LAL FAPA JADONANG-A HRINGNUN ZINKAWNG MAK

Hlauhawm lampang hrim hrim hmun hrang hrang a mi lakkhawm...
HLalthazuala
Posts: 142
Joined: March 19th, 2018, 6:51 pm

LAL FAPA JADONANG-A HRINGNUN ZINKAWNG MAK

Unread post by HLalthazuala » May 19th, 2018, 9:54 pm

BY ISAAC ZOTE
****************

He thu hi ka pu (ka nu pa) Thuamluaia'n , ka tet lai (kum 7,8 bawr vel) a an bul a ka awm thin lai a min hrilh ani a..Ka pu hi Sipai pensioner niin Kohhran Upa ani bawk a, a hnu ah Bible te zir tha leh in vairam an awm lai a an awmna Methodist kohhran chuan Pastor nihna hial a pe nghe nghe a..Dawt a sawi chu ka ring lo tawp mai..Vanduai thlak takin ngai hle mah ila, 2009 khan kum 86 mi niin a Lalpa hnenah min chawlhsan ta ani..

Jadonang-a hi Manipur leh Assam ramri inkar vel a Naga chi peng pakhat hnam ani a..An hnam hi Naga zingah pawh an tlemin an lar vak lem lo va..Hetih hun lai hian heng hnam ho te hi thingbul lungbul (Animists) bia kan tih ang chi kha an la ni a..Tun thleng pawh hian hetiang rinna nei chu an la awm zeuh zeuh ani..Chutiang Naga hnam ho awmna khaw pakhat, lian vak lem lo a an Lal fapa chu ani.. Jadonang-a pa hi Lal mai nilovin dawithiam ropui tak anga sawi ani bawk a..Thil te pawh a dam chhung chuan a ti thei hle ani awm e..

Chutiang a Lal fapa ni a nuam ti tak a khawvel a len lai leh a duh duh ei a in a ,a awm lai chuan a nunah thil mak tak a lo thleng ta!! Amah Jadonang-a sawi angin chhunzawm ta mai ilangin :

Zan khat chu ka nula rim haw chu ka chauh deuh avangin ka mu hma a, mahse zanlaiah chuan ka zun a chhuah em avangin ka thang harh ta a.. Ka khum atanga ka han tho chhuak chu ka chhungte zawng zawng chu an lo muhil vek tawh hi a lo ni a, zan pawh a lo rei deuh tawh aniang e.. Pawn ka va chhuak chu thla chu a lo eng hle mai a, lung te pawh a leng lek lek in ka hria..Kan in kawt chu hmun ruak zau deuh tak hi ani a, a sir ah chuan thingkung buk tha tak hi a awm bawk a, tah chuan zanah chuan ka zung mai thin..

Chutia eng em em mah ngaihtuah lem lova ka zun lai chuan ka zunna thlang lam, thim tham atang chuan mi pahnih, mihring pangai tur a lian leh sang deuh si chu ka lam rawn pan hian an rawn chho nul nul mai a..An dum vek avangin an hmel chu ka hmu tha thei lova..Hlauhna nasa takin min rawn bual ta nghal tlat mai..Ka hlauh em avang chuan ka chhungte han auh vak ka tum a, mahse ka ka atang chuan aw a chhuak thei reng reng lo..Chu mai chu ani lo, ka khur nasat lutuk vang nge pawh ka hre lo, ka ke te chu an che chang thei tawh lo tlat..

Aikaih ang deuh hian ka awm a, tlanchhiat ngaihna reng reng ka hre lo tawp mai..Chutianga khawng reng a ka din lai chuan min rawn pan tu te pahnih chu an rawn hnai zel a, ke in an kal han ti dawn ila lei an rap si lo; thlawk ti dawn ila thla an nei mang si lo..Lei si chiah si lo hian an rawn tleng chho ani ber ang chu..

Ka bul an rawn thleng ta!! An hmel te chu an ngainat awm lovin an rim te chu a va chhe tak em!! A thawk theih lo tep ani!! Eng mah sawi lem lo chuan an pahnih chuan ka ding lam leh vei lam zakhnuai ah min dawm ve ve a, an rawn kalna lam pan chuan min thlawh chhuah pui ta!! Kan in leh a bul vel te chu min thlawhpui lai chuan chiang takin thla eng hnuaiah chuan ka hmu thei a, mahse engmah ka sawi chhuak thei tlat lo!! ka ka (mouth) chu hnawh sak angin ka awm tlat!!

Zawi zawiin kan thlawk sang tial tial a, kan kal hla tial tial bawk a..Ral khat atang chuan kan khua awm vel pawh chu ka zu hmu thei ruai ruai a..Chutah chiah chuan hnar a hlit phawi ang hlawk hian ka awm a, ka aw bawm chu voilehkhat in a rawn inhawng hawk hian ka hria a, ka tawng thei ta!!

Ka tawng theih veleh chuan "Tu te nge in nih? Eng nge in duh? Eng ti zia a hetiang a zan zan a min man nge in nih?" tih leh zawhna tam tam chu ka zawt ta mawlh mawlh mai a..Ka dinglam pang a min dawm tu zawk chuan min chhang ta a:

" Khawbawn tlang a ramhuai lalber a ho te kan ni a..I pa hian kan Lalpa hi a zawl avangin thil pawh a ti thei hle anih hi..Kan lalpa in ka rawng bawl turin ka duh che atih avangin nangmah rawn la tur in min rawn tir ani" ati ta a..Chu thu ka hriat chuan ka hlau hle mai a.."Eng ang takin nge ka awm dawn? Ka chhuak leh thei ang em? Min that mai ang em? Ka nu leh pa te hmu leh tak ang i maw? " tih te ka ngaihtuah nauh nauh a...Min thlah ru!! ka duh lo!! ti a theih patawp a ka han tal leh tan vel pawh chuan engmah a sawt si lo..Kei aiin an chak zawk ropui mai si a!!

Tichuan kan thlawk zel a, rei fe kan thlawh hnu chuan tlang lianpui, dum kulh mai, san hmel tak bawk hi ral atang chuan a hmuh theih tan ta a..Ka dinglam a mi chuan "Saw saw anih saw kan awmna Khawbawn tlang (Mizoram,Cachar leh Manipur ramri a awm) chu!! kan thleng tep tawh e" a ti ta a..Reilote ah chuan kan thleng chu ani ta der mai..A tlang sang lai ber ah chuan min thlawh pui a, pialtlep karah chuan khawiah tak nge min luh pui pawh ka hre chiang tawh lem lo..Puk ang deuh reuh, lian vak lem lo hi ani a..kan tum ram chu kan thleng ta!!

Chutah chuan ramhuai ho chu tam tak an lo awm khawm a, a hmei a pa in an lo awm thleh thluah mai a..Mi pakhat hi an lo bial deuh luai mai a..Chu pa chu ramhuai dang te aiin a lian in a hlauhawm hmel zawk a..Zawh leh hrilh pawh ngai lovin an Lalpa ani tih chu ka hre thei nghal mai..kan va thleng chu an Lalpa chuan lawm hmel takin min lo welcome a.. "Kha in rawn thleng thei maw!! In rawn kalna te a hla deuh si a, i hah ang e..va mu phawt rawh naktuk lamah kan inhmu leh dawn nia" ati ta a..Tichuan ramhuai dang te chuan ka mutna tur awm chu min kawh hmuh ta a!!

Han muthilh leh chu a har duh ngei mai!! ka rilru ah zawhna tam tak a rawn lut nghal a..."Tlan bo tum a chi ang em ? Ramhuai anni si a, ka tlanbo tum chuan engtin emaw an hre ngei awm si a.. Min that mai ang em ? Tlan chhuak ringawt pawh ni ila kan khaw awmna chin ka hre bawk si lo, ramhnuaiah ka bo emaw ani ang a, min man leh tho awm sia...Mahse, hetia ka awm reng chuan a dik chiah bawk si lo!!" tih te in ka rilru chu nasa takin a in hnial a..chutiang ngaihtuah neuh neuh chung chuan ka hriat loh hlanin ka lo muhil ta a..

A tuk zing ka harh chuan a zan lam a ka thil tawn te chu ka mumang emaw ka ti hial a..mahse, duh ai sam thlawn mai ka ni si!! ka mutna bul vel ka'n en chuan ka awmna chu hai rual ani lo!! Nakin deuh ah chuan ramhuai pakhat hi ka bulah rawn kalin Lalber in min hmuh duh thu min rawn hrilh a..ka zui phei ta ani..

Lalber chu a lian bikin a tihbaiawm bik em em mai a..Ramhuai dang ho pawh chuan an zah mai ni lovin a hlauh hian an hlau hliah hliah ani ber zawkin ka hria..A mitah pawh tuman an en tha ngam mang lo! Lalber chuan ," I pa nen hian kan inzawl thin a, ka chhiahhlawh rinawm ani..Chuvang chuan nangpawh rawn hruai tir che ka ni a.. Ka thu lova tlanchhuah i tum anih erawh chuan i thi ang..Amaherawhchu, kan hnen a tha taka i awm dawn chuan kan thiltihtheihna ang te ka pe ve ang che a., keimahni mi leh sa ang chiahin i awm thei ang" min ti ta mai a..

Inngaihtuah buai rei vak a ngai lo!! Duhthlan tur vak pawh ka nei chuang in ka hre lo!! Tlanbo tum a thih ai chuan a thu anga awm mai chu fuh zawkin ka hre ta a..Chu ta tang chuan an thiltih theihna te nei ve in an zingah chuan ka khawsa tran ta a..Khawbawn tlang velah chuan ka duh duh na ah te ka thlawk kualin ka lengkual thin..

Ni khat chu kan Lalber chuan min koh khawm a, "Ransa ah i chang ang u le!! Eng ah nge in chan duh? In duh duh ah inti chang rawh u" ati a..A then chuan Keipui te, Keite te, Savawm te,Saphai, RUl ngan, Sanghal leh a dang dang ah te kan inti chang a..Lovah feh leh ram kal te kan rikrapin kan hram khum vel thin..Silai a min kah an tum te pawhin kan dawi hmangin kan lo inveng mai thin a, min kap fuh hlei thei chuang thin lo..

Mihring in a min hmuh theih loh tur te in kan insiam a, Lova feh leh hmeichhe thingphur haw te hi an bul velah ri nasa tak te kan siam a, a chang leh khawi atanga rawn kal nge tih an hmuh theih si lovin lungte leh lung thil ten kan vawm a, an bul vel thing buk leh hnim hnah te thli awm miah si lovin kan ti che vak vak a..Hlau leh khur in nasa takin an tlanchhia a..Kan nui nasa thei hle!! Zep lovah chuan zawi zawiin nuam ka ti chho tan ve hle ta mai a..Mihring te aia thil kan ti thei bik lai tak chu a nawm zualna chu ani..Tu ma hneh theih loh thiltihtheihna nei in ka inhre hial thin..

A nuam ka tih zia leh mihring ten min hlauh theih zia kan Lalber chu ka hrilh thin a..Ani lah chuan "duh tawkin mihring te chhaih buaiin tirethei rawh u!! In duh leh an lu te, an pum te tihnat sak ula, natna te'n tlak buak rawh se" ati mai thin a..Hmel chhe deuh leh tihbaiawm tak tak te a insiam chhia in kan tihthaih fo bawk a..chutiang taka ka mihring pui te ka sawisa thin chu mak tak maiin nuam ka ti hle ta mai a..Zawi zawi in an mahni rilru ang chiah ka lo pu ta nge tih pawh ka hre tawh bik lo..

Tum khat chu kan pu hnenah chuan "khawvelah kan chak in thil kan ti thei ber em ? Keini aia ramhuai emaw thiltithei zawk an awm em? " tiin ka zawt ta a..chutah tak chuan fuihna thu chah, nidanga a sawi ka la hriat ngai miah loh min pe ve ta tlat mai.."In duh duh sawisa ula, mahse, Hmai eng (bright/light) vek ho lakah erawh chuan fimkhur hle ang che u..In hmuh veleh a rang thei ang berin insaseng vat ula, a hla thei ang berah thlawk bo nghal thin ang che u!" ati a..

A bak chu chung ho chanchin chu engmah a sawi zui duh lo..Chu a thil sawi chuan ka beng a verh in mak ka ti ngei mai!! Keimahni aia chak leh thiltithei zawk an awm ka ring ngai lova..Kan Lalber hi ramhuai chak ber emaw anih ka lo ti thin a, mahse ani aia ramhuai chak zawk awm angin ani ber chuan a sawi mauh mai bawk si.....

Kan pu thusawi chuan a ruk takin ka thin a ti rim deuh riau mai a..Han hmu fuh ila aw ka thiltihtheih zia kan hmuh tir tur ania ka ti rilru thin..Kan intawng fuh pawh lo ni tehreng se kan Pu sawi anga tlanchhiat awzawng ka tum bawk hek lo!! Mahse, chung ramhuai hmai eng ho chu an tam vak lo nge, an vang riau mai a..Hei leh chen khawbawn leh a chhehvelah ka lengkual thin a..Tumah hmuh fuh pawh ka la nei lo..A chang hian chuan Lalber hian kan fimkhur zawk nan leh kan huangtau lutuk loh nan min tihthaih mai mai aniang te ka han ti leh hnuhnawh thin..

Mahse, ni khat chu ka thil hmuh chak loh ber leh ka thil hmuh tawh zawng zawng a ka la hlauh ber ka tawng fuh ta !! tlai lam a nu ho thing phur haw,tih thaih tum a an hmuh theih loh tur a kan lo chan vel lai chuan hla tak atangin enge maw ni ri ka hre ta a..Mihring rawn kal anih ngei chu, ka lo tihthaih chiam teh ang ka lo tih rilruk lai tak chuan ka hmu ta thut mai!! A hmai chu nasa tak hian a eng a..a en dan chu Ni (sun) ang mai hi ani a, en pawh ka en tha ngam mang lo a..Hla hi a rawn sa phei rat rat bawk a..CHu hla chu ka hla hriat tawh zawng zawng a hla ngaihthlak hrehawm ber pawl ani..Ka beng hi a puak keh dawn tlat in ka hria!! A hma a ka lo inhrosak dan ang pup pup kha chu ka ni dawn ta lo tawp mai!!

Min rawn hnaih zel a, a hmai eng avang leh a hla sak avang chuan ka mit leh ka bengdar te hi an puakdarh dawn tak ngial in ka hria a..Lo beih chi zia zang ani in ka hre ta lo!! Kei mah aia chak leh thiltithei chu ka tawng ta!! Tlan chhiat mai loh chu tih theih ka neiin ka inhre ta lova..Ka tlanchhiat san ta ani..

Hun leh ni te a lo liam zel a, a kum a kum tel a lo vei ta!! Ramhuai ho zingah chuan ka tal rei ta bawk a, nuam pawh ka ti tawhin ka tlangnel tawh hle mai..He mi chhung hian vawikhat mah ka chhungte leh kan khaw chanchin ka thiante hnenah chuan ka sawi ngai lem lo..Mahse, ni khat chu ka lung a leng ve ta tlat mai a..Ka chhungte leh kan khaw lam a ka thenrual tha te khan enge an tih ve thin ang aw tih te ka ngaihtuah chhuak a..Hmuh ka chak leh ta tlat mai..Kan Lalpa hnenah chuan " Ka pu, khawngaih takin hun reilote chhung haw min phalsak rawh..Ka chhungte pawh ka awm bo san rei tawhin ka ngai ve viau tawh ania..Reilote ka cham ang a ka rawn haw leh vat ang" tiin ka ngen ta a..

An zingah rei tak ka cham ve tawh avang leh min rin zawh ve tawh avang chuan Lalber pawh chuan min hnial vak lem lo va..Haw hun tur a tih a rawn kir leh ka intiam avang chuan ka haw chu min phalsak ta..Mahse, ramhuai angin ka haw thei dawn lo va, mihring ram a ka kal dawn chuan ka thiltihtheihna te erawh min laksak a ngaihthu min hrilh a..chuan ka thil tawn chu tumah hrilh lo turin chhia min chham tir a, ka sawi chhuah chuan ka nunna hial tan pawn a pawi tur thu thlengin min hrilh bawk..

Haw tur a ka insingsa chu ka thian ramhuaite pawh chuan min ngai hle a..A tir a min rawn hruai tu te pahnih chuan kan khaw dai thleng min rawn thlah a..An thlawk liam leh ta a..Kan khaw dai atang chuan ke in, mihring pangai angin kan khua chu hun rei tawh tak hnu ah ka let leh ta ani....

Kan khua ka va lut chu mipui zawng zawng chuan hmuhnawm thlir in min lo thlir hu hu mai hlawm a..Mit tla lek lo hian min lo en hlawm a..Mak an ti hle tih chu zawh buai ngai lovin ka hre thei mai a..Khang leh chen khawnge ka awm bo? khawtlangin min zawn nasat zia thu te leh sakei emaw misual hovin min that ta emaw an tih thu te min lo hrilh mawlh mawlh hlawm a..Chhan sen pawh anni lova, ka kalna pawh chu tumah ka hrilh ngai hek lo..Engmah sawi lovin mipui pungkhawm chu ka kal tlang zel a..rei tak hnu ah kan in chu ka va lut ta rawih mai!!

Ka nu in min hmu chu a phu nasa lutuk a, mak tihna, hlauhna, rinhlelhna leh nasa taka lawmna ten vawilehkhatah a thinlung chu a rawn luah khat nghal vek tih chu a hmelah a hriat theih mai..Min rawn kuah nghal thlawp a.."Bawiha, khawnge khatiang chen chen min kal bo san? Ka va han ngai thin tak che em !! I bo hnu khan rei tak a khawtlang huapin kan khua leh a chhehvel zawng zawngah kan zawng che a; hmuh tur reng i awm si loh avangin mitthi dah in kan lo dah tawh mai che asin!!" tap chungin a rawn ti chhuak hawm hawm mai a.."Ram hla tak ah ka zin bo a" tih bakin ka chhang thei si lo!! Lung chu a chhe duh kher mai!! Kan inkuah a rei fe chu kan tap dun ani...

Ka awm bo rei ta bawk a, kan khua pawh a lo inthlak danglam nual tawh a..chutiang bawkin kan chhungkua pawh..Min hring tu ka pa ngei pawhin mual min lo liam san ta hi a lo ni a..Ka nu hmeithai kan hmuh chuan ka rilru ati na zual hle mai!!

Ramhuai ho zingah khan ka cham rei deuh pawh ani ang, mihring zinga han awm leh chu ka khawr riau in ka inhria a..A hranpa a inzir that leh deuh vek a trul dawn in ka hre mai..Nitin eizawnna a hah tak a hna thawh an ngai te ringawt pawh chuan mihring nun hahthlak zia min hriatchhuah tir a..Ka awmna hlui chuan ka lung a len leh ta riau mai!!

Chutia mihring zinga ka len vel lai chuan nikhat chu kan khaw thenawm kha pakhatah zin turin ka thiante nen chuan kan insingsa a..Chu khua chu kan khua aia lian zawk anih avangin thil lei tur a kal tum kan ni..Chu ta kan va kalna ah chuan thil engkim a danglam zo ta!! Ka thil rin phak loh chu ka va tawng ta!!

Kan zinna khua ah chuan kan thiante nen an kawtthler ah te chuan kan leng vel a..chutia kan len lai chuan mak tak maiin in pakhat atang chuan hman a Ramhuai hmai eng vek pa in a hla a rawn sak kha ka hre leh ta tlat mai le!! Ramhuai angin ka awm tawh lo bawk a, ka bengdar puak keh tur ang chuan ka awm tawh lo..Mahse, chu hla chu hriat chian chakna namen lo chu ka nei tan ta tlat mai!!

Chu in chu ka va pan hnai zel a, chu hla chu mi pakhat chauh sak nilovin a huho a an lo sak rual hi a lo ni a, mak ka ti hle mai..Hla sa zing a tel ve ni lo khawlai dung a mi pakhat chu zah pawh dawn lovin ka va be ta chawt mai a.."Ka pu, chu hla an sak rual chu enge ni a, sawng mi te saw tute nge annih? Ramhuai hmai eng ho kha anni em?" ka va ti ta chawt mai a..

Ka zawhna chu chu pa chuan mak ati hle mai!! A mengphawk hru ringawt mai a!! Ti hian min chhang ta a, " Chung ho chu tunlai a pawl thar Kristian te anni a..Kan hnam zingah pawh lut an awm ve nual tawh asin..Mahse midang te chuan kan duh lo hle a, a thanlen zelna tur kan do char char ani..Saw in saw an inhmuhkhawmna thin Biak in antih chu anih saw..Chu hla pawh chu an Lalpa an fakna hla anih chu !! Kan khua ah pawh hei tlem tlemin ram an rawn la zel a, an hnawksak tak tak asin! " ati ta a...

Min chhanna chu mak ka ti hle na in, dik chiah chuan a thusawi awmzia chu ka hrethiam chuang hauh lo mai!! kan zawt nawn leh ringawt mai a " Chu an Lalpa chu tunge? Khawi lai Ramhuai lal nge anih a? A va chak awm ve?" ka ti ta phawng mai a..chu pa chuan "Ni lo, Ramhuai Lal ani lo, anni kristian te chuan Pathian Fapa ani an ti a, A hming chu Isua Krista ani" ati ta a..Mak tih bak loh chu engmah han sawi theih ka nei lo...

Ramhuai Lal emaw ka tih thin kha Pathian Fapa maw lo ni a? Dawt ani han ti dawn ila ramhuai ho zinga ka awm lai khan an hmai eng zia te ka hmu vek bawk si..Dawt muhlum tawp chu ani thei lo!! Ka rilru chu nasa takin a insual a, an chanchin leh an Lalpa chanchin chu hriat chian zual duhna in nasa takin ka thinlung chu a rawn luah khat ta !!..

Ka insum zo ta lo!! Zah pawh ka dawn zo ta lo!! An inkhawmna ah chuan ka va lut ve ta rawih mai..Mi tam vak lo hi chu Biakin antih in tereuhte ah chuan an lo awm a, a then te chu berh ve tak tak leh retheih hmel tak te pawh anni..Mahse ka neih ve lo enge maw chu an nei tlat a hriatna ka nei a..Mihring tawng a sawifiah theih lo hlimna thuruk chu an neih hmel tlat lawi si..

Zak chung chung chuan " In Lalpa chanchin hi min hrilh ve rawh u!! ka hre ve chak e" mawlmang takin ka va ti lut rawih mai a..Min hau dawn emaw ka tih laiin hlim hmel tak leh nui sang chung hian an zinga mi pakhat chuan, " Lehkha i chhiar thiam chuan he lekhabu a thu ziak te hi lo chhiar ve rawh..Hetah hian i hriat duh chanchin chu a inziak e..I hriat fiah duh chuan amah Lal Isua hnenah chuan tawngtai in dil mai rawh" a rawn ti ta a..(He ta lehkhabu an pek hi chanchin tha ziak pali zinga eng emaw ber lakchhuah ani a, ka pu min hrilhna a rei tawh avangin a eng ziak ber nge ka hre thei tawh lo - Isaac Zote) Tawngtai dan te min zirtir hnu chuan ka chhuak ta a..

Chulai ka rilru put hmang chu ka hrethiam bik lo..Ka thil tih chu a dik nge dik lo pawh ka hre lo..Lal fapa te ka nihna angin kan khua a lehkha chhiar thiam tlem te zinga mi ka ni a, chu lehkhabu pan tak mai pawh chu ka chhiar thiam ang tih chu ka hria..Chu chu ka buaina ber pawh ani hran lo..Ka buaina zawk chu a chhung a mi chu chhiar chi ani em tih zawk chu ani..Ka chhiar chuan khawbawn tlang a Ramhuai lalpa kha ka phatsan tihna ani thei ang em? Hre chhuak ta se min that duh mai ang em? Zawhna tam tak chu a rawn lut nghal zung zung mai..

Mahse, ka thil hriatchian chakna chu ka do zo ta ngang lo!! Isua Krista an tih chanchin chu ka hrechiang chak tlat! Kan thlenna in ka thleng chu, chu lehkhabu chu ka keu a, ka chhiar ve ta a..Chutah chuan le, khawvel a ka thil hriat ngai miah lo, Hmangaihna leh khawngaihna a khat Pathian chanchin chu ka chhiar ve ta..

A hma a ka thil tawn leh ka lehkhabu a inziak chu lei leh van ang ani a..Ka khawvel chu a inlinglet ni ber hian ka hria..A hma a ka lo tih thin mi tih nat leh mi sawisak ang chi te khan hmun a chang lo..Chu a hnekin, Isua Krista chu mi tidam tu leh beidawng te beiseina siam tu zawk alo ni..A va han mak thin tak em!! Hetiang hi maw Pathian Fapa chu a lo nih!! Kan Lalpa nen chuan inang lo tak chu ani..

Kan khua ka thleng a, ka lehkhabu pawh chu ka chhiar zawm zel a..chutiang ka chhiar chhung zawng chuan a hma a ka la tawn ngai reng reng loh, hlauhna leh beidawnna thlarau ni lo, tun thleng a ka la hriat ngai loh thlarau chuan min chenchilh tlat niin ka hre ta!! Ni danga ka la tih ngai miah loh, Ka zinna a Kristian Pa in min hrilh dan ang chuan , Lal Isua hnenah chuan ka tawngtai ve ta !!

Mi sual te zingah pawh sual ber..Ramhuai ho te nen a leng dun a..mihring te sawisa a, ti na a, tiduhdah thin tu chuan Pathian hmangaihna thlei bik nei lo chu ka chang ve ta !! Hei ngei hi ani hmangaihna famkim chu!! Ani chuan ka sualna te angin min thungrul si lo!! A va ropui tak em!! Ka lo piangthar ve ta a, Kristian ah ka inpe ve ta..

Chu ka pianthar hnu chuan nasa takin ka nun a inthlak a, kan khaw mipuite hmuh theih leh mak tih khawpin ka nun a danglam ta!!..Khawlai ah te thu sawiin Pathian hmangaihna chu ka auchhuahpui ta a..Engmah hlauh ka nei tawh lo!! A ngaithla duh apiang te hnenah ka chanchin mak tak mai pawh chu ka puang chhuak a, Hnehna ka puang chhuak ta!! kan khua ah pawh ring thar an lo awm ve ta nual mai..A va lawm awm em!!

Chutia ka pianthar tak avang chuan Ramhuai ho chuan min thlahthlam ta angin ka lo ngai a..Mahse alo ni awzawng lo mai!! Zan khat ka pathian thu sawi haw ka muhil tur chu hman a ka lo hriat thin, rei tak ka hriat tawh loh rimchhe tak, Ramhuai rim ngei mai kha ka hre leh ta!! Ka va han ning tak em!! Pahnih rawn kal thin kha tunah chuan pahnih chauh pawh an ni tawh lo..Paruk pasarih vel anni tawh..An hmel rah a rapthlakin phuba lakna leh mi tihnat duhna hmel an pu ani tih chu ka hmu thei reng mai..

"Enge in duh? In hnenah ka awm thei tawh lovang..Lal dang ka nei tawh!! Min kalsan ru.."tiin ka au vak vak mai a..Anni chuan, "Chuti maiin i kal bo thei lovang..kan hnenah chhia i chham tawh kha!! kan lalpa ngeiin va hruai haw tur che in min rawn tir ani..I rawn haw duh loh chuan i thi ngei tur ani!!" an ti ta a..Kei chuan " Ka taksa chu in tina thei, ka thlarau erawh in ti na thei chuang lovang..ka hlau lo che u !!" ka ti ta a..

Chutia ka sawi rual chuan an zinga mi pakhat chuan engin nge maw ni in ka ke ah hian min hlap chawrh mai a..ka ruh a tliak nghal thawt in ka hria a..A nat dan chu rapthlak tak ani..Mahse, ka beidawng duh bik lova.."Nazareth Isua hmingin helai hmun ata hi thlawk bo nghal rawh u!!" tiin ka au ta vak mai a..Ka nunna chu min laksak thei bik lovin an insaseng ve ta a..Chu ta chin chu ka thian hlui te chu ka hmu leh tawh ngai lo

He ka zinkawng ah hian mi pangai tawng ngai loh thil tam tak ka paltlang a,a tawpah chuan Pathian min hmangaihna sawifiah rual loh avangin chhandamin ka awm ve ta ani...Ka ke ramhuai hovin min vuakna avang chuan tun thlengin ke bai in ka awm phah ta a..Mahse pawi ka ti lo, an tihnat theih loh ka thlarau erawh chu ka thih hunah thlamuang takin ka Lalpa hnenah a chawl tawh ang...Lalpa chu ropui ber rawh se!!


( He thu hi Ka Pu , Assam a awm lai a Biakin Pulpit chung a amah Jadunong-a ngeiin a puan chhuah ani a..Jadonang-a hian a kalna apiangah pathian thu sawi zelin Team te an indin in anmahni hnam zingah rawng a bawl ber a..nasa takin amah avang pawh hian an hnam chu Kristian ah an inpe a ... Ka pu te hian a chanchin an lo hriatin an biakin ah thu sawi ve turin an sawm ani )

*********ADVERTISEMENT CLICK **********



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)