THE FIRST NIGHT WITH DUKE BY Bee Hlutei (Completed)

[Ngaia]

Ka kut an phuar a, chhuatah chuan min theh tlu tawp a, ka ngal an rawn tlawh a

"Hey, nula tho rawh" mipa pahnih hian min lo en reng a

"Khawilai nge?" Ka ti zuai raih a

"Kan awmna hmun hi khawilai nge tih i ngaihtuah a ni maw?" Pakhat chuan hnai deuh ah min lo en a

"Thu awmze neilo sawi suh ang che" Pakhat zawk chuan a rawn ti ve leh bawk

"Awmze neilo i ti maw, nula in zawhna an zawh chuan kan chhang tur alawm, he hmun hi i thlan tur anih hi" ka beng bulah a rawn phun sup a, nui huah huah chungin a kal sawn a

Ka ti ril a khur beuh beuh

"I sual thiam ve reuh hle mai a" an inbe bawrh bawrh a

Tute nge an nih le? Min man a ni maw? Engvangin? Tu in nge? Engati nge le?...... kawngka ri rak ka hria a

"Chhuata i han tal vel chu i inhmeh hle mai, tho rawh" ngeiawm deuh chuan a nui suk a

A aw chu, a chhawr te chuan min tung tho a

"Nangman min man a ni maw? Rose, eng thil nge i tih a" ka vin deuh hrawk a

"Eng nge ka tih maw? Han ring chhin teh. Eng nge ni a i hriat?" A kut kuangkuah chuan min melh kawr a

"Mite hlawh i pek khan i him phah turah i ngai em ni?" Ka hlau duh bik lo

"I nunna kawltu i hre lo niin a lang" a rawn ti leh a

"A hriatchhuah chuan a awm mai mai lo ang tih i hria a ni lawm ni?" Ka vau leh sak a

"Hria e, Duke chu chutiang mi chu a ni, a tum daltu an awm chuan a that zel ṭhin. Duke khan tuiah ka nam thla che tih a hre lova, hria ni se chu ka dam tawh miah lovang.

Chuvang chuan ka ngaihtuah a, a hriat lohin ka ti mai dawn alawm, Ka chhungte hriat loh in mi ka ruai a ka che zei i ti viau lo em ni?" A biang dawmin a nui suk a

"Thil theih a niin i hria em ni?" Ka au leh ṭhawt a

"Tinge a theih loh tura i ngaih zawk? Kan awmna hi i hria em? I hre miah lovang kei pawhin ka hre lo. Ramhnuaia in rauhsan tawh anih hi, a bul velah hian engmah a awm lo. Tumahin an hmuh loh che chuan engtin nge man i ni tih an hriat ang?" Min chhuk en a

"Man i ni tho ang" ka melh let ve ngat

"Ka ni lovang lungngai suh, chhan tur che an awm loh vangin i lungngai em em ang, kan inchawi dawn em ni? I ruang an hmu hmasa ang nge min man ang" ka biang dawmin a rawn kun hniam a

"I â anih hi" ka ti a

"Keipawh ka rindan alawm, Duke ka thlakhlelh lutuk vang pawh a ni ta ve ang, dik tak chuan hetiang thil ka tih hi ka ring bik lo" A hmui hup chuan a nui leh vel a

"Eng nge i sawi awmzia?" Ka ṭhingṭhi chung chuan ka zawt vat a

"Ngawi la min sawi zawh tir rawh, min lo tibuai tawh suh, in inneih thu ka hriat aṭang khan Duke in a fawp che tih ka hre leh a, inneih thawmhnaw leh Designer in rawih te, Party planner chungchang te, Lalber in phalna a pek thu te, chung zawng zawng ka hriat chuan min ti â lo chauh, nitin hian min tina asin

Ka rilru ka siam ta a, nitin hian ka tan hremhmun tem reng ang ka nih chuan, ka hnuk thla ve ang che nga na i tuar ve tur a ni. Duke Inglid nupui ka nih theihna tur anih phawt chuan Ripley, thihna na ber chi ka tem tir ang che" ka biang dawm chuan a nui huah huah a

****

Ni a tla leh tawh ania, vawiin hi a ni hnihna anih ka ring, ka ril a van ṭam tak, Zeronis min ngaihtuah ang tiraw? Sylvia phei chu keimah vangin a ṭap tawh hrim hrim ang

Ka in her kual vel a, ka ti thei ania, ka taksa hi ka her kual zeuh zeuh a ngai. Thisen kal ṭhat loh vanga tlanchhiat theih loh ka duh lo. Ka chhuak tur a ni ringawt

"Ripley, eng nge i lo an? Chanchin ngaihnawm deuh hrilh tur che ka nei ania, ka lawmpui che Duke chuan i awm lo tih a hre tawh, Eng nge i lo beisei a? Duke chhanchhuah che maw? Nangmah enkawltu a hnuk kual ania" Rose-i chu kawngka aṭang rawn lutin ngeiawm deuh chuan a nui leh a

"Sylvia maw? Engati nge?" Ka ngaihtuah ve takzet

"Chu chu maw a hming lo ni a, a ngeiawm nen khan, a mawhphurhna ah a tla vek alawm, i tlanbo angin an ngai vek alawm" a nui leh hak a

Zeronis a'n man ka ni tih a hre lovang, keima thu a tlanbo anga a ngaih chuan, Sylvia chungah eng nge thleng ta ang

"Sylvia khawngaihthlaki chu a va retheih phah dawn ve aw" a awki a ti sang vel a

"Eng nge ka chungah hian i duh?" Ka melh hrak a

"Eng nge ka duh maw? Engmah duh ka nei lo, ngawi teh, rilṭama i thi lai hmuh ka chak ber, i thawk tawp hun hmuh ka chak" a meng kual ralh a, ngeiawm deuh chuan a nui leh a

"Han tum chhin la, thih ka tum lo, min hmuh theih chhung chu ka thi lovang tih ka tiam a che" ka tumruh viau mai

"Eng a? A ṭha alawm, mite hi an tum danin thil a kal ngai hleinem, chuvang chuan bei nasa lutuk suh" a nui leh suk a

"Anih chuan thil min tihsak rawh, lehkha ka ziah min phalsak rawh, signal thawn pawh ka tum lo, Sylvia chhan ka duh mai ania" ka ti chuai raih a

"Thil min dil a maw? Mu chung lehnghal in? I va zak lo ve" a meng rum nghal a

"Khawngaihin Rose, lehkha chu min ziah tir hram rawh" thawh tum chuan ka bei a

"Engtin nge maw ka tih dawn che le?" A inhum ruh sauh a

"Khawngaihin ka ngen a che Rose" ka kun hniam nghal a

"Lehkha ah chuan eng nge i ziah ang?" Min chhuk en a

"Keima thu a tlanbo ka nih thu leh zalenna ka duh thu ka sawi ang, room a inkhung beh tlat ka duh loh thu leh chutianga nun ka duh loh thu ka sawi ang. Hmangaih dang ka neih leh kan awm dun thu ka sawi bawk ang a, min zawng lo turin ka ti ang a, ka hmuh tawh loh tur thu ka sawi bawk ang" ka mittui a rawn tla a

A sam buang tak mai leh tle siau te kha, a chang chuan a cool em em a, a chang leh a hlauhawm bawk mahse i mitmeng pawl taka min en chang leh ka mamawh changa zaidam taka min kuah te kha ka ngai takzet

Thinur deuhin min zawng ang chu, a thinrim ngawt ang, a thaw halh ang a, a phurrit tihbo dan a zawng hrim hrim. Ka hmu tawh awm si lova, eng nge ka tih tak ang? A rilru ka tina leh dawn anih hi

"A ṭha e, paper leh pen ka rawn keng ang, i sawi ang chiah kha i ziak tur a ni, i lehkha ziah ah hian chhanchhuah na tur code i zep tel em lovang chu" Lehkha chu a bih nawn leh ngat a

"Chutiang engmah ka ti lo, i duh leh i chhiar thei ang" pakhat chuan min man bet ran mai

"Anih chuan lehkha hi Count emaw Duke hmuh theih turin va dah rawh" Pakhat zawk chu lehkha a pe a

"In awmpui vang mai mai a Duke han bansan che chu, ka rin lawk ang ngeiin nang hian i phu thlawt lo" a lukhum chu khum in a chhuak daih a

Lehkha chu a kal dik ang em? Keimah vang vek a ni. Zeronis hi duh lo ila chuan hetah hian awm in inneih hial pawh kan tum lo tur. Sylvia pawh thlamuang takin a awm ang a, Zeronis pawh Etoile nen hlim takin an awm mai tur

Keimah vang ni lo se chuan Zeronis thusawi chu ka ngaihtuah chhuak thut a

'Thil i tihsual loh chuan mi hmaah kun suh, Inringtawk la, Ripley, i hmelṭha ber ania, mi dang zawng ai hian ka thlang che, ka heroine i ni'

Tuna kan nun hi thawnthu ni ta se, hmeichhe pakhat chu rilṭamin a thi lovang. Ni e, thil sual ka ti hleinem. Changtupa in min thlan chuan a bulah ka ding tlat ang. Hlim takin kan tawp ang

Chu chiah chu a ni. Misualnu hian min tina tur a ni lo. Inchhungah hian engemaw chu a awm tur a ni. Khawngaihin awm rawh, darthlalang keh them ka hmu e

Ka va lawm ve, lung hriam deuh pawh lo ni se, a ṭha hrim hrim. Hei hi anih hi, ka phuarna ka phelh ta. Awle ka ti thei e. Tunah chuan ka chet a ngai

"Min lo hrethiam lawk teh, bathroom kal ka ngai ania"
- Ripley

"Eng a? I duh duhna ah khan zung mai teh" min rawn vin hlak a

"A hing dawn ania, pawn thlengin a rawn nam chhuak ang a, Rose-i rawn let leh hunah a thinrim dawn asin" thiam deuh chuan kawngka biangah ka sawi vel a

"Ka va thatchhe tak, mi hausa mawl tak mahni pawh a zung thei lo i nih hi, ngawi reng khan va zung la, i bawlhhlawh tak kha hmuh ka duh lo ania" kawng chu min kawhhmuh a

"Awi chu chu eng nge ni?" Ka au phut a

"Eng nge ni?" A hawi vual vual a

Hetia tih hun tak a ni, a kap ah ka pet chawrh a

****

"I duh chuan khatah khan i zung ve mai dawn nia" intithei deuh chuan ka hawi vah a

"Nang kha....nang" a kap na ti lutuk chu a dawm ran a

Ka tlanchhe daih, ka thawmhnaw hi a ṭet dawnin ka hria, khawiah nge ka awm le? Khaw chhungah ka luh a ngai. Thingkung hawi zawng aṭang kalkawng a hriat theih an tia, eng nge ni kha? A chhah lam hi chhim a ni em kha?

Anih chuan thingkung te hi an sang si a, a zik hmuh a har em mai. A pawi lo ti leh lo mai ang. Min pui tak tak dawn chuang lo. Khaw chhunga mi te hi khawiah nge an awm pawh ka hre hleinem

Tunah rih chuan tlan zel phawt mai ang, hemi hlat thei ang berah ka awm a ngai. Tha ka nei tawh lo, ka tlu tawp a, ka tui a hal, mahse hei bak chuan ka thei tawh lo, ka kal thui leh deuh hlek a ngai

Min rawn thawi fua a, thing chu a fuh a, mipa khan sairawkherh a lo keng a

Engtin nge a lo thlen leh hman le, ka tlan a ngai, ka in man tir leh tur a ni lo, a sairawkherh chu a rawn perh leh pawp a, ka lu a fuh vaih chuan ka thi a ni mai

"Ka hmuh theih loh che fingin hnimbuk karah i kal dawn maw?" A in ring leh ran tawh

Hnim chuan min chhun a, ka darah tak min rawn perh siah a, ka tlu tawp

"Nang kha, ka man che, tinge i tlanchhiat zel a, ka man dawn tho che sia, mahse kawrfual i ha chu i ti ṭha takzet. Infiampui che ka la duh viau nan i fing em a, i tlanchhuak zel sia, ka thah vat che a ngai anih hi" a rawn kal hnai zel a

"Thutawp ka sawi dawn ania" ka melh chho ralh a

"Anchhia min lawh i tum deuh em ni?" A rawn kun hniam a

"I thaw a rimchhe lutuk a, ka luak i tichhuak" ngeiawm deuh chuan ka nui a

"I â anih hi, awle, i duh ang chuan ka that ang che" chemte chu a phawrh a

Hei hi ka tawpna tur em ni? Ka thih dawnah pawh ka hmu chak lutuk che Zeronis

"Hremhmunah kal rawh" thisen chu a per nghal chuai a

Eng thil nge thleng le? Engtin nge a thih daih le? Thal maw?

"Ripley" tu emaw hian min rawn ko a, ka hawi vat

Sakawr var chungah chuan Duke chu thaw hlawp hlawpin a rawn chuang a

"Zeronis" ka ko nghal vat

****

Chhunzawm tur
(Tun ṭum chu nuihna tur a awm lo anih hi. A lehpek a ngaihnawm ngawt ang )


Show post links
Top

[Ngaia]

Zeronis nen chuan kan inkuah vawng vawng a

"I inhliam ania" a mittui a rawn luang a

"Ka hlau lutuk Duke" ka kuah leh chawt a

"Ka tihpalh lo thleng hma tur hi ka nia sin" Min pawm hle hle a

"Ka hlauh apiangin ka ngaihtuah zel che a" ka mittui a tla ve a

"Kei pawhin" a ti ve bawk

In kan thlen chuan

"Ripley bawihte" ka nu chuan min pawm thlawp a

"Kan naute hmai hi a cher vek ania, i na em? Tinge hetiang em em hian i danglam hman? Awi ka duat lutuk te" Ka pa chuan ka hmai a rawn khawih a, a mittui a tling piau mai

"Duhtak, duhtawk teh, Ripley khan chawlh a mamawh ania, i room ah han chho rawh aw, doctor in a lo nghak ang che" ka nu chuan ka pa a lo hnem a, min signal a

"Awle ka nu" tih pah chuan kan chho ta a

"Lady Ripley tak tak i ni tiraw? I ṭha ang tiraw" Sylvia chu rawmawl in chhawpin a ṭap leh chiam a, Duke chu kut kuang kuah in a lo ding ringawt

"Ka ngaihtuah zia che i hria em? I lo bo daih a, tunah lem mitthi ang mai i ni" ka mal ah chuan bawkin a ṭap leh ngat ngat a

Thil ka tawng hnem hman hle mai a

"Sylvia keimah vangin harsatna i tawk nasa hle a ni tiraw? I ti ṭha lutuk e" a hnungzangah ka beng thek thek a

"Ka tihpalh lutuk, thil i tawng hnem dawn sia, misual te khan chaw pawh an pe ṭha lo che a ni maw, ni reilote a ni chungin i cher hman vek" a mittui a hru pah mawlh mawlh a

"Aw, ka ril a ṭam lutuk" ka nui ver ver a

"Eitur ka rawn la vat ang, ei siamtu in cream soup siam a tum a, mahse bawng soup siam turin ka ti a, miss sa ka lo la ang" a kutzungpui min rawn hmuh a

Lo bu nghauh in ka kutzungpui ka hmuh let vat, ka nui var a

"In zo tawh em? Liverpool chhungkua hi in rilru a no hle mai" a rawn kun hniam a

"Thil ṭha a ni lawm ni?" Ka nui leh a

"In awmpui kha i tan a rinawm khawp mai" a en zui vang vang a

"Sylvia kha ka unaunu ang chiah a ni" ka ti leh sap a

"I bo tih ka hriat hlim khan ka khaihlum ṭep a, nangma thu chuan i tlanbo a rin loh thu a sawi a, thil thleng a awm a nih a ring a, khaihlum pawh a inhuam thu a sawi bawk"
- Duke

"Engtin maw? Chuan Sylvia thusawi chu i ring tiraw?" Ka en leh ngat a

"Ka ring lo a, hei hi min hmuh a" wardrobe chu a hawng a

"Inneih thawmhnaw leh pheikhawk i dah duh vangin a chhunga thawmhnaw zawng zawng hi i tiruak vek tiraw, chuan i thawmhnaw leh pheikhawk hi i ha chhin in i bun ngun viau bawk a, inneih chu i nghakhlel takzet. Mo phur tak chu inneih dawnah a tlanbo dawn lo hrim hrim. Chu chu ka rindan a ni" Min nuih sak a

"Inneih chu i nghakhlel tawh a ni" ka biang a dawm a

"Tehreng mai i nupui nih hi ka chak alawm, mahse min lo nghah deuh a ngai ang, ka inhliam si a" a kut chu ka chelh a

"Ni e tun ṭum chu ka lo nghak ang che" ka sam a zut a

"Wow, Duke chuan a bik takin min nghak dawn maw?" Ka nui ver ver a

"Tehreng mai, i pasal tur ka nia lawm, him taka i lo let avangin ka lawm e, ka hlim zia hi i hre kher lovang" kan hmai chu a insi lo chauh

"Mahse min rawn chhan alawm" ka en reng a

"Ni love, i dam chhuak zawk alawm" min fawp a

"Min fuih a" - Ripley

"Keiman maw?" - Duke

"Heroine ah min thlan vangin changtu ka nih ve phah a, chuvang alawm ka damchhuah" ka nui leh ver ver a

"Ka rin dan ang chiah anih chu, ka lawm e chhan na che hun min pek avangin chuan i pasal ka nih theihna hun min pek avang pawhin" ka kut chu a fawp vang vang a

****

"Kan inhmu lo rei hle mai, in chenna hi chu a ropui in a mawi em em reng a nih hi" thingpui chu ka in a

A ding hluai ringawt

"Ṭhu ta che, thla hmu ang maiin tinge khatia i din reng, thi ta la chu ramhuai in an duh ngawt ang che" ka melh chho vah a

"Engtin? Engtin nge?" A in seh ruh ṭeuh mai

"Engtin nge ka damchhuah maw? Nge Engtin nge ka tlanchhuah theih maw? Nge ni a, in chenna ah thingpui ka in theih i ngaihtuah tiraw?" Ka mit ka siai zeuh a

"Lawmthu hrilh che ka ba in ka hria Rose. Lehkha kha min ziahtir lo la chu thingpui pawh hi ka in tawh miah lovang" dawhkan ah chuan thingpui ka nghat a

"Ka rindan chiah in code i zep tel a nih chiah chu" rum lutuk hian min rawn melh a

"Teuh lo mai, i chhiar zawng zawng kha chu ka ziak vek, Code buaipui thei pawn ka awm loh kha, mahse Zeronis chuan lehkha thu a inziak engmah a awih ve hleinem" intithei deuh chuan ka nui a

"Eng a?" A ti bak hlak

"Zeronis chuan ka hmangaih tih a hria a, midang nena tlanbo chu a awih therte lo? I hrethiam mai em? Chutianv khawp chuan Zeronis hian min ringin min thlah mai mai lo a ni...

Chutiang chu a lo nih chiah loh pawhin, lehkha a dawn khan a khaikhin vel a, ka ziah ngei a ni tih pawh a hria, a awih theih loh avangin hmanhmawh taka ziah a ni tih a hrethiam a

Lehkha puan leh pen tui aṭang misual chu chhungkua hausa tak tih a hrechhuak a, lehkha siamtu te hnen aṭangin tu ta nge tih a manchhuak ta alawm

Tunah pawh khan kawr sen dang i ha leh a, a sendang hi i ngaina viau anih dawn hi. Lehkha kha a sendang a ni bawk a, chuta ṭang chuan nangmah tih an hre ta alawm,

Min dahna in pawh kha Jenkinson chhungkaw in a bik taka an thlan a lo ni bawk a, tichuan thil pahnih chu kan chhui chhuak ta a, engvanga in chenna a lo kal nge ka nih han ring teh le" ka kut chu bengin ka nui a

"Min nuihsawh turin i lo kal em ni?" A thin a ur khawp mai

"A chanve chu i sawi dik e, mahse chu chu ka lo kal chhan a ni lo" ka ṭhu hahdam viau mai

"Anih chuan insawithei turin maw i lo kal? Kei ai i fing zawk tih lantir i tum em ni? Nge ni he khawvel a fing ber i ni tih lantir i tum?" A ti chang fak a

"Chu pawh a la ni chuang lo. Chutiang thil chu tih ka tum hleinem. Tun ṭum chu zak taka awm tir che ka tum Rose. I nunna chhanhim tu ka nih hi aw. Duke Zeronis chuan Jenkinson chhungkua zawng zawng tih chimih vek a duh a" ka nui leh suk a

"Thu awmze nei lo anih chu. Kan chhungkua hi chutiang mai mai a tih theih kan ni hleinem" min vin tuarh a

"Chu chu ka ngaihdan ve tho ania, Jenkinson chhungkua hi kan tih chimih chuan a nghawng let tur chu a nasa dawn si a, chuvang chuan Duke Zeronis chu ka dang a, mahse khaihlum che a duh a" thutak deuh chuan ka hrilh a

"Thil theih loh anih chu" a ding hluai a

"Tak tak maw? Thil theih loh a ni dawn em ni? Vanneihthlak takin Duke Zeronis chuan a rilru a thlak thei ta hram a, eng nge a chhan niang le?" Ka biang dawmin ka nui ver ver a

"Ka dil alawm, Rose khawngaihthlak- i dam nan mahse i hrethiam lo maithei, tui no khat pawh min intir phal lova, rilṭama thih tir min tum vang khan hremna ka pek ngei che a ngai alawm tiraw? Insiam la puithiam inah tar kuna i dam thlengin chutah chuan awm reng ang che, hun ka pe che anih chu" ka kut chu ka kuangkuah a

"Fiamthu i thawh anih hi, Jenkinson chhungkua nula ka nih hi, chutiang hmunah chuan ka awm lo hrim hrim ang i hria maw?" A inhrosa chiam a

"Chu chu thleng tur alawm, i pa pawhin a remti vek tawh, chhungkaw mi ah a ngai tawh lo che" inringtawk deuhin ka hrilh a

"Dawt anih chu, ka pa in chutiang in min paih bo mai lovang" a ti leh hram a

"Ka khawngaih hle mai che. I pa chuan nang aiin in chhungkaw zahawmna a ngai pawimawh zawk anih hmel e, vawiin tih loh chu kan inhmuh tawh ka ring lo, i nun thar chu nuam takin puithiam ho bulah i hmang dawn nia, hrisel takin awm la mangṭha le" ka hawi let leh a

"Mi â nu, tu nge ka nih in hria em? Engtin nge hetiang hian min tih theih?" thil a vawm keh chhuai ri chu kan hria
a

*****

Lirthei chhungah chuan kan chuang a

"Chhuah dawna hriat atan chuan a rapawm zawk mange, khatianga thusawi kha zir theih pawh a ni lo" thutak deuhin Sylvia chu a rawn kun hniam a

"Chu chiah tiraw, mi hausa fanu sawi atan chuan a ṭawngkam a nasa mah mah" za lo deuh chuan ka nui a

Hetiang hi ni mah sela misualnu tawp dan hi a ṭha mai ah ngai ang, danglam zeuh awm mah sela, a tawpah chuan misual chu hneh an ni a, Etoile leh Wright inkar pawh a ṭha zel turah ngai ila, ka hliam pawh a dam ṭan a, ka ngainat em em Zeronis nen kan innei thei tawh ang

Tun aṭang chuan hlimna hlirin min hmuak tawh ang tiraw? Ka duh dan angin hlimna in kan tawp ngei ang

"Ngawi teh, eng maw i sawi kha? Kan sumdawnna chu a hlawhchham maw?" Kei leh Etoile leh Sylvia chu kan phu zawk mai

Hlimna a tawp chu a la hnai lo mai anih hi. Thil hi a ṭha vek turah ka ngai asin. Harsatna chu awm mah sela, kan inhmangaihna chuan engkim a sutkian theih vek ka ring a, kan inneihna chu hlimawm tak turah ka ngai

Thawveng takin ka awm ang chu tih laiin, box ṭihbaiawm zet zet tam tak chu Count tualah an dah rui a

"Heng zawng zawng hi kan damdawi siam kha maw?" Awih chiah lo chuan ka kawk a

"Aw ni e" - Etoile

"Mahse engtin engvangin?" Ka hawihai ngei mai

"An hralh thei lova" Etoile chu a hnual rawih

Kan damdawi siam chu an hralh thei lo anih chu. Kan check leh ang e, dawr hmun chu mi tam na ah a nia, a fuh chiah e

Inchhung design pawh a felfai e, kan damdawi siam chu kan rem fel vek a, a ṭhat tehreng nen

"Engtin nge min dawr tu pakhat mah kan neih loh theih?" Thinrim deuh chuan ka ang a

"Ka tihpalh lutuk ka zak khawp mai" Etoile chu inthiamlo deuhin a hawisawn a

"I thiamloh a awm lo ania, i ti ṭha lutuk alawm, inchhung design pawh hi a fuh lutuk, dawr nghaktu pawh biak a nuam" a kut ka vuan a

"Mahse dawrtu kan neih loh hi" a thaw halh a

"A dik chiah...." ka ti chuai raih

Rilru neih lo deuh ka ni em ni? Mahse hetiang thawnthu ah te chuan changtute hi an thiltihna lamah an tluang ṭhin sia. Eitur dawr pawh hawng se miten an dawr vat zel a, lehkhabu chhuah se an hralh zung zung bawk a, thawmhnaw leh tlereuh pawh an hralh zung zung zel sia

Mahse tinge kei hi ka tluan loh em em le? Ka vanneihna zawng zawng hi Zeronis lakah ka hmang zo vek aniang a, hnial theih a ni lo tlat

"Engpawhnise damdawi dahna tur hmun kan nei tawh tal a, lungngai vak lo phawt mai ang" ka infuih thar leh sauh a

"Dik tak chuan a dahna hmun ringawt chu buaina tur a ni lo" - Etoile

"Buaina dang a la awm em ni?" Ka thaw halh a

"En la a thih hun tur hi, heng zawng zawng hi thla hnih chhung chauh an dam dawn" a thih hun tur chu min hmuh a

"Thla hnih maw? A va thi hma dawn em em ve" ka phu zawk a

"Damdawi hi a thawh hun chhung hi thla nga tur ania, mahse a leitu tur ngaihtuahin a rei vak kan ring lo va, chuvang chuan a thih hun kan sawn hma alawm" tih thu a sawi chuan ka kehchhe vek ni maiin ka hria

Ka hlawhchham der anih hi

"In damdawi zawrh chu puih che u in duh em?" Zeronis chuan Champagne chu a ban a

"Min hralh ṭhen sak dawn tihna em ni?" Ngaihtuah chiang mang lovin ka chhang a

"Chu chu maw min zawh?" Min melh kar mai

"Ka fiamthu anih kha" ka siai zeuh a

"I chhiahhlawh te tan i leisak dawn em ni?" Ka hmui chu ka hru fai a

"Bur sangthum ni ta se" a rawn tih chuan ka phu zawk

"Chutiang zat zat chhiahhlawh i nei em ni?" Ka zawt let vat

"Ngah vak love" - Duke

"Anih chuan engtia tih nge i tum? Min hrethiam la min dawrtu awmchhun i ni nan, kut them thiam taka an siam ania, leitu ten an hlamchhiah mai mai chu ka phallo" ka kut ka lek chhuak a

"Ka hriatdan chuan, warehouse chhungah in dah mai mai tho a ni lawm ni?" - Duke

"Chu pawh nise keimah vanga i insen ṭawk ṭawk ka duh lo, hman i mamawh bawk si lova" lai deuh chuan ka nghawng ka khawih a

"Anih chuan eng nge tih i tum? Hetiang anih chuan i tlachhe der dawn ania. Ka hriat danin i tlereuh zawng zawng i hralh vek bawk ania" a dar a san ak a

A hriatna hnar ka hre mai. Sylvia a zawt anih dawn hi

"Sumdawnna lam chu sawi tawh lovang. Thil dang sawi tur kan nei ania, Emperor hnen aṭang sawmna kan dawng a" champagne chu a in a

"Emperor maw?" Ka phu zawk

Ka rin loh lam daih a ni

"Majesty chuan kan inneih kan sawn vangin hmuh min duh a, pu ber chuan a hmu chak hle che a ni" a nui suk a

"Emperor maw?" Ka phu zawk

"Aw ni e mahse buaina zawk chu Prince Sharman a ni" a ti leh a

Prince Sharman maw? Chu chu tunge ni a?

****

Chhunzawm tur


Show post links
Top

[Ngaia]

Ka hriat loh danah hian a pawimawh vak lo aniang, chu lo ah Lal chhungkua hi an lang lo hrim hrim

"Eng nge a ni chu? Eng ang mi nge a nih?" Ka lo zawt vat a

"Buaina zawk chu ka hre bik lo hi a ni, Prince Sharman mitmeng leh chezia chu kan lal zaidam tak ang hi a ni lo" min rawn en chuan thil dang ka lo ngaihtuah daih a

"Eng nge ka fimkhur na tur chu?" Ka zawt nawn leh a

"Fimkhur tawp la a ni mai, ka sawi chu engkimah hian fimkhur a ngai" a thusawi lai chuan thil ka lo ei reng a

*****

"Duke Zeronis leh a nupui hual hmelṭha tak maw? Ka lo lawm che u" kan lam panin a rawn kal phei a

"I ṭha maw Lalpa? Min sawm avang hian kan lawm lutuk ania" Chibai bukin kan kun a

"Nuam ti deuh khan awm rawh u, i ṭhu teh ang u" nelawm deuh chuan a sawi zung zung a

Saw saw Prince Sharman chu a ni ang a, a lo nui sen sen a. Ka rin aiin boruak a nuam daih. A thawventhlak hle mai a, Prince Sharman pawh a pangngai hmel viau hi a

Zeronis chuan a hlauhawm angin a ngai a, mahse chutiang chuan ka ngai ve chiah lo. A rilru hriat a har si a, engmah lo ah ka lo lungngai a ni ve thei tho. Tun bak hi chu kan hmuh tawh hmel si lova nuam deuhin hmang teh ang

"Grape hrui aṭangin ka lo hria a Lady Ripley De Liverpool" - Emperor

"Aw ni e, lal ber" ka nui ver ver a, puakthei thil te chu ka siam leh a

Buai vak lo teh ang

A tukah chuan Prince Sharman a lo leng a

"Ka rawn lang thut sia, ka ṭhawng che em?" A nui leh ver ver a

"Ṭhawng ve deuh" ka nuih let var a

Nichin lawk khan min kaithawh tumin an buai zak zak anih kha. Tinge hetah a lo kal le?

Lal fapa thawnthu ah pawh lang lo khan min rawn tlawh chu a ni mai sia, a mak hle mai. Thawnthu ah khan a lang ve em le? Lal chhungkua hi an lan awm pawh ka hre lo

Tinge ka thluak hi a chhiat em em le? Thawnthu a ka chhiar kha chuan changtu te re re hmun danga an awm thut hian an zei em em zel sia, an sumdawnna an tluang a, ṭawngkam thlum an dawng reng bawk a, mipa ten an duh em em ṭhin bawk

Ka mizia zun nei vak lo kha hemi khawvel a ka luh hnu hian mipa te hip theihna riau hi ka nei thut ang a, mi zawng zawng duh rawn ka ni dawn aniang, a tawpah chuan chutiang zawng chuan a inher dawn niang a, a nuih dan te hi, a ni thei lo ang

"Lady Ripley, thudik chu kei hian ngen duh che ka nei a.... chuvanga rawn tlawh vat che ka ni" thingpui chu a in khawlh a

Wright nena thil thleng kha hrereng teh ang, a zahthlak em mai

"Ka sawi zawm mai ang a, dan ka bawhchhiat loh hram ka beisei. In rawn kal hnu khan min tur ut ut a, a tlai tak tak hma in thudik hi hrilh che ṭha in ka hria, min chhanna ka lo nghak reng ang" a ti leh sap a

Ni lo, a ni thei lo, ka dik ngei ang tih ka hlau hle mai

"Tihpalh lal fapa mahse...." - Ripley

"I hriat hma aṭang hnawl i tum a ni maw" - Prince Sharman

"Tihpalh Duke nupui ka ni mai tawh dawn a, ka hriat loh kha a ṭha zawk ang" hnuai lam ka melh a

"Ni e Duke nupui i ni dawn a, Duchess pawh i la ni dawn alawm" - Prince Sharman

"Chuvang chuan min hrethiam hram dawn nia" ka ti leh a

"Duke phalna lak phawt a ngai a ni maw?" - Prince Sharman

"Aw ni e, eng a?" Ka harhchhuak leh thut a

"Sumdawnna lamah biak che ka duh a Duke phalna ka lak phawt a ngai dawn a ni maw? Damdawi hnawih chi kha thawhpui che u ka duh deuh a" min melh kar a

"Chu lam zawk chu maw, min sawipui thei reng alawm" ka hmai a sen ṭawn ṭawn

"A ṭha alawm" - Prince Sharman

Ka sawi chhuak lo chu ka ti ṭha e

"Anih chuan inbiak chhunzawm ang le" a kut suihin a nui leh var a

"Chuan i hriat angin lal in kan thlen chuan, an awmpui chu a hnathawhna ah a kut a ti hliam a, damdawi kha ka pe a, ka keng reng ṭhin bawk a, a ngaihzawng sipai hnenah a ṭhatzia thu a lo hrilh a, tichuan ani'n a lo sawi darh ve leh a

Lal fapa beng a lo thleng ta alawm, chuan sipai tan damdawi hnawih tur chu tam tak a duh ta alawm, a ṭha i ti viau lo maw" phur deuh chuan Etoile ka hrilh a

Min chhang miah lo a

"A ṭha i ti lovem ni?" A hmel aṭang ka hre deuh mai

"A ṭha nge ṭha lo chu ka hre lova, Skirmishes ho in ramri an rawn nek reng tih chu a dik a, mahse ka hriat danin an lian vak lova, tlem chu an inhliam maithei. Kan damdawi hi a thi hma dawn si a, a dahna hmun vel nen a ṭangkai vak ka ring lo" Etoile chuan a ngaihtuah zui mawlh mawlh a

"A dik alawm, naktukah lal fapa chu ka hmu dawn a, a order rawn siam hi sawi nawn leh a ngai ang. Box zahnih a duh thu a sawi khan ka lo lawm lutuk a, sumdawnna buaipui hi a lo awl lo hle mai" ka thaw halh a

"Box zahnih maw?" Mak a ti viau mai

"Aw, box zahnih a tia lawm sang riat vel ṭheuh a awm ang, ka phur lutuk a, enge dik lo a, Miss Etoile?" A mak ti lutuk hmel ka hmuh chuan ka ngaih a ṭha bik lo

****

"Lal fapa, Lady Ripley De Liverpool a rawn thleng e" awmpui chuan a va hrilh a

"Lo luh tir rawh, ka lo nghak reng che alawm, rawn lut rawh u" a rawn nui leh ver ver a

"Lal fapa, hei hi ka sumdawnpui Lady Etoile De Hailey, Baron Hailey fanu anih hi. Damdawi vel sawipui tur che in kan lo kal a ni" Etoile chu ka hmelhriat tir a

"Ka hmu che chu ka lawm hle mai lal fapa" Etoile chu a kun zeuh a

"Ka hmu che u chu ka lawm zawk hle mai nula te u" ṭhutna chu min kawhhmuh a

"Hrilh hmasa tur che ka nia, mahse ka hmanhmawh ve lutuk a, ka tihpalh lutuk" ka sawifiah bawrh bawrh a

"A ṭha alawm, i thawhpui anih chuan kan sawiho ngei chu a ngai alawm, ṭhu rawh u, nulate u" min dawngsawng ṭha khawp mai

"Chuan lal fapa, kan damdawi ṭangkaina tur i sawi khan min tibuai deuh a" - Etoile

"Enge i sawi awmzia?" Prince Sharman chuan Etoile lam a hawi a

"Ka lo hriat danin box zahnih damdawi i duh tih ka lo hria a, kan damdawi te hi a dam rei dawn lo tih i hria em?" Etoile chuan a zawt a

"Hre tehreng e" a nui leh a

"Chung zawng zawng chu eng atan nge i hman dawn? Lal fapa thil atthlak tak niin i hre lo em ni?" - Etoile

"Eng atan nge ka hman ang maw? Inhliam ho tan mawle" awlsam zet chuan a chhang a

"Chutiang zat zat an inhliam dawn em ni? Ka ngaihdan tlawm tak mai chuan chutiang zat zat chu ramri ah an mamawh ka ring lo" Etoile chuan inngaitlawm deuhin a chhang a

"He thil chu a..." lungawi lo deuhin a awm zuai a, a hmel a rawn thlak leh nghal

"A ni maw, Lady Etoile hian mipui inhliam tur a ngaihtuah anih hi, i thinlung a ṭha hle mai" a nui leh suk a

Enge maw dik lo a awm tlat

"Ni love, ngaihtuah ka ngah lutuk a, chuvang alawm" Etoile chu a maimitchhing a

Sawi chat tur chu ka hre mai bawk si lo

"Ramri ah chauh lo pawh hmun dangah pawh damdawi chu mamawhna kan ngah ang, lal in ah pawh hian sipai in an mamawh alawm" - Prince Sharman

"Ni e mahse inhliam an tam lo thei ania" - Etoile

"Awi leh, Foreign affair minister hmuh ka ngai tak e, ka kalsan phawt mai ang che , biak che u in nuam lutuk a, ka tihtur ka theihnghilh der alawm, min hrethiam phawt mai rawh u, in kal hma in ei tur a bik taka an siam hi lo ei ula, thingpui nen hian in lo in dawn nia" a rawn nui leh var a

Kan haw kawngah chuan

"Miss Ripley, Prince Sharman kha ngaihtuah deuh chu a ngaih ka ring" Etoile chuan a rawn sawi chhuak a

"Lal fapa kha maw?" Ka lo ti vat

Zeronis pawhin hetiang chiah khan a sawi a, a hlauhawm nge hlauhawm lo pawh ka hrethiam love a

"Ka rindan mai a ni a, mahse ka zawhna zawh te kha pehhel na a zawng rengin ka hria, a phakar hle bawk" hnuai lam a melh leh ralh a

"I sawi awmzia chu damdawi hman a tumna kha tiraw?" Ka lo zawt ve leh vat

"Aw, dik lo chu a awm alawm, a dam rei dawn lo tih hrereng chungin a chah ṭeuh bawk a, chu pawh ramri a awm ho tan, inhliam an tam vak bawk lo nen, Prince Sharman hian indo velah hian thil ruahman chu a nei chiang a ni" Etoile chuan min hrilh a

"Indo maw? A ni thei lovang, ram a ralmuang a ni lawm ni?" Ka ti sap a

Indo chu lehkhabu leh film ah kan hmu ṭhin ang hi maw, ka awih thei lo, hemi thawnthu ah hian indo a awm em ni?

"Lal fapa a ni sia, a hausa dawn lutuk, chuvang chuan hman ṭeuh ṭeuh a tum aniang" ka ti chhuak phut a

"I sawi dik maithei, ka hriatsual pawh a ni maithei" a bengah a sam zepin a rawn nui a

"Nia tiraw? Engmah a ni lovang lungngai lutuk suh aw" ka kut chu ka suih a

****

"Awmzia a nei hlawl lo, ramri chu a buai zual nasa lutuk a, inbeih chu a nasa telh telh dawn maw?" Awih harsa ti zetin ka zawt a

"Miss Ripley, chu zawng pawh chu a la ni lo" Sylvia chuan min rawn hrilh ru a

Hmanhmawh lutuk in Duke chenna ah ka kal nghal

"Zeronis" ka ko nghal a

"Ripley?" A rawn hawi a

"Indona ah i kal dawn maw? Thudik a ni em? Tinge engmah min hrilh loh a? Ramri lamah chuan i kal dawn a mi? Sipai te i hruai dawn maw? Awmzia a nei lo, lalpa leh, indo maw?" Thawk pawh la lovin ka sawi nghal par par

"A hmasa berah chuan hahdam phawt teh aw, khawi aṭang nge i hriat?" Min rawn pawm a

"Sylvia hnen aṭang" a darah chuan ka bei hle hle a

"Count chhiahhlawh pawhin a hriat chuan mi zawng zawng in an hria anih chu" a ti leh sap a

"Tak tak a ni maw, indo chu a awm tak tak dawn a mi? I tel ve dawn bawk maw?" Ka zawt nawn leh a

"Duke ka ni a, ram venhim a ngaih chuan ka tel ve a ngai alawm" ka ban a vuan a

"Mahse a hlauhawm asin, thil thleng awm ta se...." ka zam ru riau

"Min ngaihtuah em ni?" Ka beng bulah a rawn kun hniam a

"Tehreng mai" ka ti hluai

"A lo ni maw? ka naupan lai aṭang ngaihtuah tu ka nei ngai lova, ngaiah ka lo nei hman alawm" a ti chuai raih a

"Ka awm alawm, tinge chutianga i ngaih, min nei alawm" tih thu chu ka hrilh a

"I sawi dik e, ngaihtuah tu ka nei hi ka lawm, awle che sawn rang lutuk lo teh" min la vuan a

"Min hrilh teh, thil dang min hrilh loh i la nei em? A hlauhawm em? Thudik tak min hrilh teh" chiang deuh chuan ka melh a

"Engmah a ni lo tih sawi ka duh na in thudik chu indona hi chu a hlauhawm lutuk" a ti leh sap a

"I ṭha ang tiraw?" Ka zawt leh vat a

"Thudik tak ka hrilh leh tho che a ngai em ni?" - Duke

"Aw, thudik chauh sawi rawh" - Ripley

"Indo hi chu vanneih thil thu ania, martial arts leh mi thiam tak nih chuan a chak ve theih tho" a ti sap a

"Anih chuan ka vanneihna zawng zawng hi nei vek rawh, chutiang chu ka mamawh tawh lova, ka pe vek ang che" thutak deuh chuan ka hrilh a

"Tak tak maw? I vanneihna chu i hmang zo vek tawh maw? Ka rawn let leh hunah chuan ka nupui i ni tawh ang" lungchim deuhin min fawp a

A rawn let hunah maw? Tinge heng zawng zawng hi a thlen le? Tukin zingah khan hlim takin kan awmdun ka ring ania, mahse tunah chuan ka hma a mipa hi a bo ka hlau a ni

"Ka duh lo" - Ripley

"Ngati maw?" - Duke

"I rawn let hunah chauh i nupui nih ka duh lo, tunah ngei hian i nupui nih ka duh, ka pasal i nih chuan dam taka rawn let turin i bei ngei ang" ka awm chu ka khawih pah a

"Indona chu chutiang mai mai a ni lo....." a sawilai chu ka lo pawtchat vat a

"Indona chu ka hrethiam ve lo, min hrilhfiah tum lo mai rawh, i rawn let leh ngei ang tih min tiam rawh, chu mi atan i hmeichhia ah min siam rawh" ka in kawk a

"Ka thei lovang" - Duke

"Engati maw?" Ka lo ti vat

"Ka hmeichhia chu i ni tawh sa reng alawm" nui vaer ver chungin min fawp leh a

Inneih thawmhnaw chu ka ha a

"Miss Ripley, i mawi lutuk" Sylvia chuan min lo en a

"I sawi dik e, a mawi lutuk" darthlalang ah chuan ka in en a

"Erenel a Duchess hmasa ber i ni dawn a, mahse hriatpuitu che an awm dawn si lova...." Sylvia chu a thaw halh a

"A pawimawh lo, Duke nen kan nih chuan a tawk mai" pawi ti lo deuhin ka awm a

"I sawi dik alawm, mahse a la tlai lo ania him dam taka a rawn haw hunah a la ti theih tho asin" a ti leh hram a

"Him dam takin a rawn haw dawn tih ka hria alawm, chutih hunah chuan kan innei ṭha leh mai ang, tihpalh" ka mittui a rawn tla a

"Ni love, Miss Ripley, keima thiamloh zawk alawm, i sawi awmzia chu ka hria alawm" inthiamloh deuhin a kun lap a

Min ngaihtuah tih ka hria alawm, min hre tu apiangin chutiang chuan an ngai ve vek ang, indona ah chuan thil ṭha lo a thleng thei a, mahse changtupa ania, a thi thei lovang

"Kal dawn ila, ka nupui?" A kut chu min rawn pe a

Engkim hi a ṭha vek mai ang

Puithiam chu sawtah sawn ding tur ania, lehkhabu ah pawh hetiang hi chu a la thleng lovang, lehkha ka zir khan chutiang chu ka lo ngaihtuah thleng lo a ni a

"Tinge i nuih a?" Min rawn nghawk a

"Inneih hun a tihdan tur ka lo zir vek khan awmzia a nei tawh lo lutuk a, Sylvia in min hau ziah bawk a" tih chu ka hrilh a

"I lungawi lo em?" - Duke

"Ni love, ka duhdan dan a ka chet theihna hi ṭha ka ti ber, heti hian kan awm ta sa sa, kan duhdan in kan kalpui dawn lawm ni?" Sylvia chu ka melh zeuh a

Zungbun bawm chu a rawn la a

"Hei hi eng nge ni?" Zeronis chuan min lo zawt a

"Eng vak mah chu a ni lo, mahse hei hi pek che ka duh a, ka thilpek che anih hi" bawm chu ka hawng a

"Engtikin nge i lo buatsaih a?" Min en reng a

"Hna leh inneih chungchang vel ka buaipui karah ka pawisa khawl in ka lo lei a, kan damdawi siam kha kan hausak pui dawn maw ka tia, thil ṭha lutuk mai lei che ka tum a, mahse kan hlawkpui hmel bawk si lova" silver zungbun chu ka la hmuh reng

Diamond zungbun lei ka tum zawk tak ania

"I hlawhtlinpui lo chiang khawp mai, a chhe vek zawk lo maw?" A nui suk a

"Ni e, hei hi ka tih tak zia lantir na anih hi, i bun vak loh chuan...." ka hmai a sen ṭawn ṭawn

"I tih tak zia ka hriatin ka bun reng ang" - Duke

"Chutiang chuan ka sawi chuang lo ania" insawithiam chu ka tum a

"Ripley, tun ang hunah chuan ka ngaihtuah a, i zuna min uai tir dan i hre hle mai, zungbun chu min bun tir ta che" ka biang a rawn dawm a

A kutah chuan ka bun tir a

"A ṭha e, Ripley De Inglid, Zeronis De Inglid hi i pasal tak ni turin a nuam emaw a hrehawm emaw kumkhua in i pasal ah i pawm ang em?" Min zawt a

"Pawm ang, Zeronis De Inglid, Ripley De Inglid hi i nupui tak ni turin a nuam emaw hrehawm emaw kumkhua in i nupui ah i pawm em?" Nui deuh sak chungin ka zawt a

Sylvia chu a mittui a lo tla pur mai

"Tehreng mai ka pawm e, tunah chuan nichin aṭanga ka tih chak tawh em em ka tih a hun" ka hmai bul chetah a rawn awm hnai a

"Eng nge i tih duh chu?" Ka lo zawt vat

"Ka nupui fawh mawle" tih pah chuan min fawp leh a

"Eng maw i sawi a? I nu leh pa tel lovin pasal i nei maw? Ka dam chhungin chutiang thil chu ka hre ngai lo" ka pa chu a ding hluai a

A lungawi lo a ni maw? A awm viau tho e

"He thil hi ka pawm thei lo" ka pa chu a sa phat a

****

Chhunzawm tur


Show post links
Top

[Ngaia]

"Ka pawm thei lo, inneih thawmhnaw i ha lai hmuh che ka duh asin" ka pa chu a mittui a lo tling kuang a

"Ka tihpalh" tih thu ka lo sawi ve mek bawk

"Ni lawm ni? A rawn pian hlim aṭang kan rohlu ah kan ngai a, tunah chuan a lo puitling in a chhungte hriat loh in pasal a lo nei a, inneih thawmhnaw pawh nangmah chiahin a hak chhin lai i hmu tiraw?" A mittui hru pah chung chuan ka nu lam a hawi a

"Ni e, i ti dik lo khawp mai tun ṭum chu bawihi" thutak deuhin ka nu chuan min melh run a

Chu chu buaina ber tum em maw ni le?

"A inhmeh dan tur zia te hi ka lo mitthla asin" - Count Liverpool

"Duke rawn haw hunah kan innei ṭha leh dawn alawm, chutih hunah chuan ka ha leh thei tho alawm" ka lo inrawlh vat a

"A ni maw? A ṭhat chu" an thaw huai a

"Engpawhnise, ka bungrua zawng zawng nen Duke chenna ah ka inthiar lut tawh ang" ka nghawng chu ka tuai neuh neuh a

"Vawiin aṭang maw? I hmanhmawh mah mah lo maw?" Ka pa chuan min lo zawt vat a

"I pa hian a sawi dik, Duke indona ah a kal nghal dawn si a, nangmahin hriat ngai loh hmunah i cheng thei dawn em ni?" Ka nu chuan a hmui a hup nghal ṭhawt

"Ni e, nakinah insawn zawk mai rawh" ka pa pawhin min ngaihtuah hmel khawp mai

"Ka ṭha mai ang, tunah chuan Duchess Ripley De Inglid ka ni tawh alawm" phur deuh chuan ka hrilh dun a

****

"Miss, indona a kal tur te chu i thlah lo ang maw?" Sylvia chuan tukverh lam a thlir a

"Thlah lovang, tihtur ka ngah lutuk" lehkha chu ka bih leh thuak thuak a

Ka insum thei lo ang a, mittui nen kal lo turin ka ngen ang tih ka hlau

"Sylvia min ngaihtuah lo la, hna thawk phawt mai rawh aw, bungrua vel kha tihfel i ngai a ni lawm ni?" Ka inti paukhauh lui a

"Awle, Miss Ripley, chhun thil ei hunah ka lo let ang" min chhuahsan a

Hna thawk ṭan mai ang, box 200 Prince Sharman a'n a duh a, vawiinah an siam fel ang a, ramri ah an thawn dawn a, bawm ah lo lut ru ta ila Zeronis nen kan inhmu vat mai dawn alawm

Eng thil nge maw ka ngaihtuah le? Rilru pe zawk teh ang. Engmah a ni hleinem. Reilote ah a rawn let leh mai ang a, zin chhuah zawk ang alawm anih dawn, tunah hmu thei rih lo mah ila, him dam takin a lo let leh mai ang

Changtupa a ni a, a thi em lovang, engkim hi a ṭha vek mai ang, ka mittui a rawn far a

"Miss thingpui i duh ang em?" Sylvia kawngka a rawn dak chiah chu ka tlan pel nghal a

"Khawiah nge i kal dawn?" Min rawn au zui lawm lawm a

"Zeronis hnenah" ka hawi let leh a

Ṭha taka inthlah maw? Engtikin nge ka lo puitlin tak em em le? Tunah ka hmuh loh chuan ka hmuh leh hun tur ka hre si lo

Awm hmun aṭang ringawt a ka lo phur pui chuan a âtthlak dawn lutuk. Ka mittui tla hian a ti hrilhhai maithei, a hun takah a bulah chat ka thlen a ngai

Vawi khat chiah ka hmuh pawhin ka hmangaih thu hrilh ka duh, vawi khat chiah a ni mai.

"Ke a tlan thlen zak chu i ngaihtuah lo tiraw?" Sylvia chuan min rawn au leh a, ka ding chat

"Tehreng mai" ka meng kual ralh ralh a

"Awle, lirthei i chuanna tur ka va buatsaih nghal dawn nia" min kalsan a

****

Mipui chuan indona a kal tur ho chu an lo thlah nasa ngang mai, an karah chuan ka inzep a

Zeronis chu a hma lamah a awm ngei ang

"Zeronis" ka au vak a

"Ripley?" Ka bul chatah sakawr nen a ding a

Mak a ti hle mai a, mangṭha tiin kan inthlah vek tawh a, hetah ka lang leh thut bawk sia, kal tir ka van phal lo tak, a bula kal ve mai ka chak, mahse a rei dawn si a, a tawp thlengin a kianga hman ka duh

A theih loh tih hre mah ila, hei hi kan pe ang e, ka nghawnga ribbon sen dang chu ka phelh a, a lamah ka va vawr a, a lo dawng chat, a fawp ngawih ngawih a, a kal liam ta

"Miss Ripley, thawnthu lungchhiatthlak tak leh ropui tak anih hi, indona ah a kal dawn tih i hriat veleh in innei nghal a, ṭap miah lovin i thlah thei bawk a, i puitling lutuk ania" Etoile chu a inhnit hlawp hlawp a, a mittui a rawn tla kuang bawk

"Khawngaihin insum hram rawh Miss Etoile" amah zawk chu ka thlem a

"I ṭhian ka nih angin i bulah ka awm thei lo a, ka zak hle mai, i ropuiin i zahawm lutuk ania aw, harsatna i tawh lai pawh hian chhel takin i hmachhawn ṭhin a, ka ngaisang lutuk che" a hmel a hnur khup a

"Chung em em chu ka ni hleinem" sawi tur pawh ka hre mai lo

"Khawngaihin ṭap suh Miss Etoile anih loh chuan i mitmeng mawi tak hi a bui vek dawn ania" Wright chuan a rawmawl a lo pe a, an hmai chu a insi lek lek

"Mahse, Mr Wright ka lawm e" rawmawl chu la in a mittui a hru mai bawk a

"In pahnih khan in inhnaih hle mai a, hun in hmang dun ngun hle aniang maw?" In la zei deuh chuan ka nui vel a

"Eng a? A teuh lo mai" an tirual deuh ṭhawt

"Hahdam teh u, in pahnih a hmuh dun che u hi nuam ka ti lutuk a" inthiamlo deuh chuan ka nui put put a

"I khawhar hlau in hnem tur che in kan lo kal alawm" lai deuh reuh in Wright chuan min lo chhang a

"A dik alawm" ka nui sang a

An inhmeh hle mai

"Ka ṭha alawm min ngaihtuah suh u tih sawi tur chu ka ni a, mahse thudik chu ka ṭha miah lo" ka kun lap a

"Miss Ripley" Etoile chuan min ngaihtuah tih hriat zetin min rawn ko a

"Nimahsela, min ngaihtuah suh u, Duke lo let leh hma chu chak takin ka awm ang a chhan chu tunah hian Duke Inglid chenna a thu ber ka ni rih tlat" ka kut hum ruh in ka nui var a, an lo phu deuh zawk

Ni e hlim takin ka awm tur a ni. A rawn let leh hunah pawh ṭha takin ka lo hmuak ang a, thil ka ei ṭha in ka tei chhuak fo bawk ang, sumdawnna lamah ngawrh zawkin hma ka la bawk ang

****

"I hming sign dan a danglam daih a ni maw? Duke Inglid nen in innei tawh em ni?" Prince Sharman chuan lehkha chu a bih nawn leh a

"Inneih tak tak chu a la ni chiah lova, mahse tlema hmanhmawh deuh hlek a ngai a" ka nui var var a

"Indona a a kal chungchang vel ah a ni maw, anih chuan Duchess Inglid i ni tawh a ni maw?" Min zawt leh a

"Aw, chutiang vel chu a ni e" - Ripley

"Lalber in a hriatpui cheu em ni?" A ṭhen sak a

"Duke khan a kal hma in lal a hmu lawk a, chuvang chuan hre turah ka ngai mai" phur deuh chuan ka chhang a

"Anih dawn chu, in inneih ka lawmpui che Duchess Inglid, in inneih ka tel lo chu pawi ka ti hle mai" thingpui chu a in khawlh a

"Duke lo let leh veleh kan innei nawn leh dawn alawm, chumi hunah chuan hmuh che ka lo beisei ang" hlim deuh chuan ka sawm a

"Lawm takin ka lo tel ve ang, document chhunga inziak hi a dik em? Damdawi chu hralh lovin i pe chhuak vek dawn tih hi? Duchess tan pawn i thil phal mah mah lo maw?" Min rawn melh kalh a

"Kha kha maw, indona ah hian lo hlawk pui ka duh lo alawm" ka kawr chu ka chelh nghet sauh a

Sumdawnna chu kan tluang lo tih pawh ka hria, order lak vel pawh kha ka phur em em a, hliam dam theihna ni mahse indona vaka lo hlawkpui vak kha ka tum lo chu lo ah indona ah chuan ka hmangaih ber a tel ve si a

"I thil vei chu ka hrethiam alawm mahse lal chhungkua tan chuan buaina a ni ve thei a, thamna la kan ang dawn em asin? Indona vang hian puh kan ni thei tlat a ni" - Prince Sharman

"Chutiang chu a ni lovang" ka au deuh ṭhawt a

"I thil ṭha tih hi ka ringhlel deuh tlat, engpawhnise ngaihdan hi a inang lova, heti hian ti ila, lal chhungkua hian i thil ṭha tih hi kan rul let che anga, a chanve velin" a kut chu dawhkan ah a khawng ri kerh kerh a

"A awmzia chu box 200 ah khan 100 chu donation ah kan pawm ang a, a hlawkna chu i nei lo maithei mahse in senso zat kha a tum thei dawn alawm, kan pahnih tan a ṭha ve ve bawk ang. Budget hmasa ai kha chuan inremsiamna a ṭha zawk bawk ang, i pawm zawng a ni em?" A ban phar chho in a nui leh ver ver a

"A ṭha maithei" ka ngaihtuah pah rauh rauh a

"Anih chuan document ziak ṭha ila kan inhmu leh vat dawn nia" min kalsan a

A van chauh thlak tak, Prince Sharman chu a fel hmel alawm, mahse Zeronis leh Etoile i'n fimkhur turin min chah bawk sia ka zam deuh, ka ngaihtuah hian Zeronis in lal fapa ka hmuh hi tinge a duh loh em em le?

"Miss Etoile hnenah lal fapa chungchang ka sawi pui a, ka lo chik vak loh thil min hrilh a, sumdawnna chungchang sawipui turin kan kal a" Zeronis chu ka hrilh mawlh mawlh a

Ka mumangah chuan Zeronis nen huanah kan lo leng dun a, Etoile nen Prince Sharman sumdawnna chungchang vel kan sawipui thu te ka lo hrilh a, thinrim deuh in hmu tawh lo turin min lo hrilh a, ka hmelṭhatna in a tih zam thu te a lo sawi a, a lo let hunah mi zawng zawng hriatpuia kan inneih tur thlengin kan lo infawp bawk a

"Miss, i awm em?" Kawngka an rawn kik dawt dawt ah chuan ka harh chiang lutuk

Ka muttui hman nena ka van ui tak

"Ka taksa chu awm e, ka thlarau chu hmun dang daih a a awm" ti chuan ka chhang a

"Eng nge i sawi awmzia?" Sylvia chu a rawn kal hnai a

"I hriat ang khan a ni mai" lukham chu ka pawm hlun a

"Ani maw? A pawi dawn hle mai, he thil hmu turin i thlarau pawh tel a ngai asin" engemaw hi a rawn keng a

"Enge ni a?" Ka lo zawt vat

"Duke Inglid lehkha rawn thawn hian i thlarau pawh a ko let leh ngei ang" lehkha chu min pe a

"Lehkha min rawn thawn thei a ni maw....." ka mittui a tla a

Sylvia chuan min rawn ko bawk

****

"Ka nupui duh tak, chawhnu lamah kan tum ram kan thleng a, hmun zawl nuam tak a ni.Mahni rama awm ang mai kan ni" - Duke

A lehkha a a ziah dang leh chu an hun hman dan tlangpui a ni a, indo chu a la awm chiah lo a, min ngaihtuah lo turin a ti, chhunah steak an hmeh a, sa anih vangin a ei duh tho, vawi thum a dam thu a sawi a, engmah a thlen loh thu vawi li, ngaihtuah hah tur a awm loh thu vawi nga a tawp berah chuan min ngaih thu a sawi bawk

Kei pawhin ka ngai lutuk che asin, ka ṭap nghar char char a, Sylvia in min buaipui char char

A tukah mit bui chukin Prince Sharman ka hmachhawn a

"I hmai chu tinge" a hriat thiam loh hmel khawp mai

"Ka ṭha e" ka nui hul hak a

Ka mit bui reh nan ka bei nasa asin le

"Hemi document hi a man tih loh chu a hma ang deuh chiah kha a ni" lehkha pawimawh chu a keng a

"Anih kha mawle" thingpui chu ka dawm a

"A ṭha e, Erenel ram aiawh in contract sign ila, eng tikah nge in rawn dah theih ang?" A nui leh ver ver tawh

"Stock sa kan nei ṭeuh a, kan rawn dah vat ang" ka lo nui ve mai bawk

"A ṭha alawm keimah ni'n kan rawn la mai ang" - Prince Sharman

"Ni love keimahni tihtur zawk alawm, kan rawn dah vat ang" ka lo hnial leh a

"Anih chuan sumdawnna lam chu i hnehsawh hle mai, sang tak i thlen ka ring" a ṭhen suk a

A tawp a tawpah chuan ka hlawhtling ve dawn ta niin a lang

"I hman chuan tlai chaw min eipui thei ang em?" Dawhkanah chuan a kut suihin min melh a

"Tlai chaw maw?" Ka ngaihtuah mawlh mawlh a

Sylvia khan eng nge a sawi kha? Duke eisiam sak tu khan a hmuh hniam thu kha a sawi a, a la thinrim ang em aw?

Prince Sharman chuan min rawn ko leh a

"Inah ka haw zawk mai ang e, ka lawm e" ka phu zawk a

"Ani maw? A pawi hle mai a, anih leh thingpui te, a hma a ei tur kan chhawp kha tui i tih thu ka lo hria a, a bik takin ka siam tir leh asin" - Prince Sharman

"Ni love, ka lawm lutuk vawiin ah pawh thingpui ka in hnem thawkhat viau e" ka ti leh sap a

Haw vat vat a Zeronis lehkha thawn vat ka duh

"I buai hle anih dawn hi Miss Ripley" - Prince Sharman

"Contract min sign pui avangin ka lawm e" bang chhah pui mai ni berin ka inhria

"Anih chuan thlah che min phalsak rawh" a kut min rawn pe a

Lal fapa hian min thlah a duh tak tak a ni maw? Tinge a fel em em a? Min duh aniang a? A duhzawng ka ni lovang. Sumdawnna vang aniang, lal fapa a ni miau a, hnial chu a mawi love

"Awle" kan inzui chhuak a

"Ka zawh duh che hi i ngei zawng tak ani ang em ka hre lova engtin nge Duke nen in intawn dan?" Min nuih var a

"Baron Hailey fanu piancham lawmna ah ania" ka kut chu ka phar kual a

"Tichuan in inhmangaih ta a ni maw?" - Prince Sharman

"Duke chauhin mawle" ka nui hul hak a

Ka hre chiang lo nan ka dik turah ngai ang

"Anih chuan i duh ve lo a ni maw?" A nui leh suk a

"Ka....dik tak chuan...." a tir kha chuan ka duh lo alawm

"Eng ang mi nge i duhzawng ka zawt thei che ang em?" Min rawn en leh a

"Sam buang mit pawl chuan ngilnei tak" ka ngaihtuah hnu chuan ka sawi a

"Anih chuan Duke Inglid i duhzawng a ni lo, a ni maw?" phur deuhin a nui ver ver a

(Facts : Zeronis leh Prince Sharman hi an inang lutuk, sam buang leh an mit a pawl ve ve)

"Duke Inglid nihna chiah anih chu, ka pasal duhzawng tak mai ka nei a ni" ka nui var a

"Engtin maw? Mahse ngilnei tih kha i sawi bawk si a?" A hriatthiam loh hmel khawp mai

"I hre lo anih kha, Duke ngilneih zia" ka hmui hupin ka nui leh a

"Ani maw? Eng nge i tuizawng, engtin nge hun awl i hman ṭhin?" Chik deuh chuan min zawt a

A zawhna chu a mak hle mai a,

"Prince Sharman pehhel kual a ngai lo ania, i sawi duh chu min hrilh tawp mai rawh" ka han melh kar a

"Ka thil tum i manchhuak a ni maw?" A phun sap a

"Ni e nichin aṭang khan ka ringhlel deuh tawh a, min koh reng danah leh min ngaihtuah viau danah hian Zeronis angin thil man chak viau lo mah ila" hnuai lam ka melh a

"Ka inthup viau in ka hria asin min rinhlelh chuan ka hrilh mai ang che" tih a sawi lai chuan ka lo pawtchat a

"Thu sawi vak a ngai hleinem ka hria e" ka nui ralh a

"Ni e, Duchess Inglid ka...." a rawn kun hniam deuh a

"Ka in tur siam dan thuruk i hre duh tiraw? Mi hi ka hrilh duh zen zen lo a, mahse nangmah i nih vangin ka hrilh ang che, a pawlh zat tur chu Champagne pasarih leh Vodka pathum, chuan i chawk kawi ang a, tichuan i in tawh mai dawn alawm, sawi aiin a taka siam in a tui lehzual ania" inringtawk tak chuan ka hrilhru a

"Ka lawm lutuk e, i intur siam dan min hrilh bawk a, ka la ei chhuah pui dawn che nia" a hmel a dang bal mai

"Khang te chu engmah anih loh kha" a lo ti sam et a

"Min hnawlna chuan ka rilru a tina hle mai chuan Duke Inglid a'n lo enzui tur che in min hrilh a" lirthei a ka chuan lai chuan min hrilh a

"Duke Inglid maw?" Mak ka ti ve deuh

"A kal hma khan min hrilh alawm" a rawn ti leh a

Chu pa chu min ngaihtuah lutuk a, Prince Sharman a mi rin vak loh hnenah chutiang chu a lo hrilh maw? A duhawm reuh hle mai

Vawiin chu ni a sa hle mai, i sam buang tle tak mai kha min ti hrechhuak, a lum nuam tak vangin he thu hi ka ziak a ni, i ṭhutna ṭhin office ah khan ka ṭhu a, dawhkan nghengin kan inkar chu inhlat mahse i chenna hmuna ka awm hian ka thinlungah i awm reng

"Sylvia lehkha hi min va thawn sak ta che" lehkha chu ka pe a

"Miss khawngaihthlak eng thil nge thleng ta hi? In inneih zawh veleh i pasal chu indona ah a kal nghal a, i huaisen hle mai" a lo ṭap pur a

"Indona kha a lo thleng thut sia, chuvang alawm kan inneih chhan" ka nui hul hak a

"Miss Ripley kal ang, hetiang hun hrehawm lutuk ah hian i nuam tih zawng tak ka tih pui ang che, chak tak ang khan lan tum suh, hna i thawk char char a, zangkhai deuha hun hman i mamawh" min nawr chhuak dawt dawt a

Ka ṭha ka ti chungin helai hmun ah hian kal ka duh tawh lo asin le

ISLA THE WITCH CRYSTAL BALL

****

Chhunzawm tur


Show post links
Top

[Ngaia]

"Sylvia ka ṭha tak tak ania" zam ru deuh takin kawngka pawnah kan ding a

"Chuan hei hi la rawh" lawm takin engemaw min pe a

"Hei hi eng nge ni" hrethiam lo deuhin ka en reng a

"Ka wallet anih kha, ka lo treat ang che" a mit a siai zeuh a

"Eng a? Eng thil nge i sawi? Hah taka i thawhchhuah anih hi" ka phu deuh zawk a

"I sawi dik alawm, hei hi hah taka ka thawhchhuah anih hi, i tan Miss Ripley ka unaunu ang chiahin i bulah chuan eng pawh ka sawi apiang i pawm ṭhin, i lungngaih chuan tih theih ka nei lova chuvang chuan he thil ka pek che hi pawm hram rawh, tunah chuan lut tawh rawh le" kawngka chu min kawhhmuh a

A thusawi chuan min hneh lutuk a, ka mittui a tling kuang mai

"Sylvia ka lawm e" ka hawi let a, a kutzungpui min hmuh a

Ngaihtuah chiang mang lo in ka lut leh ringawt ania, a thusawi khan min hneh em a ni, ka chhuak leh mai dawn maw ni? Ka kal hi a ṭha leh zawk maithei

"Lady Ripley! A rei leh ta hle mai" Isla chu a rawn lang thut a

Ka van phu chiang tak

"Ṭhu rawh le, dream catcher i lei chu a ṭhat hmel em?" ṭhutna chu a pawt chhuak sawk sawk a

"Kha kha a ṭha khawp mai" ka nui hul hak a

"I duhzawng anih chuan hei ribbon ṭha lutuk mai ka nei ania, Isla dawithiam thil neih hi chu a ṭha vek ania, eng nge i lo kal chhan?" Amah chu a han infak leh rih a

"Ka lo kal chhan...." tih ka sawi lai tak mai chuan ka hmui a rawn hup a

"I sawi a ngai lo, engkim ka hre vek, in en dawn ang hmiang, aw ka hria e, mi pakhat i ngaihtuah hle a ni maw Lady Ripley, chu mi chu i thlah a, him taka a lo let leh loh i hlau tiraw?" A ball chu a zut kual vel a

Tinge engkim hre vek ang hian a awm ṭhin le? A chet dan hi a ngai reng mai. Thuthang a lo hria anih dawn hi. Inbumna mai anih dawn hi a

"Aw" ti chungin ka chhang tho a

"A ṭha e, en ang hmiang i duhthusam a thleng dik dawn em?" Crystal ball chu a tuai vir leh a

Inbumna pawh nise a pawi lo, him takin a lo let leh ngei ang tih chiah hriat ka duh, khawngaihin, khawngaihin, khawngaihin, Zeronis chu him takin a lo let ang tih sawi hram teh

"Chhanna chu ka hre ta, i hmangaih chu him takin a rawn let ang" a nui suk a

Ka van â tak, mahse a ṭha tho e

"Ka lawm e Isla" haw mai ka tum a

"Crystal ball hian thil thleng tur dang a sawi tlat mai" pawi tih hmel deuhin a hmui a hup a

"Engtin maw?" Ka lo zawt vat

"Tawpna chungchang a ni" - Isla

"I sawifiah deuh thei em?" Ka thin chu a phu dup dup

"Ka chiang chiah bik lo, crystal ball sawi chiah ka hre thei a, engpawhnise a sawi chu tawpna a thlen chuan engkim hi a zo vek ang" thutak deuh chuan a sawi a

"Tawpna awmzia te chu a chiang viau alawm, thihna, thim leh kan tana ruat hrim hrim a ni mai a" Ka hrethiam lo leh tawh

"Chutiang a ni lo, Crystal ball chuan chutiang thil chiang sa a sawi ngai lo, ka sawi tum hi i hrethiam lo maithei khawvel hi a tawp dawn pawh a ni thei" a nui duh bawk si lova

Khawvel hi a chhe vek dawn em ni le? Ka ngaihtuah zawng ringawt pawn ka tha a khur thei

"Kan sawi takah chuan Lady Ripley remna leh muanna thlen theih nan thil ka nei asin, hei hi ania, i duhzawng a ni em?" Zawhte lem a rawn phawrh a

Eng thil nge ni a? Thil hralh a duh vang lek a lo nih hi a

"Ka duh lo mai ang, ka lawm e" ka kut chuan ka lo dang a

"I hre tawh ngei ang a, mahse ka thil neih te hi a ṭha teh mai ania" - Isla

"Mahse ka budget siam ka hmang zo vek tawh alawm" ka nui ruh ruh

"Lady Ripley ka tlawm dawn che alawm" - Isla

"Ka wallet ka pai lo tak tak" - Ripley

"Remna leh muanna thlen nan a ṭangkai tak tak ania" - Isla

"Aih ka duh lo mai ang" ka chhuahsan ta a

****

"I nuam tih zawng chu eng nge a an?" - Sylvia

"A ṭha khawp mai, tinge mipui hi an intlar nasat em em a?" Mak ka ti deuh chuan ka zawt tawp

"Ka hre bik lo, restaurant thar a awm a ni maithei" Sylvia chuan min chhang a

Kan damdawi zawrhna bulah a ni sia, ei tur chu a tui viau aniang. Ka va hmuh meuh chuan mak ka ti ngei mai

Kan dawra luh tum chu an lo intlar put a lo nia

"Eng nge thleng hi?" Ka phu deuh zawk

"Ka hre bik lo, mahse thil ropui deuh chu a thleng a ni ngei mai" Sylvia chuan a ka a hup tawp

"Hey, rawn inzep ringawt suh u, darkar hnih chuang kan nghak tawh ania" mipui chu an lo phu mur mur a

Dawr chhung kan luh chuan a lo ruak vek

"Mak i va tih hmel ve, dawrtu kan ngah lutuk a, nimin ngaihtuah phei chuan vawiin chu tam tak an ni"

"Count chenna aṭang ka va lak belh hnu pawhin stock sa zawng zawng nen a zo vek anih hi, kan siam belh leh chu a ngai ang" Etoile chuan hlim deuhin min lo hrilh a

"Ka haw phawt ang a, ka pa ka va sawipui vat ang e" phur deuh chuan ka chhang a

"Awle, naktuk hi ka ngaihtuah riau mai, lo siam vat pawh ni ila, hun a duh rei dawn si a, Miss Ripley" a sawi lai mekin ka lo nui ver ver a

"A nuam tho tho, kan damdawi hian hriat a hlawh ve ta anih hi" ka lo ti var a

"Ni e, lal in a thuthang leng vel vang liau liau chu a ni" Etoile pawh chu a hlim ve lutuk

Ka ring deuh reng a ni

"Anih chuan in in hralh thei ta a ni maw? Keimah vang aniang" Prince Sharman chu a lo ding reng a

"Min lo hrethiam ula nulate u, dawr in khar tawh tih ka hria a, damdawi pawh in lo zuar zo vek anih dawn hi" dawr chhung chu a en kual a

"Ni e nangmah vang liau liau a ni lal fapa" ka nui suk a

"Ka sawipui che kha i hlawkpui viau a ni maw?" - Prince Sharman

"Chutiang chuan i ngai thei ang, ka lawm e Prince Sharman" ka kun zeuh a

"Anih chuan thil min ei chhuahpui thei anih chu" Ka hmai zawnah a rawn thle phei a

"Ei chhuah maw...Miss Etoile i hman ve dawn em?" A lam ka va hawi vat a

"Theih ka va ring lo ve, Baron hnenah kan siam chhuah dan tur vel ka va sawipui ang" Etoile chuan a ngaihtuah vawng vawng a

"A nih chu a va pawi ve" ka ti chuai raih a

Engpawh chu nise Prince Sharman vang a ni a, ei tur ka lei loh chuan ka sual hmel viau ang a, vawiina ka kalpui loh chuan naktukah min sawm leh tho ang

"Ni e chhuahpui che chu ka ba alawm" ka ti sam et a

Ei tur dawr ah chuan kan inzui lut a, mi ho chu an lo phun sep sep mai

"Heta an in tur hi a tui asin, mahse i siam kha chu a la tluk lo hle a ni" ṭhutna min kawhhmuh nghal a

"Ani maw?" zawi sap chuan ka chhang a

Lal fapa ka kal pui vang nge min en deuh hlawm tlatin ka hria

"Duchess Inglid, i sumdawnna a hlawhtlin vangin ka lawmpui che" kan in tur chu kan khawng ri keuh a

"A lan dan chuan sumdawn lam hi i kalna zawng a nih hmel hle mai Duchess Inglid" - Prince Sharman

"Ka thiam hmel i ti maw? Chutiang chuan ka lo ngai ve chiah hleinem, ka vannei mai mai anih ka ring zawk" in tur chu ka lem khawlh a

"Vanneih pawh hi thiam thil tho alawm, a tir aṭang i nei ṭha nghal hle a ni" mit lang miah lovin a nui a

A tirah khan extra chauh ka nia, changtupa ka tawng hi vanneihna kan ti thei mai ang chu

Zeronis, thil i ei ṭha em? Chawhmeh a tui loh thu kha a sawi a, keimah chauh in thil tui deuh deuh lo ei bik hi nuam ka ti lo khawp mai

"Ka lo hriat dan in damdawi in siam belh dawn in ka hria a, order ka lo lak belh dawn em ni?" Dam deuh chuan a sawi a

"Order lak belh maw? Mahse i tih lawk sa ṭeuh kha" Ka rilru a nuam chiah lo

"A dik alawm mahse" a tih lai tak chuan ka tho thurh a

"Pawisa i neih vang maiin order belh i duh maw? Indo rei se i duh viau em ni? Damlo awm belh ṭeuh se pawi i ti miah lo tihna a ni maw?" Thinrim zetin ka ang hlawi hlawi a

"Duchess Inglid?" Nuam ti vak lovin min en a

"Hetiang aṭanga hlawkna kan hmuh hian ka lawm phah miah lo, mi hliam nei tan kan siam a, mahse indona chu a rapthlak lutuk" dawhkan chu ka bawh lo chauh

"Duchess Inglid, reilote inbengdai hram ta che" dam deuh hian min bia a

"Min lo hrethiam dawn nia, ka thinur deuh thut a" ka insiam ṭha nghal mawlh mawlh

"Ka hrethiam lutuk che alawm, in tur chah leh ila, sherry hi a tui teh mai ania, i rilru hahna chhawk zangkhai che ka duh a, mahse tihtur mai ka hre si lo"

"Indo lai chuan eng thil pawh thleng thei ania, inhriatthiam lohna a thlen loh nan kei pawhin indo hi zo vat se ka duh"

"Erenel lal fapa ka ni a, sipai ramri a indona a chhuak zawng zawng te hi ka tan an pawimawh vek chuvang chuan muanna tih loh chu duh engmah ka nei lo" a in tur chu a tlak pawp a

"Anih chu" kei pawh chuan ka in zeuh a

"No hi a ruak tlat, a dang lam leh ila" - Prince Sharman

He kan lal fapa hi a, in tur man to tak a lam char char a, ka wallet a ruak vek dawn, ka thawh hah ve tehreng nen, a la rui em em zui

"Ka lo pui dawn che u em ni?" Dawr nghaktu chuan min lo zawt vat a

"Min khawih tum re re suh, ka rui miah lo ania" a lo hui sawn a

Eng thil nge maw a tih le? Keimah chauh te chuan ka zo dawn re re lo, in ṭanpui tir mai awm

"Prince Sharman, khawiah nge i chhiahhlawh te?" Ka ṭawng thei ṭawk ṭawk a rit lutuk

"Nula hmelṭha deuh in min bia ania, chhiahhlawh maw, ka chhiahhlawh te maw?" Min nuih leh ver ver a

"Ka pe fel vek tawh e" Sylvia chu kan lam panin a rawn kal a

"Chhuak phawt ila, Sylvia ṭhutna kha lo peih rawh aw, lal in thleng ka thlah a ngaih hmel tlat" ka hah lutuk chu ka hmai a sen ṭawn ṭawn

"Sylvia kha lam kha lo chelh rawh aw, lal fapa in tih harh tum hram teh, awi le" - Ripley

Lal in kan pan pui a

Tak tak in lal fapa chu a van nawi tak, ka ei chhuahpui tawh dawn lo hrim hrim

Ka dar ka malis mawlh mawlh a

"A tak a nih hi, In tur siam nula kha i ni maw?" lal fanu naupangte chuan min rawn kawk a

"Chawhnu hun hman nuam lal fanu" ka kun hniam a

"Ka unaupa i rawn hruai haw a tinge?" Min chhoh en a

"A chhan chu..." sawi tur ka hre mai lo

Chhun lai taka a unaupa chahthlak thu ka hrilh chuan a fuh vak lovang

"In pahnih chauh in maw? I sual hle mai, kar hmasa pawn kan infiam kha" min chhuahchhal a

"Ka sawi tum chu he lamah hian i room a awm em ni lal fanu? Enge i lo tih dawn?" Ka ṭhu ṭha sauh a

"Ni love ka room te chu a nuam lutuk, engmah a ni lo, rawn hmuh che pawh ka tum lo, ka rawn kal fuh mai mai" hmun dang a hawi daih a

Min hmuh tumin i lo kal chiang lutuk, Zeronis min hrilh kha ka hrechhuak Lal fanu chu a nu in a thihsan hma avangin a u te pahnih leh a pa in an duat lutuk a, ka en hian naupang duhawm tak niin ka hria

"Haw i tum em ni?" Ka kawr ah a chelh a, ka lu ka bu nghat

"Ni e haw vat rawh, i nu in a lo nghak ang che, a lo ngaihtuah ngawt ang che, kei chuan nu ka nei ve lova chuvang chuan ka hrethiam lo" a in hnit hlawp hlawp a

"Lal fanu i ṭap em ni?" Ka lo zawt vat

"Ṭap love, ka ṭah chuan ka pa in i chungah eng nge a tih ang ka hre lo, min ti ṭap tih a hriat chuan e, chuvang chuan ka ṭap lovang" chimawm deuh hian a rawn nui a

Lal fanu chu duat sual Zeronis a'n a lo sawi kha a dik chiah anih hi

"Eng nge ka tihsak theih che" ka nui halh a

"Naktuk zing thleng min infiampui rawh" ka kut a man bet a

"Engtin a?" Ka tih hnu chuan sakawr lem ah te kan chuang dun a, thingpui te kan in bawk, Duchess ka nih thu ka hrilh chuan Duke pasal a neih a tum thu a sawi a, a hnu chuan a rilru a thlak leh

"A va nuam tak" khumah chuan a mu a

"Lal fanu mutthilh a hun tawh ania" puan ka sin ṭhat tir a

"Ka bula i mut hian ka unaunu ang maiin ka ngai che" sir zawngin ka lam a rawn hawi a

"Nia tiraw, ka unaunu ang chiah i ni, lal fanu" ka lo nuih let ve bawk

Sam buang mit pawl, kan fa lo la piang tur hian eng ang nge a nih ang le?

"Nangmah ang deuh fa ka neih chuan ka hlim ngawt ang" ka nui leh ver ver a

"I fa i tih chu Duke Inglid nen in fa maw?" A ṭhu chhuak leh a

"A dik alawm" ka lu ka bu nghut

"Anih chuan naute insiam dan i hria em?" Thutak deuh chuan min zawt a

Engtin a?

"Naute insiam dan i hre chak a ni maw... kanghlai in naute a phur a" - Ripley

"Engtin nge kanghlai in naute a phurh theih a khawi aṭangin?" A awih lo ngei mai

"An sawi leh dan dang chu maw naute chu lei hnuaiah chhungkua in an hmu a....." - Ripley

"Thu awihawm loh lutuk anih chu, nang pawhin i hrechiang lo a ang hle mai" a nui deuh put put a

Chu thil hre tur chuan i la naupang lutuk e

"Naute chu maw mipa leh hmeichhia an inhmangaih hian zanah..." chung lam a hawi a

A hre tak tak em maw ni le?

"Lo nghak lawk teh lal fanu" dan ka tum lai takin

"Kut an invuan ṭhin chutichuan naute a lo piang mai alawm naute neih vat i duh chuan mut laiin a kut vuan tlat rawh aw" khumah chuan a bawk leh a

"Awle tehreng mai" ka van zak tak

"Duke kut chu eng nge a an? I hmangaih ber kut a ni sia" phur deuhin min zawt a

"Duke kut chu a nem in a kuta min deh te hian a lum nuam em em a, a rilru leh a hmangaihna a hriat theih ṭhin, kan kut kan invawn hian kan hlim reng dawnin ka hre ṭhin, hun lo kal turah chutiang mi i tawng anih chuan i hre ve mai ang" ka sawi zawh chuan a lo muhil der tawh

A kut hi a van duhawm reuh tak

****

"I ṭha em Miss Ripley? i chauh hmel hle mai" Sylvia chuan min lo be vat

"Ni e" ka thaw halh

Lal fapa leh lal fanu in ka haw hma in thil ei turin min ti tlat a, lal fapa phei chu a inthiamloh hmel lutuk, inang lo viau angin lang mahse an inan na tam tak a hmuh theih

"Tihtur ka ngah lutuk a, ka hun a la ṭeuh alawm, dawr kha ka inthlak veleh kan tlawh nghal dawn nia" - Ripley

Kan thlen chuan inchhungah kan awm puite chu an lo phun deuh mur mur a

"Sylvia, thil dik lo a awm tlatin i hre ve em?" Ka hawi kual ve a

"Ni e, thil thleng chu a awm chiang a ni" a lo ti ve bawk

"Eng nge ni le? Engvang nge niang?" Kan ti rual ṭhawt

Khaw chhungah pawh min en hrek hrek a, an phun leh sap ṭhin. Eng chu nge ni ang le?

"Min lo hrethiam lawk, Duchess Inglid i ni em?" Hmeichhe pakhat hian min rawn ko a

"Aw ka ni e" a lam chu ka hawi a

"Anih chuan nang hi" a tih lai mekin a ṭhiannu in a lo pawtchat a

"Ka tihpalh lutuk, ka ṭhiannu hian a sawi loh tur a sawi a ni" an kal daih a

Tinge sawi zo lo a an kal daih le?

"A mak hle mai, Duchess ka ni tih a hre ve chiah a ni maw? " ka nghawng ka khawih tawp a

"Ni chiah mai, Duke Inglid nen in inneih chuan khatiang kha chu i tawn turah ngai tawp rawh" Sylvia chuan a ngaihtuah vung vung a

"Eng nge i sawi awmzia?" Ka zawt deuh tawp

"Miss Ripley, buaina kan nei ania" Etoile chuan ka kut a rawn vuan a

"Eng nge dik lo? Damdawi hnawih ah khan buaina a awm em ni?" - Ripley

"Chutiang lam a ni lo, lut phawt mai ang u" dawr ah kan inzui lut a

"Eng a? Prince Sharman nen inngaizawng angin kan thang maw? Khawi aṭang nge chu thu chu a lo chhuah?" Thinrim zetin ka kut ka tum a

"Thuthang hi chu a lo chhuahna tak hi hriat a har tawh ṭhin a, mahse a thang chak khawp mai. Ṭhian ngah vak lo mah ila kei pawhin ka hriat hi, niminah khan thil ei turin in chhuak dun tiraw?" Etoile chuan a ngaihtuah neuh neuh a

"Aw, min hmuh ve reng kha, min treat rawh a ti tlat a, chuvangin kan chhuak dun alawm chumi hnuah a in hnem lutuk a, an chenna thlengin ka va thlah a, lal fanu nen kan inkawm leh a zanah ka riak bawk. Inhriatthiamlohna a nih hi, rin a harsa ang tih ka hria" ka mitthla ah ka hun hmasa lam a rawn lang chuai chuai a, ka khur der der bawk

"Miss Ripley, ka ring che alawm, tu pawh hrechiang tu che chuan an awih miah lovang, Duke i hmangaih tih hi ka hmu thiam vek alawm" Etoile chu a nui ver ver a

"A dik chiah Miss Ripley, chutiang thuthang mai mai chu intihbuai tir suh, a reh leh vat mai ang, buai lutuk suh aw" Sylvia pawh chuan min lo fuih bawk

"In pahnih chungah hian ka lawm lutuk e mahse kalna tur ka nei tlat" - Ripley

"Khawiah nge i kal dawn?" Min zawt a

Hetianga ka awm mai mai chuan thil hi a ṭha dawn lo

"Lal inah" - Ripley

"Engtin nge chutiang thu te chu a thang theih?" Prince Sharman chu a rawn ṭhu a

"Chu chiah a awihawm loh i ti ve em? Engemaw chu kan tih a ngai a ni. Miin an zawh che pawhin thil awihawm loh lutuk a ni tiin sawi zel la i duhzawng ka nih loh thu i hrilh zel dawn nia" uluk deuhin ka hrilh a

"Ka sawi lovang" thingpui chu a khawih ri rek rek a

Min hrethiam teh? Ka ngaithla sual zawk em ni? Ka sawi lovang a ti tlatin ka hria

****

Chhunzawm tur

(Thawhṭan ah kan inhmu leh dawn nia )


Show post links
Top

[Ngaia]

"Ni e, Lal fapa i ni a, chutiang mai mai chuan a tibuai lovang che tih ka hria, mahse thudik i hrilh hlawm a, i duhzawng ka ni lova thuthang mai mai tih i sawi chuan an reh duak mai ang..." nuih tlawn ti tih chuan ka sawi a

"Ka duhzawng i ni alawm" a rawn tih chuan ka phu zawk

"Duchess Inglid, i mawi lutuk, ka duhzawng tak i ni, i chhip aṭanga i ke ler thleng hian ka hmuh tirh che khan ka luangliam nghal tawp" Zam eih loh chuan a sawi zawm leh a

Eng thil nge thleng ta hi. A tir aṭang khan a chet dan hi mak ka ti reng a ni. Mi hip theihna riau hi ka nei aniang. Min duhtu chu lo awm ve neuh neuh mahse Zeronis ta ka nih vangin engah mah ka ngai lovang

"I thu min hrilh chu a lawmawm viau nan i sawi lo angah ka ngai zawk mai ang" ka hnawl thla der mai

Ka hnawl a lo beisei vak lo aniang "Eng a?" A meng phawk hraw a

Mak a va tih hmel ve, ka pawm a lo beisei emaw ni chu, a va zakthei lo tak pasal nei tawh min rawn beisei ngam ania, ka hnawl a ring lo a ni maw?

"Engpawhnise" a rawn ti leh chiah chu "Aih" ka lo ti nghal vat

"Engmah ka la sawi hman hleinem" - Prince Sharman

"Ni e, eng pawh chu lo nise ka hnawl e" - Ripley

"Ka sawi tum chu...." a nui hul hak a

"Chu pawh chu ka ngaithla lo mai ang" ka lu ka thing hmak

"Ka..." engemaw sawi a tum leh chu ka kutin ka lo dang a

"Engmah sawi tawh suh khawngaihin Duchess Ripley De Inglid ka ni, chu hming chu ka pu tawh a, chu kawng chu ka thlang tawh a ni" lungawi lo zetin ka chhuahsan a

*****

In ka thlen chuan eitur an rawn chhawp chu ka ei a, ka thil ei hi a nem lai a ni lo tlat, hei hi chu arsa ro rap anih hi. Ka ei ṭhin nen kha chuan a dang hlak

"Enge dik lo a awm em ni Miss Ripley?" Sylvia chu ka bulah a rawn ding a

"Hei hi chu arsa hnute tî anih hi" ka ngaihtuah zui vawng vawng a

"Eng a? A va mak ve, i ei duh zawng kha ka hrilh chiang viau sia.... ka va siam tir leh ang e" kal chu a tum ut ut a

"Hetiang thil hi a la thleng lo mawle, chung zawng ai chuan Sylvia, Duke in chhungah hian thil thleng a awm chuan min hrilh zawk rawh" - Ripley

"Duke a awm lova, eng thil mah thleng tur a awm lo" a nui hul hak a

"Ka sawi tum i hria alawm, thudik min han hrilh teh, a pawi lo ania, mi mawl ang maia ṭhu renga engmah hre lo turin min duh em ni" a lam chu ka hawi vat a

"I sawi dik alawm, anih chuan thudik chu ka hrilh ang che, tunah hian hnathawk te chuan phatsantu ah an ngai che" a rawn kun hniam sap a

"A ni dawn lutuk" ka thin chu a phu dut mai

"Engpawhnise a hma khan lung lum thei angin an sawi che a, Duke, Inglid thlah zinga hmelṭha ber hnuaia thawk an nia, an lo beisei dan chuan a phu ber tu hmeichhia, zaidam invawng fel tak chu a nupui turah an duh a,

Mahse an suangtuah dan lo in Count ve mai fanu thlemin zan an hman dun hnuah a tan an thawh a ngai dawn ta a, an lawm vak lo, mahse Duke hmangaih ber i nih vangin a ṭha thei ang bera dawnsawn che an tum a

Ngaihzawng i nei tih thuthang a len khan Duke mite chuan an pu phatsantu Ripley De Inglid chu an haw ta em em a ni" Sylvia chuan a lo zep zawng zawng chu min hrilh fai ta vek a

"Sylvia i zep lo leh lutuk mah mah lo maw?" Ka zam viau tawh mai

"Ka tihpalh lutuk, sawi chhuahna tur ka nei lo em a ni" inthiamlo deuh chuan a lu a hiat sup a

"I thiamloh ani hleinem" ka hnem nghal vat

Ka bul vela an phun sep sep vang khan ngaihdan ka lo siam ve ringawt a, mahse ka hriat meuh chuan chu ai a lo nasa daih sia, ei tur min siam sak vang hian lawmthu ka hrilh dawn em maw ni?

"Sylvia khawngaihin hnathawk ho chu min koh khawm sak ta che?" Ka ding hluai a

Zeronis nen kan pahnih chauh a kan inneihna hmunah chuan an rawn pung khawm ṭuk ṭuk a

Tun hun leh nakin zel atan a ni, pehhel deuha thil sawi ka thiam ve lo

"Helai hmuna ka koh khawm chhan che u chu keimah chungchanga thu thang leng vel hi a ni" An vai hmaah chuan ka ding a

An phun leh mur mur a, "A van zahthlak tak, eng nge sawi a tum le? Engmah thleng tur ka hre lo" an in hrilh ru leh sap sap a

Hahdam tum ang, thudik hrilh ka tum mai alawm

"Sawi tlang pawp ila, thuthang awmze nei lo a ni. Kei hian thinlung takin Duke Inglid hi ka zah in ka hmangaih a, chuvanga pasal a nei pawh ka ni, a chenna ah ka rawn insawn bawk

Min awih mai lo ang tih pawh ka hria, eng pawh chu nise ka thusawi tur hi a tihchianna pawh ka nei thlap, pakhatna ah chuan Duke Inglid hi mipa ka hmuh tawh a hmelṭha ber a ni, ka thusawi hnial thei tur in awm em?"

Tumahin min hnial thei lo tawp ang

"A pahnihna ah chuan Duke hian min hmangaih em em a, chuvanga hun hmang dun kan ni a, kan pahnih in inneihna urhsun tak kan hmang dun a ni, ka thusawi tlip nan chuan he khawvel a hmelṭha ber hian min hmangaih a, chuvang chuan engtin nge mi dang ka duh theih ang?

Ani aia hmelṭha lo chuan ka pasal in min hmangaih ang hian min hmangaih thei dawn em ni? A aia hmelṭha an awm lo" huai takin ka sawi chhuak a

"Duke Inglid chuan ka hmaiah ser nei pawh ni ila min hmangaih reng tur thu a sawi a, he khawvel sual tak lakah hian min venhim tur thu a sawi bawk, keipawhin chutiang bawkin ka ti ve ang, ka nunah hian a pawimawh ber angin a nun ah pawh pawimawh ber nih ka duh

"A nupui ka ni ta reng a, engtik lai pawhin venhim ka duh, in hmaah hian Duchess ka nih angin ka rawn ding a ni. Ka ngen duh che u chu khawngaihin min pui rawh u, he hmun hi a rawn let leh hma chu venhim ka duh, a chhung lo siam ṭhat a, thlamuang taka a lo haw theih nan.

"Lungngai taka lo nghah chawt chawt chu ka duh bik lo. Duke awm lai ai mah khan nasa takin ka thawk ang a, tun ang chiah hian thuthang a len leh hunah pawh, duhthlanna dik lo ka siam thei a, chuvangin in puihna ka ngen a ni

"Ka ngen che u, a tan rei tak in rinawm tawh ang khan he ina cheng ka nih angin leh Duke thlan ka nih ang ngeiin min ring ula, ka thu zawm rawh u" an hmaah chuan ka kun a

Thil atthlak tak ka ti em le, hmeichhia zahawm taka awm zir ngai lo leh ho nei ngai lo ka ni si a

"Duke chuan daisie a ngaina a, huanah i phun ṭeuh chuan a lo haw hunah a hlim dawn lutuk" an zing aṭang mipa naupangte hian hmai sen ṭawn ṭawn in a ban a rawn phar a

"Thurawn min pek vangin ka lawm hle mai, a phun na lai tur nakinah sawi dun ila tiraw" ka nui ver ver a, mipa naupangte pawh a lawm khawp mai

"Kei hi Tom, ran in enkawltu ka ni a, tunah hian a hmun hi sa ṭha leh ila chuan a ṭha lehzual ngawt ang" an zinga pakhat chuan ban a rawn phar ve leh a

"Kei hi Marie ka ni a, choka lamah ka thawk" ban a rawn phar ve leh a

"Duchess Inglid, kei hi Andie ka ni a, inchhung tifai tu ka ni" pakhat chuan phur deuhin a rawn phar ve leh a

"Kei pawhin tlang hmunah hmun ṭha deuh sakna tur ka hual" an rawn ti leh a

"Duchess Inglid puih ve che ka duh, ka ngaihdan hi min ngaihthlaksak rawh aw, keipawh aw" an rawn phar suau suau hlawm a

An zingah chuan ei siamtu kha a tel ve a, ban rawn phar ve in a nui deuh suk, Sylvia chu a lo ṭap char char. A thawventhlak ta hle mai

Duke Zeronis Pov

"Chuan vawiinah kailawn ah ka tlu a, ka thiam loh vek ania, ei tur an siam kha ka ei chak tawh lutuk, ka inhliam na lo ania min lo ngaihtuah lutuk suh ka ṭha vek e, carpet kan phah a, midang an inhliam ve loh nan, khami ni a eitur an siam kha i hre duh em?
Ripley"

Lehkha min rawn thawn ka chhiar lai chuan ka nui tawp, a aw ka hre thei hialin ka hria, kan thawn let vat ang e

"Duke Inglid" kawngka aṭang an rawn lut a

"Eng nge ni?" Ka lo zawt vat

"Rawn duh che ka nei a, Barbarian kan beih ho hi rin ai an chak daih a" ka bulah a rawn ṭhu a

"Chu chu ka rin dan ve tho ania, Lalber ngaihruat ang ai khan indona te tak chu a ni lo, chu lo ah kan thil neih sa hi a tam vak tawh lova engtia rei nge kan indo dawn a hriat si lova" dawhkan ah chuan ka kut ka dawm a

"A dik chiah" a lu a bu nghut a

Lal in aṭanga an thil rawn thawn te hi a chhe lutuk re re, tum lawk a ang viau mai. Prince Sharman a kutah an dah vek te hi thil dik lo chu a awm a ni. General phu tak tak ten an rinawmna an lantir hun tak ania

Eng thil nge a tum ni ang le? A rinhlelhawm viau lehnghal. A ni thei lovang

"Min rawn lambun" an rawn au chul a

"Khawchhak lamah khan ṭanhmun lo va rem ula, thlang lam ka pan ang e" an awmna tur ka hrilh zung zung a

"Barbarian ho in min rawn lambun e" tiin an la auh chuah chuah

"Awle Sir" a chhuak nghal vat a

"Duke Inglid i ni ang maw?" Ka hnung lam aṭang tu emaw hian hriam hrei a rawn lek a

Ripley POV

Huan siam dan tur, Ran in siamṭhat dan tur, Damdawi hnawih chi siam, a hming tur, kailawn carpet phah tur, Inglid thil neih sa rawtna zawng zawng nen

Tinge tih tur a tam em em le? Lian deuha buatsaih pawh ka tum lo asin le, engpawh nise kan chawl hahdam phawt ang e

Zeronis ka ngai hle mai, thli chu a thaw na reuh hle mai a, dream catcher pawh a che nasa mai a, Zeronis te awmna ah thli a thawk na ve ang em le?

"Miss Ripley, i ril a ṭam em? Thil i ei na kha a la rei lo sia" ka bulah dingin min fiam zuk a

"Ei tur ka ngaihtuah hleinem" ka lo hnial vat

"Tak tak maw? I thlir vang vang danah khan hriat theihna riau ka nei a" a hmui hup in a nui suk a

"Tu ah nge maw min ngaih" ka lo ti bah hluk

"Thil ṭha lo tak a thleng" In enkawltu chu hmanhmawh deuhin a rawn tlan lut a

Zeronis leh thli thawt dan mak tak hian ka ngaih a ti ṭha chiah lo, chutiang thu chu sawi ila chuan nui chungin awih loh turin min ti hrim hrim ang

"I va che mawi love, kawngka kik lova i rawn luh" Sylvia chuan a lo hau nghal

"Lal sipai te chu an chak lo, Duke chu barbarian te nen an inbeih hnu khan a bo daih, sipai ho in Hei hi puan in aṭang an chhar a" ribbon thi kai hnuang hi a rawn phawrh a

"Hei hi thil theih a ni lo" ka lu ka thing ringawt

"Lal sipai ho in an sawi dan chuan Duke chu puan inah beih a tawk a, chuan...." a sawi leh tur chu ka lo dang a

"Thil theih a ni lo, a thi anih chuan a ruang a awm tur asin" hnuai lam ka melh daih

"I sawi dik alawm nimahsela, ral in hnehna an chan hian an hruaitu ber lu hi an tar ṭhin alawm" tih thu chu harsa ti deuhin min hrilh a

"A lu la turin a taksa an la bo tih chu min hrilh maw? Duke lu tla lai pawh chu hmu an awm reng em ni? Chuvang chuan a thi tih min hrilh tum duh suh, he thil in chhar vang mai hian a thi tih sawi suh, zawn tumna te an nei re re em?" Thinur zetin ribbon chu ka hum a

"Commander a bo tak si ah chuan hneh theih dinhmunah an ding alawm...." hnuai lam a melh daih a

"An zawng dawn lo i tihna maw? Heng thil vang hian a thi tih ka pawn dawn lo ania" ka hnial leh a

"Hei hi chu a chianna tak a ni lova" a rawn ti leh a

"Chianna a ni emaw ni lo pawh nise pawi ka ti lo. Duke Inglid hi a la dam rinhlelh rual loh in" ka ribbon ken chu ka thlauh a, chhuatah ka ṭhu hnawk

"Miss Ripley inbengdai hram teh" Sylvia chuan min hnem a tum a

"Min lo dang suh Sylvia he thil hi chu inbengdaih chi a ni lo, ka in bengdai dawn chuang lo" bag ah chuan ka thawmhnaw ka thun mawlh mawlh

"I lam ka ṭang mahse khawiah nge kal i tum?" Sylvia chuan ka bag min rawn chhuh a

"Khawiah nge ni chuang ang? Duke ka zawng dawn mawle" a lehlam ah ka pawt ve leh a

"Ni love, indona hmun hi i kalna chi a ni lo" a lehlam a dawm ve ṭang mai

"Lal chhungkua hian zawn an tum si lova chuvangin Zeronis ka chhanchhuak dawn" - Ripley

"Tuna tan chuan lo nghak turin an tih che kha" - Sylvia

"Nghah maw? Eng chen nge ni ang? An man chuan puih a ngai dawn asin, hliam tuarin khawiah emaw a biru thei asin, second tin hian a nunna a derthawng thei, engtin nge ka ṭhut mai mai theih ang?" Ka mittui a tling kuang tawh

"Chu pawh lo nise engtin nge i thlen theih chuang ang? Barbarian ho in an hneh an tih kha" - Sylvia

"Engpawh thil engkim hi a ni mai, engtin emaw tak ka chhan thei mahna..." kan bag inchuh chu a chat pawp a chhuatah damdawi bur chu a lum thla tap

"Miss Ripley i ṭha em?" Min rawn buaipui nghal vat

"Eng thil nge thleng ta hi?" Ṭhingṭhi in ka ṭap chhuak hawm hawm a

"Miss Ripley bag nen khan in inang chiah, en ta che, saw lai bungrua zawng zawng saw, indona hmunah ka kal dawn i ti a, i thawmhnaw ken zozai saw eng atan nge i tih? Lukhum parh te saw i mamawh kher dawn em ni?

I hmuh theih ang ang i khung lut a, ni lawm ni? I ngaihdan tur chu ka hriatpui che, i rilru a hah lutuk a, i ṭhu mai mai thei lo tiraw?" Sylvia chu ka bulah a rawn ṭhu ve a

"Sylvia ka hlau lutuk, ka hlau takzet, tihdan tur ka hre tawh" ka mit hupin ka ṭap char char

"A ṭha mai ang, i sawi ang khan a taksa pawh an hmu em hleinem, Duke Inglid a ni a, a dam em em ang nichin khan i ti ṭha lutuk ania, thu rawn thlen tu pawh khan mak a ti lutuk

I hrilh ang ngei khan lal inah a thlen ngei ngei ang, i chak lehzual a ngai ania" Min kuah a, ka hnungzang a ben thek thek hnu chuan min kaitho a

Chu pawh nise, heti hian ka lo nghak tawp thei lovang, thil chiang a hriat bawk si lova, ramri hnaih ah tal awm ila chuan a zia viau ang

"Lal fapa, i lo nghak lawk thei lovem ni" - Awmpui

"Duchess Inglid" kawngka chu an rawn hawng ṭhuai a

"Chanchin ka hriat veleh ka rawn kal nghal vat a ni" Prince Sharman chu a rawn lang hlawl a

Enge rawn tih a tum le?

"Eng chanchin maw?" Ka lo zawt vat

Awmpui chu kal turin a hui a "Engmah i lo la hre lo a ni maw? Ramri aṭang thu an rawn thlen a, Duke Inglid thil nrih thisen a kai thu chuan Duchess Inglid, hnem dan tur che ka va hre lo em?" Ka kut rawn chelh a tum a

Ka lo inher sawn vat. Hetiang ang em em hian a lo che maksak ṭhin em ni?

"Thu rawn thlen tu chu ka hmu tawh, a thil ken pawh ka hmu bawk e" ka inveng nasa mai

"Ni e, i duh chuan lal sipai ten a ruang chu an va la thei ania, Duke chenna a thuneitu ber i ni a, i duhzawng apiang...." min ngaihtuah hmel deuh chuan a awm vel a

"A thih ka ring lo" ka ti deuh hmak

"Eng a?" Rum zet hian a rawn meng a

"Ribbon a thisen a kai vang maiin a thi ah ka ngai thei lo, fiahna ṭha tak a awm lova he inchhunga mi hian a thi tih kan pawm thei lo, Duke chu a la thi lo bawk" huai deuh chuan ka hrilh a

"Aw Ripley khawngaihthlak" ka kut a rawn hmer vak a, min hnaih viau bawk

"Lal fapa min kaltir rawh" ka kut chu lakthlak ka tum

"I pasal duhtak i chan si a, i thinlung a va na dawn em? I hrethiam lo lutuk hian ka thinlung a ti na, engtin nge ka hnem theih ang che Duke a thi tawh si a" a rawn ti leh thluam a

Thinrim zet chuan ka beng pawp

*****

Chhunzawm tur
(A ngaihnawm chho dawn chauh ania )


Show post links
Top