ROSEMARY BEACH BY Noah Hringngen (Complete)
Posted: May 21st, 2017, 2:06 pm
A link chiah tih loh hi chu khawiahmah copy/paste phal a ni lo.
A link share dan
https://storyfb.com/viewtopic.php?f=2&t=917
A share dan tur nen lam kan inkawhhmuh chung pawh a, a story full a whatsapp lama la copy/paste lui in awm anih chuan Police-ah FIR kan thehlut anih pawhin nangmahni chochhuah liau liau a ni ang...
Copyright ©
All rights reserved
http://www.storyfb.com
Chu lai in nalh zet kawtah chuan ka truck, a ke pawh vaivutin a a tih pawt luk tawh chu ka khalh lut ve a. In kawtah chuan car nalh leh man to hmel tak tak 20 chuang a lo ding tlar thup a, chung ho karah chuan ka truck park na tur hmunawl chu kan dap ve a. Ka nu in a kum 15 chhung ngawt a lo enkawl tawh Ford truck chu ka neih ve chhun a ni mai a, chung mi hausa ho motor dip lo thei ang ber tura ka dah loh chuan.
.
A reng reng thuah ka pa pawhin party a neih dawnte chuan min hrilh lawk ve tur hi a nia. Engmah hi chiang hian min hrilh duh lo a, ni tak e, ka nu kan vui ni pawh khan a rawn lang eih lo a nih kha. Hmun dang pan tur nei chu ni ila helai hmunah hian ka kal tawp lovang.
.
Ka pi in kan rochun ve chhun lah kha ka nu damdawi man atan kan hralh mai a ngai bawk si. Ka neih chhun chu ka thawmhnaw tlem a zawng leh he truck upa tawh tak chauh hi a ni.
.
Ka nu cancer a ni tih kan hriat hnu kum 3 naah ka pa chuan min sazumeidawh san a, chumi hnu a a tanpuina va ngen chu a harsain a tlawm thlak khawp mai. Mahse a ni lo chhungte belh tur dang ka nei thlawt si lo.
.
Ka hma zawna in mawi tak mai, bawm pathum zawm khawm ni awm tak chu ka thlir reng a, Florida a Rosemary tuipuikam a sak a ni a, chu chu ka pa in thar, a chhungkaw thar nena an chenna hmun chu a ni a, keia lo va tel ve ngawtna chi pawh a ni lo.
.
Ka truck kawngkhar chu pawn lam atang tu emaw hian a rawn pawt hawng a, chuveleh ka thutna hnuaia ka dah that silai, a dawt 9milimeter zet a sei chu lek chhuakin kawngkhar rawn hawng tupa chu ka tin runa. Hmeh puah ka inring nghal at mai.
.
"Whoa.....i motor dahna hi a dik lo tih hrilh che ka tum mai a ni e. Ka puih theih ngei che ka beisei, mahse i silai kha dahthla phawt la" tihpahin a kut pahnih chu a koki zawnah a phar chho a.
.
Ka mitko chu kan chip deuh a, ka silai erawh ka hum ngaiin ka la hum renga. Chu pa chu tunge a nih ka hre lo va, chutianga hmelhriat loh motor hawn ngawt chu tih dan tur a ni lo hrim hrim. "Hmun dik lo a kal ka nih chu ka ring chiah lo. Helai hi Abraham Wynn-a in a ni lovem ni?"
.
Chu pa chuan nuam tih vak loh hmel pu chung hian a chil an lem ri khalh a. "Khatia ka hmai zawn a min tin rengte chuan mumalin engmah thil ka ngaihtuah thei lo. Min ti hlauthawng a nia bawih-i. I chetsual palh hmain dah thla vat teh"
.
Chesual aa...? Amah vang vek zawk hi a nia. "Khaw thim hnuah kal ngai lohna khua ka rawn thleng a. Tunge i nih ka hre lo a, ka ti thlabar che a nih chuan min hrethiam dawn nia. Mahse eng chetsualna mah a thleng lovang. Silaite zawng, ka hnehsawh lutuk."
.
Chu pa chuan ka thusawi chu a ring lem lo a ni tih ka hre mai. A hmel atang erawh min rawn tihbuai tum chu a ang lo. Mahse chutih rual erawh chuan ka silai dah thlak pawh chu ka tum em em hran bik lo.
.
"Abraham-a maw..?" tihpahin a lu a han thing a, chutah thil hrechhuak ni awm tak hian min rawn en a. "Abe-a chu Rush-a pahrawn thar a nia, a nupui Georgiana-i nen a Paris a zin tura an chhuah hma khan kan inhmu hman tak e"
.
Paris? Rush ? Eng nge a sawi awmzia chu? A chhanna beiseiin kan nghak deuh a, mahse chupa chu a ngawi ta daiha. Silai dawt chu a rawn en a, a thla a muang zan lo tih chu a mitmengah chuan a lang chiang hle a. Ka silai ken chu ka dah thla a,mahse ka ban phak reng turah ka dah a. Silai a awm ta lo tih a hriat chuan chu pa pawh chu a thaw huai mai.
.
"A reng reng thuah khatiang kawl theihna license kha i nei em ni?" min rawn ti a.
.
Chutiang thil tul hlei lo sawi tur khawp chuan zaidamna ka nei rih lo. Chhanna chauh a ni ka mamawh ni. "Abraham-a chu Paris ah a zin i ti em ni?" ka han ti nawn leha. Kar hmasa lawk, kan in ka hralh zawh hnu pawh khan kan inbe reng a, vawiinah amah hmu turin ka kal dawn a ni tih pawh a hre ve reng si a.
.
Chu pa chuan zawi muangin a lu a han bu a, tunah chuan a hmel hmuh pawh a hahdamthlak ta deuh e. "In inhria em ni?"
.
Ka hre chiang em em tawh lo maithei a ni. Kum 5 kalta a ka nu nena min kalsan atang khan tum 2 bak kan la inhmu leh miah lo. Soccer ka khel apiang a min hruai thintu leh thenawm ten party an neih apianga burger min lei sak ziahtu, ka phirpuinu Valarie Car accident a a thih tuma min thlamuan tlattu ka pa kha chu ka hria. Mahse tunah zawng hmana ka hriat thin kha a ni tawh kher lovang. Khami ni atang khan a inthlak danglam vek tawh. Ka nu damlo ka enkawl chhung Kha vawikhat pawh kan that leh that loh ngaihven turin min rawn call eih lo.
.
"A fanu Blaire-i ka nia"
.
Chu pa chu mak tiin a meng kawk a, vanvadak meuhin a nui ta vaka. Eng nge nuihzathlak awm reng reng le...?
.
"Lo kal rawh Blair, hmelhriat tir tur che ka nei a nia. A hmu che hi alawm ngei ka beisei" tiin ka lamah a kut a rawn phar chhuaka. A kut chu ka en a, ka purse ka thuhruk pawh chu ka phawrh chhuaka.
.
"Ekhai a..! I purse i lo thukru hman elaw..? Mi zawng zawng bulah nangmah ti hlauthawng zawnga che lo turin hrilh ila a tha ang". Min han tih el dan vel chu a ngeiawm ru riau.
.
"Kawngka pawh kik lovin i rawn pawt hawng ringawt a nih kha. Min ti hlau alawm"
.
"Miin an tih hlauhthawn chein silaiin i tin hmiah zel tihna a ni maw.. ? Karei lehh... Khawilam chhuak nge maw i nih le? Ka hmeichhe hriat thinte chu an hlauh chuan an au vak zel a ni ngaia"
.
A hmeichhe hriat thinte chuan anmahni invenna turin engmah an ti ngai lo tihna a ni mai alawm. "Alabama atang ka rawn kal". A kut pawh chu vawn sak duh lovin keimahin truck atang chuan ka chhuka.
.
Tuipui atanga thlifim rawn thaw heih heuh chuan min rawn chhem a, a thiang tawk lek hian chi al rim a nam chem chema. Vawikhatmah tuipui kam hi a takah ka la hmu miah lo. TV leh thlalakah tih loh. Ka beisei ai daihin a zun chuan min phuarna dawn tlat.
.
"Alabama nulate chanchin an sawi thin hi a lo dik dawn a nih hi" a thusawi chuan ka beng a verh zar mai. A lam chu ka hawi let thuaia.
.
"Engtin maw i tiha?"
.
Ka taksa chu an melh thla zuai a, rawn hawi chho lehin a han nui sek a. "Tawnzau ha in jeans kekawrbul chhing tak an ha a, silai an kawl fur bawk an tia. Hei, tunah chutiang chiah chiah chuan ka hmu bawk che a"
.
Thawk hak pahin chunglam ka melh a. Ka truck a ka dah ka suitcase chu ka pawt chhuaka.
.
"Khawi, keiman ka lo ti ang" tihpahin ka nu min hnutchhiah suitcase lian angreng tak chu min hlan thlak saka. Ka nu khan engtikah emaw khawthlang tuipui kam lama zin khawthawn hi a sawi thin a, mahse a tak ram a thlen hmain a damlo ta kha a nia.
.
"Ka lawm lutuk e. Engtin nge ka koh ang che? I hming pawh ka hre si lova"
.
"Silai a min tin ringawt i ngaihtuaha, ka hming min zawhna chang pawh i hre hleinem" tihpahin min rawn nuiha. "Grant-a ka nia. Aa.. Uhh... Rush-a thianpa"
.
"Tunge Rush-a chu?" a hma pawh khan chu hming chu a sawi tawh.
.
Grant-a chu a nui leh ver ver a. "Rush-a i hre lo a maw..? A pawi love. Min lo zui rawh. Ka inhmelhriat tir dawn che u nia"
.
In lam pan chuan kan inzui phei a. Kan hnaih telh telh a, music ri pawh chu a ring telh telha. Ka pa a awm lo a nih chuan tunge midang awm ang? A nupui thar chu Georgiana-i a ni tih ka hria a, chu zawng chu. Tuna in a awmte chu a fate em ni ang? Fa a nei angem? Kum engzat bawr vel nge an nih ang? Ka pa lahin chiangin engmah min hrilh si lo. Nuam ka tih viau tur thu chu a sawi nangin a chhungkaw thar chu eng chiah nge an nih tih a sawi bawk si lo.
.
"Anih chuan Rush-a chu hetah hian a cheng em ni?"
.
"Aw cheng e. Mahse nipui chhung choh. Hmun hrang hrangah in a nei a, sik leh sa inthlak dan a zirin a awm kual thin a"
.
"In dang a nei aa..!!? "
.
"I pa in nupui thar a nei tih bak engmah i hre nange Blair?"
.
Ka lu ka thing ringawta. Kawngka a kan luh hma chuan min han dinpui te te a. "Engmah hre lova luh ngawt chu a tha lo. Rush Finlay chu i unaupa tur, i nu thar fapa ania. Drummer lar zet mai Slacker Demon an tih mai Dean Finlay-a fapa neih chhun a ni. Mahse a nu nen hian an innei lo. Hei hi Rush-a in a nia, a phalsak avangin a nu pawh Rush-a inah hian a cheng ve a" a sawi zawh chuan kawngka chu a hawnga. "Heng ho hi Rush-a thiante an nih hi"
.
Nula sang tha tak, sam sen nalh tak mai, kawr pawl manto hmel tak ha hian min lo melh nghal runa.
.
"Hello Nannette" Grant-a chuan a han ti a.
.
"Khawilam hmeichhia nge i rawn hruai hi? "
.
"Kan thian thar a nih hi. Hmelthat leh khatia meng nur chur kha a inhmeh tehchiam lo ania Nan" tihpahin min rawn kai a, inchhung lamah chuan min luhpuia. Kawngka pakhat hi a hawnga, chutah chuan kan inzui luta, thutkhawmna pindan a nih ka ring. Kan in ai pawhin a lian daih. Darthlalang kawngkhar pahnih hi a inhawnga, chiang takin tuipui chu a lang ruiha.
.
"Helamah hian.. . " Grant-a chuan kawng min rawn kawhhmuha. Bar em ni.. ? Ni chiah e, inchhungah chuan Bar te a awm nia.
.
Kan kalpelh hote chuan min en duh hle lehnghal.
.
"Rush, hei hi Blair-i a nih hi. Pawnah sawn bo angreng deuhin a lo awm a. I bula rawn hruai tur niin ka hria"
.
A sawi fo Rush-a chu awn duaiin Sofa var chungah beer dawm chungin a lo thu a.
.
"Chu ti elaw..? " zawi angreng deuh hian a rawn ti a."A duhawm reuh khawp kha. Mahse ka duh aiin a la naupang. Ti rih lo phawt mai ang"
.
"Oh... Chutiang lam a ni lo thiana. A pa a rawn zawnga, i nu nen karleh thlenga cham turin Paris-ah an zin daih bawk si a. In inhmuh ve hrim hrim loh chuan ka ti mawle. I duh leh ka awmna lamah a riahna tur chu ka lo ngaihtuah sak mai ang."
.
Rush-a chuan min rawn en zeuha. "Chuvang ringawt chuan keia ngaihtuah tur a nihna a awm chuang hleinem" a lo ti duh lek chauh a.
.
A tha dawn lo tawp mai. Ka purse ah chuan $20 chiah ka ak a, ka petrol lah a zo tep tawh mai si. Kan neih zawng zawng kan hralh avangin ka pa ka va bia a, reilote atan, hna ka hmuh hma chenna tur ka mamawh thu ka hrilh a, he in hi phal takin min kawhhmuh kha a ni si a.
.
Rush-a chuan min rawn en leha. "Bawih-i, zanin chu mikhual ka ngah lutuk a, ka khum thlengin a full vek tawh" Grant-a lam chu a hawia. "Hotelah lo riak rih mai rawh se. A pa lo haw hmate chu"
.
'Pa' tih a sawi laia a hmel awmdanah ka pa chu a ngaina tehchiam lo tih ka hre mai. Ka dem hran lo. Ka pa in heta kal tur hian min ti a, ama thiam loh pawh a ni hleinem.Ka pawisa neih chhun lah Florida ka panna kawng lamah ka hmang zo vek titih tawh si. Ka pa chu engtin nge ka rin nawn leh theih ang ni?
.
Ka suitcase Grant-a la vawnlai chu ka va chhuha. "A sawi dik chiah. Ka chhuak leh mai ange. Thil atthlak tak ka ti a ni" tihpahin kawngka lam pan chuan ka kala. Mahni inkhawngaihna avangin ka mittui a rawn hnam tiam tiama.
.
Grant a'n Rush-a a hauh mawlh mawlh lai pawh chu hre mah ila ka beng ka chhu ngawng lui tlata, ka chanchin an sawi chu ka hre duh lo. Ka pa lah a ngaihtheih zawng a lo ni vak lo nen.
.
.
"I va haw leh hma dawn ve.. " nui ver ver chungin hmeichhe pakhat hian kawngka chu min lo hawn saka. Anni pawh chuan chulai hmuna ka awm ve chu an ngaithei tehchiam lo a ni tih ka hre mai.
.
Rang takin ka mittui ka hru a, heng ho hmuh laia tah chu ka chaponain a tlin lo. In atang ka chhuak fel ta maw tihah chuan ka tah chhuak lutuk chu ka inhnit hlawp hlawpa, ka truck awmna lam chu ka pana.
.
Hmanhmawh takin ka neih chhun truck chhungah chuan ka luta, chu truck chhungah chuan ka him ber. Kan in ka ngai ngei mai. Ka nu ka ngai lutuk chu ka tap chhuak hlawp hlawpa, kawngkhar pawh chu chhung lamah ka kalh hmaka.
.
.
END OF CHAPTER - 1