tawh sia ka phur lutuk a ka muhil thei lo alawm. Inpawh lehzual ka duh a, i buai lem loh chuan thil ei dun ila, an siam tui deuhna ka hria ania. I duh loh chuan min hnar tho la aw, a pawi lo ania. I ngainat awm sia hualtu che i ngah ka ring, kei ai an bula awm i thlan pawhin ka hrethiam aw. Keimahin ka kal leh mai ang, keimah bawkin ka haw ang a, ka tih ṭhin fo ania, buaina a awm lo aw

I ṭhian thar
Etoile

Ka ṭhian nih chu a phurawm viau dawn em ni le? Aih nilo, changtu te inkar ah hian ka lo buai tawh lovang. Lehkha chu ka bih nawn leh a

"Sylvia lirthei kha buatsaih nghal rawh u"

***

"Miss Etoile helai dawr nuam lutuk mai a min hruai hi ka lawm hle mai" ka nui seih a

"Aw duhtak, tui i tih avangin ka lawm daih zawk" min nuih let ve sen sen a

A hun tawh em le? In ka chhuahsan hma khan lehkha ka thawn a, a hmu tawh ang chu maw? Kawngka lam chu ka melh leh ṭhin a

Kawngka a rawn ri rak a

"A rawn thleng e" ka zuang chhuak zawt mai.

"Min hrethiam la, tu maw?" A hriat loh hmel takzet

Duke Inglid chu kan lam panin a rawn pen khauh khauh a

"A hmanhmawhthlak i ti sia, ka rawn kal alawm" a rawn ti deuh hmuk a

"Heta Cake hi a tui lutuk. I rawn thlen hmaa an hralh zawh hman ka hlau a" ka zahzel kual vel a, ka nui deuh huk

"Helai thleng min koh chhan chu cake a zawh i hlauh vang maw?" Awi lo tih hriat zetin min melh a

"Bakah ei chhin la ka tia" ṭhutna chu ka kawhhmuh a

"Duke Inglid, hei hi Miss Etoile anih hi, Piancham lawmna ah khan i hmu ang tiraw?" Ka ti zung zung a

"Aw ni e, party naah khan ka rawn tlai a, pawi ka ti khawp mai Miss Etoile" Duke chuan a ṭhutna chu a siam ṭha mawlh mawlh a

"Ka hmu reng che alawm. Mahse hualtu kha i ngah lutuk a, ka rawn chibai thei lo che alawm" Etoile chu a nui ver ver a

Kan ngawi ṭhap hlawm mai

"Eitur hi i thlan a mi? Miss Etoile" ka ṭawng chhuak vat a

"Aw ni e" a ti a

"E, chumi anih vang anih chu a lo tui em em. Choux phei hi chu a tui asin, i ei duh em Duke?" Duke lampang chu hawiin ka nui suk a

"A tui khawp mai" a ti zo chiah a

"Miss Etoile hi a hmelṭha in a thinlung te hi a thianghlim asin, Choux pawh hi tui a ti ber a, in duhzawng a inang hle mai" suihzawm phet chu ka tum a

"Min kawhhmuh vang chauhin anih kha ka ei" a bangbo viau mai

"Awi leh, hetia kan en takah chuan a pawl ve ve in ha a, khuanu ruat te pawh in ang hle mai" ka kut te chu ka beng vel a

Duke chu a rawn tawlh hnai a, "Eng thil awmze neilo nge i tih Ripley Liverpool?" Ka beng bulah a rawn phun sup a

"Engmah tih ka tum lo" ka chil ka lem khawlh a

"Heta kal turin min ko a, Miss Etoile nen Choux kan ei vang maiin leh rawng pawl kan hak vang maiin khuanu ruat angin min chhuah bawk a, hei baka awmze nei lo a awm dawn mi?" Chik deuh chuan min melh a

Min va man chiang ve

"A chhan engmah a awm lo" ka kut ka khawih leh niap niap a

Ka tih theih awmchhun a ni sia lawm

"A ṭhat chu i mawhphurhna kha i la hrereng em?" A nui ve suk a

"Mawhphurhna maw? Miss Ripley hian mawhphurhna a nei em ni?" Etoile chuan a lo zawt vat a

"Nei tehreng mai"

"A ṭhian ka nih angin ba a neih chuan ka lo pek sak vek ang" Etoile chuan a ti leh a

"In inṭhianṭhatna chuan ka thinlung a khawih hle mai, mahse chutiang lam a ni lova" Duke chuan min rawn melh zeuh a

Etoile i'n Eng nge tih a zawh lai chuan ka hmai a sen vek

"Miss Ripley hi a hmasa ber" a tih lai chuan ka lo ip chawih a, a nui deuh suk. Ka van hlau hman tak

"I mawhphurhna i la hria chu ka thawveng huai mai" a ṭhen leh sak a

"Engtin nge ka theihnghilh theih ang?" Ka ti chuai raih a

"Chumi anih takah hei hi i pawm thei ang em?" Sawmna lehkha chu min pe a

"Eng ang sawmna lehkha nge?" Zam deuh chuan ka la a

"I hawn hunah i hre mai ang" dawhkan ah chuan a kiu a nghat a, a biang dawmin min en reng

Sawmna lehkha chu Etoile nen kan hawng dun a

Hei chu

****

Chhunzawm tur

(A tawi lo thei lova, min lo hrethiam mai dawn nia)


Show post links
Top

[Ngaia]

"Engmah ka ti tawh lovang kha i ti sia, mahse sawmna lehkha i rawn hawn leh bawk sia. I awm mai mai thei dawn lo a va ang ta ve" Sylvia chuan lehkha chu a chhiar nawn leh a

"Chu chiah" lukham chu ka pawm bet tlat. Chet ngaihna pawh ka hre tawh lo

"Mite hlauh leh zah rawn Duke Inglid i kalpui dawn a, engmah i ti lo tak tak ang maw?" A nui leh suk a

Khumah chuan ka ke ka leng nasa mai "ka ti tawh dawn lo tak tak" lukham chu ka pawm nasa leh viau tawh

"Engmah ti lovin i ṭhu mai mai thei dawn lo tih a chiang" a rawn kun hniam a

Lukham a inkhuh chung chuan ka tum ve nasa asin mawle ka ti mawlh mawlh a

***

"Thawh in bul ṭan phawt ang hmiang" Sylvia chuan a ti a

"Ti maw?" Ka lo ti vat

"Royal ball ah i tel dawn a, thawmhnaw nalh deuh i hak a ngai alawm" min rawn pawt tho a

"Engpawh kha ha ila pawi ka ti hleinem" ngaihtuah lo deuh chuan ka ti phawng mai

A hmel a dang vek a

"Dik lo a awm em ni?" Ka lo ti vat a

"Thawmhnaw thar i duh lo chu mak ka ti deuh a, zanlaiah pawh nise thawmhnaw leh tlereuh thar sawi chuan i rawn tho ngei ngei zel sia, han ngaihtuah chian chuan nimin aṭang tawh min biak dan te hi a dang tlat, thil i ei thei hle bawk a, zan chhuah te i hrat riau mai..." min ringhlel deuh si chuan a ngaihtuah pah neuh neuh a

"I ngaihtuah nasa lutuk anih kha, ka sawi tum zawk chu ṭhui ngai lo a, Dawr lun deuh a lei hi a changkang zawk lo maw ka tia?" Ka zahzel chuan ka ṭhen sak a

"Chumi chu maw i lo sawi tum zawk a ṭha e lirthei ka va buatsaih nghal ang e" phur deuh chuan a chhuak a

***

Dawrah chuan

"Lo lut rawh u" min lo nuih sang a

"Awi leh, Lady Ripley a ni reng mai. Eng chi nge in duh ang? Tlaia hak tur nge Party naa hak tur zawk?" Min lo zawt deuh zung zung a

"A mawi ber tur kha aw. Royal ball a tel tura sawmna a dawng a" Sylvia chu a lo phur lutuk

"Royal ball ah maw? Anih chuan Designer rawn phawt ula tiraw tunah chuan a hman rih lova in nghak thei ang em? Thawmhnaw te hi lo en kual ula in duh in hmuh chuan min lo hrilh dawn nia" min lo kawhhmuh zung zung a, biak a nuamin a hna a tlin khawp mai

"Miss, heng thawmhnaw te hi han enchhin teh, a mawi hlawm ania" Sylvia chuan phur deuhin min hrilh sar sar a

"Ni e, helai aṭang pakhat chu kan thlang dawn nia...." ka tih lai tak chuan

"Awi leh tu nge ni ka hmuh tak hi" Rose chu ka hnungah kawng dawmin a lo ding cham vah mai

"Hello Miss Rose" zah zelah ka nui lui a

"Khawiah emaw kalna tur i nei em ni? Mahse heta mi ho hi chu Liverpool chhungkaw tan chuan a to mah mah lo maw?" Ngeiawm deuh chuan a nui suk a, a hmaizah chuan a inzap vel a

Eng nge ni ta le? Liverpool chhungkua hi ka la hre lutuk a, thil lei chiam hi pawi turah ka lo ngai lo asin le

"Sylvia helaia mi hi a to hlawm em ni?" Ka zawh pawh chuan ka ngaihtuah vung vung a

"Nilove Miss, helaia hman tur hi chu pawisa i ngah lutuk alawm, chu loh bakah kan mi ropui Duke Inglid kawppui tur i ni a, hetiang hi chu i inbel ve tur alawm" Sylvia chuan ka thlavang a hauh a

Rose chuan a hre ve chiah aniang "Eng a?" a ti deuh ṭhawt a, a thinrim hmel viau bawk

Misualnu huat nih a he khawvel chhuahsan ka duh lo asin

"Engmah a ni lo ania, Miss Rose engah mah ngai suh" dawih deuh chuan ka lo ti zum zuih a

"A pawimawh asin. Erenel a thinlung sak ber, hmeichhia engah mah ngai lo tu Duke Zeronis De Inglid a'n a bik takin Royal ball ah kal turin a sawm che ania ngaihthah chi a ni hleinem" Sylvia bawk chuan a rawn ti leh a

"Royal ball ah Duke nen maw?" Rose chu a in seh ruh ṭun mai

"Uh, Miss Rose, bazar nuam aw, he thawmhnaw hi ka tan chuan a tawk mai" ka nuih tlawn pahin kawrfual eng chu ka chelh a, Sylvia chuan Rose chu a la melhrum ngang mai

"Tawp rawh, he thil hi ka la dawn, a dang va zawng zawk mai rawh?" Ka thil khawih lai chu min rawn chuh a

"Kha kha i duh chuan i la dawn nia, a dang ka zawng leh mai ang. Eng nge ka lak ang aw?" Hmun dang chu ka melh a

"Sylvia hei hi eng nge a an?" Kawrfual var leh pawl chawhpawlh chu kan en a

"Ngawi teh, khami thawmhnaw pawh kha ka duh, ka lo la ang" Rose chu ngeiawm deuhin a nui a

"Tak tak maw? Anih chuan Clerk hnenah a dang ka zawt mai ang e...." ka ti chuai raih a

"Royal ball ah ka ha duh maithei a. Ka thawmhnaw design ang chiah i lo hak ve chuan a sual thlak i ti ve lo em ni?" Rose chuan a ti leh khur khur a

"I kal ve dawn maw?" Ka zawt deuh thut a

"Kal dawn e a, ka kal theih loh i ring em ni?" a ti deuh hluk a

"Ka hriat danin mi za vel chauh an sawm an tia, anih chuan....." ka sawi zo hman lo

"Ka kal tho tho ang, chuvang chuan lo buai duh suh" min kawk deuh sawk sawk a

"Awle" ka te chem chem in ka hria

"Sylvia hei hi ka la ang"

"Hei pawh hi ka lo duh ang"

"Anih chuan hei hi ni mai rawh se"

"A design chu ka inhmeh dawn hle mai, min neih tir ang tiraw Miss Ripley?"

Helai dawra mi hi chu pakhat mah Royal ball ah ka hak a phallo aniang

"Sylvia hmun dangah kal mai ila" ka ti chuai raih a

"Mahse Miss" Sylvia chuan a kut a suih a

"A ho lutuk, ka ṭha alawm" ka ti a, thawmhnaw inchuh reng chu a buaithlak em mai

"Miss Rose! Heng zawng zawng hi i lei dawn maw? I tawk kan hre tho a, kan siam ṭhat hunah in awmna ah kan rawn thawn dawn nia. A man zat chu......" hlim deuhin Clerk chuan a lo chhawn a

Chhuak tura kan inher lai chuan Rose ang thawm kan hria a

"Eng a? Eng zat man maw? Thawmhnaw tam vak pawh anih loh hi Engtin?....." a ang hlawi hlawi a

"I thlan zawng zawng zingah khan hemi kawrfual pawl hi Designer in ram dang aṭanga a puan than a zawn hmuh ngat ania a to bik alawm" Clerk chuan a hrilhfiah mawlh mawlh a

A pawl kha ka khawih ve mai mai kha a ni sia

"Ka rindan in Miss Rose hian pawisa a ngah lo aniang. Designer thawmhnaw chu a to si a, Jenkin Chhungkua hian an lei thei dawn em ni?" Sylvia chuan Rose hriat theih tur ngatin min rawn hrilh ru a

"A vaiin ka lei vek ang" a sawi pah chuan rum lutuk tak mai hian min rawn melh a

"Awle a vai chuan Francs 4200 aw khawngaihin" Clerk chu a nui seih a

Min ngei leh viau ang Sylvia sawi a ni reng sia, tinge min melh rum daih le?

***

Royal ball ah chuan

"Kan lam dawn em ni?" A kut chu min rawn pe a

"Ka lam thiam lo...." ka tih chuan a meng zau kawk mai

"Awihawm loh lutuk" tih pah chuan min kai phei a

"Nilo, ka lam thiam lo tak tak alawm" ka tih lai chuan lammual kan thleng der

Ka taksa hian eng nge maw chu hriat a nei a ni. Engtin nge ka lam thiam zawk? Kan insawi hlarh hlarh a

"Ball dangah i lam ka hmu tawh a, i thusawi ka awih i ring em ni, kan zan hmasa berah khan i che na sia, tinge i zia i thlak daih a?"

"Che na a? Keimah maw?" Ka awih vak lo deuh a

"I chet dan kha a nasat loh chuan Ramaya tlanga Sakeibaknei te hi an zakzum tihna aniang" a ṭhen sak a

Ka lo che nasa viau aniang a, eng nge ka tih le chuan engtin?.....

A rawn nuih leh chuan ka thin a phu deuh dup dup mai. Ka in ngaihtuah harh a ngai, changtupa ania kei chu Extra mai ka ni. Ka hmai a sen ṭawn ṭawn a

"I nuamsam chiah lo em ni?" Min ngaihtuah hmel viau mai

"Boruak ṭha dawn lawk ka mamawh a" amah pawh chu ka en ngam chiah lo

"Anih chuan bathlar ah chhuak ila" ka kawng a rawn vuan a

"Keimahin ka kal thei alawm" ka tim deuh dui mai

"Tlangval in a nula hruai chu a buaipui tur alawm" min hruai phei a

Pawn boruak chu a nuam ngei mai. Zan a thiang ruih a thlifim in hnah te chu a chhem leng siau siau bawk, thawnthu a romantic lai deuh kha a ang

Engemaw ka sawi le? Extra mai chauh ka nih kha

"Lady Ripley?"

"Aw eng nge ni?"

"A reh lai tak hian zawh duh che ka nei a"

"Eng chu?"

Ka lam a rawn pan phei a

****

Episode 6

"Inneih maw? Tute nge innei dawn?" A thusawi chu ka man lo khawp mai

Amah a inkawh zawh ah min kawk leh a

"Nangmah leh keimah maw?" Ka thlan a rawn bawl ṭiam ṭiam

"Tehreng mai. Zan hun kan hmang dun tawh a, kan inneih ngei a ngai alawm" a kawng chu a dawm a

Ka thin a phu dut dut mai, ka meng zau kawk a

"Ka sawi chu....inneih chu a....." ka inveng viau mai

Ka chhe vek mai ang

Changtute chuan harsatna an paltlang phawt ṭhin a, tichuan an inhmangaih thu an inhrilh hnuah an innei a hlim takin an awm ṭhin a ni lawm ni? Mahse tinge kan mut dun vang ringawta kan inneih ang?

"Min hnar ngam ang maw?" A rawn ti deuh ṭhak a

"Hnar pawh a ni chiah lo....."

"Min thlem hnuah engmah thleng lo ang chiahin i awm ang maw? Ka hrilh chiang viau che in ka hre sia" min rawn pan hnai a, ka chal chu a kawk keuh keuh a

Zan hun ka hriatchhuah theih tawh loh hmanga min vau chu le rin harsa ka va ti ve, ka tuar thei thlawt lo

"Duke Inglid a fair lo em mai aw" ka an khum ve tawn tawn a

"Fair lo a? Inneih a chinfel ka tum a, a fair lo maw? Count fanu ve mai vangin ka thianghlimna ka hloh a, ka duh chuan ram dangah ka hralh thei cheu asin, sal i nih a, mi bathroom i tihfai hunah chuan a fair lo tih i sawi chauh dawn nia" min vau pah chuan ka sam a zut heuh heuh, min rawn hnaih viau mai

"Count fanu ka nia, inhualna awm lova inneih tawp chu ka duh lo alawm chu zawk chu ania" za lo deuhin ka nui hul huk a

"A ṭhat nasat chu, inhual ila, eng hun nge ṭha ber ang?" A sawi phur viau mai, a nui hak hak a

"Ka hre chiah lo, chhungkaw thil a ni sia, ka chhungte ka biak phawt a ngai ang" ka lu thak lo pui chu ka hiat ringawt

"I sawi ang chuan ni rawh se" nelawm deuh chuan min en a

"Anih chuan ka lut tawh mai ang" muangchangin ka tawlh hret hret a

"Intiamkam nan infawh ka duh ang"

"I duh tak tak maw?"

"Ka nupui hual tur hian dawt sawi a ching riau mai a, chuvangin thla leh arsi te hriatpuiin min han fawp teh le"

"Aih" ka lu ka thing a

"Chumi anih loh pawhin..." a kawng a rawn pawt hnai a, ka khabe a kuai dak a, lungchim zetin min rawn fawp a

Eng thil nge thleng ta? A khirh hmel ka rin nen, tinge a fawh hi a nawm em em?

Min thlah hnu chuan thla eng hnuaiah a lang kulh mai

***

Inchhung ka luh hnu chuan darthlalang ah ka inen a,ka hmui ka khawih vel

A hmel leh a pian aṭang pawhin a larzia ngaihtuah chuan midang a la mutpui miah lo chu rin harsa ka ti hle mai

Engpawhnise, changtupa ka neih daih chuan a tawp daih dawn asin....darthlalang aṭang Rose i'n rum lutuk maia min lo melh chu ka hmu a

"Hello, sawmna chu i hmu ngei a ni maw...." ka nui ruh ruh a

"Ka lo kal theih loh i ring em ni?" A meng dur khup mai

"Ni love, i ṭha maw Miss Rose?" Ka ṭhen sak a

"Ṭha hmel ka pu em ni?" A kawng dawmin a hawi pir vah a

A va pawi thei tak

"Mi phakar tak i lo nih hi. Phakar tih pawh hi i tan chuan a la sang mah mah" rum zet chuan min melh leh a

"I ṭawngkam a na hle mai" ka ti leg ve sak a

"Duke i thlem nasa khawp mai bathlar ah khan" min vin leh tuar a

"Engtikin nge ka thlem? Ngawi teh min lo enthla a ni maw? Khawi aṭangin nge?" Ka hmai a sen ṭawn ṭawn a

"Ka hmuhna hmun che chu ka hrilh kher che a ngai em ni?" A thinur hmel khawp mai

Ninja ang in a rukin mi a enthla reng mai. Mi enthlak ching a nih hi. Eng ang mipa in nge duh ang a?

Ka ngaihtuah chhuak thut a ngawi teh. Thawnthu a misual te hi changtupa te'n an ngei ṭhin sia. An thil sual tih an hriatchhuah phei chuan engatan mah an ti lo anih kha. Chu chiah chu a ni ka tihtur

"Miss Rose engtiang chiahin nge i chet ṭhin?" Ka kut chu ka suih a

"Eng maw i sawi a?" A alh deuh pup pup tawh in ka hria

"Aw, nangmah aṭang hian zir ka duh a, khawngaihin min hrilh rawh, engtianga nasa in nge i sual a, i chet ṭhin? a hmaah chuan kut suihin ka ṭhingṭhi a

"Nasa taka sual a? Eng thil chu? Ngawi teh, i thil tum ka hre ta, fel deuh anga inlan a, sual deuh anga min chhuah i tum a ni maw? Duke hi i thil tum zawng zawng kan hrilh ang e" min kawk sawk sawk a, a awki pawh a sang viau

"Aw, khawngaihin hrilh ngei ngei rawh aw, mi sual phakar tak ka ni thu hi i hrilh bawk dawn nia" ka lawm zawk phian a

"Eng a?" A ti nghut a

"Mi fel tak puh hi chu a la ho e, Miss Rose misual high class nih dan min zirtir thei ang em? A la tawk lo deuhin ka hria" ka sawi zo chiah chu ka hmaiah a beng siah mai

Ka biang ka dawm vang vang a, anih chuan misual te'n an thinrimin kut an thawh ṭhin a ni maw

"Min beng maw?"

"Aw beng e ka insum chhan tur ka hre tlat lo" A kut chu a la phar chhuak a

"Miss Rose dawhtheihna i nei lo hle mai, i thlhak ni lovin i kut i thawh ṭhin a ni maw? Duke hi nangmah zawkin alawm zarbuai kei ni lovin"

"Engmaw i sawi?" A in hum ruh ṭun a

"In ngaihzawng pawh ni lo i zui ru reng a, lo inngaizawng tak tak pawh ni ula, i thiltih hi a dik chuang lo" ka ti ve hmak a

"I sawi zo tawh em?" A tih leh chuan

"La zo lo e, i duhdana thil a kal loh in midang puh tawh suh, a zahthlak chuan darthlalang ah khan i hmel landan chiang deuhin en ang che" ka chhang let ve hmak

Ka kalsan hnu chuan kawngka nghengin ka ding a, ka tiril a khur zawih zawih.

Ka van hlau tak. Misualnu ka ṭawngkhum ve hmak ania. Ka thin a phu dup dup mai

Mahse sawi chhuah hi a ṭha zawk. Hlau miah lova tih let sak sak theih ni se aw

Thil vawm chhe thawm ka hria a, ka phu zawk mai

A thinrim a ni ngei ang. Min tihbuai leh hma in kan tlan daih ang e, chhuak daih ang

Tlan ka tum lai tak chuan

"Hey, khawnge i kal dawn a?"

***

Chhunzawm leh tur
(Saturday special anih hi, sunday ka chawl dawn a, chuan thosi in min seh nasa lutuk a rilru pek a har khawp mai haha)


Show post links
Top

[Ngaia]

"Duke nangmah maw?" Min lo be tu chu mak ti deuhin ka en a

"Ka thusawi i hre thei tawh niin a lang, khawiah nge hmanhmawh deuha kal i tum a?" A nui suk a

"Ka hmanhmawh hleinem" kut suihin ka ding zum zuih a, ka thaw deuh halh bawk

Awih loh hmel zet chuan min melh reng a

"Eng nge? Dawt ka sawi hleinem, ka thaw vak lo ania" ka nuih seih a

Ka biang chu a rawn khawih a

"Mi in an beng che em ni?" Min ngaihtuah hmel viau mai

"Aih tuman min beng lo" ka hmai a sen ṭawn ṭawn a

"I bianga kut thla hi thup bo tur chuan a lang chiah mah mah i ti ve lo maw?" Min rawn hnaih leh viau tawh

"Engmah a ni lo tak tak" ka biang chu ka dawm nghal vat

"Awi Duke Inglid i ṭha maw? A lo rei ta hle mai" Rose chu kan bulah chuan rawn dingin a nui ver ver a

"Aw, a rei tawh khawp mai, engpawh nise khalai room aṭang khan i rawn chhuak em ni?" Duke chuan a zawt leh a

"I mit a fing hle mai, min lo chik viau a ni maw Duke?" Nelawm hmel deuh chuan Rose chu a nui leh a

Engtin nge a mizia a thlak thiam zawk a, awihawm loh ve le

"Chik lem love, Miss Ripley hi khami room ah khan a awm ve tho a" a nui suk a

"Miss Ripley maw?" Rose chu a thlan a bawl ṭek ṭek a

"Nichin kha chuan a hmel a dik reng sia, hei tunah room aṭanga a rawn chhuah hian a vung deuh bur a, room khata in awm chuan thil thleng i hriat ka ring a" Duke chuan thutak zetin a zawt leh a

"Ka hre mai lo, Miss Ripley hi a zei lo sia, a in pal tlu a ni maithei asin" Rose chuan phut zawk pawh nei lovin dawt a sawi a

A va han zakthei lo tak

"Tu emaw in an beng anih ka ring a" Duke chuan ringhlel deuh chuan a melh kar a

"Awi leh Duke khawngaihin, tu in nge Count fanu te chu beng ngam ang a?" A hmui hup chuan a nui vel chawih chawih a

Ka sawi chhuah a rin loh avangin hetiang hian a awm anih hi. Chu misualnu mai mai chuh, a ṭha e ngawi teh misual nih kha ka tum ve a ni lawm ni? Kan che ve chiah ang e

"Chuan Duke, i thingpui ngainat ber chi kha ka nei asin" kan inkarah chuan a rawn inrawlh thawt thawt a min rawn nek sawk

"Amah hi alawm min beng tu chu" ka kawk siah mai. Rose chu a rawn thlan nghal ṭiam ṭiam mai

"Eng thil nge i sawi a, Miss Ripley?" A rawn kun hniam a

"Eng nge i rin? Powder room ah min ben ngei kha" ka zam duh bik hauh lo

"Eng vangin nge chung te chu Miss Ripley i chungah ka tih ang a?" A hmai a dâng nghal vek a

"Duke nen kan infawh vangin min beng anih kha" ka ti leh siah mai

"Thudik a ni em Miss Rose? I pa te nen kan inhnaih vangin hetiang i tih ka ring lo asin. Ka lawm lo hle mai" Duke chuan a sawi charh charh a

"Duke heng hi dawt vek a nih hi, heng zawng zawng thlen chhan chu he mi phakar" thinur deuha min rawn kawk chu ka hmaah Duke a lo ding a

"Ka nupui hual hi i kawk tur a ni lo, insum deuh ang che" Duke chuan ka thlavang a rawn hauh a

"Nupui hual a?" Rum deuh chuan min rawn melh a

Hetiang hunah hian misualnu chuan hetiang hian a ti ṭhin......

Ngeiawm deuh chuan ka lo nui vel a

"Nang kha....nang kha" min kawk khur der der mai

"I pa vangin tun ṭum chu ka ngaidam phawt ang che, mahse a lehpek a awm tawh tur a ni lo, ka nupui hual hliam hi ka tuam dam phawt a ngai mangṭha le" Duke chuan a ti deuh khur khur a, ka kawngah vuanin min kalpui daih

"Duke Inglid" kan hnungah chuan Rose chu thinrim zetin a au tuarh a

***

Lirthei chhungah chuan

A ṭha e, mi sual ni tura ka inzirna chu ka hlawhtling dawn e, tunah kan hmang ṭan tak tak ang e

"Count fanu chuan Count fanu dang a ben chhan kha min hrilh thei ang em?" A kiu chuan a biang dawmin min lo thlir reng a

Ka hrilh ang em? Nge hrilh lovang, misualnu ka ni tawh alawm le

"Hetiang thil thleng zawng zawng ka hrilh vek kher che a ngai em ni?" Ka ti vin ṭhak a

"Ngai love" mak ti deuh chuan min en hâ a

"Anih chuan lo ngaihtuah hah vak duh suh" lehlam chu ka hawi hmak

"Awle" a ti ve mai bawk a

A thawk ṭha dawn em le? A ṭha e hetianga sual hmel deuha ka awm zel chuan inhual emaw inneih lam a sawi tawh lo mai ang

"I biang chu a la sen reng anih hi, a la na reng em?" Dim deuh chuan a rawn khawih a

Eng thil nge ni? Tinge min ngaihtuah hmel deuha a awm? Hetiang mi kha a ni lo in ka hre sia

"Ka ṭha tawh e" tih pah chuan ka inthiarfihlim a

Ka ngaihtuah pawhin a mak ka ti hle mai. Thawnthu a Duke ka hriat kha chu hetiang hi a ni lo

Zeronis thawnthu a mi kha chu Etoile a hmangaih a, mahse a hmangaih dan kha chu induat lam ai mahin in atchilh lam rawng a kai mah zawk

A ṭawngkam hman pawh "Ka ta i ni dawn. Lu aṭanga ke thleng pawhin ni dawn mahse" chu thu chuan a mizia a sawifiah viau

Duke ka hriat chu fiamthu ah a nui ngai lova, duh deuhin mi a thlek ngai lo bawk......

"Uh Duke? Hmangaihna hi eng nge ni a i hriat?" Ka zawt deuh phawng a

"Engvangin nge chung chu min zawh a?" Lawm loh hmel deuh hian a ti a

"Ka hre chak mai mai a" ka nui hul hak, ka thlan a rawn bawl ṭek ṭek

Ni e, Zeronis ka hriat ngei kha a ni hetiang hmel hi a pu ziah alawm, a inhmeh viau

A sawi ṭhin chu "Hmangaihna a? Chu chu eng nge? Chutiang engmah ka hre lo ve. Ka nei dawn che a ni tawp mai" tih a nih kha

"Lumna in pek tawn leh in duh tawn ve ve a ni maithei" dam deuhin ka kut a rawn vuan a

A thusawi ah chuan ka thin a lo phu dup dup mai

"Ka lo ngaihtuah ngai miah lova mahse hmangaihna chu chutiang chu a ni ngei ang" ka biang a rawn dawm a, a kut lehlamin ka kut a vuan bawk. Ka lo rindan ang kha a va ni lo em

***

A tuk zingah chuan

Hetiang ringawt chu a ni thei lo

"Misual ka nih a ngai" harh chiang mang lo chuan ka sawi chhuak thut

"I duhthusam chu a inthlak e, Miss Misualnu,eng nge i ei dawn?" Sylvia chuan min rawn nuih sâng a

"Sylvia, ka thutak teh mai ania" ka lo ti deuh nghek

"Ni e, Miss thutak Misualnu. Eng nge i ei dawn?" Min nuih leh ver ver a

"Bawng sa nakruh tê deuh aw" Ka chhang thuai a

"Awle ka va hriattir vat dawn nia" a chhuak nghal a

Engmah hi ngaihtuah hah a nei lo ve mange. Etoile nakinah ka hmu dawn sia, sual hmel deuha inlan ka induh

Sylvia hnenah ka sam ka bawk tir dawn mi niang?

"Min lo hrethiam lawk, Miss Misualnu, tunah chuan an peih hman rih dawn lova, eisiamtu lu ka va tan dawn mi?" Fiamthu titak deuhin Sylvia chu a nui a

"Eng a? A chi nang" ka âng phuau ringawt

"A lu anih loh chuan a lêi ka va tan dawn mi niang?" A ti leh ta zel a

"Eng thil nge maw i sawi le?" Ka kut chu aih tih nan ka ti kawkalh a

"Ka sawi chhan chu mi sual nih kha i tum in ka hria a" min rawn siai zuk a

"An vai chuan ni love a....ei siamtu chu engtin mah ti lovang" ka ti chuai raih a

"Aw chu zawk chu maw lo ni? Tute chungah nge sual deuha awm chu i tum?" A biang dawmin a nui leh ver ver a

Ka sual tumna chu mi pakhat chauh a awm, hlahhawm hmel deuh chuan ka nui chhuak hawk hawk a

****

Chhunzawm tur


Show post links
Top