CHAPTER -22
School an chawl tawh bawk a , Rinsawma pawh hun a nei deuh tawh nen ,a rawn leng zing viau a ,Pekin dawr min nghah chhawk zeuh zeuh bawk nen keipawh hun thawl ka ngah ve tawh khawp mai.
Dawr a thil zawrh tur ho pawh ka ni chah tawh lo in , bungraw sem a rawn kal thin te ta hi kan la ve tawh a , a awlsam ta phian .Thla khat ah vawi 5 emaw vawi ruk an rawn kal thin avang in hmun dang a mi lak buai a ngai hran lo bawk.
"Ehe , ngati nge , " Rinsawma leh a u fanu Celini rawn inkai lut chu ngaih na hrelo zet in ka en a , zan dang a a rawn len in a rawn hruai ngai si lo a, mak ka ti deuh.
Thuthleng ah thu in a bul ah a thut tir ve a "min ngen tlat a lawm "min en in a ti thum dut ,Celini ka en chu min lo nuih var var , nuih let ve in lolipop chu ka pe " Lawm e , "ti in a lo ban vat ,a nu ang mai a hmel fel thak hi a ni a,a tet zual lai pawh a tawng duh deuh a ni bawk a, a len ve tak deuh hnu thleng pawh hian a nu ang mai in a la tawng duh zat zat khawp mai .
" Au Mate , a nu in min hrilh a , a pute a nen in inei tep tawh a ti a , a putea te in a i lo awm hun ah chuan a nuam ngawt ang "a ti siam siam a ,Rinsawma chuan min rawn melh in a nuih a zat hmel viau ,a tunu te chu en a lu thin khum nghut in ''A nu a tawng thei bawk a ,hei pawh hi a nu siar"ti sup in " midang rawn len an tum hlawm em "ti a min biak chuan lu ka thing a .
Zikpuii phei chu chhuak hman pawh hi a ni meuh lo krismas kawr thui tur a ngah bawk si ,zawh hman loh a hlau bawk nen zan lam ah pawh a meng rim viau zel.
Celini rawn leng ve chu boruak a ti hlimawm phian ,amah a tawng duhsi a ,kan nuih pui leh thin , naupang na na chu dawr chhung ah a awm tih a in hre ve ran nen , eitur a ei chak zawng deuh chu lei a ngen leh thin a, a thlawn a pek ka tum lah in a putea chuan " a ngai lo , pawisa ka pe ang che ,a thlawn a pek ngawt zel chu nangma tan leh a ma tan pawh thil tha a ni lo, a zawng chhang mai mai "ti in min lo hnial zel a, tul lo ka ti chung chung in an thil lak man chu min pe ta lui ta nge nge.
Celini mu hil chu pawm in " Zanin chu duh ang pawn a awm theih loh chu a nih hi , tlangval leng kan naupang te reuh te hian min zui tlat si a "ti in a pen chhuak zui a , kei pawn ka zui chhuak ve vat , dawr kawt ah ding dat in " zanin chu rim tu dang i nei lo a ni maw "ti in pawn a thuthleng kan dah chu a melh pah zeuh ,
" Tun kar chu eng an hre hlawm nge maw ni , an reh riau "ka ti ve mai a.
Zan dang ah lem thutna kan dah a leng lo khawp in tleirawl rual ho an rawn thu khawm thin a , tun kar atang erawh in an reh riau , khawi lam ah nge maw an tuan daih hlawm ni.
A nau pawm lai a siam tha leh thin chu " puak na tur puan i duh em " ti a a a bul te a ka kal phei chuan lu thing in "a buaithlak mai mai , pawm hian a awlsam ber " a ti than ,kut a pawm bet hlun ai chuan puak a awlsam daih sia , a nau pawm lah chu a lian ve zuar tawh nen nuih an ti za reuh lutuk .
"Lo awn deuh teh " a lam ah chuan ka awn phei deuh "min lo melh la " tha te te chuan ka melh chho leh , rinloh deuh in ka hmui ah a rawn fawp ta zeuh , zawi fiah ruih si hian "kha bak kha chu zan dang ah a ni mai , a rem teh teu lo e mai " ti hluk a min melh chu ka lo insiam chhiat khum vak , za deuh a nui hawk hawk in "a nih muttui aw" ti in kan in thlah liam ta a .
Khua a vawh tawh em avang in dawr a awm reng pawh a vawt duh nen ,rei tak pawh ka inhawng peih thin lo .
Dam a hrisel chuan ni te hi an kal duak duak a ,Peki nen krismas hma kar ah thawmhnaw bazar tur in aizawl ah ni thum cham in kan kal a , aizawl kan awm chhung in Rinsawma'n min rawn be ngun ngang mai , bazar tawt lutuk a kan inhnawh buai lai tak a min lo be leh chut thin hi chu , hlim sar a biak hi a har talh zel ,dah ka tum lah hian sawi tur hre hawt si lo hian an phal lo tlat tlat thin nen , kan in vin leh khar khar zel a,thinrim a la lo in min rawn nuih leh kur kur thin .
Min dawh thei a, a hma ang mai khan min hrethiam em em a , innghahna tlak a nih zia min hmuh thar tir leh in amah a thlamuanna ka neih leh theih nan tan a la thar reng bawk thin.
Ka ni te in ah bawk kan innghat leh a, bazar kan chhuah pawn ka ni in min chhuah pui mai thin , Pa Bda a fel in , kan unau in krismas present ah kawr min lei theuh a, ka nu shawl tur a lei tel bawk , kan chung ah a tha in min duhsak bawk a,keini pawn thinlung takin kan pawh ti ila a dik ber ang .
Peki aizawl lam ah krismas hmang tur in ka ni in a chelh ta tlat a , a ni lah lo phur bawk nen ni thum kan cham hnu in keimah in kan khua ah ka let a.
Thawhleh zan ah kohhran zaipawl in , krismas leh kumthar a hla rem tur kan zir a, hmun dang a lehkha zir leh hna thawk ho haw khawm lai a ni bawk nen, thalai hla zir kan thahnem in a nuam mup mup viau .
"Doroi hi eng chu hria ni maw , kan zing ah hian a tal tam duh tawh lo riau mai,a pawi sawi kan nei a maw ni "kan piah a Doroi leh midang thu chu en in Zikpui chuan a ti vawng vawng .
Rinsawma nen kan in kar a that leh tak hnu atang hian kan thianho thil tihna ah emaw ,inkawm ho na ah pawh hian a rawn tel tawh ngai lo .
Hmingi pawn" , a in la hrang tlat a, han sawm ve pawn min hnial zel a ,a mak tak tak a ni "a lo ti ve bawk , kei erawh in a chhan tur awm ang ka ring thiam deuh a , han sawi vak ka duh loh avang in ka ngawi ta daih.
Kumthar ni a kan hla rem tur chu Rinsawma'n a conduct dawn a ,mahni bialpa te solfa vai a han zai chu a nuam riau , hla dang kan zir ai zawng in sak a nuam hial in nia ka hriat .
" Ka nupui i nih hun ah chuan , ka tir kual reng zel ang che , min hnial deuh hlek chuan ka vin khur khur zel ang che nga , ka thu tawh dawn sia a nuam ngawt ang "nui lek lek a a rawn tih chuan ngei deuh in ka melh , a ni lah chu a lo hawi cham nasa mai
" Min duat loh chuan ka tlan a nga , min rawn koh i tum pawn ka haw duh tawh miah lo ang "lei chhuah zeuh in ka tih khum " ka pawm lawk che nga , ka tlan haw pui vang vang tho ang che "ti in ka kut chu a rawn vuan a ,
" Ka duh lo chung chu min pawm awm lo e mai "ka lo ti zat zat chu a nui chhuak ta huk ,keipawh hlim tak in ka nui ve tho , nupa kan nih hun tur lam kan sawi rik hi chuan a tu a zawk zawk pawh hi kan phur sar reng mai thin.
"I lo tlang dawn em "ti a ka zawh chuan a ngawi vung vung a , a inngaihtuah a niang .Tullo ka ti viau na chung in hla zir zawh lam ah min thlah leh thlap a, khua a vawt tawh nen ,mahni a an haw leh rak rak tur chu a khawngaih thlak reuh , mahse hnial theih pawh a ni lo , min thlah thlap kha a duh tlat si a
" Ka rawn tlang tawh lo mai ang ,zan a rei tawh ,he lai thleng hi ka lo thlah ang che "rawn ti in kan in thlen hma a thingkung lian zet hnuai ah chuan min din pui a , he lai hmun hi chu kan pahnih tan hian a tangkai in a hlu tak zet .
Kan inngaihzawn hmasak tum pawh a chance kan neih na thin hmun kha a ni ve miau .
Krismas kan hmang zo a ,kum thar kan chuang kai ta der , krismas vuak vet chhung in kohhran thil tih na lam ah theih ang tawk tawk in kan in hmang hlawm a , a buai pawh kan buai hlawm viau ,
Urlawk zan Hmingi te in ah kan hmang ho a , kumhlui thlah zan erawh Chhana te in ah ar hem in , guitar te nen nuam deuh in kan hmang tlang bawk.
Zikpuii'n kan bul a a sawi thawi zeuh tawh ang ngei in rei lo ah palai hmel a hmu ta ngei a , a ngaihzawng pa Muanchhana pawh rawn zin chho in ,an sawi ang ngei in a fel in a dam dup a , a hmel en erawh in a naupang chhe zawk zawk tawh lo tih a hriat hle .
Buaina awmlo in March thla tir lam a innei tur in an insawi fel ta ,Rinsawma pawn inneih lam ringawt a sawi tawh a , duh loh na em em nei lo mah ila chiang tak in aw ka la pawh mai thei lo thung .
Ka chhungte ka ngaihtuah lo thei si lo ,hmun hla tak ah awm bo dawn lo mah ila , pasal nei a midang in a lawi luh tawh chuan duh ang tak in ka ngaihtuah in ,len luh reng te kha a rem tawh dawn si lo a,ka nu lah upat lam hnaih zel a ni tawh bawk nen ngaihtuah na sen thiam pawh a har khawp mai.
A rawn len leh hmasak ber ah kan sawi dun a ,"tun ah tawt tawt hi chuan inneih lam chu la tin zawn hrih lo ila , ka la inpeih chiah lo deuh in ka hria"inthlahrung tak in ka ti a , Rinsawma lah in inneih a phur in a chak tawh si a .
Dam thluam hian " ka nghak thei che ka tih kha ,duh ai in ka lo nawr lutuk che ni in ka hria, ka nupui i nih hun ka lo nghah hlelh lutuk na lam ah nangmah lam ka lo ngaihtuah kai lo a ,min hrethiam teh "ka rinloh dan tak a a rawn tih chhuah chuan zah pawn dawn zo lo in ka kuah vang vang , ka lak a a dawhtheih zia ka hre thar leh a , a ni ang mipa tha lutuk ka lo tawng hi ka lawm tak zet.
Min kuah let ve vang vang hnu in , min nem hla hret a,ngaihnat awm em em a min nuih in " tah awiloh "ti nghut in ka mittui luang tur chu a rawn tuai hul zung zung ,hmeichhe tahbelh lo tak ka ni ve a sin le, mahse a kiang ah hi chuan ka rilru a no leh tlat thin.
" I tah hliam hliam chuan i chhungte mu an rawn tho a nga , ka hau che emaw an ti mai a nga sin "ka mit sir te ah chuan rawn fawp zeuh in a rawn ti lum hak ,
" Ka hmangaih em che a lawm "ti tiau in ka thlamuan pui thin leh ka hahdam thin na ngei mai a awm lum nuam tak ah chuan ka bei than , duat tak in ka hnung chu a lo chul ve hliau hliau bawk .
Kan in hmangaih na hian tawp chin nei tawh lo in , kumkhua in nung reng tawh se ,he khawvel a ka hmangaih mipa ni tur a a lo piang hi a siamtu Pathian chung ah lawmthu awm mawlh teh se .
Thiani te in lam ah nitin deuh thaw kan kal hi a ni mai a ,an inneih a hnai tawh a , inbuatsaih na pawh a kal chho ta mup mup ,monu thian a kei nge Hmingi a hman zawk dawn tih ah kei ni thian thum chu kan buai a .
Hmingi hmang zawk tur a kan tih ve lah hian Hmingi lah chuan a lo hnial ve tung zel a,
" Matei hi hmang zawk rawh , kei chu ka zam dawn lutuk , kum tam ve viau tawh mahse tiang lam hi chu ka thisen in a ngam lo"ti in tan a khawh tlat ,tih theih awm hek lo mo nu thian ah chuan keimah ka tang dawn ta nge nge .
A pasal tur te Chanmari veng ni in , Chanmari presbyterian biak in ah dan khat na in an in nei dawn a , Zikpuii pazawn te in ah aizawl kan chhuk thlak chuan innghat in ,an chhungkhat hnai leh thenrual tha zual ten inneih chhimpui tur in kan zui thla hlawm bawk a ,keini thianho phei chu kan kal kim vek ,
Sawi hmaih thei miah lo Chhana te pawh naute mipa an nei thar tawh a, buai chung chung in inneih hmang tur in aizawl lam ah a rawn chhuk ve tho .
"I va hmeltha ve " ka hma a Rinsawmpuia ding chu ka en a , a ni pawh a chhe lo tak zet, coat sen duk dak hlarh in bel in , smart shoe dum tle tha zet a bun a ,amah a sang bawk nen hmuhnawm tham tak a ni .
"Nang pawh " ka ti sep chu rawn kun hniam in ka hmui ah a fawp zeuh "mo nu ai pawn i nalh aw, mipa dang in nalh an tih ve che ka rem ti hauh dawn lo a nia ,ka bialnu ka Duhnoi i nih hi " a rawn tih leh chuan
"Zikpuiin i thusawi hria se, a ngei ngawt ang che "ka ti a , rawn hre tak tak se Rinsawma a tim hrep duh hrim hrim.
Hnar tum dat in " dawt ka sawi hlei nem "a tih hmak chuan ka nuih ta ringawt ,mo kawr leh ka kawr hak hi kan hawh a,Zikpuii ni fanu in kan hmai min chei sak thlap bawk, inchei teh chiam ngai lo tih tak ah,duhtawk leh nalh tur ang ber a min han chei chiah chu ,mahni leh mahni pawh kan inhai mai dawn a lawm.
Kan thlenna in hi a lian lutuk lo nen , inneih inkhawm a kal tur an han inchei sap sap chu a beng chhen mai bak ah , an vei suau suau nen hmuhnawm tham a ni.
" Awi ,ka zam e , thulh leh mai a nia ka duh"Thiani chuan a ti hak , a hmel zawng zawng ah a zam zia chu a lang vek, lehkha in a in zap leh hluai thin a,a khawngaihthlak lek lek .Hmingi lah chuan a zam lutuk chu a lo nuih san leh vur vur thin .
Inneih inkhawm kan hman zawh atang ka bodyguard ang mai in Rinsawman min veng run a ,mopa thianpa U Dinan min biak leh zeuh thin chang pawn ,a lo inrawlh vat zel chu atthlak ti lutuk in ka nuih leh heu thin,a bialnu hi eng ka nih loh tehlul nen a thikthu chu pe chhe ve tak a ni.
Ka beng bul ah min rawn hrilh ru in "inneih ve ka chak tawh " a rawn ti sup ,a hmel ka en chu a lai ve deuh nge ,hnuai lam hawi in a lo khi suk suk a,a kut ah ka sih chuan rawn hawi chho vut in a phun ta hluk .
"Sawi awm leh awm loh hi hre rawh "
Ngai pawimawh lo fe in "a dawt chu kei leh nang kan nih ve tawh ngei ka ring " a mit vun chuar lang kalh in a nui zui a .
Lungawi hmel fe hian min melh zui vang vang ,a mitmeng a min duhna leh hmangaih na lang chuak zut zut tluk a thil hmuh nuam hi a awm lo ang.
After party hran an buatsaih lem lo a, mo neitu leh mo ta lam in a tul an tih hran loh vang a ni ,ti hian lungrual tak in hman loh an rel thlu ta kha nia.
Kan khua kan haw hma ni ah Rinsawma nen kan chhuak dun a , inneih zawh lam ah keipawh ka ni te in lam ah ka awm leh ren rawn a, Hmingi te leh midang ho chu khaw lam ah an let leh tawh thung
"Ka putea te nupa in chaw ei ah sawm rawh an ti che a , an hmu ve chak che a niang"
"A zahthlak awm e mai , zanriah ei lo in ka lo kal zawk ang " ka ti a , min hnial lo se ka duh zia chu ,Tha te te chuan"a pawi lo, nakin atan khek mai ang "nui pat pat in a ti a , lai deuh in ka ner khum ta nang .
A hma a thi min pek ang chiah kha min lei sak leh a , phelh lo tur leh paih bo mai mai tawh lo tur in min chah ngun viau , a hma mi pawh kha duh vang reng a paih bo ka ni der si lo , kha thi ka hnuh apiang khan ani nen a kan hun hman dun tawh te ka hre chhuak leh thin si a , theihnghilh a hma lam pan ka duh lutuk tih ngaih na hre si lo in , hmalam pan tur a ka tih hmasak ber ngai a ka hriat vang a paih bo ta kha ka nia, sawi lan leh hnuhnawh erawh a tul in ka hre lem lo.
" I rilru a awm ka hria , ka thiamloh ka tih tawh kha ,demna che pawh ka nei lo"ti nghut in ka kut ah rawn kai a , bazar tawt lutuk mihring phe nuai nuai lak atang chuan min kal sawn pui in , dawr ah kan inhnawh puar leh te te hnu ah a pu te in lam chu kan pan ta a .
Scooty a rawn ken avang in ,bus tawt lutuk a inhnawh kual vel a ngai lo a ,a hahdamthlak.
Kan thlen chuan min lo be nghal bawrh bawrh hlawm , an monu chei tak a min lo chei nghal chu keimah zawk ka awmthiam lo lek lek thin , a cousin te ho pawh an lo awm a, kan inrual tlang hmel viau hlawm ,an chhungkhat kual ho hrim hrim hi an hmeltha in an hleitling hlawm thaw khat viau a nih dawn hi ka ti ta.A chhan pawh an hmel leh pian a vantlang pawl tih tur chi vek an ni .
A pa lam atanga an laina hnai ho pawh kan khua ang ah chuan a langsar pawl an ni nawk hlawm a, mahse thingtlang a awm zawk tih tak ah a nu lam a a unau te ho erawh an tluk lo hlawm deuh in ka hria
"Awi, Mampuia hian a phu lo che ,i hmel a tha reuh in i hleitling si " a putea nupui chuan a lo ti hlut , hmai chhan a min fak hian awmdan tur leh sawi tur hre lo thin tih tak ah "a awi awmloh e ,Rinsawma te chu a hmelthat em hi , ka phu lo zawk " kan ti ngawt a, ka bul a thu pa chu a rawn nui huk , chutiang bawk in a pitei pawh , ka thusawi kan ngaihtuah let leh chu ka zak tak tak , keimah leh keimah ka inpuan tak der chu a.
La nui sang chung hian"nih leh inhmeltha ve ve , "a pitei chuan a rawn ti a ,ka lo then ve tha mai
Ka bengbul te ah" Hmeltha min lo ti fal bik thin awm hi ka tia"ti a a lo phun sup chuan , a kut chu ka hmer vak , nghal lutuk mai ,
"Ka pu te in ah ka hruai lo ang che tih ka hlau" zawi dup a ti in, a nghal a rawn la chhuah zel ,
A awm ah nem dat in "kal teh ,i chhia " ka tih hlak chuan a nui huk huk a,a pite in thingpui min rawn pek tak ah chuan la nui ruh ruh chung in min chhaih zawm ta lo .
Dar 4 dawn ah min thlah a , a pu pawh min hmuh tir a , tar chak lo a ni tawh a,a pindan ah a tawm deuh chawt tawh ti in a sawi kha nia , a kum upat tawh ang ai in ka la hmu tha viau thung .A ri hriatna pawh a la tha in han biak vel pawh a la nuam khawp mai.
Min thlah zawk a , let leh mai a tum kha a nia , mahse ka ni in a lo be tang leh rih , rinai in zawh tur a hre zek lehnghal a, Rinsawma lah in tha deuh in a lo chhang ve zel nen an inkawm dun thei phian , thingpui a in leh te te hnu ah a haw ve thei dawn ta chauh .
A scooty hun na bul thleng ka zui chhuak ve leh a"i ni kha ka ngainat chi tak "ti in helmet a khum pah mawlh mawlh ,
" A ni pawn a ngaina che tih ka hre nghal , "ti let in ka nuih a " a chelh rei ta phian che sia , a zia lo tak tak ,i hmanhmawh nen "ka ti leh thuai , a unau te nen khan khawi emaw a chhuah an tum ni in ka hria, min thlah dawn pawh khan let leh thuai tur in an chah hlawm sap sap kha nia.
" A pawi lo , ti khan makpa interview ka nei nghal a ni zel mai "uang zet a ti in scooty ah chuan a thu a ,
" Over vel siah "ti a hmui ka tihsawih khum vak chu atthlak tih hmel lutuk a min melh in, " i kum zat hrechiang viau lo ila chu, he tleirawl phawng phawng chu ka ti ngei ang che "a ti chu lei ka chhuah khum leh zeuh, lu thing nghut in " ka kal dawn , ka thlen hun ah ka lo bia ang che ,"ti in a tlan chhuak zui a , a lan theih chhung chu ka thlir char char
A sawi ang tak tak khan ,tleirawl hlim ,dawn nei lem lo ang a tawng leh phawng phawng thin hi ka hrat leh zeuh thin , fanu innghahna tlak tak leh puitling tak a awm hi ka duh leh ka nih tum ber a ni a , kan thenawm hnai vai leh ka nu thiante ho pawn ka nu bulah "Matei hi chu a puitling ngawt mai , i tan pawn innghahna tlak tak a ni a,kum naupang te a nih atang in a chawm thei nghal che u a ni a, fanu i nei tha tak zet" an tih ka hre leh thin , ka nihna ni fai vek lo mahse ka lo lawm ve em em thin .
Mahse ,Rinsawma bul a ka mizia erawh a letling thawk thung ,a lak ah ka pangchang in ,tawng leh phawng phawng ka hrat bak ah mize thup em em ka nei lo bawk ,inchhung a ka ko rit lutuk leh ngaihtuah tur tam tak hi a kiang a ka awm chuan min chhawk zang khai sak a ,hmeichhia tih tak ah duat tu mamawh ve tho ka lo ni nen a ni bul ah chuan puitling tak a awm pawh ka thei thin lo, chung zawng zawng chu min hriat thiam pui in min dawm thiam em em a,he khawvel ah hian a ni ai a hmeltha zawk, mipa tam tak awm mahse Rinsawnpuia lo hi chu thinlung tak a thlan tur ka neih ka ring chuang lo .
Inchhug a ka luh rual in ka ni hnen atang zawhna ka dawng hnem mawlh mawlh khawp mai , zep ngai a ka hriat lo avang in engkim ka hrilh ve vek a .
"Hman a ka hmuh khan innghahna tlak tak mipa a nih ka ring nghal a ,tun ah kan hmu leh a ,,pasal tlak tak tur leh mi fel tak a ni in ka hria , hna tha tak a nei bawk nen , i tihsual ka ringlo " ti a ka ni in a sawi chuan thinlung tak in ka hlim veng veng thei .
Chhung te lam atang a ka bialpa min duh pui lo thu hriat tur a awm lo ringawt pawh hi vannei ka inti in nihlawh ka in ti khawp mai.
Rinsawma chu tlai lam a min rawn biak a a sawi lawk tawh ang ngei in a reh vang vang , an kal hma in an unau ho a zanriah an ei chhuah tur thu leh phone khawihna hun vak a awmloh tur thu min rawn hrilh lawk hmasa thlap a .
Zan ah ka nu te nen kan inbia a ,dawr bungraw lei ngai tur a an rin an rawn sawi mawlh mawlh , aizawl kal remchan lai chuh in bungraw phur te an lo kal hun nghaklo a, naktuk ka haw rual a lei a, ken chhoh mai ka tum a .
Peki te an exam zawh tawh avang in ka awmloh chhung chu a man a nghak deuh chawt a , dawr nghah vel chu kei ai a ti mi viau zawk bawk .
"Duata awm lo em ni , a va reh ve " ka ti a ,nidang a kan inbiak te hi chuan ring deuh deuh a rawn tawng in, a thil duh zawng rawn sawi a ,hawn sak tur a min lo chah hi a hrat a , ka nu nen an in khak leh hlak hlak thin.
"An thian ho in i Pu Chhunga lui kal an zui ve a ,an rawn la haw lo deuh , nichin a ka biak kha chuan an rawn thlen tep tawh thu in min chhan kha" a ti a , a tawng dan atang reng in Duata chu a ngaihtuah leh viau tawh tih a hriat , vawi eng emaw zat chu biak tum in a phone leh reng dawn tih lah ka hre chiang .
Pu Chhunga a tih chu Duata thianpa ve ber Rinpuia pa ni in, lui kal leh ram vah peih zet mai a ni a ,a ram vak emaw , lui a kal emaw pawh nise a hlawhtling thei em em a ,Duata te thian ho pawh a hnungzui tur in a hruai ve fo tawh a , an rawn hlawhtling haw thei khawp mai
Chawhnu sumo chhuak a haw tur kan ni a , kan haw hma in Zikpuii kan tlawh leh phawt a ,a pasal chhungte an fel a niang ,amah pawn nuam a tih hmel khawp in ka hria, mahse a lunglen thu erawh a sawi lang leh zeuh thin chu awm ka tihpui viau ,a awm rei a nga a zia mai tur ah ngai ang .
"In haw hma in chaw ei ah sawm che u kan tum leh tehreng nen , kan buai a talang in kan lo mangnghilh der a, a zia lo tak tak a ni , tun ah han sawm leh dawn che u in hun a awm tawh si lo, aizawl in rawn zin leh hun atan khek tawh mai ang " Muanchhana chuan a ti luam a, keini pawn aizawl kan zin leh theih veleh a kan ei ngei tur thu kan sawi ve a.
Thiani hian pasal a nei fuh dawn khawp in ka hre ta ,an pa hi a puitling in ,a dam dup reng a , tawng tam lutuk mipa ni lo mahse mipa innghahna tlak tak ni in ka hria a ,a tawng dan lam ah a mi ni emaw a thil tih reng reng ah hian a nghet thlup mai a ni .
###Last kan thleng tep e aw ##
Naktuk zan ka dah dawn nge dawn lo ka la chiang lo ,comment that dan a zir in kan rel dawn nia
