MANAGER MAMUANA By Ziki_nu (Completed)

[Ngaia]

MANAGER MAMUANA
By Ziki_nu




Chapter-19



U Mamuana chu ka en ran a, a hmelah danglam na engmah hmuh tur a awm lo, "Ka chhang dawn nge nangmah zawkin I chhang dawn?" a ti heu a, a la har sia a ring tawp tep tawh zawk ang.




"Engnge keiin ka lak daih anga, chhang vat rawh a pawimawh thut thei asin" tiin pangai deuhin ka hrilh a, thik deuh anga lan chu ka la tlawmngai tlat.



"Hello" tih pahin speaker ah a dah nghal zat a, lehlam atang chuan "Khawiah nge I awm a? In in ah ka lo kal asin" a rawn ti lang lang a, "Ka chhuak daih, thil pawimawh a awm em ni?" tiin pangai tak in U Mamuana chuan a bia a, "Awm tehreng e, I bialnu anga in sawi leh a fanu te chungchang kha sawi fel kan ngai a ni lawm ni?" a rawn ti ta fak fak a, a awki atang ringawt pawh chuan a lawmloh zia a hriat vek.



U Mamuana nen chuan kan in melh rual siah a, ka awm ve tih hreloa a mi sawi dan teh fawk kha chu ngaihthiam har ka ti ve khawp mai.



Thaw chhuak ham hamin U Mamuana chuan "Sawi tur a awm tawhloh kha, engkim I hre vek tawh alawm" a ti leh sup a, tawngkam vin a la hmang ve lo reng reng.



"Ka awih chuanglo, ngaihzawng dang I nei mai thei pawh hi mak ka tih tawh sa tehreng nen, thingtlang ami, nuthlawi leh nghal... "


A tawng lai chuan U Mamuana'n a off hmak a, Bawihtei cartoon en lai chu en zawm tir in a malchung atang chuan thutthleng pangaiah a thut thlak tir ve a.


Sofa hnung lam chu ngheng dawtin a thaw chhuak hawk a, keichu ka thut dan ngaiin ka la thu reng, min en reng tih hre mah ila ka thu kun tlat a, kei ai mahin Muanpuii thil rawn sawi vang khan hrehawm a ti zawk mai thei.


"Mary.. " ka kut a rawn vuan a,
"He thil hi zo vat vat tawh se ka duh" ka lo ti sap a, ka chau zo takngial dawnin ka hria.


Hmun tin atanga min hmuhsitna thu hriat reng hi ka hne tawh lutuk, ka nihna diktak vek an sawi a, thingtlang ami, lehkha pawh thiamlo, nuthlawi lehnghal chu Tu ngaihsan mah ka hlawh dawnlo tih ka hre chiang lutuk, mahse langsar taka min hmuhsitna hi chu tuar har ka ti ve thin em a ni.


"A reh vek ang, an ngaihdan che hi ka la thlak vek dawn, thingtlang mi hi khawpui nula tam tak aiin A nun a mawi zawk a, nuthlawi mah ni se huaisen taka a tawrhna hi a thlawn in ka awm tir dawn reng reng lo" a ti nghet charh a, ka lo nuih sak a.


"Mahse tinge chutiang chu I sawi?" tiin ka zawt leh hram.

"Ka hmangaih che alawm, khawvel hmuha I mawi lohna ai chuan I nun chhungril ka hmu tlang a, zah I phu a, chu chu ka pe dawn che" a ti leh sup a, ka mit ah tak min en avangin keipawhin ka en ve ran a, a mitmeng atang hian engmah ka chhiar thiamlo mahse ka ring tawk a, hun khirh tak ah pawh amah hi ka thlamuanpui em em tawp mai zawng anih hi.



"Zanin chu lo riak ula, naktuk zing chaw ei khamah kan haw mai dawn alawm, zingkara chhuah ai chuan a nuam zawk ang, mahni ina thleng tur in ni tawh tho a" a tih chuan pawmpui viau mah ila "Riah em chu a chi loh ang, bakah Bawihtei nen phei chuan inthlahrun a na ve a, I pa leh U Mami chu an fel ka ti, mahse i nu tak hi chuan min la lawm vak silo a" ka ti tlang râwt a, a bu ve nghut tho.



"Muanpuii nen kan inkar hi sawi thiam a har a, tette atanga inkawm kan ni ka tih tawh kha, mahse A laka ka rilru put hmang A tawp vek tawh a, chu chu hrethiam tur in ka duh che a ni" a ti leh a, a tawng ring hranlo khawp mai.



"Tute mai pawh hian in inzui rei zia an sawi vek a, U Kimkimi pawhin in inneih hial a rin tawh thu min hrilh a, mahse in inthen thut a, in inthen chhan tuman an hre lo bawk si" ka ti deuh hap a, zawh tawp ka hreh si a, ka hre chak tho bawk si.



A ngawih tak vung vungah chuan ka sawi sual em mawni ka ti hman lek lek a, "A chhan I hre duh em ni?" A ti chiah chu "Hre duh tehreng mai" ka lo ti vat a, za vaklo tih hriat deuh hian a nui sak a.



"Khuaa kan let leh hun ah ka hrilh dawn che nia" A tih chuan ka bu nghat a, zawh tut tut chi nia ka hriatloh vang a ni pakhat bawk.


Diktak chuan inneih hial kan sawi kai ve tawh a, kan inzuina la rei miahlo mah se ka dinhmunin a zirlo bawk nen, ka duh a, ka ring tawk bawk a, aman mi nei duh anih phawt chuan inneih chu ka hnial hauhlo, mahse inneih sawi kai hial tawh e tilo chuan ngaihzawng hluiah kan la buai kan la buai a, a dik ber pawhin ka hrelo. Chutih rualin tih theih em em ka neilo a, Nu Maawmi lahin min duhloh hmel bawk si, Muanpuii thawm hi reh hmak se min ngaihdan te pawh a thlak ve deuh thei mah na, an in ngaina mai si a, ka tan chuan chance a chhe deuh a ni.



U Mamuana haw hnuah Bawihtei ka bual fai a, U Kimkimi a lo haw hma bawk nen Bawihtei a awm chhungin ka inbual ve leh thung a, zanriah ei a hun der mai.



Pi Remi chuan kan nufa kawr tur leh ka pi leh pute kawr tur te min lo lei sak a, an ina ka thleng ringawt pawh ka inthlahrun tawh sa nen nuam pawh ka ti chiah tawh lo.



"Inthlahrunna tur a awm miahlo ania, in lo zin leh hun ah pawh kan inah hlir hian rawn lut thin ang che u, kan tlem si a, kan khawhar in hnem zawk alawm" tiin Bawihtei chu a chhaih pah zak zak reng a, chaw kan ei laiin kawngkhar an rawn kik dat dat a, Muanpuii a rawn lang hlawl mai!



"Chaw ka lo ei dawn Nu Rem, engnge in hmeh a?" in la tlangnel fahran hian a rawn ti bawrh bawrh a, min hria anga a awm chiahloh avangin ka hriat loh awm ve tawp mai.



"Hei i duh zawng ber kan siam alawm, thleng kha rawn in lak la rawn kil ve nghal rawh, kan ei tan chauh ani" Pi Remi chuan a lo ti var a, ka chaw ei pawh a tui tawhlo.



Bawihtei hrai pah a ngaih avangin ka ei chak lutuk theilo a, Muanpuii'n dawhkan a rawn kil ve rual chuan "Khawilam mikhual nge in lo neih leh taka Kim?" a ti kher leh nghal. Min hrelo angin awm hmak se pawi ka ti lo a, mahse a tawngkam hman duhdan ngeiawm thin lutuk hi chu ka haw ngawt mai.



"Ka pi thiannu tunu Mary anih hi, an lo zin ve zuai a" tiin pangai deuhin U Kimkimi chuan a ti a, "In fel ee Nu Remi te hi chu, chhungte ni lem lo pawh in mikhual thei zel a, keichu ka pa sawn a remti vak lo a, thilbo te hi a awm nasa thei sia" a ti leh chiah phei chu dawhkan hnuaiah ka kut ka hum ruh nasa tawh lutuk ringawt.



"Lalmuani mai mai thin hi a, Mary te chu kan nau ngawih ngawih alawm" Pi Remi chuan a lo. ti dam thluam a, ka tan a hrehawm a hlauh vang te pawh a ni ang, diktak chuan inchhunna hranpa em em chu kan nei hleinem.




Bawihtei'n chaw a ei tha duhlo bawk nen ka kham pui thuai a, sitting room lamah ka lo va phei pui a, chaw ei mek e tilo chuan Muanpuii chu a nui duai duai a, "Zanin chu ka lo riak dawn" a la ti ta deuh deuh zui, ka awm nawm lohna tur thil siam a duh ve hrim hrim niin ka hria.




Kan awmdan boruak hrehawm lutuk vang chuan U Mamuana message ka thawn ta ringawt a, *Muanpuii lo riah a tum aa* tih ngawt ka thawn a, ka va sawi chhan em em pawh ka hre chuanglo.



Ka message a hmuh rual chuan reply lovin a rawn call a, zawi deuh sap a "Hello" ka tih chuan "Kan ina lo riah chu I duh zawk em?" a rawn ti nghal khawl ringawt a, "Maw?" ka ti let ha mai.




"Muanpuii a awm ve chuan nang leh Sangbawihi tana hriat nuamlo tur in thil a sawi reng dawn tih ka chiang, chu ai chuan helama lo riah a nuam zawk mai thei, pindan awl kan nei alawm, lo riak mah ula tuman engtinmah an tilo ang che u" a ti leh sup a, ka ngawi vang vang a, "Min lo hruai thei dawn em ni?" ka tih chuan "Thei e, tunah ka lo kal ang" a ti a, ka chhan let hma in a off nghal daih bawk.




Zanriah kan la ei kham chauh a, Pi Remi te lakah han riah chhuah chu inthlahrung viau mah ila Muanpuii awmnaa awm hi ka chak thlawt bawk silo, engpawh ni se U Mamuana chu rawn thleng phawt teh se.



"Tunge I lo biak a Merte, I pi in a lo call leh tawh che em ni?" kan thutna lama rawn thut ve pahin Pi Remi chuan A rawn ti dam hliai a, "Nilo e, U Mamuana a nia, an in lama riak phei turin min rawn sawm deuh a" ka lo ti a, "Anih tak chu, duh leh va riak phei ula, mahse naktukah maw in haw dawn kha" a tih chuan ka lo bu nghat a.


"Haw hma in tum si a, khawhar in hnem tehreng nen, kan pa pawh in hmu ve hman dawn ta lo anih hi" a tih chuan nui chungin "Dam te chuan hmuh ni a la awm leh em ang chu" ka ti ve a, zin nawn leh erawh ka tum tawh rihlo bur thung.



Awmpui nula an neih avangin thleng seng leh sil vel engmah a ngai lo a, a hahdam thlak viau mai.
Dar 7 velah U Mamuana a rawn thleng phei a, sitting room ah Pi Remi leh Bawihtei te nen kan thu ho a, U Kimkimi te thiandun chu pindan lamah an awm in ka hria.



U Mamuana chu Bawihtei'n a lo ban leh vat a, "Mertei hian in ina riah phei an tum tih a lo sawi a, ngai viau mah ila kan chelh ngam silo a" tiin Pi Remi chu a lo nui nghal hak hak a, U Mamuana pawh chuan nui chungin mawi hnai deuhin chhuanlam min siam sak a, rei vaklo a thut hnuah kal tur chuan kan in buatsaih a.



Kan chhuah hma hretin pindan atang Muanpuii leh U Kimkimi chu an rawn in zui chhuak a, U Mamuana hmel a hmu chu mak a tih hmel kher mai.


"In lo awm ve reng a ni maw?" tiin U Mamuana zawk chuan a be hmasa a, a hrelo der vel ngei chuan ka nuih a ti za viau mai.



"Ka riak dawn a, engnge i tih zawk?" nem vaklo a tih pahin Muanpuii chuan keimah min rawn en kher a, "Hei kan in ah an rawn riak phei dawn a, ka rawn hruai anih hi" pakhat chuan a lo ti sup a, "Hahh a nih vel chu a" tih pahin ngaihnep hmel fe hian min melh nawn leh kher a, engmah dang sawi tawhlo in U Mamuana chuan ka banah a chelh a, a ban lehlamin Bawihtei a pawm bawk a, Pi Remi'n pawn thleng min thlah hnuah motor chhungah kan lut a, ka thaw chhuak suai suai mai.




"A zia lo e" ka ti sap chu "Engahmah ngai suh, ka pa ka hrilh tawh a, U Mami pawh a phur khawp mai, Sangbawihi hi a sawi reng zel a" a tih chuan keipawh ka nui ve a, "I nu zawk" ka tih chuan "Ka lo chhuah khan committee tur in a chhuak tawh a, a lo haw tawh angem ka hrelo, ka nu ah pawh inthlahrunna tur a awm lo ania, hrehawm tih phah suh" a ti sup a, za lo deuhin ka nui.




In be tawhlo in an veng lamah chuan kan tlan zel a, a khat tawkin Bawihtei a rawn chhaih leh zuk thin tih loh chu thawm dang teh vak a awm lo.




An in kawt kan thlen chuan ka lungphu a rawn rang leh ringawt a, bialpa te ina fanu nen han riah chu thil zam awm tak a ni reng ani.


Huphurh ru ang reng deuh chuan kan inzui lut a, U Mami leh Pa Johana te sitting room ah an lo thu a, an ni baka mipa pakhat lo thu tel ve ka hnuh rual chuan ka pen lai ka tawp zui chawt!




U Mamuana'n mak tih hmel zeta min en na pawh chu ngaihsak lovin kan hma lawka mipa thu chu ka en reng a, U Mamuana te in ah hian ka putea hian eng thil nge maw a tih le!!!



"Mary, lo thu rawh u, lo kal rawh le Bawihte" tiin U Mami chuan Bawihtei chu a lo pawt hrang leh nghal zat a, "I tha em?" tih pahin ka melh na lam chu a melh ve a, a ni pawh a thil hmuh chuan a thawng ve viau aniang a ngawi vung vung mai.




"Ngah nge maw khatia in din reng le? Rawn thu ta che u, thuruk kan sawi pawh a ni hleinem" Pa Johana chuan a lo ti a, a nui ngai lem lo ka tih tawh kha.



"Aa pa, Mary hi A chau deuh a, pindan lamah ka va hruai zawk ange" tiin ka darah min kuah a, an mikhual pindan lam ni awm tak ah chuan min hruai phei a.




Pindan chhung kan lut chiah chu duhthawh lutuk in boruak ka hip lut kawk a, ka thaw chhuak leh hak a, ka putea khan helai hmunah hian eng thil teh hrep nge maw a tih le?




End of chapter-19
(A tawi in ti in rilru inSaturday zanah chuan a thui ve thei tak tak tawh tur ah ngai ang, naktuk holiday ni bawk a)

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***


Show post links
Top

[Ngaia]

MANAGER MAMUANA
By Ziki_nu


Chapter-20



"Ka..ka putea khan hetah engnge a tih?"

Ka dang a awk a, ka mit deuh sulh mai. Ka mi huat ber hmel ka inrin hma in ka hmu thut a, ka hmuhna hmun leh hun lah kha ka beisei phak bak daih leh nghal.



"In bengdai teh Mary" ti supin khumah chuan min thut thlak pui a, "I pa leh ka putea te khan eng chungchang nge an sawidun ang le? Engtinnge an in hriat theih?" tiin mangang deuhin amah chu ka melh chho ruai a, ka mitmeng phili lutuk chu a hmuh hmaih lo tawp ang.



Thaw chhuak ham hamin a âwm ah min kuah bet a, "In bengdai rawh, I bulah ka awm" ti supin dimte in ka Sam chu a chul pah a, ka mittui rawn luang ringawt vang chuan ka hnar a thip tun a, a ping nghal vek bawk nen ka in sut zui hraih mai.


"Ka pa nen eng inzawmna nge an neih ka hrelo, ka pa hi contractor a ni a, A hmelhriat sa ni lem lo pawhin an rawn dawr fo alawm, hlauthawng lutuk lo phawt rawh" a ti sup a, a lak atanga min nawr hla deuhin uluk deuhin min en a,


"I mittui hi tla lo se ka duh, I tap lai hmuh ka duh lo" a tih chuan keimahin ka biang huh chu ka tuai hul sawk sawk a, "A hmel ka hmu thut kha mak ka ti lutuk a, min hmuh ve rual khan a hmelah danglam engmah a awm bawk silo, hetah kan kal dawn tih hre sa ang mai a ni" ka ti leh hram a, ka putea laka ka ralmuanglo lutuk hi chu keimah pawh hi ka in haw lek lek thin.




"A tha mai ang, hlauthawng suh" a ti sup a, ka chalah a hmui a nawr si zui vang vang bawk.


"Lalmuanpui..Lalmuanpui"
Nu Mamawmi au ri kan hriat rualin pindan kawngkhar chu a rawn in hawng zui pawp a, Nu Maawmi chuan mitmeng nelawm loh zeta min en pahin "Ngahnge min rawn lova thu I lo tih tluk ve ngawt thin, bialnu te mahni ina riah tir ringawt te chu thil tih chi pawh a ni hleinem, thlen in pangai an nei a ni lawm ni" a rawn ti zui hlak hlak a, U Mamuana nen khum atang kan tho chhuak hluai bawk.



"A ngai a ni mai alawm, ka pa leh U Mami pawn an remti vek tawh, pindan hranah tho alawm an riah dawn" tiin pangai tak in U Mamuana chuan a chhang a, "Mai mai, chutiang ka remti reng reng lo" tih pahin kan din na lam a rawn pan a, ka banrekah man lawkin "In zaktheilo nufa lutuk emai, kan lawmlo cheu tih hre reng chungin helai hmun ah riah te in la tum ngam a, chhuak rawh u" A rawn ti ta mai a, U Mamuana'n min vawnna chu A lo pawt thla hlawk thung.


"I ti mah mah ka nu" a ti ve hluk a, a awki pawh a hniam bik tawhlo.


"Engatinge maw I rawn haw chauha thawm I rawn siam nghal chiam le?" tiin Pa Johana a rawn tlan phei ve a, Nu Maawmi chuan ngawi rengin keimah min en ran mai.


"Awm tir mai mai teh naupangchhia pawh an nih tawhloh hi maw le, phul hlut zel suh inleng te ka neih saw, rawn kal teh thingpui min va lum teh" tiin a nupui chu a pawt sawn a, "Ka lum awmlo emai, in lo mai rawh u" a la ti hlak hlak in ka hria.




Thawm a reh hnu chuan ka kâ in ka thaw chhuak ham ham a, U Mami leh Bawihtei te an awmlo a A zia zawk ah ngai teh ang.



"Ka nu hi hriatthiam ala ngai deuh dawn ka tih kha aw, mahse a rei tawhlo ang" ka bul ami chuan a ti sup a, ka darah min kuahin ka dar chu a tuai hauh hauh a.



"Khawi hmun mah hi nuam ka tilo, haw vat vat tawh ka duh A ni" ka ti sap a, ka tah pawh a chhuak rihlo, ka mit deuh sulh ringawt a, ka putea ka ngaihtuah chhuak leh nghal zat bawk si, ka tawt up up a ni ber mai.



"Naktukah kan haw vang vang dawn nia, zing chhuah ila a fel zawk ka ring, Pi Remi te an tho hma tho a ni lawm ni? In thuamhnaw chu kan la kawi mai dawn nia" a ti sup a, ka inthlahrun rualin zing chaw chauh ei tur pawha cham khawtlai leh rih chu ka hreh ngawih ngawih bawk si a, a tawpah zing chhuah chu kan ti tlu ta nge nge.




U Mami leh Bawihtei an rawn in pawm lut ve a, Bawihtei chu mutchhuak tawh tih hriat zetin a meng deuh siar siar ringawt tawh.


"In thawm ka hre sia, ka rawn chhuk pui duh lawk lo anih kha, ka nu vang khan hrehawm I ti dawn tih hre tho mah ila tui deuha mut in tum dawn Nia, keichu I lamah ka tang reng ania" U Mami chuan a ti thlap a, ani hi a awmlo ang tih ka hlau lutuk ringawt.




"Dar 9 a pel thui tawh, mutthilh hma tum la, zingkarah kan chhuak leh si dawn aw U" tiin U Mamuana chuan A u chu a melh zawk a, "Zing chaw tal in ei leh hman ang chu ka lo tia, mahse ni e, kan boruak in a zir chiahlo bawk nen chaw han ei khawmuan leh vak pawh Mary te nufa tan thil nuam a ni lo ang" tiin a bu nghat nghat a, U Mami'n min chhuah San hnu ah Bawihtei chu ka malchungah A muhil ve nghal mai a, kan boruak engmah a hre ve mang bawk silo, ka khawngaih ngawt mai.





Khuma ka mut that tir hnuah U Mamuana pawh a tho hluai a, a chhuah dawn chuan ka kut vuanin "Ka hmangaih che tih hre nawn leh ang che, ka nupui i niha ka ta tak tak I nih hun ah chuan zan tin I mut dawnah he thu hi I hmaah ngei ka sawi ziah thei tawh ang" a ti sup a, "Keipawn ka hmangaih che U Mamuan" ka ti ve sap a ka lai deuh reuh in ka hria. Min din hnaih hret a, dimte in ka hmui ah a fawp a, a reilo, a in la hrang leh vat tho.
"Tui deuhin in mu dawn nia" a tih hnuah a chhuak zui nghal a, ka thaw chhuak halh mai.



Bawihtei bulah chuan ka mu kai a, thlamuang taka muhil siai siai ka fanu chu en in ka nui sak a, kan thil tawn mek boruak thalo zet hrelo in tui deuhin a muhil a, ka awt letling zawk hial mai!



Mahse heng boruak tha lo zawng zawng hi a rawn hriat ve hun a la thleng awm si a tih ka ngaihtuah chhuak leh a, chutiang chu a thlen ka phal lo. Ka fanu hi chuan chhungkaw tha tak nei se ka duh, hlim takin seilian sela, rualawt lo va siam ka duh a ni. Chutiang tur chuan nasa takin ka bei a, Pathian hnenah ka dil a, harsatna tam tak ka paltlang ve bawk a.
Tunah a chhanna ka dawng tawh emaw ka tih laiin a aia harsatna nasa zawk leh liantham zawk ka tawng leh mek bawk si. Vui ka duh a, vui thei ka niin ka inhre bawk si lo. A chang chuan ka tana malsawmna lo thleng tur hi nghak chhuaklo a bo daih mai ka chak rum rum thin a, chu chu tuna ka awm dan chiah hi a ni bawk. Tumahin min hriat loh na hmuna awm a, nun thar neih ka duh a, chumi tir chuan heng harsatna te hi ka tlansan ngawt thei bawk silo.



Zingah Bawihtei thawm in min ti harh a, pindan chhungah chuan ni zung a rawn lang tawh, sana ka en vat a, dar 7 a lo ri tep tawh tih ka hriat rual chuan ka tho chhuak vat a, kan mutna vel ka thleh fel laiin U Mami a rawn lut hlawl a, mahni in lo tih takah ka lo phu leh hman pek.




"Sangbawihi nui ri ka hria a, ka rawn tlan lut nghal" tia ngainatawm deuha min nuihin Bawihtei chu a pawm kang leh nghal zat a, "I van tho hma ve" ka tih chuan "Zing chhuah kha in sawi deuh sia, thlah hman cheu ka duh alawm, Mamuana pawh a thawh tawh kha, I insiam fel zawhah lo chhuak mai rawh aw, Bawihtei chu ka lo va hruai chhuak ang" a tih chuan ka bu ve nghat a, an unaua an fel tehreng nen tinge Nu Maawmi rilru hi a kawih bik em em le!



Kan mutna ka tih fel zawha ka chhuah chuan U Mami te hmel ka hmu lawk lo va, choka atanga U Mamuana rawn chhuak chuan min rawn hui zauh avangin choka lamah bawk chuan kan in zui phei leh a.




"Chaw ei loa chhuah kan tum sia, tiffin ka lo siam a, restaurant vela ei ai chuan khaw kar kawng laklawhah kan chawl zawk dawn ania, a nuam zawk ang" a lo ti sup sup a, chaw ei dawhkanah a thil pack ho chu a dah khawm rui a, "I van siam tam awm em em" ka tih chuan a lu thingin "Tam vaklo, thei tlem azawng ka dah tel a, dawrah Sangbawihi ei tur kan lei kawi bawk anga" a Ti leh zel a, a va han ngaihtuah kim em em bawk ve mawle.




Choka atanga kan chhuah leh rual chuan Nu Maawmi tho hlim nen kan in tawk a, nutling ber si a van tho har ka lo ti rilru hman, a sam chu chunglamah a bawk tawm nawk nawk a, biak pawh min be lovin min kalpel a, "Ngaihkhatah ngai rawh" ti supin ka bul ami chuan min nam kal zui ve dar dat a.



Sitting room ah Pa Johana chuan chanchinbu a lo chhiar mek a, "Kan kal deuh mai dawn asin pa" a tih chuan min rawn en in "Chaw in ei phawt dawnlo em ni?" a ti a, U Mamuana zawk chuan "Ei tur ka siam lawk sa a, kawng lakah kan ei zawk mai ang" a ti a, "A nih leh in duhdan anih zawk tlat te chuan,,, khawnge i nu kha a rawn tho tawh a ni lawm ni, kawtzawl thlengte chuan kan thlah ve ang cheu chu" a ti a, an nu chu a ko zui nghal zat bawk.




"Pi Remi chu i be tawh em ni?" tia U Mamuana'n min zawh chuan bu nghatin "A tho hma thin alawm, kan thlen phei meuh chuan U Kimkimi pawh a tho tawh ang" ka ti a, ka sawi zawh rual chuan hriatchhuah ka nei leh nghal zat bawk. Nizanah Muanpui nen an riak tlang a, zingkarah chuan a thiannu te in atang a haw miahlo ang, ka va han hmu peihlo tak.




U Mamuana chuan a pindan atang a thuamhnaw tam vaklo a rawn khai chhuak a, motora a in rem luh lai chuan U Mami leh Bawihtei bakah Pa Johana te nen kan lo en thap a, Nu ber chu a hmel ka la hmu leh lo hrim hrim.




"Tikhan in in khung zo em ni? En chiang rawh theihnghilh te in nei ange" pa Johana chuan a ti ve reng a, "Neilo turah ngai ang, thuamhnaw ka rawn keng tam vaklo a, Pi Remi te in ah Mary te thuamhnaw kan la kawi leh anga, engmah theihnghilh tur a awm pawhin ka hrelo" tiin car hnung chu a khar ri zui dawp a, U Mami chuan Bawihtei bianga fawp vang vang chung chuan "Hei te hi ka ngai dawn emai, a fel bawk si, lo zin leh vat ang che u" a ti a, hmangaiha ngaina Tu na na na chu Bawihtei pawhin a hai biklo aniang, a nghawngah a kuah bet ve tlat a, ka lak pawh a duhlo, eng tin Tin emaw U Mamuana nen zawk an in thlem thei hram a, kan kal dawn tak tak meuh chuan Pa Johana chuan an nu chu a ko leh hram a,

"Ngahnge maw mi auh reng le, ka tello in an kal thei lo em ni?" ti hlak hlakin a rawn chhuak a, "Fa te zin bo leh tur pawh thlah loh te chu i duh em ni?" Pa Johana chuan a lo ti leh a, a vin hauhlo na in a thil sawi hrim hrim hi a tak a, zawmloh ngam chi ah keichuan ka ngailo.




Kan in vai liam hnu ah kan thlen in lam kan pan leh a, dar 8 a ri tawh.


Inchhungah chuan an nula leh Pi Remi chiah an lo awm a, Muanpuii te hmel ka hmulo chu ka thaw huai mai.



Pindanah kan thuamhnaw te ka siam fel sawk sawk a, Pi Remi'n kawng laka kan ei tur eng eng emaw a lo siam bawk nen inthlahrung ru deuh chungin ka la a, "I pi chu min han biak mawlh mawlh dawn nia, in thlen velah chanchin te min rawn hrilh bawk anga" a tih chuan nui chungin ka bu nghat nghat a, rei pawh awm lovin kan in vai liam ve thuai a.




"Kan beisei ang boruak tawng ta chiah lo mah ila, keichuan kan hlawhtling viau tho ah ka ngai asin"

A motor khalh pah chuan hmalam a en ran a, a nui lo a, lungngai hmel pawh a pu chuanglo, a thlamuan hmel ngawih ngawih hian ka hria.




"I nu berin min duhloh chuan tih ngaihna a vang awm e" tiin za lo deuhin ka nui hak a, "Keiman alawm nei dawn che, ka nu nilovin" a ti deuh nghut a, chu ringawt pawh chu awm nawm veng veng na tham zawng a ni chiang alawm.


"Mahse i chhungte remti lo chunga inneih luih chu a that ka ring chuanglo" ka ti leh sap a, "I chhungte lam kan ngaihchan ve tho a ngai sia lawm, I putea kha kan inah hial a rawn chuangkai tawh a, a lo kal chhan tak hre chiah lo mah ila a rang lama inneih chu a tha ber ang" a ti sup sup a, a khât tawkin Baiwhtei chu a chhaih pah reng bawk.



"Ka nawr lui mah mah che em le U Mamuan" ka ti hap a, kei leh Nu Maawmi boruak a chhe si, a karah Muanpuii a awm a, ka putea a ni leh zel a, thil hi a fel mai dawnin ka hre tlat lo.




Khaw kar kawng hmun remchang laiah kan ding a, Bawihtei mutthilh loh lai kan chuh a ni ve pakhat bawk, kan tiffin pai chu kan ei a, khawi khaw dawr emawa chawlh ai chuan hetiang hian a nuam fe zawk. Keimah chauh nilo in ka fanu pawh hhian nuam a ti ve tak tak niin ka hria.





Chawhnu lam dar 2 pelh deuhah kan thleng a, kan in kawt zawla ka motor hmuh vang chuan ka nui tur pawh ka thulh leh thak, nizan lawkah U Mamuana te inah kan in hmu a, tunah kan in kawtah a motor a lo awm leh daih bawk si.



Ka pi leh pute an rawn chhuak thuai a, Bawihtei chu la vatin U Mamuana pawh lut tur in an sawm ve a, kan bungrua te a lak fel hnuah kan vai chuan kan inzui lut a, thutthleng seiah chuan ka rin lawk ang ngeiin ka putea leh mipa pakhat an lo thu dun a, min hmu chu mak ti hmel pawh a pu duhlo, bathroom atang Vli a rawn chhuak ve chiah bawk a, a pa te nena kan boruak hre miahlo tihhriat zetin "In va lo thleng hma ve Merte" min lo ti zat a, chhan pawh ka chhang theilo.




Pindanah kan thuamhnaw ho chu ka khai lut a, a lo zin changa ka pindan min tawm ziah avangin Vli pawh a rawn lut ve nghal a, "In lo zin tih pawh min hrilhlo hi chu ka thin a rim teh ania, tunah chuan in la chau awm si a, zanah ka hau dawn che" a ti a, lotion chu a chawn ah a hnawih zui dap dap a.



"Enge in lo tih reng reng a, in lo thlenna a rei tawh em?" ka tih chuan a lu thingin "Thlen hlimah ka inbual nghal a, ka luak nasa lutuk alawm" a ti a, "Tunge i pa bula mi kha" ka tih chuan mitmeng hriatthiam har deuha min en pahin "Mahni pasal tur pawh han hriat loh, I over emai ah" a ti a, a nui zui duai bawk!


Tunah khan engthu maw a sawi a?
Ka pasal tur maw?!!!






End of chapter-20
Ads vawi khat click leh comment kha aw❤


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***


Show post links
Top

[Ngaia]

MANAGER MAMUANA
By Ziki_nu




Chapter-21



Pindan atanga ka chhuah leh rual chuan ka pi in min lo pawt hrang vat a, midang awmlohna lamah min kai pheiin "I putea thil sawite kha engnge ni?" a ti sar sar a, tawng rin a hlauh hmel kher mai.



"Ka hre nang" ka ti hmuk ringawt a, Vli laka ka hriat chin ringawt pawh khan ka thin a ti rim lutuk tawh, a dang ka hre peih rihlo.



"A rawn hruai pa saw Sawma a ti mai a, I pasal tur zawk ang ten a sawi bawk si, I pu nen kan mangang lutuk tawh" a tih chuan zalo deuha nui chhuak hakin "U Mamuana awm laiin a sawi ngam em kan en ang chu ka pi, keichuan ka mipa hmangaih chauh pasal ah ka nei ang" ka ti ve hmak a, ka pi te rilru tur chauh ka ngaihtuah reng chuan engmah hi a fuh thei dawnlo.




U Mamuana lo thutna bulah chuan thu ve in Bawihtei chu ka pawm a, "Mamuana chu tlai chaw ei ve nghal mai la a va tha awm ve, in lama rawngbawl chawp leh chu I tan pawh a buaithlak mai mai ang" ka pu'n a lo ti var a, ka pawmpui khawp mai.



"Ni e ei ve nghal rawh se" ka tih chuan "Mikhual kan pung sawt dawn a ni maw" ka putea'n a lo ti zauh a, sawi fuh in tih hmel zetin min en ran bawk.


"Sawm loh mikhual ai chuan sawm mikhual te chu an lal deuh zawk ang chu, ti rawh U Mamuan, choka lamah thingpui ka lum sak ang che" tih paha thawh mai ka tum chu "Thu rawh Lalpekhlu" tih ri vang chuan ka tawp leh chawt a, ngawi rengin ka thutna ngaiah chuan ka thu thla leh dawt.


"Chhungte rem tihna tel lo in I duhzawng pasal neih ngawt te I lo tum a, nangpawh hre rawh Vala, nizan lamah in inah thil awmdan ka rawn hmu vek a, ka tunu hi khatiang chhungkua ah khan a lawi ka remti teuhlo ania, I chhungten an lo lawm theilo anih chuan in innei malek anga ni mai" ka putea chuan a ti ta mai a, a thil sawi duh dan zawng chu mak ka ti lutuk a, sawi miah tur pawh ka hrelo.



"Engtizia nge kan thu hriat chu ni ngai Mamuan? I chhungten kan tunu hi an lo lawm vaklo em ni a?" hlauthawng hmel zetin ka pi chuan a lo ti a, "A... Ka nu tih loh midang chuan an remti vek alawm, ka nu tak hi chuan ala hrethiam lo deuh e tih A ni mai" A ti sup a, kan thleng chauha hetiang boruak a ni leh nghal hi ka inthiam lo takzet.



"Mita hmutu ka ni a, keiin rem ka tih loh chuan in innei chuanglo ang, ngaihtuah chiang rawh Lalpekhlu, khatiang chhungkua ah khan I hlim dawn chuanglo" a ti leh zel a, "Min hrethiam teh ka pu, mahse kan chhungkua i hmuhsit na hi chu ka ngawih bo pui thei biklo" tiin U Mamuana A rawn tawng chhuak ve leh a, A thaw pik thlak lutuk ringawt.




"Engpawh ni se inbengdai tlang teh u Mama, nangpawh Mamuan, thinrima thil sawi hian eng thiltha mah a paw chhuak ngailo, tha tete in kan sawifel ang chu le" tiin ka pu a lo inrawlh ta hlauh zawk a, nilo se chuan ka putea hi a tawngthei si, engkim a ti khawlo vek mai ang.




U Mamuana haw phei hnu a inchhunga ka lut leh chu ka putea'n min lo dinchilh leh nghal run a, "Ka thu i awih lo ngam ang maw Lalpekhlu?" A tih rual chuan ka pi in "A mak, thinrim hian thil hi sawi nghal ngawt zel suh u" a lo ti a, Vli leh Bawihtei pindan lamah an in pawm lut a, ka laka a pa chet dan chu mak a ti ve viau ngei ang, U Mamuana nena kan thil hriat ang kha hre ve ngat phei se chuan rapthlak a va han ti dawn tak.


"Khupa khu tunge?" tih pahin thlanglam thutthleng seia lo la thu reng pa chu ka melh a, "Aw, Sawma anih hi, nangmah ang tho in fanu pakhat a nei ve tawh a, a hmaa thlalak ka hmuh ai che kha chuan i duhzawng deuh ang chu, a ni hian a nei hrehlo che a, fa nei ve ve tawh na na na chu in in hrethiam zawk bawkin ka ring" a ti a, a thianpa chu a chhuang hmel kher mai.


"Hahh ka nei lullo ang" ti nghatin choka lam ka pansan a, tuilum lo awm sa chu bathroom ah khai lut in ka inbual zui nghal daih bawk.



Ka dinhmun khirh lutuk leh U Mamuana rilru tur te ka ngaihtuah kual a, ka putea hi ka chungchanga a in rawlh ngam tawh hauhloh na tur in ka chunga a thil tihte kha sawi chhuak vek ta ila tih thlengin ka ngaih tuah a, ka pi leh pute an lo lang lo thei silo. An fapa neih chhun, an rin em em in chutiang thil ka chunga a ti chu an awih ngamlo hial zawk emaw ani anga, an upa tawh si, thil tha lo pui pui ka ngaihtuah tello theilo a, a harsa a ni.



Ka inbual zawh chuan Vli leh Bawihtei te pawh pindanah an lo la awm a, Vli min en dan danglam ta chuan ka thawk lak a ti sak talh mai, a laka insawifiah ngai tur ringawt pawh hi ka huphurh lutuk.


"Mamuana an tih kha i bialpa anih chuan tinge U sawma saw ka pa'n nei tura a tih tlat che a" a ti sap a, min zawt hreh hle tih a aw ri atang chuan a hriat vek.




"Nakinah I la hre ve mai ang" ka ti ringawt a, "Mahse tunah min hrilh la, I duhlo chung neih tir che a tum anih chuan ka tanpui zawk dawn che alawm" a ti leh a, "A ngailo, I buai lohna tur ah lo buai ve suh, tha tak in lehkha zir la a ni mai" dawhtheilo zet in ka ti leh hap a, engmah min zawt zui tawhlo na in ka hrilhfiah duhloh vang chuan min melh no teh vaklo.



Bawihtei chaw ka siam sak a, kan boruak in a zirlo bawk nen U Mamuana pawhin message in chaw a rawn ei loh mai tur thu min rawn hrilh a, sawm luihna chi pawh a ni lo, zan lamah thil sawi fel tura lo kal a tum thu a sawi chuan ka lo pawmpui leh mai a, ka pasal tura ka duh ber awm lai ngeiin ka pasal tur dang a rawn hruai lut ngam a, engkim hi zawhfel law law a hun tawh.



Thil dang eng emaw neuh neuh kan ei tho bawk nen, zanriah pawh ka ei ve peih ta lo va, Bawihtei leh Vli an in awm chawt a, kan vawk no pawh an lo la dam Kim thah mai, hmuh loh kar reilo te ah pawh an lo changkang hman viau a, a lawmawm tak tak.



Ka pi leh pu bakah ka putea te thiandun chu sitting room ah an titi a, Vli leh Bawihtei pindan lamah an in chhaih rak teng tung bawk a, keichu tapchhak lamah keimahin ka thu a, U Mamuana lo lan hun ka nghak a ni mah zawk.



Dar 7 velah a rawn thleng a, ka bulah thutna a rawn rem ve nghal chat bawk.


Ka pi in thingpui lum tura min rawn auh rualin an bula thu thla ve tur in min ti nghal bawk a, ka putea tih tir bawk a niang chu..


Thingpui lum sa chu ka thli chhuak thuai a, U Mamuana'n min la ken pui zui, ka putea te thiandun chu ka pek pawh a phallo a, amah ber chuan a pe nulh mai, hrehawm ti hmel pawh a pu chuanglo a, chungte hlei hlei chuan inthiamlohna min neih tir zawk bawk si.



Sitting room lamah kan thu thap a, inleng dang an awmlo bawk nen ka pu chuan thutak deuh hian "Kan dinhmun chu heti hi a ni a, zep leh thup tur engmah pawh a awm tawhloh hi, a innei tura ten an duh miau chuan innei mah se pawi tihna kan neilo a, chutih rual chuan Mamuan, I nu chuan Mertei hi a duh lo viau amaw?" A ti charh charh a, "Thil eng emaw hriat sual a awm a tinni, a fel thuaiin ka ring, ka u leh ka pate chuan an lo lawm khawp mai" a ti a, a inringtawk hle tih a awri atang ringawt pawh in a hriat theih!




"Hriat sual palh chu anih loh kha, ka mit ngeiin thil awmdan ka rawn hmu vek a, I nu in Mary a hmuhsit na tawngkam te pawh ka rawn hre ve vek alawm, khatiang anih chuan engtikawng mahin in innei theilo ang, a reng rengah, nang ang tlangval tha pangai te chuan a duh pawh I duh tak taklo tawp ang" tiin putea a lo inrawlh a, tullo ti lutuk in ka kut kanlo hum ruh nghek ringawt.




"Ka'n ding hluai teh ang ka pu, ka chet dan hi a lo mawi chiahlo anih pawhin min hriatthiam ka beisei e, Mary nena kan inkar chu in hre vek a, a nihna ang ang hian ka pawm tih amah Mary ngei pawh hian a hriat ka ring, inneih hial pawh ka hnial tawhloh laiin hetiang hian in hriatthiam lohna a lo awm leh a, ka nupui tur ang hiala ka ngaih tawh hmeichhia ka awm lai ngeia mipa dang in sawi hmuh theih hi ka ngaihdan a ni bik tlat lo, kei hi makpa atan min iai viau anih chuan tih theih engmah ka neilo a, mahse duhthlang tur leh duhthlanna neitu chu Mary hi a ni, khawngaihin kan inkar hi hriatthiam tum teh u"



U Mamuana hmel chu ka en thin a, a beidawn thlak ve duh ngawt hian ka ring thin, kan in duh tawn em em laiin ka chhungte ber lah chuan ka pasal tur min zawn sak chhen bawk si a, a luhai thlak emai.




"A ni ngawt mai tiraw Mamuan, kan iai che a ni hran hleinem, amaherawhchu hei, a putea hnen atang hian I chhungte lamin an lawmlo hle tih kan lo hre leh bawk si nen, ngaihngam tak in Mary hi kan thlah thei angem kan hre lo a ni, midang hnena pek chungchang te zawng, engmah kan la sawi ri hleinem" ka pi chuan a lo ti ve hliai a, a vin lo ve tlat mai.



"Ngawi teh Hmingmawi, kan boruak en hian engmah kan sawi kaw dawnin ka hrelo, tullo ah ka hun ka rawn khawhral mai mai a ni, I sawi lai khan harsatna awmlo a engkim a fel mai tur thu I sawi a, mahse hei, tumloh puiin ka rawn thu mualpho ve ta hrep ringawt anih hi, hotel a awm em, tah chuan ka riak anga naktuk ah ka haw thla nghal ang" tiin ka putea thianpa chu a rawn ding ve hluai a, a ngawi rei thei ka ti reng a ni.




Ka putea'n chelh luih viau tum mah se a lungawilo laklawh ve aniang a chhuak lui ta tho a, In chhung a rawn luh leh ruala a mitmeng rapthlak zia chu sawi ngaihna pawh ka hrelo.




A kutzungchal tawi tupa min kawk siah pahin "Lalpekhlu, min va han ti zak zo zai ve leh, ngaihtuah man awmlo lutuk, nangang nuthlawi lehkha pawh thiamlo, chhungte chawmhlawm mai mai hian ka thu te I hnial ngam a ni maw, I la hre dawn khawp mai" a tih chuan U Mamuana chu rawn ding ve hluaiin "I tawngkam hman kha fimkhur ang che aw ka pu, Mary hi hmusit thei I ni lo tih in hre thar leh ang che, nuthlawi anihna te, lehkha thiamlo anihna te hi Tu vang nge I hrechiang khawp ang chu" a ti ta mai a, "U Mamuan" ti khur hlakin ka thutna tang chuan ka ding ve nghal a, a ban ah vuanin a hmel chu ka en ran a,





Ka pi in "Engthu nge maw in sawi a in in din chilh tak rum rum le Mamuan?" a lo ti ve ruai bawk a, kan mangang tlang a ni.



"A tawk tawh Mary, I zep chhung chuan hepa hi a in luling tulh tulh dawn, nangpawhin I hmuh vek hi, i pi leh pute hi thudik hrilh ila buaina hi a bengdai zawk thei ang" tiin ka banah a lo chelh a, tawng tuma ka âng ve zuau tawh chu ka putea'n min lo tawng khalh a.



"Thu awmze neilo sawi tum lo mai teh u, ka remti dawn chuanglo" a la ti khur khur a, hun kal tawh zawng zawng ka ngaihtuah naah a rawn lang nghal zut zut a, ka chunga ràwng taka a chet tum te ka mitthlaa a Rawn lan leh rualin ka thaw chhuak hak a.




"A tawk, a tawk lutuk pute, engtinnge engmah thlenglo ang maiin tunthlenga i la awm theih tih hi ka zawhna a la ni reng asin, ka pi, ka pu, nau ka pai tirh khan a pa min zawt a tiraw, tunah hian ka hrilh ang che u" tiin ka putea awmna lam chu ka hawi a, "Lalpekhlu ngawi rawh" tih paha ka putea Rawn che vut chu U Mamuana'n a lo dang vat a,




"Engthu nge maw in sawi chhuah tak chiam mai le Merte, thudik chu min han hrilh vat mai teh"

Ka pi aw ri pawh chu a khur hlak hlak tawh, hrehawm ka ti a, an rilru na lutuk tur hian engnge a thlen zel ang tih pawh ka ngaihtuah ngamlo.



"Ka... Ka putea hian min pawngsual a ni ka pi"


Engkim chu a reh zui duk a, hun rei tak ka lo pai bo tawh, sawi chhuah pawh ka tum ngailoh thil kha vawi leh khatah ka sawi ta pawp a, engtinnge an lo dawnsawn ang tih ka ngaihtuah thiamlo, ka putea an dem ang nge keimah min dem zawk ang le...!



"Awi ka nu, a va han rapthlak ngai em!!" tiin ka pi chu thutthleng seiah a thu thla hnawk a, a kut vuai leh cher ve tawh tak chuan a hmai hupin a tap chhuak hak mai, ka biang a Rawn lum thla ve pap a, ka pian tirh ata ka nu leh pate an boral ni bak kha ka pi mittui tla ka la hmu ngai lo.




Thudik ta nafam chu ka putea pawhin phatna thu engmah a sawilo a, a khabe tuaiin a tei kual vut vut ringawt.



"Thudik a ni em Hmingmawi?" ti khur hlukin ka pu chuan putea chu a en ran a, ka pu tar ve tawh tak pawh thinrim rilru na bawk si vangin a ding khur dawt dawt lo chauh chu anih hi.



"He mihring hian engmah a sawi ngam ka ringlo ka pu, Mary, naupang rilru na kha remchangah la in a thisen zawm ngei lakah thil rapthlak tak a ti a, nau hial a pai ta a, inthiamloh a hnehin a naute leh amah Mary ngei nunah a la inrawlh zawm zel ngam a, in tan dawnsawn thiam a harsat tur zia ka hriat thiam pui em em rual cheu in, Mary tawrh na zawng zawng hi ngaihtuahpui ve ula, rilru in siam thiam zawk pawh ka ring" tiin felfai takin U Mamuana chuan a sawi a, hrehawm ka va han ti tak.




Ka pindan kawngkhar chu dim deuha Rawn hawngin Vli a Rawn chhuak a, "Engnge in thil sawi kha a awmzia, Sangbawihi pa hi ka pa maw?" a Rawn ti leh a, engkim a lang vek tawh chung hian a van la harsa ngawih ngawih tak em.




"Lo inrawlh ve suh Vanlalfel" ti hlukin a fanu chu lo khap tum mah se naupangchhia a ni tawhlo a, kan thu khel lai hi thu ho mai mai a nilo bawk nen Vli chuan ngawih bo mai mai a tum biklo tawp tih hriat takin,
"A teuhlo mai, ka unaunu neihchhun chunga i chet dan hi ka nu'n hria se engtin tak ngai ang maw?" a tih chuan chuan khauh leh vin zet hian "Vanlalfel" a lo ti leh hluk a, ka pi a Rawn tawngchhuak ve leh ta.




"A tawk ta e, hman atanga lo inthup tawh thudik hling nei chu a Rawn lang chhuak ta anih hi, a va han rapthlak ngai em ve le'h, Mama, I farnu neihchhun fanu chunga I chet duh dan chuan min va han ti na em, Pathian pawh hian a ngaidam duh dawn che em maw ni le?" a ti a, a tawng ring hranlo, a aw lawi rût leh zawi sapah chuan a thinlung nat zia a Rawn langchhuak hialin ka hria.



"Ka pa I ni hi ka zak lutuk, I hmel hi ka hmu peih hlawllo" tih pahin Vli chu pawn lamah a tlan chhuak ta daih a, um zui chi ah pawh kan ngai rihlo.



"Ni e, engkim hi ka thiamloh vek anih hi, inchhir leh ngaihdam dil in sawtna nei lo mah se, Merte, min ngaihdam ka ngai a ni" a ti ve ta sup a, "Naktuk zing nghah a ngailo, Vli chu a duh chen chen kan hnenah a awm rih anga, ngaihtuah a ngailo ang, kan boruak heti hi a ni a, nangzawng zanin ah la la hian haw la a that ka ring" tiin ka pu in thutawp a siam a, tuman kan hniallo.

Ka putea pawh a bungrua tlem azawng nen a in khai chhuak ve nghal a, a tlan liam hnu chuan ka pi'n "A va han rapthlak ngai em ve le Bawihte, lo kal teh" tiin a àwm ah min pawm a, ka mittui ka dang zolo.


"Kan hriatloha i tawrhna zozai te kha a rapthlak ka ti emai ka tunu, nangzawng i tuarchhel êm a I tuarchhuak thei mai chauh a ni, khang I tawrhna zawng zawng phena kan lo hau thin che kha min ngaidam teh" a ti mawlh mawlh a, "Ka pi chutiang sawi suh, min hmangaih zia ka hria alawm, min enkawl danah hian lungawi lohna ka neilo" ka ti tuau a, ka pu leh U Mamuana te tan tak pawh tihdan tur a vang viau ang ka ring.




Ka pi nen duhtawka kan in tah khum chiam hnuah ka pu zawk chuan "Vli kha va umzui teh, nangman bia la, a hriatthiam theih dan tur in sawipui I tum dawn nia" a ti a, bu nghatin ka kawrlum ka in thawlh sawk sawk a, U Mamuana chu lo la awm tura ka chah hnu ah Vli zawng tur chuan ka tlanchhuak ve leh nghal a.









End of chapter-21
Ads click leh comment ah khan khawngaihin tan min lakpui leh rawh u aw,,, feedback mamawh ve reng kan ni si a


Show post links
Top

[Ngaia]

MANAGER MAMUANA
By Ziki_nu




Chapter-22




Ka mit bul kual kham lutuk vang chuan ka kut pahnih in dim deuhin ka nuai a, men pawh ka meng hleithei lo, ka bulah Vli a lo la mu a, Bawihtei rak ri chu choka lamah daih ka hre tawh.




Vli tih harh hlau deuh chung chuan ka tho chhuak a, sana ka en chu dar 8 a lo ri thuak tawh.


Darthlalang hmaah chuan ka ding vang vang a, nizan thil thlengte ka ngaihtuah chhuak leh nghal bawk a, za vaklo a nui sakin, "Tunah chuan ka nunah engmah zep leh thup ngai a awm ta lo e" tiin ka phun sap a.




Vli chu ka en leh a, nizan kan tlaivar titih a, ka va zawn khan kan in atanga hla vaklo tuikhur bula waiting shed ah amahin a lo thu a, rei deuh kan titi a, ka chunga a pa chetdan khan a thawng em a, a hrethiam theilo viau na in "Ka pa pawh ni se thil tisual tu zawk lam chu ka tang theilo ang" a ti ve a, keimah avanga a pa haw tur in ka duh hauhlo, mahse naupang â a ni tawh lo a, duhthlanna siam thei rual a ni tawh tlat a ni. A tan a zahthlak zia leh hrehawm a tih tur zia ka hriatthiam pui a, ka putea chu engtin zel nge a awm ang pawh ka hrelo, Nu Ruati hian hre ve ta se engtinnge a ngaih ang le.. An inthen emaw a ni hial thei a, keimah vanga chutiang em em a thlen chu ka duh chuanglo. Ka putea te nupa hi chu keini lak atang hian inthiar fihlim hmak se pawi ka tilo a, mahse inthen kher tur chuan ka duh lo thung.




Ka Sam ka hui mam thuak thuak hnu ah pindan atang chuan ka chhuak a, U Mamuana ka hriatchhuah rualin ka iptea phone chu ka phawrh chhuak leh nghal a, ka pu leh Bawihtei an in awm tlei rih bawk nen kawmchar lama chhuah pahin nizan lama U Mamuana message lo hnutchhiah tawh chu ka hawng ve chauh a.



*Bible pawhin 'engahmah mangang suh u, engkimah tawngtai leh dilin' a tih kha, Pathian ka ni e chu ka tilo a, mahse rintur dik Pathian kan rin tlat chuan ka hmaa harsatna chu kan hneh dun zel thei ang, ka rin ang che hian min ring la, min rin angin ka awm ngei ngei ang, ka nu vangin hrehawm i ti tih ka hria a, ka hmin thei nganglo anih pawhin ka nei tho ang che, chu chu ka thutiam a ni.
I putea vanga hun khirh tak i tawn mekah hian i kianga awma pui reng theih che ka chak a, min mamawh hun apianga i koh tur in ka in ring reng ania, tunah hrehawm deuh mah se kan la tuarchhuak ngei ngei ang*


Tih a lo ni a, a type thui ve khawp mai.


Lawm loh in ka nui ver ver a, nizan lamah khan rei deuh Vli nen kan titi hnuah kan haw ta chauh kha ani a, U Mamuama lam ka lo ngaihtuah tawh chiahloh avangin A lo haw daih tawh zawkte ka ring a, mahse sitting room lamah ka pi leh pute nen min lo la nghak thap a, zing dar 1 rik dawn velah a haw ve ta chauh. Nilengin motor a khalh bawk si a, kan boruakin a zirlo bawk si, a chau ngawtin ka ring.



Ka pi'n min koh avangin reply hmasa ta lo chuan ka lut leh rih a, a type thui lutuk a ka chhiar rei phah vek.



Dawhkana a alu vel lai chu thawh San pahin "Lo chhunzawm teh, vawk note ho hnute pek a hun tlat" a ti a, a kut chu sil lemlo in a hru fai nawk nawk a, kawmcharah a tlan chhuak nghal a.




Alu ka vel laiin ka phone a rawn ri a, Nu Ruati hming ka hmuh rual chuan ka meng vak ringawt a,



Screen chu ka en ren rawn hnu ah "Hello" ka ti ta sap a, lehlam atang chuan min rawn hauh nghal chiam ka rin laiin a reh deuh vang vang phawt a,

"I putea rawn haw hi A awm dan a diklo a, zingkarah sawi lawk pawh awmlo in a rawn thleng hlawl a, Bawihtei a rawn hruai tel bawk silo, thil thleng a awm em ni?" A rawn ti dam vei thluam a, tianga min biak lohna chin pawh hi ka hre tawhlo.



" Vli chu be ta che" ka tih chuan "Ka call a, a la mu em ni? A chhang theilo a" a rawn ti leh zel a, a sawi rual deuh thaw chuan pindan atang Vli a rawn chhuak phak chual a,ka lo en ran bawk nen 'engnge' tih nan a mithmul a rawn San zauh a, "Hei a rawn tho chiah" tia Nu Ruati zawk ka biak chuan Vli'n "Tunge?" a rawn ti nawn leh a, ka sawi hma in ka phone chu min chhuh nghal ringawt bawk.




A beng bula dah pahin "Tunge?" a ti a, a tawng nem hranlo.

A nu aw a hriat rual chuan keimah zawk min rawn melh vak a, "Ka sawi peih rihlo, keichu tunkar chhung ka la cham rih dawn a, ka lo haw hun tur chu ka rawn hrilh mai ang che u" a ti deuh hmak a, a nu hnena hrilh tawp chu a hreh ve ngang aniang thil thleng engmah sawi lovin an in be tluan thei hram a.



"Hrilh i tum em?"
Ka phone min pek let leh pah chuan a ti zawi sap a, ka lu lo thing in "I tum te anih loh chuan keichuan ka tumlo, I nu'n a hriat chuan a tuar zolo anga, keimah zawk pawh min dem daih mai thei, a tul viau anih loh chuan sawi kher a ngai hleinem, buaina a punlun mai mai ang" ka lo ti a, ka ngaihdan diktak ka sawi bawk.




Ka putea ka huatna hi chu eng thil mah hian a thlak danglam dawn tawhlo a, a nungchang hneawm lutuk hi a thlak danglam ve te anih chuan sawi chhuah leh kher ka tum tawhlo. Chumi tur erawh chuan aman a zir viau a ngai ve thung ang.



Tukthuan kan ei laiin Spa leh Jacoba an rawn lut hlawl a, kan boruakin a zirlo bawk nen ka thiante ho pawh biak nachang ka lo la hrelo.



"Tuk in zingah Manager Mamuana hmu lo ila chuan in rawn haw tawh tih pawh kan hre tawp nang, pasal i nei dawn dek dek a I induh nghal ringawt a ni maw" Jacoba chuan a ti nghal hluk hluk a, ka pi leh pute pawh an nui ve tawp.



"Chutiang pawh a nilo, kan buai reuh lutuk a, ka la rawn hrilh hman lo cheu alawm, khawnge Puia leh Engtheii" ka tih chuan "Engtheii a damlo, chupawh chu I hre tawp nang, I be ngailoa a vui teh mai ania, khumah a mu tlat a, zung tur leh e tur bakin a tho duhlo hrim hrim, a khawsik a reh thei lo a, a in la thu em em ringawt" a lo ti leh a, a va han zia lo tak e aw...



"A van pawi ve, a reh ka ti ru reng tho a, kei lahin biak nachang ka hre bawk si lo, lo thu phawt teh u, hei ka kham dawn" ka ti a, thutthleng seiah chuan na zetin an thu thla dawp a, ka pi'n rum deuha keimah min melh pahin "Thutthlengte kha chhe theilo thutin thut ziah suh u, in thutna thin pawh a kul ngûk tawh kha" a ti hlak a, choka atang an thutna lai tak hmu theilo mah ila ka pi a rawn tawngchhuak tawh bawk nen ka thiante pahnih chu an reh zui hmak a, chhan pawh an rawn chhang let lo.





Ka ei kham hnuah Bawihtei chaw hrai pahin ka thiante bulah ka thu thla ve a, an lawm nui thiam a, chaw pawh ka ei tir teuh mai.


"Engtheii chu tunah a la na viau em ni?" ka tih chuan "Amah hi chu a harh tha a, mahse a khawsik a la awm miau avangin damlo awmin a la awm a ni mai, a tawng zawt zawt thei a, chaw pawh a ei teuh thei, mahse a khawsik a reh thei miau silo a, a mu tlat bawk si, a sawi ang ang tih sak zel a la ngai tho" Spa'n a lo ti ve nuah nuah a, ka nui ta ringawt.



"Chhun lamah hna in thawh dawnloh chuan va leng phei ila, Puia kan sawm bawk ang" ka tih chuan lu an thing rual nghut nghut a, Jacoba chuan thle luk luk pah hian "Kan lo phei lamah Manager Mamuana'n a huan tihfai pui turin min sawm a, kan pui dawn" a ti heu a, Laljacoba hi chuan Manager hi a ti tel kher zel, awih lo zeta Spa zawk ka melh chuan a lo bu ve nghut tho mai.




"Inhlawh turin min sawm hmasa a, mahse a huan a zau chuanglo a, hna dang kan neihloh ni a ni bawk nen puih kan tum ta zawk anih kha, in ina rawn lan loh tawp aiah kan lo kal zawk mai mai, Engtheii chu lo va kan ngei ngei rawh, In rawn haw tih pawh a la hrelo ang, va surprise la, eitur kensak ngei ngei ang che, a hau hrep dawn che tih hre lawk bawk la" tiin Spa'n min chah lawk thlap a, nui hak hak chungin ka bu ve nghat.





An chhuah hnuah Vli a awm tho bawk nen thleng pawh sengpui lovin Bawihtei ka bualfai nghal a, Engtheii te ina kal ka sawi chuan ka pi pawhin min hrethiam khawp mai.




Dar 10 velah be lawk miahlo in an in lamah kan kal a, Nu Edeni'n kawtzawlah aieng zailep sa tlem azawng a lo pho a, min hmuh rual chuan "Ehee Mertei te nufa chu engtik in nge in rawn haw a?" a lo ti ve ngei a, a vin rihlo khawp mai.



"Nimin ah lawk, Lalmuani a damlo tih Spate'n min hrilh a, kan lo kal nghal anih hi" ka tih chuan a thlangra ken chu dah thla pahin "Awi awi awi I thiannu damlo chu e Merte, enkawl ngaihna pawh ka hrelo, a tawng zuah zuah thei a, a khawsik lah a sang fu bawk si, damlo ngailo tih tak ah a'n pangchang ve thin bawk sia maw, a pangchang thiamlo bawk si, thin a ti rim zawk" a ti nghal hlak hlak a, Nu Edeni àng hi chu a hmuhnawm bawk a ni Bawihtei pawhin ka àng hau in a en kar mai.



Ka thiannu pindan lama kan luh chuan rizai in a lo in khuh phui vek a, chhun pachangah lehnghal a vawh loh tehreng nen, "Engthei" tiin dim deuhin ka ko dek dek a, a rizai chu rawn hlim phut in rum zet hian min rawn melh a, min hmu chu mak ti hmel pawh a pu lo.




"Ka ngei nufa cheu ania, Lalmuanpuia pawh kha ka ngei tho, in zin ve dek dek a mi biakna chang in hrelo nghal ringawt mai" tiin min hau nghal pang pang a, a aw leh hmel atang ringawt chuan a damlo tih a hriat loh reng reng.



"Aw,,, chutianga inbiakna hun a awm hleinem, chanchin duhawm lo deuh kan rawn hawn ania, min hau ringawt suh" ka tih chuan a hmel a danglam nghal vek a, "Rawn thu phawt teh u" a tih takah chuan a khumah ka thu thla a, Bawihtei chu a lo ban nghal zat bawk.



"Beisei ang in thil a kal vak nange" a tih chuan "Ka sawi peih rihlo e a, I damloh chhan hi sawi phawt ang" ka ti tlat a, a thaw chhuak hawk a, a khum sir dawhkan tea tui bottle chu banin a in zui khawlh khawlh a, "Ka khawsik hi a reh thei hleinem, vawt ka ti em em ringawt a, nachhawkna ka ei lahin a lum leh huam bawk si, keimah tak hi chu ka harh tha reng mawle, ka nu lah hi fanu te damlo pawh vin vak vak zel ringawt mai, ka hne ania" a ti hmarh hmarh a, a insawi thinrim dawn takngiala ka hriat avangin "Nang pawn tinge min lo hrilh ve mai loh a? Chanchin min lo zawh te pawh ka beisei ve tho a" ka ti a, min melh rum vak hnu ah Bawihtei chu a lawm zui daih a.




Nu Edeni dawr kal turin Bawihtei chu a rawn sawm chhuak a, kan thianduna titi na hun min siamsak ve ah ngaiin ka lawm rilru khawp mai.



"Chhura awm ta lo ve, a bul atang engkim min hrilh ang che, rawn thu hnai teh" tih pahin ka thiannu chuan a lamah min pawt phei sawk a, ka tum vang em em pawh ni lovin ka mu ve ta daih leh nghal.




"I pi thiannu te in ah chuan ami in thlen tak a?" a ti sap a, "Umm khawvel zim zia chu maw" ka ti hluai a, kan thlenna in a U Kimkimi leh Muanpuii inkawm nasat zia te, U Mamuana te chhungkaw laka Muanpuii a mikhualloh zia leh Nu Maawmi min lo dawnsawn dan duhawm lo tak takte chu ka hrilh malh malh a, uluk deuhin ka thiannu chuan a ngaithla niin ka hria, rizai chu sin hlunin min melh kar a, ka sawi zawh meuh chuan ka thaw chhuak ve ham ham mai.




"A van zim tak ve khawvel chu, Pathian pawh hi a mak e tiraw, Muanpuii kan ngei nen nen I thlen in nu nen best friend an lo ni daih a, I thlen in te thenawmnu tal ni se tha tur ania" a ti kher a, a ti ho zo leh vek tawh.


"Fiamthu mood ah pawh ka chenglo ania, U Mamuana'n min neih tum viau mah se a nu in min ngainat theih loh chuan nuam ka ti dawn chuanglo a, khawvel thil lama thlir in engmah chhuan tur ka nei lo a, Muanpuii nen chuan tehkhin chi pawh kan nilo, keimah vanga an chhungkua an buai hrep te ka hlau zawk" ka ti sap sap a, kan mu tlang bawk si, tawng zawi deuh pawh ni ila thawm dang a awm lo a, a hre phak vek tho.




"A ni tho mai, mahse tih theih kan neilo e, U Mamuana kuta innghah tawp bak chu Pathian hnena tawngtai a ni mai" thutak deuh hian a ti ve ngei a, "Nizan ah thil thleng a awm a" ka tih leh tak ah chuan a hma aia chiang lehzual hian min rawn melh a, "Sawi rawh" tih pahin ka lamah a rawn tawlh hnai pah sat sat bawk.




"Midang bulah I sawi chhuaklo ang tiraw" ka tih chuan "Mawl mawl suh, ka sawi chhuah I ring em ni a? Min hrilh vat mai teh beng I ti vir" min ti let zek a, ka aw ka then kharh kharh hnu ah nizan thil thleng te chu ka sawi ve leh ta a.


Ka laka ka putea chet duh dan a han hre chiah chu a mitmeng a talbuai ve tap mai, "I putea I nelloh em em chhan pawh a lo ni reng a ni maw?" a ti tham tiak a, ka thiannu zawk a mittui a tling lung tawh bawk nen keipawhin insum har ka ti, ngawi rengin kan mut hmunah chuan kan in kuah ta ringawt a, ka in sût hraih rualin ka thiannu chu a rawn tap chhuak ve hawk a, engtia rei nge chutiang chuan kan awm pawh ka hrelo.



Nu Edeni rawn let leh hnu ah Engtheii pawh a rawn tho chhuak ve peih tawh a, dawrte ah waiwai chhum tur leiin kan chhuak a, Spa te khan eitur kensak ngei ngei tur khan min tia, ka theihnghilh tak avangin kan waiwai leina man chu keiman ka pe ta vek.



Chawhnu lamah kan haw leh chauh a, U Mamuana nen pawh kan la in be leh lo, ka pi in vawkchaw khawn a duh avangin eirawng ka bawl a, Bawihtei chu thenawm ah an la phei a, a tlei ve khawp mai.



"Ka pa vanga I vanduaina hi engtikah mah tihbo theih ani tawh dawn lo a, khatiang zozai I tuar chunga Pathiana vui miah loa amah I la fak thei hi ka ngaisang che" ka nui sak a,
Tapchhakah ka chawhmeh chhuan ka vil a, ka bulah Vli a thu bawk a, a thil sawi chu ngaihthlak a hahdam viau mai.!





End of chapter-22
Ads click leh comment kha aw❤


*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WRITER TE HLAWH KAN TUMSAK ZEL TIH KAN HRE THEUH DAWN NIA, KAN LAWM E***


Show post links
Top

[Ngaia]

MANAGER MAMUANA
By Ziki_nu



Chapter-23


Ka putea chetdan ka sawi chhuah atangin ni hnih a liam leh tawh a, kartawp lam a ni ta bawk nen Hlimpuii chawlh hmang pawh a rawn haw leh tawh a, engmah chanchin a la ve hre bawk silo, a hriat hunah chuan a au vak ka ring, a phi cheng zel bawk si, ka hrilh ve lo tawp dawn zawk nge mawni.

Vli a la awm ve reng a, tuman thil thlengte kha sawi chhuak tawhlo mah ila kan rilru ah kan la pai vek tih ka hria a, ngaihtuah zawmloh tawp atan chuan a serious em bawk a ni.



"Zanin ah i thiante an lo leng ang tiraw" zanriah ei laia Vli'n a tih chuan "Len ka ring, an sawi lawk loh pawn an lo kal ziah alawm" ka lo ti mai a, "Jacoba a lo kal ve ngem le?" a ti sap chu keimah min zawt chiah ni pawhin ka hrelo, a sawi zawi emai.


"Kal ang, a ni ber a rawn kalloh te chuan" ka tih laiin ka pi chuan "Jacoba berkher saw I duh tlat bawk sia, a va han ngaihzawn tlakloh ber mai tak em, I U Mary ang hian mipa tha deuh, in nghahna tlak tur te zawng ve ta che" a lo ti nghal hlaih hlaih a, sawi fuhlo a in ti ve ngawtin ka ring.



"A... Ka pi vak vak zel hi a, in nghahna tlak ka la mamawh hleinem, pawl 11 pawh ka la pass chhuak lo a, mahni rualpui ngaizawng mai mai rual lek alawm ka la nih, pasal neih te chu ka la tum lo hrim hrim" a lo ti vat a, ka lo nuih hak laiin ka pi chuan nui miahlo hian "Chutiang ngawt a nilo, tunlai tleirawl chhuak thar ho hian hmangaihna te hi an la na thei zek ania, i ngaizawng anih pawhin rilru zawng zawng pe suh ang che, a chin tawk hriat tur" a ti leh a, a tar ve tawh reuh nen thil te hi a hre thei si.



Dar 7 bawrah ka thiante chu U Mamuana ho in an rawn in zui lut dam dam a, kan pahnih inkar ah buaina kan nei lo bawk a, ka thiante pawhin an ngaina a, kan haw hlim deuha Engtheii'n a hau vak tih loh kha chu tumah kan la in hau leh lo.



"Naktuk chu U Mamuana vawk in tur sak kan tum a, in hman leh lo kal ve ula" Puia'n a tih chuan hmeichhe ho chu kan in en ha hlawm a, Engtheii'n "Vawk i vulh dawn maw?" tia U Mamuana a zawh chuan a lo bu nghut a, "Tu vawk?" ka lo ti ve thung.




"Ele,,, nangmahni vawk" a lo ti then a, min la nuih suk zui.


"Mamuana te chuan a pa chal tur a hauh fel daih tawh alawm, I hre ve reng emaw ka tia" tiin choka lam atang ka pi a rawn au ve lang lang a, U Mamuana en chung chuan "Hre teuh nang aw... Engmah min hrilh ve duh hleinem" ka ti kher a, thinrima sawi pawh ka ni hranlo, ka fiam chak ve mai mai a ni.



Chhuatah pher phah in kan thu bial leh laih a, inneih hial sawi ve tawh mah ila naupangchhia taka chet chu kan la bansan thei meuhlo a ni, thil hrehawm zawk zawk a lo ni bawk silo nen.


Vli pawh Bawihtei a tih mut hnu ah a rawn thu thla ve a, Jacoba bula thut a rem ber avangin a zak chung chung kan thut luih tir a, Laljacoba lah lo in la zei leh pek, awi ka sawi peihlo ka ten zawk e a.




Guitar ka perh a, Tza Ralte in Ka thian tih hla a sak kha ka perh rem a, thiam lo deuhin kan zai lung lung hlawm mai.



"Thian hla kan sak dawn ro ro chuan Saiwanah hla te kha sa zawk ila, a boring emai ah" tiin engtheii a tau leh ringawt tawh a, "Perh rem a har alawm" ka tih pawhin "A hangin sa mai ang u" a ti talh a, a ti tau peih si, phur lo deuhin kan sa a, a tawpah chuan kan lam a ni ringawt tawh.




Ka pi te mu tur in bengchheng tawhlo tura min tih avangin guitar chu kan dah a, ka thiante pawh haw tumin an ding nghal suau mai.



"Dar 9 pawh a la rik loh hi" ka tih chuan "Kan Manager nen khan lo inkhawm tawh ru, bengchheng lova in kawm dan in thiam deuh ang" an ti kher a, an va han ngeiawm thei tak.



Vli'n kawtzawl thleng a va thlah hlawm a, a rawn luh leh rual chuan U Mamuana'n a lo be vat a, "Awm ve reng la a tha ang, Mary I awl hneh si" a ti ve ngei a, nui chungin Vli chuan "Ka awl hneh lo lutuk zawk, lo in kawm rawh u Bawihtei ka lo va mutpui ang" tiin pindan lamah min luhsan ta daih a, a reh ta huai mai.



Ngawi rengin ka bul ami chuan ka kut chu min khalh sak neuh neuh a, "I vawk vulh tum thu min hrilh ve miahlo" ka tih chuan "Hrilh ngailo in I hre mai alawm" a lo ti mai a, a va han zeilo ber mai tak em.

"Nangma hnen atang ngeia hriat te pawh a chakawm ve alawm" ka ti leh hram a, hmannia ka thiante nen a huan an tih fai pawh kha a vawk in sakna tur a ni hrim hrim.



"In vawkte ania ka lak dawn" a ti sup ringawt a, thil dang a sawi leh dawn emaw ka tih laiin a ngawi leh tlat bawk si.



"Anih leh vawk te chu la ta la, engtinnge I enkawl anga, nitin hna ah I kal a, vawk chaw zawnna leh chhumna hun pawh I nei nang, nangman leiin midang vulh tir la chu ka la hrethiam a" ka ti leh halh a, Nupuii no neih tirha a che vel zeilo lutuk ngaihtuah let phei kha chuan amaha vawk vulh chi a ni lo hrim hrim.



"Aw,, tunge enkawl vak se I tih a? Nangman a ni mai alawm" a tih chuan "Maw?" ka ti vak a, ka tawng ring bawk nen a kut in ka hmui a rawn hup thawk a, chengthir tiat ngawtin kan in melhin ka ring.


"Kan innei dawn tho a, ka lo in buatsaih lawk ve alawm" a ti zawi sup a, a nui bawk si lo, "A.... Kal sawn teh" tih pahin ka nam vak a, ka nuih pawh a za lo.



"Vawk vulh turin ami nupuia min neih i tum a" ka ti a, ka tum bur tawh.

"Ni nang aw,, office ka kal chhungin vawk chaw i lo chhum anga, ka ban velah ka pe thin dawn alawm, zing ah i thawh ve hma in ka pe ziah bawk anga" te a ti vel a, chutiang chu a taka a thlen dik hma chuan ka awihlo bur.



"A sawi chauh a awl, a tak tak chu ni se i buaipui peih awmlo emai, I zei lo si" ka ti a, ka la nui theilo.


A ti awm ang lo ve bawk alawm, inneih kan sawi ri dek dek a, ka vulh tur vawkte a lo hauh nghal ringawt a, ka vulh peihloh vang em em pawh a ni lo, nilenga office a Kal thin daih phei chuan tih tur ka nei dawnlo si a, a tha phian zawk mai thei a ni. Mahse ka la tau ve laklawh rih a, ka nui mai mai thei rihlo.




"Thinrim phah kherlo la, karleh ah U Mami lo zin a tum lehnghal" a tih tak ah chuan "Engnge a lo tih dawn?" ka lo ti vat a, "A lo zin mai mai dawn aniang, sawm pawh ka sawmlo" a ti ringawt a, kan sawi zawm lemlo.




Vawkte vang khan kan boruak a dik thei chiahlo a, thinrim tak tak lo mah ila a nuam chiah tawhlo, "Karleh lamah ka thiante ho school an lut leh vek tawh dawn nia, a khawhar thlak leh ngawt ang" ka tih chuan "U Mami nen in lo inkawm thin dawn alawm" a ti liam puat a, vei em em a neihloh hmel thei ngawt mai ka bialpa Mamuana ve hi chu..




A haw tur chu kawtzawlah ka zui chhuak ve a, engmah sawi lemlo in kan ding deuh vang vang a, ka thiante ruala a lo kal avangin motor a keng bawk silo, an veng a hla ve reuh sia, zan a rei tawh bawk nen ka khawngaih ve reuh.



"I hlau lo tiraw?" nui paha ka tih chuan "Mary" a lo ti sup a, a thutak hmel reuh bawk nen "Umm" ka ti ringawt a, "Engpawh thleng se ka nei ngei ngei ang che" tih pahin min din hnaih hrut a, ka lo melh chho ve kiau bawk a.




Ka dar tawn tawnah dawmin a rawn kun hniam a, a chalin ka chal a tauh dat rual chuan ka nui sak a, a ni pawh a khi ve suk tho.



"Ka hmangaih lutuk che hi mak ka in ti zawk Lalpekhlu" a ti sup a, a tawng zawi lutuk ringawt, mahse a aw zawi leh thuk ruih ah hian ka tuiral zawih zawih lo chauh chu a nih hi.



Ka nui a, sawi tur ka hrelo a ni "Ka nuna I lo lang hi ka lawm tak zet, ka kalsan ngai miahlo ang che" a ti leh a, ka va han thlamuang ngawih ngawih tak em!



Thli rawn thaw vuk vuk vang chuan a in la hrang hlek a, a hawi kual thuak hnu ah ka hmuiah a rawn fawp zauh a, "Lut tawh rawh, mutthilh nghal tum la, keipawh ka mu nghal ang" a tih chuan ka bu nghat nghat a,, a kal liam hnu ah inchhungah ka lut ve ta chauh.





**



Zingkarah Vli zai ri in min ti harh a, khumah chuan keimah chiah ka lo mu leh tawh, sana ka en vat a, dar 7 a lo pel leh der tawh mai, tunlai thawh ka harsat lutuk hi engvang nge mawni le..




Pindan atanga chhuah pah chuan "Zing karah vocal exercise la turin an ti che em ni?" tiin Vli chu ka en a, Tv hmaa remote hum ran chungin a zai luah luah a, zingkarah lehnghal hetianga a khawsak chhan hi ka hre chak lutuk.



"Vocal exercise te chu sawi loh, physical exercise pawh ka la zat zat tawh dawn" a ti a, a tho fuh hmel bik kher mai.



"I lo tho chiah na in dawrah soda va lei nghal lawk teh, I naui kha tukin chu a tirh tlak hlawlloh" tih pahin ka pi chuan pawisa min hmehbel chawt chawt a, thawhphan hi a sawi ve theihloh reng reng.




Bawihtei hruaiin kan veng dawr hnai berah kan kal a, dawr kawtah chuan Isaca te thianho inkhelh tum ni awm tak an lo thu thap a, Isaca nen hian kan inhmuh lohna chin pawh ka hre chiah tawhlo, kan in rualkhat a, a class erawh a hniam deuh zawk thin. Min lo be ve reng thin a, mahse U Mamuana nen kan inzui atang chuan a reh zui ta hmak, min block nge pawh ka hre biklo.




Kan thil lei tur ka lei zawh hnua Bawihtei ka kai leh tur chiah chu Isaca thianpa chuan a lo ko ve ngei a, a hming pawh ka hre chiahlo, "I dam maw Mary" Isaca chuan a lo ti ve sup a, a inthlahrun hmel kher mai.


"Dam lutuk e, in dam zawk em?" ka tih chuan a bu nghut a, en pawh min en chiang lovin a kun deuh tlat leh nghal.



"Pasal i nei dawn an tia, tak tak ami?" A thianpa bawk chuan a lo ti leh a, engtinnge maw mi hian thil hi an hriat theih em em bik le.



"Dam te chuan kan la nei ve ang chu" ka ti ringawt a, za vaklo in ka nui pah hak bawk. Kan hmanhmawh deuh thu sawiin Bawihtei kai chung chuan ka kalsan ta hlawm a, U Mamuana hi tawng ta lovin nula pangai te chu la ni ve ila Isaca nen pawh khan kan in ngaizawng ve mial mahna..
Ka ngaihtuahna atthlak zet vang chuan keimahin ka nui chhuak hak a, atthlak tak a ni tawp mai.





Tukthuan kan ei lai pawhin Vli chu a nui thaw reng a, ka ngaih a tha lo lek lek tawh.


"Tinge I nuih reng a, damdawi diklo I ei em ni?" ka tih chuan lawmlo zetin min melh rum vak a, "Chutiang a ni lo, vawiin ah U Mamuana vawk in tur saknaa kal ve turin Jacoba'n min sawm a" a ti a, ka pi nen kan in en ha ringawt..


"Chutiang a ho lutuk, kartawp ania insuk tur a tam em hi" ka pi'n a tih chuan "Zanah ka su mai dawn lawm, duhsak deuhin min sawm ve a kalloh te chu mawi pawh a mawilo" pakhat lah chuan a ti tlat a, kal chu a tum hmel khawp mai.



Ka pi leh pute pawhin engmah an sawi zawm lemlo, an phalloh tlat chu ka ringlo hrim hrim.



U Mamuana'n kal ve turin min sawm nasa viau a, mahse in lamah tih tur neuh neuh ka nei bawk nen chawhma lamah chuan ka hmanloh tur thu ka hrilh a, Vli leh Bawihtei an lo va kal hmasa a, tihtur a tam bawk a mawng pawh ka hung hman meuhlo a ni.



Chawhnu lamah Spa'n min lo call a, "Engtheii leh Hlimpuii pawh an lo kal tawh, nangmah chiah I Kim tawhlo" a rawn ti a, ka pi ka dil hnu ah ka chhuak ve leh hnuhnawh.



"I lo thleng har lutuk a, I ei tura kan dahthat Bawihtei ka ei tir leh vek" Engtheii'n a lo ti duai a, a va han awihawm loh tak, amah hian a ei bak a nilo ang.



"Thil ka ei tawh alawm, khawnge in vawk in sak chu" ka tih chuan "Huanah" an lo ti rual dual a, "Lo kal rawh ka en pui ang che" tiin U Mamuana chu a thutna atang a rawn tho tharh a, nui ver verin a huan thlanglam ah chuan kan in zui thla a, kan vawk in kawng ai ngawt chuan a kal pawh a hahdam deuh zawk alawm.




"Ehee in va han sa lian em em, a no te I la dawn sia, a bang leh bang inkarah hian a chhuak leng va va ang chu" ka ti deuh hluai a, vawk no te pakhat awm na tur chuan a lian in a dahlau mah mah, ka thiante pawn hrilhfiah ve tur alawm mawle..


"A bang atan chuan tile kan vuah ang chu ka lo tia, ruah vel a sur changin bang phui lo chu a hrehawm dawn emai, hetianga àwng sung tur hi chuan ka design bik hleinem" a ti sup sup a, sawi fuh in tih hmel zetin min nuih pah vur vur bawk.




"Vawk in atan tile an hman ngai pawh ka hre lo e a" ka ti a, a duh ang thlapin han sa phawt teh se, a hahthlak meh meh emai.



"Arang lamin kan innei dawn tho a, vawk in sir ah hian thlai te pawh kan ching anga, kan eikhawp thar te chu a har vak nang" a ti ve ngei a, a va han ngaihtuah thui thei bik tak.



Ka nuih a zat viau rualin ka hlim a, a hma hun zawng zawng suangtuahnaa kei ka tel ve ta zel chu hriat a hahdam khawp mai.



Huan atanga kan let leh hnu chuan haw nghal mai an rawt a, rei pawh ka awm ve hmanlo, "Zanin chu inkhawm zan ani sia, ban lamah chuan a tlai deuh tawh bawk nen ka lo leng hman kherlo mai thei" a tih chuan ka bu nghat nghat a, "Keini pawh sermon inkhawm ania kan rei ka ring" ka ti ve a, tha deuhin kan in thlah a, Engtheii leh Vli nen, Bawihtei ka pawm a, kan in zui haw hnek hnek hlawm mai.




Engtheii'n an in penga min kalsan hnuah Vli nen chauh chuan kan titi haw a, "Vanduaina i tawh tam tak karah i vanneihna turin U Mamuana hi Pathianin a rawn tir anih hi, a hmaa hmeichhe vanduai tak kha hmeichhe awhawm ber pawl I ni ve tawh niin ka hria" a ti sap sap a, a nui pah sen sen a, a thinlung tak in min lawmpuiin ka hria.



"A nia sin Vl, harsatna chu kan la tawk chho zel dawn a, mahse tun atan chuan Pathianin ka chana a ruat ah hian ka lungawi khawp mai" ka ti a, kan nui dun hak hak a.







End of chapter 23
In comment in min ti phur nasa thin khawp mai, ka lawm em em vek ania🥰(lo la comment ve zel rawh u aw)


Show post links
Top

[Ngaia]

MANAGER MAMUANA
By Ziki_nu



Chapter-24


Pathianni kan hmang ral a, thingtlang khua tih tak ah U Mamuana nena kan chanchin chu miten an lo hre leh tawh khawp mai.



'Pasal i nei dawn em ni?' tia zawhna ka dawng deuh zut reng a, ka ning lek lek zawk.


U Mamuana nena kan inkar chu a tha rih a, ka putea leh Nu Ruati te chanchin engmah kan hre zui rihlo thung. Vli ber hian a be huphurh ngawih ngawih a, ka laka a pa chet duh dan vang khan a lung a la dam theilo a ni. Ka pi leh pute pawhin i awm duh chen chen awm rawh an ti a, an school chawlh lai a ni bawk nen a duhlo chunga nawr haw chu kan tumlo bur vek a ni.




Ka thiante'n school an lut leh vek tawh a, Vli vangin ka khawhar lutuk tur erawh a zia deuh thung.



"Vawiin ah U Mamuana u a lo thleng dawn I ti tiraw" vawk chaw kan pek laia a tih chuan ka lo bu nghat nghat a, thawhlehni a ni a, U Mami lo thlen hun tura a sawi kha a ni tawh.



"Ka hmu ve chak reuh e, a hmeltha ve tho em?" a tih chuan nui hakin "Hmeltha lutuk, a hleitling a, a zahawm a ni tawp, U Mamuana hian nula senior a han ti thin tak na in, a la upat hmel vak pawh ka ti chuanglo" ka ti deuh duah a, U Mami nui sen sen hmel ka mitthla zui a, ka nui ve ringawt lehnghal.




Vawk chaw kan pek zawhah thenawmnu rualin Bawihtei chu wadi ah a kal leh a, chhunlamah hi chuan min awm chhawk thei viau mai. Kan veng lamah a kawm rualpui an awmloh em avangin thian a kawm tam lutuk lova, pawi ka ti lem lo thung.


Zanriah ei khamah U Mamuana'n min lo call a, ka chhan rual chuan U Mami tawng ri zawk ka hre ta thung.


"I dam maw Mary?" tha tho tih hriat zet hian a rawn ti lauh a, "Aw dam e, I lo thleng tluang maw?" ka tih chuan an tluan viau thu a sawi a, an in lamah Bawihtei nen kan len theih dawn leh dawnloh min zawh chuan chhan dan tur ka hre lawk lo.



"Zan chhuah hi chu kan ti vaklo a" ka ti sap a, ka inthlahrung letling zawk.



"Keimahni zawk kan lo leng dawn em ni? Sangbawihi ka ngai tawh lutuk a naktuk ka nghak hmanlo ang" a ti leh zel a, ka pi a inkhawm daih ang a, fel viau nah se kan ina rawn leng lut tur êm chuan ka la zah tlat, chhuan tur engmah ka nei silo a.



"U Mamuana a awm em?" ka ti ta daih a, "Awm e, inbe rawh u" a tih hnuah a ri deuh rawk rawk a, U Mamuana chuan 'hello' a rawn ti thum dut mai.



"U Mami khan kan ina rawn kal te a sawi a" ka tih chuan "Nia" a lo ti ringawt a, "Diktak chuan ka huphurh a ni" ka ti hap a, ka sawi chhan chu a hrechiang ngang a ni ang a thaw chhuak ve hawk in ka hria!



"I pi lo dil la, Bawihtei nen ka rawn hruai ang che u, zanin chu U Mami lo zin in rawn lawm a ni ve mai" a ti ta sup a, aw ka pawh ve ta nghal.



Kan inbiakna kan tihtawp rualin ka pi inkhawm kal tur chuan "Tunge i biak a?" a lo ti leh nghal zat a, "U Mamuana u, U Mami a lo zin a, Bawihtei a hmu ve chak tawh bawk nen zanin chu leng tur in min sawm a" ka ti a, min en vang vang hnuah engmah sawi lovin a kal nghal daih a, min haulo emai a phal tih naah ka ngai.



Bawihtei ka thlak fai hnuah ka pu hnenah chuan kan kalna tur te ka hrilh ve leh a, ka pu chuan a phal dawn tih ka hriat sa vang ani.


U Mamuana pawh a rawn thleng harlo a, ka fanu in a ngainat em em mipa ka hmangaih thei hi ka lawm a ni.



"Zanin chu a la hlimchhawn a, mahse U Mami laka i inthup zel chuan a ngaihdan a nilo ang, ka u mah nise a fing a, in chhungkaw dinhmun vanga zahpui tur mi chu a nilo" a ti sup sup a, za vakloa nui pahin "Ka hria lawm, a la hlimchhawn em a ka zam ve deuh mai mai" ka ti a, an in kawt kan thleng zui nghal der mai.




Chhuk hmasa lovin garage ah kan tlan thla tlang a, motor te a hun fel hnuah Bawihtei chu a pawm kang lawp a, step ah kan inzui chho hnak hnak hlawm.



"Ehee in va lo let leh hma si ve" tiin U Mami a lo phul hlut a, Bawihtei a ban nghal zat bawk.


"Min lo la hria em Sangbawih, a ni Mami kha" a ti a, a la rei lutuk lo bawk nen Bawihtei pawhin a lo la hre ve deuh aniang, a en vang vang hnuah a nui sen sen a, an in kuah leh nghal chawt tawh.




Choka lamah eitur siamin an ri rak rak reng a, U Mamuana nen sitting room ah insi rialin kan thu dun a, ka kut a khalh neuh neuh a, sawi tur kan hrelo dun bawk si, a ninawm.



"Engtikah nge vawk chu a lak theih ang? A in tur pawh kan sa zo thawkhat tawh a" a tih chuan mit chhingin ka thaw chhuak ham ham a, sawi tur vang viau mah se vawk chanchin sawi reng hi ka hne lutuk.



"Ka pi zawt rawh, engmah ka hre velo" ka ti a, chhum bung deuha ka chhang chung pawhin a hrethiam chuanglo reng reng.

"I hria ang, vawk in enkawlna a rei tawh em kha" a la ti talh a, U Mami te rawn let hmanlo se chuan ka vin hrep ang mawle...



"Nakinah chuan in in ah ngei ka rawn leng ve duh dawn ania aw,,, ka la rawn thleng hlim chauh si a, hmanhmawh lutuk loh tha in ka hre zawk a" U Mami'n a tih chuan nui chungin "Nia, chaw te pawh I rawn ei ve ang chu" ka ti mawi ve a, tullo tawpin ka bul ami chuan "U Mami chiah I sawm dawn ami?" a lo ti hmanhmawh a, U Mami a nuih hak hak laiin ka sik ru ngar ngar mai.



Dar 8 pelh hret ah Engtheii hnen atang message ka dawng a,

*Sir Zautea leh Hlimpuii hi an in ngaizawng in ka hria, chuan i nau leh Jacoba pawh U Eli dawrah ka hmu*



U Mamuana nen ka phone chu kan en vung vung a, henu hian tinge min rawn hrilh daih le...


*U Mamuana te in ah kan kal lawk a, kan haw hunah kan sawi tha dawn nia* tiin ka thawn let a, ka ngaihtuah zui nauh nauh thung.



"" A tlai deuh tawh emai, Sangbawihi pawh a mut a chhuak deuh tawhin ka hria, Mama va thlah leh la, nidangah chuan ka rawn leng ve tawh thung ang" U mami'n a tih chuan bu nghatin ka thutna tang ka tho zui nalh a, dar 9 a ri tep a, ka pi thin a rim deuh tawh mai thei a ni.





Kan haw dawn chuan Bawihtei thil tur U Mami'n min pe teuh a, thuamhnaw leh ei tur te a niin ka hria, "I lo hawn tam sia, a inthlahrunawm zawk e a" ka tih chuan ka darah min beng dat datin "Inthlahrunna tur a awmlo, ka naute hi ka duat ve a ni mai" a ti a, Bawihtei chu a fawp leh nawk nawk a, heti tak maia keia fanu tehlul a ngaina hi lawm tur ka ni tawp mai.


Kan in thleng min thlah leh hnuah rawn lut kawi lovin a haw tlang leh nghal a, inchhung ka lut chu a lo reh thap mai, tv a in on loh danah ka pu chu a mu tawh chiang a, ka pi inkhawm bang hi a la haw lo em mawni.



Vli awm leh awmlo en turin pindanah ka lut nghal a, a ni pawh a awmlo.


Engtheii thil sawi kha hre chhuak zawkin ka phone ka phawrh chhuak nghal a, tlai deuh tawh mah se a la meng dawn tih ka hriat chian avangin ka call ta tho.


Lehlam a tang cuan tawng rin hlauh hmel zet hian "Hello" a rawn ti sur sur a, "In kan thleng chiah, message a I thil sawi kha han sawifiah teh, Vli in ah a awmlo ania" ka ti a, ka tawng ring ngam lutuk biklo.


"Ka mu tawh a, ka tawng rin chuan ka nu'n zingah min talh leh duh ang, message in ka rawn sawi ang" a tih hnuah ka tawng leh hun pawh nghak hmanlo in a dah nghal daih a, a type chhung nghah pahin mut turin ka inbuatsaih nghal bawk.





Bathroom atanga ka chhuak tur chu ka pi nen kan in tawk a, "Khawiah nge i nau?" a tih chuan ka hrilh hai khawp mai,,,
"Maw?" ka ti let hu a, Mamuana te in ah kan kal dawn in ti ni lawm ni, Vli a kal ve lo em ni?" a tih chuan hrethiam in "Kal e" ka ti hluai a, "A mu tawh" ka tih zawm leh hnu ah "Anih chuan kawngkapui kha kalh tha la, mu ve nghal ang che u, thawh hma a ngai dawn ania" a ti a, bathroom ah chuan a lut zui nghal bawk.



Bawihtei pawm pahin Vli chu ka call a, henu hi a chhuak ru duh anih pawhin min hrilh lawk ve tal tur ania, min ti buai lutuk.



A vawi khat naah a la chhang theilo zui, ka call nawn leh a, a chhang leh dawnlo emaw ka tih hnuah mipa aw hian min rawn chhang a, zawh leh hrilh buai ngai hauhlo in ka thianpa Jacoba aw ngei a ni tih ka hre bawk.



"Khawiah nge Vli?" ka ti chang fak a, Jacoba kher a zui bawk si, ka ngaih a ngam thlawtlo.



"Buaina nasa lutuk Mary, min hauh dawn pawn naktuk ah min hau la, zanin chu in hauhna hun pawh a nilo" a rawn ti hmasa zawt zawt a, "Sawi mai mai teh khawiah nge Vli chu?" ka ti leh a, ka rawng ring ngam bik bawk silo, a hrehawm tak tak.


"A rui a, a chatthla tawh" a ti chiah chu ka au chhuah mai loh nan ka hmui ka hup thawk a, "Mawla, tinge zu i in tir ve a? Engtinnge kan tih dawn?" ka ti a, ka rilru mangang lutuk chu ka pi te hrilh mai ka duh rum rum hial.




"Kawng hnih a awm, ka rawn hruai haw dawn nge kan in ah ka riah tir dawn?" a ti a, a rawn hruai haw anih chuan kan thawm atang ka pi ten engkim an hria anga, ka thianpa mah ni se ka unaunu an ina riah tir ngawt chu thil mawi a niin ka hre bawk si lo, U Mamuana ka hre chhuak zawk a, U Mami rawn zin lai a ni kher bawk si, kawng a va han phui tak.




"Engpawh chu ni se a rawn haw ngei ngei a ngai, tunah khawnge in awm?" ka tih chuan "Kan in ah" a rawn ti pawr hlur leh nghal, "I bulah tunge awm? Spa emaw Puia an awm em?" ka tih leh hnu ah a ri rawk rawk a, "Keimah Mary, engtinnge ni dawn?" Spa'n a rawn ti sup a, Spa a awm ve tih ka hre ringawt pawh chu ka hahdam pui sawng sawng mai, Jacoba bulah ringawt chuan ka ngaih a tha theilo.


"Lo hruai haw dan ngaihtuah a ngai, zingkarah ka pi in a hre leh vek dawn a, a riah chuan buaina a tam mai mai dawn" ka ti sap a, Bawihtei a lo tap ve chhen bawk si, a thawpik thlak lutuk.



"Kan nula lah chu a chatthla fel der mai tawh sia, a hruai chhuak Tu pa lah hi a laktlak hlawl bawk si lo" a ti ve nghut nghut a, tihdan ngaihtuah hram tura ka tih hnu ah "Keiman ka rawn hruai mai ang, kawngka lo hawng sa la" a ti a, kan inbiakna kan tih tawp hnu ah Bawihtei chu hnute ka pe a, a muhil harlo.




Spa hnen atanga call ka dawn leh rual chuan chhang vatin pindan atang ka chhuak nghal a, thawm dim thei ang bera kawngkapui ka hawn hnu ah dim deuh bawkin Spa chuan ka naui chu a rawn paw lut a, naupang mai mai pua a ni lo bawk nen rit a ti ve ngang aniang pindan luh dawn hnaiah a sep kang lawp pek a, kan buaina beri lah chu rui tih hriat lutuk in a rawn phun nuah nuah leh nghal. Rang lutuk in pindanah ka nawr lut a, ka rin ang ngeiin ka pi chuan,
"Engnge ni?" a rawn ti hlut a, "engmah a nilo Pi, Vli a tawngvai a" ka ti a, Spa chu ka nawr chhuak leh nghal dawt dawt.




Engtin tin emaw kan in chingfel thei hram a, khuma mu zawi ngiai ka unaunu chu kawng dawm meuhin ka en vawng vawng ringawt.
eng rilru pua hetianga awm nge maw a nih ve le.. Jacoba hi chu zui tam lo tawp se a tha ang, an â dun si, hmasawnna tlak engmah an ti dun dawnlo.




Ka mut fel meuh chuan zan a tlai tawh viau a, ka chau deuh aniang ka muhil hma emai.
Zingkarah ka pi in min rawn sawi harh a, Ration buhfai lak a ngai ania" a tih hnu ah tho nghal tura min ti leh in pindan atang chuan a chhuak a, Vli chu a la mu tui khawp mai, rawn harhchhuak ve phawt se la, ka va han hau nasa dawn tak.



Bawihtei nen kan tho rual a, ka pi'n min lo kaihthawh hi chuan thawh hre lutuk ka fanu hi a harh tel ve ziah.



"Ngahnge i nau i rawn kaihthawh ve nghal loh? Nangmah te chuan i lei thei dawn em ni?" ka pu'n a lo tih chuan "Thei mai ang" ka ti ringawt a, thingpui lum sa chu thli in ka in leh te te a, Bawihtei'n min ngen tlat bawk nen Tawlailir nawr chungin ka hruai ve leh te nge nge.




Engtheii'n "Lak ve ka ngai" a tih avangin ka nghak kawi a, ka pi'n hria se chuan tul lo a ti leh ngawt ang.



"Nizan chu engnge chanchin?" a tih chuan thaw chhuak hawkin "Ka sawi peihlo" ka ti a, ka banah manin "Sawi vat rawh" a ti leh chhen tawh.



Thil thleng te ka hrilh chuan a au that a, phawk zeta ka melh chu mitmeng zau deuh hian min lo en ve a, "Awiiii Laljacoba mawl lutuk hi engtinnge kan tih ang le" a ti hluai a, a thlaphan hmel lutuk chuan ka ngaih a ti tha lo letling zawk.


"A thleng vek tawh a, an inkar ah hian eng chiah nge maw awm ve ni? Tha deuha zawhfiah an ngai ang, an â dun sia, thil tha lo deuh an lo ti palh ang tih te a hlauhawm" thutak deuh hian ka ti duah a, "Nia zawt ngei ngei rawh, an in ngaizawng duh anih pawhin tha tak in inngaizawng mai se la, awi mahse Jacoba hi chu ka mipa rinzawng a ni thlawtlo" a ti leh thin a, kan thianpa mah ni se kan ring thlawt lo a ni.




Buhfai lakna ah chuan Puia a lo kal ve a, nizan lam bawk kan sawi chhuak leh, engmah a hriat ve loh thu in min chhang a, ka awihlo lemlo. Puia hi chu a dangdai ber a, ze zawi chi, tawng pawh tawng tam lemlo tak a ni. Thian pawh keimahni bak a kawm vak ngailo a, a lengchhuak tamlo bawk.




"Inngaizawng in sawi tak ah chuan Hlimpuii te hi engnge an chanchin?" a ti ve khiah a, engmah ka hriat loh avangin Engtheii chu ka ka melh a, beidawn hmel deuh bawk hian a thaw chhuak leh halh.



"Henu pawh hi a zin haw atang kan la inbe mumallo, school ah pawh midang a zui daih zel a, ka hrethiamlo, min kawm duhlo na na na chu tiin ka be hmasa duh biklo a" a ti a, a va han buaithlak hlawm tak e aw...



"Sir Zautea nen chuan an inngaizawng tak tak tihna em ni?" ka tih chuan "Ka hre biklo, kan duhpui lo sia, min hrilh hreh nge pawh ka hrelo" a ti leh a, an hahthlak hlawm emai zingkar ah chuan ka sawi peih tawh rihlo.




In kan thlen leh hnu chuan Vli pawh thutthleng ah a lo thu tum bur tawh a, min melh that ngamloh danah nizan lam thil thleng a la hre vek tih ka hrethiam mai.




"Kha i u kha rawn zawn luh pui rawh, I thawh tlai tehreng nen I thu tum bur reng ringawt mai" ka pi'n a lo ti hlak hlak a, buhfai chu inchhunga kan zawn luh hnu ah chaw ei kan siam zui a, ka pi a fing si, Vli awmdan ngurchuai lutuk chu a melh leh zawk thin a, "I rim chhe si, thil tha lo tih I nei a nilo maw?" a tih chuan ka pi ni lovin keimah zawk min rawn en daih a, engmah hrelo angin ka awm thung.





A fala inbiakna hun kan la neihloh avangin engmah zawh chian theih a la nilo a, chaw ei kham rualin inbual tur in ka ti thung, min hnial lovin a inbual nghal a, a harh ve deuh hawk mahna.


Chawhnu lamah U Mami hnen atang call ka dawng a, a number ka lo la nei bawk silo nen min rawn be thut chu ka hrilhhai letling khawp mai.




"Lo len a rem angem?" a tih chuan a rem thu ka hrilh a, U Mamuana nen an lo len kawi lawk tur thu sawiin kan inbiakna chu kan ti tawp nghal a, ka pi ka hrilh chuan "Lo leng rawh se" a ti mai a, kei chu ka zam leh em em tawh.




Ka theih ang tawkin inchhung chu ka ti fel nghal thuak thuak a, dinhmunin a zirloh chuan bungraw tha te kan nei ve lemlo a, kan nihna ang anga lan tawp hi a ngai a ni mai.








End of chapter -24
Ads click leh comment kha khawngaihin min ngaih pawimawh sak rawh aw❤


Show post links
Top