MANAGER MAMUANA By Ziki_nu (Completed)

[Ngaia]

MANAGER MAMUANA
By Ziki nu

Chapter-37


Hun hi a han kal chak khawp a, U Mamuana nena kan intawnna kha la reilo viau angin lang mah se tunah chuan inneih kan tum der tawh, kum khat pawh kan la in zui hma, nilo, kan la inhriat hma in palai a rawn tir der mai. Mahse ka tawn atang hian thil tam tak a rawn thleng zut zut a, ka nuna ka la tawn ngailoh leh beisei loh lam atang thil tam tak ka zir chhuak a ni.


Ka putea lak atangin zalenna min pe a, hmangaihna tuipui ah min zuan luh puiin a telloa ka chhuah a phal ta lo va, engkimah tel ve zel a duh a, chu chu keiin ka lo thlehlel em em mai bawk a, ka fanu tana ka lo zawn ruk thin leh beisei ang thlapin a awm a, vuina tur leh sawiselna lai tur ka hrelo.

Amah vanga ka mittui tam tak luang ral ta te khan hetiang zozai hlimna hi a rawn paw chhuak ang tih rinngaihna ka hre bik lo, amah nen hian ka hlim a, ka bula a awm phawt chuan ka kim ngawih ngawih hian ka hre thin. Hmangaihna awmzia ka sawifiah thiamlo a, mahse U Mamuana ka hmuh hian ka hrethiam thin!!


A nu leh pate remtihna thlapin U Mamuana chuan palai a rawn tir a, ka pi leh pute lamin tha takin an lo dawngsawng bawk a, ka pu a damthalo viau na in palai an rawn len zan chuan a lo thu chhuak ve peih a, ka pi pawhin ka pu thu chu a la thiam ve khawp mai, "Tunlai chhanah a innei tur te an induh phawt chuan in rial vung vung pawh a tha hleinem" tiin lungawi takin palai te chu an haw tir kha a ni a, man hlan leh inneih hunte chu nakzan lamah rel turin an lo kal leh dawn ani awm e..



Bawihtei thuamhnaw tet thenkhat chu kuta thui pahin ka pi TV en lai chu ka melh pah ve zauh zauh a, vawk note an la zo ta bawk a, ka pi buai zual pawh a reh ve ta deuh.



"Pasal te I han nei ve tak tak tawh dawn chu a ni si a, I ni te lam I bia em?" a lo ti ve khiah a, ka sawi anih loh chuan ka ni te lam hi chu a sawi chhuak khat viau a sin.



"La be lemlo, zanah inneih hunte an sawi fel chuan ka nitei ka bia ang ka lo ti rilru a" ka ti ve mai a, "A that chu, hrilh ve reng reng loh chu thil tih chi a ni mang silo, I chhawm tur te pawh an rawn tum ve angai alawm" a ti a, thinrimin a sawi hranlo a, ka ni te a lawmlo viau pawh hi ka dem chuanglo, ka pa te lamah chuan han belh tur ka neilo em a, an boral hnua min hlamchhiah lutuk hi ka pi leh pute tan tak pawh hian a tha nat thlak ve bawk a ni.




"Innei ta ila Aizawlah daih a ni awm si a, helama kan chhungte tam tak hi chu an lo kal ve thei awm silo" ka ti sap sap a, ka lungngai deuh tlat chu a chhan ka hrethiam biklo, "Thian I ngah alawm, an vaia an telpui theih che chuan I mawi lutuk ang, keini kan awm a, I nu Edeni pawh in 'Mertei'n pasal a neih chuan ka kal chiang viau ang' a tih kha, lungngai mah ta che" ka pi chuan a ti ve duah a, pindan atanga ka pu in a rawn koh tak avangin min thawhsan thuai a, Spa leh Engtheii an rawn in zui lut nghal zat bawk.




"Khawnge midang?" Spa'n a tih chuan "Pindanah" ka lo ti mai a, "Bawihtei pawh maw?" a tih leh chuan lu thing in "Thenawm ten an hruai phei anih kha, engnge sawi lawk lo va in rawn lan ve teh khiah a" ka ti leh vat a, "Lalmuankimi hi buh ka her pui a, kan hmaah mi an tam lutuk a, kan rawn leng kawi rih anih hi" Spa bawkin a lo ti leh a, kan boruak a tha ta bawk a an hmel hmuh pawh a nuam sawr sawr khawp mai.



"Palaite chu zan inah an lo kal leh dawn maw?" Engtheii chuan a lo ti ve a, "Umm, an sawi dan chuan a nia lawm, remlohna a awm lemlo bawk a man hlan hun leh inneih hunte pawh an rel fel nghal vekin ka ring" ka ti a, ka tawng zawngte chuan ka hlim zia leh zangkhai tak zia te chu an hmuthiam vekin ka ring.



"Aizawl lamah in innei anga" a tih leh chuan lo bu nghatin "Aniang chu, mipa lamah an innei thin zawk miau bawk si a" ka lo ti niah niah a, "Taka, thianah ka hmang dawn che ania aw" ka tih leh hluai takah chuan min rawn melh haw in "Ka chetchhiat i hlau lo em ni?" a ti pek a, Spa chu lo nui hawk mah se ka thiannu ber chuan nui hauh lovin min la en kal a,

"Teuh nang, ka ring tawk ve che alawm, bakah rehearsal te kan nei hmasa ve thlap anga, Pathian zarah kan che chhe lutuk bik nang" tiin ka lo tawng thlamuan a, Hlimpuii han ti ngawt dawn ila, ka thiantha tak chu ni tho mah se Engtheii ang êm chuan ka pawh lo tlat a, ka hun pui berah hian ka thiantha berin min dinpui se ka duh ve tlat a ni.




A ngawih vung vung hnuah "Kawrfual kan ha dawn em?" a lo ti teh daih a, chulam chu ka la ngaihtuah hauhloh thil a ni nachungin "Ha ve ang chu" ka ti a, chutah rawn nui var varin, "Ka rawng duh ka thlang dawn ania" Ati leh a, ngaihtuah zawng hi a va han in ang lo thin tak.



An buh her tir tur ngaihven a la ngaih avangin rei pawh an thu lo va, an chhuah dawnah Engtheii bawk chuan "I pi ten puanbih an tih pawhin hnial tlat ang che, vawi khat chiah pasal kan nei dawn a, mo kawr mawi leh fual tha hnilh hnelh hi kan ha zen zen dawnlo, chuvangin puan bih chu ti reng reng suh se, in in hmangaih phah sawt pawh ni hleilo" a lo ti zat zat a, Spa'n a lo khap thuai tak na in pindan atanga ka pi rawn chhuak chuan a lo hre hman pek a,
"Zet zawt che hian Lalmuankim" a rawn ti hlak a, ka thiannu chuan a lei chhuah tat in "Nangmahni chungchang ka sawilo ka pi" a ti a, a nui zui pat pat bawk.




Ka thlah liam hnua inchhunga ka luh leh chuan eirawngbawl a lo hun thuak tawh a, Bawihtei chu a leng rei ta bawk nen ka ngaihtuah ta deuh, ka pi in "A lo ti buai lutuk ang" a lo ti ve chiah bawk a, lam tura ka va kal lai chuan an chaw ei dawhkanah lo thu in U Mimtei alu vel lai chu a lo khawih pui ve a, ka kallo ang tih ka hlauh zia chu aw...



"Awi U Mimte,, eirawngbawl dawnah te chuan lo dah mai tur alawm" ti sawk sawkin dawhkan atang chuan ka hlang thla thuai a, "A ho em mai a, min tihbuai loh hi, ka nu leh pate an chhuak vek a, Sangbawihi hian khawhar a hnem alawm, nangmah khan eirel te I peih tawh zawk em ni?" a lo ti var a, "La peih chiah chuanglo a, mahse ka pi a awm alawm, a tibuai lutuk ang che" ka la ti talh a, an tawngkamtha ngawt ka ûm chuan hnawksak a lo ni ang tih ka hlau ani.



A phal vaklo chung chuan ka hruai haw lui ta tho a, ka pi'n chaw chhum a lo siam mek a, tuilum awm sa chuan Bawihtei chu bual nghal mai ka tum a, a inbual tui tur ka siam sawk sawk hnuah ka bualfai a, nau harsa lo tak a ni bawk a, inbual pawhin a tap ngailo tluk a ni.



Zanriah ei khamah Bawihtei hruaiin Engtheii te in ah kan leng a, palai te lo kal laia lo awm ve kur chu ka hreh vang a ni.


Midang ho pawh an rawn thleng khawm tak tak a, U Mamuana nen erawh message in kan in be ve zeuh zeuh.

*Lo kal ve ka dil a, ka pa Muana'n a remti lo a*
A rawn tih chuan ner nangin "Mo neitu turte an kal ve ngai em ni?* tiin ka lo zawt let a, *Ka hrelo, mahse hmuh che ka chak a* a lo ti leh a, ka nui var var chu Hlimpuii'n " Ngatinge?" a lo ti thuai a, ka hmui chu ka chip leh rang khawp mai.



"Engmah" ka ti tak na in ka thiante chuan an han awihloh hmel khawp a, "U Mamuana nen in inbe chiang mai" Engtheii'n a lo tih laiin "I ngai ve tawh em? Nizan leh zanin a lo leng thei silo a" Jacoba'n a lo ti ve ngei a, a haw dawn tih hre ran chung chuan "Ngai rapthlak" uar fe hian ka lo ti leh bawk nen, hmeichhe ho chu an te tuar tuar hlawm a, "In va han tenawm tak" ti hlukin Jacoba chu a ner a ner ringawt a, ka nuih a ti za reuh tak tak.



*Keipawn ka hmu chak che alawm* tia ka thawn let chu *I lo chhuak thei em?* a rawn ti a, Engtheii te in lama kan len phei thu ka hrilh tawh reng sia.


*Bawihtei hi* ka tih chuan min reply lawk lo va, rei vak lovah Engtheii chuan ka malchunga Bawihtei chu rawn la lawkin *Ka lo awm ang, I duh leh va tei harh ve rawh" a lo ti a, U Mamuana hian Engtheii a be chiang mai.
Ka phone ah message a rawn thleng leh chiah a, *Lo chhuak rawh le* tih zawng a ni.




Thuawih deuha Bawihtei a thut ve hle hle avang chuan ngawi rengin ka chhuak a, ka tawng vak chuan min ngen ka hlau a ni. Kawngpui ka thlen chhoh rualin ka call a, a lo chhang rang khawp mai.



"Ka rawn kal mek, kawngpuiah khan min lo nghak rawh" a rawn ti nghal thawr a, zan a la tlai lo bawk a a la reh lutuk lo, "Lo thleng vat vat rawh" tiin phone chu ka dah hmasa a, thlasik a zo a, khua pawh a vawt vin tûk tawhlo, ka kut kuangkuahin ka che sek a, ka nghahhlelh vang nge a rawn thleng har ka ti tak tak..




A rawn thlen rual chuan engmah sawi lovin a motor ah chuan ka thu lut ve nghal thuai a, ngaihawm deuha min lo nuih sukin a tlan lehnghal a, kan kalna tur ber pawh ka hrelo.



"Khawiah nge kan kal dawn?" tia ka zawh chuan "Tlangah" a lo ti mai a, hmun danga han len vakna tur dang a awm lo miau a ni.




"Midang an awm ve ange?" ka tih chuan nui ruh ruh chungin "An awm loh na lamah kan kal dawn nia, inneih kan sawi ri dek dek a, midang I huphurh nghal ringawt a ni maw" min ti a, ka lo pha nasa ngang mai.



"Thingtlang anih hi, mi ho hian min sawi peih bawk si" ka tih chuan "Midang awm ve miah lohna hmunah kan kal dawn nia" a lo ti nawn leh a, tlang chhip lamah kan tlanchho zel a, motor a tih din dat rual chuan thawm a reh zui nghal duk a, engmah sawi lo va a chhuah nghal mai avangin ngawi rengin ka chhuak ve a.



Thingkung bula thutna tur an lo siamah chuan thu in kan hmalama khaw thenawm lang pe tura te chu ka thlir dun a, kan awmna hmun a thim bawk a, vana arsi te pawh an lang chiangin an lang mawi bik ngawih ngawih hian a hriat.


Ka malchunga ka kut a rawn vawn rualin a darah lu ka lo nghat ve thuai a, a nui ri suk ka hriat rual chuan "Nupa kan ni ve tep tawh" ka ti chhuak phawng a, "Zanin a liam chuan kan inneih hun tur chauh kan hmathlir tawh ang" a lo ti ve sup a, ka kut chu nghet deuh hian a hum a, ka va han thlamuang tak aw..



"Aizawl lamah inneihna chu kan hman a ngai dawn a" a tih chuan "umm, ka hria alawm, ka pi te pawhin engmah an sawi buai ka ringlo" ka lo ti vat a, "A reilo berah kar hnih khat tal chu kan awm ve angai bawk anga, helama ka hna pawh midangin min lo thawh sak rih thei dawn a" a ti leh zel a, "I be fel tawh em ni?" tia ka lo zawh chuan a bu nghat nghat a.



"Hrehawm I ti lo ang tiraw?" tih paha min rawn en chuan hmai zangthal hawa lo melh ve pahin "Engvangin nge ka tih anga, pasal ka neih chuan ka pasal te ina awm tawh tur ka nia, bakah keini phei chu I hna vangin kan khaw lamah kan let leh a ngai dawn bawk si a" ka ti malh malh a, a nu te bul lama khawsak chu ka huphurh emaw a ti anih ka ring a, ka duhlo tak zet.


"Umm nupa kan nih chuan ka awmna apiangah I awm ve tawh ang" a ti leh charh a, nui var varin "Ka enkawl tur vawk pawh I nei tawh a" ka ti a, a lo nui ve hawk mai.



"Tunlai chu chaw a heh lutuk a, min ti buai khawp mai" a tih zawm leh a, vawk chanchin sawi hi chu nuam a ti ve khawp a, huat en ah pawh ka en tawhlo, a la tih ngai hauhloh thil ni mah se a han vulh ve rawih a, a hmangaih bawka a vawk tan chuan a in pe zo khawp mai.



Bawihtei ka ngaihtuah deuh avangin Engtheii chu message ka thawn a, la tlai chhe lo mah se min hmuhloh hi chuan lo tah leh vak te hi a ching thin a, ngaihtuah loh a har thin.



*A fel lutuk, ka nu in papawr a kan sak a, a nui ring rapthlak*
A rawn tih chuan ka thaw ve huai a, kan haw har loh tur thu ka hrilh chuan min chhang leh tawhlo.



" Arsi khi an mawi tiraw" ka tih chuan a hawi chho ve vang vang a, "Chhiar sengin khawih phak ila chuan tuna a hlut ang hian a hlu thei lovang" a lo ti a, keichuan a hmel chu ka lo en reng a, a lungawi hmel hliah hliahin ka hria.



"A chang chuan kan thil duh leh awh em em te hi kan beih fe hnuah chauh kan nei thei thin a, awlsam taka kan nei theih thilte chu awlsam tak bawkin kan ti riral thei mai a, mahse harsa taka kan lo beih ve tawh thil te chu kan ngaihlu a, eng nen mah thleng kan phal thinlo, neih che hi thil awlsam a ni lo va, chutiang bawkin kalsan che pawh thil awlsam a ni lovang, arsi te ang bawk khian hmun thim leh khawharah ka tan eng mawi deuh deuh la, kan innei tawh anih chuan hmun thim taka ka awm lai pawhin ka tan lo eng mawi zual zel ang che, keipawhin tiang chiah chuan ka ti ang" a ti sup sup a, uluk deuhin a tawnglai chuan ka lo en reng a, a thutak hle a, keimaha a lungawi hliah hliah hmel hmuh tluka nuam chu thildang a awm tawh lovang.




Sawi ve tur ka haihchham deuh avangin a biangah ka han fawp ta ngawt a, min rawn en in a nui ve suk a, a lama min pawh hnai sauh pahin "Eng kawngah mah in sit ngailo la, I tih tur chu nupui tha tak nih leh kan fate tana nu tha tak nih a ni mai" a ti leh a, zanin chu tawngna hun ka chang meuhlo a ni e, ni lo, sawi ve tur ka hrelo ani zawk mah.



Sangbawihi a ngaihtuah avangin haw a rawt zui a, kan thutna atanga ding paha ka in ben fai thuak thuak lai chuan ka banrekah lo dawmin a lamah min kuai her zui a, ka kut pahnih la kawpa a nghawnga min kuah tir hnuah ka kawng a rawn dawm zui ve zat bawk a.
A chala ka chal a rawn nawr sik rualin a thaw lum zui hak a, engmah sawi lovin ka lo fawp thuai a, a chang chuan min dimdawi lutuk hi ka khamlo lek lek zawk thin, ngaihzawng nei ngailo ka ni a, mahse U Mamuana hi chu ka ngaiin ka thlahlel ve ngawih ngawih thin.
Duhthawh zeta min fawh hnuah "Ka ta I ni pumhlum tep tawh" a ti leh sup a, ka lo nui sen sen mai.






End of chapter 37
Note: Ka hriselloh vang leh zirna vang te in ka han chawl vang vang a, ka inthiamlo in in comments te pawh ka reply ngamlo zawk a, ngaihdam ka ngaihna zawng zawngah in mi ngaihdamna ka han dil leh rawih a ni
Story hmawr pawh kan bawk leh teuh tawh hle a, min lo nghak tang tang tute in zahawmin a tawp min thlen pui tur in ka han sawm nghal cheu a ni e..


Show post links
Top

[Ngaia]

MANAGER MAMUANA
By Ziki nu



Chapter-38



Inneih ni tur te kan sawi fel tak avangin chulam ah ngawt chuan rilru kan dah tawh a, thla thar ni 16 chu inneih hun atan an ruat a, ni 14 ah man hlanin ni 15 ah chuan Aizawl lama kan tlak thlak hman vek a ngai dawn a ni.



Inneih dawnah meuh chuan mahni buai buaiin kan buai tawh a, U Mamuana nen pawh kan inhmu khat ang reng khawp mai.



Ka nitei ka bia a, pasal ka neih dawn thu leh a hun tur te ka hrilh chuan lo kal theih ngei a Tum thu min lo hrilh ve a, ka mamawh te min zawh hnuah ka ni te ho be ve tur in min chah bawk a, ka be phur vaklo na in, beisei leh phut nei hauh lovin ka sawm mawi ve ringawt ang ka ti leh hnuhnawh a, ka ni Pari ka call chuan rei vak lo ah a lo chhang a, a aw ri chu a nem lemlo khawp mai.


"Hello ka ni, keimah Mary" ka tih chuan a ngawih vang vang hnuah "Mertei maw?" a rawn ti ve a, "Min va rawn be khat em em ve, I number pawh hi ka lo nei tawh reng reng hleinem" a tih chuan ka hnim deuh ruih a, thil dang sawia pehhel lem lovin pasal ka neih tur thu chu ka hrilh a, eng ang mi nge tih leh khawi hmunah nge tih te min zawh hnuah "I pa Peka ka lo rawn anga, rawn kal ve kan tum dawn nia" a lo ti hlauh a, Aizawla awm sa an ni a, an tan chuan thil buaithlak tak pawh a ni lo ang.
Ka tum aiin kan inbe rei a, ka beisei ai daihin min ngaihsakna a ti lang thiam bawk, a tawng nem vak lo naa, "Mamawh I neih chuan rawn sawi zel ang che" a ti ve a, dil hreh mah ila a thlamuanthlak ve huai huai tho mai.



Zanriah ei laia ka ni te nen kan inbiak dan ka sawi chuan ka pi pawhin "An va fel ve" a lo ti ve a, ka nitei'n thuamchhawm chu a lo ngaihtuah vek tur thu min hrilh bawk nen, mi angin nei ten tun lo mah ila kan mangang lutuk bik love.




Vli leh Nu Ruati pawh an lo phur ve khawp a, ka nu te lamah chuan ka belh tur neih chhun an nih ve avangin an ni pawh an in pe zo a, Nu Ruati a fel tawh bawk nen engkim chu a fuh vel vek tawh.



"Mamuana nen pawh lo sawi dun ve ula,Edeni khan Aizawl lama lo zuk bazar lawk ve te pawh a ngai ang a ti a, I pu nen chuan engahmah kan laktlak tawh loh hi, I nu Edeni te an awm a, an rorel ang ang chu kan pawm a ni mai, kan neihchhun liau liau I ni a, kan phak ang tawka ropui taka thlah liam ve che kan duh ania" ka pi chuan a ti malh malh a, khumah ka pu chaw a ei tir a, tunlai ka pu taksa a chaklo bawk nen, rilru erawh a khingbai leh tlat thin.




Pindan atanga kan inzui chhuah hnuah ka pi hnenah chuan "Ka pu hi a hniam zel si a, in lo kal ve thei lo ang tih ka hlau" ka ti chhuak phawng a, "Lungngai lutuk suh, kan tello pawhin.. " a ti dek dek chu "Ka duhlo" ka lo ti nghal thawr a, "Ka neihchhunte in nih hi, in hmuh lai ngeia pasal neih ve ka duh alawm, ka ropuina ni berah in telloh chuan ka kim thei dawnlo" ka ti mawlh mawlh a, sil hmun lam pan pah chuan "Lungkham lutuk teh suh, a hunah chuan I pu pawh a dam mai ang" a ti mai a, ka awm erawh a nuam theilo hle.



*Zanin chu ka lo leng ang*
U Mamuana message ka chhiar zawh rual deuh thaw chuan kawngkhar kik ri ka hre zui a, ka thiante an nih ka rin tehlul nen Jacoba pa Pa Ramsanga a lo ni a, polythene ah rasgulla leh bawnghnute eng ilo a lo khai lut a, "Ramsanga chu, engnge i rawn tih ve dawn mial a?" ka pi'n a lo ti thuai a, a thil khai chu dawhkana dah pahin "Pu ber kan nan ka rawn keng anih hi, tunlai kan buai a zual deuh a, kan rawn lang hman lawk lo va, hei zanin pawh keimaha ka rawn kal a ngai anih hi, nu ho in member tlawhchhuah kan nei dawn an ti mauh mai si a" a ti charh charh a, "Jacoba te an lo kal dawn em Pa Ramsang?" tia ka lo zawh chuan a hriatloh thu chauhin min chhang a,
Pindan lamah ka pi nen chuan an in zui lut nghal a.

Rei vak lo ah u Mamuana a rawn thleng ve nghal a, tunlai chu an buai bawk a ka hmu pawr deuh phungin ka hria.


"Zan I mu tha lo a ni maw?" a lo thut ve rual chuan ka lo ti nghal thawr a, a mit nuai nak nak chung chuan "Vawiin ah ka mu hman ngailo, naktukah hlir ka mu" a lo ti pek a, ka zawh thutak tehreng nen min chhang uang vel lutuk chu ka han ner khum nang nang a,
"In dim deuh rawh, inneih ni ah I kulcho ruih ange aw" ka tih leh te chuan min en in a nui tet tet ringawt a, ngaihtuah man a awmlo ve ngawt mai



"Pathian zarah hun hi a liam duak duak a, thlathar anih meuh chuan inneih hun a hnai kuar dawn a, tun atanga mamawh zualpui chu lo in buatsaih a pawilo ang" thutak zawk deuh hian a ti a, "Thuamchhawm lamah khan in lo lungngaih viau ka hlau a, ka nu te lam pawhin engmah an phut hranlo ania" ka chhan hma in amah bawk chuan a ti leh a.



"Ka ni te an awm a, mi hmuha a mawi tawk te chu kan thei ve mai ang" ka tih laiin pindan atang ka pi leh Pa Ramsanga te an rawn in zui chhuak leh a, "Ee kha,, Mamuana chu, in nu tur I rim a ni maw?" a rawn ti a, nui vur vur in kan ep chiahah chuan a thu thla nghal zat bawk.



U Mamuana chuan zangkhai vah hian "A hranpa in kan in rim leh khat tawh dawn si a, zanin chu ka'n rim ve anih hi" a lo ti ve ngei a, a zaktheilo sawt tak tak.




Thingpui lum turin ka thawh San a, pa Ramsanga bulah chuan titi a tlachham lo khawp ang.



Thingpui no chawi chunga ka let phei leh lai chuan an lo in thut hnaih viau tawh a, ka pi pawhin a meizial zial sa chu tawn pahin an titi chu a lo zawm ve zeuh zeuh bawk a.


An bula ka thutthlak ve ruala pa Ramsanga'n "Kan fanu I han thlang chat hi chu I tisual lo khawp in ka ring, kan khaw nula tam tak ai hian a chhuanawm daih zawk ania, chuta karah fanu I han nei nghal ringawt dawn bawk a, fa tha I chhawr hma ting a ni mai" tiin a nui zui huah huah a, a titi duh zawng leh tawngkam hman duh dan te hi a huatawm loh bik a, kan chunga rilru chhia a pu lo tih kan hriatchian em vang te pawh a ni mahna...




"Inneih hunah te chuan in rawn kal ve ang chu" tia U Mamuana'n a sawm chuan a thingpui chu dawt ri khawlhin "E... Kan dam phawt chuan kal lutuk e a, Mertei pa chan kan chan lohte chuan miten min dem lutuk anga sin" a lo ti leh hlut a, a thlamuanthlak thin ania aw...



Pa Ramsanga haw hnuah ka pi pawhin min mutsan zui a, Bawihtei chu Zan tir atang khan a muhil nghal a, a harh tawhloh vek pawhin zing lamah min kaitho hma leh viau ang.



"Naktukah ka nu te an rawn zin dawn a" a tih chuan melh vatin "Min van hrilh har ve" ka ti ringawt a, "An Tum deuh thut aniang, ka nu chuan ka vawk vulh a hmu chak ber a, ka pa erawhin Sangbawihi" a ti a, a nuih a zat hmel khawp lehnghal.



"Ka pa... Ka tih pa Johana te chuan naupang a lawm vaklo emaw ka tia" ka ti a, ka tawngsual vang nge ka lai deuh tut mai.



"Ka pa ti rawh, a la ni vat dawn tho a, amah pawh a lawm daih zawk ang" ka zawhna pawh min chhang lo va a lo tih chuan "A awm ang lo e a" ka lo ti sap a, ka zak lutuk chu ka beng a sa hat hat thei hial mai, hmu thei ngat ila chu a sen vekin ka ring.


"Tak takah, naupang chu a ngaina alawm, han chhawnchhaih vak hi a thiamlo zawk a, kan unau kan tlem si a, thenawm te nau a pawm a pawm zawk alawm" a tih chuan mak ti deuh hian ka en a, kan zin lai khan chuti vaka a lawm ka hre tlat lo a ni.




"Nu Maawmi nen chiah em ni an lo zin dawn a? U Mami a lo kal ve dawn em?" ka ti leh a, lo kal ve se ka ti takzet.


"Ka hrelo, an sawi tel lo a, bakah a hna ah a chawl ve mai mai theilo alawm" a tih chuan ka hmui pet sawi zeuhin hnuailam ka melh daih a, "Kei ai pawhin U Mami chu I ngai a ni maw" A ti pek a, ka melh hrak rualin hmun dang a hawi zui ve daih a, a va han naupangchhia tak.



"U Mamuan.. Pu Mamuana I nih tep tawh hi, titau rual pawh I ni tawhlo" ti nang nang chungin a banah chuan ka kuah a, a lo vawn hnan rang khawp mai.


Hnai deuhah kan in en reng a, kan lai chhe deuh nge engmah pawh sawi lovin kan han in nuih leh ringawt a, a zeiloh theih mange...



A haw tur chu kawtzawl thleng ka zui chhuak leh a, "Ka nu te lo thlen hunah ka rawn hrilh dawn che nia, lo len ve te pawh an duh ka ring" a tih chuan ka lo bu nghat nghat a, a hma kha chuan kan in leh a velte hi ka zahpui thin a, mahse tunah chuan zahpuina leh sitna pakhatmah ka nei tawhlo, ka nihna ka hrechiang a, ka lungawi a, min pawm thlap thei tawh nia ka hriat avangin ka hahdam bawk a, ka nihna baka lanmawi tumna ka nei reng reng lo, chu chuan awm nuam takin min siam thei tawh a ni.


Mu tura pindana ka luh rual chuan ka fanu tereuh chu a lo tal phat phat a, a rawn harh mai hlau in chechang lo chuan ka en reng a, a harh palh hlauh chuan kan mengrei duh dawn lutuk a, a chiloh reng reng.


A in leh bat bat hnuah a ka tep chuap chuapin a muhil zawm leh mai a, duhawmna zawng zawng a nei vek emaw tih mai turin ka mitah chuan a duhawm a ni.



Tunah chuan amah hmangaih em em Tu pa a nei ve tawh ang a, pi leh pute neiin chhungkaw hlim leh nuam tak a nei ve tawh anga, khawvela fanu vannei bera siam ngei ngei ka duh dawn a ni.




Mu chung chuan ka hun tawn mekte chu ka ngaihtuah nauh nauh reng a, mut a chhuak mawh khawp mai.

Pasal tha tak neih kha ka duh ber leh dil tam ber a ni thin a, tunah hei, ka duh leh hmangaih em em nen inneih tumin kan inbuatsaih chho ve zel a, min enkawltu ka pi leh pute ka ngaihtuah lo theilo a, U Mamuana'n palai rawn tirh a Tum pawha ka hnial deuh chhan a ni nghe nghe.
Ka pu hrisellna in hniam lam a pan zel a, ka pi lah tarchaklo nih chiah a hma bak tawh bawk nen, ngaihtuah an naa, hmun danga pasal han neih San mai tur chuan ngaihtuah loh an har em a ni. Mahse kan inneih hnuah pawh kan khaw lama kan la awm thei tur hian tlem chuan thla ati muang a, Nu Edeni'n 'Pasal tha tak i nei dawn a, chu chu i pi leh pute tan pawh hian a tha zawk' a tih avang chauha palai a rawn tirh remti ka ni.



Nu Ruati'n Aizawl lamah thingpui dawr a siam a, ka putea awmloh chhunga an ei hmuhna tur a dap ve a ngai miau a ni. Tam tak ngaihtuah chang chuan, ka putea jail atanga a rawn chhuah hnuah Nu Ruati nen hian an la innei leh angem tih te, kan chhungkua ah a lo inrawlh leh duh mai angem tih zawhna te a rawn lut ve fo a, chu erawh ngaihtuahna ti hahtu mai a ni. Tuman ka putea hming kan lam ri tawh ngai lo va, sawi chhuah lah kan chak hlawm heklo, diktak chuan kan nunah hian rawn lang ve tawh miah lo se la ka duh.




Zing kar hma lutukah Bawihtei'n min ti harh a, zan lamah ka muhil har bawk nen ka meng hleithei meuhlo.


Ka phonea dar zar ka en chuan dar 5 pawh a lo la ri lo va, notification atanga U Mamuana morning wish ka hmuh chu ka hawng zui vat bawk a, a lo thawnna a la reilo tawp mai.


Reply mai lovin Bawihtei chu ka thawhpui hmasa a, pawn lamah a zing walk lo chang leh ila a tha ang, thingpui te pawh lo in kawi sela, nizanah lah Bawihtei nen an in hmu ta miah lo va, ngaih te pawh a ngai ve tawhin ka ring.



Kawtzawlah chuan kan tei kual chhen tawh a, U Mamuana chuan rawn lan tik a nei theilo reng reng. Rei ang reng tak pawna kan awm hnuah a message kha ka reply lo tih ka hrechhuak leh chauh a, a va han haihawt theih em em bawk ve mawle..


Keimah leh keimah in hau hlak hlak chung chuan inchhungah kan in kai lut leh a, *I va tho hma ve* tia ka han reply leh hnu hnawh chu a seen lawk lo.



Tapchhakah mei nun in ka pi rawn tho chhuak chu Bawihtei nen an in tur thingpui ka lo siam sak sawk sawk a, vawiin lamah U Mamuana nu te an lo zin dawn thu ka hrilh chuan " A that chu, lo lengve ngei ngei rawh se" a lo ti ve a, chhungkua ah in rem lohna a awm tawhloh chin chu nuam tak a ni ringawt.




Nilengin inchhungah ka buai a, tihfel ngai te ka tihfel zung zung hnuah ka pi vawk chaw chhum sa chu ka vil a, U Mamuana nen pawh zinga kan inbiak bak kha chu kan la inbe leh lo, a nu te an rawn thlen tlai lutuk loh chuan zanah rawn lenpui a tum thute pawh min hrilh lawk thlap a, ka phur rual rualin ka zam ve khawp mai.



Zanriah ei khama thleng ka sil lai chuan number hlang atang hian call ka dawng a, ka han chhang chiah chu Nu Maawmi aw ngei maiin, "Merte,, chaw in ei tawh em?" a rawn ti ta mai a, ka hawi hai ang reng khawp mai.


"Aw ei tawh e" ka tih chuan "Hei.. I pa nen kan lo zin a, zan in ah lo lente a rem em? Sangbawihi pawh kan ngai tawh ania" a rawn ti nghal luam a, min biak dan chu min ngaih hmel lutuk ringawt.


"Len theih lutuk e" tiin an lo thlenna rei tawh leh tawhloh te chu ka zawt ve luam a, kan inbiakna kan tihtawp rual chuan âm zetin thawk ka la zui vang vang a, tuma lawm ngai hauh lovin ka nui chhuak hak bawk.



Ka pi hnenah chuan U Mamuana nu leh pate an lo len tur thu chu ka hrilh tha ve leh a, thenawma len a tum pawh thulhin "An lo len laia lo chhuah daih chu a mawi love, an hmel hmuh hmasak ve reng rengte pawh a tha alawm" a ti ve a, zanin zet chu boruak a tang leh dawn khawpin ka hria.









End of chapter-38
Ads vawi khat click leh comments kha aw...


Show post links
Top

[Ngaia]

MANAGER MAMUANA
By Ziki nu




Chapter-39


Kawngka kik thawm ka hriat rualin lo lut turin ka sawm ve vat a, U Mamuana hmel ka hmuh rualin a hnungah Pa Johana leh Nu Maawmi ten an rawn zui ve nghal zat bawk a, lo in ring lawk ve viau mah ila ka zam ru khawp tho mai.



Ka thutna atanga lo ding pah chuan "In lo leng thei maw?" ka han ti ngawt a, Nu Maawmi chuan nui sang chung hian "Kan lo leng hram hram anih hi, I pa hian naktuk ka nghak theilo ang a ti deuh tlat a" a lo ti ve a, ngaih a tha sawng sawng mai.


Ka pi'n thu tura a lo sawm hnuah an han in chibai leh hnuhnawh a, Pa Johana chuan ka pi bula thut pahin "Mary pi maw I nih?" a han ti a, pangai taka an in biak laiin U Mamuana pawh ka bulah a lo thu thla ve a, "Khawiah nge Sangbawihi?" a tih chuan "Kan thenawm nula in dawrah a hruai lawk anih kha, an lo let tep ang" ka lo ti vat a, Nu Maawmi chuan "Ka ngaih tawh nen aw.. " a lo ti ve vang vang bawk.




Ka pi ho in U Mamuana nu leh pa te chu an ti ti reng a, keini chu eng emaw chang bakin min rawn ngaihven lem lo.


U Mimtei'n Bawihtei a rawn dah rualin Nu Maawmi chuan a lo ban chuk chuk a, Bawihtei lah a lo in ti fing ve deuh tawh bawk nen a han tim deuh a, mahse a chhawnchhaih reng takah chuan a nel ve leh thuai a, an in pawm hlu hlu mai.



"Kan palai te pawh in lo ti lawm thiam a, an rawn lungawi haw khawp kha" Pa Johana'n a tih chuan "Keini deuh kan lawm, a... Mertei hi kan neihchhun ve a ni a, a vanduaina te in en kân thei hi kan lawm zawk khawp asin" tiin ka pi pawhin a lo chhang ve a, thingpui lum tura U Mamuana nen kan tho chu Bawihtei'n min lo ban vat a, Nu Maawmi pawhin a dang tawh bik em love.




Ka pu chu hmuh ve reng reng an duh avangin pindan lamah thingpui chu pe mai turin min ti a, an in zui lut nghal vek bawk.




"I nu ten min be tha tawh bawk si a, a nuam tawh e" ka tih chuan a lo nui ve hawk a, Bawihtei pawm reng chungin ka thingpui lumna bulah chuan a ding ve reng a,
"An hrethiam ang ka tih kha, a tir kha chuan thil hriat fuhloh a tam em a, tunah chuan.. " a ti a, a chawlh dat hnuah "Tunah chuan I putea a awm tawhlo bawk a, buaina a kiang tawh, chhungkaw hlim tak din chiah kan hmabak tawh" a ti a, a hmel ka han en chu a lungawi hmel hliah hliah hian ka hria a, ka hlimna hian van a tawng loh pawhin a teuh ther ther viau ang ka ring.



Pindana thingpui ka va pek lai chuan ka pu pawh a lo thu ve peih a, engnge a an tih zawh paha a lukham ka siam that laiin Nu Ruati chuan damdawi ei lai a neih leh neihloh te min lo zawt ve a, a bengvar ka ti tak tak.



Ka chhuah San leh hnuah U Mamuana te chu ka mu lawk lo va, kawngkapui a in hawn danah pawn lamah an in pawmchhuak anih ringin ka chhuak ve a, kawtzawl ah Bawihtei chu pawmin a lo awi dur dur a, a office a kan inhmuh hmasak ber tuma a pawm ang chiah khan a awmah pawm betin a lu ah a dawdawm a, a fa tak tak ang maiin a awi dur dur a, an va han hmuhnawm tak!



Min rawn hmuh ve rual chuan engmah sawi lovin a lo nui ringawt a, Bawihtei lah chu a awm tha duh bawk nen an in awihmut theih mai ka rin avangin ka luhsan leh rih a, ka pi te chu an la titi tui hlawm khawpin ka hria.



Thutthleng seiah thu in ka phone ka en kual ve mai mai a, kan thianho group ah chuan message a lo tam leh tawh khawp mai.
Ka han hawng a, thu pawimawh em em phei chu an sawi lo, ka chhiar thlak ve thuak thuak hnuah *U Mamuana nu leh pa te an lo zin a, hei ka pi te nen an Inkawm mek* tiin ka va hrilh ve a, ka thawn zawh rual deuh thaw in Engtheii chuan a rawn type ve leh nghal zat a, a type rei teh reng nen *Nuam i ti em?* tih zawng hian min rawn chhang a, U Mamuana te an rawn in pawm lut ta bawk nen ka chhang leh tawh lemlo.




"A muhil ta em ni?" tiin ka lo pan hnai vat a, a dar bawhin Bawihtei chu a muhil bam a, an hmuhnawm tak tak.


"Pindanah lo pawm lut la, kan mut tir nghal daih dawn nia" ka tih lai mekin Nu Maawmi te chu an rawn in zui chhuak ve chiah a, ka pi'n an thingpui in ruahna no a rawn khawm nghal bawk a,
"Khai aw... Kan nula chu a lo muhil hman a ni maw?" ti hlutin Nu Maawmi chuan a rawn pan hnai deuh a, "Khumah kan va mut tir lawk ang" U Mamuana'n a tih tak avangin pindan lamah kan in zui lut ve leh nghal a, a mutna tur ka siam rem sawk sawk hnuah dim deuhin a mut tir a, a mut fel hnuah pawh chhuak mai lovin Bawihtei muhil hmel chu kan en deuh vang vang a, engmah phei chu a sawi lo.


"A rit ve tawh si a, I dar a kham ngawt lo maw?, Ka tih chuan "Ka chak alawm" a lo ti pek a, a hmel ka en chian rualin a lo nui vei pat pat a, ka tihngaihna hrelo chuan "I inla chak e a" tih pahin a darah ka beng thlawp a, ka beng na lutuk lo na in a thawm erawh a na khawp mai.




Pindan atanga kan in zui chhuah leh chuan Pa Johana'n "Hei Mama, zan te a tlai tawh dawn a, Mary te pawhin mut an duh tawh ang, zan dangah te kan la Inkawm leh zawk anga kan haw phawt mai dawn em ni?" a lo ti a, "Keini lam chu kan mut hun pawh a la ni lo va, amaherawhchu in rawn thleng tir ve chauh a, a chauh te pawh in chau ve zawk ang" ka pi pawhin a lo ti ve a, an haw tur chu kawtzawl thleng ka pi nen kan zui chhuak ve a, lungawi tak chuan kan han in thlahliam chu a ni a, kan inchhungte min han hmuhpui ta bawk nen, Nu Maawmi min ngaihtuah zui dan tur ka hre chak kher mai.




"Maawmi maw kha... A fel viau kha" ka pi pawhin a ti ve a, min lo dawnsawn tirh dan ngaihtuah chuan a hmel hmuh pawh a nuam tawh a, hetianga in lungrual taka kan han awm thei ta hi chu thil mak te pawh a tling zawk hialin ka hria.



Chhuat te ka nawh zawhah mu turin ka in buatsaih ve nghal a, ka thiante chuan group lamah min lo sawi zui nasa leh pek khawp a, Aizawl a bazar hun a hnaih tawh avangin leh an exam chawlh lai anih bawk avangin zin ho te ka han rawt ve ngawt a, kan puitlin leh thei ngut ange maw..


*Midang an theihloh pawhin keichu ka lo kal ve a ngai dawn hrim hrim alawm, mo kawr turte pawh kan en a ngai dawn a* tiin Engtheii chuan private in message min lo thawn a, *Ni e.. A hun turte kan sawi tha leh anga, ka chhungte leh U Mamuana te lam pawh ka rawn ve phawt anga* ka tih chuan *Ka nu pawh ka lo hrilh lawk ang* a lo ti ve vat a, U Mamuana chu *Muttui* tia message ka va thawn hnu ah tawngtai turin ka thu chhuak leh hluai a, Pathian hnenah hian lawmthu sawi senloh ka ba a ni.


Tlang chhipa lawn tur chuan hmun chhengchhia leh hrehawm tak tak te kan paltlang a ngai a, khaw vawt leh thli thaw ten min nuai vel nawk nawk chang lah a tam, a chhip thlen ngei ka duh avangin ka dinhmun ngaia min len thlak leh lawp lawp lai pawhin bansan lovin ka lawn lui ngar ngar a, tunah chuan ka duhthusam leh beisei ang thil min tawn tir in a malsawmna tam takin min vur a, ka hun tawn mekah hian lawm ngawt mai tur ka niin ka hria.


Nu Maawmi te cham chhung chuan kan in hmu ve zeuh zeuh a, U Mamuana vawk pawh a lawmin an cham chhung na na na kha chuan a han vil hneh khawp a, "Hetianga vawk hial vulh tir theitu hmeichhia chu a theuneu lo khawp ang" tiin min fiam nan tak te hian a hmang thin a, a lawmawm lam zelah ka ngai tawh.


U Mami a maha a awm avangin kartawpah an haw leh mai a, an han haw leh chiah chu a khawharthlak ve dawn dawn mai.

***




Nitin in kan inneih ni tur chu a hnai ve zel a, ka thiante pawh an phur in lo kal theih ngei an tum ruh hle hlawm, naktuk lamah Aizawl lam pan kan tum a, U Mamuana motor ah Engtheii leh Nu Edeni te nen kan chhuk ho dawn a ni.


"I pi Remi khan kan inah lo thleng leh ngei ngei rawh se a tih kha" zanriah ei laia ka pi in a tih chuan "Ka ni Pari khan kan in lamah lo thleng ula, buaipui ngai te kan buaipui anga a tia, Nitei pawh naktuk tuk leh lamah chuan Aizawl a rawn thlen ve theih hmel bawk a" ka lo ti a, a ngawih vang vang hnuah "I ni te nen chuan in inhmuh lohna a rei tawh si a, hriat pawh an lo hre dawn che em ni? Nuam I ti lo ang" a ti deuh tlat a, keipawhin nuam ka ti angem ka chiang biklo.


"Mahse min sawm ngawrh ve lutuk a, Bawihtei pawh an hmuh ve chak thu te min hrilh a, vawi khat ka biak hmasak atang kha chuan min rawn be ve zeuh zeuh tawh bawk a" ka ti malh malh a, ka pa te lamah han belh tur ka neihloh em avangin chutianga ka ni te'n min han sawma min han ngai der ve ta chu ka lo thlahlel ve a, ka pasal neih ni ah min ti mawi ve se ka duh a ni.



"I thu thu a ni mai ang chu, I putea a awm tawh chuanglo a, Ruati te in lamah pawh thlen chu a thlen theih tho anga" a ti leh hram a, mahse a hma atang tawha ka ni Pari te in lama in nghah ka lo rilruk tawh sa avangin sawh sawn ka tum lem lo.



Zanriah kan ei kham rualin ka thiante an rawn lang nghal a, naktuk lama kan zin dawn vang nge zanin chu an rawn lang kim thap a, Hlimpuii rual chuan Sir Zautea a rawn tel ve bawk.



"In la tha zel maw?" tia ka lo fiam chuan a lo nui ve suk a, "Inneih niah ka rawn lang ve hman dawn silo a, a zia lo tak tak" a lo ti ve ngei a, high school kan kal lai khan min hrem ve nasa thin si a, tunah lah kan thiannu bialpa a ni ta der a, a tan chuan awm dan thiam a har ve ngawt in ka ring.



"Inthlahrung mah ta che, hmun dang daiha inneih dawn chuan kal hi a harsa ve alawm" ka lo ti vat a, zanriah ei kham hlim chauh a la ni bawka thingpui lum pawh an la hmanhmawh lo tlang khawp mai.



Kan vai mai chuan veranda ah kan in zui chhuak a, thutthleng seia lenglo chinin herhsawp la chhuakin kan thu bial laih a, Puia'n ka guitar a pawm leh thlap tawh a, kan buai tlang ve ta deuh bawk nen zai ho na hun pawh kan nei thei meuh tawhlo.



Thla bial zan la ni chiah lo mah se a bial full teuh tawh hle a, kawtzawl pawh a rawn ên paw ruih vek tawh, lungleng deuha zai vawng vawng kan in beisei laiin Jacoba chuan young fella hla a thlang leh tlat pek a, tihtauh a ching bawk nen kan han sakpui mai dawn a, amah lah chuan a hla thu thiam mang a lo nei leh si lo a, Puia'n a melh rum tak viau hnu chuan phunnawi ngam lovin "A dang sa mai ang u" a rawn ti ta hlauh a, sak tur ngaihtuaha kan in râwn khawm nak nak laiin Puia chuan Pu C.Vansanga hla 'Runmawi' chu a rawn sa a,


'Zankhua a lo tlai hian,
Kaina runsang kan mawi,
Suihlungrual zaa lengin,
Hlimzai kan vawr thin... '
A han tih chuan amah a zaithiam bawk a, rilru pe vaklo pawhin ngaithla ila a lunglenthlak ngawih ngawih tho ang.

A thunawn a sak dawn chuan kan zavaiin kan lo zawm ve a,
'Leng zawngte kimna ber Runmawi,
Lanu chhuihthangval rual, kan lawina'
Kan ti rual dual dual a, zan hlimawm tak ni mah se ka rilru a hnim ru deuh tlat a, ka khua a har lawk deuh tlat.



Hetianga kim hian hlim leh lungrual takin kan la zaiho leh thei angem tih te rilru ah zawhna a rawn awm a, reilo te ah pasal ka neih San tawh anga, chhungkaw enkawl tur ka nei tawh ang.
An ni pawhin an zirna te chhunzawm turin khawpui lam an pan vek hlawm tawh anga, thian thar te chharin in hmuh leh in biak a khat tulh tulh anga, hetiang hian kan inah kan zaiho leh angem tih chu hunin a la rawn hril chauh tawh ang.




Ka ngaihtuahna te chuan min ti tawt in ka thawk a ti buai zo a, Bawihtei chu Engtheii bulah dahin inchhungah ka han luhsan ngawt a, ka inngaihtuah lungleng lawk vel chuan ka mittui a ko dawn ringawt nia..



Ka hmai te ka phih zawhah ka va zawm leh a, U Mamuana chu a hna lamah chinfel tur a ngah deuh avangin a rawn leng thei dawn lo va, naktuk zing chaw ei kham lamah chhuah kan tum a ni.





Ka thiante ka va zawm leh chuan ka mitmeng a la dik chiah lo nge min lo en chik viau hlawm a, Hlimpuii'n "I tap em ni?" tia min lo zawh phei chuan an vaiin min en vek hlawm a, "Teuhlo, tunlai chu ka mit a chaklo lutuk a, hmai ka va phih lawk alawm" ti mah ila Engtheii chuan pawr fe hian,
"I tap anih kha, Runmawi hla kan sa a, I lung a leng anih kha, hetianga kan zaiho theih tawhloh te hi I hlau a, I inngaihtuah lungpuam mai mai anih kha" a lo ti zat zat a, sawi dikloh a nei hauhlo.
Phat buai pawh ka tum lova, "Ka lung a leng lawk alawm" ka tih chuan sawi zawm zelin "Kan puitling tulh tulh anga, heng hun hi chu kan la ngaidawn alawm" Spa'n a lo tih ve phei chuan kan ngui nghiai tawh hlawm a, kan hlim lai ni te hi a liam huna kan awmdan turte ngaihtuahin kan insawi hmuh zel a, tumah kan nui lui thei tawh meuhlo.



Ka duhthusam nun nei turin inbuatsaih mek mah ila, thil tam tak ka lo paltlang pui tawh, engkim a tha leh thalo pawh ka lo tihpui tawh ka thiante nen duh anga kan han inkawm thei tawhlo tur hian min ti lungngai lo thei lo a ni.







End of chapter-39


Show post links
Top

[Ngaia]

MANAGER MAMUANA
By Ziki nu



Chapter-40

Zingkar hma ang reng takah tho in kan bungraw ken tur ang ang chu ka han en fel leh thuak thuak a, theihnghilh ka nei lo tur ah ka in ngai.


Dar 6 velah Engtheii hnen atangin call ka dawng a, a phur bawk a a tho hma khawp mai.



"Hello" ka tih rualin "Bungrua hi kan ngah ang reng lutuk a, ka nu nen kan ni bawk si a kan phur lenglo mai anga" a rawn ti hem mai a, cham rei viau tur pawh kan ni lo va, an ni nufa hian eng teh fakau nge maw ken an tum ni...


"Leng thei mai ang, in ngah viau em ni?" tia ka zawh chuan an thuamhnaw dahna bag pahnih bakah satha ip pahnih leh rackshak te a nih hmel a, Nu Edeni hian Aizawl lama an chhungte sem tur chawhmeh ken tam a tum khawp anih hmel.


"A leng thei mai ang, keimahni hian kan ngah vak lova" ka tih chuan a thaw deuh huai a, "Ka phur tawh lutuka nizan ah pawh ka muhil manglo, darkar tin ka harh a ni ringawt, motor ka rui nasa sia, ka chhungte an zin chang hian ka zin ve peih ngai lova, Aizawl ka kal khat zia chu i hriat kha" a rawn tih zat zat hnuah "Mahse tun tum chu ka phur leh mah mah a, ka za cheng mai, ruih lohna damdawi pawh nizan atang ka ei lawk tawh" a ti leh a, peihlo deuh kalpui ai chuan a zia tho mai.


Dar 9 vela chhuah kan tum thu leh lo in peih thlap tura ka chah hnuah kan inbiakna chu kan ti tawp a, Bawihtei pawh a rawn tal ve taih taih a, ka kaitho zui ta mai bawk.



Pindan atanga kan in pawmchhuah chuan ka pi hmel hmuh tur a awm mai lova, an pindan lama tawng thawm ka hriat avangin ka ngaithla deuh vang vang a,

"Tunah chuan pasal a nei ve tak tak tawh dawn a, I intih chhel hram hram a ngai ania, hetiang dinhmum thleng tur hian a theihtawp a chhuah ve a, hlim taka awm hi a phu ve tawh bawk alawm"

Ka pi thilsawi chu ngawi rengin ka ngaithla a, a tawng ringlo viau bawk.


Ka pu erawh a tawng tha peih meuh lova, a khat tawk hian a khuh leh bur bur ringawt mai thin a, rilru a la peng tlat thin.


"Kan neih ang angin kan thlah liam dawn chu a ni si a, I in tih pachan hram hram a ngai anih hi, tunah chuan a ni te lam nen pawh an in hre pawh ve leh tawh a, a mawi tawk chuan kan thlah liam thei em em ang" ka pi bawk chuan a ti leh sap sap a, Bawihtei pawm reng chung chuan vanvadakin ka mit tui rawn tla mai tur chu ka khap let sak sak a, ka tana ka pi leh pute in pekna zawng zawng hi rulh let vek theih ka chak tak zet.


Ka inrin aia hma in ka pi chu a rawn chhuak thut a, ka awmdan danglam deuh chu a rawn hmu thiam a niang "I tap em ni?" tiin min zawt nghal tawl a, "Teuhlo mai, ka mitah hian eng emaw a rawn lut a, Bawihtei hi lo pawm lawk rawh chaw chhum ka'n siam sawk sawk ange" tih pahin ka hmehbel chawt chawt a, choka lam ka pan zui nal nal bawk.



Gas a chaw ka chhuan kai hnuah thingpui ka lum leh a, ka pi thilsawi te kha rilru ah a cham reng a, theih se chuan eng emaw tak nih a, min enkawlna zawng zawng hi rul let tura an bula awm reng mai theih hi ka chak a, mahse hetiang renga kan awm anih chuan an tan hnawksak leh an ritphurh mai mai kan ni dawn si. Rilru a hnim a, an nupa chauha an han awm rek rek tur chu a hma pawhin lo ngaihtuah lawk tho thin mah ila ka khawngaih thar riau a, pasal neih leh rihloh mai te hial ka duh dawn dawn mai.




Tukthuan pawh kan ei hma viau a, dar 8:30 ah chuan kan lo in peih thlap tawh, U Mamuana pawh a rawn thleng har lova, kan bungrua ang ang te motora a dah luh hnuah Engtheii chu ka phone lawk a, a lo hman hmel tawh khawp mai.




Ka pi te nena kan in vai liam hnuah Engtheii te in lam panin kan tlan a, a sawi ang tak takin bungrua chu an han ngah em em khawp a, an thuamhnaw dahna ringawt pawh chu mi pangai ta aia lian ve ve a ni a, satha ip ah lah chawhmeh an thun khat vek bawk nen, U Mamuana pawhin ka hau in a en a, Nu Edeni chu a inthlahrung deuh nge "A len vek theih loh pawhin naktuk zing sumo ah an rawn thawn thei tho ania" a lo ti ve a, mahse kan han in hnawh deuh takah chuan kan leng ve thei mai dawn e.



Dar 9 pelh deuhah khua kan chhuah San a, thiante an tel ta bawka kan zin hmasak ai ngawt chuan titi tur pawh a awm ve ta deuh e.



Nu Edeni leh U Mamuana chuan eng eng emaw sawi dun ve in an titi thei viau a, Bawihtei chu Engtheii nen kan in pawm chhawk thung a, motor a rui lem lo bawka a fel khawp mai.



Zing chaw ei saa kal kan nih avangin kawng lakah pawh kan ding lem lo a, Aizawl luh dawn tepah zunram te thiarin kan ding ve zawk tih a ni mai.




Nu Edeni chuan U Mamuana nen chuan min han dem fiam leh zauh thin a, "Mertei te chu a naupan lai leh pian hlim te kan han hriat chian tehlul nen, tunah chuan kan hralh dawn a ni ta der a, a ni zawng a nunin a zir bawka pasal tur tha tak a hmu nawlh mai che alawm" tiin a nui pah hak hak a, a fanu ngaihdan erawh a nilo khawp mai.



"A nunin a zir bik han tih kher, min dah zero thei ee" ti nang nangin a nu chu a melh tur khui a, Nu Edeni lah chu âng chak reng tih takah "Nangte chuan zir ve heklo, I khawsak dan phelh phulh hi pasal hmu zo khawsak in I khawsa hleinem, lehkha I zir peihlo si, I thatchhe bawk si" a ti hlaih hlaih a, lo khap vat lo ila chuan a chhuah laktlakloh zual ngawt ang.


"Fate pawh I fak hreh ngawih ngawih mai chu ania" Engtheii lah chuan a ti leh hram a, "Fak tlak hian awm ve ta che, mizinga sawi nuam deuh tur chanchinte hi nei ve heklo che, I â phuang a, I che hleka len I tum nghal zel bawk si, mo thianah te I tan tawh dawn hi, kan haw leh hunah chuan i awmdan hmasa ang mai mai khan I awm tawh dawnlo ania" a han ti zui bawk nen ka thiannu chu a tum nasa tawh mai.



Nu Edeni te thlenna tur veng lamah kan tlan hmasa a, a nuta te inah an in nghat dawn a, veng a in hlat deuh dawn bawk nen chhuah ho reng theih chu a har deuh mai thei.


Ka ni Pari ka call chuan a lo chhang vat a, kan thlen tawh thu leh kan thiante kan thlah kawi hmasak thu ka hrilh chuan lo hre thiam in kan kal dan tur te min hrilh a, ka nel ngai lem lo bawk nen an in pawh ka hrechiang leh tawhlo.



Keimah ngawt ai chuan U Mamuana a biak tlak zawk ang tiin ka ni nen chuan ka in biak tir tawp a, kawng vel an in hrilh fe hnuah U Mamuana chuan kan thlen theih mai tur thu hrilhin phone chu min pe leh a, ka ni chuan min lo hmuah tur thu a sawi bawk.



Kawngtluan deuh thaw in Bawihtei chu a muhil a,ka ni te in kan thlen fel chuan ka kai tho lui a, ka ni pawhin a lo ban ve chuk chuk mai.
Bungrua te kan hlan thlak fel hnuah U Mamuana chu lo lut kawi ve tur in ka han sawm tak naa, a tlai deuh tawh bawk nen min hnial a, a tlan liam leh hnuah bungrua te nen chuan kan in sawn lut ve a.


An in pawh a lo ropui ve khawp mai, concrete building tha leh la thar ve tak a ni a, an sak zawhna pawh a la reiin ka ring hauhlo.




"Lo thu hahdam phawt teh u, I unaute an chhuak vek a, I pa Peka office bang a lo la haw bawk silo, in ril te a tam tawh em?" a lo ti ve sawk sawk a, Ka ni Pari hi nu lian leh hleitling zet mai a ni a, ka pa te unau ho hi an te lo hrim hrim bawk nen, an lang zahawm khup a, an tawngkam erawh a nem viau lo thung.


"Bawihtei chu hmuh loh karin a lo lian tawh hle mai ka ti, kum engzat nge ni ve tawh?" tiin a kum zat te chu min zawt a, ka putea chungchang engmah ka hrilh hre ve hlawm lo va, tul ka ti lemlo bawk.


An pindan awlah chuan kan bungrua te chu kan dah lut a, Bawihtei chuan engnge maw a hriat ni, min bawh deuh tlat a, a la tlangnel lutuk lo a tinni.


Pa Peka office bang pawhin min lo chibai ve vat a, an fate U Johnsona leh U Tetea te inkhel pawh an lo haw tawh.
Ka ni te lam nen kan in pawh loh em avangin ka pa te lama ka cousin te nen pawh hian kan innel lem lo va, mipa vek an ni bawk nen kawm dan tur pawh ka hrelo.



Zanriah ei dawn chuan ka lo chet pui ve zung zung a, ka ni chiah chu hmeichhia a awm avangin a fate pahnih pawh chuan chaw ei chu an siam ve sawk sawk a, an ti thang viau anih ka ring an phunnawi lo reng reng.



"Inneih naa hak tur vel en tur in maw in lo kal?" tia ka ni pasal Pa Peka'n min zawh chuan lo bu nghatin "Mamawh zualpui lei pahin kan tia, rei pawh kan cham lovang" ka ti a, "Umm in mamawh kha chu sawi hreh lo ula" a ti ve a, ka beisei ai tak chuan min lo dawngsawng tha e.



Thleng sil ka tum chuan U Johnsona zawk chuan a phal tlat lova, a upa zawk a ni bawk a a dam thluam mai, U Tetea erawh a phawk ve chi a ni a, a hmunphiat pawh a uluk lo tak tak, Muankimi nen Inkawm se an hmuhnawm viauin ka ring.


"Mi mo I nih tep tawh kha, peihlo chung chunga I tih hun a thleng teuh tawh emai ka lo awl ang che" nui chunga tih pahin ka apron ken lai chu min laksak a, "Aw ti rawh Mary, kha a ni pawh thleng sil chhawk Tu tur nupui a dap ve tan ania" nui hawk hawk paha Pa Peka'n a lo tih ve bawk avangin ka chuh lui ta lem lova, sitting rooma ka ni te Thutkhawmna bulah chuan Bawihtei pawm chungin ka thu phei ve a,
Ka ni chuan lo ban vatin a malchungah a pawm bet hlu hlu a, hmuh an nuam ve takzet.



Eng eng emaw sawiin kan titi reng a, ka pasal tur pawh chu remchangah la hmuh ve an duh thu te, chaw eia sawm tur te pawhin min ti ve a, U Mamuana pawh ka la hrilh ve ang.



Motor kan chuang chau ve deuh bawk nen kan mu har lova, Bawihtei pawh a chau ve ngang a ni ang a muhil hma khawp mai.



Mut hmunah chuan ka pi ka call a, a chhang lawk lo chu a phone dahna a hrelo leh tawh anih ringin ka han nghak vang vang a, rei deuh tak a ring hnuah "Hello" a rawn ti ve ta hram.


"Min van ngailo ve pi" ka han ti nghal thawr a, "Ngaihna hman cheu pawh a la awm hleinem, hei i pu damdawi ka ei tir mek a" a rawn ti a, a buai deuh vang anih chu phone pawh a lak lawk loh.



Ka ni te min lo lawm thiam zia te ka hrilh chuan "A va lawmawn ve, fel takin han awm la, duat tlaka I khawsak zelte chuan manganna tur a awm hleinem" a lo ti ve a, a buai bawk nen rei pawh kan in be hmanlo.



U Mamuana nen reilo te kan in biak leh hnuah ka lo muhil zui a, ka harh leh chuan ni a lo tlangsang tawh khawp mai.


Sana ka en thuai a, dar 7 a lo pel thui tawh lutuk ringawt, Bawihtei pawh a lo la mutui khawp mai a, kaitho duh lovin dim deuhin ka thawh San a, pindan atanga ka chhuah chuan ka ni hmel ka hmu hmasa ber a, "I mutui em?" min lo ti var mai.


"Mu tui lutuk, I lo buai em? Min lo kaihthawh mai tur ania" ti sawk sawkin choka lamah chuan ka zui phei a, "Eirawng bawl vak a ngailo a, Bawihtei a la tho ve nange" a tih lai chuan chair pawt chhuak in ka lo thu mek a, "A chau ve deuh aniang, a mutui khawp mai" ka ti a, thingpui min lo pek rual chuan ka lo ban ve nghal vat.



Ka hma zawnah chuan rawn thu thla ve in thingpui chu kan in dun a, "Ih e Merte, I pa boral atang khan kan ngaihsak tawklo che pawh I ti mai thei a, mahse I hriatloh thil tam tak a awm ve a, min hriatthiam a ngai a ni" a tih chuan hriatchian chak takin "Engthil nge a?" ka lo ti vat a, a hmel chu uluk deuh hian ka en a, ka ngaihbel nge a lungngaih hmel riau hian ka hria.



"Han sawi dawn chuan thil kal tawh vek a ni a, tul pawh a tul ber lo anga, mahse hei pasal neih hial I tum ve tawh a, a dik a dik chuan, kan lakah I pi leh pute pawh an lungawi lo viau ang tih ka hria a, mahse keini lam pawh kan lawm bik tlat lo a ni, khatianga I nu leh pate an boral khan I pa kha chu kan khaw lama phum kan duh a, tin I pi te lamin an duh phawt chuan I nu lung nen phun rual thlap pawh kan remti a, mahse an remti tlat lova, an hna avangin I nute khuaah in awm a ni mai a, I pa ruang kan khaw lama kan hruai haw theilo kha kan tha a na ve em a, kan nuta neihchhun a ni a, ka nu pawh khan a ngai ngawih ngawih a, mahse I pite lamin an remtih miau loh avangin kut kan sil San a, kan lawm bik tlat lo a ni" a ti malh malh a, tawngkam vin a hmang lova, a tawng ringlo hle bawk a, ka ni te lam atanga ngaihdan siam dawn chuan an lungawi lohna te pawh hi awm tihna chen ka nei ve tho a, ka pi te lam ka han ngaihtuah lah chuan awm ka ti leh hle tho bawk si nen, ngaihtuahna siam thiam har ka ti takzet.



"Keimah min rawn ngaihthah zui hmak bawk si a"zawite tak tak hian ka ti sap a, "Ni e khatah kha chuan thiamthu han sawi tur pawh ka hrelo, a sarhu lai kha chuan kan tha kha a na ve em a, I pi te lakah kan lawmlo a, nangmah biakloh thleng thleng khan kan kal ta kha a ni a, a pawi tak tak" a ti zui vawng vawng a, a hunlai khan ka rilru na thin mah sela tunah chuan engkim ka hre vek tawh bawk a, min hmangaihloh vang pawh ni lova lawmlohna hran an lo neih ve tho vang a ni tih ka hriatna chuan tlemin ka ngaihdan te pawh an thlak ve a, mahse kum 3 chhung kha chu a rei em a, biak takngial pawh min rawn be ngailo erawh ka la vui tho.




Pa Peka zing chhuak a rawn haw ta bawk nen engmah kan sawi zawm ta lova, "Naktukah I nitei pawh a rawn thlen tawh dawn kha, hetah rawn in nghat rawh ka tia, in awm tih ka hrilh bawka a phur khawp mai" a tih chuan ka lo bu ve nghat nghat a, vawiin lam hi engtinnge U Mamuana'n kan awmdan tur a siam ni.



Biak ka tum lai mekin min rawn call a, ka chhang rang khawp mai, "Bawihtei a tho tawh em?" a rawn ti nghal thawr a, hello pawh ka ti hmanlo.


"La tho lo, a chau ve deuh aniang" ka tih chuan "Vawiin chu kan chhuak rihlo mai dawn em ni, ka nu a nuamsam vaklo a, lo leng phei zawk ula" a rawn tih chuan ka ni zawk chu ka melh pah zawk a, "Ka hrelo le,, ka ni te ka lo rawn ve anga" ka tih lai chuan "Chhuah in ngaih chuan inthlahrung suh aw, helamah chuan tihtur em em a awmlo ania" a lo ti zung zung a, chaw ei kham lama ka biak leh tur thu hrilhin phone chu ka dah ta rih a,

"In pa tur chu em ni? Mamuana i ti em ni kha?" a tih chuan bu nghat nghatin "Vawiin chu an in lama leng phei turin min ti a" ka ti a, "Va leng rawh u, a chhungte lam nen pawh in pawhna zel ania, helam chu ngaihtuah a ngailo" a lo ti var a, ka awm a nuam deuh huai mai.



Bawihtei thawm ka hriat tak avangin pindan ah ka tlanlut thuai a, khumah sam pheng deuhin a lo thu a, min hmuh rual chuan a men zui par par bawk.
Nui chungin ka pan hnai thuai a, a thawh hlimah ka awmlo bawk nen a riahna hmun chu a hre thanglo si a, a hlau deuh anih ka ring.



Tukthuan ei kham chuan U Mamuana chu ka be leh a, dar 10 velah a rawn thleng phei a, an in lama leng tur chuan kan han in zui chhuak leh ta pauh chu a nia, chhungkua tak tak ang mai kan ni tawhin ka hria!!









End of chapter-40
(A tawp teuh tawh si a, a tawp min han thlenpui hram hram rawh u aw❤)


Show post links
Top

[Ngaia]

MANAGER MAMUANA
By Ziki nu



Chapter-41



Hun chu a kal chak ka ti a, nileng chu reilo ka ti ta fo a, ka hlimna te chu eng thil nen mah thleng ka phal biklo.
Tunah chuan nun hi a nuam a, hmangaih neih leh hmangaihtu neihte hi a nuam in a hlut zia ka hre thar nitin mai bawk a, khawvel hrehawmna leh lungngaihnate pawhin min tihchhiat vek tumin min bei mahsela U Mamuana bulah ka awm phawt chuan hmachhawn ka inpeih reng.



Aizawl lama kan cham chhungin buaipui ka ngaihna apiangin ka ni te lamin min buaipui thei ta a, ka nitei pawh a rawn thleng tluang a, a rawn thlen Tukah Engtheii nen mokawr vel te min enpui a, kan inneih naa kan hak tur pawh kan hawh fel diam tawh, ka lungawi a, kei ai mahin ka thiannu chu a lungawi zawk emaw tih tur a ni.



"Mamuana te chu an lo va thleng har ve" ka ni in a rawn ti lang lang ri chu kawtzawl atang pawhin ka hre reng a, a ni pui hian a nghakhlel lutuk a min zawt sek tawh mai.



Ka call khan an lo chhuah chiah thu min hrilh alawm, an lo thleng tep ang" tiin ka au let thuai a, naktuk maiah kan khaw lama haw chhoh kan tum tawh avangin vawiin tlai lam chu U Mamuana leh a thian U Reubena te chaw ei ah kan sawm ve a, ka ni hian a nghakhlel tawh lutuka a sawi reng mai.




Kawtzawlah Bawihtei chaw hrai pahin U Mamuana te chu ka lo nghak rilru pah deuh a, ka nitei rawn chhuak ve chu ka lo nuih var var a, mahse tun tum chu a hmel a hlimlo riau in ka hria.




"I nuamsam lo em ni a" ka bula a rawn thut ve rual chuan ka lo ti thuai a, "Nuam e" a lo ti ringawt chu ka awih chiah loh avangin chik deuh hian ka lo en ran a, "I nawm loh hmel e, rilru hahna I nei em ni?" ka ti leh a, za lo tih hriat deuha min nuih sakin pangpar khawina bula ka fanu infiam chu a en vang vang a,
"Min ngaihdam hi kan ngai em a" a tih chuan hrethiam lo deuh hian "Engatimaw?" ka lo ti a,
"I nu leh pate boral hnua I baihvai zia leh harsatna I pal chhoh nasat zia te ka u nen kan lo sawi dun a, keini lam lawmlohna vang ringawta khatianga kan dah tawp mai che kha kan inthiamlo takzet a, tunah hetiang hian in hmukhawm leh tawh mah ila a hunlaia I mal zia te kha ngaihtuah let chuan... " a ti a, a thaw chhuak pah hak a, a inthiamlo hle tih chu hrilh nawn ka ngai tawh lo, ka thil ken lai chu dahin ka nitei kut chu ka vuan a, min rawn en rual chuan nui var varin "In lawm lohna kha a awm ve tho alawm, a hunlaia ka tawrhna te kha hei, tunah chuan ka tan malsawmnaah an chang vek tawh a, min ti chhel Tu leh beiseina min pe Tu a ni zawk asin" ka ti a, ka nitei mittui tling pam hmuh chu nuam ka tih loh em avangin,

"Hetianga in awm hian a hrehawm ka ti zawk ania, tunah chuan ka neihchhun, ka mawina te in nih hi" tih pah chuan ka nuih tlawn titih a, a rawn tah nuih ve hak mai.



Bawihtei chaw ka pak lai ani bawk nen ka thawhsan zui ta mai bawk a, U Mamuana te pawh an rawn thleng chawpchilh ve nghal bawk.


Bawihtei chuan a lo pan hnai ve vat a, motor atanga a rawn chhuah rual chuan a lo pawm kang nghal nawlh a, U Reubena pawhin min lo nui ve leh vur vur mai.



"Mam mam i lo ei em ni a?" tih pahin ka bulah a rawn pawm phei a, "Le... Ang ang ti rawh le, Bawihtei hi chu a fel ania" a han ti ve luam a, a lawmdan naupangchhia lutuk hi ka fanu kum 2 mi tawh tan chuan a thawk vak tawhlo a ni ang, a chaw barh ka tum chuan a hawi sawn zel a, "A ei hnem tawh tho a, a puar tawh aniang" ka tih chuan a chal ti chuar tupin Bawihtei chu a en ren rawn a, "Min ti zak reuh tlat" a la ti zui a, a va han hahthlak tak.



Inchhunga kan inzui lut chu ka ni Pari a lo phur khawp mai a, lo chibai sawk sawkin titi a siam zui nghal a, Bawihtei pawh a chaw ei na berh vel ka tihfai hnuah ka nitei nen an lo in awm a, U Johnsona nen chaw ei kan siam zui ve ta mai bawk.



"U Tetea hi a lo la haw ve lo em ni a?" ka tih chuan "A la inbual aniang" a lo ti mai a, a ni pui hi a chaw ei siam peihlo tawi khawmuang mai mai a nih ka ring tlat.



Zanriah kan ei lai te chuan ka ni Pari te nupa chuan titi tur an han hre em em khawp a, U Mamuana pawh a tawng teuh hman tawhin ka hria.



"A mipa in lama rawn riah ai te chuan nangmahni zawk in lo riak phei mai lo a ni" Pa Peka'n a tih chuan U Mamuana pawh a lo nui ve hak a, "Nia.. Nih chu a ni khawp mai a, mahse ka nu leh pate hian an ngai ve sia " a lo ti ve ngei a, Nu Maawmi ten min han biak that achin chu mi an ngai thiamin min dah pawimawh thiam khawp a, ka tana inthlahrunawm hial tur khawpin min duhsak bawk nen, a nuam a, a hlimawm a, a la zamawm tho bawk si.


Zanriah ei khamah pawh kan thu muang ve leh rih a, naktuk lamah U Mamuana te in atanga haw nghal mai kan rilruk avangin kan thuamhnaw leh bungrua te chu kan pack fel thlap a, U Reubena'n motor ah min lo dah luh sak thlap tawh bawk.



Ka ni Pari chuan eng eng emaw U Mamuana chu a hrilh teuh a, min duat turin a ti nawn zing viau bawk, min ngaihtuah vang tih ka hria a, U Mamuana ka tawn hmaa ka nun retheih zia leh an ngaihsakna ka dawn ve leh hmaa pasal ka neih mai tawh dawn avangin, an mi ngaihsak ai zawng zawng kha U Mamuana hian a tihsak an beisei ve tlat tih ka hria a, ka laka an inthlahrung tlat hi ka duhlo tak zet.



Dar 8 bawrah kal turin kan insiam tan a, U Mamuana te in atanga chhuah nghal mai kan tum avangin kan bungrua te pawh motor ah kan dah lut nghal vek a, ka ni te nena kan in vai liam hnuah U Reubena chu an veng lamah kan thlah kawi hmasa a, an mahni in kan thlen tak phei chu a tlai tawh viau.


Bawihtei pawh ka malchungah a thu zawi ngiai tawh a, inchhung kan luh rual chuan U Mami'n min lo pan vat a, Bawihtei chu la sawk sawkin a pindan lamah a hruai chho zui a, Nu Maawmi pawhin min lo lawm thiam khawp mai. Pa Johana a lo awmlo a, kan thleng tlai deuh bawk nen han titi anahun vak pawh kan nei tawhlo, sitting room ah Pa Johana nghah pahin thei kan ei ho a, Nu Maawmi chuan sawi tur a han hre em em khawp a, Pa Johana pawh a rawn thleng harlo.



Rei vak lo ah mu turin an pindan lamah min luhsan a, U Mami lah chuan message min rawn thawn a, *A mutui emai zanin chu ka bulah riak mai rawh se aw* tih hi a lo ni a, U Mamuana ka hrilh chuan a chal ti chuar tupin "Zanlai ah a rawn tihbuai vaih che chuan ka vua ang" a ti pek a, ka lo nui hak a, chutia riahpui chak ta nafam chu tiin 'aw' ka lo pawh ve mai a, an buai em lo tur ah ngai teh ang.




Midang an mut fel vek hnuah pawh U Mamuana nen chuan inchung zawlah kan la awm a, thla a êng bawka, mi mut reh hun a ni tawh bawk nen, boruak a nuamin a hahdamthlak a, a thlamuanthlak takzet.



"Ka ta I ni tak tak tep tawh a" a tih chuan ka lo nui ve hak a, kan inkarah zep tur engmah a awm tawh lova, nakin lawkah a nupui ni turin min lei anga, a ta ka ni thuai tawh ang.


Chu feeling chu tun atang hian ka feel lawk thei a, A ta nih pumhlum vek theih ka chak tawh, a engkim tawmpui a, a tana nupui tha tak nih ka chak tawh takzet a ni.



"Hun hi a kual duak duakin ka hria" ka ti sap a, kum khat êm pawh la inzui lo mah ila thil tam tak kan ti dunin, thil tam tak a thleng hman a, rei deuh tawh angin lang mah se hun a la liam tam hauh silo.
"Hmangaih nan che hian hun tam ka lo mamawh lo tawp anih hi" a ti sup a, chu thu tawi te ina min han tih lawm zia chu aw..


Ka kawng rawn dawmin a lamah min pawt hnai salh a, kan dinna thlang lama building te chu kan thlir dun vel a, sawi dun tur vak pawh kan hre rihlo.


Nakin deuhah chuan amah hmachhawn zawngin min kuai her a, a kut pahniha ka kawng a rawn dawm rual chuan a nghawngah ka lo kuah ve vat a, hetianga awm dunna hun hi kan neih ngailoh em avangin innei mai tur tilo chuan ka lai deuh tlat pek a, mahse a chala ka chal a rawn nawr sik rual chuan dak arin ka lo en ve a, a thaw chhuak suai suai a, dim deuha ka hmui a rawn fawhrual chuan ka mit ka chhing vak a, vawi khat mah la in fawp lo ang maia ka awm chu ka duhlo tak zet.


A nghawng ka kuahna chu ti nghet ve salhin ka thiam ang tawk chuan ka han chhang let ve a, chu chuan a ti phur zo ve nge a aia uarin min han fawp ve leh a, kan hmui in si reng chunga a nui suk chu ka han laih pui leh em em khawp a, ka zeilo lutuk hi chu a inthlahrunawm lek lek zawkin ka hria, amah lah hian min dimdawi em em mai bawk si.



Inhnuaia kan chhuk leh hnu chuan a bula mu tur in min han sawm uang ve leh khanglang lehnghal a, "I hmelchhe lutuk" ka ti hlak chu nui ruh ruh chung hian ka mutna tur pindan thleng min thlah a, Bawihtei te chuan thawm engmah an rawn neilo bawk a, an mu thei mai turah ngai teh ang.



Zan a tlai tawh bawk nen keipawh ka muhil har lova,
"Mary chu kaitho ta che u" tia Nu Maawmi tawng ri ka hriat rual chuan ka meng nghal kawk a, "A chau ve aniang chu, Mama pawh a lo la haw loh hi" tia U Mami tawng thawm te pawh chu ka hre hman vek.


Khum atang chuan tho chhuak vatin sana chu ka en a, dar 8 a lo ri thuak tawh, ka mutna chu siam fel sawk sawkin pindan atang chuan ka chhuak thuai a, Nu Maawmi hmel ka hmu hmasa ber.



"Ka tawng ri kha i hria em ni?" tiin min lo nuih heu a, "Min lo kaihthawh mai tur ania, tunlai chu thawh ka hai reng mai, engnge maw a chhan ni?" ti nuah nuahin ka sam chu ka tawn tha zui mawlh mawlh a, "I chau ve aniang" a lo ti mai a, choka lam atanga U Mami leh Bawihtei rawn in kai phei chuan min rawn nuih var var bawk a, "Anî.. Anî" tiin ka lo pawm rual chuan U Mami chu a kawk a, "Anî tih ka zirtir a, kha a thiam chak khawp mai" U Mami lah chuan a lo ti vat a, a hlim hmel khawp mai.



"Lo kal rawh u Mary, inchungah pangpar tui min han pekpui rawh u, Mama te pawh an rawn haw tep ang" Nu Maawmi'n a tih takah chuan Bawihtei kaiin inchung lamah kan inzui chho a, "Khawiah nge u Mamuana te chu an kal a?" Ka tih chuan "Reubena nen khan khawnge maw an chhuah le, an lo haw tep ang, an kalna tur pawh an sawilo" a lo ti mai a, pangpar tui kan pek hlan chuan Bawihtei pawh a lo tei kual ve nasa khawp a,


Kan chhuk thla tur chiah chu U Mamuana nen kan in tawk a, nur nanga min en in "I tho ve thei maw?" min ti a, Bawihtei'n a lo ban nghal bawk nen an in pawm kang zui lawp a, "Min kaitho ve ta che" ka lo ti hlak chu nui sukin lu a thing nghut ringawt a, I hnuaia kan inzui thlak leh hnuah chaw ei kan siam zui a, U Reubena pawhin a ei ve nghal a, an chhuak rei deuh bawk nen tukthuan ei khama kan insiam zawh meuh chuan dar 10 a ri dawn der tawh.




"Tluang deuhin han thleng rawh u" tiin U Mami leh Nu Maawmi te chuan ban min vai lauh lauh a, min thlah dan hmasa nen a in anglo lutuk chu ka hnuk a ulh titih zawk a, ka hlim lutuk chu sawifiah dan pawh ka hrelo hial zawk.


Nu Edeni te kan lam phei leh hnuah kan khaw lam. Oahnin kan tlanchhuak a, chaw ber kan ei tawh miau avngin chawl lovin kan tlan a, kan chhuah har ang ai chuan kan thleng hma leh ang lawi a, dar 4 a rik chuan mahni inah kan awm leh veng veng tawh.



Ka pu chu khum betin alo la na reng hi a lp ni a, kan zinbo hlana ka pi lo buai dan tur te chu ka ngaihtuah ringawt oawhin ka lainat a, pasal han neihsan tur chuan ka lungngaih pui leh deuh tlat thin.


"A damdawite hi an thawk chak vak tawhlo nge mawni, a hnungzang na leh a khuh nasa lutuk hi a reh theilo a" ka pi pawhin a lo ti zawi ve sap a, Bawihtei pawm chung chuan ka pu mutna khum sirah a thumbs a, "Nu Ruati te hi bia ila, helamah Vli nen lo awm ve tawh rih mai se a tha zawk angem le?" a tih chuan "A.. Chutiang zawng a ngai lovang" a ti a, han sawi belh viau tur a hre bik lo nge a ngawi deuh vang vang a, "Nangmahni chauha ka kalsan cheu chuan hrehawm ka ti dawn a, ka ngaihtuah dawn bawk si cheu a" ka tih chuan "In zin hlan pawhin kan awm ve naw naw theih hi nangni ber in awm loh chuan kan vawk vulh laite oawh hi kan ti ral anga, a dang chu ka vulh belh tawhlo ang, I pu pension hlawh hi kan nupa chauh chuan kan kham lutuk alawm" a ti ve duah a, "Sum leh pai kha ka sawi chhan ber chuanglo a, in chaklo tulj tulh anga, nangmahni chaiha in enkawl chu a harsa dawn asin" ka ti leh talh a, ka rilru diltak leh thlir dan a ni bawk.



Zanriah kan ei lai pawhin ka pu chu a lo tho chhuak oeih lo va, Bawihtei chu dawhkan kilin amahin a in barh ve nawk nawk a, ka pi nen ngawt chuan sawi tur a vang rih deuh tlat.



"Naktip mai ah man hlan a ni der a, naktukah i ni te ho pawh an rawn kal a ngai ang chu" a tih chuan "Nia an tum. Dan pawh a nia lawm, Vli te pawh lo kal an t kha" ka lo ti vat a, "Naktukah i pa Ramsanga ko ila, I man ei Tu tur te oawh ziah hmaih a awm nual a tia, lehkha kan sem. Hman tawhlo anih pawhin phone talin kan hrilh leh hlawm ang chu, thil hi a rawn thleng leh thut thin a, kan inbuatsaihna a tha vaklo emaw an ti palh ange" a ti a, keichuan engvakmah hriat la nei tam lo va, ka thiante ho in thian main anei dawn tih ka hrechiang em em a ni mai.



Zanah pawh kan mu hma khawp mai a, ka thiante reilo te an rawn leng a, U Mamuana pawhin "In chau ang" tiin min hrethiam khawp mai.


Jacoba chuan U Mamuana vawkin chaw a heh thu nhawt a sawi a, a enkawltu ber angin a insawi bawk nen a han in sawi buai em em khawp a, "Zingkarah chaw oe turin ka kal a, chhun lamah a chaw zawngin ka chhuak leh bawk a, amah vang hian kan buhfai ka tham ru hnem tawh lutuk" tih te chu in sawi theih nan tak a hmang a, Spa leh Puia te chu a hah ber ber an ni dawn tih hre reng mah ila Jacoba chu a in sawi buai em avangin ka lo fak ve luam a, an haw dawn mein chuan a hawi snag tawh khawp mai.




**

Ni a liam zel a, man hlan ni a ni der tawh, ka ni Pari te nupa leh ka nitei te oawh an rawn thleng tluang a, ka pi te nen pawh in nghitnghona nei tawhlo abg maiin tha taking an inbia a, kan in pawh a lenloh nen mikhual neuh neuhin a khat ve khawp mai.



Ka ni Sawmtei erawh Mizoram lama an rawn ha whmanloh avangin min rawn telpui thei ta lo va, lawmpuina erawh min rawn hlan ve mawlh mawlh a, pawisa tam tham tak min rawn thawn tel bawk.




Tluang takin man kan in hlan thei a, ka ni te zarah ka mawi a, tin, buaipui ka ngaihna leh pa chan chan a tul changing Jacoba pa, Pa Ramsanga chu pa nih a tling em em mai bawk a, mi aia uchuak taking ti thei lo mah ila, a mawi tawkin engkim chu kan ti ve thei a, Pathian zarah kan mualpho bik em love.




"Tihian naktuk lamah Aizawl lam kan pan leh diak dawn a, in veng lam chua reh ve ruih anga" kawtlaia thutthlengah thu in U Mami nen chuan kan titi dun a, "Keini awm leh awmloh te chu eng tehvak a ni hleinem" tiin za vaklo hian ka nui sak a, inchhunh lam chu an la ri bung bung hlawm a, chaw ei kham hlim a ni bawk nen inleng oawh an la thahnem ve rih khawp mai.



"I hlim lo riau in ka hria?" U Mami bawkin a tih leh chuan za lo deuha then sakin "Ka pu hi.. " ja ti sap a, ka sawi tur chua hrethiam a ni ang a thaw chhuak ve hak a, "Lo kal ve thei se tha tur" a ti a, van lam chu en in ka mit ka khap sak saka,


"Min enkawltu ka pi leh oute berin min tawiawm theilo tur hi hrehawm ka tia, a chang chuan U Mmauana ka hmangaih loh vang ni lovin, hetiang ngawta ka pi leh putr kalsan hi ka hreh a, pasal neih lehloh mai te k duh rume um zawk thin" tiin U Mami bulah cjuan ka inbuanruak ta tawp a, min hretjiam takin ak darah min kuah a,



"Engkim hian chhan a nei vek a, kan chunga Pathian rorel danah hian lawmlohna tur tam viau angin lang thin mah se kan tana tha tur vek a ni tih akn hriat a tha, I pi te pawhin I mawi lai leh ropui lai ber chu hmuh an chawk ngawtin ka ring, mahse ni khat thil thoeng mai nilo, I nun pum kha an ni chuan an ngaihtiah zawk a, lo kal ve thei dawnlo mah se I nawmna tur lam I pan hi an dem che ka ringlo" a ti ev duha a, ka pi nen a fala in biakna hun kan la nei leh lo, aka pu khumbeta a nat tlat avangin Aizawl lam oanpui ve chiah ziazabg an ni silo a, la sawi rihlo mah se an lo kal ve dawnlo tij chu ka hrechiang khawp mai.




Zan a tlai deuh tak hnu chuan kan ina chuangkai leh ka man ritu thenkhat te oawh an haw darj tawh a, ka ni te ho leh U Mamuana te chhungkua chaih chu kan awm tawh, Vli te nyfa nen.



"Naktip maiah inneih a nih tawh avangin naktuk lama. Aizawl lam kan pan lehnghal a ngai dawn si a, ka pu chu engtinnge kan han tih ang aw" Pa Johana chuan a ti vang vang a, "A.. Hetiang chuan kal chi pawh kan nih loh hi, kan tello in inneihna tluang tak in zuk hmabg ang chu" ka pi chuan a ti ta chiah reng a, a thilsawi chu thilsawi nuam tak a nilo tih a chiang reng, ka thaw chhuak deuh hluai a, ka bula thu U Mamuana pawh chuan ak rilru chu a hrethiam a niang "Mary hian nang talking chu I kal a lo beisei asin" ati a, ka pi chu ebisei viau mah ila ka pu lo enkawltu turmidang an awm chuang silo a, kawng a ping angreng khawp mai.



Pindan atanga rawn chhuah oahin Nu Ruati chuan "Keiman ka lo awmpui thei alawm, ka nu tal kha kal rawh se" a rawn ti ta mai a, Nu Ruati lam chu kan hawi vek hlawm a, kan thut khawmna lama rawn phei ve pah chuan "Mary enkawltu ber ani a, a ni tal a telloh chuan a diklo, ka oa chu ka lo awmpui mai ang, kal ve rawh se" a lo ti nawn leh a, zawhna dang pawh ka zawt nawn duhlo, ka lo bu nghat nghat a, midang ho pawh chuan an lo pawmpui khawp mai.





End of chapter41
Zanin chu aw,,, thui tak dah ka tum ve nen ka type sa ka clear palh hlauh mai a, lak let mai dan ka hre silo a, a bul atang ka han type tha leh a, duhthusam angin ka type chhuak thei tawh bawk silo nen, in duhthu a sam lohna lai zawng zawngah min ngaidam rawh u aw..


Show post links
Top

[Ngaia]

MANAGER MAMUANA
By Ziki nu



Chapter-42(last)


Ka hun ropui berah hian ka nu leh pa te'n min tel pui thei se ka ti takzet a, ka lawmnaah hian min lawmpuiin ka mamawhna zawnah hian min din pui ve thei se la, an hmuh lai ngeia pasal neih ve pawh ka chak lutuk.
An telloa harsa taka min enkawl seiliantu ka pi leh pute hi ka tan chuan an hlu lutuk a, an lakah hian lawmthu sawi ngaihna pawh ka hrelo.


Ka pi nen Pi Remi te inah kan innghat a, Vli'n an in lamah zui haw turin min duh viau mah se Pi Remi lakah ka pi a inthiam thei si lo a, ka pazawn turte pawh an veng hnai ami min han zawnsak thawr a, kan hnampui, Ralte pa ve bawk a lo nih avangin min lo dawngsawng thiam khawp a, mi tih anga mawi chuan engkim chu kan la tlak ve zel e.



U Kimkimi'n ka mamawhna zawn apiangah min buaipui a, inneih nia min cheitu tur thlengin a lo be fel diam tawh hi a lo ni a, ka laizawn tak tak ang mai a ni.


A thiannu Muanpuii erawh ram pawna a zinbo hlan a ni a, buaina engmah siam dawnlo mah se la a awmlo tih ka hriatna ringawt pawh chuan min ti thlamuang khawp mai.


Naktuk maiah kan inneih tawh dawn avangin hah pawh sawi thei kan nilo, U Mami'n Bawihtei chu a chang chawt a ni ber a, Pi Remi te nen an veng a in hlat lutuk lo bawk a, amah Bawihtei'n a lo ngaina ve viau tawh bawk nen zanin pawh riahpui leh turin an han inhruai phei leh ta chu a nia, an va buai em lovang chu maw..



Zinglam atanga inchei tan mai angaih dawn avangin Vli leh Engtheii te pawh kan thlenna ah an rawn riak ve nghal dawn a, kan thian dangte pawh an mahni chhungte in lam theuhah an thleng a, kan inneihna min tawiawm kim thei tur chu ka lawm khawp mai.



"Ka duh theilo Mary, kawr hi ka tawt leh tawh ania, ka dulah a mar vek" tia ka thiannu au chul thawm avang chuan U Kimkimi nen kan in melh ralh a, inchung lamah chuan kan tlanchho zui nghal bawk.



Pindana kan luh chuan darthlalang hmaa dingin naktuka kan hak tur kawr chu a lo ha chhin leh hi a lo ni a, aman a duh a thlan avangin a fan theilo chi a thlang a, a tirah pawh "A mar lutuk ang" tiin ka hrilh lawk vek a, a duh tlat avangin kan la ta kha ania, hei tunah chuan a hnung zipper a zip leh theih tawhloh hi.



"Engatinge I lo hak chhin leh a" tih oaha ka pan hnaih lai chuan min lo nuih tlawn titih a, "Chaw ei kham hlim chauh a la nia, I ei hnem bawk si, I ha chhe mai dawn asin" tih pah chuan a phelh tur chu ka lo pui ve a, kan phelh tum chhung pawh a rei khawp mai.


"A mawi lutuk a, hak reng mai ka duh" thaw hliam hliam pah hian a lo ti leh pek a, U Kimkimi nuih a za khawp mai.



"Naktuk zingah pawh engmah I ei thei dawnlo anih kha, I duh I thlang a, ei turah chuan in hrek deuh mai rawh" ka lo ti bung hmak a, mawi chu a mawi teh meuh mai, mahse ama tan hian a hrehawm lutuk ang tih ka hlau zawk a, hun hman laiin a che chhia ang tihte ania ka hlauh.


"Imm ka lan mawi dawnloh ai chuan ka eilo tawp ang, vawi khat zing chaw eiloh vang mai maiin ka thi lovang" a lo ti awlsam mai a, a thuamhnaw chu uluk deuha zût mam thuak thuakin a khai naah a khai tha leh thlap a, U Kimkimi ho in pindanah chuan kan titi a, sawi tur dang vak kan hrelo, U Mamuana nena kan inngaihzawn tan tirh lai te, min biak ve thin dante chu sawi chhuak in kan nui leh hak hak thin hlawm a,
"Naktuk lawka ka pasal tur ni mahse a bulah chuan ka la lai chhe thei lutuk" ka ti chu Vli leh U Kimkimi nuih a han za em em khawp a, "Mamuana chu a zei ngai hleinem, a ngawi reng a, zuamawm tak angin lang mah se a bulah chuan hmeichhia te hi an zamchhe thin teh tak asin" tiin U Kimkimi chu a nui ruh ruh reng a, U Mamuana'n rei tak a lo zui tawh Muanpuii thiantha ber ani a, huai taka chutiang a sawi ngam chu mak pawh ka ti lo.



Hmeichhe hlang kan ni bawk a, kan titi tui hlawm khawp a, Engtheii chu U Reubena zûnah ngawt a uai leh tawh a, nupui a la neilo tih a hriat hlim phei kha chuan a lawm lutuk vangin min beng chawrh a, ka dar te hi a sil them thum thei.



Mahse bialnu a neih thu ka hrilh kha chuan a duh viau emaw tih laiin "Nei ve ang chu" a lo ti mai a, "Nupui em a la neihloh chuan a zia alawm" a ti a, ngaihzawngah hi chuan a ngaihtuahawm loh khawp mai.




Dar 10 a rik takah chuan a upa ber U Kimkimi chuan mut a rawt a, thawh hma a ngaih dawn avangin kan lo pawmpui khawp mai.


U Kimkimi pindanah ka riak ve a, an mikhual pindan ah Engtheii leh Vli an riak thung a, ka pi pawh Pi Remi pasal a zinbo hlan a ni bawk nen an thian dunin an riak a, sawi dun tur an ngah khawpin ka ring.



Mut hmunah chuan ka meng kar reng a, U Kimkimi chu a muhil nghal mai niin ka hria, naktuk maiah pasal ka nei tawh anga, ka nun zawng zawng a inthlak danglam tawh ang tih ngaihtuahna chuan min ti muhil theilo a ni ber.



Ka nulatna, ni e.. Nuthlawi chu ka ni teh meuh mai, mahse nula dangte ang tho in dream ka la nei ve a, chhungkua diktak ka din ve thei tawh tur chuan min ti lawm a, ka hmangaih ka chhungte lak atanga ka tlat hran a ngai tawh tur erawh hi chuan min ti hnîm deuh a ni.


Ka pu ka ngaihtuah lo theilo a, zanriah ei khama Nu Ruati ka call kha chuan a tlangval viau thu kha min hrilh mai a, an kum in aphu tawh bawk nen kan hlim lai tak hian min liamsan maite ka han hlau rum rum a, a chhe ber ka ngaihtuah thleng lo thei silo, rilru a luah ve reng a, ka pasal neih lai min han tawiawm thei se chuan min chhuan dawn vei nen, ka vanduaina piahah Biak in hawng ngeia pasal neih theihna hun tha Pathianin min buatsaih sak leh hi ka pi leh pute mawlh hian an lawm a, an hmuh laia inneih thutiam chham theih chu ka thil chak ber te zing ami a ni.



Ka ngaihtuahna vak kual nasa lutuk chuan ka mutchhuak tur a chhembo zel ni berin ka hria, ka hun kal ta te ka han ngaihuah kir leh thin a, ka putea te, Muanpuii leh mi chi hrang hrang rilru ah an rawn thar zut zut a, a hun laia khatiang harsatna ka tawh lai khan tun dinhmun hi ka thleng ang tih ka ring pha ngailo anih kha.



Tunah chuan engkim felfai takin a awm thei tawh a, hun kal tawh vanga han in tihhrehawm viau chu tul pawh ka ti tawhlo, tunah chuan ka hma lam hun chauh ka ngaihtuah tawh anga, khawvela nu tha ber leh nupui tha ber nih ka tum tlat bawk ang.




Zingkarah U Kimkimi'n min lo kaitho a, a thawhna ala rei biklo tih a hmel en mai pawh chuan a hriattheih. Sana ka en vat a, dar 7 a lo ri thuak tawh.


Ka mutna atang chuan tho chhuak thuaiin khum chu ka thlep fel sawk sawk a, ka rilru tete chuan ka pi pawh hian engahnge min lo kaihthawh ve mai loh le.. Ka duh ai ka tho tlai tlat.



Bawihtei ka ngaihtuah chhuak hmasa ber a, U Mami call tum chuan ka phone ka dap zui rak rak bawk.


"Tunge biak I tum?" tia U Kimkimi'n min lo zawh chuan "U Mami ka biak loh chuan Bawihtei chanchin engmah kan ngaihven lo a" ka ti vat a, "I pi khan an lo kal mek a tiin ka hria" a ih chuan inhnuai lamah ka chhuk thla vat a, ka pi te thiandun chu choka ah thingpui in in an lo titi a, min hmuh rual chuan "I va tho tlai ve,, Mamuana'n min lo bia a, Bawihtei an lo dah dawn" a lo ti nghal thuai a, "A sual lem lo maw" ka tih chuan min chhang tawh lo va, min rawn be lo emai an buai vaklo turah ngai teh ang.



Vli leh Engthei te pawh an lo tho tawh a, ka thiannu chuan thawhphan hmel pawh a neilo reng reng, a pasal neih ni tur zawk ang maiin a hmel chu a nung sarh a, U Kimkimi hnenah chuan min cheitu turte an lo kal dawn tawh em tih a zawt chhen bawk.


Rei vak lo ah U Mami leh mipa pakhat hi an rawn thleng a, Bawihtei chuan min lo ban ve chuk chuk mai. A thianpa chu ka la hmuh ngailoh anih avangin ka lo en duh deuh nne U Mami chuan "Thanpuia anih hi, Mama chu a buai deuh a" a lo ti vat a, ka buk nghat laiin Engtheii chuan "I bialpa em ni?" a lo ti leh pek a, U Mami chu nui hak hak mah se ka lo inthlahrung zawk thin.


Rei pawh awm lovin an let leh thuai a, Vli leh Bawihtei an in awm chawt a, chaw ei hma in min chei Tu turte an rawn thleng ta bawk nen thingpui bak chu engmah kan la ei leh lo.



Chawhma dar 11 ah inneih tan anih dawn avangin thawh hlim atang kan buai nghal viau hlawm a, ka ni te lam in kawr puanthan in ang hak an rawt ve tlat pek a, ka pi leh Vli te ta tur pawh an ngaihtuah sak vek a, ka mawiloh an hlau lutuk te chuan ka hnuk a ti ulh tun thei zawk hial.




A kawr a hak theihloh a hlauh lutuk avangin Engtheii pawhin engmah a ei ngam lo va, tui takngial pawh a in duhlo.



Min chei uluk bawka an han bei rei em em khawp a, an zawh fel meuh chuan ka in hmu dang ve vek thei alawm, make up chu a nasa uchuak lo va, mahse uluk taka a thiamin min han chei meuh chuan lang tha ka in ti ve lutuk tlat.



Ka pazawn te lamin motor in min rawn lam a, Biak in kan thlen chuan ka beisei aiin mipui pawh an lo tam daih.



Biak in chhungah chuan ka pasal tur chuan min lo nghak reng tawh a, inneih thu kan chham lai mawlh mai te chu mumang ang mai hi niin ka hria, ka kut chelha zungbun a nawr luh lai te, hmangaih taka min enkawl a in tiam lai te chuan rilru a kal bing duh kher mai, ka zam a, mahse ka hlimna chu a nasa zawk fe thung.




Pastor in inneih thuchah a sawi laite chuan uluk tak hian ka lo ngaithla a, U Mamuana chu kohhran leh khawtlangah a theih leh phak tawka mi tangkai tak a nih thu te, mite tana malsawmna a nih thin nasat zia te a sawi lang nghe nghe a, kei erawh hmun dang atanga mo tur ka ni bawka ka chanchin erawh a sawi tam ve vaklo. Chutih rual chuan mo tha tak ni tura min duhsak thu te a sawi ve a, mi chhungkua ti darhtu ni lova, huikhawm Tu zawk nih a pawimawh zia te a sawi a, reilo te chhungin thu tha tak tak a sawi hman a, zawm nghal theih vek thil a ni bawk.



Inneih hunserh a zawh chuan Biak in kawtah thlalakna hunte kan hmang a, program sheet a tel lo thla min lakpui duh an awm ve nual bawk nen kan ding rei khawp mai. Ka thiante pawh an lo tel kim thap a, an mawi hlawmim mipa ho pawh an smart ve khawp mai. Ka thiannu ber lah chuan ka beng bulah a ril tam tawh thu a rawn sawi sek tawh a, a hrehawm ang reng khawp mai.



Mo lawmna program hranpa kan siam tawhloh avangin U Mamuana te in lamah present leh thilpek in hlanna hun tawi te kan hmang ve leh a, tlaiah catering an buatsaih a, engkim tluang takin kan zo fel ve zel thei e.



"I chau tawh em Merte, inthlak ula, duh leh in mu hahdam ve rih dawn nia" Nu Maawmi chuan chaw kan ei ve laiin a rawn ti lang lang a, Engtheii pawh a inthlak tawh bawka a lim nghek mai.


U Mamuana chu ngawi reng hian a nui leh suk suk ringawt zel a, a zeilo ve si a, min nei ta hi a lawm lutuk awm dan tur a hrelo ni berin ka hria.


Bawihtei chu Vli leh ka ni te lamin an buaipui theih avangin ka ngaih a tha viau a, ka pi erawh ka ngaihven ru ve reng thung. Mi zingah, nel vaklohte zingah hrehawm ti deuha a lo awm ka hlau a, ka phal miahlo bawk
Mahse Pi Remi a awm a, an in zui ve chawt bawka ngaih erawh a tha ve deuh.




Pindan awlah kan nupa chuan kan hahchawl ve rih a, nupa kan han ni ta mai te chu a awihawmloh rum rum hial in ka hria.


Kan thiante pahnih hi khawi lamah nge an kal ka hre lo va, pindan dangah an chawl ve a ni mai thei. Reubena chu han star ru viau mah se a ngaihzawng Zotei a awm ve zel avangin Engtheii pawhin a ti lang duh lutuk lem lo va, mahse a ruk chuan a ner a nerin ka ring.




"I chau em ka nupui duhtak"
Tukverh bula ka ding chu ka hnung lam atang ka kawngah min rawn kuah a, ka darah a khabe nghatin ka nghawng zawnah te chuan a thaw lum zui hak bawk a,
"Chau lo ve" tiin ka lo nuih var var a, "Nupa tak tak kan ni ta e" a lo tih leh chuan ka thaw chhuak hluai a, "Min nei hi I in chhir lo ang tiraw?" tia ka zawhna chu atthlak tih hmel fe hian a chek zui hlak a,
"Khawvela nupui nei fuh ber ka nih reng theih nan nangmah hi I pawimawh tak zet" a tih chuan ka lo bu ve nghat a, min hmangaiha min nei tawh anih chuan hmangaih ngawih ngawih tlak ka nih zia ka hriattir zel anga, nupui tha tak nih ka tum tlat dawn a ni.




Rei vak lo ah Pa Ramsanga'n min rawn ko a, lawichal a ni bawka mumal taka ka pasal te ina ka lawi luh ve te pawh a ngai tak alawm le..



Pa uang leh titi thiam tih takah "Lawichal in thil phut a nei" tiin U Mamuana pa, Pa Johana chu kuhva cheng 100 man lai a han dil pek a, chhungte dang awm vete pawh chu an nuih a zat hmel khawp mai.


Chu mai chu la duh tawk lovin kan pindan tur thleng U Mamuana'n min pawmluh a han phut leh tlat mai bawk a, ka lo zah ruk sa ve tehreng nen ka lai chhe lutuk chu U Mami'n min khawngaih deuh aniang ka awm nawmna turin min lo fak ve a, mahse ka zahna a bo phah chuanglo reng reng.





U Mamuana lah chuan ka inrin hma in min pawm kang nawlh a, ngawi rengin inchhungah min pawm lut a, midang lah chu an lo nui nasa mai bawk nen, inchung chhohna kailawna min chhohpui laite chuan "Min dahthla tawh mai rawh" ka ti ru sek sek reng a, "Keima tan a zahthlak dawn" tih pahin min la sep kang lawp zui bawk nen, a kawr ah chuan ka tham ngawt ngawt a ni ber.




Khumah min mut tir dawp a, phone leh camera lek vek tuten minnlo thlen khalh bawk nen kan thla chu an la hnem khawpin ka ring.



Boruak sang zual a reh fel a, inleng thenkhat an tin meuh chuan ka chau ve hnawk thei mai, nilengin ka fanu chu ka buaipui hman lo a ni ber a, Vli leh U Mami ten an awm hneh em a, nilo se chuan ka buai viauin ka ring.





Zan dar 11 velah kan mu ve thei chauh a, ka pu te lam chanchin ka pi hnena ka zawh chuan a that thu in min lo chhang mai a, Bawihtei chu U Mami bulah a riak leh dawn a, Vli pawh an mahni inah a haw phei ve tawh ang.



Pindana kan pahnih chauha kan awm takah chuan boruak a dang nghal vek a, ka pasal bulah ngei mai zan ka han riak ve thei tawh turte chuan min ti hlimin ka tahte lam lam a ti chhuak hial mai.



Kan inbual fai ve ve hnuah khumah chuan ka lawn kai ve a, ka zam ru kher mai.
Ngawi rengin a awmah min lo kuah bet hlu hlu a, ka hmui a rawn fawh ruala kan thil tih leh chu sawi zawm zel chi pawh a nilo....





Zinga ka harh leh chuan ka pasal chu a lo la mutui khawp mai a, uluk deuhin a hmel chu ka en a, a hmeltha takzet.
Hetiang hian tuktin ka harh rualin a hmel ka hmu hmasa ber thei tawh anga, ka thiltih engkimah a tel ve zel tawh bawk anga, ka fanu tan pa tha tak a ni anga, Pathian kan dah hmasa ber thin bawk anga, chhungkaw hlim tak dinpui ngei ka tum dawn a ni.



A TAWP TA







Ka regular loh zia te, ka story in belhchian a dawlloh zia te hrechiang Tu in ni hlawm a, chuti chunga a tawp min thlenpui tute zawng zawng chungah lawmthu ka sawi takzet a ni.
Harsatna neuh neuh karah ka han complete hram a ni a, a ending hian in duhthu a sam kherlo pawh a ni thei e(a tira ka duhdan angin tawp ka khar biklo) ngaihdam ka ngaihna zawng zawngah min ngaidam ula..
Min support Tu zawng zawngte in chungah ka lawm takzet a, min support chhunchawm zel turin ka sawm bawk che u
Luv y'all ❤


Show post links
Top